1, 2. 1) ¿Baʼaxten unaj u kʼubik u yóoloʼob tiʼ Jéeoba le máaxoʼob táant u tsʼoʼokol u beeloʼoboʼ? (Salmo 37:3, 4). 2) ¿Baʼax ken k-il teʼ xookaʼ?

WA TEECH táant u tsʼoʼokol a beel bey xan wa jach taʼaytak u tsʼoʼokol a beeleʼ seguro taak a kuxtal ich kiʼimak óolal yéetel le máax a yaabiltmoʼ. Chéen baʼaleʼ u jaajileʼ tu káajbaleʼ yaan u yantalteʼex problemas yéetel yaan u kʼaʼabéettal a chʼaʼtuklikeʼex jujunpʼéel baʼaloʼob. Le baʼax ken a chʼaʼtukleʼexoʼ yaan u afectartik a kuxtaleʼex. Wa ka kʼubik a wóoleʼex tiʼ Jéeobaeʼ yaan a chʼaʼikeʼex maʼalob decisiónoʼob yéetel yaan u yantalteʼex kiʼimak óolal. Chéen baʼaleʼ wa maʼ ta beetkeʼex u cuentail baʼax ku yaʼalik Jéeobaeʼ maʼ xaaneʼ yaan u yantalteʼex yaʼab problemas yéetel maʼ kun antalteʼex kiʼimak óolal (xok Salmo 37:3, 4).

² Le xookaʼ maases beetaʼan utiaʼal le máaxoʼob táant u tsʼoʼokol u beeloʼoboʼ, chéen baʼaleʼ le baʼax ku yaʼalikoʼ láayliʼ letiʼe baʼax ku aktáantik xan tuláakal le máaxoʼob tsʼokaʼan u beeloʼoboʼ. Yaan k-ilik u ejemplo jujuntúul xiiboʼob yéetel koʼoleloʼob ku chʼaʼchiʼitaʼaloʼob teʼ Bibliaoʼ yéetel yaan k-ilik baʼax jeʼel u páajtal k-kanik tiʼ letiʼobeʼ. Tsʼoʼoleʼ yaan xan k-ilik baʼax jeʼel u páajtal k-kanik tiʼ jujuntúul máaxoʼob tsʼokaʼan u beeloʼob teʼ kʼiinoʼobaʼ.

3, 4. ¿Baʼaxoʼob jeʼel u aktáantik le máaxoʼob táant u tsʼoʼokol u beeloʼoboʼ?

³ Yaan tuʼuxoʼobeʼ tiʼ le máaxoʼob táant u tsʼoʼokol u beeloʼoboʼ ku sen aʼalaʼaltiʼob tumen u amigoʼob wa u láakʼtsiloʼob ka jáan yanak u paalaloʼob, ka u beet u yotochoʼob yéetel ka u manoʼob tuláakal baʼax kʼaʼabéettiʼob.

 ⁴ Le máaxoʼob táant u tsʼoʼokol u beeloʼoboʼ wa maʼ tu kanáantkoʼob baʼax ku chʼaʼtuklikoʼobeʼ jeʼel u sen pʼaxkubaʼobeʼ, le ken tsʼoʼokkeʼ ku kʼaʼabéettal u meyajoʼob tu kaʼatúulaloʼob utiaʼal u boʼotkoʼob. Chéen baʼaleʼ leloʼ yaan u beetik maʼ u yantaltiʼob tiempo utiaʼal u xakʼalxoktikoʼob le Bibliaoʼ, utiaʼal u beetik u adoración ich familiaʼob yéetel utiaʼal u táakpajloʼob teʼ kʼaʼaytajoʼ. Maʼ xaaneʼ hasta yaan kʼiin jeʼel u pʼáatal maʼ kun binoʼob muchʼtáambal utiaʼal u náajaltikoʼob maas taakʼineʼ wa utiaʼal maʼ u luʼsaʼaltiʼob meyaj. Bey túunoʼ yaan meyajoʼob ichil u kaajal Jéeoba maʼ kun páajtal u beetkoʼob.

5. ¿Baʼax ku kaʼansiktoʼon le baʼax úuch tiʼ Klaus yéetel Marisaoʼ?

⁵ Yaʼab ejemploʼob eʼesikeʼ wa ku chʼíikil máak u kaxt ayikʼalileʼ maʼ tu yantal tiʼ kiʼimak óolal. Leloʼ bey tu yilil Klaus yéetel Marisa. * Le ka tsʼoʼok u beeloʼobeʼ tu kaʼatúulaloʼob joʼopʼ u sen meyajoʼob utiaʼal u kuxtaloʼob maʼalob, chéen baʼaleʼ maʼ kiʼimak u yóoloʼob kaʼachiʼ. Klauseʼ ku yaʼalik: «Yaantoʼon kaʼach tuláakal baʼax kʼaʼabéettoʼon, chéen baʼaleʼ maʼatech u máan t-tuukul k-maas meyajtik Jéeoba, yéetel u jaajileʼ mantatsʼ chiʼichnakoʼon». Maʼ xaaneʼ techeʼ tsʼoʼok a wilkeʼ wa ku chʼíikil máak u kaxt ayikʼalileʼ maʼ tu yantaltiʼ kiʼimak óolal. Wa beyoʼ maʼ u lúubul a wóol, jeʼel u páajtal a kaanbal tiʼ u ejemplo máaxoʼob meyajt Jéeoba úuchjeakileʼ. Yáaxeʼ koʼoneʼex ilik baʼax jeʼel u kanik le íichamtsiloʼob tiʼ le rey Jeosafatoʼ.

6. Jeʼex u yaʼalik Proverbios 3:5, 6, ¿baʼax tu beetaj Jeosafat ka tu aktáantaj junpʼéel nojoch problema?

⁶ Íichamtsileʼex, ¿yaan wa kʼiin ka wuʼuyikeʼex maʼ ta páajtaleʼex yéetel le responsabilidad yaanteʼexoʼ? Wa beyoʼ jeʼel u páajtal a kaanbaleʼex tiʼ u ejemplo Jeosafateʼ. Letiʼeʼ yaan tiʼ kaʼach junpʼéel nojoch responsabilidad tumen letiʼ u reyil Judá. ¿Baʼax tu beetaj utiaʼal u tsʼoʼokbesik le responsabilidad yaantiʼoʼ? Letiʼeʼ tu beetaj lugaroʼob kaʼanal u pakʼiloʼob yéetel tu yilaj u yantaltiʼ maas tiʼ 1,160,000 soldadoʼob (2 Cró. 17:12-19). Le ka máan kʼiineʼ tu aktáantaj junpʼéel nojoch problema: taal atacarbiloʼob tumen yaʼabkach máakoʼob ku taaloʼob tiʼ u luʼumil Ammón, Moab yéetel tu montañailoʼob Seír (2 Cró. 20:1, 2). ¿Baʼax túun tu beetaj Jeosafat? Letiʼeʼ tu kʼáataj áantaj tiʼ Jéeoba, tu beetaj jach jeʼex u yaʼalik Proverbios 3:5 yéetel 6 (xoke). Le oración tu beetoʼ tiʼ tsʼíibtaʼan tiʼ 2 Crónicas 20:5 tak 12, teʼeloʼ ku chíikpajleʼ letiʼeʼ jach ku kʼubik u yóol kaʼach tiʼ Jéeoba. ¿Baʼax túun tu beetaj Jéeoba?

7. ¿Bix tu núukil Jéeoba u oración Jeosafat?

⁷ Jéeobaeʼ tu túuxtaj juntúul levita ku kʼaabaʼtik Jasiel u yaʼal tiʼ Jeosafat: «Preparartabaʼex, yéetel maʼ a péekeʼex. Yéetel ileʼex bix ken u salvartileʼex Jéeoba» (2 Cró. 20:13-17). ¿Máasaʼ jelaʼan le baʼax aʼalaʼabtiʼoʼ? U jaajileʼ jelaʼan, chéen baʼaleʼ  maʼ unaj u tuʼubultoʼoneʼ Jéeoba aʼaliktiʼ, maʼ chéen juntúul wíinikiʼ. ¿Baʼax túun tu beetaj Jeosafat? Letiʼeʼ tu kʼubaj u yóol tiʼ Jéeobaeʼ ka tu beetaj le baʼax aʼalaʼabtiʼoʼ. Le ka túun jóokʼoʼob tu contra u enemigoʼobeʼ maʼ tu tsʼáaj táanil le maas maʼalob soldadoʼoboʼ baʼaxeʼ tu tsʼáaj máakoʼob utiaʼal ka kʼaaynakoʼob. Jach jeʼex túun úuchik u prometertik Jéeoba tiʼ Jeosafateʼ xuʼulsaʼab tiʼ u enemigoʼob le kaajoʼ (2 Cró. 20:18-23).

8. ¿Baʼax jeʼel u kanik le íichamtsiloʼob tiʼ Jeosafatoʼ?

⁸ Íichamtsileʼex, ¿baʼax jeʼel u páajtal a kankeʼex tiʼ u ejemplo Jeosafateʼ? U jaajileʼ teʼexeʼ unaj a kanáantik a familiaʼex le oʼolal ka wilik a tsʼáaikeʼex tuláakal baʼax kʼaʼabéettiʼ. Chéen baʼaleʼ le kéen a aktáanteʼex junpʼéel problemaeʼ maʼ xaaneʼ jeʼel a tuklikeʼexeʼ jeʼel u páajtal a wutskíintikeʼex ta juunaleʼexeʼ, pero maʼ unaj a beetkeʼex beyoʼ baʼaxeʼ unaj a orareʼex tiʼ Jéeoba utiaʼal a kʼáatkeʼex áantaj tiʼ. Maʼalob xan ka múul orarnakeʼex yéetel a wataneʼex, ka a xakʼalxokteʼex le Biblia yéetel le publicaciónoʼoboʼ ku tsʼoʼokoleʼ ka chʼaʼtuklikeʼex baʼax ken a beeteʼex. Chéen baʼaleʼ le ken tsʼoʼokkeʼ maʼ xaaneʼ yaan máakoʼobeʼ jeʼel u yaʼalikoʼobeʼ jach junpuliʼ maʼ maʼalob le baʼax ka chʼaʼtuklik a beetkeʼexoʼ. Letiʼobeʼ jeʼel u yaʼalikoʼobteʼexeʼ le baʼax maas jeʼel u taasik utsil tiʼ a familiaʼexoʼ letiʼe taakʼinoʼ wa le ayikʼaliloʼoboʼ. Pero maʼ u tuʼubulteʼex u ejemplo Jeosafat, letiʼeʼ tu kʼubaj u yóol tiʼ Jéeobaeʼ ka tu beetaj baʼax aʼalaʼabtiʼ, Jéeoba túuneʼ maʼ tu pʼataj Jeosafat tu juunaliʼ. Teʼex xaneʼ wa ka kʼubik a wóoleʼex tiʼ Jéeoba jeʼex tu beetil Jeosafateʼ, letiʼeʼ maʼ ken u pʼateʼex chéen ta juunaleʼex (Sal. 37:28; Heb. 13:5). ¿Baʼax jeʼel u taasik kiʼimak óolal tiʼ le tsʼokaʼan u beeloʼoboʼ? Koʼoneʼex ilik.

9. ¿Baʼax jeʼel u páajtal k-aʼalik yoʼolal profeta Isaías yéetel u yataneʼ?

⁹ Isaías yéetel u yataneʼ tu tsʼáaj u yóoloʼob u meyajtoʼob Jéeoba. Letiʼeʼ profeta kaʼachi yéetel u yataneʼ maʼ xaaneʼ tu beetaj junpʼéel meyaj beyoʼ, le Bibliaoʼ ku yaʼalikeʼ «profetisa» (Isa. 8:1-4). Le baʼax maas importante u yilkoʼob kaʼachoʼ letiʼe u adorarkoʼob Jéeobaoʼ. Jeʼex k-ilkoʼ Isaías yéetel u yataneʼ junpʼéel jach maʼalob ejemplo utiaʼal le máaxoʼob tsʼokaʼan u beeloʼob teʼ kʼiinoʼobaʼ.

10. ¿Baʼax jeʼel u yúuchul wa le máaxoʼob tsʼokaʼan u beeloʼoboʼ ku xakʼalxoktikoʼob le profecíaʼoboʼ?

¹⁰ Teʼ kʼiinoʼobaʼ le máaxoʼob tsʼokaʼan u beeloʼoboʼ jeʼel xan u páajtal u tsʼáaik u yóol u meyajtoʼob Jéeobaeʼ. Utiaʼal leloʼ maʼalob ka u muʼukʼaʼankúunt u fejoʼob, ka u xakʼalxoktoʼob le profecíaʼoboʼ yéetel ka u yiloʼob bix u béeychajal (Tito 1:2). * Maʼalob xan ka u yiloʼob bix jeʼel u táakpajloʼob utiaʼal ka béeychajak jujunpʼéel profecíaʼob ku yaʼalik le Bibliaoʼ, jeʼex le u kʼaʼaytaʼal le baʼaloʼob maʼalobtak ken u beet le Reino antes tiʼ u taal le xuʼulsajiloʼ (Mat. 24:14). Le kéen yiloʼob táan u béeychajal le profecíaʼob ku yaʼalik le Bibliaoʼ yaan u maas tsʼáaik u yóol u meyajtoʼob Jéeoba Dios.

11. ¿Baʼax páajchaj u beetik Áquila yéetel Priscila, yéetel baʼaxten?

¹¹ Le máaxoʼob maʼ úuch tsʼoʼokok u beeloʼoboʼ yaʼab baʼaloʼob jeʼel u kankoʼob tiʼ Áquila yéetel Priscilaiʼ, letiʼobeʼ judíoʼob kaʼachi baʼaleʼ kajaʼanoʼob Roma. Teʼeloʼ tiʼ tu  yuʼuboʼob u yúuchul tsikbal yoʼolal Jesúseʼ ka tu beetubaʼob cristianoil. Seguro kiʼimak u yóoloʼob kaʼachi, chéen baʼaleʼ junpʼéel kʼiineʼ le emperador Claudiooʼ tu yaʼaleʼ tuláakal le judíoʼoboʼ unaj u jóokʼloʼob Roma. ¡Chéen tukult bix tu yuʼubiluba Áquila yéetel Priscila! Letiʼobeʼ yanchaj u pʼatkoʼob yaʼab baʼaloʼob utiaʼal u binoʼob yaanal kaaj. Tsʼoʼoleʼ yanchaj u kaxtikoʼob tuʼux kun kajtaloʼob yéetel tuʼux ken u tsʼáa u chan negocioʼob utiaʼal u beetkoʼob najoʼob de nookʼ. Yoʼolal le baʼax úuchtiʼoboʼ, ¿xuʼul wa u tsʼáaikoʼob táanil le Reinooʼ? Maʼatech. Le ka kʼuchoʼob Corintoeʼ tu yáantoʼob le múuchʼuliloʼ yéetel tu yáantoʼob xan apóstol Pablo utiaʼal u líiʼsik u yóol le sukuʼunoʼoboʼ. Tsʼoʼoleʼ le ka máan tiempoeʼ binoʼob tuláakʼ kaajoʼob tuʼux kʼaʼabéet u maas kʼaʼaytaʼal le Reinooʼ (Hech. 18:18-21; Rom. 16:3-5). Jeʼex k-ilkoʼ jach tu tsʼáaj u yóol u meyajtoʼob Jéeoba. ¡Jach kiʼimakchaj wal u yóoloʼobeʼ!

12. ¿Baʼaxten le máaxoʼob ku tsʼoʼokol u beeloʼoboʼ maʼalob ka u chʼaʼtukloʼob bix jeʼel u páajtal u maas meyajtikoʼob Jéeobaeʼ?

¹² Teʼ kʼiinoʼobaʼ le máaxoʼob xan tsʼokaʼan u beeloʼoboʼ jeʼel u páajtal u tsʼáaikoʼob táanil le Reino jeʼex tu beetil Áquila yéetel Priscilaoʼ. Le táan u biskubaʼoboʼ maʼalob ka u tsikbaltoʼob baʼax ken u beetoʼob kéen tsʼoʼokok u beeloʼob. Wa ku chʼaʼtuklikoʼob bix jeʼel u páajtal u maas meyajtikoʼob Jéeoba yéetel ku yilik u beetkoʼobeʼ maas yaan u yilkoʼob bix u yáantaʼaloʼob tumen le espíritu santooʼ (Ecl. 4:9, 12). Koʼoneʼex ilik baʼax úuch tiʼ Russell yéetel Elizabeth. Russelleʼ ku yaʼalik: «Le táan k-bisikbaoʼ t-chʼaʼtuklaj bix jeʼel k-múul meyajtik Jéeoba kéen tsʼoʼokok k-beeleʼ». Elizabetheʼ ku yaʼalik xan: «T-chʼaʼtuklaj baʼax ken k-beete tumen beyoʼ jeʼel baʼaxak ka u kʼatuba t-beel kéen tsʼoʼokkeʼ yaan k-kanáantik maʼ u kʼaskúuntik le metas yaantoʼonoʼ». Úuchik u beetkoʼob beyoʼ letiʼobeʼ páajchaj u binoʼob Micronesia utiaʼal u yáantajoʼob tuʼux maas kʼaʼabéet u yúuchul kʼaʼaytaj.

13. Jeʼex u yaʼalik Salmo 28:7, ¿baʼax kun úuchul wa k-kʼubik k-óol tiʼ Jéeoba?

¹³ Jeʼex Russell yéetel Elizabetheʼ, bejlaʼeʼ yaʼab máaxoʼob tsʼokaʼan u beeloʼobeʼ ku  tsʼáaikoʼob juntséelil yaʼab baʼaloʼob utiaʼal u yantaltiʼob tiempo utiaʼal u maas kʼaʼaytajoʼob yéetel u kaʼansajoʼob. Le máaxoʼob tsʼokaʼan u beeloʼoboʼ le kéen u chʼaʼtukult u maas meyajtikoʼob Jéeobaeʼ ku kʼamkoʼob yaʼab bendiciónoʼob. Tsʼoʼoleʼ kéen u yiloʼob bix u kanáantaʼaloʼob tumen Jéeobaeʼ ku maas kʼubik u yóoloʼob tiʼ letiʼ yéetel ku yantaltiʼob kiʼimak óolal (xok Salmo 28:7).

14. ¿Bix tu yeʼesil Pedro yéetel u yatan u kʼubmaj u yóoloʼob tiʼ le baʼax ku yaʼalik Mateo 6:25, 31-34?

¹⁴ Apóstol Pedro yéetel u yataneʼ junpʼéel maʼalob ejemplo xan utiaʼal le máaxoʼob tsʼokaʼan u beeloʼoboʼ. Pedroeʼ kex seis meses wa junpʼéel año u kʼaj óolt Jesúseʼ yanchaj u chʼaʼtuklik junpʼéel baʼal jach kʼaʼanaʼan. Tumen chuk kay ku beetik kaʼacheʼ le ka aʼalaʼabtiʼ tumen Jesús ka u beetuba u discípuloeʼ letiʼeʼ yanchaj u chʼaʼtuklik baʼax ken u beete (Luc. 5:1-11). Le Bibliaoʼ ku yaʼalikeʼ Pedroeʼ tu chʼaʼtuklaj u beetkuba u discípulo Jesús. ¡Jach maʼalob le baʼax tu beetoʼ! Yaan baʼax eʼesikeʼ jach apoyartaʼab tumen u yatan. Tumen le Bibliaoʼ ku yaʼalikeʼ le ka tsʼoʼok u kaʼa kuxkíintaʼal Jesúseʼ Pedroeʼ láakʼintaʼab tumen u yatan kex junpʼéel tiempo (1 Cor. 9:5). Pedroeʼ páajchaj u tsolnuʼuktik le máaxoʼob tsʼokaʼan u beeloʼoboʼ tumen u yataneʼ ku tsʼáaik kaʼach junpʼéel maʼalob ejemplo (1 Ped. 3:1-7). Jeʼex k-ilkoʼ Pedro yéetel u yataneʼ u kʼubmaj kaʼach u yóoloʼob yaan u tsʼaʼabaltiʼob tuláakal baʼax kʼaʼabéettiʼob tumen Jéeoba wa ku tsʼáaikoʼob táanil le Reinooʼ (xok Mateo 6:25, 31-34).

15. ¿Baʼax tsʼoʼok a kanik tiʼ Tiago yéetel Esther?

¹⁵ ¿Kux túun wa tsʼoʼok u máan tiempo tsʼoʼokok a beeleʼex? ¿Baʼax jeʼel u yáantkeʼex utiaʼal u taaktal a maas meyajtikeʼex Jéeobaeʼ? Junpʼéel baʼax jeʼel u yáantkeʼexeʼ letiʼe a wilkeʼex bix tsʼoʼok u maas meyajtaʼal Jéeoba tumen uláakʼ máaxoʼob tsʼokaʼan u beeloʼoboʼ. Utiaʼal le jeʼeloʼ maʼalob ka a xakʼalteʼex le jaats ku kʼaabaʼtik: «Yéetel kiʼimak óolal binoʼob áantaj». Le xookoʼobaʼ jach tu yáantaj Tiago yéetel Esther, juntúul sukuʼun yéetel u yatan kajaʼanoʼob Brasil. Le ka tsʼoʼok u xokikoʼobeʼ taakchaj u binoʼob áantaj tuʼux maas kʼaʼabéet u yúuchul kʼaʼaytaj. Tiagoeʼ ku yaʼalik: «Le ka t-ilaj bix u kanáantik Jéeoba le máaxoʼob meyajtik teʼ kʼiinoʼobaʼ taakchaj k-maas meyajtik utiaʼal k-ilik xan bix ken u kanáantiloʼon». Le ka máan tiempoeʼ binoʼob Paraguay, teʼeloʼ desde 2014 táan u yáantajoʼob utiaʼal u yúuchul kʼaʼaytaj ich portugués. Esthereʼ ku yaʼalik: «Le baʼax ku yaʼalik Efesios 3:20, jach jatsʼuts k-ilik. Yaʼab u téenel tsʼoʼok k-ilik u béeytal ichil k-kuxtal». Jeʼex úuchik u yaʼalik Pablo le ka tu tsʼíibtaj Efesiosoʼ, bejlaʼeʼ Jéeobaeʼ mantatsʼ ku tsʼáaik tiʼ máak maas tiʼ le ku kʼáatkoʼ.

16. Le táankelmoʼob tsʼokaʼan u beeloʼoboʼ, ¿tiʼ máaxoʼob maʼalob ka u kʼáatoʼob consejo?

¹⁶ Le táankelmoʼob tsʼokaʼan u beeloʼoboʼ jach jeʼel u kaanbaloʼob tiʼ le máaxoʼob tsʼoʼok u xáantal u tsʼaamaj u yóol u meyajtoʼob Jéeobaoʼ. Maʼalob ka u kʼáatoʼob consejo tiʼ letiʼob. Tumen leloʼ junpʼéel bix u yeʼeskoʼob u kʼubmaj u yóoloʼob tiʼ Jéeoba (Pro. 22:17, 19). Maʼalob xan ka u kʼáatoʼob consejo tiʼ le ancianoʼoboʼ, tumen letiʼobeʼ jeʼel u yáantkoʼob u yiloʼob bix jeʼel u maas meyajtikoʼob Jéeobaeʼ.

17. ¿Baʼax úuch tiʼ Klaus yéetel Marisa, yéetel baʼax ku kaʼansiktoʼon leloʼ?

 ¹⁷ Kex k-chʼaʼtukultmaj bix ken k-maas meyajtil Jéeobaeʼ yaan horaeʼ maʼ xaaneʼ maʼ tu jóokʼol jeʼex k-tuklikoʼ. Koʼoneʼex ilik baʼax úuch tiʼ Klaus yéetel Marisa, le máaxoʼob tsʼoʼok k-yáax chʼaʼchiʼitikoʼ. Letiʼobeʼ tres años tsʼoʼokok u beeloʼobeʼ ka tu pʼataj u yotochoʼob utiaʼal u binoʼob áantaj tiʼ construcción tu sucursalil Finlandia. Chéen baʼaleʼ le ka kʼuchoʼobeʼ tu yojéeltoʼobeʼ chéen seis meses kun páajtal u pʼáatloʼobiʼ. Tu káajbaleʼ jach lúub u yóoloʼob, chéen baʼaleʼ le ka tsʼoʼokeʼ invitartaʼaboʼob utiaʼal junpʼéel curso ich árabe. Bejlaʼeʼ letiʼobeʼ jach kiʼimak u yóoloʼob u kʼaʼaytajoʼob tiʼ le máaxoʼob ku tʼankoʼob árabeoʼ. Marisaeʼ ku yaʼalik: «Tu káajbaleʼ ku chan talamtal tiʼ máak u confiar tiʼ Jéeoba utiaʼal u beetik junpʼéel baʼal mix juntéen u beete. Chéen baʼaleʼ tsʼoʼok in wilkeʼ Jéeobaeʼ jejeláas bix tsʼoʼok u bendecirkoʼon. Bejlaʼeʼ maas in kʼubmaj in wóol tiʼ letiʼ». Jeʼex k-ilkoʼ Jéeobaeʼ mantatsʼ ken u bendecirt le máaxoʼob ku kʼubik u yóoloʼob tiʼ letiʼoʼ.

18. Utiaʼal u seguer u kʼubik u yóoloʼob tiʼ Jéeobaeʼ, ¿baʼax maʼalob ka u beet le máaxoʼob tsʼokaʼan u beeloʼoboʼ?

¹⁸ Le tsʼoʼokol beeloʼ junpʼéel regalo ku taal tiʼ Jéeoba, le oʼolal letiʼeʼ u kʼáat ka u disfrutart máak (Pro. 5:18; Mat. 19:5, 6). Táankelmeʼex tsʼokaʼan a beeleʼex, maʼalob ka a wileʼex baʼax táan a beetkeʼex yéetel a kuxtaleʼex. ¿Táan wa a beetkeʼex tuláakal le ku páajtal utiaʼal a agradecerkeʼex tiʼ Jéeoba le jatsʼuts regalo u tsʼaamajteʼexoʼ? Maʼalob ka orarnakeʼex tiʼ Jéeoba, ka a xokeʼex le Bibliaoʼ yéetel ka a beeteʼex le baʼax ku yaʼalikoʼ. Wa ka tsʼáaik a wóol a meyajteʼex Jéeobaeʼ jach yaan u yantal kiʼimak óolal teʼex.