XOOK 41
Áant le máax ka tsʼáaik xook tiʼoʼ utiaʼal ka okjaʼanak (jaats 1)
«Teʼexeʼ u cartaʼex Cristo k-tsʼíibtmaj yoʼolal le meyaj t-beetoʼ» (2 COR. 3:3).
KʼAAY 78 Kaʼans u Tʼaan Dios
TIʼ BAʼAX KUN TʼAAN *
Jach ku kiʼimaktal u yóol le múuchʼulil le kéen u yil tsʼoʼok u yokjaʼ juntúul j-xoknáaloʼ (Ilawil párrafo 1).
1. ¿Bix u yáantkoʼon 2 Corintios 3:1-3 k-il jach jatsʼuts u yáantaʼal juntúul máak utiaʼal ka okjaʼanak? (Ilawil u yáax páginail le revistaaʼ).
¿BIX k-uʼuyikba le kéen okjaʼanak juntúul máax ku tsʼaʼabal xook tiʼoʼ? ¿Máasaʼ jach ku kiʼimaktal k-óol? (Mat. 28:19). Tsʼoʼoleʼ wa toʼon tsʼáa le xookoʼ maas ku kiʼimaktal k-óol (1 Tes. 2:19, 20). Le máaxoʼob táant u yokjaʼoboʼ ku beetkoʼob u «yúuchul maʼalob tʼaan» tiʼ le máax tsʼáa xook tiʼoʼ bey xan tiʼ le múuchʼuliloʼ (xok 2 Corintios 3:1-3).
2. 1) ¿Tiʼ baʼax kʼáatchiʼil unaj k-tuukul, yéetel baʼaxten? 2) ¿Bix jeʼel k-ojéeltik wa táan k-tsʼáaik xook tiʼ wa máaxeʼ? (Ilawil le notaoʼ).
2 Teʼ cuatro años tsʼoʼok u máanoʼ tiʼ tuláakal yóokʼol kaabeʼ cada meseʼ ku tsʼaʼabal xook * tiʼ 10,000,000 máakoʼob. Lelaʼ jach ku beetik u kiʼimaktal k-óol. Tsʼoʼoleʼ ichil le cuatro años xanoʼ tsʼoʼok u yokjaʼ kex 280,000 máakoʼob cada año. Lelaʼ ku yeʼesikeʼ yaʼab tiʼ le máaxoʼob táan u xookoʼoboʼ jeʼel u yokjaʼobeʼ. ¿Bix jeʼel k-áantkoʼobeʼ? Jéeobaeʼ ku yeʼesik paciencia yéetel táan u tsʼáaik tiempo utiaʼal ka okjaʼanak le máaxoʼob u kʼáatoʼob u meyajtoʼ. Jach maʼ yaʼab tiempo pʼaatliʼ le oʼolal unaj k-beetik tuláakal le ku páajtal utiaʼal k-áantik le máaxoʼob ku xokoʼob utiaʼal ka okjaʼanakoʼoboʼ (1 Cor. 7:29a; 1 Ped. 4:7).
3. ¿Baʼax ken k-il teʼ xookaʼ?
3 Le Cuerpo Gobernanteoʼ tu kʼáataj tiʼ jujunpʼéel sucursaloʼob baʼax jeʼel u páajtal u beetaʼal utiaʼal u yáantaʼal le u maas yaʼabil máakoʼob ku páajtal utiaʼal ka okjaʼanakoʼobeʼ. Teʼ xookaʼ bey xan le ku segueroʼ yaan k-kanik baʼax tsʼoʼok u beetik jujuntúul superintendenteʼob tiʼ circuito, misioneroʼob yéetel sukuʼunoʼob úuch káajak u beetik u precursoriloʼob yéetel jach u yojloʼob kaʼansaj (Pro. 11:14; 15:22). * Le baʼax tu yaʼaloʼoboʼ jach yaan u yáantik le sukuʼunoʼob ku tsʼáaikoʼob xookoʼ bey xan le máaxoʼob ku kaanbaloʼoboʼ. Teʼ xookaʼ yaan k-ilik cinco baʼaloʼob jeʼel u yáantik juntúul máak utiaʼal ka okjaʼanakeʼ. Yaan xan k-ilik baʼax unaj u beetik le máax ku tsʼáaik xook utiaʼal u yáantik tubeel u j-xoknáaloʼ.
UNAJ U XOOK MÁAK CADA SEMANA
Kʼáat tiʼ le j-xoknáal wa yaan tuʼux a kutaleʼex utiaʼal a xookeʼex (Ilawil párrafo 4 tak 6)
4. ¿Baʼax jeʼel u yúuchul wa k-tsʼáaik xook tiʼ juntúul máak chéen tu jool u yotocheʼ?
4 Yaʼab sukuʼunoʼobeʼ suuk u tsʼáaikoʼob xook tu jool u yotoch le máakoʼoboʼ. Kex maʼ kʼaas u beetaʼal beyaʼ u suukileʼ maʼatech u xáantal yéetel maʼ cada semana ku tsʼaʼabal le xookoʼ. Yaan sukuʼunoʼobeʼ utiaʼal u seguer u yáantkoʼob le máaxoʼob ku xíimbaltikoʼoboʼ ku kʼáatkoʼob u número u teléfonoʼob, beyoʼ ku páajtal u tʼankoʼob wa u túuxtikoʼob información yaan yil yéetel le Biblia antes u kaʼa xíimbaltikoʼoboʼ. * Jeʼel u máan yaʼab meses táan u kaʼansaʼal juntúul máak beyaʼ, pero maʼ tu yeʼesik wa u kʼáat u meyajt Jéeobaiʼ. Chéen baʼaleʼ wa juntúul máak maʼ tu jóoʼsik tiempo utiaʼal u maas kaanbaleʼ maʼ xaaneʼ mix bikʼin ken u chʼaʼtukult u kʼubik u kuxtal tiʼ Jéeoba mix u yokjaʼ.
5. Le baʼax tu yaʼalaj Jesús tiʼ Lucas 14:27-33, ¿bix jeʼel u yáantkoʼon utiaʼal k-áantik le j-xoknáaloʼoboʼ?
5 Juntéenjeakeʼ tiʼ Jesúseʼ meyajnaj kaʼapʼéel ejemploʼob utiaʼal u yeʼesik baʼax unaj u beetik le máax u kʼáat u meyajt Diosoʼ. Tʼaanaj tiʼ juntúul máak u kʼáat u beet junpʼéel torre bey xan tiʼ juntúul rey ku bin baʼateʼel tu contra uláakʼ juntúul rey. Tu yaʼaleʼ le máax u kʼáat u beet le torreoʼ «yáaxeʼ unaj u kutal u tukult bukaʼaj ken u tojolttiʼ utiaʼal u yilik wa jeʼel u páajtal u tsʼoʼoksikeʼ». Le rey xanoʼ unaj u kutal tsikbal yéetel le máaxoʼob áantik utiaʼal ka u yil wa jeʼel u ganartik le baʼateloʼ (xok Lucas 14:27-33). Le kaʼapʼéel ejemploʼob tu tsikbaltaj Jesúsoʼ ku yeʼesikeʼ le máax u kʼáat u meyajt Diosoʼ unaj u tuklik tubeel baʼax kʼaʼabéet u beetik utiaʼal ka béeyak u yokjaʼ. Le oʼolal kʼaʼabéet k-aʼaliktiʼ jach unaj k-xook tu yéetel cada semana. ¿Bix jeʼel u páajtal k-beetkeʼ?
6. ¿Baʼax jeʼel u páajtal k-beetik utiaʼal k-ilik wa taak u seguer u kaanbal le j-xoknáaloʼ?
6 Yáaxeʼ letiʼe k-ilik u xáantal le xook cada ken xiʼikoʼonoʼ. Maʼ xaaneʼ tu lugar k-tsolik chéen junpʼéel teksto tiʼeʼ jeʼel u páajtal k-tsolik tak kaʼapʼéel tiʼeʼ. Kéen suukak u yilik ku chan xáantal táan k-tsikbal yoʼolal le baʼax ku yaʼalik le Bibliaoʼ jeʼel u páajtal k-kʼáatiktiʼ wa yaan tuʼux k-kutal utiaʼal u seguer k-tsikbaleʼ. Le baʼax ken u yaʼaloʼ yaan u yeʼesik wa jach tu jaajil taak u seguer u kaanbal. Kéen máanak kʼiineʼ jeʼel tak u páajtal k-kʼáatiktiʼ wa u kʼáat xook kaʼatéen tiʼ junpʼéel semanaeʼ, beyoʼ maas séeb kun kaanbal. Koʼoneʼex ilik uláakʼ baʼax unaj u beetik le máax ku xookoʼ.
UNAJ U PREPARARKUBA MÁAK YÉETEL LE XOOKOʼ
Unaj k-líiʼsikba cada ken xiʼikoʼon tsʼaa xook; unaj xan k-kaʼansik tiʼ le j-xoknáal bix jeʼel u beetkeʼ (Ilawil párrafo 7 tak 9)
7. ¿Bix unaj u preparartik le xook le máax ku kaʼansajoʼ?
7 Le máax ku tsʼáaik xookoʼ unaj u prepararkuba tubeel antes u tsʼáaik xook. Yáaxeʼ jeʼel u páajtal u xakʼaltik le jaats ken u xokoʼoboʼ yéetel le tekstoʼob ku taaskoʼ. Jeʼel xan u páajtal u marcartik le baʼaxoʼob maas kʼaʼanaʼantakoʼ. Unaj u tuukul tiʼ u kʼaabaʼ le xookoʼ, le joʼol xookoʼoboʼ, le kʼáatchiʼoboʼ, le tekstoʼob unaj u xoʼokloʼ, le fotoʼoboʼ yéetel le dibujoʼoboʼ. Jeʼel xan u páajtal u yilik wa yaan junpʼéel video jeʼel u meyajeʼ. Kéen tsʼoʼokok k-beetik tuláakal lelaʼ unaj k-tuukul tiʼ le j-xoknáaloʼ yéetel bix jeʼel k-tsoliktiʼ tubeel le baʼax ken k-xakʼaltoʼ. Beyoʼ yaan u naʼatik le baʼax ku kanikoʼ yéetel yaan u tsʼáaik ichil u kuxtal (Neh. 8:8; Pro. 15:28a).
8. Jeʼex u yaʼalik Pablo tiʼ Colosenses 1:9, 10, ¿baʼax unaj k-beetik tu yoʼolal le j-xoknáaloʼ?
8 Le táan a prepararkabaoʼ kʼáat tiʼ Jéeoba ka u yáant le j-xoknáaloʼ, kʼáat xan tiʼ ka u yáantech a wil bix jeʼel u meyajtech le Biblia utiaʼal a kʼuchul tu puksiʼikʼaloʼ (xok Colosenses 1:9, 10). Tukult wa yaan baʼax maʼ tu jach naʼatik wa difícil u creertik. Maʼ unaj u tuʼubultecheʼ a kʼáat a wáant utiaʼal ka okjaʼanak.
9. ¿Bix jeʼel k-áantik le j-xoknáal utiaʼal u prepararkuba yéetel le xookoʼ?
9 Wa le j-xoknáal ku suuktal u xakʼalxoktik mantatsʼ le Bibliaoʼ yaan u maas yaabiltik Jéeoba yéetel Jesús yéetel yaan u maas taaktal u kaanbal tu yoʼolaloʼob (Mat. 5:3, 6). Utiaʼal u jóoʼsik u yutsil le baʼax ku kanikoʼ le j-xoknáaloʼ maʼ unaj u náayal u yóol le táan u xookoʼ. Utiaʼal maʼ u náayal u yóoleʼ jeʼel u páajtal k-aʼaliktiʼ kʼaʼabéet u prepararkuba antes k-xookeʼ yéetel ka u tukult bix jeʼel u tsʼáaik ichil u kuxtaleʼ. Maʼ xaaneʼ jeʼel k-áantik u preparart junpʼéel xookeʼ utiaʼal u yilik bix jeʼel u páajtal u beetkeʼ. * Kʼaʼabéet k-eʼesiktiʼ bix jeʼel u kaxtik u núukil le kʼáatchiʼoboʼ yéetel ka u marcart chéen wa jaypʼéel tʼaanoʼob utiaʼal u kʼaʼajsik bix ken u núukil. Kéen tsʼoʼokkeʼ k-aʼaliktiʼ ka u núuk le bix tu naʼatiloʼ maʼ de xokbiliʼ, beyoʼ yaan k-ilik wa táan u naʼatik le xookoʼ. Koʼoneʼex ilik baʼax unaj u beetik le j-xoknáal utiaʼal u taaktal u yokjaʼoʼ.
UNAJ U TʼAAN MÁAK SÁAMSAMAL YÉETEL JÉEOBA
Unaj k-kaʼansik tiʼ le j-xoknáal kʼaʼabéet u tʼaan yéetel Jéeobaoʼ (Ilawil párrafo 10 yéetel 11)
10. 1) ¿Baʼaxten le j-xoknáaloʼ unaj u xokik sáamsamal le Bibliaoʼ? 2) ¿Baʼax unaj u beetik utiaʼal u jóoʼsik u yutsil le xook ku beetkoʼ?
10 Kex ka xooknak cada semanaeʼ yaan baʼaloʼob unaj u suuktal u beetik le j-xoknáal chéen tu juunaloʼ. Junpʼéel baʼax unaj u suuktal u beetkeʼ letiʼe u tʼaan yéetel Jéeobaoʼ bey xan u yuʼubik le baʼax ku yaʼalaʼaltiʼoʼ. Wa ku xokik sáamsamal le Bibliaoʼ bey ka u yuʼub u tʼaʼanal tumen Jéeobaeʼ (Jos. 1:8; Sal. 1:1-3). Maʼalob ka k-kaʼans u usart u programail u xookil le Biblia tiaʼan jw.org, hasta jeʼel u páajtal u imprimirke. * Chéen baʼaleʼ utiaʼal u jóoʼsik u yutsil u xookil le Bibliaoʼ unaj k-aʼaliktiʼ ka tuukulnak tiʼ baʼax ku kanik yoʼolal Jéeoba bey xan ka tuukulnak tiʼ bix jeʼel u tsʼáaik ichil u kuxtaleʼ (Hech. 17:11; Sant. 1:25).
11. 1) ¿Bix jeʼel u kanik orar le j-xoknáaloʼ? 2) ¿Baʼaxten unaj u suuktal u beetik?
11 Unaj k-aʼalik tiʼ le j-xoknáal ka orarnak sáamsamal tiʼ Jéeobaoʼ. Kéen orarnakoʼon tu káajbal yéetel tu tsʼoʼokbal le xookoʼ unaj k-beetik yéetel u jaajil k-óol tsʼoʼoleʼ maʼalob ka k-chʼaʼchiʼit le j-xoknáaloʼ. Beyoʼ yaan u kanik orar chéen tiʼ Jéeoba, yaan u beetik tu jaajil u yóol yéetel tu kʼaabaʼ Jesucristo (Mat. 6:9; Juan 15:16). Le j-xoknáaloʼ jach yaan u náatsʼal tiʼ Jéeoba wa ku xokik sáamsamal le Bibliaoʼ bey xan wa ku orar (Sant. 4:8). Wa ku suuktal u beetik sáamsamal le baʼaloʼobaʼ yaan u taaktal u kʼubik u kuxtal tiʼ Jéeoba yéetel u yokjaʼ. Koʼox ilik uláakʼ baʼax jeʼel u yáantikeʼ.
UNAJ U BISKUBA MÁAK YÉETEL JÉEOBA
12. ¿Bix jeʼel k-áantik le j-xoknáal u yaabilt Jéeobaoʼ?
12 Le baʼax ku kanik le j-xoknáaloʼ maʼ chéen unaj u pʼáatal tu tuukuliʼ unaj xan u kʼuchul tu puksiʼikʼal. Wa ku kʼuchul tu puksiʼikʼal le baʼax ku kanikoʼ yaan u taaktal u beetik. Kex Jesús tu kaʼansaj yaʼab baʼaloʼob tiʼ le máakoʼob yéetel jatsʼuts u yuʼubaʼal u kaʼansajeʼ tu yilaj u kʼuchul tu puksiʼikʼaloʼob (Luc. 24:15, 27, 32). Le j-xoknáaloʼ unaj u creertik jach tu jaajil yaan Jéeoba yéetel unaj u yilik bey u Taataeʼ, bey u Dioseʼ yéetel bey u Amigoeʼ (Sal. 25:4, 5). Le táan k-tsʼáaik le xookoʼ unaj k-beetik u yilik le jatsʼuts modos yaan tiʼ Jéeobaoʼ (Éxo. 34:5, 6; 1 Ped. 5:6, 7). Cada ken k-tsʼáa xook tiʼeʼ unaj k-eʼesiktiʼ bix Jéeoba. Unaj k-áantik u yil le jatsʼuts modos yaan tiʼ Diosoʼ jeʼex u yaabilaj u yutsil yéetel u chʼaʼ óotsilal. Jesúseʼ tu yaʼaleʼ le yáax mandamiento yéetel le maas nojochoʼ letiʼe u yaabiltaʼal Jéeoba Diosoʼ (Mat. 22:37, 38). Le oʼolal unaj k-beetik tuláakal le ku páajtal utiaʼal k-áantik le j-xoknáal u jach yaabilt Jéeobaoʼ.
13. Tsol bix jeʼel u páajtal a wáantik le j-xoknáal u yil jach kʼaʼabéet u maas biskuba yéetel Jéeoba yéetel u yaabiltikoʼ.
13 Le kéen tsikbalnakoʼon yéetel j-xoknáaloʼ unaj k-aʼaliktiʼ bukaʼaj k-yaabiltmil Jéeobaoʼ. Lelaʼ yaan u yáantik utiaʼal u yilik jach kʼaʼabéet u beetik le ku páajtal utiaʼal u maas biskuba yéetel Dios yéetel u yaabiltikoʼ (Sal. 73:28). Koʼox aʼalikeʼ táan k-xakʼaltik junpʼéel publicación wa junpʼéel teksto jach ku kʼuchul t-puksiʼikʼal le baʼax ku yaʼalikoʼ tumen ku tʼaan yoʼolal u yaabilaj, u naʼat, u justicia yéetel u poder Jéeoba. Jeʼel u páajtal k-aʼaliktiʼeʼ leloʼ chéen junpʼéel tiʼ le baʼax oʼolal jach k-yaabiltmaj Jéeobaoʼ. Beoraeʼ koʼox ilik le u tsʼook baʼal jeʼel u páajtal u beetik le j-xoknáal utiaʼal u béeytal u yokjaʼoʼ.
UNAJ U BIN MÁAK TEʼ MUCHʼTÁAMBALOʼ
Unaj k-aʼalik tiʼ le j-xoknáal jach kʼaʼabéet u bin teʼ muchʼtáambaloʼ (Ilawil párrafo 14 yéetel 15)
14. Jeʼex u yaʼalik Hebreos 10:24, 25, ¿baʼax kun áantik le j-xoknáal utiaʼal u progresaroʼ?
14 Tuláakloʼon k-kʼáat k-il u yokjaʼ le j-xoknáaloʼoboʼ. Junpʼéel baʼax jach jeʼel u yáantajeʼ letiʼe u binoʼob muchʼtáambaloʼ. Le máaxoʼob jach u yojloʼob tsʼaa xookoʼ ku yaʼalikoʼobeʼ le j-xoknáaloʼob ku binoʼob muchʼtáambaloʼ maas séeb u progresaroʼob (Sal. 111:1). Letiʼobeʼ suuk u yaʼalikoʼob tiʼ u j-xoknáaloʼobeʼ le táan u xookoʼoboʼ yaan baʼax ku kankoʼob pero wa ku binoʼob teʼ muchʼtáambaloʼ yaan u kankoʼob uláakʼ baʼaloʼob. Maʼalob ka k-xok tu yéetel Hebreos 10:24, 25 (xoke), tsʼoʼoleʼ k-tsoliktiʼ le utsiloʼob ku taasik u bin teʼ muchʼtáambaloʼ. Jeʼel u páajtal xan k-eʼesiktiʼ le video ¿Bix le muchʼtáambaloʼob ku beetaʼal teʼ Najil Reinooʼ? * Unaj k-áantik le j-xoknáal utiaʼal ka u beet tuláakal le ku páajtal utiaʼal u bin teʼ muchʼtáambaloʼoboʼ.
15. ¿Bix jeʼel k-áantik le j-xoknáal utiaʼal ka xiʼik teʼ muchʼtáambaloʼoboʼ?
15 ¿Bix jeʼel k-áantik juntúul j-xoknáal mix juntéen xiʼik muchʼtáambaleʼ? ¿Kux túun wa chéen wa baʼax kʼiin ku bin? Utiaʼal k-áantikeʼ jeʼel u páajtal k-tsikbaltiktiʼ junpʼéel baʼax jatsʼuts t-kanaj teʼ muchʼtáambaloʼ. Leloʼ jach jeʼel u yáantik utiaʼal u taaktal u bineʼeʼ. Jeʼel tak u páajtal k-tsʼáaiktiʼ le revista U Pʼíich Tulumil Kanan ku xakʼaltaʼal teʼ múuchʼuliloʼ wa le u Kuxtal yéetel Meyaj jeʼex Cristoeʼ. U juʼunil xook utiaʼal le muchʼtáambaloʼ. Tsʼoʼoleʼ k-eʼesiktiʼ le baʼax kun ilbil teʼ muchʼtáambaloʼ yéetel k-kʼáatiktiʼ baʼax maas jatsʼuts u yilkiʼ. Le bix ken u yuʼubiluba le yáax juntéen ken xiʼik teʼ muchʼtáambaloʼ maʼ ken u tuʼubse yéetel mix tuʼux uláakʼ jeʼel u yuʼubikuba beyoʼ (1 Cor. 14:24, 25). Tsʼoʼoleʼ yaan u kʼaj óoltik sukuʼunoʼob jach u tsʼaamaj u yóol u meyajtoʼob Dios. Letiʼobeʼ yaan u yáantkoʼob le j-xoknáal utiaʼal ka u maas meyajt Diosoʼ yéetel utiaʼal ka okjaʼanak.
16. 1) ¿Bix jeʼel k-áantik juntúul j-xoknáal utiaʼal ka okjaʼanakeʼ? 2) ¿Baʼax ken k-kan teʼ tuláakʼ xookoʼ?
16 Jeʼex tsʼoʼok k-ilkoʼ, ¿bix jeʼel k-áantik juntúul j-xoknáal utiaʼal ka okjaʼanakeʼ? Kʼaʼabéet k-aʼaliktiʼ jach unaj u xook cada semana yéetel jach kʼaʼabéet u líiʼskuba. Unaj xan k-aʼaliktiʼ ka orarnak sáamsamal tiʼ Jéeoba yéetel u yilik bey u amigoeʼ bey xan k-áantik u yil jach kʼaʼabéet u bin teʼ muchʼtáambaloʼoboʼ. (Ilawil le cuadro « Baʼax unaj u beetik le j-xoknáaloʼ»). Teʼ tuláakʼ xookoʼ yaan k-kanik cinco baʼaloʼob unaj u beetik le máax ku tsʼáaik xook utiaʼal u yáantik le j-xoknáal utiaʼal ka okjaʼanakoʼ.
KʼAAY 76 Kiʼimak in wóol ikil in kaʼansik u Tʼaan Dios
^ xóot’ol 5 A kaʼansik juntúul máakeʼ letiʼe a wáantik u kʼex bix u tuukuloʼ, le bix u yuʼubikubaoʼ yéetel le bix u kuxtaloʼ. U tekstoil u añoil 2020, Mateo 28:19. Le tekstoaʼ ku kʼaʼajsiktoʼon kʼaʼabéet k-tsʼáaik xook tiʼ le máakoʼoboʼ yéetel kʼaʼabéet k-áantkoʼob utiaʼal ka okjaʼanakoʼob. Le xookaʼ yéetel le ku segueroʼ yaan u yáantkoʼon k-beet maas maʼalob le meyaj kʼubéentaʼantoʼonoʼ.
^ xóot’ol 2 BAʼAX KU TSOʼOLOL: Wa suuk k-tsikbal yéetel wa máax yoʼolal le Biblia yéetel ku meyajtoʼon junpʼéel publicación wa tiʼ k-chʼaʼik le baʼax k-tsikbaltikoʼ jeʼel u páajtal u yaʼalaʼal táan k-tsʼáaik xook tiʼeʼ. Wa tsʼoʼok k-eʼesiktiʼ bix k-tsʼáaik xook, tsʼoʼok k-xook kaʼatéen tu yéetel, tsʼoʼoleʼ k-ilik jeʼel u seguer u xookeʼ jeʼel u páajtal k-informarkeʼ.
^ xóot’ol 3 Le kaʼapʼéel xookoʼobaʼ ku taasik xan jujunpʼéel tiʼ le baʼaxoʼob tsoʼol teʼ jaats «Kʼaʼabéet k-áantik le j-xoknáaloʼob utiaʼal ka u beetoʼob le baʼax ku kankoʼoboʼ». Le jaatsaʼ jóokʼ desde tu mesil julio tiʼ 2004 tak tu mesil mayo tiʼ 2005 tiʼ K-meeyjil tiʼ le Reinooʼ.
^ xóot’ol 4 Tuláakal le j-kʼaʼaytajoʼoboʼ unaj u kanáantkoʼob u datos le máakoʼob jeʼex u yaʼalik le ley u tsʼaamaj le gobierno teʼ luʼumil tuʼux kajaʼanoʼoboʼ.
^ xóot’ol 9 Ilawil le video Áant a j-xoknáal u líiʼsuba, ooken JW Library®, ka a kaxt MULTIMEDIA > NUESTRAS REUNIONES Y MINISTERIO > MEJORE SUS HABILIDADES EN EL MINISTERIO.
^ xóot’ol 10 Kaxt JÓOʼSAʼANILOʼOB > LIBROʼOB YÉETEL FOLLETOʼOB.
^ xóot’ol 14 Ooken JW Library®, kaxt MULTIMEDIA > NUESTRAS REUNIONES Y MINISTERIO > AYUDAS PARA LA PREDICACIÓN.
