Le j-Xoknáaloʼob tiʼ le Bibliaoʼ kʼaʼabéet maʼ saajkoʼobiʼ tumen yaan u tsikbaltikoʼob kaʼach «le baʼaloʼob maʼalobtak ku taal u kʼiinoʼ» bey xan «u kʼiinil u vengarkuba» Dios tiʼ le kʼasaʼan máakoʼoboʼ.

John Hoskin, juntúul sukuʼun kajaʼan kaʼach Canadáeʼ, maʼ sajakchaj kʼaʼaytajiʼ. Tu káajbal u añoil 1921, tu yilaj juntúul pastor metodistaeʼ ka tu yaʼalajtiʼ: «Unaj k-múul tsikbaltik baʼax ku yaʼalik le Bibliaoʼ. Wa yaan tiʼ baʼax maʼ de acuerdooneʼ jeʼel u páajtal u xuʼulul k-tsikbal sin ke k-tsʼíikileʼ». Chéen baʼaleʼ maʼ bey úuchikiʼ. Le sukuʼun Hoskinoʼ ku yaʼalik: «Jach maʼ sáam káajak k-tsikbaleʼ le pastoroʼ tu xíikkʼaltaj le joonajoʼ, hasta tin tuklaj yaan u júutul u cristalileʼ».

Le pastor túunoʼ tu yawtaj: «¿Baʼaxten maʼ ta bin tsikbal yéetel le máaxoʼob maʼ u kʼaj óoloʼob Diosoʼ?». Le sukuʼun Hoskinoʼ maʼ tu yaʼalaj mix baʼaliʼ, chéen baʼaleʼ le ka lukʼ tu yiknal le máakoʼ tu yaʼalaj: «¡Tin tukleʼ letiʼe baʼax táan in beetik kaʼachoʼ!».

Chéen baʼaleʼ maʼ bey tsʼoʼokikoʼ, tuláakʼ kʼiineʼ le pastoroʼ seguernaj u yaʼalik baʼal tu contra le sukuʼunoʼ. Le sukuʼun Hoskinoʼ ku yaʼalik: «Tu yaʼalaj tiʼ le máaxoʼob ku binoʼob tu iglesiaoʼ ka u kanáantubaʼob tiʼ teen. Tu yaʼaleʼ chéen tuus kin beetik yéetel unaj in táaj tsʼontaʼal». Chéen baʼaleʼ leloʼ maʼ tu beetaj u lúubul u yóol le sukuʼunoʼ. Letiʼeʼ seguernaj u kʼaʼaytajeʼ ka béeychaj u tsikbal yéetel yaʼab máakoʼob, letiʼeʼ ku yaʼalik: «Jach tin disfrutartaj in kʼaʼaytaj joonaj joonajil. Yaan tak jujuntúul máakoʼob tu yaʼaloʼobten: ‹K-ojel ka meyajtik Dios›, tsʼoʼoleʼ ka tu kʼáatoʼobten baʼax jeʼel u páajtal u beetkoʼob tin woʼolaleʼ».

Le j-Xoknáaloʼob tiʼ le Bibliaoʼ tu beetoʼob programaʼob utiaʼal u xakʼalxook máak, yéetel tu jóoʼsoʼob tiʼ le revista The Golden Age utiaʼal u yáantkoʼob progresar le máaxoʼob taak u kaanbaloʼoboʼ. * Le programa tu kʼaabaʼtaj «Juvenile Bible Study» (Utiaʼal u xakʼalxook le táankelmoʼoboʼ) ku taasik kʼáatchiʼob jeʼel u páajtal kaʼach u xakʼaltik le taatatsiloʼob yéetel u paalaloʼoboʼ. Le taatatsiloʼoboʼ unaj kaʼach «u beetkoʼob le kʼáatchiʼob tiʼ u paalaloʼoboʼ yéetel u múul kaxtikoʼob u núukil teʼ Bibliaoʼ». Yaan kʼáatchiʼobeʼ ku yáantik kaʼach máak u kan jujunpʼéel baʼaloʼob maʼ jach talamtakiʼ, jeʼex le kʼáatchiʼ: «¿Jaypʼéel libroʼob ku taasik le Bibliaoʼ?». Chéen baʼaleʼ yaan xan kʼáatchiʼobeʼ ku  yáantkoʼob le táankelmoʼob utiaʼal maʼ u sajaktaloʼob kʼaʼaytajoʼ, jeʼex le kʼáatchiʼ: «Le u jaajil cristianoʼoboʼ, ¿unaj wa u páaʼtkoʼob u chʼaʼpachtaʼaloʼob?».

Le programa tu kʼaabaʼtaj «Advanced Studies in the Divine Plan of the Ages» (Utiaʼal u xakʼalxoktaʼal le libro Plan Divino de las Edades) tu taasaj kʼáatchiʼob ku beetik u tuukul le j-Xoknáaloʼob tiʼ le Biblia yiijchajaʼan u tuukuloʼoboʼ, le kʼáatchiʼobaʼ chʼaʼabaʼan kaʼach u tuukulil tiʼ le yáax libro tu kʼaabaʼtaj Estudios de las Escrituras. Yaʼab máaxoʼob tu jóoʼsoʼob u yutsil le programaʼobaʼ. Chéen baʼaleʼ le revista The Golden Age jóoʼsaʼab 21 tiʼ diciembre tiʼ 1921, tu yaʼaleʼ yaan u xuʼulul u jóoʼsaʼal le kaʼapʼéel programaaʼ. ¿Baʼaxten túun?

Le sukuʼunoʼob nuʼuktik kaʼach le j-Xoknáaloʼob tiʼ le Bibliaoʼ tu tsʼáajoʼob cuenta kʼaʼabéet u yáantaʼal le túumbenoʼob u naʼatoʼob jujunpʼéel baʼaloʼob ku kaʼansik le Bibliaoʼ. Le oʼolaleʼ tu mesil noviembre tiʼ 1921, tu jóoʼsoʼob le libro The Harp of God (ich españoleʼ jóoʼsaʼab tu añoil 1925 yéetel tu kʼaabaʼtaj El Arpa de Dios). Le máaxoʼob kʼamik kaʼach le librooʼ ku tsʼíibtaʼal u kʼaabaʼob utiaʼal u táakpajloʼob tiʼ junpʼéel xook ku kʼaabaʼtik The Harp Bible Study Course (Utiaʼal u xakʼalxoktaʼal le libro El Arpa de Dios). Le máakoʼoboʼ jeʼel u páajtal kaʼach u xookoʼob tu juunaloʼobeʼ yéetel u yilkoʼob «bix u chʼaʼtukultmil Dios u tsʼáaik kuxtal minaʼan u xuul tiʼ wíinik». ¿Bix u beetaʼal kaʼach le xookoʼ?

Le kéen u kʼam kaʼach juntúul máak le librooʼ ku tsʼaʼabaltiʼ xan junpʼéel chan tarjeta tuʼux ku yaʼalaʼaltiʼ baʼax páginail unaj u xokik. Tuláakʼ semana túuneʼ ku tsʼaʼabaltiʼ uláakʼ tarjeta tuʼux yaan jejeláas kʼáatchiʼob yaan yil yéetel le baʼax tsʼoʼok u xokikoʼ yéetel tiʼ ku yaʼalaʼaltiʼ baʼax unaj u xokik utiaʼal uláakʼ semanaoʼ.

Ichil 12 semanaʼobeʼ ku túuxtaʼal kaʼach tiʼ le j-xoknáaloʼob junpʼéel chan tarjeta tumen le múuchʼuliloʼ (úuchjeakileʼ ku yaʼalaʼaltiʼ clase). U suukileʼ le tarjetaʼobaʼ ku túuxtaʼal kaʼach tumen le sukuʼunoʼob yaan u jaʼabiloʼoboʼ wa tumen le máaxoʼob maʼ tu páajtal u jóokʼloʼob kʼaʼaytaj joonaj joonajiloʼ. Kiik Anna Gardner kajaʼan Millvale (Pensilvania, Estados Unidos), ku yaʼalik: «Le librooʼ jach tu yáantaj in kiik Thayle, tumen kex maʼ tu páajtal u xíimbaleʼ ku béeytal u túuxtik tarjetaʼob cada semana tiʼ le máakoʼoboʼ». Le kéen tsʼoʼokok le 12 semanaʼoboʼ le sukuʼunoʼoboʼ ku bin u xíimbaltoʼob le j-xoknáal utiaʼal u yáantkoʼob maas kaanbal tiʼ le Bibliaoʼ.

Tu tsʼoʼokbal u añoil 1921, le sukuʼun Joseph Rutherfordoʼ tu túuxtaj cartaʼob tiʼ le múuchʼuliloʼoboʼ ka tu yaʼalajtiʼob: «Desde káajak le joochoʼ mix juntéen kaʼach kʼaʼaytaʼak u Reino Dios jeʼex úuchik teʼ añoaʼ». Chéen baʼaleʼ tu yaʼalaj xan tiʼob: «Todavía yaʼab meyaj yaan beetbil. Líiʼseʼex u yóol u maasil utiaʼal ka táakpajkoʼob teʼ jatsʼuts meyajaʼ». Le j-Xoknáaloʼob tiʼ le Bibliaoʼ jach bey tu beetiloʼoboʼ. Tumen tu añoil 1922, tu sen kʼaʼaytoʼob u Reino Dios tiʼ le máakoʼoboʼ.