ÚUCHJEAKILEʼ ichil le meyaj ku beetik le máax tsʼaʼan páajtalil tiʼoʼ letiʼe u nuʼuktik tuláakal le baʼax yaan tiʼ u tsʼuuliloʼ wa le baʼaxoʼob u tiaʼal yaanal máakoʼ.

Le ka palitsiltaʼab José, u paal Jacob, tu luʼumil Egiptoeʼ u tsʼuulileʼ tu tsʼáaj u nuʼukt tuláakal baʼax yaantiʼ. Le Bibliaoʼ ku yaʼalik: «Potifareʼ tu pʼataj tu kʼab José u yotoch yéetel tuláakal baʼax u tiaʼal» (Gén. 39:2-6). Ka máan kʼiineʼ le ka tsʼaʼab páajtalil tiʼ José tu luʼumil Egiptoeʼ, tu yéeyaj xan juntúul máak kanáantik u yotoch (Gén. 44:4).

Tu kʼiinil Jesuseʼ le ayikʼal máakoʼoboʼ maʼatech u pʼáatloʼob tu haciendaʼob, baʼaxeʼ ku binoʼob kajtal teʼ noj kaajoʼoboʼ. Le oʼolal ku kaxtikoʼob máax kun nuʼuktik le meyajoʼob kʼaʼabéet u beetaʼal teʼ haciendaoʼ.

¿Baʼax ku yilaʼal tiʼ juntúul máak utiaʼal u chaʼabal u nuʼuktik u yotoch wa máax? Columela, juntúul máax kuxlaj tu kʼiinil le apostoloʼob suuk u tsʼíibtik baʼaxoʼob uchaʼantakeʼ, tu yaʼaleʼ «le máax kun tsʼaabil nuʼuktajoʼ u kʼaj óol yéetel u yojel bix u beetaʼal le jejeláas meyajoʼob teʼ haciendaoʼ». Tu yaʼalaj xaneʼ le máak kun yéeybiloʼ kʼaʼabéet «u yilik ka beetaʼak maʼalob le meyajoʼ, maʼalob u tratartik le j-meyajoʼoboʼ yéetel ku yeʼesik jatsʼuts modos». Columelaeʼ tu yaʼalaj xan: «Maʼ unaj u tuklik wa u yojel u beet tuláakal baʼaliʼ yéetel mantatsʼ unaj u tsʼáaik u yóol maas kaanbal».

Teʼ Bibliaoʼ suuk u chʼaʼchiʼitaʼal le máax nuʼuktik u yotoch juntúul tsʼuul bey xan le meyajoʼob ku beetkoʼ. Lelaʼ maases ku chʼaʼchiʼitik utiaʼal u ketik jujunpʼéel meyajoʼob ku beetaʼal ichil u kaajal Dios. Jeʼex apóstol Pedroeʼ tu yaʼalaj tiʼ le sukuʼunoʼob ka u meyajtoʼob uláakʼ máakoʼob bey «j-kanan ayikʼalil[oʼob] tiʼ u nojoch utsil Dios[eʼ]» (1 Ped. 4:10, tsolajil).

Jesús xaneʼ le ka tu tsolaj le kettʼaan ku chíikpajal tiʼ Lucas 16:1 tak 8, tʼaanaj tiʼ juntúul máax tsʼaʼan páajtalil tiʼ tumen u tsʼuulil. Le ka tʼaanaj xan tiʼ le profecíaʼob ken u yeʼes taʼaytak u taal bey Reyeʼ, tu yaʼalaj tiʼ u disipuloʼob yaan u yéeyik juntúul «palitsil chúukaʼan u yóol yéetel yaan u naʼat», wa juntúul «j-kanan ayikʼalil chúukaʼan u yóol». Le meyaj ken u beetoʼ letiʼe u tsʼáaik le kaʼansaj ku keʼetel yéetel janal tiʼ le máaxoʼob meyajtik Jéeoba teʼ tu tsʼook kʼiinoʼoboʼ (Mat. 24:45-47; Luc. 12:42). K-tsʼáaik u diosboʼotikil tiʼ le «palitsil» ikil u tsʼáaiktoʼon le publicacionoʼob ku muʼukʼaʼankúuntik k-fejoʼ.