1, 2. Aʼal junpʼéel baʼax oʼolal unaj u interesartoʼon le baʼax ku yaʼalik Apocalipsisoʼ.

 ¿YAAN wa kʼiin tsʼoʼok a kutal a chaʼant le fotoʼob u líiʼsmaj wa máaxoʼ? Maʼ xaaneʼ le táan u bin a chaʼantik le fotoʼoboʼ ka téek jeʼelel tiʼ junpʼéeliʼ. ¿Baʼaxten? Tumen tiaʼanechiʼ. Le oʼolal ku káajal a jach paktik yéetel ka wilik a kʼaʼajsik baʼax kʼiin yéetel tuʼux chʼaʼab le fotooʼ. Tsʼoʼoleʼ ka wilik a kʼaʼajsik máaxoʼob le ku chíikpajloʼoboʼ. Techeʼ jach especial a wilik le foto jeʼeloʼ tumen tiaʼanechiʼ.

² U libroil Apocalipsiseʼ bey jeʼex le foto tsʼoʼok k-aʼalikoʼ. Koʼoneʼex ilik kaʼapʼéel baʼax oʼolal k-aʼalik leloʼ. Yáaxeʼ, tumen tsʼíibtaʼab tiʼ toʼon. Tu káajbal Apocalipsiseʼ ku yaʼalik: «Lelaʼ junpʼéel baʼax tu yeʼesaj Jesucristo jeʼex tsʼaʼabik u yojéelt tumen Dioseʼ. Letiʼeʼ tu tsʼáaj u yojéelt tiʼ le máaxoʼob meyajtik le baʼaxoʼob yaan u yúuchloʼob ichil junpʼíit kʼiinoʼoboʼ» (Apo. 1:1). Jeʼex k-ilkoʼ u libroil Apocalipsiseʼ tsʼíibtaʼan utiaʼal le máaxoʼob meyajtik Diosoʼ, maʼ utiaʼal tuláakal máakiʼ, le oʼolal maʼ jelaʼan k-uʼuyik u yaʼalaʼal táan k-áantaj utiaʼal u béeytal le profecíaʼob ku yaʼalikoʼ. ¡Jeʼel u páajtal k-aʼalikeʼ bey tiaʼanoʼon teʼ fotooʼ tumen yaan baʼax u yil yéetel k-kuxtal!

3, 4. Jeʼex u yaʼalik Apocalipsisoʼ, ¿baʼax kʼiin ken béeychajak le profecíaʼob ku yaʼalikoʼ, yéetel baʼax unaj u péeksikoʼon k-beet leloʼ?

³ U kaʼapʼéel baʼax oʼolaleʼ yaan yil yéetel baʼax kʼiinoʼob ken béeychajak le profecíaʼob ku yaʼalikoʼ. Le apóstol Juanoʼ tʼaanaj tiʼ le kʼiinoʼob ken béeychajak le profecíaʼob le ka tu yaʼalaj: «U espíritu santo Dioseʼ tu bisen tu kʼiinil Yuumtsil»  (Apo. 1:10). Le tʼaanoʼobaʼ tu tsʼíibtaj kex tu añoil 96 tsʼoʼokok u taal Jesús. Teʼ kʼiinoʼob jeʼeloʼ yaʼab u bin kaʼach u kʼuchul u «kʼiinil Yuumtsil» (Mat. 25:14, 19; Luc. 19:12). Le profecíaʼob yaan teʼ Bibliaoʼ ku yeʼesikeʼ u kʼiinil Yuumtsileʼ káaj tu añoil 1914 le ka joʼopʼ u beetik u Reyil Jesús teʼ kaʼanoʼ. Desde teʼ año jeʼeloʼ káaj u béeychajal le profecíaʼob ku yaʼalik Apocalipsis yaan yil yéetel u kaajal Diosoʼ. Jeʼex k-ilkoʼ bejlaʼeʼ kuxaʼanoʼon teʼ kʼiinoʼob ku yaʼalik le Biblia u «kʼiinil Yuumtsil[oʼ]».

⁴ Tumen kuxaʼanoʼon tu kʼiinil Yuumtsileʼ jach unaj k-chʼaʼik en cuenta le baʼax ku yaʼalik Apocalipsis 1:3, ku yaʼalik: «Kiʼimak u yóol le máax ku xokik kʼaʼam u tʼaaniloʼob le profecíaaʼ, bey xan le máaxoʼob ku yuʼubikoʼob yéetel ku tsʼoʼokbeskoʼob le baʼaxoʼob tsʼíibtaʼan ichiloʼ, tumen le kʼiin aʼalaʼanoʼ tsʼoʼok u náatsʼal». Jeʼex k-ilkoʼ unaj k-kʼaʼam xokik «u tʼaaniloʼob le profecíaaʼ», k-uʼuyik baʼax ku yaʼalik yéetel k-tsʼoʼokbesik. ¿Máakalmáak le baʼaloʼob unaj k-tsʼoʼokbeskoʼ?

5. ¿Bix u yeʼesik Apocalipsis unaj k-ilik wa ku kʼamik Jéeoba le adoración k-tsʼáaiktiʼoʼ?

⁵ Desde teʼ yáax capítulo tiʼ Apocalipsisoʼ ku chíikpajleʼ Jesúseʼ u yojel tuláakal baʼax ku beetik le múuchʼuliloʼoboʼ (Apo. 1:12-16, 20; 2:1). Leloʼ bey u yeʼesik le baʼax tu yaʼalaj tiʼ le siete múuchʼuliloʼob yaan kaʼach Asia Menoroʼ. Le baʼax tu yaʼaloʼ jach jeʼel u yáantik kaʼach le cristianoʼob teʼ yáax siglo utiaʼal u yilkoʼob wa ku kʼaʼamal tumen Jéeoba le bix u adoraroʼoboʼ. Tsʼoʼoleʼ yaan kaʼach u yáantik xan le máaxoʼob meyajtik Dios teʼ kʼiinoʼobaʼ. ¿Baʼax ku kaʼansiktoʼon leloʼ? Ku kaʼansiktoʼoneʼ Jesucristoeʼ jach u yojel bix yanil cada juntúul tiʼ toʼon. Letiʼeʼ ku nuʼuktikoʼon yéetel ku kanáantkoʼon. Mix baʼal ku pʼáatal wa maʼ tu yilik. Jesúseʼ u yojel baʼax unaj k-beetik utiaʼal maʼ u xuʼulul u kʼamik Jéeoba le adoración k-tsʼáaiktiʼoʼ. Le oʼolaleʼ koʼoneʼex xakʼaltik jujunpʼéel tiʼ le baʼaxoʼob tu yaʼaloʼ tumen leloʼ unaj xan k-ilik k-beetik teʼ kʼiinoʼobaʼ.

6. 1) Jeʼex u yaʼalik Apocalipsis 2:3, 4, ¿baʼax problemail yaan kaʼach tiʼ le cristianoʼob yanoʼob Éfesooʼ? 2) ¿Baʼax ku kaʼansiktoʼon leloʼ?

⁶ (Xok Apocalipsis 2:3, 4). Maʼ u xuʼulul k-eʼesik le yaabilaj yanchajtoʼon tu káajbaloʼ. Jesúseʼ tu yaʼaleʼ le cristianoʼob yanoʼob kaʼach Éfesooʼ chúukaʼan u yóoloʼob yéetel maʼ xuʼul u meyajtikoʼob Jéeoba kex yaʼab baʼaxoʼob tsʼoʼok u muʼyajtikoʼobiʼ. Chéen baʼaleʼ tsʼoʼok kaʼach u xuʼulul u yeʼeskoʼob le yaabilaj yanchajtiʼob tu káajbaloʼ. Le oʼolaleʼ utiaʼal u seguer u kʼamik Jéeoba le adoración ku tsʼáaikoʼoboʼ unaj kaʼach u yilkoʼob u kaʼa eʼeskoʼob le yaabilaj yanchajtiʼob tu káajbaloʼ. Teʼ kʼiinoʼobaʼ kex maʼalob ka chúukpajak k-óol k-meyajt Jéeobaeʼ jach unaj k-ilik baʼax péeksikoʼon k-beete. Maʼ u tuʼubultoʼoneʼ letiʼeʼ ku yilik baʼaxoʼob k-beetik, chéen baʼaleʼ ku jach ilik xan baʼax péeksikoʼon k-beet junpʼéel baʼal. Jach ku interesar tiʼ Jéeoba baʼax péeksikoʼon k-beet jeʼel baʼaxakeʼ. Ku páaʼtik ka k-adorart tumen k-yaabiltmaj yéetel tumen k-agradecertik baʼaxoʼob ku beetik (Pro. 16:2; Mar. 12:29, 30).

7. 1) Jeʼex u yaʼalik Apocalipsis 3:1-3, ¿baʼax problemail tu yilaj Jesús teʼ múuchʼulil yaan kaʼach Sardisoʼ? 2) ¿Baʼax unaj k-beetiktoʼon?

⁷ (Xok Apocalipsis 3:1-3). Unaj k-ilik maʼ u náayal k-óol. Le cristianoʼob yanoʼob kaʼach tu múuchʼulil Sardisoʼ yaanal problema yaan kaʼach tiʼob. Kex letiʼob jach u tsʼaamaj u yóol u meyajtoʼob kaʼach Jéeobaeʼ tsʼoʼok u pʼáatal maʼ jach bey u beetkoʼobiʼ. Le oʼolal aʼalaʼabtiʼob tumen Jesús unaj u yaajloʼob. Leloʼ ku kaʼansiktoʼoneʼ kex Jéeoba maʼatech u tuʼubsik le baʼaxoʼob k-beetik tu yoʼolaloʼ, maʼ unaj u káajal k-tuklik wa maʼ jach kʼaʼabéet k-tsʼáaik k-óol  k-meyajtiʼ (Heb. 6:10). U jaajileʼ maʼ xaaneʼ maʼ tu páajtal k-meyajtik jeʼex k-beetik kaʼacheʼ, chéen baʼaleʼ láayliʼ unaj k-beetik yaʼab baʼaloʼob yaan yil yéetel ‹u meeyjil Yuumtsileʼ›, tsʼoʼoleʼ unaj k-ilik maʼ u náayal k-óol ka tak pʼáatak bey táan k-wenel teʼ kʼiinoʼob kuxlikoʼonaʼ (1 Cor. 15:58; Mat. 24:13; Mar. 13:33).

8. ¿Baʼax ku kaʼansiktoʼon le baʼax tu yaʼalaj Jesús tiʼ le cristianoʼob yanoʼob kaʼach Laodiceaoʼ? (Apocalipsis 3:15-17).

⁸ (Xok Apocalipsis 3:15-17). Unaj k-meyajtik Jéeoba yéetel tuláakal k-puksiʼikʼal. Jesúseʼ tu yaʼalaj baʼax problemail yaan kaʼach tiʼ le cristianoʼob yanoʼob Laodiceaoʼ. Tu yaʼalajtiʼobeʼ ‹kʼíinaloʼob›, leloʼ u kʼáat u yaʼaleʼ maʼ u tsʼaamaj u yóol u meyajtoʼob Jéeobaiʼ. Le oʼolal aʼalaʼabtiʼob tumen Jesúseʼ mix baʼal u biilaloʼob yéetel yaj yaniloʼob. Jeʼex k-ilkoʼ letiʼobeʼ jach unaj kaʼach u yilkoʼob u kaʼa tsʼáaik u yóol u meyajtoʼob Jéeoba (Apo. 3:19). ¿Baʼax ku kaʼansiktoʼon leloʼ? Wa k-tsʼáaik cuenta maʼ táan k-meyajtik Dios jeʼex kaʼacheʼ unaj k-ilik k-maas agradecertik le baʼaxoʼob ku taal tiʼ Dios yéetel tiʼ u kaajaloʼ tumen leloʼ jeʼel u yáantkoʼon k-tsʼáa k-óol k-meyajteʼ (Apo. 3:18). Le baʼax unaj k-tsʼáaik táanil ichil k-kuxtaloʼ letiʼe k-meyajtik Jéeobaoʼ maʼ letiʼe k-ilik u maas maʼalobtal bix kuxlikoʼonoʼ.

9. Jeʼex úuchik u yaʼalik Jesús tiʼ le múuchʼuliloʼob yanoʼob kaʼach Pérgamo yéetel Tiatiraoʼ, ¿tiʼ baʼax unaj k-kanáantikba?

⁹ Maʼ unaj k-kʼamik le baʼax ku kaʼansik le apóstataʼoboʼ. Jesúseʼ tu kʼeyaj jujuntúul cristianoʼob yanoʼob kaʼach Pérgamo tumen ku beetkoʼob u jatskuba le sukuʼunoʼoboʼ (Apo. 2:14-16). Chéen baʼaleʼ tu felicitartaj le cristianoʼob yanoʼob kaʼach Tiatiraoʼ tumen maʼ tu kʼamoʼob «le kaʼansajoʼob maʼ jaajtak ku taaloʼob tiʼ Satanásoʼ» yéetel tu yaʼalajtiʼob maʼ u pʼatkoʼob le u jaajil kaʼansajoʼ (Apo. 2:24-26). Le cristianoʼob naayal kaʼach u yóoloʼob yéetel tsʼoʼok u tuʼusloʼoboʼ unaj kaʼach u arrepentiroʼob. Teʼ kʼiinoʼobaʼ toʼoneʼ maʼ unaj k-kʼamik xan le kaʼansajoʼob ku binoʼob tu contra le baʼax ku yaʼalik Jéeobaoʼ. Le apóstataʼoboʼ «kex ka u yaʼaloʼob jach u tsʼaamaj u yóoloʼob u adorartoʼob Dioseʼ yéetel u kuxtaloʼobeʼ ku yeʼeskoʼob maʼ beyiʼ» (2 Tim. 3:5). Wa suuk k-xakʼalxoktik le Bibliaoʼ maas chéen chʼaʼabil ken k-ilil máakalmáak le kaʼansajoʼob maʼ jaajtakoʼ (2 Tim. 3:14-17; Jud. 3, 4).

10. ¿Baʼax uláakʼ ku kaʼansiktoʼon le baʼax tu yaʼalaj Jesús tiʼ le múuchʼuliloʼob yaan Pérgamo yéetel Tiatiraoʼ?

¹⁰ Maʼ k-núupkʼebantal yéetel maʼ k-chéen ilik u núupkʼebantal u maasil. Tu múuchʼulil Pérgamo yéetel Tiatiraeʼ yaan kaʼach uláakʼ problema,  le oʼolal tsoʼol u nuʼuktiʼob tumen Jesús. Jujuntúul tiʼ le cristianoʼob yanoʼob kaʼach teʼ múuchʼuliloʼobaʼ ku núupkʼebantaloʼob wa maʼeʼ chéen ku yilkoʼob xan bix u núupkʼebantal u maasil (Apo. 2:14, 20). Lelaʼ ku kaʼansiktoʼoneʼ kex jeʼel jaypʼéel años joʼopʼok k-meyajtik Jéeoba yéetel kex jeʼel baʼaxak privilegioil yaantoʼoneʼ wa k-núupkʼebantaleʼ Jéeobaeʼ maʼ ken u chéen il baʼax k-beetik (1 Sam. 15:22; 1 Ped. 2:16). Jeʼel bukaʼaj ka kʼaschajak le yóokʼol kaabaʼ Jéeobaeʼ ku páaʼtik ka kuxlakoʼon jeʼex u yaʼalik letiʼoʼ (Efe. 6:11-13).

11. ¿Baʼax tsʼoʼok k-kanik tak beoraaʼ? (Ilawil xan le cuadro « Baʼaloʼob maʼ unaj k-tuʼubsikiʼ»).

¹¹ Koʼoneʼex kʼaʼajsik baʼax tsʼoʼok k-kanik tak beoraaʼ. Tsʼoʼok k-kanikeʼ jach kʼaʼanaʼan k-ilik wa ku kʼamik Jéeoba le adoración k-tsʼáaiktiʼoʼ. Wa k-ilik yaan baʼax maʼ maʼalob táan k-beetkeʼ unaj k-utskíintik tu séebaʼanil (Apo. 2:5, 16; 3:3, 16). Beoraaʼ koʼoneʼex ilik uláakʼ baʼax tu yaʼalaj Jesús tiʼ le múuchʼuliloʼoboʼ.

12. ¿Baʼax ku kaʼansiktoʼon le baʼax tu yaʼalaj Jesús tiʼ le múuchʼuliloʼob yaan kaʼach Esmirna yéetel Filadelfiaoʼ? (Apocalipsis 2:10).

¹² Beoraaʼ koʼoneʼex xakʼaltik le baʼax tu yaʼalaj Jesús tiʼ le múuchʼuliloʼob yanoʼob kaʼach Esmirna yéetel Filadelfiaoʼ. Jesúseʼ tu yaʼalajtiʼobeʼ maʼ unaj u sajaktaloʼob tiʼ le baʼaxoʼob ku taal u kʼiinil u muʼyajtikoʼoboʼ, tumen wa ku chúukpajal u yóoloʼobeʼ yaan u bendecirtaʼaloʼob tumen Jéeoba (xok Apocalipsis 2:10; 3:10). ¿Baʼax k-kanik tiʼ le baʼax aʼalaʼabtiʼoboʼ? Ku yeʼesiktoʼoneʼ deporsi yaan u kʼuchul u kʼiinil k-chʼaʼpachtaʼal, chéen baʼaleʼ unaj k-ilik u chúukpajal k-óol (Mat. 24:9, 13; 2 Cor. 12:10). ¿Baʼaxten maʼ unaj u tuʼubultoʼon leloʼ?

13, 14. ¿Bix u afectartik le máaxoʼob meyajtik Dios le baʼax ku yaʼalik Apocalipsis capítulo 12?

¹³ U libroil Apocalipsiseʼ ku yaʼalikeʼ ‹tu kʼiinil Yuumtsileʼ›, wa teʼ kʼiinoʼob kuxlikoʼonaʼ, yaan u chʼaʼpachtaʼal le máaxoʼob meyajtik Diosoʼ. Le capítulo 12, ku yaʼalikeʼ le ka káaj u gobernar u Reino Dioseʼ «yanchaj junpʼéel guerra teʼ kaʼanoʼ». Miguel, wa Rey Jesucristo, yéetel u ángeloʼobeʼ baʼatelnajoʼob tu contra le Kʼaasilbaʼal yéetel u kʼasaʼan ángeloʼoboʼ (Apo. 12:7, 8). ¿Bix túun tsʼoʼokik le baʼateloʼ? Le Kʼaasilbaʼal yéetel u kʼasaʼan ángeloʼoboʼ perdernajoʼobeʼ ka puʼuloʼob way Luʼumeʼ, le oʼolal jach táan u beetkoʼob u muʼyaj tuláakal yóokʼol kaab (Apo. 12:9, 12). Le baʼax úuchoʼ, ¿bix u afectartik le máaxoʼob meyajtik Diosoʼ?

¹⁴ Le kéen tsʼoʼokkeʼ Apocalipsiseʼ ku yaʼalik baʼax ku beetik le Kʼaasilbaʼaloʼ. Letiʼeʼ jach pʼujaʼan tumen maʼ tu páajtal u yokol teʼ kaʼanoʼ, le oʼolal ku atacartik le u yalab le yéeyaʼanoʼob pʼaatloʼob way Luʼumeʼ, le máaxoʼob representartik u Reino Dios way Luʼum yéetel «kʼubéentaʼantiʼob ka tʼaanakoʼob tu yoʼolal Jesúsoʼ» (Apo. 12:17; 2 Cor. 5:20; Efe. 6:19, 20). ¿Bix tsʼoʼok u béeytal le profecíaaʼ?

15. ¿Máaxoʼob le ‹kaʼatúul testigoʼob› ku yaʼalik Apocalipsis capítulo 11, yéetel baʼax úuchtiʼob?

 ¹⁵ Satanáseʼ tu beetaj u atacartaʼal le sukuʼunoʼob yéeyaʼanoʼob nuʼuktik le kʼaʼaytajoʼ. Le sukuʼunoʼobaʼ ku chíikbeskoʼob le ‹kaʼatúul testigoʼob› * kíimsaʼaboʼob ku yaʼalik Apocalipsisoʼ (Apo. 11:3, 7-11). Tu añoil 1918, ocho u túulal tiʼ le sukuʼunoʼob nuʼuktik u kaajal Dios way Luʼumeʼ taʼak u pooloʼobeʼ ka aʼalaʼab yaan u kʼaʼalaloʼob cárcel yaʼab tiempo. Tu táan chéen máakoʼobeʼ jeʼel u tuklaʼal kaʼacheʼ bey kun tsʼoʼokol tiʼ le meyaj ku beetkoʼoboʼ.

16. ¿Baʼax úuch tu añoil 1919, chéen baʼaleʼ baʼax seguernaj u beetik Satanás?

¹⁶ Le profecía ku chíikpajal tiʼ Apocalipsis capítulo 11, ku yaʼalikeʼ le ‹kaʼatúul testigoʼoboʼ› yaan u kaʼa kuxtaloʼob le kéen máanak junpʼíit tiempo. Leloʼ jach bey úuchikoʼ tumen mix junpʼéel año kʼaʼalkoʼobeʼ ka chaʼab u jóokʼloʼob. Tu mesil marzo tiʼ 1919, chaʼab u jóokʼol le sukuʼunoʼob yéeyaʼanoʼob kʼalaʼanoʼoboʼ yéetel ilaʼab maʼ jaaj tuláakal le baʼax ku yaʼalaʼal kaʼach tu contraʼoboʼ. ¿Baʼax túun tu beetoʼob? Tu séebaʼanileʼ káaj u kʼaʼaytikoʼob tu kaʼatéen le Reinooʼ. Chéen baʼaleʼ Satanáseʼ maʼ tu chéen ilaj baʼax ku beetkoʼobiʼ. Letiʼeʼ tu beetaj u taal ‹junpʼéel río› wa chʼaʼpachtajil tu contra tuláakal le máaxoʼob meyajtik Diosoʼ (Apo. 12:15). Le oʼolal bejlaʼeʼ tuláakal le máaxoʼob meyajtik Diosoʼ kʼaʼabéet «u chúukpajal u yóoloʼob muʼyaj yéetel kʼaʼabéet u yantaltiʼob fe» (Apo. 13:10).

17. ¿Bix u yáantaʼal le máaxoʼob meyajtik Dios le táan u sen chʼaʼpachtaʼaloʼob tumen Satanásoʼ?

¹⁷ Le kéen tsʼoʼokkeʼ Apocalipsis capítulo 12, ku yaʼalik bix u yáantaʼal u kaajal Dios. Le «luʼum túunoʼ tu japaj u chiʼeʼ ka tu xúuchaj le río» wa le chʼaʼpachtajiloʼ (Apo. 12:16). Leloʼ jach bey tsʼoʼok u yúuchloʼ tumen yaan kʼiineʼ le máaxoʼob yaan autoridad tiʼob, jeʼex le juezoʼoboʼ, tsʼoʼok u yáantkoʼob u kaajal Dios. Le máaxoʼob meyajtik Jéeobaoʼ yaʼab juicioʼob tsʼoʼok u ganarkoʼob, le oʼolal maas yaantiʼob junpʼíit libertad. Le kéen u yiloʼob ku páajtaleʼ ku beetkoʼob tuláakal le ku béeytal utiaʼal u tsʼoʼokbeskoʼob le meyaj kʼubéentaʼantiʼob tumen Jéeobaoʼ (1 Cor. 16:9). ¿Baʼax táakaʼan ichil le meyaj kʼubéentaʼantiʼoboʼ?

18. ¿Máakalmáak le meyaj maas unaj k-beetik teʼ tu tsʼook kʼiinoʼobaʼ?

¹⁸ Jesúseʼ tu yaʼaleʼ táanil tiʼ u taal le xuʼulsajiloʼ  u discípuloʼobeʼ yaan u kʼaʼaytikoʼob «le baʼaloʼob maʼalobtak ken u beet le Reino» tiʼ tuláakal yóokʼol kaaboʼ (Mat. 24:14). Utiaʼal u beetkoʼob le meyajaʼ táan u yáantaʼaloʼob tumen juntúul ángel wa tumen junmúuchʼ ángeloʼob. Le ángeloʼobaʼ «táan u tsʼáaik[oʼob] ojéeltbil le maʼalob baʼaloʼob ku taal tiʼ Diosoʼ, le jatsʼuts baʼaloʼob minaʼan xuʼulultiʼoboʼ. Lelaʼ táan u tsʼáaik[oʼob] u yojéelt u kajnáaliloʼob luʼum: tiʼ tuláakal luʼumoʼob, tribuʼob, idiomaʼob yéetel kaajoʼob» (Apo. 14:6).

19. ¿Baʼax uláakʼ unaj u kʼaʼaytik le máaxoʼob yaabiltmil Jéeobaoʼ?

¹⁹ Le máaxoʼob meyajtik Diosoʼ maʼ chéen ku kʼaʼaytikoʼob le baʼaloʼob maʼalobtak ken u beet le Reinooʼ, baʼaxeʼ táan u yáantkoʼob xan le ángeloʼob ku chʼaʼchiʼitaʼaloʼob tiʼ Apocalipsis capítulo 8 tak 10. Le ángeloʼoboʼ ku yaʼalikoʼob le yaayaj baʼaloʼob kun taal tu yóokʼol le máaxoʼob maʼ tu kʼamkoʼob u Reino Diosoʼ. Le oʼolaleʼ yaan kʼiineʼ le baʼax ku kʼaʼaytik u testigoʼob Jéeobaoʼ jeʼel u páajtal u keʼetel yéetel u kʼáaxal ‹bat yéetel kʼáakʼeʼ›. Ku yaʼalikoʼob bix ken u xuʼulsil Dios tiʼ tuláakal le baʼaloʼob maʼ maʼalobtak yaan way tu yóokʼol kaab Satanáseʼ (Apo. 8:7, 13). Le máakoʼoboʼ kʼaʼabéet u yojéeltikoʼob taʼaytak u xuʼulsaʼal tiʼ le kʼasaʼan yóokʼol kaabaʼ, tumen beyoʼ wa u kʼáatoʼobeʼ jeʼel u páajtal u kʼexik u kuxtaloʼob utiaʼal u salvarkubaʼob teʼ kʼiin ken u yeʼes u pʼujaʼanil Jéeobaoʼ (Sof. 2:2, 3). Chéen baʼaleʼ utiaʼal k-kʼaʼaytik lelaʼ kʼaʼabéet maʼ saajkoʼoniʼ, tumen u maas yaʼabil le máakoʼoboʼ maʼ uts tu tʼaan u yuʼubikoʼobiʼ. Maʼ u tuʼubultoʼon xaneʼ tu kʼiinil le nojoch muʼyajiloʼ maas directo ken k-aʼal tiʼ le máakoʼob baʼax ku taal u kʼiinil u yúuchultiʼoboʼ (Apo. 16:21).

20. ¿Baʼax ken k-xakʼalt teʼ kaʼapʼéel xookoʼob kun segueroʼ?

²⁰ Jach kʼaʼanaʼan k-beetik le baʼax ku yaʼalik «le profecíaaʼ», tumen toʼoneʼ k-táakpajal utiaʼal u béeytal le baʼax ku yaʼalik Apocalipsisoʼ, jeʼel u páajtal k-aʼalikeʼ bey tiaʼanoʼon teʼ foto t-aʼalaj tu káajbal le xookaʼ (Apo. 1:3). Chéen baʼaleʼ, ¿baʼax jeʼel u yáantkoʼon utiaʼal u chúukpajal k-óol kéen chʼaʼpachtaʼakoʼon yéetel utiaʼal u seguer k-kʼaʼaytik le baʼax kʼubéentaʼantoʼonoʼ? Yaan kaʼapʼéel baʼal jeʼel u yáantkoʼoneʼ. Yáaxeʼ letiʼe baʼax ku yaʼalik Apocalipsis yoʼolal u enemigoʼob Diosoʼ, yéetel u kaʼapʼéeleʼ letiʼe bendiciónoʼob ken k-kʼam wa ku chúukpajal k-óoloʼ. Le kaʼapʼéel baʼaloʼobaʼ yaan k-xakʼaltik teʼ kaʼapʼéel xookoʼob kun segueroʼ.