1. ¿Baʼaxten yaʼab máakeʼ ku yuʼubik maʼ tu páajtal u confiar tiʼ mix máak?

 TEʼ KʼASAʼAN yóokʼol kaabaʼ yaʼab máakeʼ ku yuʼubik maʼ tu páajtal u confiar tiʼ mix máak. Tumen mantatsʼ táan u pʼaʼatloʼob kʼaasil tumen le máaxoʼob yaan u negocioʼoboʼ, le políticoʼoboʼ bey xan tumen u nuuktakil le religiónoʼoboʼ. Tsʼoʼoleʼ bey xan u beetaʼaltiʼob tumen u amigoʼob, u vecinoʼob bey xan tumen u láakʼtsiloʼob. Toʼoneʼ k-ojel deporsi yaan u yúuchul leloʼ, tumen le Bibliaoʼ u yaʼalmeʼ «tu tsʼook kʼiinoʼobeʼ» le máakoʼoboʼ yaan u xúumpʼattik u amigoʼob, yaan u yaʼalikoʼob baʼaloʼob maʼ jaajtak tu contra u maasiliʼ yéetel yaan u suutoʼob traicioneroil. Letiʼobeʼ ku seguerkoʼob u ejemplo u diosil le yóokʼol kaabaʼ, juntúul máax junpuliʼ maʼ tu páajtal u confiar máak tiʼ (2 Tim. 3:1-4; 2 Cor. 4:4).

2. 1) ¿Tiʼ máax jeʼel u páajtal k-confiareʼ? 2) ¿Baʼax kʼáatchiʼil jeʼel u beetik máakeʼ?

² Chéen baʼaleʼ toʼoneʼ k-ojel jach jeʼel u páajtal k-confiar tiʼ Jéeobaeʼ (Jer. 17:7, 8). Letiʼeʼ u yaabiltmoʼon yéetel mix bikʼin ken u pʼat le máaxoʼob ku biskubaʼob tu yéeteloʼ (Sal. 9:10). Jeʼel u páajtal k-confiar xan tiʼ Jesucristoeʼ tumen letiʼeʼ hasta tu kʼubaj u kuxtal t-oʼolal (1 Ped. 3:18). Tsʼoʼok k-ilik xaneʼ jeʼel u páajtal k-confiar tiʼ baʼax ku yaʼalik le Bibliaoʼ (2 Tim. 3:16, 17). Seguroʼon jeʼel u páajtal k-confiar tiʼ Jéeoba, tiʼ Jesús yéetel tiʼ le Bibliaoʼ. Chéen baʼaleʼ, ¿jeʼel wa u páajtal k-confiar tiʼ le sukuʼunoʼob yéetel tiʼ le kiikoʼoboʼ? U jaajileʼ jeʼeleʼ. Koʼoneʼex ilik baʼaxten k-aʼalik beyoʼ.

3. ¿Baʼax jatsʼuts privilegioil tsʼoʼok u tsʼáaiktoʼon Jéeoba? (Marcos 10:29, 30).

³ Jéeobaeʼ tsʼoʼok u tsʼáaiktoʼon u jatsʼuts privilegioil k-antal ichil le máaxoʼob meyajtik tiʼ tuláakal yóokʼol kaaboʼ. Letiʼobeʼ beyoʼob junpʼéel nojoch familiaeʼ, le oʼolal yaʼab k-sukuʼunoʼob yéetel k-kiikoʼob yaan (xok Marcos 10:29, 30). Letiʼobeʼ u yaabiltmoʼob xan Jéeoba yéetel ku yilik u kuxtaloʼob jeʼex uts tu tʼaaneʼ. Kex yaanal u idiomaʼob, yaanal bix líiʼsaʼaniloʼob yéetel yaanal bix suuk u vestirkubaʼobeʼ, le kéen k-kʼaj óoltoʼobeʼ séebaʼan k-yaabiltikoʼob. Jach kiʼimak k-óol k-múul alabartik Jéeoba tu yéeteloʼob (Sal. 133:1).

4. ¿Baʼaxten jach kʼaʼabéettoʼon u yáantaj le sukuʼunoʼob yéetel le kiikoʼoboʼ?

⁴ Teʼ kʼiinoʼobaʼ maas jach kʼaʼabéet k-bisikba yéetel le sukuʼunoʼoboʼ. Letiʼobeʼ ku yáantkoʼonoʼob k-aguantart le problemas ku yantaltoʼonoʼ (Rom. 15:1; Gál. 6:2). Ku yáantkoʼonoʼob xan utiaʼal ka muʼukʼaʼanchajak k-fe bey xan utiaʼal ka k-maas tsʼáa k-óol k-meyajt Jéeoba (1 Tes. 5:11; Heb. 10:23-25). Chéen t-juunaleʼ maʼ t-páajtal tu contra le Kʼaasilbaʼaloʼ mix tu contra le kʼasaʼan yóokʼol kaabaʼ. Maʼ tun xáantaleʼ le Kʼaasilbaʼal yéetel le máaxoʼob apoyarkoʼ yaan u líikʼloʼob tu contra le máaxoʼob meyajtik Diosoʼ. Teʼ súutuk jeʼeloʼ jach yaan u kʼaʼabéettaltoʼon u yáantaj le sukuʼunoʼob yéetel le kiikoʼoboʼ.

5. ¿Baʼaxten yaan máaxeʼ ku chan difíciltaltiʼ u confiar tiʼ le sukuʼunoʼoboʼ?

⁵ Chéen baʼaleʼ yaan máaxeʼ ku chan difíciltaltiʼ u confiar tiʼ le sukuʼunoʼoboʼ. Maʼ xaaneʼ tumen tu tsikbaltaj tiʼ juntúul sukuʼun junpʼéel baʼal maʼ u kʼáat ka ojéeltaʼak tumen u maasiliʼ, chéen baʼaleʼ le ka tsʼoʼokeʼ le sukuʼunoʼ tu tsikbaltaj. Wa maʼ xaaneʼ maʼ cumplirtaʼabtiʼ junpʼéel baʼax aʼalaʼabtiʼiʼ. Maʼ xaan xaneʼ yaan baʼax  beetaʼabtiʼ tumen juntúul sukuʼun. ¿Baʼax jeʼel u yáantkoʼon utiaʼal ka maas confiarnakoʼon tiʼ le sukuʼunoʼoboʼ?

6. ¿Bix u yáantkoʼon le yaabilaj utiaʼal k-maas confiar tiʼ le sukuʼunoʼoboʼ? (1 Corintios 13:4-8).

⁶ Le yaabilajoʼ ku yáantik máak confiar tiʼ u maasil. Yáax tiʼ Corintios capítulo 13, ku yaʼalik baʼaxoʼob ku páajtal u beetik máax yaan u yaabilaj. Leloʼ yaan u yáantkoʼon confiar tiʼ u maasil, tak tiʼ le máaxoʼob yaan baʼax u beetmoʼobtoʼonoʼ (xok 1 Corintios 13:4-8). Le versículo 4, ku yaʼalikeʼ «máax yaan u yaabilajeʼ yaan u paciencia yéetel ku yeʼesik u yutsil». Jéeobaeʼ jach ku yeʼesiktoʼon paciencia tak ken kʼebanchajkoʼon tu contra. Toʼon xaneʼ kʼaʼabéet k-eʼesik paciencia tak tiʼ le sukuʼunoʼob ku beetkoʼobtoʼon wa baʼaxoʼ. Le versículo 5, ku yaʼalikeʼ máax yaan u yaabilajeʼ «maʼ tu séeb kʼuuxil» yéetel «maʼ tu kʼaʼajsik le baʼax kʼaas ku beetaʼaltiʼoʼ». Le oʼolal maʼ unaj k-kʼaʼajsik mantatsʼ le baʼax kʼaas ku beetiktoʼon le sukuʼunoʼoboʼ. Tsʼoʼoleʼ Eclesiastés 7:9, ku yaʼalikeʼ maʼ unaj k-séeb pʼuʼujuliʼ. Jach maʼalob ka k-beet le baʼax ku yaʼalik Efesios 4:26: «Maʼ a chaʼikeʼex u tʼúubul kʼiin láayliʼ kʼuuxilnajaʼaneʼexeʼ».

7. Le baʼax ku yaʼalik Mateo 7:1-5, ¿bix u yáantkoʼon utiaʼal ka maas confiarnakoʼon tiʼ le sukuʼunoʼoboʼ?

⁷ Uláakʼ baʼax jeʼel u yáantkoʼon confiar tiʼ le sukuʼunoʼoboʼ letiʼe k-ilkoʼob jeʼex u yilaʼaloʼob tumen Jéeobaoʼ. Letiʼeʼ u yaabiltmoʼob yéetel maʼatech u kʼaʼajsik le baʼaloʼob maʼ maʼalobtak u beetmoʼoboʼ, toʼon xaneʼ bey unaj k-beetkoʼ (Sal. 130:3). Tu lugar k-ilik baʼax maʼ maʼalob ku beetkoʼobeʼ maas maʼalob ka k-il le jatsʼuts modos yaantiʼoboʼ yéetel k-tuukul maʼalob tu yoʼolaloʼob (xok Mateo 7:1-5). Kʼaʼajaktoʼoneʼ juntúul máax yaan u yaabilajeʼ «tuláakal baʼal ku creertik» (1 Cor. 13:7). Jéeobaeʼ maʼ táan u yaʼaliktoʼon ka confiarnakoʼon tiʼ jeʼel máaxakeʼ, baʼaxeʼ chéen tiʼ le máaxoʼob ku yeʼeskoʼob jeʼel u páajtal k-confiartiʼoboʼ. *

8. ¿Baʼax jeʼel u yáantkech utiaʼal ka maas confiarnakech tiʼ u maasileʼ?

⁸ U jaajileʼ ku bisik tiempo utiaʼal u páajtal k-confiar tiʼ wa máax. ¿Baʼax jeʼel u yáantkech utiaʼal ka maas confiarnakech tiʼ u maasileʼ? Unaj a kʼaj óoltikoʼob tubeel. Tsikbalnen tu yéeteloʼob teʼ muchʼtáambaloʼoboʼ, kʼaʼaytajnen tu yéeteloʼob, eʼes paciencia tiʼob yéetel tsʼáatiʼob u oportunidadil u yeʼeskoʼob jeʼel u páajtal a confiartiʼobeʼ. U jaajileʼ wa maʼ a kʼaj óol tubeel wa máaxeʼ maʼ ta jáan tsikbaltiktiʼ baʼax ku yúuchultech, chéen baʼaleʼ le kéen a maas kʼaj óolteʼ ku taaktal a tsikbaltiktiʼ (Luc. 16:10). ¿Kux túun wa juntúul sukuʼun ka confiartiʼeʼ ku pʼatkech kʼaasil? Maʼ unaj u jáan xuʼulul a confiartiʼiʼ, mix unaj u xuʼulul a confiar tiʼ u maasil chéen yoʼolal baʼax beetaʼabtech tumen wa máaxiʼ. Junpʼéel baʼax kun áantkecheʼ letiʼe a xakʼaltik u ejemplo le máaxoʼob meyajt Dios úuchjeakil maʼ xuʼul u confiaroʼob tiʼ u maasil kex yaan baʼax beetaʼabtiʼoboʼ.

9. 1) ¿Baʼax tu beetaj Ana kex ku kʼebantal kaʼach le máaxoʼob ku meyajoʼob teʼ tabernáculooʼ? 2) ¿Baʼax ka kanik tiʼ u ejemplo Ana? (Ilawil le dibujooʼ).

⁹ ¿Yaan wa baʼax tsʼoʼok u beetiktech juntúul sukuʼun tsʼaʼantiʼ junpʼéel nojoch privilegio? Wa beyoʼ jach jeʼel u yáantkech u ejemplo Anaeʼ. Tu kʼiiniloʼob Anaeʼ, Elí ku beetik u maas nojoch sacerdoteil tu luʼumil Israel. Chéen baʼaleʼ u paalaloʼobeʼ kex sacerdoteʼobeʼ jach kʼaas baʼax ku beetkoʼob. Letiʼobeʼ ku  núupkʼebantaloʼob, pero Elíeʼ óoliʼ mix baʼal tu beetaj utiaʼal u tojkíintik u kuxtaloʼob. Kex beyoʼ Jéeobaeʼ maʼ tu jáan luʼsaj le privilegio yaan tiʼ Elíoʼ. ¿Baʼax túun tu beetaj Ana? Letiʼeʼ maʼ xuʼul u bin u adorart Jéeoba teʼ tabernáculooʼ. Juntéenjeak jach yaachajaʼan u yóol táan u orareʼ, Elíeʼ tu jáan tuklaj kalaʼan Anaeʼ ka tu tsʼíikiltaj (1 Sam. 1:12-16). Anaeʼ tsʼokaʼaniliʼ u yaʼalik tiʼ Jéeobaeʼ wa ku yantal juntúul u chan hijoeʼ yaan u bisik meyaj teʼ tabernáculooʼ. Kex yaan u kʼaʼabéettal u bisik u chan hijo teʼ tuʼux yaan Elíoʼ, letiʼeʼ u chʼaʼtukultmaj u cumplirtik le baʼax u yaʼalmaj tiʼ Jéeobaoʼ (1 Sam. 1:11). ¿Kʼaʼabéet wa túun u beetaʼal wa baʼax utiaʼal u corregirtaʼal u paalal Elí? U jaajileʼ kʼaʼabéet, le ka kʼuch u kʼiinileʼ Jéeobaeʼ tu beetaj (1 Sam. 4:17). Chéen baʼaleʼ mientras maʼ u beeteʼ tu bendecirtaj Ana utiaʼal u yantal juntúul u chan hijo (1 Sam. 1:17-20).

10. ¿Xuʼul wa u confiar David tiʼ u maasil yoʼolal baʼax beetaʼabtiʼ tumen máax u yaabiltmaj? Tsole.

¹⁰ ¿Yaan wa baʼax tsʼoʼok u beetiktech juntúul a amigooʼ? Wa beyoʼ jach jeʼel u yáantkech u ejemplo rey Davideʼ. Aitofel, juntúul máax jach ku biskuba maʼalob yéetel Davideʼ, tu apoyartaj Absalón le ka taakchaj u luʼsik le reino tiʼ u taataoʼ. Chéen tukult bix tu yuʼubiluba David le ka tu tsʼáajuba u hijo tu contraoʼ bey xan úuchik u apoyartaʼal u hijo tumen u amigo. Kex beyoʼ Davideʼ maʼ xuʼul u confiar tiʼ u maasiliʼ. Por ejemploeʼ maʼ xuʼul u confiar tiʼ Usay, juntúul u amigo maʼ tu apoyartaj Absalóniʼ. Jach maʼalob úuchik u beetik leloʼ, tumen Usayeʼ hasta tu tsʼáaj u kuxtal tu chiʼ kíimil utiaʼal u yáantik David (2 Sam. 17:1-16).

11. ¿Bix úuchik u yeʼesik juntúul tiʼ u j-meyajoʼob Nabal ku confiar tiʼ u maasil?

¹¹ Maʼalob xan ka tuukulnakech tiʼ u ejemplo juntúul tiʼ u j-meyajoʼob Nabal. Úuchjeakileʼ David yéetel le máaxoʼob ku máanoʼob tu yéeteloʼ tu kanáantoʼob maʼ u beetaʼal loob tiʼ u j-meyajoʼob Nabal. Ka máan kʼiineʼ Davideʼ tu túuxtaj kʼáatbil janal tiʼ Nabal, juntúul israelita jach ayikʼal, chéen baʼaleʼ letiʼeʼ maʼ tu yóotaj u tsʼáaiʼ. Le oʼolal Davideʼ sen pʼuʼujeʼ ka tu yaʼalaj yaan u kíimsik tuláakal le xiiboʼob yaan tu yotoch Nabaloʼ. Juntúul tiʼ u j-meyajoʼob Nabaleʼ tu tsikbaltaj tiʼ Abigaíl le baʼax úuchoʼ. Jeʼex k-ilkoʼ le máakaʼ maʼ púutsʼiʼ, baʼaxeʼ confiarnaj tiʼ Abigaíl, u yatan Nabal. Letiʼeʼ u yojel  Abigaíleʼ jach yaan u naʼat yéetel jeʼel u yutskíintik le baʼax tsʼoʼok u yúuchloʼ. Jach maʼalob le baʼax tu beetoʼ tumen Abigaíleʼ líikʼeʼ ka bin u convencert David utiaʼal maʼ u beetik le baʼax tsʼoʼok u chʼaʼtuklikoʼ (1 Sam. 25:2-35). Abigaíl xaneʼ confiarnaj yaan u kʼexik u tuukul David.

12. ¿Bix úuchik u yeʼesik Jesús ku confiar tiʼ u discípuloʼob kex yaan kʼiin tu beetoʼob baʼax maʼ maʼalobiʼ?

¹² Jesúseʼ confiarnaj tiʼ u discípuloʼob kex yaan kʼiin tu beetoʼob baʼaloʼob maʼ maʼalobtakiʼ (Juan 15:15, 16). Le ka tu kʼáataj Santiago yéetel Juan ka chaʼabak u kutaloʼob tu tséel le kéen káajak u gobernareʼ, letiʼeʼ maʼ tu tuklaj chéen por interés táan u meyajtikoʼob Jéeobaiʼ mix tu tuklaj wa maʼ tu páajtal u seguer u beetik u apóstoliloʼobiʼ (Mar. 10:35-40). Tsʼoʼoleʼ teʼ áakʼab ka maʼach Jesúsoʼ xúumpʼattaʼab tumen tuláakal u discípuloʼob (Mat. 26:56). Kex beyoʼ Jesúseʼ maʼ xuʼul u confiartiʼobiʼ, «tu yaabiltoʼob tak tu xuul» kex yaan kʼiin tu beetoʼob baʼax maʼ maʼalobiʼ (Juan 13:1). Le ka tsʼoʼok u kaʼa kuxkíintaʼaleʼ hasta tu kʼubéentaj tiʼ u 11 apóstoloʼob chúukaʼan u yóoloʼob ka u nuʼuktoʼob le u beetaʼal discípuloʼoboʼ yéetel ka u kanáantoʼob le mejen tamanoʼoboʼ (Mat. 28:19, 20; Juan 21:15-17). Jach maʼalob úuchik u confiar tiʼ le apóstoloʼob kex j-kʼeban máakoʼoboʼ, tumen letiʼobeʼ chúukpaj u yóoloʼob tak ka kíimoʼob. Tsʼoʼok k-ilkeʼ Ana, David, juntúul tiʼ u j-meyajoʼob Nabal, Abigaíl yéetel Jesúseʼ confiarnajoʼob tiʼ j-kʼeban máakoʼob. Toʼon xaneʼ jeʼel u páajtal k-beetik beyoʼ.

13. ¿Baʼaxten yaan kʼiineʼ ku chan difíciltaltoʼon k-confiar tiʼ u maasil?

¹³ ¿Yaan wa baʼax confidencial tsʼoʼok k-tsikbaltik tiʼ juntúul sukuʼun, chéen baʼaleʼ letiʼeʼ tu tsikbaltaj tiʼ u maasil? ¿Máasaʼ le kéen úuchuk beyoʼ jach ku yaatal k-óol? Bey úuchik tiʼ juntúul kiikoʼ, letiʼeʼ tu tsikbaltaj junpʼéel baʼal confidencial tiʼ juntúul anciano. Chéen baʼaleʼ tuláakʼ kʼiineʼ tʼaʼan tumen u yatan le anciano utiaʼal ka líiʼsaʼak u yóoloʼ. Bey túunoʼ tu tsʼáaj cuentaeʼ le sukuʼunoʼ tu tsikbaltaj tiʼ u yatan. Yoʼolal leloʼ tu yuʼubaj maʼ tu páajtal u kaʼa confiar tiʼ le ancianooʼ. U maʼalobileʼ le kiikaʼ tu tsikbaltaj tiʼ uláakʼ juntúul anciano bix u yuʼubikuba yéetel áantaʼab utiaʼal u kaʼa confiar tiʼ le ancianoʼoboʼ.

14. ¿Baʼax áant juntúul sukuʼun kaʼa confiar tiʼ kaʼatúul ancianoʼob?

¹⁴ Juntúul sukuʼuneʼ máan yaʼab tiempo jach kʼuuxchajaʼan yéetel kaʼatúul ancianoʼob tumen ku tuklik kaʼacheʼ maʼ tu páajtal u confiartiʼob. Chéen baʼaleʼ kʼaʼajtiʼeʼ juntúul sukuʼun jach ku respetarkeʼ u yaʼalmaj: «K-enemigoeʼ letiʼe Kʼaasilbaʼaloʼ, maʼ k-sukuʼunoʼobiʼ». Le sukuʼunoʼ jach tuukulnaj tiʼ le baʼax u yuʼubmoʼ ka túun orarnaj tiʼ Jéeoba utiaʼal u kʼáatik áantaj tiʼ. Ka máan kʼiineʼ béeychaj u kaʼa biskuba yéetel le kaʼatúul ancianoʼoboʼ bey xan u kaʼa confiartiʼob.

15. ¿Baʼaxten jeʼel u bisik tiempo u kaʼa confiar máak tiʼ u maasileʼ? Tsikbalt u ejemplo Grete.

¹⁵ ¿Tsʼoʼok wa u luʼsaʼaltech junpʼéel jatsʼuts meyaj tsʼaʼantech kaʼach teʼ múuchʼuliloʼ? Leloʼ jach jeʼel u beetik u yaatal u yóol máakeʼ. Koʼoneʼex ilik baʼax úuch tiʼ Grete yéetel u maama. Letiʼobeʼ jach chúukpaj u yóol u meyajtoʼob Jéeoba tu luʼumil Alemania tu kʼiiniloʼob le naziʼoboʼ. Tiʼ Greteeʼ kʼubéentaʼan kaʼach ka u beet u copiailoʼob U Pʼíich Tulumil Kanan, chéen baʼaleʼ le sukuʼunoʼoboʼ tu yojéeltoʼobeʼ u papá Greteeʼ u pʼekmaj le Testigoʼoboʼ. Tumen jach saajkoʼob u taʼakal u pooloʼobeʼ tu luʼsoʼob le meyaj u kʼubéentmoʼob tiʼ Greteoʼ. Chéen baʼaleʼ yaan uláakʼ prueba tu aktáantaj Grete. Le táan le Segunda Guerra Mundialoʼ, hasta xuʼul u tsʼaʼabaltiʼob le revistaʼoboʼ bey xan u saludartaʼaloʼob tumen le sukuʼunoʼoboʼ. Leloʼ  jach tu beetaj u yaatal u yóol Grete. Máan kʼiin ka béeychaj u perdonartik le sukuʼunoʼoboʼ bey xan u kaʼa confiartiʼob. Leloʼ tu beetaj tumen tu naʼateʼ Jéeobaeʼ tsʼoʼok u perdonartik le sukuʼunoʼoboʼ yéetel letiʼeʼ unaj xan u beetik beyoʼ. *

16. ¿Baʼaxten unaj k-beetik tuláakal le ku páajtal utiaʼal k-kaʼa confiar tiʼ le sukuʼunoʼoboʼ?

¹⁶ Wa tsʼoʼok u yúuchultech junpʼéel tiʼ le baʼaxoʼob tsʼoʼok k-aʼalik teʼ xookaʼ beet tuláakal le ku páajtal utiaʼal a confiar tiʼ le sukuʼunoʼoboʼ, maʼ xaaneʼ yaan u chan bisiktech tiempo, chéen baʼaleʼ maʼalob ka a beete. Lelaʼ bey jeʼex u yúuchul le kéen intoxicarnak máak yoʼolal junpʼéel baʼax ku jaantikeʼ. Tuláakʼeʼ yaan u chan kanáantik baʼax ken u jaante pero maʼ u kʼáat u yaʼal wa yaan u xuʼulul u janaliʼ. Bey túun xanoʼ kex yaan máax tu pʼatoʼon kʼaasileʼ maʼ unaj u xuʼulul k-confiar tiʼ tuláakal le sukuʼunoʼoboʼ. Wa k-confiar tiʼ le sukuʼunoʼoboʼ jach yaan u kiʼimaktal k-óol yéetel yaan k-áantaj utiaʼal ka u bisuba maʼalob tuláakal le múuchʼuliloʼ.

17. 1) ¿Baʼaxten jach kʼaʼabéet u confiar máak tiʼ u maasil? 2) ¿Baʼax ken k-il teʼ tuláakʼ xookoʼ?

¹⁷ Teʼ yóokʼol kaabaʼ óoliʼ maʼ tu páajtal u confiar máak tiʼ mix máak, chéen baʼaleʼ toʼoneʼ jeʼel u páajtal k-confiar tiʼ le sukuʼunoʼoboʼ tumen letiʼobeʼ u yaabiltmoʼonoʼob. Yoʼolal leloʼ jach kiʼimak k-óol yéetel ku béeytal k-múul meyaj tu yéeteloʼob. Tsʼoʼoleʼ le jeʼeloʼ jach jeʼel u yáantkoʼon teʼ talam kʼiinoʼob ku taaloʼ. Chéen baʼaleʼ, ¿kux túun wa yaan máax tsʼoʼok u pʼatkoʼon kʼaasil? Utiaʼal k-kaʼa confiartiʼeʼ unaj k-ilik le baʼaloʼob jeʼex u yilik Jéeobaoʼ, k-tsʼáaik ichil k-kuxtal le baʼax ku yaʼalik le Bibliaoʼ, k-maas yaabiltik le sukuʼunoʼoboʼ bey xan k-ilik le baʼax tu beetaj le máaxoʼob meyajt Dios úuchjeakiloʼ. Wa k-beetkeʼ yaan u yantaltoʼon yaʼab sukuʼunoʼob maas nojoch u yaabilajoʼob «ke jach u sukuʼun máak» (Pro. 18:24). Chéen baʼaleʼ maʼ chéen unaj k-confiar tiʼ u maasiliʼ, kʼaʼabéet xan k-eʼesik tiʼ le sukuʼunoʼob jeʼel u páajtal u confiaroʼobtoʼonoʼ. Teʼ tuláakʼ xookoʼ yaan k-ilik bix jeʼel u páajtal k-beetkeʼ.