1, 2. ¿Baʼax tu yaʼalaj Ageo kun úuchul teʼ kʼiinoʼobaʼ?

TU AÑOIL 2015, tu tíituba le luʼum tu luʼumil Nepaloʼ. Juntúul tiʼ le máaxoʼob il le baʼax úuchoʼ tu yaʼalaj: «Le tiendaʼob yéetel le nukuch najoʼoboʼ chéen jun chan súutuk ka níikoʼob». Uláakʼ juntúuleʼ tu yaʼalaj: «Le máakoʼoboʼ jach sajakchajoʼob [...]. Kex chéen wa jaypʼéel minuto xáanchajeʼ teneʼ tin wilaj bey jach xáanchajeʼ». Wa ka k-il le baʼax úuch teʼ kʼiin jeʼeloʼ maʼ xaaneʼ mix bikʼin xan jeʼel k-tuʼubsikeʼ.

² U jaajileʼ Jéeobaeʼ táan u tíitik tuláakal le kaajoʼob yanoʼob way yóokʼol kaabeʼ, yéetel tsʼoʼok u máan años joʼopʼok u beetik jach jeʼex tu profetizartil Ageoaʼ: «Jéeoba, le máax gobernartik le ángeloʼoboʼ, ku yaʼalik: ‹Ichil junpʼíit kʼiineʼ yaan in kaʼa tíitik le kaʼanoʼoboʼ, le yóokʼol kaaboʼ, le kʼáaʼnáaboʼ bey xan le tikin luʼumoʼ›» (Ageo 2:6).

3. Le u tíitaʼal le kaajoʼob tumen Jéeobaoʼ, ¿baʼaxten jelaʼan tiʼ bix suukil u tíitkuba le luʼumoʼ?

³ U suukileʼ kéen u tíituba le luʼumoʼ jach ku beetik loob, chéen baʼaleʼ le u tíitaʼal le kaajoʼob tumen Jéeobaoʼ jach ku taasik utsil. Jéeobaeʼ desde úuchjeakil u yaʼalmaj: «Yaan in tíitik tuláakal le kaajoʼoboʼ, le koʼokoj baʼaloʼob yaantiʼob túunoʼ yaan u yookloʼob teʼ najoʼ, yaan in chupik le naj yéetel in kiʼichkelmiloʼ» (Ageo 2:7). Yéetel le profecíaaʼ, ¿baʼax táan kaʼach u yaʼalaʼal tiʼ le máakoʼob kuxlajoʼob tu kʼiiniloʼob Ageooʼ? ¿Bix u béeytal le profecía teʼ kʼiinoʼobaʼ? Teʼ xookaʼ yaan k-ilik u núukil le kʼáatchiʼobaʼ yéetel yaan k-ilik bix jeʼel k-táakpajal utiaʼal u tíitaʼal le kaajoʼob teʼ kʼiinoʼobaʼ.

4. ¿Baʼax tu kʼubéentaj Jéeoba tiʼ profeta Ageo?

⁴ Maʼ xaaneʼ profeta Ageoeʼ tiaʼan ichil le máaxoʼob suunajoʼob Jerusalén tu añoil 537 táanil tiʼ u taal Jesúsoʼ. Le  maʼ úuch kʼuchoʼob teʼeloʼ tu beetoʼob u cimientoil le templooʼ (Esd. 3:8, 10). Chéen baʼaleʼ tu yoʼolal baʼax ku beetaʼaltiʼob tumen le máaxoʼob pʼekmiloʼoboʼ lúub u yóoloʼobeʼ ka tu pʼatoʼob le meyajoʼ (Esd. 4:4; Ageo 1:1, 2). Le oʼolal Jéeobaeʼ tu añoil 520, tu kʼubéentaj tiʼ Ageo ka u líiʼs u yóol le judíoʼob utiaʼal ka u tsʼoʼoksoʼob le templooʼ (Esd. 6:14, 15). *

5. ¿Baʼaxten tu líiʼsaj u yóol le judíoʼob le baʼax tu yaʼalaj Ageooʼ?

⁵ Le baʼax ken u yaʼal Ageooʼ unaj u muʼukʼaʼankúuntik kaʼach u fe le judíoʼoboʼ. Letiʼeʼ tu yaʼalaj tiʼ le máaxoʼob lubaʼan u yóoloʼoboʼ: «Jéeobaeʼ ku yaʼalik: ‹Teʼex, u kajnáalileʼex le luʼumaʼ, maʼ a chʼaʼikeʼex saajkil, tsʼáabaʼex meyaj›. Jéeoba, le máax gobernartik le ángeloʼoboʼ, ku yaʼalik: ‹Teneʼ tiaʼanen ta wéeteleʼexeʼ›» (Ageo 2:4). Le tʼaanoʼob «Jéeoba, le máax gobernartik le ángeloʼoboʼ» jach tu líiʼsaj wal u yóol le judíoʼoboʼ. Letiʼobeʼ chéen baʼax unaj u beetkoʼob kaʼacheʼ u confiaroʼob tiʼ Jéeoba tumen yáanal u páajtalileʼ yaan u millonesil ángeloʼob.

6. ¿Baʼax utsiloʼob ken u taas kaʼach le baʼax ken u beet Jéeobaoʼ?

⁶ Jéeobaeʼ tu kʼubéentaj tiʼ Ageo ka u yaʼal tiʼ le judíoʼoboʼ letiʼeʼ yaan u tíitik tuláakal le kaajoʼoboʼ. Yéetel le tʼaanoʼobaʼ táan kaʼach u yaʼalik tiʼ tuláakal le máaxoʼob xuʼul u beetkoʼob le templooʼ es ke letiʼeʼ yaan u tíitik u luʼumil Persia bey xan le kaajoʼob yanoʼob yáanal u páajtaliloʼ. ¿Baʼax utsil kaʼach ken u taas leloʼ? Yáaxeʼ le judíoʼoboʼ yaan u béeytal u tsʼoʼoksikoʼob le templooʼ. Ku tsʼoʼokoleʼ le máaxoʼob maʼ judíoʼoboʼ yaan u káajal kaʼach u adorarkoʼob Jéeoba teʼ templo ken u beetoʼoboʼ. Le baʼax tu yaʼalaj Ageooʼ jach tu líiʼsaj wal u yóol u kaajal Dios úuchjeakileʼ (Zac. 8:9).

7. ¿Baʼax táan k-áantik u beet Jéeoba teʼ kʼiinoʼobaʼ? Tsole.

⁷ Teʼ kʼiinoʼobaʼ, ¿bix u béeytal le profecía tu yaʼalaj Ageooʼ? Bejlaʼeʼ Jéeobaeʼ táan xan u tíitik tuláakal le kaajoʼoboʼ, yéetel táan k-áantik u beete. Tu añoil 1914, letiʼeʼ tu tsʼáaj Jesucristo utiaʼal ka u beet u Reyil u Reino yaan teʼ kaʼanoʼ (Sal. 2:6). Le máaxoʼob ku gobernaroʼob way Luʼumeʼ maʼ maʼalob u yilkoʼob leloʼ tumen ku yeʼesikeʼ ‹tsʼoʼok le kʼiinoʼob tsʼaʼan tiʼ le kaajoʼoboʼ›. Lelaʼ u kʼáat u yaʼaleʼ bejlaʼeʼ yaan máax ku gobernar tu kʼaabaʼ Jéeoba (Luc. 21:24). Le oʼolal maases desde tu añoil 1919, le máaxoʼob meyajtik Jéeobaoʼ táan u yaʼalikoʼobeʼ chéen u Reino Dios jeʼel u yutskíintik tuláakal baʼal way yóokʼol kaabeʼ. Jeʼel u páajtal k-aʼalikeʼ le u kʼaʼaytaʼal «le baʼaloʼob maʼalobtak ken u beet le Reinooʼ» táan u tíitik tuláakal yóokʼol kaab (Mat. 24:14).

8. Jeʼex u yeʼesik Salmo 2:1-3, ¿bix u yilik le máakoʼob le baʼax k-kʼaʼaytikoʼ?

⁸ ¿Bix u yilik le máakoʼob le baʼax táan k-kʼaʼaytikoʼ? U maas yaʼabil tiʼ letiʼobeʼ maʼ uts tu tʼaan u yuʼubikoʼobiʼ (xok Salmo 2:1-3). Teʼ kʼiinoʼobaʼ le kaajoʼoboʼ pʼujaʼanoʼob tumen maʼ tu yóotik u kʼamoʼob Jesucristo, le máax tsʼoʼok u tsʼaʼabal gobernaroʼ. Maʼ uts tu tʼaan u yuʼubikoʼob k-kʼaʼaytik chéen u Reino Dios kun utskíintik tuláakal baʼaliʼ. Le oʼolal yaan tiʼ letiʼobeʼ tsʼoʼok u prohibirkoʼob le meyaj k-beetkoʼ. Yaʼab gobernanteʼobeʼ kex ku yaʼalikoʼob ku meyajtikoʼob Dioseʼ maʼ  tu yóotik u tsʼáaubaʼob yáanal u páajtalil tumen jeʼel u perderkoʼob le poder yaantiʼoboʼ. Jeʼex tu kʼiiniloʼob Jesúseʼ ku beetkoʼob loob tiʼ le máaxoʼob meyajtik Jéeobaoʼ. Beyoʼ ku yeʼeskoʼob tiaʼanoʼob tu contra le Rey yéeyaʼanoʼ (Hech. 4:25-28).

9. ¿Baʼax ku yaʼalik Jéeoba tiʼ le gobernanteʼob maʼ tu kʼamkoʼob le Rey u yéeymoʼ?

⁹ ¿Baʼax ku yaʼalik Jéeoba tiʼ le gobernanteʼob maʼ tu kʼamkoʼob le Rey u yéeymoʼ? Salmo 2:10 tak 12, ku yaʼalik: «Le oʼolal beoraaʼ, reyeʼex, eʼeseʼex yaan a naʼateʼex, u juezileʼex yóokʼol kaab kʼameʼex baʼax ku yaʼalaʼalteʼex. Meyajteʼex Jéeoba, respetarteʼex, adorarteʼex, kiʼimakchajak a wóoleʼex. Kʼameʼex u hijo Dios, wa maʼeʼ Dioseʼ yaan u pʼuʼujul yéetel yaan u xuʼulsikteʼex, letiʼeʼ ku kʼuchul u kʼiinil u pʼuʼujul. Kiʼimak u yóol tuláakal le máaxoʼob ku natsʼkubaʼob tu yiknal utiaʼal u kanáantaʼaloʼoboʼ». Jéeobaeʼ jach uts, le oʼolal táan u tsʼáaik tiempo tiʼob utiaʼal u kʼexik bix u tuukuloʼob. Chéen baʼaleʼ chéen junpʼíit kʼiin pʼáataltiʼob tumen kuxaʼanoʼon «tu tsʼook kʼiinoʼob» (2 Tim. 3:1; Isa. 61:2). Bejlaʼeʼ le máakoʼoboʼ jach kʼaʼabéet u yojéeltikoʼob u jaajil utiaʼal u chʼaʼtuklikoʼob wa yaan u meyajtikoʼob Jéeoba.

10. Jeʼex u yaʼalik Ageo 2:7-9, ¿baʼax utsil ku taasik u tíitkuba le luʼumoʼ?

¹⁰ Le u tíitkuba le luʼum tu yaʼalaj Ageooʼ jach ku taasik utsil tumen tu yoʼolal leloʼ «le koʼokoj baʼaloʼob» wa le máaxoʼob uts u puksiʼikʼaloʼoboʼ yaan u káajal u adorarkoʼob Jéeoba (xok Ageo 2:7-9). * Isaías yéetel Miqueaseʼ u yaʼalmiliʼob xan bey kun úuchul teʼ tu tsʼook kʼiinoʼobaʼ (Isa. 2:2-4; Miq. 4:1, 2).

11. ¿Baʼax tu beetaj sukuʼun Ken ka tu yuʼubaj u yúuchul tʼaan yoʼolal u Reino Dios?

¹¹ Juntúul sukuʼun ku kʼaabaʼtik Ken ku yáantaj tuʼux ku nuʼuktaʼal le meyaj ku beetik u testigoʼob Jéeobaoʼ ku yaʼalik bix tu yuʼubiluba le yáax ka tu yuʼubaj u  yúuchul tʼaan yoʼolal u Reino Diosoʼ. Kex tsʼoʼok u máan 40 añoseʼ láayliʼ jach kʼajaʼantiʼeʼ. Letiʼeʼ ku yaʼalik: «Jach kiʼimakchaj in wóol ka tin wojéeltaj u jaajil tumen tin kaneʼ kuxaʼanoʼon tu tsʼook kʼiinoʼob. Tin tsʼáaj cuentaeʼ utiaʼal u kʼamken Dios yéetel utiaʼal u yantalten le kuxtal minaʼan u xuuloʼ kʼaʼabéet in tsʼáaikinba tu tséel Jéeoba. Le oʼolal orarnajen tiʼeʼ ka tin pʼataj tu séebaʼanil le yóokʼol kaaboʼ. Tin tsʼáajinba tu tséel u Reino tumen leloʼ mix bikʼin kun péeksbil».

12. ¿Baʼaxten k-aʼalik tsʼoʼok u chuʼupul yéetel koʼokoj baʼaloʼob u yotoch Jéeoba?

¹² Jéeobaeʼ jach tsʼoʼok u bendecirtik u kaajal. Teʼ tu tsʼook kʼiinoʼobaʼ tsʼoʼok k-ilik bix u yaʼabtal le máaxoʼob adorarkoʼ. Tu añoil 1914, maʼ jach yaʼaboʼon kaʼachiʼ, chéen baʼaleʼ beoraaʼ maas tiʼ ocho millones u túulaloʼon. Ku tsʼoʼokoleʼ cada añoeʼ u millonesil máakoʼob ku muchʼkubaʼob t-éetel teʼ Conmemoraciónoʼ. Jeʼel u páajtal k-aʼalikeʼ u yotoch Jéeobaeʼ tsʼoʼok u chuʼupul yéetel «le koʼokoj baʼaloʼob» ku taal tiʼ le kaajoʼoboʼ. Le máakoʼob tsʼoʼok u kʼexik u kuxtaloʼoboʼ beoraaʼ táan xan u alabarkoʼob Jéeoba (Efe. 4:22-24).

13. ¿Baʼax uláakʼ profecíailoʼob táan u béeytaloʼob teʼ kʼiinoʼobaʼ? (Ilawil u yáax páginail le revistaaʼ).

¹³ Le baʼaxoʼob ku yúuchloʼob teʼ kʼiinoʼobaʼ táan xan u béeykuntkoʼob profecíaʼob ku chíikpajal tiʼ Isaías capítulo 60. Le versículo 22, ku yaʼalik: «Le junpʼíitoʼ yaan u chukik mil, le chichanoʼ yaan u kʼuchul u beetuba junpʼéel nuxiʼ kaaj. Teen Jéeoba, teen kin beetik u séeb úuchul, jach tu kʼiinil». Le baʼax ku yaʼalik le tekstoaʼ jach táaj maʼalob tumen le yaʼabkach máakoʼob táan u yookloʼob ichil u kaajal Diosoʼ jejeláas baʼaxoʼob u yojel u beetoʼob yéetel jach taak u yáantajoʼob utiaʼal u tsikbaltaʼal «le baʼaloʼob maʼalobtak ken u beet le Reinooʼ». U kaajal Jéeobaeʼ jach táan u aprovechartik le jejeláas meyajoʼob u yojel u beet le máakoʼoboʼ (Isa. 60:5, 16). Yéetel u yáantajoʼobeʼ bejlaʼeʼ táan u yúuchul kʼaʼaytaj tiʼ 240 luʼumoʼob yéetel kaajoʼob, tsʼoʼoleʼ táan xan u jóoʼsaʼal publicaciónoʼob ich maas tiʼ 1,000 idiomaʼob.

14. ¿Baʼax kʼaʼabéet u chʼaʼtuklik le máakoʼob teʼ kʼiinoʼobaʼ?

¹⁴ Teʼ tu tsʼook kʼiinoʼobaʼ táan u tíitaʼal tuláakal le kaajoʼoboʼ. Le oʼolal le máakoʼoboʼ kʼaʼabéet u chʼaʼtuklikoʼob wa yaan u apoyarkoʼob u Reino Dios wa le gobiernoʼob yaan way yóokʼol kaabeʼ. Toʼon k-meyajtik Jéeobaeʼ k-ilik k-beetik baʼax ku yaʼalik le autoridadoʼoboʼ, chéen baʼaleʼ junpuliʼ maʼatech k-táakpajal tiʼ política (Rom. 13:1-7). K-ojleʼ chéen u Reino Dios jeʼel u yutskíintik tuláakal le baʼaloʼob kʼaastak ku yúuchul way yóokʼol kaabeʼ (Juan 18:36, 37).

15. ¿Baʼax nojoch pruebail ken u aktáant le máaxoʼob meyajtik Jéeoba teʼ tu tsʼook kʼiinoʼobaʼ?

¹⁵ U libroil Apocalipsiseʼ ku yaʼalikeʼ tu tsʼook kʼiinoʼobeʼ yaan u probartaʼal u kaajal Dios. Leloʼ u kʼáat u yaʼaleʼ yaan u seguer u chʼaʼpachtaʼaloʼob yéetel yaan u beetaʼal u muʼyajoʼob. Le gobiernoʼoboʼ yaan tak u kʼáatkoʼob ka adorartaʼakoʼob yéetel yaan u beetkoʼob u sen muʼyaj le máaxoʼob maʼ ken u yóot u beetoʼoboʼ (Apo. 13:12, 15). Le gobiernoʼoboʼ yaan u obligarkoʼob «tuláakal máak —mejentakoʼob yéetel nuuktakoʼob, ayikʼaloʼob yéetel óotsiloʼob, esclavoʼob bey xan maʼ esclavoʼobiʼ— utiaʼal ka marcartaʼakoʼob tu x-noʼoj kʼaboʼob wa tu táanpoolaloʼob» (Apo. 13:16). Úuchjeakileʼ le esclavoʼoboʼ ku marcartaʼaloʼob utiaʼal u yilaʼal máax u tsʼuuliloʼob. Teʼ kʼiinoʼob xanaʼ le gobiernoʼoboʼ bey yaan u yóotik u marcartoʼob tuláakal máak tu kʼab wa tu táanpoolaleʼ. Leloʼ u kʼáat u yaʼaleʼ yaan u páaʼtkoʼobeʼ tuláakal máak ka u yeʼes táan u apoyartik le gobiernoʼob yanoʼob way yóokʼol kaabeʼ.

16. ¿Baʼaxten jach kʼaʼabéet k-eʼesik k-kʼubmaj k-óol tiʼ Jéeoba?

¹⁶ ¿Kux túun toʼon? ¿Baʼax ken k-beete? ¿Yaan wa k-chaʼik k-marcartaʼal? Kʼaʼajaktoʼoneʼ le máaxoʼob maʼ ken u chaʼa u marcartaʼaloʼoboʼ yaan u beetaʼal u sen muʼyajoʼob. U libroil Apocalipsiseʼ ku yaʼalikeʼ «chéen le máax yaan u marca» kun béeytal u manik wa baʼaxoʼ bey xan u konik (Apo. 13:17). Chéen baʼaleʼ toʼoneʼ k-ojel xan baʼax kun úuchul tiʼ le máaxoʼob yaantiʼob le marcaoʼ (Apo. 14:9, 10). Le oʼolal toʼoneʼ maʼ ken k-chaʼa k-marcartaʼal, baʼaxeʼ cada juntúuleʼ bey yaan u tsʼíibtik tu kʼabeʼ: «Jéeoba in yuumil» (Isa. 44:5). Bejlaʼeʼ u kʼiinil k-eʼesik k-kʼubmaj k-óol tiʼ Jéeoba. Wa k-beetik beyoʼ letiʼeʼ yéetel kiʼimak óolal ken u yaʼal letiʼ k-Yuumil.

17. ¿Baʼax unaj k-kʼaʼajsik yoʼolal le paciencia ku yeʼesik Jéeobaoʼ?

¹⁷ Jéeobaeʼ jach tsʼoʼok u yeʼesik paciencia teʼ tu tsʼook kʼiinoʼobaʼ tumen maʼ u kʼáat ka xuʼulsaʼak tiʼ mix máakiʼ (2 Ped. 3:9). Letiʼeʼ u kʼáat ka arrepentirnak tuláakal máak yéetel ka meyajtaʼak chéen letiʼ. Chéen baʼaleʼ yaan xan tu pʼiis u yeʼesik paciencia. Le máaxoʼob maʼ ken u chʼaʼtukloʼob u tsʼáaikubaʼob tu tséel Jéeobaoʼ yaan u yúuchultiʼob le baʼax úuch tiʼ Faraón tu kʼiiniloʼob Moisésoʼ. Jéeobaeʼ tu yaʼalaj tiʼ Faraón: «Wa ka in wóot kaʼacheʼ bejlaʼa tsʼoʼok in castigarkech paʼteʼ yéetel a kaajal yéetel kʼaakʼas kʼojaʼaniloʼobeʼ yéetel bejlaʼa úuch in xuʼulsech teʼ luʼumaʼ. Chéen baʼaleʼ lelaʼ letiʼe baʼax oʼolal maʼ in xuʼulsech tak beoraaʼ: utiaʼal ka in weʼestech in poder yéetel utiaʼal ka kʼaj óoltaʼak in kʼaabaʼ tiʼ tuláakal yóokʼol kaab» (Éxo. 9:15, 16). Le kéen tsʼoʼokkeʼ tuláakal le kaajoʼoboʼ yaan u  yojéeltikoʼobeʼ chéen Jéeoba u jaajil Dios (Eze. 38:23). ¿Bix kun úuchul leloʼ?

18. 1) Jeʼex u yaʼalik Ageo 2:6, 20-22, ¿baʼax ken u kaʼa beet Jéeoba? 2) ¿Baʼax kun úuchul tiʼ le máakoʼob le kéen béeychajak baʼax ku yaʼalik Ageooʼ?

¹⁸ Le ka máan yaʼab años kíimik Ageoeʼ, le apóstol Pablooʼ tu yaʼaleʼ le baʼax ku yaʼalik Ageo 2:6, 20 tak 22, yaan u béeytal maas táanil (xoke). Pabloeʼ tu yaʼalaj: «Beoraaʼ letiʼeʼ tsʼoʼok u yaʼalik: ‹Yaan in beetik u tíitkuba tu kaʼatéen, chéen baʼaleʼ maʼ chéen le luʼumoʼ tak le kaʼanoʼ›. Bey túunoʼ le kéen u yaʼal ‹tu kaʼatéenoʼ› u kʼáat u yaʼaleʼ Dioseʼ yaan u luʼsik le baʼaloʼob tu tíitubaʼoboʼ, baʼaloʼob maʼ letiʼ beetmiliʼ, utiaʼal beyoʼ ka pʼáatak le baʼaloʼob mix juntéen tíitaʼakoʼoboʼ» (Heb. 12:26, 27). Le kéen béeychajak le baʼax ku yaʼalik le tekstoaʼ, yaan u xuʼulsaʼal tiʼ tuláakal le máaxoʼob maʼatech u yóotik u reconocertoʼob chéen Jéeoba unaj u gobernaroʼ.

19. Le kéen tsʼok tíitaʼak le yóokʼol kaabaʼ, ¿baʼax maʼ kun péeksbil, yéetel baʼaxten k-aʼalik leloʼ?

¹⁹ Chéen baʼaleʼ apóstol Pabloeʼ tu yaʼaleʼ yaan junpʼéel baʼal maʼ kun péeksbil, ¿baʼaxiʼ? Letiʼeʼ tu yaʼalaj: «Toʼoneʼ yaan k-kʼamik junpʼéel Reino maʼ tu páajtal u péeksaʼal, le oʼolaleʼ unaj k-ilik maʼ u xuʼulul k-kʼamik u nojoch utsil Dios, utiaʼal beyoʼ ka páajchajak k-meyajtik jeʼex uts tu tʼaaneʼ, yéetel saajkilil bey xan yéetel respeto» (Heb. 12:28). Jeʼex k-ilkoʼ le kéen tsʼok tíitaʼak le yóokʼol kaabaʼ chéen u Reino Dios kun pʼáatal (Sal. 110:5, 6; Dan. 2:44).

20. ¿Baʼax unaj u chʼaʼtuklik le máakoʼoboʼ, yéetel bix jeʼel k-áantkoʼobeʼ?

²⁰ Chéen junpʼíit tiempo pʼaatal utiaʼal u chʼaʼtuklik le máakoʼob baʼax ken u beetoʼoboʼ. Wa letiʼob ku chʼaʼtuklik u seguer u kuxtaloʼob jeʼex suukil tiʼoboʼ yaan u xuʼulsaʼaltiʼob. Chéen baʼaleʼ wa ku chʼaʼtuklik u meyajtikoʼob Jéeobaeʼ yaan u yantaltiʼob kuxtal minaʼan u xuul (Heb. 12:25). ¿Bix túun jeʼel k-áantkoʼobeʼ? Yéetel le kʼaʼaytajoʼ jeʼel u páajtal k-áantkoʼob u chʼaʼtukloʼob baʼax ken u beetoʼobeʼ. Bey túunoʼ koʼoneʼex seguer k-áantik le máakoʼob ku keʼeteloʼob yéetel koʼokoj baʼaloʼob utiaʼal ka u tsʼáaubaʼob tu tséel u Reino Diosoʼ. Yéetel maʼ u tuʼubultoʼon le baʼax tu yaʼalaj Jesúsaʼ: «Le baʼaloʼob maʼalobtak ken u beet le Reinooʼ yaan u tsikbaltaʼal tiʼ tuláakal yóokʼol kaab utiaʼal ka ojéeltaʼak tumen u kajnáaliloʼob tuláakal kaajoʼob, le kéen tsʼoʼokkeʼ ku taal u xuul» (Mat. 24:14).