1. ¿Baʼax jach kʼaʼabéet u chʼaʼtuklik tuláakal máak?

 BEJLAʼEʼ tuláakal máakeʼ jach kʼaʼabéet u chʼaʼtuklik wa yaan u apoyartik Jéeoba, le máax yaan u derechoil u gobernartik tuláakal baʼaloʼ, bey xan wa yaan u apoyartik Satanás, u kʼasaʼan enemigo Dios. Lelaʼ deporsi kʼaʼabéet u chʼaʼtuklik máak tumen letiʼe baʼax kun eʼesik wa yaan u pʼáatal kuxtal mantatsʼoʼ (Mat. 25:31-33, 46). Tu kʼiinil le «nojoch muʼyajiloʼ» le máaxoʼob kun chúukpajal u yóol u meyajtoʼob Jéeobaoʼ yaan u marcartaʼaloʼob utiaʼal u salvarkubaʼob (Apo. 7:14; Eze. 9:4, 6). Chéen baʼaleʼ le máaxoʼob kun yantaltiʼob u marca le tsʼíitsʼik baʼalcheʼoʼ yaan u xuʼulsaʼaltiʼob (Apo. 14:9-11).

2. 1) ¿Baʼax ku yaʼaliktoʼon Hebreos 10:35-39 ka k-beete? 2) ¿Bix u yáantkoʼon u libroil Apocalipsis?

² (Xok Hebreos 10:35-39). Wa tsʼoʼok a chʼaʼtuklik a tsʼáaikaba tu tséel u gobierno Jéeobaeʼ jach maʼalob baʼax tsʼoʼok a beetik. Seguro wal jach taak a wáantik u maasil utiaʼal ka u beetoʼob xan leloʼ. Junpʼéel baʼax jeʼel u yáantik máakeʼ letiʼe baʼax ku yaʼalik u libroil Apocalipsisoʼ. Le libroaʼ ku yaʼalik baʼax kun úuchul tiʼ le máaxoʼob ku tsʼáaikubaʼob tu contra Jéeobaoʼ, chéen baʼaleʼ ku yaʼalik xan le bendiciónoʼob ken u kʼam le máaxoʼob ku chúukpajal u yóol u apoyartoʼob u gobierno Diosoʼ. Jach maʼalob ka k-xakʼalt le baʼax ku kaʼansik u libroil Apocalipsisoʼ tumen jeʼel u yáantkoʼon utiaʼal k-chʼaʼtuklik k-meyajtik Jéeoba utiaʼal mantatsʼeʼ. Tsʼoʼoleʼ le baʼax ken k-kanoʼ jeʼel u meyajtoʼon xan utiaʼal k-áantik u maasil u chʼaʼtukloʼob u meyajtikoʼob Dios utiaʼal mantatsʼeʼ.

3. ¿Baʼax kʼáatchiʼiloʼob kun núukbil teʼ xookaʼ?

³ Teʼ xookaʼ yaan u núukaʼal le kaʼapʼéel kʼáatchiʼobaʼ: ¿Baʼax kun úuchul tiʼ le máaxoʼob apoyartik u gobierno Diosoʼ? yéetel ¿baʼax kun úuchul tiʼ le máaxoʼob apoyartik le chak tsʼíitsʼik baʼalcheʼ ku yaʼalik Apocalipsisoʼ?

4. ¿Máaxoʼob le ilaʼaboʼob tumen apóstol Juan tiaʼanoʼob yéetel Jesús teʼ kaʼanoʼ?

⁴ Le apóstol Juanoʼ tu yilaj kaʼajaats máakoʼob ku apoyarkoʼob u gobierno Jéeoba yéetel ku kʼamkoʼob tuláakal le bendiciónoʼob ku taasik le kuxtal minaʼan u xuuloʼ. Le yáax jaatsoʼ 144,000 u túulaloʼob (Apo. 7:4). Letiʼobeʼ way Luʼum yanoʼob kaʼacheʼ chéen baʼaleʼ binoʼob teʼ kaʼan utiaʼal u múul gobernaroʼob yéetel Jesúsoʼ. Tuláakloʼob túuneʼ ku gobernaroʼob yóokʼol le Luʼumaʼ (Apo. 5:9, 10; 14:3, 4). Tsʼoʼoleʼ Juaneʼ ku yilkeʼ múul waʼalakbaloʼob yéetel Jesús teʼ Montaña Sión yaan teʼ kaʼanoʼ (Apo. 14:1).

5. Jach maʼ kun xáantaleʼ, ¿baʼax kun úuchul tiʼ le sukuʼunoʼob yéeyaʼanoʼob pʼaatloʼob way Luʼumeʼ?

⁵ Desde tu kʼiiniloʼob le apóstoloʼob tak teʼ kʼiinoʼob kuxlikoʼonaʼ tsʼoʼok u yéeyaʼal u milesil máakoʼob utiaʼal u táakpajloʼob ichil le 144,000 (Luc. 12:32; Rom. 8:17). Chéen baʼaleʼ tiʼ Juaneʼ aʼalaʼabeʼ tu tsʼook kʼiinoʼobeʼ chéen u chan jaats tiʼ le 144,000 kun pʼáatloʼob kuxtal way Luʼumeʼ. Táanil tiʼ u káajal le nojoch muʼyajiloʼ u yalab le sukuʼunoʼob yéeyaʼanoʼoboʼ yaan u tsʼok tsʼaʼabaltiʼob le «sello» eʼesik kʼamaʼanoʼob tumen Jéeobaoʼ (Apo. 7:2, 3; 12:17). Le kéen tsʼoʼokkeʼ le táan le nojoch muʼyajiloʼ le u yalab le sukuʼunoʼob yéeyaʼanoʼoboʼ yaan u bisaʼaloʼob teʼ kaʼan utiaʼal u muchʼkubaʼob yéetel le u maasil le 144,000 kíimoʼob chúukaʼan u yóoloʼoboʼ. Letiʼob yéetel Jesúseʼ yaan u gobernaroʼob tu Reino Dios (Mat. 24:31; Apo. 5:9, 10).

6, 7. 1) ¿Máakalmáak le uláakʼ jaats máakoʼob ilaʼaboʼob tumen Juanoʼ, yéetel baʼax k-ojel tu yoʼolaloʼob? 2) ¿Baʼaxten u yalab le sukuʼunoʼob yéeyaʼanoʼob yéetel le «yaʼabkach máakoʼoboʼ» jach unaj u beetkoʼob u cuentail le baʼax ku yaʼalik Apocalipsis capítulo 7?

⁶ Le ka tsʼoʼokeʼ apóstol Juaneʼ tu yilaj «yaʼabkach máakoʼob», le máakoʼob jeʼelaʼ maʼ tu páajtal u xoʼokol jaytúuloʼob (Apo. 7:9, 10). ¿Baʼax k-ojel tu yoʼolaloʼob? Tiʼ Juaneʼ aʼalaʼabi: «Le jeʼeloʼobaʼ letiʼe máaxoʼob ku jóokʼloʼob tiʼ le nojoch muʼyajiloʼ, tsʼoʼok u pʼoʼik u chowak nookʼoʼob yéetel tsʼoʼok u sakkúuntikoʼob yéetel u kʼiʼikʼel le Tamanoʼ» (Apo. 7:14). Le kéen tsʼoʼokok u salvarkubaʼob tiʼ le nojoch muʼyajiloʼ le «yaʼabkach máakoʼoboʼ» yaan u pʼáatloʼob kuxtal way Luʼumeʼ yéetel yaan u kʼamkoʼob yaʼab bendiciónoʼob (Sal. 37:9-11, 27-29; Pro. 2:21, 22; Apo. 7:16, 17).

⁷ Kex yéeyaʼanoʼon utiaʼal k-bin kaʼan wa utiaʼal k-pʼáatal way Luʼumeʼ tuláakloʼon unaj k-creerkeʼ yaan k-ilik u béeytal le baʼax ku yaʼalik Apocalipsis capítulo 7. Teʼ kʼiinoʼoboʼ jach yaan u kiʼimaktal u yóol tuláakal le máaxoʼob meyajtik Diosoʼ, le kun binoʼob teʼ kaʼanoʼ bey xan le kun pʼáatloʼob way Luʼumeʼ. Jach yaan u kiʼimaktal k-óol úuchik k-chʼaʼtuklik k-apoyartik u gobierno Jéeoba. ¿Baʼax uláakʼ ku yaʼalik Apocalipsis yoʼolal le nojoch muʼyajiloʼ? (Mat. 24:21).

8. ¿Bix kun káajal le nojoch muʼyajiloʼ, yéetel baʼax ken u beet u maas yaʼabil le máakoʼoboʼ?

⁸ Jeʼex t-ilil teʼ xook máanikoʼ maʼ kun xáantaleʼ le políticoʼob yaan tiʼ tuláakal yóokʼol kaaboʼ yaan u atacarkoʼob le Nojoch Babilonia, wa tuláakal le religiónoʼob maʼatech u kaʼanskoʼob u jaajiloʼ (Apo. 17:16, 17). Bey kun káajal le nojoch muʼyajiloʼ. ¿Yaʼab wa túun máakoʼob kun káajal u adorarkoʼob Jéeoba? Maʼatech, baʼaxeʼ yaanal baʼax ken u beetoʼob. Apocalipsis capítulo 6, ku yaʼalikeʼ le máaxoʼob maʼatech u meyajtikoʼob Jéeobaoʼ yaan u kʼubik u yóoloʼob tiʼ le política yéetel tiʼ le ayikʼalil yaan teʼ yóokʼol kaabaʼ. Le Bibliaoʼ ku yaʼalikeʼ le baʼaloʼobaʼ beyoʼob montañaʼobeʼ. Le máakoʼobaʼ maʼ ken u tsʼáaubaʼob yáanal u Reino Dios, le oʼolaleʼ yaan u pʼáatloʼob u enemigoʼob Jéeoba (Luc. 11:23; Apo. 6:15-17).

9. Tu kʼiinil le nojoch muʼyajiloʼ, ¿baʼaxten yaan u yilaʼaleʼ le máaxoʼob meyajtik Diosoʼ maʼ beyoʼob jeʼex u maasil máakoʼobeʼ, yéetel baʼax ken u beet le máakoʼoboʼ?

 ⁹ Tu kʼiinil le nojoch muʼyajiloʼ yaan u yilaʼaleʼ le máaxoʼob meyajtik Jéeobaoʼ maʼ beyoʼob jeʼex u maasil máakoʼobeʼ, chéen letiʼob kun seguer u meyajtikoʼob Jéeoba way Luʼumeʼ yéetel chéen letiʼob maʼ ken u apoyartoʼob le «tsʼíitsʼik baʼalcheʼoʼ» (Apo. 13:14-17). Le máaxoʼob ku tsʼáaikubaʼob tu contra Jéeobaoʼ le kéen u yiloʼob bix chúukaʼanil u yóoloʼobeʼ jach yaan u pʼuʼujuloʼob. Le oʼolaleʼ junmúuchʼ kaajoʼobeʼ yaan u atacarkoʼob u kaajal Dios tiʼ tuláakal yóokʼol kaab. Letiʼe kʼiin ken atacarnak Gog tiʼ Magog ku yaʼalik le Bibliaoʼ (Eze. 38:14-16).

10. Jeʼex u yaʼalik Apocalipsis 19:19-21, ¿baʼax ken u beet Jéeoba kéen atacartaʼak u kaajal?

¹⁰ ¿Baʼax ken u beet Jéeoba kéen atacartaʼak u kaajal? Letiʼeʼ ku yaʼalik: «Teneʼ yaan in sen pʼuʼujul» (Eze. 38:18, 21-23). Apocalipsis capítulo 19, ku yaʼalikeʼ Jéeobaeʼ yaan u túuxtik u Hijo utiaʼal u defendertik u kaajal yéetel utiaʼal u xuʼulsik tiʼ u enemigoʼob. Teʼ kʼiin jeʼeloʼ Jesúseʼ yaan u láakʼintaʼal tumen «u soldadoiloʼob kaʼan», leloʼ u kʼáat u yaʼaleʼ yaan u láakʼintaʼal tumen le ángeloʼoboʼ bey xan tumen le 144,000 (Apo. 17:14; 19:11-15). ¿Bix kun tsʼoʼokol le baʼatelaʼ? Yaan u xuʼulsaʼal tiʼ tuláakal le kʼasaʼan máakoʼoboʼ bey xan tiʼ jeʼel baʼaxak u tsʼaamuba tu contra Jéeobaeʼ (xok Apocalipsis 19:19-21).

11. ¿Baʼax le jach táan u páaʼtaʼal tsʼíibtaʼan tu libroil Apocalipsisoʼ?

¹¹ ¿Bix ken u yuʼubiluba le máaxoʼob kun pʼáatloʼob kajtal way Luʼum kéen xuʼulsaʼak tiʼ u enemigoʼob Diosoʼ? Letiʼobeʼ jach yaan u kiʼimaktal u yóoloʼob. Kex le máaxoʼob yanoʼob teʼ kaʼan yaan u yawatoʼob yéetel kiʼimak óolal kéen xuʼulsaʼak tiʼ le Nojoch Babiloniaoʼ yaan junpʼéel baʼal kun beetik u maas kiʼimaktal u yóoloʼob (Apo. 19:1-3). ¿Baʼaxiʼ? Letiʼe «u tsʼoʼokol u beel le Tamanoʼ», lelaʼ letiʼe baʼax maas jach táan u páaʼtaʼal tsʼíibtaʼan tu libroil Apocalipsisoʼ (Apo. 19:6-9).

12. ¿Baʼax kʼiin ken tsʼoʼokok u beel le Tamanoʼ? (Apocalipsis 21:1, 2).

¹² ¿Baʼax kʼiin ken tsʼoʼokok u beel le Tamanoʼ? Kex táanil tiʼ u káajal Armagedón tsʼokaʼaniliʼ u bin teʼ kaʼan tuláakal le 144,000, leloʼ maʼ u kʼiinil u tsʼoʼokol u beel le Tamanoʼ (xok Apocalipsis 21:1, 2). Le Tamanoʼ yaan u tsʼoʼokol u beel le kéen tsʼoʼokok Armagedón, le tsʼokaʼaniliʼ u xuʼulsaʼal tiʼ tuláakal u enemigoʼob Diosoʼ (Sal. 45:3, 4, 13-17).

13. ¿Baʼax kun úuchul kéen tsʼoʼokok u beel le Tamanoʼ?

¹³ ¿Baʼax kun úuchul kéen tsʼoʼokok u beel le Tamanoʼ? U suukileʼ junpʼéel tsʼoʼokol beeleʼ ku nupik juntúul xiib yéetel juntúul koʼolel. Bey túun xanoʼ le kéen tsʼoʼokok u beel le Tamanoʼ ku nuʼupul rey Jesucristo yéetel u ‹novia›, le 144,000. Le jatsʼuts kʼiinbesajaʼ yaan u yeʼesikeʼ tsʼoʼok u káajal u múul gobernartaʼal le Luʼum tumen Jesús yéetel le 144,000 ichil 1,000 añosoʼ (Apo. 20:6).

14, 15. ¿Yéetel baʼax ku keʼetel le 144,000 teʼ Apocalipsis capítulo 21? (Ilawil le dibujo yaan tu yáax páginail le revistaaʼ).

¹⁴ Le kéen tsʼoʼokkeʼ Apocalipsis capítulo 21, ku ketik le 144,000 yéetel junpʼéel kiʼichkelem kaaj ku kʼaabaʼtik «le Túumben Jerusalénoʼ» (Apo. 21:2, 9). Le kaajaʼ etsʼekbal tu «yóokʼol 12 tuunichoʼob» tuʼux tsʼíibtaʼan «le 12 kʼaabaʼob yaan tiʼ u 12 apóstoloʼob le Tamanoʼ». Apóstol Juaneʼ jach kiʼimakchaj wal u yóoleʼ. ¿Baʼaxten? Tumen tu yileʼ u kʼaabaʼeʼ tsʼíibtaʼan tiʼ junpʼéel tiʼ le tuunichoʼobaʼ. ¡Leloʼ junpʼéel nojoch privilegio! (Apo. 21:10-14; Efe. 2:20).

¹⁵ Le kaajoʼ maʼ chíikaʼan tiʼ mix junpʼéel kaaj  yaan way Luʼumeʼ. U noj bejileʼ beetaʼan yéetel tsʼúuk oro, le 12 joonajoʼob yaantiʼoʼ 12 perlaʼob. U baʼpakʼil yéetel u cimientoiloʼobeʼ beetaʼan yéetel jejeláas jatsʼuts tuunichoʼob. Tsʼoʼoleʼ u chowakil, u kóochil yéetel u kaʼanlileʼ junpʼéeliliʼ medida yaantiʼob (Apo. 21:15-21). Chéen baʼaleʼ Juaneʼ tu tsʼáaj cuenta yaan baʼax ku bineltik. ¿Baʼax ta tʼaaniʼ? Letiʼeʼ ku yaʼalik: «Ichil le kaajoʼ maʼ tin wilaj mix junpʼéel temploiʼ, tumen Jéeoba Dios le máax jach táaj yaan u poderoʼ bey xan le Tamanoʼ, letiʼob u temploil le kaajoʼ. Le kaajoʼ maʼ kʼaʼabéet u sáasilkuntaʼal tumen le Kʼiinoʼ mix tumen le Lunaoʼ tumen u kiʼichkelem sáasil Dios sáasilkuntik, yéetel u lámparaeʼ letiʼe Tamanoʼ» (Apo. 21:22, 23). Le máaxoʼob yanoʼob teʼ Túumben Jerusalénoʼ yaan u béeytal u yantaloʼob tu táan Jéeoba (Heb. 7:27; Apo. 22:3, 4). Le oʼolal le Bibliaoʼ ku yaʼalikeʼ Jéeoba yéetel Jesúseʼ letiʼob u temploil le kaajoʼ.

16. ¿Baʼax bendicióniloʼob ken u disfrutart tuláakal máak ichil le Mil Años kun gobernar u Reino Diosoʼ?

¹⁶ Le sukuʼunoʼob yéeyaʼanoʼoboʼ jach ku kiʼimaktal u yóoloʼob kéen joʼopʼok u tuukuloʼob tiʼ le kaajaʼ. Chéen baʼaleʼ maʼ chéen letiʼob unaj u jach kiʼimaktal u yóoloʼobiʼ baʼaxeʼ tak le máaxoʼob táan u páaʼtkoʼob u kuxtaloʼob way Luʼumeʼ. ¿Baʼaxten? Tumen ichil le Mil Años kun gobernar u Reino Diosoʼ le Túumben Jerusalénoʼ yaan u beetik u yantal yaʼab bendiciónoʼob way Luʼumeʼ. Juaneʼ tu yileʼ le bendiciónoʼobaʼ beyoʼob junpʼéel ‹u ríoil kuxtaleʼ›, tu kaʼatséelil le ríoaʼ «yaan u cheʼiloʼob kuxtal» yéetel u leʼ le cheʼobaʼ «ku meyaj utiaʼal u tsʼaʼakal u kajnáaliloʼob le luʼumoʼoboʼ» (Apo. 22:1, 2). Tuláakal le máakoʼob kun kuxtaloʼob teʼ kʼiinoʼoboʼ yaan u disfrutarkoʼob le bendiciónoʼob ku taaloʼob tiʼ Diosoʼ. Jujunpʼíitileʼ yaan u pʼáatal perfectoil le máaxoʼob ku yuʼubikoʼob tʼaanoʼ. Maʼ kun kaʼa antal kʼojaʼaniloʼob mix muʼyajil yéetel mix máak kun kaʼa okʼol tumen yaachajaʼan u yóol (Apo. 21:3-5).

17. ¿Jach máaxoʼob kun disfrutartik le bendiciónoʼob kun antal kéen gobernarnak u Reino Dios ichil Mil Añosoʼ? (Apocalipsis 20:11-13).

¹⁷ ¿Jach máaxoʼob kun disfrutartik le bendiciónoʼob kun taal tiʼ Jéeobaoʼ? Yáaxeʼ letiʼe yaʼabkach máakoʼob ken u salvartubaʼob teʼ Armagedónoʼ bey xan le paalaloʼob kun síijloʼob teʼ túumben luʼumoʼ. Chéen baʼaleʼ maʼ chéen letiʼobiʼ tumen Apocalipsis capítulo 20, ku yaʼalikeʼ yaan u kaʼa kuxkíintaʼal le kimenoʼoboʼ (xok Apocalipsis 20:11-13). ¿Máaxoʼob túun le kun kaʼa kuxkíintbiloʼob utiaʼal u kuxtaloʼob way Luʼumeʼ? Le Bibliaoʼ ku yaʼalikeʼ «le utsoʼoboʼ»,  lelaʼ letiʼe máaxoʼob chúukpaj u yóoloʼob u meyajtoʼob Jéeoba tak ka kíimoʼoboʼ, ku yaʼalik xaneʼ yaan u kaʼa kuxkíintaʼal «le kʼasaʼanoʼoboʼ», lelaʼ letiʼe máaxoʼob maʼ yanchaj u oportunidadil tiʼob u kʼaj óoltikoʼob Jéeobaoʼ (Hech. 24:15; Juan 5:28, 29). ¿U kʼáat wa túun u yaʼaleʼ ichil le Mil Años kun gobernar u Reino Diosoʼ yaan u líiʼsaʼal tuláakal le kimenoʼob utiaʼal u kuxtaloʼob way Luʼumeʼ? Maʼatech. Le máaxoʼob yanchajtiʼob u oportunidadil u meyajtikoʼob Jéeoba chéen baʼaleʼ maʼ tu yóotoʼoboʼ, maʼ tun kaʼa kuxkíintbiloʼob. Letiʼobeʼ tsʼoʼok u yeʼeskoʼob maʼ u kʼáatoʼob kuxtal teʼ Paraísooʼ (Mat. 25:46; 2 Tes. 1:9; Apo. 17:8; 20:15).

18. ¿Bix kun pʼáatal tuláakal máak kéen tsʼoʼokok le 1,000 añosoʼ?

¹⁸ Kéen tsʼoʼokok le 1,000 añosoʼ tuláakal le máaxoʼob kuxaʼanoʼob way Luʼumeʼ yaan u pʼáatloʼob perfectoʼob. Mix máak kun muʼyaj yoʼolal le kʼeban tu máansaj Adán tiʼ u paalaloʼ (Rom. 5:12). Jeʼel u páajtal u yaʼalaʼaleʼ le kéen tsʼoʼokok le 1,000 añosoʼ tuláakal u kajnáaliloʼob le Luʼumaʼ yaan u kuxtaloʼob jach tu jaajil tumen tuláakal máak perfecto (Apo. 20:5).

19. ¿Baʼaxten yaan u kʼaʼabéettal le u tsʼook pruebaoʼ?

¹⁹ K-ojleʼ Jesús, juntúul máak perfectoeʼ, chúukpaj u yóol u meyajt Dios kex jeʼel baʼaxak beetaʼabtiʼ tumen le Kʼaasilbaʼaloʼ. Chéen baʼaleʼ, ¿bey wa xan ken u beetil le máaxoʼob perfectoʼob kéen tsʼaʼabakoʼob a pruebail tumen Satanásoʼ? Cada juntúul tiʼ letiʼobeʼ yaan u yeʼeskoʼob baʼax ken u beetoʼob le kéen tsʼaʼabakoʼob a pruebail tumen Satanás le kéen tsʼoʼokok le 1,000 añosoʼ (Apo. 20:7). Le máaxoʼob kun chúukpajal u yóoloʼoboʼ yaan u kʼamkoʼob le kuxtal minaʼan u xuuloʼ yéetel yaan u disfrutarkoʼob «u kiʼichkelem jáalkʼabtajil u paalal Dios» (Rom. 8:21). Chéen baʼaleʼ le máaxoʼob ken u tsʼáaubaʼob tu contra Jéeobaoʼ yaan u xuʼulsaʼaltiʼob utiaʼal mantatsʼ jeʼex kun xuʼulsbil tiʼ le Kʼaasilbaʼal yéetel u kʼasaʼan ángeloʼoboʼ (Apo. 20:8-10).

20. ¿Bix a wuʼuyikaba beora tsʼoʼok k-xakʼaltik jujunpʼéel tiʼ le profecíaʼob ku yaʼalik Apocalipsisoʼ?

²⁰ ¿Bix a wuʼuyikaba beora tsʼoʼok k-xakʼaltik jujunpʼéel tiʼ le profecíaʼob ku yaʼalik Apocalipsisoʼ? ¿Ku kiʼimaktal wa a wóol a wojéeltik yaan a wilik u béeytal le profecíaʼob ku yaʼalikoʼ? ¿Ku taaktal wa a invitartik uláakʼ máakoʼob utiaʼal ka u adorartoʼob xan Jéeoba? (Apo. 22:17). Jach kiʼimak k-óol tumen tsʼoʼok k-ilik baʼax ku taal u kʼiin yéetel taak k-aʼalik jeʼex tu yaʼalil apóstol Juanaʼ: «¡Ka béeyak! Koʼoten, Yuumtsil Jesús» (Apo. 22:20).