XOOK 45
Jéeobaeʼ ku yáantkoʼon k-beet le meyaj u kʼubéentmajtoʼonoʼ
«Bíin u yojéeltoʼob yanchaj juntúul profeta ichiloʼob» (EZE. 2:5).
KʼAAY 67 Kʼaʼayt u Tʼaan Dios
TIʼ BAʼAX KUN TʼAAN a
1. ¿Baʼax k-ojel kun úuchultoʼon, chéen baʼaleʼ baʼax k-ojel ken u beet Jéeoba t-oʼolal?
TOʼONEʼ k-ojel deporsi yaan k-pʼektaʼal yoʼolal le baʼax k-kʼaʼaytikoʼ yéetel k-ojel xaneʼ teʼ kʼiinoʼob ku taaloʼ yaan k-maas pʼektaʼal (Dan. 11:44; 2 Tim. 3:12; Apo. 16:21). Chéen baʼaleʼ k-ojel yaan u yáantkoʼon Jéeoba. ¿Baʼaxten k-aʼalik leloʼ? Tumen letiʼeʼ desde úuchjeakileʼ ku yáantik le máaxoʼob adorartik u tsʼoʼokbesoʼob tuláakal le meyaj ku kʼubéentiktiʼoboʼ. Utiaʼal k-ojéeltik de ke beyoʼ koʼoneʼex ilik jujunpʼéel tiʼ le baʼaxoʼob úuch ichil u kuxtal le profeta Ezequieloʼ. Letiʼeʼ kʼaʼaytajnaj tiʼ le judíoʼob bisaʼanoʼob Babiloniaoʼ.
2. 1) ¿Bix kaʼach le judíoʼob kajaʼanoʼob Babiloniaoʼ? (Ezequiel 2:3-6). 2) ¿Baʼax ken k-il teʼ xookaʼ?
2 ¿Bix kaʼach le judíoʼob kajaʼanoʼob Babiloniaoʼ? Jéeobaeʼ tu yaʼaleʼ «jach tercoʼob» yéetel «chich u puksiʼikʼaloʼob». Le judíoʼoboʼ jach kʼasaʼanoʼob kaʼach jeʼex le kʼiʼixoʼoboʼ yéetel jach séeb jeʼel u beetkoʼob loob jeʼex le síinaʼanoʼoboʼ. Le oʼolal Jéeobaeʼ yaʼab u téenel tu yaʼalaj tiʼ Ezequiel: «Maʼ a chʼaʼik saajkil tiʼ letiʼob» (xok Ezequiel 2:3-6). Ezequieleʼ béeychaj u beetik le meyaj kʼubéentaʼabtiʼoʼ tumen 1) Jéeoba túuxte, 2) áantaʼab tumen le espíritu santooʼ yéetel 3) tu tséentuba yéetel u tʼaan Dios. ¿Bix áantaʼabik Ezequiel tumen le óoxpʼéel baʼaloʼobaʼ, yéetel bix u yáantkoʼon teʼ kʼiinoʼobaʼ?
JÉEOBA TÚUXT EZEQUIEL
3. ¿Baʼax líiʼs u yóol Ezequiel, yéetel baʼax uláakʼ aʼalaʼabtiʼ tumen Jéeoba?
3 Jéeobaeʼ tu yaʼalaj tiʼ Ezequiel: «Táan in túuxtikech» (Eze. 2:3, 4). Le profetaoʼ jach líikʼ wal u yóoleʼ tumen tu kʼaʼajseʼ le baʼax aʼalaʼabtiʼ tumen Jéeobaoʼ letiʼe baʼax aʼalaʼab xan tiʼ Moisés yéetel Isaías le ka yéeyaʼaboʼob utiaʼal ka u beet u profetailoʼoboʼ (Éxo. 3:10; Isa. 6:8). U yojel xaneʼ Jéeobaeʼ tu yáantaj Moisés yéetel Isaías utiaʼal ka u beetoʼob nukuch meyajoʼob. Ezequieleʼ jach u yojel yaan u yáantaʼal, tumen Jéeobaeʼ kaʼatéen tu yaʼalajtiʼ: «Táan in túuxtikech». Tsʼoʼoleʼ tu libroil Ezequieleʼ yaʼab u téenel ku chíikpajal le tʼaanoʼobaʼ: «Jéeoba túuneʼ tu tʼaneneʼ ka tu yaʼalajten» (Eze. 14:2). Yaʼab u téenel ku chíikpajal xan le tʼaanoʼob jeʼelaʼ: «Jéeobaeʼ tu kaʼa tʼaneneʼ ka tu yaʼalajten» (Eze. 6:1). Le oʼolal Ezequieleʼ jach u yojel Jéeoba túuxtik. Como u taata sacerdote kaʼacheʼ seguro kaʼansaʼabtiʼeʼ Jéeobaeʼ mantatsʼ ku tʼanik u profetaʼob utiaʼal u yeʼesiktiʼob maʼ tu juunaloʼob yanoʼobiʼ. Jéeobaeʼ u yaʼalmiliʼ xan tiʼ Isaak, Jacob yéetel Jeremías: «Teneʼ tiaʼanen ta wéeteleʼ» wa tiaʼanen ta wiknaleʼ (Gén. 26:24; 28:15; Jer. 1:8).
4. ¿Baʼax tʼaaniloʼob jach tu líiʼsaj wal u yóol Ezequieleʼ?
4 ¿Yaan wa kaʼach u kʼamik le israelitaʼob le baʼax kun aʼalbiltiʼoboʼ? Jéeobaeʼ tu yaʼalaj tiʼ Ezequiel: «U kaajil Israeleʼ maʼ ken u chʼenxikintech tumen letiʼeʼ deporsi maʼ taak u yuʼubik baʼax kin waʼalikiʼ» (Eze. 3:7). Le tʼaanoʼobaʼ jach tu líiʼsaj wal u yóol Ezequieleʼ tumen tu yeʼesajtiʼeʼ le israelitaʼoboʼ deporsi maʼ taak u yuʼubikoʼob u tʼaan Diosiʼ maʼ wa tumen maʼ maʼalob bix u beetik u profetailiʼ. Tsʼoʼoleʼ aʼalaʼabtiʼ tumen Jéeobaeʼ kéen béeychajak le baʼax ken u yaʼaloʼ le judíoʼoboʼ yaan u yojéeltikoʼob «yanchaj juntúul profeta ichiloʼob» (Eze. 2:5; 33:33). Le tʼaanoʼobaʼ jach tu líiʼsaj wal u yóol Ezequiel utiaʼal u beetik le meyaj kʼubéentaʼantiʼoʼ.
JÉEOBA TÚUXTIKOʼON
Jeʼex tu beetil le máakoʼob tu kʼiiniloʼob Ezequieloʼ bejlaʼa xaneʼ yaan máakoʼobeʼ maʼ tu kʼamkoʼob le baʼax k-kʼaʼaytikoʼ, chéen baʼaleʼ k-ojleʼ Jéeobaeʼ tiaʼan t-éeteleʼ (Ilawil párrafo 5 yéetel 6)
5. ¿Bix u líiʼsik k-óol le baʼax ku yaʼalik Isaías 44:8?
5 Toʼon xaneʼ jach ku kiʼimaktal k-óol k-ojéeltik Jéeoba túuxtikoʼon kʼaʼaytaj. Yaantoʼon u jatsʼuts privilegioil k-beetikba u testigo Jéeoba (Isa. 43:10). Úuchjeakileʼ Jéeobaeʼ tu yaʼalaj tiʼ Ezequiel: «Maʼ a chʼaʼik saajkil». Bejlaʼeʼ tiʼ toʼoneʼ ku yaʼalik: «Maʼ a sen sajaktaleʼex». ¿Baʼaxten maʼ unaj k-chʼaʼik saajkil tiʼ le máaxoʼob pʼekmiloʼonoʼ? Tumen Jéeoba xan túuxtikoʼon, yéetel letiʼeʼ mantatsʼ tiaʼan t-éeteleʼ (xok Isaías 44:8).
6. 1) ¿Baʼax ku yaʼaliktoʼon Jéeoba utiaʼal u yeʼesik tiaʼan t-éeteleʼ? 2) ¿Baʼax líiʼsik k-óol?
6 Jéeobaeʼ jejeláas bix u yeʼesik tiaʼan t-éeteleʼ. Por ejemploeʼ táanil tiʼ u yaʼalik: «Teʼexeʼ in testigoʼex», letiʼeʼ ku yaʼaliktoʼon: «Le kéen máankech ichil taamkach jaʼeʼ, teneʼ yaan in wantal ta wéetel, le kéen máankech ichil ríoʼobeʼ maʼ kan búulul. Le kéen máankech ichil kʼáakʼeʼ maʼ kan elel, le kéen tóochʼbalnak le kʼáakʼoʼ maʼ ken u chujech» (Isa. 43:2). Yaan kʼiineʼ le táan k-kʼaʼaytajoʼ k-aktáantik baʼaloʼob beyoʼob ríoʼobeʼ wa beyoʼob kʼáakʼeʼ. Chéen baʼaleʼ maʼ tu xuʼulul k-kʼaʼaytaj tumen táan u yáantkoʼon Jéeoba (Isa. 41:13). Jeʼex tu beetil le judíoʼob tu kʼiiniloʼob Ezequieloʼ bejlaʼa xaneʼ u maas yaʼabil le máakoʼoboʼ maʼatech u kʼamkoʼob le baʼax k-kʼaʼaytikoʼ. Chéen baʼaleʼ k-ojleʼ leloʼ maʼ u kʼáat u yaʼal wa maʼ táan k-beetik maʼalob le meyaj u kʼubéentmajtoʼon Diosoʼ. Jach ku líikʼil k-óol k-ojéeltikeʼ le baʼax kiʼimakkúuntik u yóol Jéeobaoʼ letiʼe maʼ u xuʼulul k-beetik le meyaj u kʼubéentmajtoʼonoʼ. Le apóstol Pablooʼ tu yaʼalaj: «Cada juntúuleʼ yaan u kʼamik u boʼolil yoʼolal le meyaj tu beetoʼ» (1 Cor. 3:8; 4:1, 2). Juntúul kiik úuch joʼopʼok u beetik u precursoraileʼ ku yaʼalik: «Kiʼimak in wóol in wojéeltik Jéeobaeʼ ku boʼotik cada juntúul yoʼolal le meyaj ku beetkoʼ».
LE ESPÍRITU SANTOOʼ TU YÁANTAJ EZEQUIEL
Ezequieleʼ tu yilaj u carro Jéeoba, bey túunoʼ tu tsʼáaj cuenta yaan u yáantaʼal tumen Jéeoba u beet le baʼax kʼubéentaʼantiʼoʼ (Ilawil párrafo 7)
7. ¿Baʼax wal ku tsʼáaik cuenta Ezequiel cada ken u kʼaʼajs le baʼax tsʼaʼab u yiloʼ? (Ilawil le dibujo yaan tu yáax páginail le revistaaʼ).
7 Ezequieleʼ tu yilaj bukaʼaj muukʼ yaan tiʼ u espíritu santo Dios. Tu yilaj bix u nuʼuktik le ángeloʼob jach yaan u páajtaliloʼoboʼ bey xan u ruedasil junpʼéel carro yaan teʼ kaʼanoʼ (Eze. 1:20, 21). Ezequieleʼ tu yaʼalaj: «Le ka tin wileʼ xolajeneʼ ka chinlajen». Le profetaoʼ jach jaʼakʼ u yóoleʼ ka chinlaji (Eze. 1:28). Maʼ xaaneʼ cada ken tuukulnak kaʼach tiʼ le baʼax tu yiloʼ ku tsʼáaik cuentaeʼ jeʼel u béeytal u beetik le meyaj kʼubéentaʼantiʼ tumen Diosoʼ tumen yaan u yáantaʼal tumen le espíritu santooʼ.
8, 9. 1) ¿Baʼax tu yaʼalaj Jéeoba tiʼ Ezequiel? 2) ¿Baʼax uláakʼ tu beetaj Jéeoba utiaʼal u líiʼsik u yóol Ezequiel?
8 Jéeobaeʼ tu yaʼalaj tiʼ Ezequiel: «U paal máak, waʼalen utiaʼal ka tʼaanaken ta wéetel». Yoʼolal le baʼax aʼalaʼabtiʼoʼ bey xan yoʼolal le espíritu santooʼ yanchajtiʼ u muukʼil utiaʼal u waʼatal. Ezequieleʼ ku yaʼalik: «Taal u poder Dios tin wóokʼoleʼ ka tu beetaj in waʼatal» (Eze. 2:1, 2). Teʼ kʼiinoʼob táan u beetik le meyaj kʼubéentaʼantiʼoʼ Ezequieleʼ nuʼuktaʼab tumen u kʼab wa «u poder Jéeoba» (Eze. 3:22; 8:1; 33:22; 37:1; 40:1). U poder Dioseʼ tu yáantaj Ezequiel utiaʼal u béeytal u kʼaʼaytaj tiʼ le judíoʼob ‹jach tercoʼob yéetel chich u puksiʼikʼaloʼoboʼ› (Eze. 3:7). Jéeobaeʼ tu yaʼalaj tiʼ Ezequiel: «Teneʼ yaan in beetik a pechkaba jeʼex u pechkuba letiʼoboʼ. A táanpoolaleʼ tsʼoʼok in beetik u pʼáatal jeʼex junpʼéel diamanteeʼ, maas chich ke junpʼéel tokʼ tuunich. Maʼ a chʼaʼik saajkil tiʼob mix a kikilankil tu yoʼolal bix u paktikechoʼob» (Eze. 3:8, 9). Bey ka u yaʼal Jéeoba tiʼ Ezequieleʼ: «Maʼ u lúubul a wóol tumen jach tercoʼob. Teen kin tsʼáaiktech u muukʼil a beetik le meyajoʼ».
9 Le ka tsʼoʼokeʼ u espíritu santo Dioseʼ tu bisaj Ezequiel teʼ tuʼux unaj u kʼaʼaytajoʼ. Le profetaoʼ ku yaʼalik: «U poder Jéeobaeʼ táan kaʼach u nuʼuktiken yéetel le páajtalil yaantiʼoʼ». Ezequieleʼ siete días pʼáat bey saatal u yóol tak ka tu naʼataj le baʼax unaj u beetkoʼ (Eze. 3:14, 15). Le ka tsʼoʼokeʼ Jéeobaeʼ tu yaʼalaj tiʼ le profeta ka xiʼik tiʼ junpʼéel táax luʼumoʼ, teʼeloʼ taal u poder Dios tu yóokʼol (Eze. 3:23, 24). Le oʼolal Ezequieleʼ tu yuʼubaj jeʼel u páajtal u káajal u kʼaʼaytajeʼ.
LE ESPÍRITU SANTOOʼ KU YÁANTKOʼON XAN
Le baʼax áant Ezequiel úuchjeakiloʼ, ¿bix u yáantkoʼon bejlaʼa utiaʼal k-beetik le meyaj u kʼubéentmajtoʼon Diosoʼ? (Ilawil párrafo 10)
10. ¿Baʼax áantajil kʼaʼabéettoʼon utiaʼal k-tsʼoʼokbesik le meyaj kʼubéentaʼantoʼonoʼ, yéetel baʼaxten?
10 ¿Baʼax áantajil kʼaʼabéettoʼon utiaʼal k-tsʼoʼokbesik le meyaj u kʼubéentmajtoʼon Jéeobaoʼ? Utiaʼal k-núukik le kʼáatchiʼaʼ koʼoneʼex ilik baʼax áant Ezequiel. Le espíritu santooʼ tu yáantaj Ezequiel utiaʼal u káajal u kʼaʼaytaj. Leloʼ ku yeʼesiktoʼoneʼ kʼaʼabéettoʼon u yáantaj le espíritu santo utiaʼal u páajtal k-kʼaʼaytajoʼ. ¿Baʼaxten k-aʼalik beyoʼ? Tumen le Kʼaasilbaʼaloʼ u kʼáat u jeʼels le kʼaʼaytajoʼ (Apo. 12:17). Wíinikeʼ jeʼel u tuklikeʼ como Satanás jach táaj yaan u podereʼ maʼ t-páajtal tu yéetel. Chéen baʼaleʼ u jaajileʼ yéetel le kʼaʼaytaj k-beetkoʼ táan k-ganartik (Apo. 12:9-11). Kéen kʼaʼaytajnakoʼoneʼ k-eʼesik maʼ saajkoʼon kex jeʼel baʼalak ka u beeteʼ. Cada ken jóokʼkoʼon kʼaʼaytajeʼ táan k-tsʼáanchaʼatik le Kʼaasilbaʼaloʼ. Leloʼ ku yeʼesikeʼ táan u yáantkoʼon le espíritu santooʼ yéetel maʼalob yaniloʼon tu táan Jéeoba (Mat. 5:10-12; 1 Ped. 4:14).
11. ¿Bix jeʼel u yáantkoʼon le espíritu santooʼ, yéetel baʼax unaj k-beetik utiaʼal u seguer u yantaltoʼon?
11 Le úuchik u beetik Jéeoba u pechkuba Ezequiel jeʼex u pechkuba le judíoʼoboʼ ku yeʼesikeʼ le espíritu santo xanoʼ jeʼel u yáantkoʼon utiaʼal k-aktáantik jeʼel baʼaxak ka u kʼatuba t-beel le táan k-kʼaʼaytajoʼ (2 Cor. 4:7-9). ¿Baʼax túun unaj k-beetik utiaʼal u seguer u yantaltoʼon u espíritu santo Dios? Mantatsʼ unaj k-orar utiaʼal k-kʼáatiktiʼ. Jesúseʼ tu yaʼalaj tiʼ u discípuloʼob: «Maʼ u xuʼulul a kʼáatkeʼex baʼax kʼaʼabéetteʼex», «maʼ u xuʼulul a kaaxaneʼex» yéetel «maʼ u xuʼulul a kʼoopeʼex». Wa k-beetik le baʼax tu yaʼalaj Jesúsoʼ, ¿baʼax túun ken u beet Jéeoba? Letiʼeʼ yaan «u tsʼáaik espíritu santo tiʼ le máaxoʼob kʼáatiktiʼoʼ» (Luc. 11:9, 13; Hech. 1:14; 2:4).
EZEQUIELEʼ TU TSÉENTUBA YÉETEL U TʼAAN DIOS
12. Jeʼex u yaʼalik Ezequiel 2:9-3:3, ¿tuʼux u taal le rollooʼ, yéetel baʼax tsʼíibtaʼaniʼ?
12 Ezequieleʼ áantaʼab tumen le espíritu santooʼ, chéen baʼaleʼ áantaʼab xan tumen u tʼaan Dios. Letiʼeʼ tu yilaj junpʼéel kʼab u machmaj junpʼéel rollo (xok Ezequiel 2:9–3:3). ¿Tuʼux u taal le rollooʼ? ¿Baʼax ku yaʼalik? ¿Bix tu yáantil Ezequiel? Le rollooʼ tiʼ u taal tu trono Jéeobaeʼ. Maʼ xaaneʼ Jéeobaeʼ tu túuxtaj juntúul tiʼ le kantúul ángeloʼob tu yilaj Ezequiel utiaʼal u tsʼáaik le rollo tiʼoʼ (Eze. 1:8; 10:7, 20). Teʼ rollooʼ tiʼ tsʼíibtaʼan u tʼaan Diosiʼ, le baʼax unaj kaʼach u yaʼalik Ezequiel tiʼ le kaaj jach tercooʼ (Eze. 2:7). Le baʼax u kʼáat Dios ka u yojéeltoʼoboʼ tsʼíibtaʼan kaʼach tu kaʼatséelil le rollooʼ.
13. ¿Baʼax tu yaʼalaj Jéeoba tiʼ Ezequiel ka u beet yéetel le rollooʼ, yéetel baʼaxten chʼujuk tu yuʼubil?
13 Jéeobaeʼ tu yaʼalaj tiʼ le profetaoʼ: «Jaant le rollo tin tsʼáajtechoʼ ka a naʼajkúuntaba tu yéetel». Ezequieleʼ tu beetaj le baʼax aʼalaʼabtiʼoʼ, tu jaantaj tuláakal le rollooʼ. ¿Baʼax u kʼáat u yaʼal le baʼax tu yiloʼ? U kʼáat u yaʼaleʼ Ezequieleʼ unaj u naʼatik tubeel le baʼax u kʼáat Dios ka u yojéelt le kaajoʼ. Lelaʼ unaj kaʼach u kʼuchul tu puksiʼikʼal yéetel unaj u péeksik utiaʼal ka u beet le meyaj kʼubéentaʼantiʼ tumen Diosoʼ. Le ka tsʼoʼok u jaantik le rollooʼ úuch junpʼéel baʼal maʼ táan u páaʼtikiʼ, tu yuʼubeʼ «chʼujuk bey kaabeʼ» (Eze. 3:3). ¿Baʼaxten? Tumen utiaʼal Ezequieleʼ junpʼéel privilegio u tʼaan tu kʼaabaʼ Jéeoba, utiaʼal letiʼeʼ bey junpʼéel baʼal chʼujukeʼ (Sal. 19:8-11). Ezequieleʼ jach kiʼimak u yóol úuchik u yéeyaʼal utiaʼal ka u beet u profetail.
14. ¿Baʼax áant Ezequiel utiaʼal u pʼáatal listoil utiaʼal u tsʼoʼokbesik le meyaj kʼubéentaʼantiʼoʼ?
14 Le ka tsʼoʼokeʼ Jéeobaeʼ tu yaʼalaj xan tiʼ Ezequiel: «Chʼenxikinteniʼ yéetel tsʼáa ichil a puksiʼikʼal tuláakal baʼax kin waʼaliktech» (Eze. 3:10). Jéeobaeʼ táan kaʼach u yaʼalik tiʼ Ezequiel ka u yil u kʼaʼajsik le baʼaxoʼob tsʼíibtaʼan teʼ rollooʼ yéetel ka jach tuukulnak tiʼ le baʼax ku yaʼalikoʼ. Beyoʼ yaan kaʼach u muʼukʼaʼantal u fe yéetel yaan u naʼatik tubeel le baʼax unaj u kʼaʼaytikoʼ (Eze. 3:11). Le kéen tsʼoʼokkeʼ listo utiaʼal u béeytal u kʼaʼaytaj bey xan utiaʼal u tsʼoʼokbesik le meyaj kʼubéentaʼantiʼoʼ (ket yéetel Salmo 19:14).
TOʼONEʼ K-TSÉENTIKBA YÉETEL U TʼAAN DIOS
15. ¿Baʼax unaj k-kʼamik utiaʼal maʼ k-pʼatik le meyaj kʼubéentaʼantoʼonoʼ?
15 Toʼon xaneʼ utiaʼal maʼ k-pʼatik le meyaj kʼubéentaʼantoʼonoʼ mantatsʼ unaj k-tséentikba yéetel u Tʼaan Dios. Unaj k-kʼamik tuláakal baʼax ku yaʼalik Jéeoba. ¿Bix túun jeʼel u páajtal k-ojéeltik baʼax ku yaʼalikeʼ? Letiʼe kéen k-xok baʼax ku yaʼalik le Bibliaoʼ. Chéen baʼaleʼ, ¿baʼax jeʼel u yáantkoʼon k-il wa táan u nuʼuktaʼal k-tuukul bey xan baʼaxoʼob k-tsʼíiboltik tumen le Bibliaoʼ?
16. ¿Baʼax unaj k-beetik yéetel baʼax ku yaʼalik le Bibliaoʼ, yéetel baʼax jeʼel u yáantkoʼon k-jóoʼs u yutsileʼ?
16 K-wíinklileʼ ku muʼukʼaʼantal kéen jaankoʼon yéetel kéen k-jóoʼs u yutsil le baʼax k-jaantikoʼ. Bey túun xanoʼ k-fejeʼ ku muʼukʼaʼantal kéen k-xok le Bibliaoʼ yéetel kéen tuukulnakoʼon tiʼ le baʼax ku yaʼalikoʼ. Leloʼ letiʼe baʼax ku kaʼansiktoʼon le baʼax tsʼaʼab u yil Ezequieloʼ. Jéeobaeʼ u kʼáat ka «k-naʼajkúuntba» yéetel le baʼax ku yaʼalik le Bibliaoʼ yéetel ka k-jóoʼs u yutsil. Utiaʼal le jeʼeloʼ kʼaʼabéet k-orar, k-xook yéetel k-tuukul tiʼ le baʼax k-xokikoʼ. Yáaxeʼ k-orar tumen beyoʼ ku jeʼepajal k-puksiʼikʼal utiaʼal u kʼamik le baʼax ku yaʼalik Diosoʼ. Le kéen tsʼoʼokkeʼ k-xokik le Bibliaoʼ. Tsʼoʼoleʼ k-jóoʼsik u súutukil utiaʼal k-jach tuukul tiʼ le baʼax k-xokikoʼ. Wa k-beetik beyoʼ maas yaan u kʼuchul t-puksiʼikʼal le baʼax ku yaʼalik u Tʼaan Diosoʼ.
17. ¿Baʼaxten jach kʼaʼabéet k-jóoʼsik u súutukil k-tuukul tiʼ le baʼax k-xokik teʼ Bibliaoʼ?
17 ¿Baʼaxten jach kʼaʼabéet k-xokik le Biblia yéetel k-tuukul tiʼ baʼax ku yaʼalikoʼ? Tumen le jeʼeloʼ yaan u yáantkoʼon utiaʼal k-kʼaʼaytik le baʼaloʼob maʼalobtak ken u beet le Reinooʼ, yéetel maʼ xaaneʼ utiaʼal k-kʼaʼaytik le baʼax kun úuchul tiʼ le kʼasaʼan máakoʼoboʼ. Tsʼoʼoleʼ le kéen tuukulnakoʼon tiʼ le jatsʼuts modos ku yeʼesik Jéeobaoʼ ku béeytal k-maas bisikba tu yéetel. Bey túunoʼ ku yantaltoʼon jeetsʼelil yéetel kiʼimak óolal, leloʼ bey jeʼex ka k-disfrutart junpʼéel baʼal kiʼ chʼujkileʼ (Sal. 119:103).
YAAN U SEGUER K-BEETIK BAʼAX U KʼUBÉENTMAJTOʼON JÉEOBA
18. ¿Baʼax ken u tsʼáa cuenta le máakoʼob le kéen kʼuchuk u kʼiinil u xuʼulsaʼaltiʼoboʼ, yéetel baʼaxten?
18 Kex maʼ profetaʼon jeʼex Ezequieleʼ Jéeobaeʼ u kʼubéentmajtoʼon ka k-aʼal tiʼ le máakoʼob le baʼax ku yaʼalik le Bibliaoʼ. Le oʼolal k-chʼaʼtukultmaj u seguer k-kʼaʼaytaj tak ken u yaʼaltoʼon Jéeoba ka xuʼuluk k-beetik. Bey túunoʼ le kéen kʼuchuk u kʼiinil u xuʼulsaʼal tiʼ le kʼasaʼan máakoʼob tumen Jéeobaoʼ, letiʼobeʼ maʼ kun páajtal u yaʼalikoʼob wa maʼ aʼalaʼabtiʼob baʼax ku taal u kʼiiniʼ (Eze. 3:19; 18:23). Baʼaxeʼ teʼ kʼiinoʼ yaan u tsʼáaikoʼob cuenta tiʼ Dios ku taal kaʼach le baʼax k-kʼaʼaytiktiʼoboʼ.
19. ¿Baʼax kun áantkoʼon utiaʼal k-beetik le baʼax u kʼubéentmajtoʼon Diosoʼ?
19 ¿Baʼax kun áantkoʼon utiaʼal k-beetik le baʼax u kʼubéentmajtoʼon Diosoʼ? Yaan u yáantkoʼon le óoxpʼéel baʼal áant Ezequieloʼ. Yáaxeʼ k-ojel Jéeoba túuxtikoʼon, u kaʼapʼéeleʼ ku yáantkoʼon le espíritu santooʼ yéetel u yóoxpʼéeleʼ k-tséentikba yéetel u Tʼaan Dios. Yéetel u yáantaj Jéeobaeʼ yaan u béeytal k-tsʼoʼokbesik le meyaj u kʼubéentmajtoʼonoʼ yéetel yaan u béeytal u chúukpajal k-óol «tak tu xuul» (Mat. 24:13).
KʼAAY 65 Maʼ u xuʼulul a tsʼáaik a wóol
a Teʼ xookaʼ yaan k-xakʼaltik óoxpʼéel baʼaloʼob áant profeta Ezequiel u kʼaʼayt u tʼaan Dios. K-ilik bix áantaʼabik tumen Jéeobaeʼ yaan u yáantkoʼon k-ileʼ Dioseʼ jeʼel xan u yáantkoʼon k-tsʼoʼokbes le meyaj u kʼubéentmajtoʼonoʼ.