1, 2. 1) ¿Baʼax ken u yaʼal le kaajoʼob maʼ kun xáantaloʼ? 2) ¿Baʼax kʼáatchiʼiloʼob ken k-il u núukil?

 KOʼOX tuklikeʼ le kaajoʼoboʼ tsʼoʼok u yaʼalikoʼob: «¡Tuláakal jejetsʼkil yéetel maʼalob yanil!». Maʼ xaaneʼ yaan u yaʼalikoʼobeʼ mix juntéen yanak jeetsʼelil bey teʼ yóokʼol kaabaʼ. Tsʼoʼoleʼ yaan u beetkoʼob k-tuklik tsʼoʼok u yutskíintikoʼob tuláakal le talamiloʼoboʼ. Baʼaleʼ mix baʼal jeʼel u páajtal u beetkoʼob yoʼolal le baʼax ku taal u kʼiin u yúuchloʼ. ¿Baʼaxten? Tumen le Bibliaoʼ ku yaʼalikeʼ «letiʼ túun ken téek taalak xuʼulsajil tu yóokʼoloʼob, [...] yéetel junpuliʼ maʼ kun púutsʼloʼob» (1 Tes. 5:3).

² Yoʼolal le baʼax kun úuchloʼ, yaan jujunpʼéel kʼáatchiʼob unaj k-ilik u núukil: ¿Baʼax kun úuchul le táan le ‹nojoch muʼyajiloʼ›? ¿Baʼax ku páaʼtik Jéeoba ka k-beet teʼ kʼiinoʼob jeʼeloʼ? ¿Bix jeʼel u páajtal k-líiʼsikba bejlaʼa utiaʼal u chúukpajal k-óol le táan le nojoch muʼyajiloʼ? (Mat. 24:21).

3. Jeʼex u yaʼalik Apocalipsis 17:5, 15 tak 18, ¿bix kun xuʼulsbil le «Nojoch Babilonia» tumen Diosoʼ?

³ (Xok Apocalipsis 17:5, 15-18). Le «Nojoch Babiloniaoʼ» yaan u xuʼulsaʼal. Jeʼex tsʼoʼok k-aʼalikoʼ, le kaajoʼoboʼ maʼ kun páajtal u beetkoʼob mix baʼal yoʼolal le baʼax kun úuchul teʼ kʼiinoʼob jeʼeloʼ. ¿Baʼaxten? Tumen Dioseʼ yaan u tsʼáaik «ichil u puksiʼikʼaloʼob ka u tsʼoʼokbesoʼob le baʼax u tukultmaj Letiʼoʼ».  ¿Baʼax u tukultmaj Dios? U tukultmaj u xuʼulsik tiʼ tuláakal le religionoʼob maʼatech u kaʼansik u jaajiloʼ. * Dioseʼ yaan u tsʼáaik tu tuukul le «diez baakoʼob» yaan tiʼ le «chak tsʼíitsʼik baʼalcheʼ» ka u beetoʼob leloʼ. Le diez baakoʼoboʼ ku chíikbesik tuláakal le gobiernoʼob u tsʼaamubaʼob tu tséel le «tsʼíitsʼik baʼalcheʼ[oʼ]», lelaʼ ku chíikbesik le Naciones Unidasoʼ (Apo. 17:3, 11-13; 18:8). Le kéen líikʼkoʼob tu contra le religionoʼob maʼatech u kaʼanskoʼob u jaajiloʼ u kʼáat u yaʼaleʼ tsʼoʼok u káajal le nojoch muʼyajiloʼ. Lelaʼ jach séeb kun úuchul yéetel yaan u beetik u sajaktal le máakoʼoboʼ.

4. 1) Maʼ xaaneʼ, ¿baʼax oʼolal ken u tsʼáauba le gobiernoʼob tu contra le religionoʼob maʼatech u kaʼanskoʼob u jaajiloʼ? 2) Maʼ xaaneʼ, ¿baʼax ken u beet le máaxoʼob yanoʼob ichil le religionoʼob kaʼachoʼ?

⁴ Maʼ k-ojel baʼax oʼolal ken u tsʼáauba le kaajoʼob tu contra le Nojoch Babiloniaoʼ. Maʼ xaaneʼ yaan u yaʼalikoʼobeʼ le religionoʼoboʼ ku talamkúuntikoʼob u yantal jeetsʼelil yéetel mantatsʼ ku yoksikubaʼob tiʼ política. Wa maʼ xaaneʼ yaan u yaʼalikoʼob jach yaʼab ayikʼaliloʼob yaantiʼob (Apo. 18:3, 7). Baʼaleʼ lelaʼ maʼ u kʼáat u yaʼal wa yaan u láaj kíimsaʼal le máaxoʼob yanoʼob ichil le religionoʼoboʼ. Le baʼax kun xuʼulsbiloʼ letiʼe religionoʼoboʼ. Le kéen xuʼulsaʼakoʼobeʼ le máaxoʼob yanoʼob ichil kaʼachoʼ yaan u yilkoʼobeʼ xúumpʼattaʼaboʼob tumen u nuuktakil u religionoʼob, le oʼolal maʼ xaaneʼ yaan u yaʼalikoʼob mix baʼal yaan u yiloʼob yéetel le religionoʼoboʼ.

5. ¿Baʼax u yaʼalmaj Jéeoba yoʼolal le nojoch muʼyajiloʼ, yéetel baʼaxten?

⁵ Le Bibliaoʼ maʼatech u yaʼalik bukaʼaj tiempo ken u bis u xuʼulsaʼal le Nojoch Babiloniaoʼ, baʼaleʼ k-ojel maʼ kun jach xáantal (Apo. 18:10, 21). Jéeobaeʼ u yaʼalmaj yaan u kóomkintik u kʼiiniloʼob le nojoch muʼyajil utiaʼal u salvartik «le máaxoʼob u yéeymajoʼ» yéetel le religión kaʼansik u jaajiloʼ (Mar. 13:19, 20). Baʼaleʼ ¿baʼax ku páaʼtik Jéeoba ka k-beet tu kʼiiniloʼob u káajal le nojoch muʼyajil yéetel tu kʼiinil le Armagedonoʼ?

6. ¿Baʼax ku páaʼtik Jéeoba ka k-beete?

⁶ Jeʼex t-ilaj teʼ xook máanikoʼ Jéeobaeʼ u kʼáat ka jóokʼkoʼon junpuliʼ ichil le Nojoch Babiloniaoʼ. Baʼaleʼ yaan uláakʼ baʼax unaj k-beetik. Unaj k-chʼaʼtuklik maʼ u xuʼulul k-meyajtik Jéeoba. Koʼoneʼex ilik kaʼapʼéel bix jeʼel k-beetkeʼ.

7. 1) ¿Bix k-eʼesik táan k-beetik tuláakal baʼax ku yaʼalik Jéeoba? 2) Jeʼex u yaʼalik Hebreoʼob 10:24 yéetel 25, ¿baʼaxten maas jach kʼaʼabéet k-bin muchʼtáambal teʼ kʼiinoʼobaʼ?

⁷ Yáaxeʼ, unaj k-beetik tuláakal baʼaxoʼob ku yaʼalik Dios. Maʼ unaj k-kuxtal jeʼex u beetik u máakiloʼob le yóokʼol kaabaʼ. Toʼoneʼ k-náachkuntikba tiʼ tuláakal u jejeláasil núupkʼeban bey xan uláakʼ baʼaloʼob kʼaastak, jeʼex u tsʼoʼokol u beel juntúul xiib yéetel u yéet xiibil wa juntúul koʼolel yéetel u yéet koʼolelil (Mat. 19:4, 5; Rom. 1:26, 27). U kaʼapʼéeleʼ, unaj u seguer k-adorartik Dios junmúuchʼ yéetel k-sukuʼunoʼob. K-beetik jeʼel tuʼuxak yanoʼoneʼ, teʼ naj tuʼux ku muchʼkuba u testigoʼob Jéeobaoʼ, tu yotoch le sukuʼunoʼoboʼ wa taʼakumbail. Jeʼel baʼalak ka úuchkeʼ maʼ unaj u xuʼulul k-muchʼikba utiaʼal ka k-adorart Diosiʼ. Baʼaxeʼ maas unaj k-beetik «le táan k-ilkeʼex u náatsʼal le kʼiinoʼ» (xok Hebreoʼob 10:24, 25).

8. Maʼ xaaneʼ, ¿bix kun kʼexpajal le baʼax k-kʼaʼaytikoʼ?

⁸ Maʼ xaaneʼ le táan le nojoch muʼyajiloʼ yaan u kʼexpajal baʼax k-kʼaʼaytik. Bejlaʼeʼ k-kʼaʼaytik u maʼalob péektsilil le Reinooʼ yéetel táan k-ilik k-kaʼansik le máakoʼob u natsʼubaʼob yiknal Diosoʼ. Baʼaleʼ maʼ xaaneʼ tu kʼiiniloʼob le nojoch muʼyajiloʼ juntaatsʼ ken k-aʼal baʼax ku taal u kʼiin, le Bibliaoʼ ku ketik yéetel nukuch bat bey tuunichoʼobeʼ (Apo. 16:21). Maʼ xaaneʼ yaan k-kʼaʼaytik jach taʼaytak u xuʼulsaʼal tiʼ u kʼasaʼan yóokʼol kaab Satanás. Kéen máanak kʼiineʼ yaan k-ojéeltik baʼax ken k-kʼaʼayte yéetel bix ken k-beetil. ¿Yaan wa ta tʼaan k-kʼaʼaytaj jeʼex suukil k-beetik desde walajki cien añosaʼ, wa yaan k-kʼexik? Láayliʼ yaan k-páaʼtik u kʼuchul u kʼiinil utiaʼal k-ojéeltikeʼ. Jeʼel bixakeʼ yaan u yantaltoʼon u jatsʼuts páajtalil k-kʼaʼaytik yéetel x-maʼ saajkilil le xuʼulsajil ken u taas Jéeobaoʼ (Eze. 2:3-5).

9. Maʼ xaaneʼ, ¿baʼax kun taaktal u beetik le kaajoʼoboʼ, baʼaleʼ baʼax jach k-ojel ken u beet Dios?

⁹ Maʼ xaaneʼ, yoʼolal le baʼax ken k-kʼaʼaytoʼ yaan u taaktal u beetaʼal u xuʼulul k-kʼaʼaytaj tumen le kaajoʼoboʼ. Baʼaleʼ jeʼex k-kʼubik k-óol tiʼ Jéeoba bejlaʼa utiaʼal k-kʼaʼaytajeʼ, láayliʼ bey ken k-beet teʼ kʼiinoʼob jeʼeloʼ. Jach k-ojel Dioseʼ yaan u tsʼáaiktoʼon u muukʼil utiaʼal k-beetik baʼax ku yaʼalik (Miq. 3:8).

10. Jeʼex u yaʼalik Lucas 21:25 tak 28, ¿baʼax ken u beet u maas yaʼabil le máakoʼob kéen u yiloʼob baʼaxoʼob kun úuchul teʼ nojoch muʼyajiloʼ?

¹⁰ (Xok Lucas 21:25-28). Le táan le nojoch muʼyajiloʼ, le máakoʼoboʼ yaan u jaʼakʼal u yóoloʼob tumen kex u kʼubmaj u yóoloʼob tiʼ yaʼab baʼaloʼobeʼ maʼ tun áantbiloʼob. Yaan u yaatal u yóoloʼob yéetel yaan u sajaktaloʼob kíimil kéen káajak le kʼiinoʼob maas talamtak mix juntéen ilaʼak tumen wíinikoʼ (Sof. 1:14, 15). Maʼ xaaneʼ yaan u maas talamtal le kuxtaloʼ, lelaʼ tak le máaxoʼob meyajtik Dios kun ilik beyoʼ. Yaan wal k-muʼyajeʼ tumen maʼatech k-táakbesikba tiʼ le baʼaxoʼob ku beetaʼal teʼ yóokʼol kaabaʼ. Maʼ xaaneʼ maʼ kun antaltoʼon tak le baʼaxoʼob maas kʼaʼabéettoʼonoʼ.

11. 1) ¿Baʼaxten tuláakal máak kun tʼaan t-oʼolal? 2) ¿Baʼaxten maʼ unaj k-sajaktal tiʼ le nojoch muʼyajiloʼ?

¹¹ Yaan u kʼuchul u súutukileʼ le máaxoʼob tsʼoʼok u xuʼulsaʼal u religionoʼoboʼ yaan u pʼuʼujuloʼob kéen u yiloʼob u testigoʼob Jéeobaeʼ  maʼ xuʼulsaʼak u religionoʼobiʼ. Maʼ xaaneʼ yaan u sen juum u tsikbalil tiʼ redes sociales, radio yéetel televisión. Le kaajoʼob yéetel Satanás, le máax gobernartikoʼoboʼ, yaan u pʼektikoʼonoʼob, tumen chéen k-religión maʼ xuʼulsaʼakiʼ. Chéen k-religión kun pʼáatal way Luʼumeʼ. Le oʼolal tuláakal máak kun tʼaan t-oʼolal. Teʼ kʼiin jeʼeloʼ le kaajoʼoboʼ yaan u muchʼkubaʼob utiaʼal u kʼaabaʼtikoʼob Gog tiʼ Magog. * Yaan u muchʼkubaʼob utiaʼal u chʼaʼpachtikoʼob u kaajal Jéeoba (Eze. 38:2, 14-16). Tumen maʼ k-jach ojel baʼaxoʼob kun úuchleʼ, maʼ xaaneʼ jeʼel k-sajaktal kéen joʼopʼok k-tuukul tiʼ le baʼaxoʼob ku taal u kʼiinoʼ. Baʼaleʼ k-ojel maʼ unaj k-sajaktal tiʼ le nojoch muʼyajiloʼ, tumen Jéeobaeʼ yaan u yaʼaliktoʼon baʼax unaj k-beetik utiaʼal k-salvartikba (Sal. 34:19). Yaan k-waʼatal yéetel yaan k-líiʼsik k-pool, tumen k-ojel ‹tsʼoʼok u náatsʼal u kʼiinil k-jáalkʼabtaʼal›. *

12. ¿Bix tsʼoʼok u yáantkoʼon «le palitsil chúukaʼan u yóol yéetel yaan u naʼat» utiaʼal u chúukpajak k-óol tu kʼiinil Jéeobaoʼ?

¹² «Le palitsil chúukaʼan u yóol yéetel yaan u naʼat[oʼ]» tsʼoʼok u xáantal joʼopʼok u yáantkoʼon utiaʼal ka chúukpajak k-óol tu kʼiinil le nojoch muʼyajiloʼ (Mat. 24:45). Lelaʼ jejeláas bix tsʼoʼok u beetik, junpʼéel bixeʼ letiʼe asamblea regionaloʼob anchaj tu añoil 2016 tak 2018. Le asambleaʼobaʼ tu yáantoʼonoʼob utiaʼal k-ilik baʼax modosil unaj u yantaltoʼon jeʼex u bin u náatsʼal u kʼiinil Jéeobaoʼ. Koʼoneʼex ilik máakalmáakoʼobiʼ.

13. ¿Baʼax jeʼel u yáantkoʼon utiaʼal ka chúukpajak k-óol k-meyajt Jéeobaeʼ, yéetel baʼaxten unaj k-beetik desde bejlaʼeʼ?

¹³ U chúukpajal k-óol. Le asamblea regional 2016, tu kʼaabaʼtaj: «Chúukpajak k-óol k-meyajt Jéeoba». Teʼ asambleaoʼ kaʼansaʼabeʼ wa k-bisikba maʼalob yéetel Jéeobaeʼ yaan u chúukpajal k-óol. Kʼaʼajsaʼabtoʼoneʼ utiaʼal k-natsʼikba tiʼ Dioseʼ unaj k-orar tu jaajil k-óol yéetel k-xakʼalxoktik le Bibliaoʼ. Lelaʼ jeʼel u yáantkoʼon utiaʼal k-aktáantik le talamiloʼob jach nuuktakoʼ. Jeʼex u bin u náatsʼal u kʼiinil u xuʼulsaʼal u kʼasaʼan yóokʼol kaab Satanaseʼ bey kun bin u túuntaʼal k-óol utiaʼal ka ilaʼak wa chúukaʼan k-óol tiʼ Dios yéetel tiʼ u Reino. Maʼ xaaneʼ yaan k-sen pʼaʼastaʼal (2 Ped. 3:3, 4). Maases tumen maʼatech k-táakpajal tiʼ le baʼaxoʼob ku beetaʼal tu yóokʼol kaab Satanasoʼ. Le oʼolal desde bejlaʼa unaj k-chʼaʼtuklik u chúukpajal k-óol tu kʼiinil le nojoch muʼyajiloʼ.

14. 1) ¿Baʼaxten yaan u kʼexpajal máaxoʼob nuʼuktik u kaajal Jéeoba way Luʼumeʼ? 2) ¿Baʼaxten unaj u chúukpajal k-óol teʼ kʼiinoʼob jeʼeloʼ?

¹⁴ Teʼ nojoch muʼyajiloʼ, yaan u kʼexpajal máaxoʼob nuʼuktik le meyajoʼob ku beetik u kaajal Jéeoba way Luʼumoʼ. Yaan u kʼuchul u kʼiinileʼ u yalab le sukuʼunoʼob yéeyaʼanoʼob utiaʼal u binoʼob kaʼanoʼ yaan u bisaʼaloʼob utiaʼal u táakpajloʼob tu baʼatelil Armagedón (Mat. 24:31; Apo. 2:26, 27). Lelaʼ u kʼáat u yaʼaleʼ maʼ kun antal le Cuerpo Gobernante way Luʼumaʼ. Kex beyoʼ le yaʼabkach máakoʼoboʼ yaan u seguer u meyajoʼob tu tsoolol. Yaan u nuʼuktaʼal le meyajoʼob tumen le sukuʼunoʼob úuch joʼopʼok u meyajtikoʼob Jéeoba ichil le uláakʼ tamanoʼoboʼ. Utiaʼal u chúukpajal k-óol k-meyajt Jéeobaeʼ unaj k-uʼuyik u tʼaan le máaxoʼob kun nuʼuktikoʼonoʼ yéetel  k-beetik baʼax ken u yaʼaloʼob. Wa k-beetik baʼax ku yaʼalikoʼobeʼ yaan k-salvartikba.

15. ¿Baʼax unaj k-beetik utiaʼal u seguer k-tsʼáaik k-óol, yéetel baʼaxten unaj k-beetik desde bejlaʼeʼ?

¹⁵ K-tsʼáaik k-óol. Le asamblea regional 2017, tu kʼaabaʼtaj: «¡Seguernak a tsʼáaik a wóol!». Lelaʼ tu yáantoʼon utiaʼal k-tsʼáaik k-óol k-meyajt Jéeoba kex ka k-aktáant talamiloʼob. T-kaneʼ maʼ chéen unaj k-tsʼáaik k-óol wa maʼalob u bintoʼoniʼ yéetel t-kaneʼ jeʼel u chúukpajal k-óol wa k-kʼubik k-óol tiʼ Jéeobaeʼ (Rom. 12:12). Maʼ unaj k-tuʼubsik le baʼax tu yaʼalaj Jesusaʼ: «Le máax kun chúukpajal u yóol tak tu xuuleʼ letiʼ bíin u salvartuba» (Mat. 24:13). Lelaʼ u kʼáat u yaʼaleʼ unaj u seguer k-tsʼáaik k-óol kex ka k-aktáant jeʼel baʼalak talamileʼ. Wa ku chúukpajal k-óol bejlaʼeʼ yaan xan u chúukpajal k-óol tu kʼiinil le nojoch muʼyajiloʼ.

16. ¿Baʼax jeʼel u yáantkoʼon utiaʼal maʼ k-sajaktaleʼ, yéetel baʼax unaj k-beetik desde bejlaʼa utiaʼal maʼ k-sajaktaleʼ?

¹⁶ Maʼ k-sajaktal. Le asamblea regional 2018, tu kʼaabaʼtaj: «¡Maʼ a sajaktal!». Lelaʼ tu yáantoʼon k-ileʼ utiaʼal maʼ k-sajaktaleʼ unaj k-kʼubik k-óol tiʼ Jéeoba, maʼ chéen tiʼ toʼoniʼ, lelaʼ bey xan kʼaʼabéet k-beetik utiaʼal u chúukpajal k-óol. ¿Baʼax unaj k-beetik utiaʼal k-maas kʼubik k-óol tiʼ Jéeoba? Unaj k-xokik sáamsamal le Bibliaoʼ yéetel k-tuukul tiʼ bix úuchik u salvartik Dios le máaxoʼob meyajt úuchjeakiloʼ (Sal. 68:20; 2 Ped. 2:9). Kéen líikʼik le kaajoʼob t-contra teʼ nojoch muʼyajiloʼ, maʼ unaj k-sajaktaliʼ yéetel jach unaj k-kʼubik k-óol tiʼ Jéeoba (Sal. 112:7, 8; Heb. 13:6). Wa k-kʼubik k-óol tiʼ letiʼ bejlaʼeʼ, maʼ ken k-sajaktal kéen líikʼik Gog tu contra u kaajal Jéeoba. *

17. ¿Baʼaxten maʼ unaj k-sajaktal tiʼ le Armagedonoʼ? (Ilawil le dibujo yaan tu yáax táan juʼunil le revistaaʼ).

¹⁷ Jeʼex t-ilaj teʼ xook máanikoʼ, u maas yaʼabil tiʼ toʼoneʼ tsʼoʼok u káajal u tsʼook kʼiinoʼob ka síijoʼ. Baʼaleʼ táan k-páaʼtik k-salvartikba tiʼ le nojoch muʼyajiloʼ. U baʼatelil Armagedoneʼ yaan u xuʼulsik tiʼ u tsʼook kʼiiniloʼob le yóokʼol  kaabaʼ. Baʼaleʼ maʼ unaj k-sajaktaliʼ, tumen lelaʼ u baʼateʼel Dios (Pro. 1:33; Eze. 38:18-20; Zac. 14:3). Kéen u yaʼal Jéeoba ka káajakeʼ, Jesucristoeʼ yaan u nuʼuktik le baʼateloʼ. Yaan u yantal tu yéetel le sukuʼunoʼob yéeyaʼanoʼob tsʼoʼok u kuxtaloʼob teʼ kaʼanoʼ bey xan u milesil angeloʼob. Tuláakloʼobeʼ yaan u baʼateloʼob tu contra Satanás, u demonioʼob yéetel tuláakal le máaxoʼob u tsʼaamubaʼob tu contra Diosoʼ (Dan. 12:1; Apo. 6:2; 17:14).

18. 1) ¿Baʼax ku yaʼaliktoʼon Jéeoba? 2) ¿Bix u yáantkoʼon Apocalipsis 7:9, 13 tak 17 utiaʼal maʼ k-sajaktal tiʼ baʼax ku taal u kʼiin?

¹⁸ Jéeobaeʼ ku yaʼaliktoʼon: «Maʼ yanak máax beetik u nuʼukul baʼateʼel utiaʼal a xuʼulsaʼaliʼ» (Isa. 54:17). «Junmúuchʼ yaʼabkach máakoʼob» chúukaʼan u yóoloʼobeʼ yaan u salvarkubaʼob «tiʼ le nojoch yaayaj óolaloʼ» yéetel yaan u seguer u meyajtikoʼob Dios (xok Apocalipsis 7:9, 13-17). ¿Máasaʼ le Bibliaoʼ jach ku yáantkoʼon utiaʼal maʼ k-sajaktal tiʼ le baʼax ku taal u kʼiinoʼ? K-ojel Jéeobaeʼ ku kanáantik le máaxoʼob maʼ tu náachtaloʼob tiʼ letiʼoʼ (Sal. 31:23). Tuláakal máax u yaabiltmaj Jéeoba yéetel ku yeʼesik tsiikil tiʼeʼ yaan u kiʼimaktal u yóol kéen u kiliʼichkúunt u kʼaabaʼ (Eze. 38:23).

19. ¿Bix le jatsʼuts kuxtal kun antal maʼ kun xáantaloʼ?

¹⁹ Tuukulnakoʼon tiʼ bix jeʼel u yaʼalik Kaʼapʼéel tiʼ Timoteo 3:2 tak 5 bix le máaxoʼob kun kuxtaloʼob teʼ túumben luʼum, tuʼux minaʼan Satanasoʼ (ilawil le cuadro « Bix le máakoʼob kun antal maʼ kun xáantaloʼ»). Le sukuʼun George Gangas, * táakpaj ichil le Cuerpo Gobernanteoʼ tu yaʼalaj: «¡Bukaʼaj jatsʼutsil le yóokʼol kaab kéen kuxlak chéen sukuʼunoʼob yéetel kiikoʼobiʼ! Lelaʼ jach taʼaytak u béeychajal. Yaan u chowaktal u kuxtaloʼob jeʼex Jéeobaeʼ. Yaan k-kuxtal utiaʼal mantatsʼ». ¿Máasaʼ jach jatsʼuts le baʼax k-páaʼtikoʼ?