Síijen 1983, tin paalileʼ maʼalob yanil tuláakal hasta ka tu tsʼáajten 10 años. Káaj in wuʼuyik yaj tuláakal in wíinklil. Junpʼéel kʼiin ka aajen le yaanten kex 12 añoseʼ tin wuʼuyaj maʼ tu páajtal in péek. Kex tin wóotaj in péeks in wookoʼobeʼ maʼ béeychajiʼ, pʼáat minaʼan in muukʼ. Desde leloʼ pʼáat maʼ tu páajtal in xíimbal. Le kʼojaʼanilaʼ tu beetaj u xuʼulul in nojochtal, le oʼolal in kaʼanlileʼ pʼáat jeʼex u kaʼanlil juntúul chan paaleʼ.

Yoʼolal le kʼojaʼanilaʼ maʼ tin jóokʼol kaʼach tin wotoch. Junpʼéel kʼiineʼ taal u xíimbaltoʼon kaʼatúul kiikoʼob. U suukileʼ kéen xíimbaltaʼakoʼon tumen wa máaxeʼ kin taʼakikinba, chéen baʼaleʼ le kʼiin jeʼeloʼ pʼáaten in wuʼuy u tsikbal le kiikoʼoboʼ. Le táan u tsikbaloʼob tin wéetel yoʼolal le Paraísooʼ kʼaʼajten le yáanten óoliʼ cinco añosoʼ yaan juntúul misionero suuk u taal tin wotoch. U kʼaabaʼeʼ Jethro yéetel Surinam u taal kaʼachi, letiʼeʼ juntéen cada mes ku taal way kaajeʼ yéetel ku xook kaʼach yéetel in papá. Jach maʼalob in biskinba kaʼach tu yéetel tumen jach uts tin wéetel. Tsʼoʼoleʼ in abueloʼobeʼ yaan kʼiineʼ ku biskenoʼob teʼ muchʼtáambal ku beetik le Testigoʼob teʼ tuʼux kajaʼanoʼonoʼ. Le oʼolal le ka tu yaʼalajten Florence, juntúul tiʼ le kiikoʼob taal u xíimbaltoʼon, wa taak in kanik u maasil yoʼolal le Bibliaoʼ tin waʼalajtiʼ in kʼáat.

Florenceeʼ suunaj u kaʼa xíimbalten yéetel u yíicham Justus utiaʼal u tsʼáaikoʼobten xook yéetel le Bibliaoʼ. Chéen baʼaleʼ tu yiloʼob maʼ in wojel xookiʼ ka joʼopʼ u kaʼansikenoʼob. Ka máan kʼiineʼ tin kane xookoʼ. Junpʼéel kʼiineʼ tu yaʼaloʼobten yaan u túuxtaʼaloʼob kʼaʼaytaj Surinam. Yaachaj in wóol tumen pʼáat mix máak yaan Orealla utiaʼal u tsʼáaikten xook. Chéen baʼaleʼ kiʼimakchaj in wóol le ka tin wilaj maʼ u tuʼubsmen Jéeobaiʼ.

Maʼ úuch xiʼik le sukuʼunoʼoboʼ ka kʼuch Floyd, juntúul precursor. Le táan u kʼaʼaytaj joonaj joonajiloʼ kʼuch tin wotoch. Le ka tu kʼáatajten wa jeʼel in xokik le Biblia tu yéeteloʼ joʼopʼ in cheʼej, le oʼolal tu kʼáatajten: «¿Baʼaxten ka cheʼej?». Ka tin núukajtiʼ tsʼoʼok in xokik le folleto ¿Baʼax u kʼáat Dios ka k-beete? yéetel tsʼoʼok in káajsik kaʼach le libro El conocimiento que lleva a vida eterna. * Tsʼoʼoleʼ tin tsolajtiʼ baʼaxten xuʼul u tsʼaʼabalten xook. Seguernaj in xook yéetel Floyd hasta ka tin tsʼoʼoksaj le libro Conocimientooʼ, baʼaleʼ ka máan kʼiineʼ túuxtaʼab xan yaanal tuʼux. Le oʼolal pʼáat minaʼan máax tsʼáaikten xook tu kaʼatéen.

 Baʼaleʼ tu añoil 2004 kʼuch kaʼatúul precursor especialoʼob, Granville yéetel Joshua. Le táan u kʼaʼaytajoʼoboʼ kʼuchoʼob tin wotoch. Le ka tu kʼáatoʼobten wa taak in xook tu yéeteloʼobeʼ cheʼejnajeneʼ ka tin waʼalajtiʼob ka k-xok le libro Conocimiento desde tu káajbaloʼ. Taak kaʼach in wilik wa le baʼax ken u kaʼansoʼobtenoʼ igual yéetel le baʼaxoʼob tsʼoʼok u yáax kaʼansaʼaltenoʼ. Granvilleeʼ tu yaʼalajten yaan u beetaʼal muchʼtáambaloʼob way kaajeʼ. Le oʼolal kex tsʼoʼok u máan óoliʼ 10 años maʼ jóokʼken tin wotocheʼ jach taakchaj in biniʼiʼ. Granville túuneʼ máan u chʼaʼeneʼ ka tu bisen tiʼ junpʼéel silla de ruedas tak teʼ tuʼux ku muchʼkubaʼoboʼ.

Ka máan kʼiineʼ Granvilleeʼ tu kʼáatajten wa in kʼáat táakpajal teʼ Escuela utiaʼal k-Kaʼansik u Tʼaan Diosoʼ. Letiʼeʼ tu yaʼalajten: «Maʼ tu páajtal a xíimbal chéen baʼaleʼ ku páajtal a táan. In wojel de ke yaan u kʼuchul u kʼiinil a máansik junpʼéel discurso, jeʼel a wilkeʼ». Le baʼax tu yaʼalajtenoʼ jach tu líiʼsaj in wóol.

Káaj in jóokʼol kʼaʼaytaj tu yéetel, chéen baʼaleʼ yaʼab tiʼ u bejiloʼob le kaajoʼ maʼ maʼalob yaniloʼobiʼ le oʼolal difícil u bisken tiʼ silla de ruedas. Yoʼolal leloʼ tin waʼalajtiʼ ka u bisen tiʼ junpʼéel carretilla, jach maʼalob biniktoʼon. Okjaʼanajen tu mesil abril tiʼ 2005. Maʼ úuch okjaʼanakeneʼ le sukuʼunoʼoboʼ káaj u kaʼanskoʼobten bix u kanáantaʼal le publicaciónoʼob teʼ múuchʼuliloʼ, bey xan bix u meyaj u nuʼukulil paax teʼ tuʼux k-muchʼikbaoʼ.

Tu añoil 2007 in papáeʼ kíim tiʼ junpʼéel accidente le táan u bin tiʼ barcooʼ. Teen yéetel in láakʼtsiloʼobeʼ jach yaachaj k-óol yoʼolal le baʼax úuchoʼ. Le sukuʼun Granvilleoʼ ku orar kaʼach t-éetel yéetel ku líiʼsik k-óol yéetel le baʼax ku yaʼalik le Bibliaoʼ. Ka máan dos añoseʼ úuch uláakʼ baʼal jach tu beetaj k-muʼyaj, búul le barco tuʼux ku bin kaʼach le sukuʼun Granvilleoʼ ka kíimi.

Jach muʼyajnaj le sukuʼunoʼoboʼ. Teʼ múuchʼuliloʼ pʼáat minaʼan ancianoiʼ, chéen juntúul siervo ministerial yaan kaʼachiʼ. Jach yaachaj in wóol úuchik u kíimil le sukuʼun Granvilleoʼ tumen jach in amigo kaʼachi. Letiʼeʼ jach tu yilaj u yáantken yéetel tuláakal le baʼaxoʼob kʼaʼabéettenoʼ, tsʼoʼoleʼ tu yáanten xan in meyajt Jéeoba. Le yáax muchʼtáambal anchajtoʼon le tsʼoʼok u kíimiloʼ, teen ku tocar in xokik kaʼach U Pʼíich Tulumil Kanan. Baʼaleʼ chéen béeychaj in xokik kaʼapʼéel párrafo tumen káaj in wokʼol. Anchaj tak in wéemel teʼ plataformaoʼ tumen maʼ xuʼul in wokʼoliʼ.

Chéen baʼaleʼ kiʼimakchaj in wóol úuchik u taal jujuntúul sukuʼunoʼob utiaʼal u yáantkoʼonoʼob way Oreallaeʼ. Tsʼoʼoleʼ u najil Beteleʼ tu túuxtaj xan juntúul precursor especial, u kʼaabaʼeʼ Kojo. Jach kiʼimakchaj in wóol xan úuchik u káajal u xook in maama yéetel in wíitsʼin, ka máan kʼiineʼ okjaʼanajoʼob. Tu mesil marzo tiʼ 2015 káaj in beetik in siervo ministerialil. Maʼ úuch káajak in beet in siervo ministerialileʼ ka tin máansaj in yáax discurso. Leʼ kʼiin jeʼeloʼ jach kiʼimakchaj in wóol, hasta káaj in wóokʼol tumen kʼaʼajten le baʼax u yaʼalmajten in amigo Granvilleoʼ. Letiʼeʼ tu yaʼalajten: «In wojel de ke yaan u kʼuchul u kʼiinil a máansik junpʼéel discurso, jeʼel a wilkeʼ».

Ikil in chaʼantik JW Broadcastingeʼ^® tsʼoʼok in kʼaj óoltik sukuʼunoʼob yaan xan tiʼob jejeláas kʼojaʼaniloʼob, kex beyoʼ jach u tsʼaamaj u yóol u meyajtoʼob Jéeoba yéetel jach kiʼimak u yóoloʼob. Teen xaneʼ láayliʼ yaan baʼaloʼob ku páajtal in beetkeʼ. Tumen jach taak kaʼach in xupkinba in meyajt Jéeobaeʼ káaj in beetik in precursor regularil. Septiembre tiʼ 2019, sen kiʼimakchaj in wóol tumen tsʼaʼab in beet in ancianoil teʼ múuchʼuliloʼ, teʼeloʼ yaan óoliʼ 40 j-kʼaʼaytajoʼobiʼ.

Jach kin tsʼáaik u graciasil tiʼ tuláakal le sukuʼunoʼob tsʼoʼok u yáantkenoʼob utiaʼal in kʼaj óoltik u jaajiloʼ bey xan utiaʼal in meyajtik Jéeoba. Baʼaleʼ maases kin tsʼáaik gracias tiʼ Jéeoba tumen maʼ u tuʼubseniʼ.