XOOK 40
Ku yáantaʼal «yaʼabkach máakoʼob utiaʼal u beetkoʼob baʼax maʼalob»
«Le máaxoʼob kun áantik le yaʼabkach máakoʼob utiaʼal u beetkoʼob baʼax maʼaloboʼ yaan u léembaloʼob utiaʼal mantatsʼ jeʼex u léembal le estrellaʼoboʼ» (DAN. 12:3).
KʼAAY 151 Jéeoba kun kaʼa kuxkíintikoʼob
TIʼ BAʼAX KUN TʼAAN *
1. ¿Baʼax jatsʼuts baʼaloʼob kun úuchul ichil le Mil Años kun Reinar Cristooʼ?
¿MÁASAʼ jach jatsʼuts le kʼiin kéen káajak u kaʼa kuxkíintaʼal le máakoʼob ichil le Mil Años kun Reinar Cristooʼ? Tuláakloʼon yaan u kiʼimaktal k-óol k-kaʼa ilik le máaxoʼob k-yaabiltmoʼoboʼ. Leloʼ letiʼe baʼax xan ku tsʼíiboltik Jéeobaoʼ (Job 14:15). Jeʼex t-ilil teʼ xook máanikoʼ «le utsoʼob» tsʼíibtaʼan u kʼaabaʼob tu «libroil le kuxtaloʼ» «yaan u líikʼloʼob utiaʼal ka kuxlakoʼob» (Hech. 24:15; Juan 5:29). Maʼ xaaneʼ k-láakʼtsiloʼobeʼ tiaʼanoʼob ichil le máaxoʼob kun yáax kaʼa kuxkíintbiloʼob way Luʼumeʼ. * Tsʼoʼoleʼ «le kʼasaʼanoʼob» wa le máaxoʼob maʼ jach yanchajtiʼob u oportunidadil u kʼaj óoltikoʼob Jéeoba yéetel u meyajtikoʼob antes tiʼ u kíimloʼoboʼ «yaan u líikʼloʼob utiaʼal ka juzgartaʼakoʼob».
2, 3. 1) Jeʼex u yaʼalik Isaías 11:9, 10, ¿bix kun kaʼansbil le máakoʼob tiʼ tuláakal yóokʼol kaaboʼ? 2) ¿Baʼax ken k-il teʼ xookaʼ?
2 Tuláakal le máaxoʼob kun kaʼa kuxkíintbiloʼoboʼ yaan u kʼaʼabéettal u seguer u kaanbaloʼob (Isa. 26:9; 61:11). Le oʼolal yaan u organizartaʼal tuláakal baʼax kʼaʼabéet utiaʼal u béeytal u kaʼansaʼaloʼob (xok Isaías 11:9, 10). Le kʼasaʼanoʼoboʼ yaan u kʼaʼabéettal u kaanbaloʼob tu yoʼolal Jesucristo, tu yoʼolal le u kuxtal tu kʼuboʼ, tu yoʼolal le Reinooʼ bey xan tu yoʼolal le u yeʼesaʼal chéen tiʼ Jéeoba yaan u derechoil u gobernaroʼ. Tak le utsoʼoboʼ yaan u bin u kaanbaloʼob jujunpʼíitil tiʼ le baʼaxoʼob kun bin u yaʼalik Jéeobaoʼ. Yaan jujuntúul tiʼ le máaxoʼob meyajt Jéeoba úuchjeakiloʼ kíimoʼob le maʼ tsʼoʼoksaʼak u tsʼíibtaʼal tuláakal le Bibliaoʼ. Leloʼ ku yeʼesikeʼ le utsoʼob yéetel le kʼasaʼanoʼob kun kaʼa kuxkíintbiloʼoboʼ jach yaan u kʼaʼabéettal u seguer u kaanbaloʼob.
3 Teʼ xookaʼ yaan k-núukik le kʼáatchiʼobaʼ: ¿Bix kun kaʼansbil le máakoʼob tiʼ tuláakal yóokʼol kaaboʼ? ¿Baʼax kun úuchul yéetel le máaxoʼob ken u aprovechartoʼob le kaʼansaj kun tsʼaabiloʼ? ¿Baʼax kun úuchul yéetel le máaxoʼob maʼ ken u aprovechartoʼoboʼ? Jach kʼaʼabéet k-ojéeltik u núukil le kʼáatchiʼobaʼ. Jujunpʼéel tiʼ le jatsʼuts profecíaʼob yaan tu libroil Daniel yéetel Apocalipsisoʼ yaan u yáantkoʼon k-naʼat baʼax kun úuchul le kéen tsʼoʼokok u kaʼa kuxkíintaʼal le máakoʼoboʼ. Chéen baʼaleʼ yáaxeʼ yaan k-xakʼaltik le jatsʼuts baʼaloʼob kun úuchul ku yaʼalik Daniel 12:1 yéetel 2.
«LE MÁAXOʼOB KIMENOʼOBOʼ YAAN U YAAJLOʼOB»
4, 5. Jeʼex u yaʼalik Daniel 12:1, ¿baʼax kun úuchul tu tsʼook kʼiinoʼob?
4 (Xok Daniel 12:1). U libroil Danieleʼ ku yaʼaliktoʼon jujunpʼéel jatsʼuts baʼaloʼob kun úuchul tu tsʼook kʼiinoʼob. Daniel 12:1, ku yaʼalikeʼ Miguel wa Jesucristoeʼ, «tiaʼan tu favor» u kaajal Dioseʼ. Le profecía jeʼelaʼ káaj u béeytal tu añoil 1914, le ka tsʼaʼab Jesús u beet u Reyil tiʼ u Reino Dios yaan teʼ kaʼanoʼ.
5 Chéen baʼaleʼ tiʼ Danieleʼ aʼalaʼab xaneʼ Jesúseʼ yaan u líikʼil tiʼ kʼiinoʼob «tuʼux kun sen muʼyaj máak, le baʼax kun úuchloʼ mix juntéen ilaʼak desde ka yanchaj le yáax kaajoʼ». Le kʼiinoʼob ku yaʼalik le tekstoaʼ láayliʼ letiʼe kʼiinoʼob tuʼux ku «sen muʼyaj máak» ku yaʼalik Mateo 24:21. Jesúseʼ yaan u líikʼil utiaʼal u defendertik u kaajal Dios tu tsʼoʼokbal le kʼiinoʼob tuʼux ku sen muʼyaj máakoʼ, lelaʼ tu kʼiinil Armagedón. Le máaxoʼob kun defenderbiloʼoboʼ letiʼe «yaʼabkach máakoʼob» ku yaʼalik u libroil Apocalipsis «ku jóokʼloʼob tiʼ le nojoch muʼyajiloʼ» (Apo. 7:9, 14).
6. ¿Baʼax kun úuchul kéen tsʼoʼokok u salvarkuba le yaʼabkach máakoʼob tiʼ le nojoch muʼyajiloʼ, yéetel baʼaxten k-aʼalik leloʼ? (Teʼ revistaaʼ ilawil xan le jaats «Kʼáatchiʼob ku beetaʼal» ku tʼaan tiʼ le u kaʼa kuxkíintaʼal máakoʼob way Luʼumeʼ).
6 (Xok Daniel 12:2). ¿Baʼax kun úuchul le kéen tsʼoʼokok u salvarkuba le yaʼabkach máakoʼob tiʼ le nojoch muʼyajiloʼ? Kaʼacheʼ k-tuklikeʼ Daniel 12:2, táan u tʼaan tiʼ le úuchik u káajal u kaʼa kʼaʼaytaj u kaajal Dios kex óolak xuʼulsaʼak u kʼaʼaytajoʼob tu añoil 1918. * Chéen baʼaleʼ beoraaʼ tsʼoʼok k-naʼatikeʼ táan u tʼaan tiʼ le u kaʼa kuxkíintaʼal máakoʼob teʼ túumben luʼumoʼ. Lelaʼ yaan u yúuchul le kéen tsʼoʼokok le u tsʼook kʼiinoʼoboʼ wa le kéen tsʼoʼokok Armagedónoʼ.
7. 1) ¿Baʼax u kʼáat u yaʼal Daniel le ka tu yaʼalaj yaan jujuntúul máakoʼob kun kaʼa kuxkíintbiloʼob «utiaʼal u kuxtaloʼob utiaʼal minaʼan u xuul»? 2) ¿Baʼaxten le kaʼa kuxtal ku yaʼalik Danieloʼ «maas maʼalob ke le bix líiʼsaʼabik» u maasil máakoʼob úuchjeakiloʼ?
7 ¿Baʼax túun u kʼáat u yaʼal Daniel 12:2 kéen u yaʼal jujuntúul máakoʼob kun kaʼa kuxkíintbiloʼobeʼ «utiaʼal u kuxtaloʼob utiaʼal minaʼan u xuul»? U kʼáat u yaʼaleʼ le kuxtal minaʼan u xuuloʼ yaan u kʼaʼamal tumen le máaxoʼob kun kaʼa kuxkíintbiloʼob ken u kʼaj óoltoʼob wa kun seguer u kʼaj óoltikoʼob Jéeoba yéetel Jesús yéetel ken u yuʼuboʼob tʼaan ichil le 1,000 añosoʼ (Juan 17:3). Le kaʼa kuxtal jeʼelaʼ «maas maʼalob ke le bix líiʼsaʼabik» u maasil máakoʼob úuchjeakiloʼ (Heb. 11:35). ¿Baʼaxten k-aʼalik leloʼ? Tumen le máaxoʼob kaʼa kuxkíintaʼaboʼob úuchjeakiloʼ kaʼa kíimoʼob.
8. ¿Baʼax u kʼáat u yaʼal Daniel le ka tu yaʼalaj yaan jujuntúul máakoʼobeʼ yaan u kaʼa kuxkíintaʼaloʼob «utiaʼal u pʼaʼatloʼob ich suʼtsilil yéetel utiaʼal u pʼektaʼaloʼob mantatsʼ»?
8 Chéen baʼaleʼ maʼ tuláakal le máaxoʼob kun kaʼa kuxkíintbiloʼob ken u aprovechartoʼob le kaʼansaj kun tsʼaabiltiʼob tumen Jéeobaoʼ. U libroil Danieleʼ ku yaʼalikeʼ jujuntúuloʼobeʼ yaan u kaʼa kuxkíintaʼaloʼob «utiaʼal u pʼaʼatloʼob ich suʼtsilil yéetel utiaʼal u pʼektaʼaloʼob mantatsʼ». Tumen maʼ ken u yuʼuboʼob tʼaaneʼ u kʼaabaʼobeʼ maʼ kun tsʼíibtbil tu libroil le kuxtaloʼ yéetel maʼ ken u kʼamoʼob le kuxtal minaʼan u xuuloʼ. Baʼaxeʼ yaan «u pʼektaʼaloʼob mantatsʼ», lelaʼ u kʼáat u yaʼaleʼ yaan u xuʼulsaʼaloʼob mantatsʼ. Leloʼ ku yeʼesiktoʼoneʼ Daniel 12:2, táan u tʼaan tiʼ le baʼax kun úuchul yéetel tuláakal le máaxoʼob kun kaʼa kuxkíintbiloʼoboʼ, según baʼax ken u beetoʼob kéen tsʼoʼokok u kaʼa kuxkíintaʼaloʼob * (Apo. 20:12). Jujuntúuloʼobeʼ yaan u kʼamkoʼob le kuxtal minaʼan u xuuloʼ yéetel uláakʼoʼobeʼ maʼatech.
KU YÁANTAʼAL «YAʼABKACH MÁAKOʼOB UTIAʼAL U BEETKOʼOB BAʼAX MAʼALOB»
9, 10. 1) Jeʼex u yaʼalik Daniel 12:3, ¿baʼax maas kun úuchul le kéen tsʼoʼokok le nojoch muʼyajiloʼ? 2) ¿Máaxoʼob le «yaan u léembal u sáasiloʼob jeʼex u léembal le kaʼanoʼoboʼ»?
9 (Xok Daniel 12:3). ¿Baʼax maas kun úuchul kéen tsʼoʼokok le ‹kʼiinoʼob tuʼux kun sen muʼyaj máakoʼ›? Daniel capítulo 12 versículo 3, ku yaʼalik uláakʼ baʼax kun úuchul kéen tsʼoʼokok le nojoch muʼyajiloʼ.
10 ¿Máaxoʼob le «yaan u léembal u sáasiloʼob jeʼex u léembal le kaʼanoʼoboʼ»? Le baʼax tu yaʼalaj Jesús tsʼíibtaʼan teʼ Mateo 13:43, ku yáantkoʼon k-naʼate. Teʼeloʼ tu yaʼalaj: «Teʼ kʼiinoʼob jeʼeloʼ le máaxoʼob beetik baʼax utsoʼ yaan u léembaloʼob tu Reino u Taataʼob jeʼex u léembal le Kʼiinoʼ». Jesúseʼ táan u tʼaan kaʼach tiʼ «u paalal le Reinooʼ» wa tiʼ le sukuʼunoʼob yéeyaʼanoʼob utiaʼal u reinaroʼob tu yéetel teʼ kaʼanoʼ (Mat. 13:38). Leloʼ ku yeʼesiktoʼoneʼ Daniel 12:3, táan u tʼaan tiʼ le yéeyaʼanoʼob yéetel tiʼ le meyaj ken u beetoʼob ichil le Mil Años kun reinaroʼob yéetel Cristooʼ.
Le 144,000, yaan u múul meyajoʼob yéetel Jesús utiaʼal u kaʼansaʼal u kajnáaliloʼob tuláakal yóokʼol kaab ichil le 1,000 años kun reinaroʼoboʼ (Ilawil párrafo 11)
11, 12. ¿Baʼax meyajil ken u beet le 144,000 ichil le 1,000 añosoʼ?
11 Le yéeyaʼanoʼoboʼ yaan u yáantkoʼob «yaʼabkach máakoʼob utiaʼal u beetkoʼob baʼax maʼalob». ¿Bix ken u beetiloʼob? Yaan u múul meyajoʼob yéetel Jesús utiaʼal u béeytal u kaʼansaʼal u kajnáaliloʼob tuláakal yóokʼol kaab ichil le 1,000 años kun reinaroʼoboʼ. Le 144,000 yaan u beetik u reyiloʼob bey xan u sacerdoteiloʼob (Apo. 1:6; 5:10; 20:6). Letiʼobeʼ yaan u yáantajoʼob «utiaʼal u tsʼaʼakal u kajnáaliloʼob le luʼumoʼoboʼ», u kʼáat u yaʼaleʼ yaan u yáantajoʼob utiaʼal u pʼáatal perfectoil tuláakal máak (Apo. 22:1, 2; Eze. 47:12). ¡Le yéeyaʼanoʼoboʼ jach yaan u kiʼimaktal u yóoloʼob u beetkoʼob le meyaj jeʼeloʼ!
12 ¿Máaxoʼob kun antaloʼob ichil «le yaʼabkach máakoʼob» kun áantbiloʼob «utiaʼal u beetkoʼob baʼax maʼaloboʼ»? Tiʼ kun antal le máaxoʼob kun kaʼa kuxkíintbiloʼoboʼ, le máaxoʼob ken u salvartubaʼob kéen tsʼoʼokok Armagedónoʼ yéetel le mejen paalaloʼob kun síijloʼob teʼ túumben luʼumoʼ. Le kéen tsʼoʼokok le 1,000 añosoʼ tuláakal le máaxoʼob kajaʼanoʼob way Luʼumeʼ yaan u pʼáatloʼob perfectoil. ¿Baʼax kʼiin túun u tsʼíibtaʼal u kʼaabaʼob bey yéetel tinta tu libroil le kuxtaloʼ?
U TSʼOOK PRUEBA
13, 14. ¿Baʼax kun kʼaʼabéettal u beetik tuláakal le máaxoʼob perfectoʼob antes u kʼamkoʼob le kuxtal minaʼan u xuuloʼ?
13 Kʼaʼajaktoʼoneʼ kex perfecto máakeʼ maʼ u kʼáat u yaʼal wa seguro yaan u kʼamik le kuxtal minaʼan u xuuloʼ. Jeʼex Adán yéetel Evaeʼ perfectoʼob kaʼachi, chéen baʼaleʼ kʼaʼabéet kaʼach u yuʼubikoʼob u tʼaan Jéeoba utiaʼal u kʼamkoʼob le kuxtal minaʼan u xuuloʼ, pero jeʼex k-ojliloʼ maʼ tu yuʼuboʼob tʼaaniʼ (Rom. 5:12).
14 Jeʼex tsʼoʼok k-ilkoʼ yaan u pʼáatal perfectoil tuláakal le máaxoʼob kun kajtaloʼob way Luʼum kéen tsʼoʼokok le 1,000 añosoʼ. ¿Tuláakloʼob wa yaan u apoyarkoʼob u gobierno Jéeoba utiaʼal mantatsʼ? ¿Yaan wa tiʼ letiʼob ken u beetoʼob jeʼex Adán yéetel Evaeʼ? ¿Bix kun ojéeltbil wa yaan u apoyarkoʼob wa maʼ?
15, 16. 1) ¿Baʼax kʼiin ken yanak u oportunidadil tiʼ le máaxoʼob perfectoʼob u yeʼeskoʼob chúukaʼan u yóoloʼob u meyajtoʼob Jéeobaoʼ? 2) ¿Baʼax kun úuchul le kéen máanak le u tsʼook pruebaoʼ?
15 Satanáseʼ yaan u kʼaʼalal ichil 1,000 años. Teʼ kʼiinoʼob jeʼeloʼ maʼ kun páajtal u tusik mix máak. Chéen baʼaleʼ le kéen tsʼoʼokok le 1,000 añosoʼ yaan u jáalkʼabtaʼal. Letiʼ túuneʼ yaan u yóotik u tus le máakoʼob perfectoʼoboʼ. Teʼ kʼiinoʼoboʼ le máakoʼob perfectoʼoboʼ yaan u yantaltiʼob u oportunidadil u yeʼeskoʼob ku respetarkoʼob u kʼaabaʼ Dios yéetel ku kʼamkoʼob chéen letiʼ unaj u gobernar (Apo. 20:7-10). Según baʼax ken u beetoʼobeʼ letiʼe baʼax kun eʼesik wa yaan u tsʼíibtaʼal u kʼaabaʼob utiaʼal mantatsʼ tu libroil le kuxtaloʼ.
16 Jujuntúul tiʼ le máaxoʼob perfectoʼoboʼ yaan u beetkoʼob jeʼex Adán yéetel Evaeʼ, maʼ ken u kʼamoʼob u gobierno Jéeoba. ¿Baʼax túun kun úuchul tu yéeteloʼob? Apocalipsis 20:15, ku yaʼalik: «Le máaxoʼob maʼ tsʼíibtaʼan u kʼaabaʼob tu libroil le kuxtaloʼ píikchʼintaʼaboʼob ichil le kʼáaʼnáab de kʼáakʼoʼ». Leloʼ u kʼáat u yaʼaleʼ yaan u xuʼulsaʼaltiʼob utiaʼal mantatsʼ. Chéen baʼaleʼ u maas yaʼabil tiʼ le máaxoʼob perfectoʼoboʼ yaan u chúukpajal u yóoloʼob u meyajtoʼob Jéeoba le kéen yanak le u tsʼook pruebaoʼ. U kʼaabaʼobeʼ yaan u tsʼíibtaʼal utiaʼal mantatsʼ tu libroil le kuxtaloʼ.
«LE U TSʼOOK KʼIINOʼOBOʼ»
17. ¿Baʼax aʼalaʼab tiʼ Daniel kun úuchul teʼ kʼiinoʼob kuxlikoʼonaʼ? (Daniel 12:4, 8-10).
17 ¿Máasaʼ jach ku kiʼimaktal k-óol kéen tuukulnakoʼon tiʼ le baʼaxoʼob ku taal u kʼiinil u yúuchloʼ? Chéen baʼaleʼ juntúul ángeleʼ tu yaʼalaj xan tiʼ Daniel junpʼéel baʼax jach importante kun úuchul teʼ kʼiinoʼob kuxlikoʼonaʼ wa teʼ ‹tu tsʼook kʼiinoʼobaʼ› (xok Daniel 12:4, 8-10; 2 Tim. 3:1-5). Le ángeloʼ tu yaʼalaj tiʼ Daniel: «Le u jaajil kʼaj óolaloʼ yaan u sen yaʼabtal». Leloʼ ku yeʼesikeʼ u kaajal Dioseʼ yaan u maas naʼatik le profecíaʼob ku taasik u libroil Danieloʼ. Chéen baʼaleʼ le ángeloʼ yaan uláakʼ baʼax tu yaʼalaj tiʼ Daniel kun úuchul teʼ kʼiinoʼobaʼ, tu yaʼalaj: «Le kʼasaʼan máakoʼoboʼ yaan u beetkoʼob baʼaloʼob kʼaastak, yéetel mix juntúul kʼasaʼan máak ken u naʼat le tʼaanoʼobaʼ».
18. ¿Baʼax taʼaytak u yúuchul tiʼ le kʼasaʼan máakoʼoboʼ?
18 Teʼ kʼiinoʼobaʼ le kʼasaʼan máakoʼoboʼ bey ku jóokʼloʼob yéetel le baʼax u kʼáatoʼoboʼ (Mal. 3:14, 15). Chéen baʼaleʼ maʼ u tuʼubultoʼoneʼ Jesúseʼ jach taʼaytak u juzgartik le máakoʼob beyoʼob chivoʼoboʼ yéetel yaan u tsʼáaikoʼob junpáayil tiʼ le máaxoʼob beyoʼob tamanoʼoboʼ (Mat. 25:31-33). Le kʼasaʼan máakoʼoboʼ maʼ ken u salvartubaʼob le kéen tsʼoʼokok le nojoch muʼyajiloʼ mix kun kaʼa kuxkíintbiloʼob teʼ túumben luʼumoʼ. U kʼaabaʼobeʼ minaʼan teʼ «libro utiaʼal u kʼaʼajsaʼal le máaxoʼob ku respetarkoʼob Jéeoba» ku yaʼalik Malaquías 3:16.
19. ¿Baʼax unaj k-beetik bejlaʼeʼ, yéetel baʼaxten? (Malaquías 3:16-18).
19 Bejlaʼeʼ u kʼiinil k-eʼesik maʼ táakaʼanoʼon ichil le kʼasaʼan máakoʼoboʼ (xok Malaquías 3:16-18). Teʼ kʼiinoʼobaʼ Jéeobaeʼ táan u muchʼik le máaxoʼob ku yilik bey ‹junpʼéel kaaj especialoʼ›. ¿Máasaʼ jach taak k-antal ichiloʼob?
¡Jach yaan u kiʼimaktal k-óol kéen kaʼa kuxkíintaʼak Daniel teʼ túumben luʼumoʼ, le máaxoʼob k-yaabiltmoʼoboʼ bey xan uláakʼ máakoʼob! (Ilawil párrafo 20)
20. ¿Baʼax promesail beetaʼab tiʼ Daniel, yéetel baʼaxten ka tsʼíiboltik u béeytal?
20 U jaajileʼ teʼ kʼiinoʼobaʼ yaʼab profecíaʼob táan u béeytal, chéen baʼaleʼ jach taʼaytak u béeytal profecíaʼob maas jatsʼutstakoʼob. Jach maʼ kun xáantaleʼ yaan u xuʼulsaʼal tiʼ tuláakal baʼax kʼaas. Le kéen tsʼoʼokkeʼ yaan k-ilik u béeytal le promesa u yaʼalmaj Jéeoba tiʼ Danielaʼ: «Le kéen xuʼuluk u kʼiiniloʼob a páaʼtajeʼ yaan a líikʼil utiaʼal a kʼamik a boʼol» (Dan. 12:13). ¿Máasaʼ táan a tsʼíiboltik u kʼuchul u kʼiinil u kaʼa kuxkíintaʼal Daniel bey xan le máaxoʼob a yaabiltmoʼ? Wa beyoʼ, ilawil u chúukpajal a wóol tak tu xuul. Bey túunoʼ a kʼaabaʼeʼ yaan u tsʼíibtaʼal tu libroil le kuxtaloʼ.
KʼAAY 80 Ilawil bukaʼaj u yutsil Jéeoba
^ Teʼ xookaʼ yaan u jel tsoʼolol le bix k-naʼatik le kaʼansaj kun beetbil ku yaʼalik Daniel 12:2 yéetel 3. Yaan k-ilik baʼax kʼiin kun úuchul yéetel máaxoʼob kun táakpajloʼobiʼ. Tsʼoʼoleʼ yaan k-ilik bix ken u preparartil le máaxoʼob kun kajtaloʼob way Luʼum utiaʼal le u tsʼook pruebaoʼ, le kun antal kéen tsʼoʼokok le Mil Años kun Reinar Cristooʼ.
^ Maʼ xaaneʼ le máaxoʼob kun yáax kaʼa kuxkíintbiloʼoboʼ letiʼe máaxoʼob chúukpaj u yóol u meyajtoʼob Jéeoba teʼ tu tsʼook kʼiinoʼobaʼ. Le kéen tsʼoʼokkeʼ jujunpʼíitileʼ ku bin u kaʼa kuxkíintaʼal le uláakʼ generaciónoʼob maas úuch kíimkoʼoboʼ. Wa ka beetaʼak beyoʼ cada generacióneʼ yaan u béeytal u yilik le máaxoʼob tu kʼaj óoltoʼob úuchjeakiloʼ. Le Bibliaoʼ ku yaʼalikeʼ le máaxoʼob kun binoʼob teʼ kaʼanoʼ «tu tsoolol kun tsʼaabil kuxtal tiʼ cada juntúul». Leloʼ ku yeʼesikeʼ maʼ xaaneʼ le u kaʼa kuxkíintaʼal le máakoʼob way Luʼumeʼ tu tsoolol xan kun beetbil (1 Cor. 14:33; 15:23).
^ Le baʼax ku yaʼalik le revistaaʼ táan u jel tsolik le baʼax ku yaʼalik le capítulo 17 tiʼ le libro Prestemos atención a las profecías de Daniel bey xan le baʼax ku yaʼalik le U Pʼíich Tulumil Kanan ich español 1 tiʼ julio tiʼ 1987, página 21 tak 25.
^ Chéen baʼaleʼ le tʼaan ‹le utsoʼob bey xan le kʼasaʼanoʼob› ku yaʼalik Hechos 24:15 yéetel le tʼaan «le máaxoʼob tu beetoʼob baʼaloʼob maʼalobtak» yéetel «le máaxoʼob tu beetoʼob baʼaloʼob kʼaastak» ku yaʼalik Juan 5:29, táan u tʼaanoʼob tiʼ le baʼaxoʼob tu beetaj le máaxoʼob kun kaʼa kuxkíintbiloʼob antes tiʼ u kíimloʼoboʼ.
