CADA añoeʼ yaʼab máakoʼob expulsartaʼanoʼobeʼ ku suutoʼob ichil u kaajal Jéeoba. ¡Chéen tukult bukaʼaj kiʼimak óolal ku yantal teʼ kaʼan kéen suunak juntúul tiʼ u tamanoʼob Jéeobaoʼ! (Luc. 15:7, 10). Wa teech tsʼoʼok a kaʼa kʼaʼamal ichil le múuchʼuliloʼ maʼ u tuʼubultecheʼ, Jéeoba, Jesús yéetel le ángeloʼoboʼ jach kiʼimak u yóoloʼob. Chéen baʼaleʼ maʼ xaaneʼ jeʼex u bin a kaʼa biskaba yéetel Jéeobaeʼ bey kun bin a aktáantik jujunpʼéel baʼaloʼob. ¿Bey baʼaxoʼob jeʼel a aktáantikeʼ, yéetel baʼax jeʼel u yáantkecheʼ? Koʼox ilik.

Yaan sukuʼunoʼobeʼ kex tsʼoʼok u kaʼa kʼaʼamloʼob ichil le múuchʼuliloʼ láayliʼ ku yuʼubikoʼob yaachajaʼan u yóoloʼob yoʼolal le baʼax tu beetoʼoboʼ. Wa bey a wuʼuyikabaoʼ maʼ xaaneʼ ka naʼatik bix tu yuʼubiluba xan le rey Davidoʼ, letiʼeʼ kex tsʼoʼok u perdonartaʼal kaʼach tumen Dioseʼ, tu yaʼalaj: «Le baʼaloʼob maʼ maʼalobtak in beetmoʼ ku pechʼkenoʼob» (Sal. 40:12; 65:3). Yaan tiʼ le máaxoʼob tsʼoʼok u suutoʼob ichil u kaajal Jéeobaoʼ ku máan tiempo láayliʼ yaachajaʼan u yóoloʼob yéetel suʼlakoʼobeʼ. Isabelle, * juntúul kiik maas tiʼ 20 años expulsartaʼaneʼ, tu yaʼalaj: «Istikyaj kaʼach in creertik tsʼoʼok u perdonarken Jéeoba». Bey túunoʼ wa teech ka chaʼik u lúubul a wóoleʼ, leloʼ jeʼel u beetik u xuʼulul a biskaba yéetel Jéeoba tu kaʼatéeneʼ (Pro. 24:10). Le oʼolaleʼ kanáantaba utiaʼal maʼ u yúuchultech leloʼ.

Uláakʼ sukuʼunoʼobeʼ jach ku chiʼichnaktaloʼob tumen ku tuklikoʼob maʼ kun páajtal u beetkoʼob tuláakal le baʼaxoʼob kʼaʼabéet utiaʼal u kaʼa biskubaʼob yéetel Jéeobaoʼ. Juntúul sukuʼun ku kʼaabaʼtik Antoineeʼ, le ka tsʼoʼok u kaʼa kʼaʼamal ichil u kaajal Jéeobaeʼ, tu yaʼalaj: «Tubaʼanten kaʼach tuláakal le baʼaxoʼob kin beetik utiaʼal in meyajtik Jéeobaoʼ». Yoʼolal bix u tuukul jujuntúul sukuʼunoʼobeʼ yaan horaeʼ maʼ tu beetkoʼob tuláakal le ku páajtal utiaʼal u kaʼa meyajtikoʼob Jéeobaoʼ.

Lelaʼ jeʼel u páajtal k-ketik yéetel le bix u yuʼubikuba juntúul máak jach kʼaschaj u yotoch yoʼolal junpʼéel ciclónoʼ. Wa le máak ku chʼíikil tuukul chéen tiʼ le bukaʼaj tiempo yéetel taakʼin ken u bis u yutskíintik u yotochoʼ, ¿máasaʼ jeʼel u lúubul u yóoleʼ? Bey xan u yúuchul yéetel juntúul máak ku suut ichil u kaajal Jéeobaoʼ. Wa chéen ku chʼíikil tuukul tiʼ le bukaʼaj  baʼaloʼob kʼaʼabéet u beetik utiaʼal u kaʼa biskuba yéetel Jéeobaoʼ yaan xan u lúubul u yóol. Wa teech bey a wuʼuyikabaoʼ kʼaʼajaktecheʼ maʼ ta juunal yanechiʼ.

Jéeobaeʼ ku yaʼalik tiʼ cada juntúul tiʼ toʼon: «Koʼoteneʼex utiaʼal k-utskíintik le baʼax uchaʼan ichiloʼonoʼ» (Isa. 1:18). Techeʼ tsʼoʼok a beetik le baʼax ku yaʼalik le tekstooʼ le oʼolaleʼ Jéeobaeʼ jach u yaabiltmech. Tsʼoʼoleʼ le baʼax tsʼoʼok a beetkoʼ jeʼel u meyaj tiʼ Jéeoba utiaʼal u yeʼesik chéen táan u tuus Satanáseʼ (Pro. 27:11).

Le Bibliaoʼ ku yaʼalikeʼ le kéen u natsʼuba wa máax yiknal Jéeobaeʼ letiʼeʼ láayliʼ xan ku yilik u natsʼkuba tiʼ letiʼeʼ (Sant. 4:8). U jaajileʼ jach maʼalob úuchik a suut ichil u kaajal Jéeoba, chéen baʼaleʼ yaan uláakʼ baʼax unaj a beetik. Kʼaʼabéet a maas yaabiltik Jéeoba yéetel a wilik bey a Taata yéetel a amigoeʼ. ¿Bix jeʼel u páajtal a beetkeʼ?

Ilawil baʼax metasil jeʼel u páajtal a tsʼáaik ichil a kuxtaleʼ. Le kéen júutuk junpʼéel najeʼ u suukileʼ ku pʼáatal u cimientoil, leloʼ ku yáantaj utiaʼal u jel líiʼsaʼal le najoʼ. Maʼ xaaneʼ beora tsʼoʼok a suut ichil u kaajal Jéeobaaʼ, u cimientoil a fe wa le baʼaxoʼob a wojel yoʼolal Jéeobaoʼ, láayliʼ maʼalob yanileʼ. Chéen baʼaleʼ beoraaʼ kʼaʼabéet a wilik u kaʼa suuktal a jóokʼol kʼaʼaytaj, a bin muchʼtáambal yéetel a máansik tiempo yéetel le sukuʼunoʼoboʼ. Koʼox ilik jujunpʼéel baʼaloʼob jeʼel u yáantkech a beet le baʼaxoʼob tsʼoʼok k-aʼalikaʼ.

Orarnen mantatsʼ tiʼ Jéeoba. Jéeobaeʼ u yojel u yaan horaeʼ suʼlakech orar, tumen maʼ xaaneʼ láayliʼ yaachajaʼan a wóol yoʼolal le baʼax ta beetoʼ (Rom. 8:26). Kex beyoʼ maʼ u xuʼulul a orar yéetel a waʼaliktiʼ jach taak a biskaba tu kaʼatéen tu yéetel (Rom. 12:12). Andrej, juntúul sukuʼun suunaj ichil u kaajal Jéeobaeʼ, ku yaʼalik: «Teneʼ jach suʼlaken kaʼachi yéetel láayliʼ yaachajaʼan in wóol yoʼolal le baʼax tin beetoʼ. Chéen baʼaleʼ cada ken tsʼoʼokok in orareʼ jach maʼalob in wuʼuyikinba». Wa maʼ a wojel baʼax jeʼel a waʼalik kéen orarnakecheʼ jeʼel u páajtal a tuukul tiʼ baʼax ku yaʼalik le Salmo capítulo 51 yéetel 65, teʼeloʼ ku chíikpajal le baʼax tu yaʼalaj David le ka arrepentirnaj yoʼolal le baʼax tu beetoʼ.

Suukak a xakʼalxoktik le Bibliaoʼ. Leloʼ jeʼel u yáantkech utiaʼal a muʼukʼaʼankúuntik a fejeʼ yéetel a maas yaabiltik Jéeobaeʼ (Sal. 19:7-11). Juntúul sukuʼun ku kʼaabaʼtik Felipeeʼ, ku yaʼalik: «Teneʼ maʼ suuk in xakʼalxoktik kaʼach le Bibliaoʼ mix uláakʼ publicaciónoʼob, leloʼ le beet in lúubul tiʼ baʼax kʼaas tu táan Jéeoba. Como maʼ in kʼáat ka úuchukten tu kaʼatéeneʼ tin chʼaʼtuklaj u suuktal in xakʼalxook». Wa teech maʼ a wojel baʼax jeʼel u páajtal a xakʼalxoktikeʼ kʼáat áantaj tiʼ juntúul a amigo u tsʼaamaj u yóol u meyajt Jéeoba.

Kaʼa bisaba yéetel le sukuʼunoʼoboʼ. Le máaxoʼob ku kaʼa suutoʼob ichil u kaajal Jéeobaoʼ yaan horaeʼ jach ku chiʼichnaktaloʼob yoʼolal bix kun ilbiloʼob tumen u maasil sukuʼunoʼoboʼ. Juntúul kiik ku kʼaabaʼtik Larissaeʼ, ku yaʼalik: «Jach suʼlaken kaʼachi, tin wuʼuyaj bey tin traicionartaj le múuchʼuliloʼ. Máan tiempo bey in wuʼuyikinbaoʼ». Wa bey a wuʼuyikaba xan techoʼ maʼ u tuʼubultecheʼ le ancianoʼob yéetel uláakʼ sukuʼunoʼoboʼ jach jeʼel u yáantkechoʼob a kaʼa biskaba yéetel Jéeobaeʼ (ilawil le cuadro « Le baʼax jeʼel u páajtal u beetik le ancianoʼoboʼ»). Letiʼobeʼ kiʼimak u yóoloʼob úuchik a suut yéetel u kʼáatoʼob xan ka kiʼimakchajak a wóol (Pro. 17:17).

¿Baʼax jeʼel u páajtal a beetik utiaʼal a kaʼa biskaba yéetel le múuchʼuliloʼ? Ilawil a bin tiʼ tuláakal le muchʼtáambaloʼoboʼ yéetel a jóokʼol kʼaʼaytaj yéetel le sukuʼunoʼoboʼ. ¿Bix ken u yáantilech lelaʼ? Juntúul sukuʼun ku kʼaabaʼtik Félixeʼ, ku yaʼalik: «Le sukuʼunoʼob teʼ múuchʼuliloʼ táan kaʼach u páaʼtkoʼob in suut, tin wuʼuyaj jach u yaabiltmenoʼob. Tu yáantenoʼob utiaʼal in wuʼuyik parteen tiʼ le múuchʼuliloʼ. Tu yáantenoʼob xan in wileʼ tsʼoʼok u perdonarken Jéeoba yéetel jeʼel u páajtal in maas meyajtikeʼ» (ilawil le cuadro « Le baʼax jeʼel u páajtal a beetkoʼ»).

Mientras táan a wilik a kaʼa biskaba yéetel Jéeobaeʼ, Satanáseʼ yaan u kaxtik bix jeʼel u beetik u lúubul a wóoleʼ wa u nikik le baʼaxoʼob tsʼoʼok a beetkoʼ (Luc. 4:13). Le oʼolaleʼ ilawil a prepararkaba desde beoraaʼ.

Jéeobaeʼ ku yaʼalik yoʼolal u tamanoʼob: «Le saatloʼoboʼ yaan in bin in kaxtoʼob, le náachchajaʼanoʼoboʼ yaan in sutkoʼob, le uchaʼan loob tiʼoboʼ yaan in vendarkoʼob yéetel le minaʼan u muukʼoʼoboʼ yaan in wáantkoʼob» (Eze. 34:16). Maʼ u tuʼubultecheʼ Jéeobaeʼ tsʼoʼok u yáantik yaʼab sukuʼunoʼob utiaʼal u kaʼa biskubaʼob tu yéetel, le oʼolaleʼ jeʼel xan u yáantkech utiaʼal a biskaba maʼalob tu yéeteleʼ.