1. ¿Baʼaxten Jéeobaeʼ ku náajmatik ka k-meyajt chéen letiʼ?

 JÉEOBAEʼ ku náajmatik ka k-meyajt chéen letiʼ, tumen letiʼ beetoʼon yéetel letiʼ tsʼáaik kuxtal (Apo. 4:11). Baʼaleʼ kex k-yaabiltmaj Jéeoba yéetel k-eʼesik tsiikil tiʼeʼ, yaan baʼaxoʼob jeʼel u beetik u náayal k-óol utiaʼal u xuʼulul k-meyajtik chéen letiʼeʼ. Utiaʼal maʼ u yúuchultoʼon beyoʼ unaj k-naʼatik baʼaxoʼob beetik. Baʼaleʼ táanileʼ koʼoneʼex ilik baʼax u kʼáat u yaʼal k-meyajtik chéen Jéeoba.

2. Jeʼex u yaʼalik Éxodo 34:14, ¿baʼax maʼ ken k-chaʼa u yúuchul wa k-meyajtik chéen Jéeoba?

² Le Bibliaoʼ ku yeʼesikeʼ wa k-yaabiltmaj Jéeobaeʼ chéen letiʼ ken k-meyajte. Maʼatech k-chaʼik tiʼ mix baʼal yéetel tiʼ mix máak ka u beet u xuʼulul k-meyajtik chéen Jéeoba (xok Éxodo 34:14).

3. ¿Baʼaxten k-meyajtik chéen Jéeoba?

³ Le baʼaxoʼob tsʼoʼok k-kanik tiʼ Jéeobaoʼ ku péeksikoʼon k-meyajt chéen letiʼ. Tsʼoʼok k-kʼaj óoltik u jatsʼuts modos. K-ojel baʼax uts tu tʼaan yéetel baʼax u pʼeek, le oʼolal k-ilik k-beetik xan beyoʼ. K-ojel baʼax u tukultmaj u beetik yéetel k-tsʼáaikba tu tséel kéen k-beet baʼax ku yaʼalik. Kiʼimak k-óol ikil u páajtal k-bisikba tu yéetel (Sal. 25:14). Tuláakal le baʼaxoʼob k-kanik tiʼ le Máax beetmiloʼonoʼ ku maas natsʼkoʼon tu yiknal (Sant. 4:8).

4. 1) ¿Baʼaxoʼob ku meyaj tiʼ le Kʼaasilbaʼal utiaʼal u beetik u xuʼulul k-meyajtik chéen Jéeobaoʼ? 2) ¿Baʼax ken k-xakʼalt teʼ xookaʼ?

 ⁴ Tiʼ le Kʼaasilbaʼaloʼ ku meyaj le yóokʼol kaab utiaʼal u beetik k-tsʼíiboltik baʼaloʼob maʼ maʼalobtakiʼ (Efe. 2:1-3; 1 Juan 5:19). U kʼáat ka k-yaabilt uláakʼ baʼaloʼob utiaʼal u xuʼulul k-meyajtik chéen Jéeoba. Koʼoneʼex ilik kaʼapʼéel bix u beetik. Yáaxeʼ ku beetik k-tsʼíiboltik ayikʼaliloʼob. U kaʼapʼéeleʼ, ku beetik k-náaysik k-óol yéetel baʼaloʼob maʼ maʼalobtakiʼ.

5. ¿Baʼaxten unaj k-kanáantik maʼ k-yaabiltik le taakʼinoʼ?

⁵ Tuláakal máak u kʼáat ka yanak baʼal u jaante, ka yanak nookʼ u take yéetel naj utiaʼal u kajtal. Baʼaleʼ unaj k-kanáantik maʼ k-yaabiltik le taakʼinoʼ. Bejlaʼeʼ yaʼab máakoʼobeʼ ku «yaabiltikoʼob taakʼin» bey xan le baʼaxoʼob ku páajtal u manikoʼob tu yéeteloʼ (2 Tim. 3:2). Jesuseʼ u yojleʼ le máaxoʼob tsaypachtikoʼ jeʼel xan u taaktal u yaabiltikoʼob le taakʼinoʼ, le oʼolal tu yaʼalaj: «Mix máak jeʼel u páajtal u beetkuba palitsil tiʼ kaʼatúul tsʼuuloʼobeʼ, tumen yaan u pʼektik juntúuliʼ yéetel yaan u yaabiltik uláakʼoʼ, wa yaan u biskuba yéetel juntúuliʼ yéetel yaan u náachtal tiʼ uláakʼoʼ. Maʼ tu páajtal a beetkabaʼex palitsil tiʼ Dios yéetel tiʼ le Ayikʼaliloʼoboʼ» (Mat. 6:24). Juntúul máax adorartik Dios ku chʼíikil u kaxt chéen ayikʼaliloʼobeʼ, u jaajileʼ taak u meyajtik kaʼatúul tsʼuuloʼob. Bey túunoʼ ku xuʼulul u meyajtik chéen Jéeoba.

6. ¿Baʼax k-kanik tiʼ le baʼax tu yaʼalaj Jesús tiʼ le múuchʼulil yaan kaʼach Laodiceaoʼ?

⁶ Tu jóokʼbal le yáax siglooʼ, le sukuʼunoʼob yanoʼob kaʼach teʼ múuchʼulil yaan tu kaajil Laodiceaoʼ ku yaʼalikoʼobeʼ jach ayikʼaloʼob yéetel mix baʼal ku bineltiktiʼob. Baʼaleʼ tu táan Jéeoba yéetel tu táan Jesuseʼ mix baʼal yaantiʼob, óotsiloʼob, chʼóopoʼob yéetel chaknuul yaniloʼob. Jesuseʼ maʼ tu tsolnuʼuktoʼob  tumen ayikʼaloʼobiʼ, baʼaxeʼ tumen u yaabilajoʼob yoʼolal le taakʼinoʼ táan kaʼach u beetik u xuʼulul u meyajtikoʼob chéen Jéeoba (Apo. 3:14-17). Wa k-tsʼáaik cuenta táan u káajal k-yaabiltik ayikʼaliloʼobeʼ kʼaʼabéet k-ilik k-kʼexik bix k-tuukul (1 Tim. 6:7, 8). Tumen wa maʼ t-beetkeʼ yaan k-yaabiltik kaʼapʼéel baʼal, bey túunoʼ Jéeobaeʼ yaan u xuʼulul u kʼamik le adoración k-tsʼáaiktiʼoʼ, tumen letiʼeʼ «u pʼeek u kʼeʼexel» (Deu. 4:24). ¿Baʼax jeʼel u beetik u káajal k-yaabiltik le taakʼinoʼ?

7-9. ¿Baʼax k-kanik tiʼ le baʼax úuch tiʼ Davidoʼ?

⁷ Koʼoneʼex ilik baʼax úuch tiʼ David, juntúul anciano jach j-meeyjil kajaʼan Estados Unidos. Letiʼeʼ ku yaʼalikeʼ jach ku tsʼáaik u yóol u beet maʼalob u meyaj. Tsʼaʼabtiʼ junpʼéel puesto maas maʼalob teʼ empresa tuʼux ku meyajoʼ, tsʼoʼoleʼ teʼ luʼumil tuʼux kajaʼanoʼ jach kʼaj óoltaʼab tumen jach maʼalob u meyaj. Letiʼeʼ ku yaʼalik: «Teʼ kʼiinoʼob jeʼeloʼ kin tuklik kaʼacheʼ Jéeoba beetik u binten utsil». Baʼaleʼ ¿bey wa tu jaajiloʼ?

⁸ Davideʼ tu tsʼáaj cuenta káaj u xuʼulul u biskuba yéetel Jéeoba yoʼolal le meyaj ku beetkoʼ. Letiʼeʼ ku yaʼalik: «Kéen xiʼiken muchʼtáambal yéetel kéen jóokʼken kʼaʼaytajeʼ chéen kin tuukul tiʼ le talamiloʼob yaanten teʼ tuʼux kin meyajoʼ. Yaʼab taakʼin kin náajaltik, baʼaleʼ joʼopʼ in chiʼichnaktal yéetel káaj u yantalten talamiloʼob yéetel in watan».

⁹ Davideʼ tu tsʼáaj cuenta kʼaʼabéet u yilik jach baʼax unaj u tsʼáaik táanil ichil u kuxtal. Letiʼeʼ ku yaʼalik: «Tin chʼaʼtuklaj in kʼexik in tuukul». Davideʼ joʼopʼ u yilik bix jeʼel u kʼexik u yorail u meyajeʼ, tsʼoʼoleʼ tu tsikbaltaj tiʼ u patrón. Yoʼolal leloʼ luʼsaʼab meyaj tiʼ. ¿Baʼax túun tu beetaj? Letiʼeʼ ku yaʼalik: «Ka sáaschaj tuláakʼ kʼiineʼ tin kʼubaj in solicitud utiaʼal  in beetik in precursor auxiliaril mantatsʼ». Utiaʼal u kaxtikoʼob baʼax kʼaʼabéettiʼobeʼ joʼopʼ u meyaj yéetel u yatan tiʼ limpieza. Ka máan kʼiineʼ Davideʼ káaj u beetik u precursor regularil, tsʼoʼoleʼ u yatan xaneʼ káaj u beetik u precursorail. Letiʼobeʼ ku beetkoʼob junpʼéel meyaj maʼ jeʼel máaxak ku yóotik u beeteʼ, baʼaleʼ maʼatech u beetkoʼob u cuentail. Kex junpʼíit ku náajaltikoʼob tiʼ le suuk u náajaltikoʼob kaʼachoʼ, mix baʼal ku bineltiktiʼob. Tu tsʼáajoʼob táanil u meyajtikoʼob Jéeoba, ka tu yiloʼobeʼ, letiʼeʼ ku kanáantik le máaxoʼob kaxtik táanil le Reinooʼ (Mat. 6:31-33).

10. ¿Bix jeʼel k-kanáantik k-puksiʼikʼaleʼ?

¹⁰ Kex ayikʼaloʼon wa maʼatecheʼ kʼaʼabéet k-kanáantik k-puksiʼikʼal. ¿Bix jeʼel k-beetkeʼ? Unaj k-kanáantik maʼ k-yaabiltik le ayikʼaliloʼoboʼ yéetel maʼ unaj k-maas tsʼáaik k-óol chéen náajal ka tak xuʼuluk k-meyajtik Jéeobaiʼ. Utiaʼal k-ilik wa maʼ táan u yúuchultoʼoneʼ, unaj k-tuklik: «¿Kin tuukul wa chéen tiʼ in meyaj le tiaʼanen muchʼtáambal wa le jokʼaʼanen kʼaʼaytajoʼ? ¿Saajken wa ka pʼáatak minaʼanten taakʼin? ¿Yaanten wa talamiloʼob yéetel in núup yoʼolal taakʼin wa yoʼolal uláakʼ baʼaloʼob koʼojtak? ¿Jeʼel wa in beetik junpʼéel meyaj maʼ tu beetaʼal tumen u maasil utiaʼal u páajtal in maas meyajtik Jéeobaeʼ?» (1 Tim. 6:9-12). Kéen tuukulnakoʼon tiʼ le kʼáatchiʼobaʼ unaj k-kʼaʼajsikeʼ Jéeobaeʼ u yaabiltmoʼon, le oʼolal ku yaʼalik tiʼ cada juntúul tiʼ le máaxoʼob meyajtik yéetel chúukaʼan óolaloʼ: «Mix bikʼin ken in pʼatech yéetel mix bikʼin ken in xúumpʼattech». Le oʼolaleʼ apóstol Pabloeʼ tu yaʼalaj: «Le bix a kuxtaleʼexoʼ ka u yeʼes maʼ a yaabiltmeʼex le taakʼinoʼ» (Heb. 13:5, 6).

11. ¿Bix jeʼel u kʼaskúuntaʼal k-tuukul tumen le náaysaj óolaloʼoboʼ?

¹¹ Jéeobaeʼ u kʼáat ka yanaktoʼon kiʼimak óolal ichil k-kuxtal, junpʼéel bix jeʼel u yantaltoʼoneʼ letiʼe kéen k-náays k-óoloʼ. Tak le Bibliaoʼ ku yaʼalikeʼ «baʼax u najmal u beetik wíinikeʼ janal, ukʼul, ka xan u kiʼimakkúuns u yóol yéetel u tojol u náajal» (Ecl. 2:24). Baʼaleʼ yaʼab tiʼ le náaysaj óolaloʼob yaan teʼ yóokʼol kaabaʼ maʼ maʼalobtakiʼ, tumen ku kʼaskúuntik u tuukul máak yéetel ku beetik u yutstal tu yich baʼaloʼob ku yaʼalik le Biblia maʼ unaj u beetaʼaloʼ.

12. Jeʼex u yaʼalik Yáax tiʼ Corintoiloʼob 10:21 yéetel 22, ¿baʼaxten unaj k-yéeyik tubeel baʼaxoʼob yéetel k-náaysik k-óol?

¹² Toʼoneʼ k-kʼáat k-meyajt chéen Jéeoba, le  oʼolal maʼ unaj k-janal «yóokʼol u mesa Jéeoba» yéetel «yóokʼol u mesa le demonioʼoboʼ» (xok 1 Corintoiloʼob 10:21, 22). Le máaxoʼob suuk u biskubaʼoboʼ u suukileʼ ku múul janaloʼob. U náaysik u yóol máak yéetel baʼaloʼob tuʼux ku chíikpajal u beetaʼal loob, j-meenil, núupkʼeban yéetel uláakʼ baʼaloʼob kʼaastakeʼ bey ka kulak máak janal yéetel le máaxoʼob pʼekmil Diosoʼ, tumen ku jaantik le baʼaxoʼob ku tsʼáaikoʼoboʼ. Wa k-beetkeʼ yaan u bintoʼon kʼaasil yéetel jeʼel tak u xuʼulul k-bisikba yéetel Jéeobaeʼ.

13, 14. 1) ¿Baʼaxten ku keʼetel le náaysaj óolal yéetel le janaloʼ? 2) Yoʼolal le baʼax ku yaʼalik Santiago 1:14 yéetel 15, ¿baʼaxten maʼ unaj k-oksik baʼaloʼob kʼaastak t-tuukuliʼ?

¹³ ¿Baʼaxten ku keʼetel le náaysaj óolal yéetel janaloʼ? Le kéen jaankoʼoneʼ k-kanáantik baʼaxoʼob k-jaantik. Baʼaleʼ kéen k-lukʼeʼ k-wíinklileʼ ku joʼopʼol u chʼaʼik le baʼaxoʼob kun meyajtiʼ utiaʼal u tsʼáaiktoʼon muukʼoʼ. Wa k-jaantik baʼaloʼob maʼalobtakeʼ maʼ ken k-jáan kʼojaʼantal, baʼaleʼ wa maʼ maʼalob baʼax k-jaantikeʼ yaan k-kʼojaʼantal. Lelaʼ ku máan kʼiin kéen joʼopʼok u yuʼubik máak.

¹⁴ Bey túun xanoʼ, kéen k-yéey maʼalob baʼaxoʼob yéetel k-náaysik k-óoleʼ k-kanáantik baʼaxoʼob k-oksik t-tuukul, tumen kéen tsʼoʼokok u yokol t-tuukuleʼ ku káajal u nuʼuktik bix k-uʼuyikba yéetel baʼaxoʼob k-tuklik. Wa k-náaysik k-óol yéetel baʼaloʼob maʼalobtakeʼ k-uʼuyikba maʼalobil, baʼaleʼ wa k-náaysik k-óol yéetel baʼaloʼob maʼ maʼalobtakeʼ ku beetiktoʼon kʼaas (xok Santiago 1:14, 15). Maʼ xaaneʼ maʼ séebaʼan u chíikpajal wa táan u beetiktoʼon uts wa kʼaasiʼ, baʼaleʼ kéen máanak kʼiineʼ yaan u chíikpajal. Le oʼolal le Bibliaoʼ ku yaʼalik: «Maʼ a tuskabaʼex: mix máak jeʼel u páajtal u burlarkuba tiʼ Dioseʼ. Tumen jeʼel baʼaxak ka u pakʼ máakeʼ le xan ken u joche; tumen le máax chéen ku tuukul tiʼ u kʼeban wíinklil ken paakʼalnakeʼ, yaan u jochik xuʼulsajil tiʼ u kʼeban wíinklil» (Gal. 6:7, 8). Bey túunoʼ jach kʼaʼabéet k-kanáantik maʼ k-náaysik k-óol yéetel baʼaxoʼob jeʼel u péeksikoʼon k-beet baʼax u pʼekmaj Jéeobaeʼ (Sal. 97:10).

15. ¿Baʼax jatsʼuts baʼaloʼob ku tsʼáaiktoʼon Jéeoba utiaʼal k-náaysik k-óol?

¹⁵ Yaʼab sukuʼunoʼobeʼ uts tu tʼaan u chaʼantikoʼob le jatsʼuts baʼaloʼob ku jóoʼsaʼal teʼ JW Broadcasting^® ich Internetoʼ. Juntúul kiik ku kʼaabaʼtik Marilyneʼ ku yaʼalik: «Le baʼaxoʼob yanoʼ tsʼoʼok u yáantken utiaʼal u yantalten kiʼimak óolal, tsʼoʼoleʼ maʼ kʼaʼabéet in kanáantik baʼaxoʼob ken in chaʼantiʼ. Kéen in wuʼuyinba chéen tin juunal yéetel lubaʼan in wóoleʼ, kin kaxtik junpʼéel tsoltʼaan wa junpʼéel adoración de jaʼatskab tu najil Betel utiaʼal u líiʼsik in wóol. Leloʼ ku maas natsʼken tu yiknal Jéeoba yéetel tiʼ u kaajal. Jach tsʼoʼok u yáantken le JW Broadcasting ichil in kuxtaloʼ». ¿Táan wa k-jóoʼsik u yutsil xan toʼon? Cada meseʼ ku tsʼaʼabal tsoltʼaanoʼobiʼ bey xan uláakʼ videoʼob yéetel kʼaayoʼob jach jeʼel u líiʼsik k-óoleʼ.

16, 17. ¿Baʼaxten unaj k-tsʼáaik u pʼiis bukaʼaj tiempo k-náaysik k-óol, yéetel bix jeʼel u páajtal k-beetkeʼ?

¹⁶ Maʼ chéen unaj k-kanáantik yéetel baʼaxoʼob k-náaysik k-óoliʼ, baʼaxeʼ tak bukaʼaj tiempo k-máansik le táan k-beetkoʼ, tumen wa maʼeʼ maas yaʼab tiempo ken k-máans táan k-náaysik k-óol ke le táan k-meyajtik Jéeobaoʼ. Yaʼab sukuʼunoʼobeʼ ku talamtal u beetkoʼob. Jeʼex Abigail, yaan 18 años tiʼeʼ, ku yaʼalik: «Kéen tsʼoʼokok in meyaj bul kʼiineʼ kin kutal in chaʼant televisión utiaʼal in náaysik in wóol. Baʼaleʼ kin kanáantik bukaʼaj tiempo ken in chaʼante, tumen wa maʼeʼ jeʼel u xáantal chéen le kin beetkeʼ». Samuel xaneʼ, ku yaʼalik: «Yaan kʼiineʼ ku xáantal táan in chaʼantik mejen  videoʼob ich Internet. Ku káajal in chaʼantik chéen junpʼéeliʼ, baʼaleʼ chéen ken in tsʼáa cuentaeʼ tsʼoʼok u máan tres wa cuatro horas chéen le kin beetik».

¹⁷ ¿Bix jeʼel k-tsʼáaik u pʼiis le bukaʼaj tiempo k-náaysik k-óoloʼ? Yáaxeʼ unaj k-ojéeltik bukaʼaj tiempo suuk k-náaysik k-óol. Utiaʼal lelaʼ jeʼel u páajtal k-tsʼíibtik tiʼ junpʼéel calendario le bukaʼaj tiempo k-chaʼantik televisión ichil junpʼéel semanaoʼ, bukaʼaj tiempo k-máansik Internet yéetel bukaʼaj tiempo ku meyajtoʼon k-celular. Wa k-tsʼáaik cuenta jach yaʼab tiempo ku bisiktoʼoneʼ unaj u káajal k-ilik k-tsʼáaik u pʼiis. Yáax unaj k-jóoʼsik u tiempoil k-beetik le baʼaxoʼob maas kʼaʼanaʼantakoʼ, tsʼoʼoleʼ k-ilik bukaʼaj tiempo ken k-náays k-óol. Kéen tsʼoʼokkeʼ k-kʼáatik tiʼ Jéeoba ka u yáantoʼon utiaʼal k-beetik jeʼex tsʼoʼok k-chʼaʼtuklikoʼ. Beyoʼ yaan u yantaltoʼon tiempo k-xakʼalxoktik le Biblia t-juunaloʼ, k-beetik le adoración ich familiaoʼ, k-bin muchʼtáambal, k-jóokʼol kʼaʼaytaj yéetel k-tsʼáaik xook. Beyoʼ maas yaan u kiʼimaktal k-óol kéen k-náays k-óol.

18, 19. ¿Bix jeʼel k-eʼesik k-adorartik chéen Jéeobaeʼ?

¹⁸ Ka tsʼoʼok u tʼaan apóstol Pedro tiʼ bix kun xuʼulsbil tiʼ u kʼasaʼan yóokʼol kaab Satanás yéetel tiʼ le túumben luʼum kun antaloʼ, tu yaʼalaj: «In yaabilaj sukuʼuneʼex, bey tumen táan a páaʼtkeʼex le baʼaloʼobaʼ, beeteʼex tuláakal le ku páajtal utiaʼal ka u yil Dios minaʼan a siʼipileʼex, minaʼan a kʼasaʼanileʼex yéetel kuxaʼaneʼex ich jeetsʼelil» (2 Ped. 3:14). Kéen k-beet le baʼax tu yaʼalaj yéetel kéen k-bis junpʼéel kuxtal limpio tu táan Jéeobaeʼ, k-eʼesik táan k-adorartik chéen letiʼ.

¹⁹ Satanás yéetel u kʼasaʼan yóokʼol kaabeʼ maʼ kun xuʼulul u beetkoʼob k-tsʼáaik táanil uláakʼ baʼaloʼob utiaʼal k-pʼatik juntséelil k-meyajtik Dios (Luc. 4:13). Baʼaleʼ jeʼel baʼaxak talamil ka k-aktáanteʼ maʼ unaj k-chaʼik tiʼ mix máak yéetel tiʼ mix baʼal ka u beet u xuʼulul k-yaabiltik Jéeoba tu jaajil k-óoliʼ. Toʼoneʼ k-chʼaʼtukultmaj k-adorartik chéen Jéeoba, tumen chéen letiʼ náajmatik ka k-adorarte.