LE MÁAX tsʼáaik noticias teʼ radiooʼ u yojel táan u náatsʼal junpʼéel chak ikʼal tuʼux kajaʼan yaʼab máakoʼob. Tumen maʼ u kʼáat ka úuchuk loob tiʼobeʼ, ku sen aʼaliktiʼob ka u líiʼsubaʼob táanil tiʼ u kʼuchul.

Jéeoba xaneʼ táan u yaʼalik tiʼ u kajnáaliloʼob le Luʼum táan u náatsʼal junpʼéel xuʼulsajil maas nojoch tiʼ junpʼéel chak ikʼaloʼ. ¿Bix u beetik? ¿Bix k-ojéeltik ku tsʼáaik u tiempoil utiaʼal u arrepentir le máakoʼoboʼ? Utiaʼal k-naʼatikeʼ koʼoneʼex ilik bix tu beetil úuchjeakil.

Úuchjeakileʼ Jéeobaeʼ yaʼab u téenel tu yaʼalaj yaan u castigartik le máaxoʼob maʼatech u beetkoʼob le baʼaxoʼob ku yaʼalikoʼ (Pro. 10:25; Jer. 30:23). Tiʼ cada junpʼéeleʼ tu tsʼáaj tiempo utiaʼal u kʼexik u kuxtal le máakoʼob táanil tiʼ u kʼuchul u kʼiiniloʼ yéetel tu yaʼalajtiʼob baʼax unaj u beetkoʼob utiaʼal u lúubloʼob utsil tiʼ letiʼ (2 Rey. 17:12-15; Neh. 9:29, 30). Utiaʼal u yáantik le máakoʼob u kʼex u tuukuloʼoboʼ tu túuxtaj le máaxoʼob meyajtik utiaʼal u tsʼáaikoʼob ojéeltbil táan u taal junpʼéel xuʼulsajiloʼ yéetel utiaʼal u yaʼalikoʼob tiʼ le máakoʼob unaj u séeb arrepentiroʼoboʼ (Amós 3:7).

Juntúul tiʼ le máaxoʼob tu túuxtoʼ Noé. Letiʼeʼ máan yaʼab años táan u yaʼalik tiʼ le máakoʼob beetik baʼaloʼob kʼaastak táan u taal junpʼéel Búulkabaloʼ (Gén. 6:9-13, 17). Tu yaʼalaj xan tiʼob baʼax unaj u beetkoʼob utiaʼal u salvartikubaʼob. Noeeʼ jach tu tsʼáaj u yóol kʼaʼaytaj, le oʼolal kʼuch kʼaj óoltbil bey «juntúul máax tu kʼaʼaytaj toj kuxta[leʼ]» (2 Ped. 2:5).

Kex tu sen aʼalaj tiʼ le máakoʼoboʼ maʼ tu beetoʼob u cuentailiʼ, tumen minaʼan u fejoʼob. Le oʼolal «ka taal le Búulkabaloʼ» láaj xuʼulsaʼaboʼob (Mat. 24:39; Heb. 11:7). Bey túunoʼ maʼ tu páajtal u yaʼalikoʼob wa maʼ tu yojéeltoʼob baʼax ku taal u kʼiiniliʼ.

Uláakʼ juntéeneʼ Jéeobaeʼ tu yaʼalaj tiʼ le máakoʼob tsʼoʼok u náatsʼal junpʼéel castigooʼ. Kex beyoʼ tu tsʼáaj tiempo utiaʼal u kʼexik u tuukuloʼob. Lelaʼ bey tu beetil le ka tu taasaj le diez noj yajiloʼob yóokʼol Egiptooʼ. Táanil tiʼ u kʼáaxal bat, le u siete noj yajiloʼ, Jéeobaeʼ tu túuxtaj Moisés yéetel Aarón utiaʼal u yaʼalik tiʼ faraón yéetel tiʼ u palitsiloʼob baʼax kun úuchul. Tumen yaan u kʼáaxal le bat tuláakʼ kʼiinoʼ, ¿anchaj wa túun tiempo tiʼob utiaʼal u yookloʼob ich naj utiaʼal maʼ u yúuchul loob tiʼob? Le Bibliaoʼ ku yaʼalik: «Jujuntúul tiʼ u nuukil u j-meyajoʼob faraoneʼ tu chʼaʼajoʼob saajkil tiʼ le tʼaan tu tsʼáaj Yuumtsiloʼ, ka tu yoksajoʼob u palitsiloʼob yéetel u wakaxoʼob ich naj; baʼaleʼ yanchaj uláakʼoʼob tu bisoʼob bey báaxlileʼ, ka tu pʼatajoʼob u wakaxoʼob chéen jáampikʼeʼenil» (Éxo. 9:18-21). Lelaʼ ku yeʼesikeʼ Dioseʼ tu tsʼáaj u tiempoil u kanáantkubaʼob utiaʼal maʼ u yúuchul loob tiʼob. Bey túunoʼ le máaxoʼob tu beetoʼob u cuentail le baʼax aʼalaʼaboʼ tu salvartubaʼob le ka kʼáax le batoʼ.

Dioseʼ tu yaʼalaj xan tiʼ faraón yéetel u palitsiloʼob baʼax unaj u beetkoʼob táanil tiʼ u taal le u diez noj yajiloʼ. Baʼaleʼ letiʼobeʼ maʼ tu beetoʼob u cuentailiʼ (Éxo. 4:22, 23). Le oʼolaleʼ kíim u yáax hijoʼob. ¿Máasaʼ jach yaj baʼax úuch tiʼob? (Éxo. 11:4-10; 12:29). ¿Anchaj wa tiempo utiaʼal u beetkoʼob baʼax kʼaʼabéet utiaʼal maʼ u kíimloʼob? Anchaji. ¿Baʼaxten k-aʼalik beyoʼ? Tumen Moiseseʼ tu yaʼalaj tiʼ le israelitaʼob baʼax kun úuchul teʼ tu diez noj yajiloʼ yéetel tu yaʼalaj baʼax unaj u beetik cada junpʼéel familia (Éxo. 12:21-28).  ¿Kex jaytúul máaxoʼob beet baʼax tu yaʼalaj? Ku tuklaʼaleʼ tres millones máakoʼob tu salvartubaʼob ka jóokʼoʼob Egipto, táakaʼan «yaʼabkach u jejeláasil máakoʼob» maʼ israelitaʼobiʼ, ichiloʼobeʼ yaan tak egipcioʼobiʼ (Éxo. 12:38).

Tuláakal lelaʼ ku yeʼesikeʼ Jéeobaeʼ mantatsʼ tu tsʼáaj tiempo tiʼ le máakoʼob utiaʼal u beetkoʼob le baʼax ku yaʼalikoʼ (Deu. 32:4). ¿Baʼaxten? Apóstol Pedroeʼ tu yaʼaleʼ Jéeobaeʼ «maʼ u kʼáat ka xuʼulsaʼak tiʼ mix máakiʼ, baʼaxeʼ u kʼáat ka u kʼex u tuukul tuláakal máak» (2 Ped. 3:9). Dioseʼ ku kaxtik u yutsil tuláakal máak. U kʼáat ka arrepentirnakoʼob yéetel ka beetaʼak baʼax ku yaʼalik táanil tiʼ u taasik le castigooʼ (Isa. 48:17, 18; Rom. 2:4).

Teʼ kʼiinoʼob xanaʼ tuláakal máak unaj u beetik u cuentail le baʼaxoʼob ku tsʼáaik Dios u yojéelt tuláakal u kajnáaliloʼob le Luʼumaʼ. Ka taal Jesús way Luʼumeʼ tu yaʼaleʼ le yóokʼol kaabaʼ yaan u xuʼulsaʼal yéetel «junpʼéel nojoch muʼyajil» (Mat. 24:21). Tu yaʼalaj baʼaxoʼob kun eʼesik tiʼ le máaxoʼob tsaypachtik jach táan u náatsʼal le kʼiin jeʼeloʼ. Tʼaanaj tiʼ baʼaxoʼob kun úuchul tiʼ tuláakal yóokʼol kaab táan u béeytal teʼ kʼiinoʼobaʼ (Mat. 24:3-12; Luc. 21:10-13).

Yoʼolal le baʼax tu yaʼalaj Jesusoʼ, Jéeobaeʼ táan u yaʼalik tiʼ tuláakal máak ka u beetoʼob baʼax ku yaʼalik. U kʼáat ka xiʼik utsil tiʼ le máaxoʼob uʼuyik tʼaanoʼ yéetel ka yanaktiʼob le jatsʼuts kuxtal teʼ túumben luʼumoʼ (2 Ped. 3:13). Utiaʼal u tsʼáaik u fe le máakoʼob tiʼ le baʼaxoʼob ku yaʼalik Jéeobaoʼ, letiʼeʼ tsʼoʼok u tsʼáaik «u maʼalob péektsilil le Reino» utiaʼal ka páajchajak u salvartikuba máakoʼ. Jesuseʼ tu yaʼaleʼ yaan u kʼaʼaytaʼal «tiʼ tuláakal yóokʼol kaab utiaʼal ka ojéeltaʼak tumen u kajnáaliloʼob tuláakal kaajoʼob» (Mat. 24:14). Dioseʼ táan u nuʼuktik le máaxoʼob meyajtik utiaʼal u tsʼáaikoʼob kʼaj óoltbil le maʼalob péektsil tiʼ maas tiʼ 240 luʼumiloʼoboʼ. U kʼáat ka uʼuyaʼak tumen u maas yaʼabil máakoʼob ku páajtal utiaʼal ka u salvartubaʼob kéen u xuʼuls tiʼ le kʼasaʼan yóokʼol kaabaʼ (Sof. 1:14, 15; 2:2, 3).

Bey túunoʼ Jéeobaeʼ mantatsʼ ku tsʼáaik tiempo tiʼ le máakoʼob utiaʼal u yuʼubikoʼob baʼax ku yaʼalikoʼ. Le baʼaxoʼob tsʼoʼok k-ilkoʼ ku yeʼesik mantatsʼ bey u beetkoʼ. Baʼaleʼ letiʼe máakoʼob unaj u yilkoʼob wa yaan u beetkoʼob u cuentail le baʼaxoʼob ku yaʼalik táanil tiʼ u kʼuchul u kʼiinil u taasik le castigooʼ. Bey túunoʼ maʼ unaj u xuʼulul k-áantik le bukaʼaj máakoʼob ku páajtal utiaʼal u salvartikubaʼob kéen xuʼulsaʼak tiʼ le yóokʼol kaabaʼ.