XOOK 47
Maʼ a chaʼik tiʼ mix baʼal ka u náachkuntech tiʼ Jéeoba
«Teneʼ, tiʼ teech kin kʼubik in wóol Jéeoba Dios» (SAL. 31:14).
KʼAAY 122 Maʼ u péek a wóol, pʼáaten yiknal Jéeoba
TIʼ BAʼAX KUN TʼAAN a
1. ¿Baʼaxten k-aʼalikeʼ Jéeobaeʼ u kʼáat ka pʼáatkoʼon naatsʼ tu yiknal?
JÉEOBAEʼ ku yaʼaliktoʼon ka náatsʼkoʼon tu yiknal (Sant. 4:8). Letiʼeʼ u kʼáat ka k-il bey k-Dioseʼ, bey k-Taataeʼ yéetel bey k-amigoeʼ. Letiʼeʼ ku núukik k-oraciónoʼob yéetel ku yáantkoʼon kéen k-aktáant jeʼel baʼaxakeʼ. Tsʼoʼoleʼ utiaʼal u kaʼanskoʼon yéetel u kanáantkoʼoneʼ ku meyajtiʼ u kaajal. Chéen baʼaleʼ, ¿bix jeʼel u páajtal k-pʼáatal naatsʼ tiʼ letiʼeʼ?
2. ¿Baʼax unaj k-beetik utiaʼal k-natsʼikba tu yiknal Jéeoba?
2 Utiaʼal k-pʼáatal yiknal Jéeobaeʼ kʼaʼabéet k-orar, k-xokik le Bibliaoʼ yéetel k-tuukul tiʼ le baʼax ku yaʼalikoʼ. Wa k-beetik leloʼ yaan k-yaabiltik yéetel yaan k-tsʼáaik u graciasil le baʼax ku beetik t-oʼolaloʼ. Tsʼoʼoleʼ yaan k-tsʼíiboltik k-uʼuyik u tʼaan yéetel yaan k-alabartik tumen jach ku merecertik (Apo. 4:11). Jeʼex kun bin k-maas kʼaj óoltik Jéeobaeʼ bey kun bin k-maas confiar tiʼ letiʼ yéetel tiʼ u kaajal.
3. 1) ¿Baʼax ku beetik le Kʼaasilbaʼal utiaʼal u náachkuntkoʼon tiʼ Jéeobaoʼ? 2) ¿Baʼax kʼaʼabéettoʼon utiaʼal k-pʼáatal naatsʼ tiʼ Jéeoba yéetel tiʼ u kaajal? (Salmo 31:13, 14).
3 Chéen baʼaleʼ le Kʼaasilbaʼaloʼ ku beetik jejeláas baʼaloʼob utiaʼal k-náachtal tiʼ Jéeoba, maases wa yaan baʼax k-muʼyajtik. ¿Bix u beetik? Letiʼeʼ ku beetik tuláakal le ku páajtal utiaʼal u xuʼulul k-confiar tiʼ Jéeoba yéetel tiʼ u kaajal. Chéen baʼaleʼ wa muʼukʼaʼan k-fe yéetel jach k-confiar tiʼ Jéeobaeʼ yaan k-pʼáatal naatsʼ tiʼ letiʼ bey xan tiʼ u kaajal (xok Salmo 31:13, 14).
4. ¿Baʼax ken k-il teʼ xookaʼ?
4 Teʼ xookaʼ yaan k-ilik óoxpʼéel baʼaloʼob k-aktáantik way yóokʼol kaab jeʼel u beetik u xuʼulul k-confiar tiʼ Jéeoba yéetel tiʼ u kaajaleʼ. ¿Bix jeʼel u beetkoʼob k-náachtal tiʼ Dioseʼ? ¿Baʼax jeʼel u páajtal k-beetik utiaʼal maʼ k-lúubul tu kʼab le Kʼaasilbaʼaloʼ?
LE KÉEN YANAKTOʼON PROBLEMAS
5. Le problemasoʼ, ¿bix jeʼel u beetik u xuʼulul k-confiar tiʼ Jéeoba yéetel tiʼ u kaajaleʼ?
5 Maʼ xaaneʼ jeʼel k-pʼektaʼal tumen k-láakʼtsiloʼobeʼ wa jeʼel k-perdertik k-meyajeʼ. Le jeʼeloʼ yaan horaeʼ jeʼel u beetik u xuʼulul k-confiar tiʼ u kaajal Jéeobaeʼ yéetel jeʼel u beetik k-náachtal tiʼ letiʼeʼ. ¿Bix túun u yúuchul leloʼ? Yaan kʼiineʼ wa tsʼoʼok u xáantal táan k-aktáantik junpʼéel problemaeʼ jeʼel u beetik k-tuklik mix bikʼin kun utstaleʼ yéetel jeʼel u beetik u lúubul k-óoleʼ. Leloʼ ku aprovechartik le Kʼaasilbaʼal utiaʼal u beetik k-tuklik maʼ u yaabiltmoʼon Jéeobaiʼ. U kʼáat ka k-tukult tiʼ Jéeoba wa tiʼ u kaajal yaan u culpail le baʼax ku yúuchultoʼonoʼ. Leloʼ letiʼe baʼax joʼopʼ u tuklik le israelitaʼob yanoʼob kaʼach Egiptooʼ. Tu káajbaleʼ ku creerkoʼob kaʼach Jéeoba yéey Moisés yéetel Aarón utiaʼal u jóoʼsaʼaloʼob tu luʼumil Egipto (Éxo. 4:29-31). Chéen baʼaleʼ le ka tu yiloʼob tu kíimsaʼaloʼob meyaj tumen Faraóneʼ joʼopʼ u culparkoʼob Moisés yéetel Aarón, le oʼolal tu yaʼaloʼob: «Tsʼoʼok a beetkeʼex k-pʼektaʼal tumen Faraón bey xan tumen le máaxoʼob meyajtikoʼ. Yéetel le baʼax tsʼoʼok a beetkeʼexoʼ bey ka a tsʼáaʼex junpʼéel espada tiʼ Faraón utiaʼal ka u kíimsoʼoneʼ» (Éxo. 5:19-21). ¡Jach maʼ maʼalob úuchik u culparkoʼob Moisés yéetel Aaróniʼ! Wa úuch joʼopʼok a aktáantik junpʼéel problemaeʼ, ¿baʼax jeʼel u páajtal a beetik utiaʼal maʼ u xuʼulul a confiar tiʼ Jéeoba yéetel tiʼ u kaajaleʼ?
6. ¿Baʼax k-kanik tiʼ profeta Habacuk? (Habacuk 3:17-19).
6 Jeʼekʼabt a puksiʼikʼal tiʼ Jéeoba yéetel kʼub a wóol tiʼ letiʼ. Profeta Habacukeʼ yaʼab problemas tu aktáantaj. Letiʼeʼ maʼ xaaneʼ joʼopʼ u tuklik maʼ yaabiltaʼan tumen Jéeobaiʼ. Le oʼolal tu jeʼekʼabtaj u puksiʼikʼal tiʼ Jéeobaeʼ ka tu yaʼalajtiʼ: «Kiʼichkelem Yuum Jéeoba, ¿bukaʼaj tiempo kun kʼaʼabéettal in kʼáat óoltiktech ka a wáanten? ¿Tak baʼax kʼiin a wuʼuyiken? […] ¿Baʼaxten ka chaʼik u beetik u kʼasaʼanil máak?» (Hab. 1:2, 3). Jéeobaeʼ tu núukaj le oración tu beetaj Habacuk yéetel tuláakal u puksiʼikʼaloʼ (Hab. 2:2, 3). Habacukeʼ líikʼ u yóol le ka tsʼoʼok u tuukul tiʼ bix tsʼoʼok u yáantik Jéeoba u kaajaloʼ. Tu tsʼáaj cuentaeʼ yaabiltaʼan tumen Jéeoba yéetel yaan u yáantaʼal u aktáant jeʼel baʼaxak problemaileʼ (xok Habacuk 3:17-19). Leloʼ ku yeʼesikeʼ le kéen yanaktech problemaseʼ maʼalob ka orarnakech tiʼ Jéeoba, ka a jeʼekʼabt a puksiʼikʼal tiʼ yéetel ka a kʼub a wóol tiʼ letiʼ. Jéeobaeʼ jach yaan u yáantkech utiaʼal ka chúukpajak a wóol. Le kéen a wil bix u yáantkecheʼ yaan u maas muʼukʼaʼantal a fe.
7. ¿Baʼax taak kaʼach u beetik juntúul u láakʼtsil Shirley, yéetel baʼax áant Shirley utiaʼal maʼ u xuʼulul u kʼubik u yóol tiʼ Jéeoba?
7 Maʼ u xuʼulul a beetik le baʼaxoʼob suukaʼan a beetik utiaʼal a meyajtik Jéeobaoʼ. Leloʼ letiʼe baʼax áant Shirley, juntúul kiik ku taal Papúa Nueva Guinea, le ka tu aktáantaj problemasoʼ. b Letiʼobeʼ jach óotsiloʼob yéetel yaan kʼiineʼ istikyaj u yantal baʼax u jaantoʼob. Utiaʼal u beetaʼal u xuʼulul u kʼubik u yóol tiʼ Jéeobaeʼ juntúul u láakʼtsileʼ tu yaʼalajtiʼ: «Techeʼ ka waʼalik táan a wáantaʼaleʼex tumen u espíritu santo Dios. Chéen baʼaleʼ maʼ chíikaʼan u yilaʼaliʼ, tumen teʼexeʼ láayliʼ nakʼan óotsileʼexeʼ. Chéen táan a perdertik a tiempo ikil a jóokʼol kʼaʼaytaj». Shirleyeʼ ku yaʼalikeʼ yaan horaeʼ joʼopʼ u tuklik wa ku chʼaʼabloʼob en cuentail tumen Jéeoba. Letiʼeʼ ku yaʼalik: «Tu séebaʼanil orarnen tiʼ Jéeoba yéetel tin jeʼekʼabtaj in puksiʼikʼal tiʼ. Seguernaj in xokik le Bibliaoʼ bey xan le publicaciónoʼoboʼ, tsʼoʼoleʼ maʼ xuʼul in jóokʼol kʼaʼaytajiʼ mix in bin muchʼtáambal». Shirleyeʼ tu séebaʼanil tu tsʼáaj cuentaeʼ táan u kanáantaʼaloʼob tumen Jéeoba tumen ku yantal baʼal u jaantoʼob yéetel kiʼimak u yóoloʼob. Letiʼeʼ ku yaʼalik: «Tin wilaj bix úuchik u núukaʼal in oraciónoʼob tumen Jéeoba» (1 Tim. 6:6-8). Jeʼex a wilkoʼ wa ka beetik tuláakal le baʼaxoʼob suukaʼan a beetik utiaʼal a meyajtik Jéeobaoʼ mix junpʼéel problema jeʼel u beetik a náachtaltiʼeʼ.
LE KÉEN CHʼAʼPACHTAʼAK LE MÁAXOʼOB NUʼUKTIKOʼONOʼ
8. ¿Baʼax jeʼel u yúuchul tiʼ le sukuʼunoʼob nuʼuktikoʼonoʼ?
8 Teʼ kʼiinoʼobaʼ le máakoʼoboʼ ku yaʼalikoʼob baʼaloʼob maʼ jaajtak tu contra le máaxoʼob nuʼuktikoʼonoʼ. Utiaʼal le jeʼeloʼ ku meyajtiʼob nuʼukuloʼob jeʼex le redes socialesoʼ (Sal. 31:13). Jujuntúul tiʼ le sukuʼunoʼoboʼ tsʼoʼok u kʼaʼaloʼob yéetel tsʼoʼok u yaʼalaʼal jach kʼasaʼanoʼob. Teʼ yáax siglooʼ úuch junpʼéel baʼal beyoʼ. Le apóstol Pablooʼ taʼak u pooleʼ ka kʼaʼali. ¿Baʼax túun tu beetaj le u maasil cristianoʼob teʼ kʼiinoʼob jeʼeloʼ?
9. ¿Baʼax tu beetaj jujuntúul tiʼ le sukuʼunoʼob le ka tu yuʼuboʼob kʼalaʼan Pablooʼ?
9 Le kʼalaʼan Pablo tu kaajil Romaoʼ jujuntúul tiʼ le sukuʼunoʼoboʼ tu xúumpʼattoʼob Pablo (2 Tim. 1:8, 15). ¿Suʼlakchajoʼob wa tumen táan kaʼach u yaʼalaʼal jach kʼasaʼan Pablo? (2 Tim. 2:8, 9). ¿Saajkoʼob wa xan ka chʼaʼpachtaʼakoʼob? Jeʼel bixakeʼ maʼ xaaneʼ Pabloeʼ jach yaachaj u yóol, tumen letiʼeʼ tsʼoʼok kaʼach u aguantartik yaʼabkach baʼaloʼob tu yoʼolaloʼob, hasta tu tsʼáaj u kuxtal tu chiʼ kíimil (Hech. 20:18-21; 2 Cor. 1:8). Mix juntéen unaj k-beetik jeʼex le sukuʼunoʼob tu xúumpʼattoʼob Pablooʼ. ¿Baʼax unaj k-kʼaʼajsik kéen chʼaʼpachtaʼak le sukuʼunoʼob nuʼuktikoʼonoʼ?
10. ¿Baʼax unaj u kʼaʼajaltoʼon le kéen k-il táan u chʼaʼpachtaʼal le máaxoʼob nuʼuktikoʼonoʼ, yéetel baʼaxten?
10 Kʼaʼajaktech baʼaxten k-chʼaʼpachtaʼal yéetel máax beetik. Kaʼapʼéel tiʼ Timoteo 3:12, ku yaʼalik: «Tuláakal le máaxoʼob u kʼáatoʼob u tsʼáaʼob ichil u kuxtaloʼob baʼax tu kaʼansaj Cristo yéetel u adorartoʼob Dioseʼ yaan xan u chʼaʼpachtaʼaloʼob». Le oʼolal maʼ unaj u jaʼakʼal k-óol le kéen k-il táan u beetik le Kʼaasilbaʼal u chʼaʼpachtaʼal le máaxoʼob nuʼuktikoʼonoʼ. Letiʼeʼ u kʼáat u beet u xuʼulul u kʼubik u yóoloʼob tiʼ Jéeoba, yéetel toʼoneʼ ka sajakchajkoʼon (1 Ped. 5:8).
Teʼ kʼiinoʼob kʼalaʼan Pablooʼ maʼ sajakchaj Onesíforo u bin u yáantiʼ. Teʼ kʼiinoʼobaʼ jeʼex u chíikpajal teʼ fotoaʼ le sukuʼunoʼoboʼ ku bin u apoyartoʼob le sukuʼunoʼob ku kʼaʼaloʼoboʼ. (Ilawil párrafo 11 yéetel 12)
11. ¿Baʼax k-kanik tiʼ Onesíforo? (2 Timoteo 1:16-18).
11 Chúukpajak a wóol a wáant le sukuʼunoʼoboʼ (xok 2 Timoteo 1:16-18). Teʼ yáax siglooʼ yanchaj juntúul sukuʼun jach tu yáantaj Pablo le ka kʼaʼaloʼ, u kʼaabaʼeʼ Onesíforo. Pabloeʼ tu yaʼalaj tu yoʼolal: «Maʼ suʼlakchaj ikil kʼaxaʼanilen yéetel cadenaʼobiʼ». Onesíforoeʼ tu beetaj tuláakal le ku páajtal utiaʼal u yilik tuʼux yaan Pablo, le ka kʼuch tu yiknaleʼ tu yáantaj. ¡Tu tsʼáaj u kuxtal tu chiʼ kíimil tu yoʼolal Pablo! ¿Baʼax ku kaʼansiktoʼon leloʼ? Kex chan saajkoʼoneʼ unaj k-ilik k-áantik le sukuʼunoʼob ku chʼaʼpachtaʼaloʼoboʼ. Unaj k-beetik tuláakal le ku páajtal utiaʼal maʼ k-pʼatkoʼob tu juunaloʼob (Pro. 17:17). Jach kʼaʼabéet k-áantkoʼob yéetel k-eʼesik yaabilaj tiʼob.
12. ¿Baʼax ka kanik tiʼ le sukuʼunoʼob yéetel le kiikoʼob yanoʼob Rusiaoʼ?
12 Tuukulnakech tiʼ baʼax ku beetik le sukuʼunoʼob yéetel le kiikoʼob tu luʼumil Rusia le kéen kʼaʼalak jujuntúul sukuʼunoʼoboʼ. Letiʼobeʼ ku bin u apoyartoʼob le sukuʼunoʼob ku bisaʼaloʼob tu táan juezoʼoboʼ. Leloʼ ku yeʼesikeʼ kex ka aʼalaʼak baʼaloʼob maʼ jaajtak tu contra le sukuʼunoʼob nuʼuktikoʼonoʼ wa kex ka kʼaʼalkoʼobeʼ maʼ unaj a sajaktaliʼ. Orarnen tu yoʼolaloʼob yéetel ilawil bix jeʼel a wáantkoʼobeʼ bey xan u familiaʼob (Hech. 12:5; 2 Cor. 1:10, 11).
LE KÉEN AʼALAʼAKTOʼON BAʼAL
13. Le u yaʼalaʼaltoʼon baʼaloʼ, ¿bix jeʼel u beetik u xuʼulul k-kʼubik k-óol tiʼ Jéeoba yéetel tiʼ u kaajaleʼ?
13 Maʼ xaaneʼ jujuntúul tiʼ k-láakʼtsiloʼob, k-éet xookoʼob wa k-éet meyajoʼobeʼ jeʼel u yaʼalikoʼobtoʼon baʼal tumen k-kʼaʼaytaj wa tumen k-tsʼáaik ichil k-kuxtal le baʼax ku yaʼalik Jéeobaoʼ (1 Ped. 4:4). Maʼ xaaneʼ yanoʼobeʼ ku yaʼalikoʼobtoʼon: «Ka lúubul utsil ten, chéen baʼaleʼ jach estricto a religión yéetel jach jelaʼan baʼax ka beetkeʼex». Maʼ xaan xaneʼ yoʼolal bix k-tratartik le expulsadoʼoboʼ ku yaʼalikoʼobtoʼon: «Tsʼoʼoleʼ ka waʼalikeʼex a yaabiltmeʼex máak». Tʼaanoʼob beyaʼ jeʼel u beetkoʼob u kaʼapʼéeltal k-tuukuleʼ yéetel maʼ xaaneʼ jeʼel k-tuklikeʼ: «¿Maʼ wa ta tʼaan jach yaʼab baʼax ku kʼáatik Jéeobaiʼ? ¿Maʼ wa ta tʼaan jach estricto u kaajaliʼ?». Wa letiʼe baʼax ku yúuchultechoʼ, ¿baʼax jeʼel u páajtal a beetik utiaʼal maʼ a náachtal tiʼ Jéeoba yéetel tiʼ u kaajaleʼ?
Jobeʼ maʼ tu creertaj le baʼaloʼob maʼ jaajtak aʼalaʼabtiʼoʼ, baʼaxeʼ chúukpaj u yóol u meyajt Jéeoba (Ilawil párrafo 14)
14. ¿Baʼax unaj k-beetik le kéen aʼalaʼaktoʼon baʼal ikil k-beetik baʼax ku yaʼalik Jéeoba? (Salmo 119:50-52).
14 Tsʼáa a wóol a beet baʼax ku yaʼalik Jéeoba. Jobeʼ kex aʼalaʼab baʼal tiʼeʼ tu yilaj u beetik baʼax ku yaʼalik Jéeoba. Juntúul tiʼ le máaxoʼob ku yaʼalikubaʼob kaʼach u amigo Joboʼ u kʼáat kaʼach ka u tukult Jobeʼ, Jéeobaeʼ baʼaliʼ u kʼáajtiʼ wa ka u beet baʼax maʼalobeʼ wa maʼ (Job 4:17, 18; 22:3). Chéen baʼaleʼ Jobeʼ maʼ tu creertaj le baʼax aʼalaʼabtiʼoʼ, u yojel maʼalob baʼax ku yaʼalaʼaltiʼ tumen Jéeoba, le oʼolal tu tsʼáaj u yóol u beete. Letiʼeʼ chúukpaj u yóol u beet baʼax maʼalob kex jeʼel baʼalak aʼalaʼabtiʼeʼ (Job 27:5, 6). Leloʼ ku yeʼesikeʼ kex jeʼel baʼaxak ka u yaʼaltech u maasileʼ maʼ unaj a tuklik wa maʼ maʼalob baʼax ku yaʼaliktech Jéeobaiʼ. Kʼaʼajaktech bix tsʼoʼok u yáantkech ichil a kuxtal le a beetik baʼax ku yaʼalikoʼ. ¿Máasaʼ yaʼab utsiloʼob tsʼoʼok u taasiktech? Apoyart baʼax ku yaʼalik u kaajal Dios, beyoʼ kex jeʼel baʼalak ka aʼalaʼaktecheʼ junpuliʼ maʼ kan náachtal tiʼ Jéeoba (xok Salmo 119:50-52).
15. ¿Baʼaxten sen aʼalaʼab baʼal tiʼ Brizit tumen u familia?
15 Koʼoneʼex ilik baʼax úuch tiʼ Brizit, juntúul kiik kajaʼan India. Letiʼeʼ tu aguantartaj u yaʼalaʼal baʼal tiʼ tumen u láakʼtsiloʼob. Le kiikoʼ okjaʼanaj tu añoil 1997, maʼ sen úuch tiʼ leloʼ pʼáat minaʼan meyaj tiʼ u yíicham, u yíichameʼ maʼ Testigoiʼ. Le oʼolal le íichamtsilaʼ tu chʼaʼtuklaj u bin kajtal yéetel u yatan bey xan yéetel u hijaʼob teʼ tuʼux yaan u papáʼoboʼ, letiʼobeʼ táanxel kaajil yanoʼob kaʼachi. Chéen baʼaleʼ leloʼ maʼ tu beetaj u xuʼulul le problemas yaantiʼoboʼ. U yíicham Briziteʼ maʼ yanchaj meyaj tiʼiʼ, le oʼolal Briziteʼ yanchaj u meyaj bul semana utiaʼal u mantenertik u familia. Tsʼoʼoleʼ 350 kilómetros (220 millas) yanil le múuchʼulil maas naatsʼ tiʼoboʼ. Tumen Testigo Briziteʼ sen pʼektaʼab tumen u láakʼtsiloʼob u yíicham. Yoʼolal leloʼ letiʼ yéetel u familiaeʼ yanchaj u binoʼob kajtal yaanal tuʼux. Tu tsʼookeʼ chéen ka kíim u yíicham, tsʼoʼoleʼ juntúul u hija yaan 12 años tiʼeʼ kíim yoʼolal cáncer. U maas yajileʼ u láakʼtsiloʼob Briziteʼ tu culpartoʼob yoʼolal le baʼaxoʼob úuchtiʼoʼ. Tu yaʼaloʼobtiʼeʼ úuchtiʼ tuláakal leloʼ tumen tu beetuba u testigo Jéeoba. Kex beyoʼ letiʼeʼ maʼ xuʼul u kʼubik u yóol tiʼ Jéeobaiʼ yéetel maʼ náachchaj tiʼ u kaajaliʼ.
16. ¿Baʼax utsiloʼob tu kʼamaj Brizit tumen maʼ náachchaj tiʼ Jéeoba yéetel tiʼ u kaajaliʼ?
16 Briziteʼ náach kajaʼan tiʼ le múuchʼuliloʼ le oʼolal juntúul superintendente tiʼ circuitoeʼ tu yaʼalajtiʼ ka kʼaʼaytajnak teʼ tuʼux kajaʼanoʼ yéetel ka u beet muchʼtáambaloʼob tu yotoch. Tu káajbaleʼ tu tuklaj maʼ kun tsaʼayal u beete. Kex beyoʼ tu yilaj u beetik le baʼax aʼalaʼabtiʼoʼ: káaj u kʼaʼaytaj, u beetik muchʼtáambaloʼob tu yotoch bey xan u beetik le adoración ich familia yéetel u hijaʼoboʼ. ¿Bix biniktiʼ? Briziteʼ béeychaj u xook yéetel yaʼab máakoʼob yéetel yaʼab tiʼ letiʼobeʼ okjaʼanajoʼob. Tu añoil 2005, hasta tu beetuba precursora regular. Jach bin utsil tiʼ úuchik u kʼubik u yóol tiʼ Jéeoba bey xan tumen maʼ náachchaj tiʼ u kaajaliʼ. U hijaʼobeʼ táan u meyajtikoʼob Jéeoba, yéetel yaan kaʼapʼéel múuchʼulil teʼ tuʼux kajaʼanoʼ. Briziteʼ u yojel Jéeoba tsʼáa u muukʼil tiʼ utiaʼal u aguantartik u yaʼalaʼal baʼal tiʼ tumen u familia bey xan le u maasil baʼaloʼob úuchtiʼoʼ.
MAʼ K-NÁACHTAL TIʼ JÉEOBA MIX TIʼ U KAAJAL
17. ¿Baʼax unaj k-ilik k-beetik?
17 Le Kʼaasilbaʼaloʼ u kʼáat ka k-tukleʼ Jéeobaeʼ ku xúumpʼatkoʼon le kéen k-aktáant problemas, yéetel maas ku bintoʼon kʼaasil le kéen k-apoyart u kaajal Dios. U kʼáat xan ka sajakchajkoʼon kéen chʼaʼpachtaʼak yéetel kéen aʼalaʼak baʼaloʼob maʼ jaajtak tu contra le sukuʼunoʼob nuʼuktikoʼonoʼ. Tsʼoʼoleʼ utiaʼal u xuʼulul k-confiar tiʼ Jéeoba yéetel tiʼ u kaajaleʼ ku beetik u yaʼalaʼaltoʼon baʼal, chéen baʼaleʼ maʼ t-chaʼik u tuskoʼon tumen k-ojel le baʼaxoʼob ku beetkoʼ (2 Cor. 2:11). Toʼoneʼ unaj k-ilik maʼ k-náachtal tiʼ Jéeoba mix tiʼ u kaajal. Kʼaʼajaktoʼoneʼ Jéeobaeʼ mix bikʼin ken u pʼatoʼon (Sal. 28:7). Le oʼolaleʼ, ¡maʼ k-chaʼik tiʼ mix baʼal ka u náachkuntoʼon tiʼ Jéeoba! (Rom. 8:35-39).
18. ¿Baʼax ken k-il teʼ tuláakʼ xookoʼ?
18 Teʼ xookaʼ tsʼoʼok k-tʼaan tiʼ baʼaxoʼob jeʼel k-aktáantik teʼ yóokʼol kaabaʼ, leloʼobaʼ jeʼel u beetik u xuʼulul u confiar máak tiʼ Jéeoba yéetel tiʼ u kaajaleʼ. Chéen baʼaleʼ teʼ múuchʼuliloʼ yaan xan baʼaloʼob jeʼel u aktáantik máakeʼ. Teʼ súutukiloʼob beyoʼ, ¿baʼax jeʼel u yáantkoʼoneʼ? Leloʼ yaan k-ilik teʼ tuláakʼ xookoʼ.
KʼAAY 118 Beet u nojochtal k-fe
a Wa k-kʼáat ka chúukpajak k-óol teʼ tu tsʼook kʼiinoʼobaʼ kʼaʼabéet u seguer k-confiar tiʼ Jéeoba yéetel tiʼ u kaajal. Teʼ xookaʼ yaan k-tʼaan tiʼ óoxpʼéel baʼaloʼob ku meyaj tiʼ le Kʼaasilbaʼal utiaʼal u xuʼulul k-confiar tiʼ Jéeoba yéetel tiʼ u kaajaloʼ. Chéen baʼaleʼ yaan xan k-ilik baʼax jeʼel u páajtal k-beetik utiaʼal maʼ u jóokʼol yéetel le baʼax ku tuklikoʼ.
b Kʼexaʼan jujunpʼéel kʼaabaʼob.