1. Maʼ xaaneʼ, ¿baʼax kʼáatchiʼil jeʼel k-beetkeʼ?

MAʼ XAANEʼ k-wéej sajaktal kéen tuukulnakoʼon tiʼ bix kun xuʼulsbil tiʼ le religiónoʼoboʼ, tiʼ u kʼiinil u líikʼil Gog tiʼ Magog bey xan tiʼ le Armagedónoʼ. Maʼ xaaneʼ k-tuklik: «¿Yaan wa ta tʼaan u chúukpajal in wóol teʼ kʼiin jeʼeloʼ? Wa tsʼoʼok a beetik le kʼáatchiʼaʼ jach jeʼel u yáantkech le baʼax ku yaʼalik Juan 14:1. Teʼeloʼ Jesúseʼ tu yaʼalaj: «Maʼ u péek u yóol a puksiʼikʼaleʼex. Tsʼáa a fejeʼex tiʼ Dios». Wa muʼukʼaʼan k-fejeʼ yaan u chúukpajal k-óol kex jeʼel baʼaxak ka taalak u kʼiineʼ.

2. ¿Baʼaxoʼob jeʼel u yáantkoʼon k-muʼukʼaʼankúunt k-fejeʼ, yéetel baʼax ken k-il teʼ xookaʼ?

² Wa k-xakʼaltik bix táan k-aktáantik le problemas ku yantaltoʼon beoraaʼ yaan u yáantkoʼon k-il baʼax unaj k-beetik utiaʼal k-maas muʼukʼaʼankúuntik k-fe. Cada ken k-aktáant junpʼéel problemaeʼ ku maas muʼukʼaʼantal k-fe. Leloʼ yaan u yáantkoʼon utiaʼal u chúukpajal k-óol kex jeʼel baʼaxak ka taalak u kʼiineʼ. Teʼ xookaʼ yaan k-il kanpʼéel baʼaloʼob eʼes unaj kaʼach u maas muʼukʼaʼankúuntik u fe u discípuloʼob Jesús. Yaan xan k-ilik bix jeʼel k-aktáantik le problemas ku yantaltoʼon beoraaʼ, yéetel bix u yáantkoʼonoʼob utiaʼal k-aktáantik le baʼaloʼob ku taal u kʼiinoʼ.

3. Jeʼex u yaʼalik Mateo 6:30, 33, ¿baʼax tu kaʼansaj Jesús tiʼ u discípuloʼob?

³ U suukileʼ le íichamtsiloʼoboʼ ku yilik u tsʼáaikoʼob janal, nookʼ yéetel tuʼux u kajtal u familiaʼob, chéen baʼaleʼ leloʼ yaan kʼiineʼ maʼ chéen chʼaʼabiliʼ. Yaan sukuʼunoʼob tsʼoʼok u pʼáatal minaʼan meyajtiʼobeʼ kex ku yilik u kaxtikoʼob u jeel meyajeʼ maʼ béeychajkiʼ. Yaan xan sukuʼunoʼobeʼ maʼ tu kʼamkoʼob junpʼéel meyaj, tumen le meyaj ku yaʼalaʼaltiʼoboʼ maʼ maʼalob ka u beet juntúul máax meyajtik Diosiʼ. Teʼ súutukil beyoʼ jach unaj u yantal  fe tiʼ máak utiaʼal u creertik yaan u tsʼaʼabaltiʼ tuláakal baʼax kʼaʼabéet tumen Jéeoba. Leloʼ bey tu kaʼansil Jesús tiʼ u discípuloʼob (xok Mateo 6:30, 33). Wa jach tu jaajil k-creertik maʼ ken u pʼatoʼon Jéeoba chéen t-juunaleʼ yaan u béeytal k-tsʼáaik táanil le Reinooʼ. Tsʼoʼoleʼ le kéen k-il bix u yáantkoʼoneʼ yaan k-maas náatsʼal tiʼ letiʼ yéetel yaan u maas muʼukʼaʼantal k-fe.

4, 5. ¿Baʼax áant junpʼéel familia u aktáant le problemas yanchajtiʼoboʼ?

⁴ Koʼoneʼex ilik bix áantaʼabik le familia Castrooʼ, letiʼobeʼ kajaʼanoʼob Venezuela. Le sukuʼunoʼobaʼ jach tsʼoʼok u yilkoʼob bix u yáantaʼaloʼob tumen Jéeoba utiaʼal u yantaltiʼob le baʼax kʼaʼabéettiʼoboʼ. Utiaʼal u kaxtik u kuxtaloʼobeʼ ku meyajtikoʼob kaʼach junpʼéel u terrenoʼob. Chéen baʼaleʼ junpʼéel kʼiineʼ junjaats kʼasaʼan máakoʼobeʼ ookoʼob teʼ terrenooʼ ka tu jóoʼsoʼob le sukuʼunoʼoboʼ. Miguel, le taatatsiloʼ, ku yaʼalik: «Bejlaʼeʼ utiaʼal k-kaxtik k-kuxtaleʼ k-meyajtik jun chan xóotʼ luʼum majáantaʼantoʼon. Le kéen sáasakeʼ yáax baʼax kin kʼáatik tiʼ Jéeobaeʼ ka u tsʼáatoʼon baʼax kʼaʼabéettoʼon teʼ kʼiin jeʼeloʼ». Jeʼex k-ilkoʼ le familia Castrooʼ maʼ chéen chʼaʼabil u kaxtik u kuxtaloʼobiʼ. Chéen baʼaleʼ letiʼobeʼ jach ku creerkoʼob yaan u tsʼaʼabal tuláakal baʼax kʼaʼabéettiʼob tumen Jéeoba, le k-Taata yaan teʼ kaʼanoʼ. Le oʼolal maʼ xuʼuluk u binoʼob muchʼtáambaliʼ mix u táakpajloʼob teʼ kʼaʼaytajoʼ. Letiʼobeʼ u tsʼaamoʼob táanil le Reinooʼ, le oʼolal ku kanáantaʼaloʼob tumen Jéeoba.

⁵ Miguel yéetel Yurai, u yataneʼ, jach tsʼoʼok u yilkoʼob bix u yáantaʼaloʼob tumen Jéeoba. Jéeobaeʼ tsʼoʼok u péeksik le sukuʼunoʼob utiaʼal u tsʼaʼabal baʼax kʼaʼabéettiʼoboʼ wa utiaʼal u yáantaʼal Miguel ka u kaxt meyaj. Yaan kʼiineʼ xaneʼ Jéeobaeʼ yéetel u yáantaj le sucursal yaan teʼ luʼumiloʼ tsʼoʼok u tsʼáaiktiʼob baʼax kʼaʼabéettiʼob. Letiʼeʼ mix juntéen u pʼat le familiaaʼ, le oʼolal tsʼoʼok u maas muʼukʼaʼantal u fejoʼob. Le ka tsʼoʼok u tsikbaltik bix u yáantaʼaloʼob tumen Jéeobaeʼ, Yoselin, le u hija maas nojochoʼ, tu yaʼalaj: «Jach ku kʼuchul tin puksiʼikʼal in wilik bix u yáantkoʼon Jéeoba. Kin wilik bey juntúul in amigo mix bikʼin u pʼatken tin juunaleʼ». Tsʼoʼoleʼ tu yaʼalaj: «Le problemas tsʼoʼok k-aktáantikoʼ tsʼoʼok u prepararkoʼon utiaʼal k-aktáantik le baʼaloʼob maas nuuktak ku taal u kʼiiniloʼ».

6. Wa maʼ chéen chʼaʼabil a kuxtal tumen minaʼantech taakʼineʼ, ¿bix jeʼel a maas muʼukʼaʼankúuntik a fejeʼ?

⁶ Maʼ xaaneʼ beoraaʼ maʼ chéen chʼaʼabil a kuxtaliʼ tumen minaʼantech le taakʼin kʼaʼabéettechoʼ. Kex beyoʼ jeʼel u páajtal a aprovechartik utiaʼal a muʼukʼaʼankúuntik a fejeʼ. ¿Bix jeʼel u páajtal a beetkeʼ? Orarnen tiʼ Jéeoba, xok le baʼax ku yaʼalik Mateo 6:25 tak 34, yéetel tuukulnen tiʼ baʼax ku yaʼalik. Maʼalob xan ka tuukulnakech tiʼ bix u kanáantik Jéeoba le máaxoʼob u tsʼaamoʼob táanil le Reino teʼ kʼiinoʼobaʼ (1 Cor. 15:58). Leloʼ yaan u yáantkech a wileʼ le k-Taata yaan teʼ kaʼanoʼ yaan xan u yáantkech jeʼex úuchik u yáantkoʼob letiʼoboʼ. Jéeobaeʼ u yojel baʼax kʼaʼabéettech bey xan bix  jeʼel u tsʼáaiktecheʼ. Le kéen a wil bix u yáantkech Jéeobaeʼ yaan u maas muʼukʼaʼantal a fe, leloʼ yaan u yáantkech a aktáant baʼaloʼob maas nuuktakoʼob (Hab. 3:17, 18).

7. Jeʼex u yaʼalik Mateo 8:23-26, ¿bix tsʼaʼabik a pruebail u fe le discípuloʼob tumen junpʼéel kʼaʼamkach iikʼoʼ?

⁷ Juntéenjeak táan u bin Jesús yéetel u discípuloʼob tiʼ junpʼéel barcoeʼ káaj junpʼéel kʼaʼamkach iikʼ. Teʼ súutukoʼ Jesúseʼ tu yeʼesaj tiʼ u discípuloʼob kʼaʼabéet u maas muʼukʼaʼankúuntik u fejoʼob (xok Mateo 8:23-26). Le iikʼoʼ jach kʼaʼam kaʼachi le oʼolal le jaʼoʼ joʼopʼ u yokol ichil le barcooʼ, chéen baʼaleʼ Jesúseʼ tu kiʼ wenel kaʼachi. Le discípuloʼoboʼ jach sajakchajoʼobeʼ ka bin u yajsoʼob Jesús utiaʼal ka salvartaʼakoʼob. Jesús túuneʼ tu yaʼalajtiʼob: «¿Baʼaxten jach saajkeʼex?, ¿baʼaxten jach junpʼíit a fejeʼex?». Le discípuloʼoboʼ maʼ unaj u sajaktaloʼob kaʼachiʼ tumen Jéeobaeʼ jeʼel u páajtal u kanáantik Jesúseʼ bey xan le máaxoʼob yanoʼob tu yéeteloʼ. ¿Baʼax ku kaʼansiktoʼon le baʼax úuchaʼ? Ku kaʼansiktoʼoneʼ kʼaʼabéettoʼon junpʼéel fe muʼukʼaʼan utiaʼal k-aktáantik nukuch problemas.

8, 9. ¿Bix tsʼaʼabik a pruebail u fe Anel, yéetel baʼax áant teʼ kʼiinoʼoboʼ?

⁸ Koʼoneʼex ilik baʼax beet u maas muʼukʼaʼantal u fe Anel, juntúul kiik kajaʼan Puerto Rico. Tu añoil 2017, máan le ciclón María tu luʼumil Puerto Ricooʼ, le oʼolal Aneleʼ pʼáat minaʼan u yotoch mix u meyaj. Letiʼeʼ ku yaʼalik: «Teʼ kʼiinoʼoboʼ jach sajakchajen, chéen baʼaleʼ tin wilaj in maas orar tiʼ Jéeoba yéetel maʼ tin chaʼaj u jach lúubul in wóoliʼ».

⁹ Aneleʼ ku yaʼalikeʼ uláakʼ baʼax áanteʼ letiʼe úuchik u yuʼubik tʼaanoʼ. Letiʼeʼ ku yaʼalik: «Le in beetik baʼax ku yaʼalik u kaajal Jéeobaoʼ tu yáanten utiaʼal maʼ in sen chiʼichnaktal. Tin wilaj bix meyajnajik tiʼ Jéeoba le sukuʼunoʼob utiaʼal u yáantkenoʼ, letiʼobeʼ tu líiʼsoʼob in wóol yéetel tu tsʼáajoʼobten le baʼax kʼaʼabéettenoʼ». Ku seguer u yaʼalik: «Mix juntéen tin tuklaj wa bey ken u yáantilen Jéeobaoʼ. Le baʼax tu beetaj tin woʼolaloʼ tu maas muʼukʼaʼankúuntaj in fe».

10. ¿Baʼax jeʼel u páajtal a beetik wa táan a aktáantik junpʼéel nojoch problemaeʼ?

¹⁰ ¿Táan wa a aktáantik junpʼéel nojoch problema? Maʼ xaaneʼ táan a muʼyaj yoʼolal junpʼéel nojoch loobil tsʼoʼok u yúuchul teʼ tuʼux yanechoʼ wa táan a muʼyajtik junpʼéel yaayaj kʼojaʼanil yéetel maʼ ta kaxtik baʼax a beete. U jaajileʼ le baʼaloʼob beyoʼ jeʼel u beetik u jach chiʼichnaktal máakeʼ, chéen baʼaleʼ ilawil maʼ u xuʼulul a kʼubik a wóol tiʼ Jéeoba. Jeʼekʼabt a puksiʼikʼal tiʼ yéetel aʼaltiʼ bix a wuʼuyikaba. Utiaʼal a muʼukʼaʼankúuntik a fejeʼ tuukulnen tiʼ jaytéen tsʼoʼok u yáax áantkech Jéeoba (Sal. 77:11, 12). Maʼ u tuʼubultecheʼ Jéeobaeʼ mix bikʼin ken u pʼatech chéen ta juunal.

11. ¿Baʼaxten unaj k-uʼuyik u tʼaan le máaxoʼob nuʼuktikoʼonoʼ?

¹¹ ¿Baʼax uláakʼ jeʼel u yáantkoʼon k-aktáant le nukuch problemasoʼ? Jeʼex tu yaʼalil Aneloʼ letiʼe  u yuʼubik máak tʼaanoʼ. Unaj k-confiar tiʼ le máaxoʼob tsʼaʼanoʼob tumen Jéeoba yéetel Jesúsoʼ, letiʼobeʼ tsʼaʼanoʼob utiaʼal u nuʼuktikoʼonoʼob. Maʼ xaaneʼ yaan horaeʼ maʼ jach de acuerdoʼon yéetel baʼax ku yaʼalikoʼobiʼ, chéen baʼaleʼ maʼ u tuʼubultoʼoneʼ Jéeobaeʼ ku bendecirtik le máaxoʼob ku yuʼubikoʼob tʼaanoʼ. Le baʼax ku yaʼalik le Bibliaoʼ bey xan u experiencia uláakʼ sukuʼunoʼobeʼ ku yeʼesiktoʼoneʼ le máax ku yuʼubik tʼaanoʼ ku salvartik u kuxtal (Éxo. 14:1-4; 2 Cró. 20:17). Wa k-tuukul tiʼ baʼax ku yaʼalik le Bibliaoʼ bey xan tiʼ u ejemplo le sukuʼunoʼoboʼ mantatsʼ kun taaktal k-beetik baʼax ku yaʼalik Jéeoba (Heb. 13:17). Bey túunoʼ maʼ ken k-sajaktal kex jeʼel baʼaxak ka taalak u kʼiineʼ (Pro. 3:25).

12. Jeʼex u yaʼalik Lucas 18:1-8, ¿baʼax yaan u yil le fe yéetel u chúukpajal u yóol máak u aguantart junpʼéel injusticiaoʼ?

¹² Jesúseʼ u yojleʼ le injusticiaʼoboʼ jeʼel u tsʼáaik a pruebail u fe u discípuloʼobeʼ. Le oʼolal utiaʼal u yáantkoʼobeʼ tu tsikbaltaj junpʼéel baʼal tsʼíibtaʼan tu libroil Lucas. Tu yaʼaleʼ juntúul koʼolel kimen u yíichameʼ mantatsʼ táan u kʼáatik kaʼach tiʼ juntúul kʼasaʼan juez ka beetaʼaktiʼ justicia. Le koʼoleloʼ u yojleʼ wa maʼ tu xuʼulul u kʼáatik ka áantaʼakeʼ yaan u kʼuchul u kʼiinil u yáantaʼal. Jach jeʼex tu tukliloʼ bey úuchikoʼ. ¿Baʼax ku kaʼansiktoʼon leloʼ? Wa juntúul kʼasaʼan juez tu beetaj justiciaeʼ, ¿kux túun Jéeoba, juntúul Dios ku beetik baʼax toj? Jesúseʼ tu yaʼalaj: «Kux túun Dios, ¿maʼ wa maas jeʼel u beetik justicia tiʼ le máaxoʼob u yéeymoʼ?» (xok Lucas 18:1-8). Tsʼoʼoleʼ tu yaʼalaj: «Kéen kʼuchuk u Paal máakeʼ, ¿jach wa tu jaajil yaan u kaxtik máakoʼob way luʼum yaantiʼob junpʼéel fe beyaʼ?». Le kéen beetaʼaktoʼon injusticiaeʼ kʼaʼabéet k-eʼesik paciencia yéetel chúukaʼan óolal, utiaʼal u chíikpajal yaantoʼon junpʼéel muʼukʼaʼan fe, jeʼex le koʼolel tu tsikbaltaj Jesúsoʼ. Junpʼéel fe beyoʼ yaan u yáantkoʼon k-creert yaan u kʼuchul u súutukil u yáantkoʼon Jéeoba. Maʼ u tuʼubultoʼon xaneʼ le oraciónoʼ jach jeʼel u yáantkoʼoneʼ. Yaan horaeʼ le súutukil táan u núukik Jéeoba k-oración wa le bix u beetkoʼ maʼ letiʼe bix k-tuklikoʼ.

13. ¿Bix áantaʼabik junpʼéel familia tumen le oración le ka tu aktáantoʼob junpʼéel injusticiaoʼ?

¹³ Koʼoneʼex ilik baʼax úuch tiʼ kiik Vero, kajaʼan República Democrática del Congo. Juntéenjeakeʼ letiʼ, u yíicham maʼ Testigoiʼ yéetel u hija de 15 añoseʼ yanchaj u púutsʼloʼob, tumen atacartaʼab u kaajaloʼob tumen junjaats soldadoʼob. Le táan u púutsʼloʼoboʼ kʼaʼat u beeloʼob tumen le soldadoʼoboʼ ka aʼalaʼab u kíimsaʼaloʼob. Teʼ súutukoʼ Veroeʼ túupʼ u yokʼol, chéen baʼaleʼ káaj u náaysaʼal u yóol tumen u hija. U hijaeʼ káaj u kʼaʼam orar yéetel u yaʼalik yaʼab u téenel u kʼaabaʼ Jéeoba. Le ka tsʼoʼok u orareʼ u nojchil le soldadoʼoboʼ tu kʼáatajtiʼ: «X-chʼúupal, ¿máax kaʼansech orar?». Letiʼeʼ tu núukaj: «In maama, letiʼ kaʼansen orar jeʼex u yaʼalik Mateo 6:9 tak 13». Le soldado túunoʼ tu  yaʼalaj: «Maʼ a sajaktal, jeʼel u páajtal a bin yéetel a taataʼobeʼ. Ka u kanáanteʼex Jéeoba a Dioseʼex».

14. ¿Baʼax jeʼel u tsʼáaik a pruebail le fe yaantoʼonoʼ, yéetel baʼax jeʼel u yáantkoʼon utiaʼal ka chúukpajak k-óoleʼ?

¹⁴ Le experienciaʼob jeʼex le tsʼoʼok k-tsikbaltikoʼ ku yáantkoʼon k-ileʼ le oraciónoʼ jach ku yáantik máak. Chéen baʼaleʼ, ¿kux túun wa maʼ tu jáan núukaʼal a oraciónoʼob? Jeʼex le koʼolel tu yaʼalaj Jesúsoʼ seguernak a orar. Maʼ u tuʼubultecheʼ Jéeobaeʼ maʼ ken u pʼatech ta juunal yéetel yaan u kʼuchul u súutukil u núukik a oración. Maʼ u xuʼulul a kʼáatik tiʼ Jéeoba ka u yáantech yéetel u espíritu santo (Fili. 4:13). Kʼaʼajaktech xaneʼ Jéeobaeʼ taʼaytak u béeykuntik le baʼaxoʼob u prometermoʼ. Teʼ kʼiin jeʼeloʼ hasta yaan u tuʼubultech le baʼaxoʼob ka muʼyajtikoʼ. Wa ku chúukpajal a wóol a aktáant le prueba yéetel u yáantaj Jéeobaoʼ, leloʼ yaan u tsʼáaiktech u muukʼil utiaʼal a aktáantik le uláakʼ baʼaloʼob ku taal u kʼiinoʼ (1 Ped. 1:6, 7).

15. Jeʼex u yaʼalik Mateo 17:19, 20, ¿baʼaxten le discípuloʼoboʼ maʼ páajchaj u expulsarkoʼob juntúul demonioiʼ?

¹⁵ Jesúseʼ tu kaʼansaj tiʼ u discípuloʼobeʼ le fejoʼ jeʼel u yáantkoʼob u aktáantoʼob jeʼel baʼaxakeʼ (xok Mateo 17:19, 20). Koʼoneʼex ilik baʼax úuch juntéenjeak tiʼ le discípuloʼoboʼ. Letiʼobeʼ suuk kaʼach u expulsarkoʼob demonioʼob, chéen baʼaleʼ juntéenjeakeʼ maʼ páajchaj u beetkoʼobiʼ, ¿baʼaxten? Jesúseʼ tu yaʼalajtiʼobeʼ tumen jach junpʼíit u fejoʼob. Tsʼoʼoleʼ ka tu yaʼalajtiʼobeʼ wa nojoch u fejoʼobeʼ yaan u páajtal u aktáantkoʼob baʼaloʼob beyoʼob nukuch montañaʼobeʼ. Teʼ kʼiinoʼob xanaʼ jeʼel k-aktáantik nukuch problemas beyoʼob nukuch montañaʼobeʼ.

16. Le fejoʼ, ¿bix úuchik u yáantik Geydi utiaʼal u aktáantik junpʼéel baʼax jach yaj tu máansaj?

¹⁶ Koʼoneʼex ilik baʼax tu aktáantaj Geydi, juntúul kiik kajaʼan Guatemala. Edi u yíichameʼ kíimsaʼab le táan u suutoʼob tu yotochoʼob le ka tsʼoʼok junpʼéel muchʼtáambaloʼ. Le kiikaʼ ku yaʼalik bix úuchik u yáantaʼal tumen u fe utiaʼal u aktáantik le baʼax jach yaj tu máansoʼ: «Teneʼ kin orar kaʼach tiʼ Jéeoba utiaʼal in waʼaliktiʼ bix in wuʼuyikinba, leloʼ jach tu yáanten. Tin wilaj xan bix úuchik u péeksik Jéeoba in familia bey xan le sukuʼunoʼob utiaʼal u kanáantkenoʼ. Le in tsʼáaik in wóol in meyajt Jéeobaoʼ jach ku yáantken xan utiaʼal maʼ in sen tuukul tiʼ le baʼax úuchtenoʼ yéetel maʼ in chiʼichnaktal yoʼolal baʼax ku taal u kʼiin. Le baʼax úuchtenoʼ ku kaʼansikteneʼ kex jeʼel baʼaxak ka in aktáant maas táanileʼ jeʼel u páajtal u chúukpajal in wóol yéetel u yáantaj Jéeoba, Jesús bey xan le sukuʼunoʼoboʼ».

17. ¿Baʼax jeʼel u páajtal k-beetik utiaʼal k-aktáantik problemas beyoʼob nukuch montañaʼobeʼ?

¹⁷ ¿Tsʼoʼok wa u kíimil juntúul máax a yaabiltmaj? Wa beyoʼ utiaʼal a muʼukʼaʼankúuntik a fejeʼ, xok teʼ Biblia bix úuchik u kaʼa kuxkíintaʼal jujuntúul máakoʼoboʼ. ¿Lubaʼan wa a wóol tumen expulsartaʼan juntúul a láakʼtsil? Wa beyoʼ xakʼalxokt le publicaciónoʼob utiaʼal a naʼatik  baʼaxten ku beetik Jéeoba leloʼ. Kex jeʼel baʼaxak táan a aktáantikeʼ ilawil bey u súutukil a muʼukʼaʼankúuntik a fejeʼ. Jeʼekʼabt a puksiʼikʼal tiʼ Jéeoba. Tu lugar a náachtal tiʼ le sukuʼunoʼoboʼ ilawil a maas natsʼkaba tiʼ letiʼob (Pro. 18:1). Táakpajkech tiʼ le baʼaloʼob jeʼel u yáantkech utiaʼal u chúukpajal a wóoloʼ, kex yaan kʼiin maʼ xaaneʼ táan a wokʼol yoʼolal le baʼax úuchtechoʼ (Sal. 126:5, 6). Maʼ u xuʼulul a bin muchʼtáambal, a kʼaʼaytaj, a xokik le Bibliaoʼ yéetel a tuukul tiʼ le jatsʼuts baʼaloʼob u beetmaj Jéeobaoʼ. Le kéen a wil bix u yáantkech Jéeobaeʼ a fejeʼ yaan u bin u maas muʼukʼaʼantal.

18. Wa ka wilik kʼaʼabéet a maas muʼukʼaʼankúuntik a fejeʼ, ¿baʼax unaj a beetik?

¹⁸ Wa yoʼolal le baʼaxoʼob ka aktáantik tsʼoʼok a wilik kʼaʼabéet a maas muʼukʼaʼankúuntik a fejeʼ maʼ u lúubul a wóol. Baʼaxeʼ ilawil bey u súutukil utiaʼal a maas nojochkíintik a fejeʼ. Jeʼex úuchik u kʼáatik u apóstoloʼob Jesúseʼ, kʼáat xan tiʼ Jéeoba: «Beet u maas yantaltoʼon fe» (Luc. 17:5). Maʼalob xan ka a kʼaʼajs u ejemplo le sukuʼunoʼob yéetel kiikoʼob tsʼoʼok k-ilik teʼ xookaʼ. Jeʼex Miguel yéetel Yuraieʼ, maʼ u tuʼubultech le jaytéen tsʼoʼok u yáantkech Jéeobaoʼ. Jeʼex tu beetil Anel yéetel jeʼex tu beetil u hija le kiik Verooʼ, jeʼekʼabt a puksiʼikʼal tiʼ Jéeoba teʼ kʼiinoʼob maʼ chéen chʼaʼabil baʼax táan a aktáantikoʼ. Jeʼex Geydieʼ chaʼa u yáantkech Jéeoba, letiʼeʼ yaan kʼiineʼ ku péeksik a láakʼtsiloʼob wa le sukuʼunoʼob utiaʼal ka u yáantechoʼoboʼ. Maʼalob ka a chaʼa u yáantkech Jéeoba a aktáant le problemas yaantech beoraaʼ tumen le kéen a wil bix u yáantkecheʼ yaan a maas kʼubik a wóol tiʼ letiʼ le kéen a aktáant uláakʼ baʼaloʼob maas táaniloʼ.

19. ¿Baʼax u yojel kaʼach Jesús, yéetel baʼax k-ojel xan toʼon?

¹⁹ Kex Jesús tu yaʼalaj tiʼ u discípuloʼob kʼaʼabéet u maas muʼukʼaʼankúuntik u fejoʼobeʼ u yojel xaneʼ yéetel u yáantaj Jéeobaeʼ yaan u páajtal u aktáantkoʼob jeʼel baʼaxakeʼ (Juan 14:1; 16:33). Letiʼeʼ seguro kaʼacheʼ yaʼabkach máakoʼobeʼ yoʼolal le fe yaantiʼoboʼ yaan u salvarkubaʼob le kéen tsʼoʼokok le nojoch muʼyajiloʼ (Apo. 7:9, 14). ¿Yaan wa ta tʼaan a wantal ichil le yaʼabkach máakoʼoboʼ? Yoʼolal u yutsil Jéeobaeʼ jeʼel u páajtal a wantaleʼ. Chéen baʼaleʼ kʼaʼabéet a wilik a muʼukʼaʼankúuntik a fe desde beoraaʼ (Heb. 10:39).