1, 2. 1) ¿Baʼax ken k-il teʼ xookaʼ? 2) ¿Baʼax eʼesik jach tu jaajil taak u yáantkoʼon Jéeoba?

 JÉEOBAEʼ jeʼel u yáantkoʼon utiaʼal ka chúukpajak k-óol k-aktáant le problemasoʼ, yéetel jeʼel u yáantkoʼon utiaʼal ka k-meyajt yéetel kiʼimak óolaleʼ. Teʼ xookaʼ yaan k-ilik bix u yáantkoʼon yéetel baʼax unaj k-beetik utiaʼal k-jóoʼsik u yutsil. Chéen baʼaleʼ anteseʼ maʼalob ka k-núuk le kʼáatchiʼaʼ: «¿Jach wa tu jaajil taak u yáantkoʼon Jéeoba?».

² Utiaʼal k-ilik u núukileʼ koʼoneʼex ilik junpʼéel tʼaan meyajnajtiʼ apóstol Pablo teʼ carta tu túuxtaj tiʼ le hebreoʼoboʼ. Letiʼeʼ tu tsʼíibtaj: «Maʼ kin sajaktal, Jéeoba áantken, ¿baʼax jeʼel u beetikten wíinikeʼ?» (Heb. 13:6). Jujunpʼéel diccionarioʼob ku tsolkoʼob u tʼaaniloʼob le Bibliaoʼ ku yaʼalikoʼobeʼ le tʼaan «áantken» ku chíikpajal teʼ versículoaʼ ku tsʼáaik naʼatbil juntúul máak táan u taal u yáalkab utiaʼal u yáantik le máax kʼáatik áantajoʼ. Chéen máans ta tuukul bix u bin u yáalkab Jéeoba utiaʼal u yáantik juntúul máax táan u muʼyaj. Leloʼ ku yeʼesiktoʼoneʼ Jéeobaeʼ jach tu jaajil taak u yáantkoʼon. Jeʼex k-ilkoʼ wa tiaʼan Jéeoba t-éeteleʼ jeʼel u páajtal u chúukpajal k-óol k-aktáant le problemas yéetel kiʼimak óolaloʼ.

3. ¿Máakalmáak le óoxpʼéel bix u yáantkoʼon Jéeoba utiaʼal k-aguantartik yéetel kiʼimak óolal le problemasoʼ?

³ ¿Bix u yáantkoʼon Jéeoba utiaʼal k-aguantartik yéetel kiʼimak óolal le problemasoʼ? U núukileʼ tiaʼan tu libroil Isaíaseʼ. Yaʼab tiʼ le profecíaʼob tu tsʼíibtaj Isaíasoʼ yaan baʼax u yil yéetel le máaxoʼob meyajtik Jéeoba teʼ kʼiinoʼobaʼ. Isaíaseʼ jatsʼuts u tsolik bix Jéeoba, tsʼoʼoleʼ séebaʼan u naʼataʼal le baʼax ku yaʼalikoʼ. Jeʼex teʼ capítulo 30, ku meyajtiʼ jatsʼuts ejemploʼob utiaʼal u  yaʼalik baʼax ku beetik Jéeoba yoʼolal u kaajal. Letiʼeʼ ku yaʼalikeʼ Jéeobaeʼ 1) ku chʼenxikintik yéetel ku núukik k-oraciónoʼob, 2) ku nuʼuktikoʼon, 3) ku bendecirkoʼon teʼ kʼiinoʼobaʼ yéetel yaan xan u bendecirkoʼon teʼ kʼiinoʼob ku taaloʼoboʼ. Beoraaʼ koʼoneʼex xakʼaltik le óoxpʼéel baʼaloʼob tsʼoʼok k-aʼalikaʼ.

4. 1) ¿Baʼax tu yaʼalaj Jéeoba yoʼolal le judíoʼob tu kʼiiniloʼob Isaíasoʼ, yéetel baʼax tu chaʼaj u yúuchultiʼob? 2) ¿Baʼax esperanzail tu tsʼáaj Jéeoba tiʼ le judíoʼob ku yuʼubikoʼob tʼaanoʼ? (Isaías 30:18, 19).

⁴ Tu káajbal le capítulo 30, Jéeobaeʼ tu yaʼaleʼ le judíoʼoboʼ ‹paalaloʼob tercoʼob› yéetel «maʼ tu xuʼulul u niktal u kʼebanoʼob». Tsʼoʼoleʼ ka tu yaʼalaj: «Letiʼobeʼ junpʼéel kaaj maʼatech u yuʼubikoʼob tʼaan, [...] maʼatech u yóotik u yuʼuboʼob baʼax ku yaʼalik Jéeoba» (Isa. 30:1, 9). Tumen maʼatech u yuʼubik tʼaan le judíoʼoboʼ Isaíaseʼ tu yaʼaleʼ Jéeobaeʼ yaan u chaʼik u bin kʼaasil tiʼob (Isa. 30:5, 17; Jer. 25:8-11). Leloʼ jach bey úuchikoʼ tumen le ka máan kʼiineʼ le babilonioʼoboʼ tu bisoʼob le judíoʼob utiaʼal ka u beet u esclavoiloʼoboʼ. Chéen baʼaleʼ ichil le judíoʼob bisaʼaboʼoboʼ yaan xan máaxoʼob ku yuʼubikoʼob kaʼach u tʼaan Jéeobaiʼ. Le oʼolaleʼ le profeta Isaíasoʼ yaan junpʼéel baʼax jatsʼuts unaj u yaʼalik tiʼ letiʼob. Unaj u yaʼaliktiʼobeʼ Jéeobaeʼ yaan u kʼuchul u kʼiinil u kaʼa eʼesik u yutsil tiʼob (xok Isaías 30:18, 19). Le baʼax tu yaʼalaj Jéeobaoʼ béeychaji. Le ka kʼuch u kʼiinileʼ tu jáalkʼabtaj le judíoʼob yanoʼob Babiloniaoʼ. Le kéen u yaʼal le teksto «Jéeobaeʼ jach táan u páaʼtik u súutukil utiaʼal u yeʼesikteʼex u yutsil», ku yeʼesikeʼ deporsi yaan kaʼach u máan tiempo utiaʼal ka jáalkʼabtaʼak le judíoʼoboʼ. Bey túunoʼ le ka máan 70 añoseʼ Jéeobaeʼ tu chaʼaj u suut jujuntúul judíoʼob tu kaajil Jerusalén (Isa. 10:21; Jer. 29:10). Le ka suunajoʼob tu luʼumoʼobeʼ, le judíoʼob táan u yokʼoloʼob le táan u bisaʼaloʼob kaʼachoʼ, beoraaʼ táan u yokʼoloʼob tumen kiʼimak u yóoloʼob tsʼoʼok u suutoʼob.

5. ¿Baʼax táan kaʼach u yaʼalik Isaías 30:19?

⁵ Teʼ kʼiinoʼobaʼ jach ku líiʼsik k-óol le tʼaanoʼobaʼ: «Dioseʼ seguro yaan u yeʼesiktech u yutsil kéen u yuʼub táan a sen kʼáatik áantaj» (Isa. 30:19). Isaíaseʼ táan kaʼach u yaʼalikeʼ Jéeobaeʼ yaan u chʼenxikintik k-oraciónoʼob yéetel yaan u núukiktoʼon tu séebaʼanil. Le profetaoʼ ku yaʼalik xan: «Letiʼeʼ yaan u núukik a oración chéen pʼelak u yuʼubik». Le tekstoaʼ ku kʼaʼajsiktoʼoneʼ le k-Taata yaan teʼ kaʼanoʼ maʼ chéen jeʼel u yóotik u yáant le máax táan u kʼáatik áantajoʼ, baʼaxeʼ jach ku tsʼíiboltik u beetik. ¿Máasaʼ le jeʼeloʼ jach ku yáantkoʼon k-aguantart yéetel kiʼimak óolal le problemas ku yantaltoʼonoʼ?

6. Le baʼax tu yaʼalaj Isaíasoʼ, ¿bix u yeʼesik Jéeobaeʼ ku chʼenxikintik le oración ku beetik cada juntúul tiʼ le máaxoʼob meyajtikoʼ?

⁶ Le versículo 19, ku yeʼesiktoʼon xaneʼ Jéeobaeʼ ku chʼenxikintik le oraciónoʼob ku beetik cada juntúul tiʼ toʼonoʼ, ¿baʼaxten k-aʼalik leloʼ? Tumen tu yáax jaatsil le capítulo 30 tiʼ Isaíasoʼ Jéeobaeʼ táan u tʼanik tuláakal u kaajal le oʼolal ku yaʼaliktiʼob «teʼex», chéen baʼaleʼ teʼ versículo 19, táan u tʼanik cada juntúul tiʼ le máaxoʼob meyajtikoʼ le oʼolal ku yaʼalik «techeʼ». Teʼ versículo 19, Isaíaseʼ ku yaʼalik: «Techeʼ maʼ bíin kaʼa okʼolnakechiʼ», «yaan u yeʼesiktech u yutsil», «yaan u núukik a oración». Jéeobaeʼ juntúul taatatsil jach u yaabiltmaj u paalal, le oʼolaleʼ le kéen u yil lubaʼan u yóol juntúul tiʼ letiʼobeʼ maʼatech u yaʼaliktiʼ: «Kʼaʼabéet u chúukpajal a wóol jeʼex a sukuʼuneʼ». Baʼaxeʼ letiʼeʼ ku chʼenxikintik le oración ku beetik cada juntúul tiʼ toʼonoʼ yéetel ku yilik u yáantik (Sal. 116:1; Isa. 57:15).

7. ¿Bix tu yeʼesil Isaías yéetel Jesús unaj k-orar mantatsʼ?

⁷ Le kéen orarnakoʼon tiʼ Dios yoʼolal  junpʼéel problemaeʼ maʼ xaaneʼ le yáax baʼax ken u beetoʼ letiʼe u tsʼáaiktoʼon u muukʼil utiaʼal k-aguantarkoʼ. Chéen baʼaleʼ, ¿kux túun wa maʼ tu xuʼulul le problemaoʼ? Maʼ xaaneʼ yaan u kʼaʼabéettal k-kʼáatiktiʼ yaʼab u téenel ka u tsʼáatoʼon u muukʼil utiaʼal k-aguantartik. Leloʼ jach letiʼe baʼax ku yaʼalik Jéeoba ka k-beetoʼ. Le profeta Isaíasoʼ ku yaʼalik: «Maʼ u xuʼulul a orareʼex tiʼ letiʼ» (Isa. 62:7). Leloʼ ku yeʼesiktoʼoneʼ unaj k-orar tiʼ Jéeoba mantatsʼ. Ku kʼaʼajsiktoʼon xan junpʼéel baʼax tu yaʼalaj Jesús yoʼolal le oraciónoʼ, lelaʼ tiʼ tsʼíibtaʼan tiʼ Lucas 11:8 tak 10 yéetel 13. Letiʼeʼ meyajnajtiʼ ejemploʼob utiaʼal u yeʼesiktoʼon maʼ unaj ‹u xuʼulul k-sen kʼáatik› tiʼ Dios ka u tsʼáatoʼon espíritu santoiʼ. Tsʼoʼoleʼ jeʼel xan u páajtal k-kʼáatik tiʼ Jéeoba ka u yáantoʼon k-chʼaʼ maʼalob decisiónoʼobeʼ.

8. ¿Bix béeychajik le baʼax ku yaʼalik Isaías 30:20, 21?

⁸ (Xok Isaías 30:20, 21). Le soldadoʼob babilonioʼoboʼ año y medio tu baʼpachtoʼob Jerusalén. Teʼ kʼiinoʼob jeʼeloʼ le judíoʼoboʼ jach muʼyajnajoʼob. Le baʼax ku muʼyajtikoʼoboʼ pʼáat bey u yoʼochoʼob sáamsamaleʼ yéetel pʼáat xan bey jeʼex le jaʼ ku yukʼikoʼoboʼ. Chéen baʼaleʼ teʼ versículo 20 yéetel 21, Jéeobaeʼ tu yaʼalajtiʼobeʼ wa ku kʼexkoʼob baʼax ku beetkoʼobeʼ yaan u salvartaʼaloʼob. Isaíaseʼ tu yaʼaleʼ Jéeobaeʼ letiʼe Máax jach maʼalob u kaʼansajoʼ, letiʼ kaʼansik u kaajal, letiʼ kun kaʼanskoʼob utiaʼal u adorarkoʼob jeʼex unajeʼ. Le baʼax tu yaʼalaj Isaíasoʼ béeychaj le ka jóokʼ le judíoʼob tu luʼumil Babiloniaoʼ. Jéeobaeʼ tu yeʼesaj jach maʼalob u kaʼansaj. Yéetel u yáantajeʼ le judíoʼoboʼ béeychaj u kaʼa adoraroʼob jeʼex unajeʼ. Teʼ kʼiinoʼobaʼ Jéeoba xan kaʼanskoʼon, leloʼ jach ku beetik u kiʼimaktal k-óol.

9. Aʼal junpʼéel bix u nuʼuktikoʼon Jéeoba teʼ kʼiinoʼobaʼ.

⁹ Jach kiʼimak k-óol táan u kaʼanskoʼon Jéeoba. Teʼ versículoʼobaʼ Isaíaseʼ ku ketikoʼon yéetel j-xoknáaloʼob táan u kaʼansaʼaloʼob tumen Jéeoba, letiʼeʼ kaʼapʼéel bix u kaʼanskoʼon. Yáaxeʼ Isaíaseʼ ku yaʼalik: «A wichoʼobeʼ yaan u yilkoʼob le Máax jach maʼalob u kaʼansajoʼ». Yéetel le tʼaanoʼobaʼ Isaíaseʼ táan u yaʼalikeʼ le máax kaʼanskoʼonoʼ waʼalakbal aktáan tiʼ toʼon. ¿Bix u kaʼanskoʼon Jéeoba teʼ kʼiinoʼobaʼ? Utiaʼal u kaʼanskoʼoneʼ ku meyajtiʼ u kaajal. Toʼoneʼ jach k-tsʼáaik u diosboʼotikil yoʼolal le kaʼansaj ku tsʼaʼabaltoʼon teʼ muchʼtáambaloʼoboʼ, teʼ asambleaʼoboʼ, teʼ publicaciónoʼoboʼ, teʼ JW Broadcastingoʼ® yéetel uláakʼ jejeláas bixiʼ. Le kaʼansaj ku tsʼaʼabaltoʼonoʼ ku yáantkoʼon utiaʼal k-aguantartik yéetel kiʼimak óolal le problemasoʼ.

10. ¿Bix k-uʼuyik u tʼaan Jéeoba paachil tiʼ toʼon?

 ¹⁰ Isaíaseʼ ku yeʼesik le u kaʼapʼéel bix u kaʼanskoʼon Jéeobaoʼ. Letiʼeʼ ku yaʼalik: «A xikneʼexeʼ yaan u yuʼubikoʼob junpʼéel tʼaan paachil tiʼ teʼex». Teʼelaʼ le profetaoʼ táan u yaʼalikeʼ Jéeoba le máax kaʼanskoʼonoʼ táan u taal u xíimbal paachil tiʼ toʼon yéetel táan u taal u yaʼaliktoʼon tuʼux unaj k-bin. Teʼ kʼiinoʼobaʼ, ¿bix k-uʼuyik u tʼaan Jéeoba paachil tiʼ toʼon? Letiʼe kéen k-xok le Bibliaoʼ. U jaajileʼ beyoʼ tumen úuch tsʼíibtaʼak le Bibliaoʼ (Isa. 51:4).

11. ¿Baʼax unaj k-beetik utiaʼal k-aguantartik yéetel kiʼimak óolal le problemasoʼ, yéetel baʼaxten?

¹¹ Jeʼex tsʼoʼok k-ilkoʼ Jéeobaeʼ utiaʼal u nuʼuktikoʼoneʼ ku meyajtiʼ u kaajal bey xan le Bibliaoʼ. ¿Baʼax unaj k-beetik utiaʼal k-jóoʼsik u yutsil? Isaíaseʼ ku yaʼalik kaʼapʼéel baʼal jeʼel u yáantkoʼoneʼ. Yáaxeʼ ku yaʼalik «lelaʼ letiʼe bejaʼ» yéetel u kaʼapʼéeleʼ «xeeneʼexiʼ» (Isa. 30:21). Leloʼ ku yeʼesiktoʼoneʼ maʼ chéen unaj k-kʼaj óoltik le bejoʼ, baʼaxeʼ unaj k-biniʼ. Le Bibliaoʼ bey xan le baʼaxoʼob ku kaʼansiktoʼon u kaajal Diosoʼ ku yáantkoʼon k-il baʼax uts tu tʼaan Jéeoba ka k-beete yéetel bix jeʼel u páajtal k-tsʼáaik ichil k-kuxtaleʼ. Utiaʼal k-aguantartik yéetel kiʼimak óolal le problemasoʼ kʼaʼabéet k-beetik le kaʼapʼéel baʼax tsʼoʼok k-aʼalikoʼ. Tsʼoʼoleʼ k-ojel seguro yaan u bendecirkoʼon Jéeoba.

12. Jeʼex u yaʼalik Isaías 30:23-26, ¿bix ken u bendecirtil kaʼach Jéeoba u kaajal?

¹² (Xok Isaías 30:23-26). ¿Úuchjeakileʼ bix béeychajik le profecíaaʼ? Béeychaj le ka suunaj le judíoʼob tu luʼumil Israeloʼ. Letiʼobeʼ jach bendecirtaʼaboʼob yéetel jejeláas baʼaloʼob. Jéeobaeʼ tu beetaj u yantal yaʼab baʼal u jaantoʼob. Chéen baʼaleʼ tu beetaj junpʼéel baʼax maas jach maʼalob tu yoʼolaloʼob. Le táan u yilik le judíoʼob u kaʼa adorarkoʼob Dios jeʼex unajoʼ, letiʼeʼ tu beetaj u yantal maas yaʼab janal espiritual tiʼob. U kaajal Dioseʼ mix juntéen kaʼach u yil le bukaʼaj bendiciónoʼoboʼ. Jeʼex u yaʼalik le versículo 26, Jéeobaeʼ jujunpʼíitil binik u maas sáasilkuntik u beeloʼob (Isa. 60:2). Le oʼolal le judíoʼoboʼ kiʼimakchaj u yóoloʼob yéetel yanchajtiʼob u muukʼil u seguer u meyajtikoʼob Jéeoba. Seguro jach kiʼimakchaj u yóol u puksiʼikʼaloʼob (Isa. 65:14).

13. Teʼ kʼiinoʼobaʼ, ¿bix tsʼoʼok u béeytal le profecía ku tʼaan tiʼ u kaʼa adorartaʼal Dios jeʼex unajoʼ?

¹³ Teʼ kʼiinoʼobaʼ, ¿tsʼoʼok wa u béeytal le profecía ku tʼaan tiʼ u kaʼa adorartaʼal Dios jeʼex unajoʼ? Tsʼoʼoki. Desde tu añoil 1919, u millonesil máakoʼob tsʼoʼok u jóokʼloʼob ichil le Nojoch Babilonia wa ichil le religiónoʼob maʼatech u kaʼanskoʼob u jaajiloʼ. Tuláakal le máaxoʼob tsʼoʼok u jóokʼloʼob ichiloʼ tsʼoʼok u  bisaʼaloʼob tiʼ junpʼéel lugar ku keʼetel yéetel junpʼéel paraíso (Isa. 51:3; 66:8). ¿Baʼaxten bey junpʼéel paraísoeʼ?

14. ¿Máakalmáak le lugar ku keʼetel yéetel junpʼéel paraísooʼ, yéetel máaxoʼob kajaʼanoʼobiʼ? (Ilawil le notaoʼ).

¹⁴ Desde tu añoil 1919, le sukuʼunoʼob yéeyaʼanoʼoboʼ jach kiʼimak u yóoloʼob tiaʼanoʼob teʼ lugar ku keʼetel yéetel junpʼéel paraísooʼ. b Le ka máan le kʼiinoʼoboʼ le uláakʼ tamanoʼob táan u páaʼtik u kuxtaloʼob way Luʼumeʼ ookoʼob xan teʼ lugar ku keʼetel yéetel junpʼéel paraísooʼ yéetel jach tsʼoʼok u bendecirtaʼaloʼob tumen Jéeoba (Juan 10:16; Isa. 25:6; 65:13).

15. ¿Tuʼux yaan le lugar ku keʼetel yéetel junpʼéel paraísooʼ?

¹⁵ Teʼ kʼiinoʼobaʼ, ¿tuʼux yaan le lugar ku keʼetel yéetel junpʼéel paraísooʼ? Le lugaraʼ tiaʼan tiʼ tuláakal yóokʼol kaabeʼ, tumen le máaxoʼob meyajtik Jéeobaoʼ tiaʼanoʼob xan tiʼ tuláakal le Luʼumaʼ. Le oʼolaleʼ kex jeʼel tuʼuxak kajaʼanoʼoneʼ jeʼel u páajtal k-antal teʼ lugar ku keʼetel yéetel junpʼéel paraísooʼ. Chéen baʼaleʼ utiaʼal le jeʼeloʼ kʼaʼabéet k-apoyartik le u jaajil adoraciónoʼ.

16. ¿Baʼax unaj k-beetik utiaʼal u seguer k-ilik kiʼichkelem le lugar ku keʼetel yéetel junpʼéel paraísooʼ?

¹⁶ Junpʼéel tiʼ le baʼaloʼob jeʼel u yáantkoʼon utiaʼal k-pʼáatal teʼ lugar ku keʼetel yéetel junpʼéel paraísooʼ letiʼe k-apreciartik u kaajal Dios yaan tiʼ tuláakal yóokʼol kaaboʼ. ¿Bix jeʼel k-beetik le jeʼeloʼ? Letiʼe kéen chʼíikikoʼon k-il le baʼaloʼob maʼalobtak ku beetik le máaxoʼob meyajtik Diosoʼ maʼ le baʼaloʼob maʼ maʼalobtak ku beetkoʼoboʼ (Juan 17:20, 21). Utiaʼal k-ilik baʼaxten jach kʼaʼabéet k-beetik leloʼ koʼoneʼex tsʼáaik junpʼéel ejemplo. Tiʼ junpʼéel kʼáaxeʼ yaʼab jejeláas cheʼob yanoʼobiʼ. Bey túun xanoʼ le jejeláas máakoʼob yanoʼob teʼ lugar ku keʼetel yéetel junpʼéel paraísooʼ beyoʼob jeʼex le jejeláas cheʼob yanoʼob teʼ kʼáaxoʼ (Isa. 44:4; 61:3). ¿Máasaʼ junpʼéel kʼáaxeʼ maʼ tu xuʼulul u yilaʼal kiʼichkelem chéen tumen maʼ maʼalob yanil jujunpʼéel tiʼ le cheʼoboʼ? Leloʼ ku yeʼesiktoʼoneʼ maʼ xan unaj u xuʼulul k-ilik bukaʼaj jatsʼutsil u kaajal Dios yéetel bix u múul meyaj chéen yoʼolal le baʼax maʼ maʼalob ku beetik u maasiloʼ wa yoʼolal le baʼaxoʼob k-beetiktoʼonoʼ.

17. ¿Baʼax jeʼel u páajtal u beetik cada juntúul tiʼ toʼon utiaʼal u maas biskuba le múuchʼuliloʼ?

 ¹⁷ ¿Baʼax jeʼel u páajtal u beetik cada juntúul tiʼ toʼon utiaʼal u maas biskuba le múuchʼuliloʼ? Letiʼe ka k-il ka yanak jeetsʼelil ichiloʼonoʼ (Mat. 5:9; Rom. 12:18). Cada ken k-il k-bisikba maʼalob yéetel le sukuʼunoʼoboʼ táan k-áantaj utiaʼal u maas jatsʼutstal le lugar ku keʼetel yéetel junpʼéel paraísooʼ. Maʼatech u tuʼubultoʼon Jéeoba natsʼ tuláakal le máaxoʼob yanoʼob ichil u kaajaloʼ (Juan 6:44). ¡Chéen tukult bukaʼaj kiʼimakil u yóol Jéeoba le kéen u yil k-áantaj utiaʼal ka yanak jeetsʼelil ichil le máaxoʼob meyajtikoʼ! (Isa. 26:3; Ageo 2:7).

18. ¿Tiʼ baʼax unaj k-tuukul, yéetel baʼaxten?

¹⁸ ¿Baʼax jeʼel u páajtal k-beetik utiaʼal k-jóoʼsik u yutsil le bendiciónoʼob ku tsʼáaik Jéeoba tiʼ le máaxoʼob meyajtikoʼ? Unaj k-jóoʼsik u súutukil k-tuukul tiʼ le baʼax k-kanik teʼ Bibliaoʼ bey xan teʼ publicaciónoʼoboʼ. Wa k-xakʼalxook yéetel k-tuukul tiʼ le baʼax k-xokikoʼ le jatsʼuts modos kun antaltoʼonoʼ yaan u péeksikoʼon ‹k-eʼes nojoch yaabilaj t-baatsil jeʼex le yaabilaj yaan ichil sukuʼuntsiloʼoboʼ› (Rom. 12:10). Le kéen tuukulnakoʼon tiʼ bix u bendecirkoʼon Jéeoba teʼ kʼiinoʼobaʼ ku taaktal k-maas bisikba tu yéetel. Yéetel kéen tuukulnakoʼon tiʼ le bendiciónoʼob ken u tsʼáatoʼon maas táaniloʼ ku maas antaltoʼon esperanza yéetel ku taaktal k-meyajtik utiaʼal mantatsʼ. Tuláakal le jeʼelaʼ ku yáantkoʼon utiaʼal ka maas kiʼimakchajak k-óol mientras táan k-meyajtik Jéeoba.

19. 1) Jeʼex u yaʼalik Isaías 30:18, ¿baʼax jach k-ojel? 2) ¿Baʼax kun áantkoʼon utiaʼal k-aguantartik jeʼel baʼaxakeʼ?

¹⁹ Le kéen tsʼoʼokok u xuʼulsik Jéeoba tiʼ le kʼasaʼan yóokʼol kaabaʼ «yaan u líikʼil» utiaʼal u yeʼesiktoʼon u yutsil (Isa. 30:18). «Jéeobaeʼ juntúul Dios ku beetik justicia», le oʼolaleʼ maʼ ken u chaʼa u pʼáatal utiaʼal mantatsʼ u kʼasaʼan yóokʼol kaab Satanás, baʼaxeʼ chéen le bukaʼaj tiempo ku yilik kʼaʼabéeteʼ (Isa. 25:9). Jeʼex toʼoneʼ, Jéeobaeʼ jach táan xan u páaʼtik u kʼuchul u kʼiinil u salvarkoʼon tiʼ le kʼasaʼan yóokʼol kaabaʼ. Chéen baʼaleʼ mientras u kʼuchul le kʼiin jeʼeloʼ unaj k-apreciartik le u páajtalil k-orar tiʼ letiʼoʼ, le k-xakʼalxoktik le Bibliaoʼ yéetel le k-tsʼáaik ichil k-kuxtal le baʼax ku yaʼalikoʼ bey xan le k-tuukul tiʼ le bendiciónoʼob ku tsʼáaik Dios tiʼ le máaxoʼob meyajtikoʼ. Wa k-beetik tuláakal lelaʼ Jéeobaeʼ yaan u yáantkoʼon utiaʼal u seguer k-meyajtik yéetel kiʼimak óolal bey xan utiaʼal k-aguantartik jeʼel baʼaxakeʼ.