XOOK 39
¿Tiaʼan wa a kʼaabaʼ tu «libroil le kuxtaloʼ»?
«Tu táan letiʼ túuneʼ káaj u tsʼíibtaʼal junpʼéel libro utiaʼal u kʼaʼajsaʼal le máaxoʼob ku respetarkoʼob Jéeobaoʼ» (MAL. 3:16).
KʼAAY 61 Chúukpajak a wóoleʼex, Testigoʼex
TIʼ BAʼAX KUN TʼAAN *
Jéeobaeʼ tsʼoʼok u tsʼíibtik yaʼab kʼaabaʼob tu «libroil le kuxtaloʼ» (Ilawil párrafo 1 yéetel 2)
1. Jeʼex u yaʼalik Malaquías 3:16, ¿baʼax libroil táan u tsʼíibtik Jéeoba, yéetel baʼax yaniʼ?
JÉEOBAEʼ tsʼoʼok u máan u milesil años joʼopʼok u tsʼíibtik u kʼaabaʼ máakoʼob tiʼ junpʼéel libro. Le yáax kʼaabaʼ tu tsʼíibtoʼ u kʼaabaʼ Abel, juntúul máax jach chúukpaj u yóol (Luc. 11:50, 51). * Tak bejlaʼeʼ tsʼoʼok u tsʼíibtik u kʼaabaʼ u millonesil máakoʼobiʼ. Tiʼ le libroaʼ ku yaʼalaʼal «libro utiaʼal u kʼaʼajsaʼal», u «libroil le kuxtaloʼ» yéetel ‹u rolloil le kuxtaloʼ›. Teʼ xookaʼ yaan u meyaj le tʼaan u «libroil le kuxtaloʼ» (xok Malaquías 3:16; Apo. 3:5; 17:8).
2. ¿Máax kʼaabaʼob tsʼíibtaʼan tu libroil le kuxtaloʼ, yéetel baʼax jeʼel u páajtal k-beetik utiaʼal xan ka tsʼíibtaʼak k-kʼaabaʼiʼ?
2 Teʼ libroaʼ tiaʼan u kʼaabaʼ tuláakal le máaxoʼob ku adorarkoʼob Jéeoba yéetel u yaabiltmoʼob u kʼaabaʼoʼ. Letiʼobeʼ táan u páaʼtik u kuxtaloʼob utiaʼal mantatsʼ way Luʼumeʼ wa teʼ kaʼanoʼ. Wa k-ilik k-bisikba maʼalob yéetel Jéeoba yéetel k-tsʼáaik k-fe tiʼ Jesucristoeʼ jeʼel xan u tsʼíibtaʼal k-kʼaabaʼ teʼ libroaʼ (Juan 3:16, 36). ¿Máasaʼ tuláakloʼon k-kʼáat ka tsʼíibtaʼak k-kʼaabaʼiʼ?
3, 4. 1) Wa tiaʼan k-kʼaabaʼ bejlaʼa tu libroil le kuxtaloʼ, ¿u kʼáat wa túun u yaʼaleʼ seguro k-kuxtal utiaʼal minaʼan u xuul? 2) ¿Baʼax ken k-il teʼ xookaʼ bey xan tiʼ le ku segueroʼ?
3 Wa tiaʼan u kʼaabaʼ máak tu libroil le kuxtaloʼ, ¿u kʼáat wa túun u yaʼaleʼ seguro yaan u kuxtal utiaʼal minaʼan u xuul? Tiʼ Éxodo 32:33, Jéeobaeʼ tu yaʼalaj tiʼ Moisés: «Jeʼel máaxak ka kʼebanchajak tin táaneʼ yaan in tupik u kʼaabaʼ tiʼ in libro». Leloʼ ku yeʼesikeʼ jeʼel u tuʼupul le kʼaabaʼob yaan teʼ libroaʼ, tumen tak beoraaʼ Jéeobaeʼ bey yéetel lápiz u tsʼíibtmeʼ (Apo. 3:5). Le oʼolal unaj k-ilik u pʼáatal k-kʼaabaʼ tu libroil le kuxtal tak ken kʼuchuk u kʼiinil u tsʼíibtaʼal bey yéetel tintaeʼ.
4 Maʼ xaaneʼ yaan kʼiineʼ jeʼel k-tuukul tiʼ lelaʼ: ¿Baʼax ku yaʼalik le Biblia yoʼolal le máaxoʼob tsʼíibtaʼan u kʼaabaʼob tu libroil le kuxtaloʼ yéetel le máaxoʼob maʼatechoʼ? Le máaxoʼob tsʼíibtaʼan u kʼaabaʼoboʼ, ¿baʼax kʼiin ken tsʼaʼabaktiʼob le kuxtal minaʼan u xuuloʼ? ¿Baʼax kun úuchul yéetel le máaxoʼob maʼ yanchajtiʼob u oportunidadil u kʼaj óoltikoʼob Jéeoba antes u kíimloʼoboʼ? ¿Tsʼíibtaʼan wa xan u kʼaabaʼob teʼ libroaʼ? Yaan k-ilik u núukil teʼ xookaʼ bey xan tiʼ le ku segueroʼ.
¿MÁAXOʼOB TSʼÍIBTAʼAN U KʼAABAʼOB TEʼ LIBROOʼ?
5, 6. 1) Jeʼex u yaʼalik Filipenses 4:3, ¿máaxoʼob tsʼíibtaʼan u kʼaabaʼob tu libroil le kuxtaloʼ? 2) ¿Baʼax kʼiin ken tsʼíibtaʼak u kʼaabaʼob bey yéetel tintaeʼ?
5 ¿Máax kʼaabaʼob tsʼíibtaʼan tu libroil le kuxtaloʼ? Utiaʼal k-ilkeʼ yaan k-tʼaan tiʼ cinco grupo máakoʼob. Yaan tiʼ letiʼobeʼ tsʼíibtaʼan u kʼaabaʼob tu libroil le kuxtaloʼ yéetel yanoʼobeʼ maʼatech.
6 Le yáax grupooʼ letiʼe máaxoʼob yéeyaʼanoʼob utiaʼal u gobernaroʼob yéetel Cristo teʼ kaʼanoʼ. Letiʼobeʼ ¿tiaʼan wa u kʼaabaʼob tu libroil le kuxtaloʼ? Tiaʼaniʼ. Úuchjeakileʼ apóstol Pabloeʼ tu yaʼalaj tiʼ le sukuʼunoʼob yanoʼob Filiposoʼ u kʼaabaʼ le máaxoʼob yéeyaʼanoʼob utiaʼal u gobernaroʼob yéetel Jesúsoʼ tiaʼan tu libroil le kuxtaloʼ (xok Filipenses 4:3). Chéen baʼaleʼ utiaʼal maʼ u tuʼupul u kʼaabaʼob teʼ librooʼ unaj u chúukpajal u yóol u meyajtoʼob Dios. Le kéen tsʼok sellartaʼakoʼob antes tiʼ u kíimloʼob wa antes tiʼ u káajal le nojoch muʼyajiloʼ u kʼaabaʼobeʼ yaan u tsʼíibtaʼal bey yéetel tinta tiʼ u libroil le kuxtaloʼ (Apo. 7:3).
7. ¿Bix u yáantkoʼon Apocalipsis 7:16, 17 k-naʼat baʼax kʼiin ken tsʼíibtaʼak u kʼaabaʼ le yaʼabkach máakoʼob bey yéetel tinta tu libroil le kuxtaloʼ?
7 Le u kaʼapʼéel grupooʼ letiʼe yaʼabkach máakoʼob ku keʼeteloʼob yéetel tamanoʼ. ¿Teʼ kʼiinoʼobaʼ tiaʼan wa u kʼaabaʼob tu libroil le kuxtaloʼ? Tiaʼaniʼ. ¿Tiʼ wa kun pʼáatal u kʼaabaʼ le máaxoʼob ken u salvartubaʼob teʼ Armagedónoʼ? Tiʼ kun pʼáatliʼ (Apo. 7:14). Jesúseʼ tu yaʼaleʼ le máakoʼob beyoʼob tamanoʼ «yaan u tsʼaʼabaltiʼob kuxtal minaʼan u xuul» (Mat. 25:46). Chéen baʼaleʼ u jaajileʼ le máaxoʼob ken u salvartubaʼob teʼ Armagedónoʼ maʼ kun jáan tsʼaabiltiʼob le kuxtal minaʼan u xuuloʼ. U kʼaabaʼobeʼ bey láayliʼ yéetel lápiz tsʼíibtaʼan tu libroil le kuxtaloʼ. Ichil le Mil Años táan u gobernar Jesúsoʼ «letiʼ kun kanáantkoʼob yéetel letiʼ kun nuʼuktikoʼob tak tu sayabiloʼob u jaʼil le kuxtaloʼ». Le máaxoʼob ken u chaʼob u nuʼuktaʼaloʼob yéetel kun chúukpajal u yóol u meyajtoʼob Jéeobaoʼ yaan u tsʼíibtaʼal u kʼaabaʼob bey yéetel tinta tu libroil le kuxtaloʼ (xok Apocalipsis 7:16, 17).
8. ¿Máaxoʼob minaʼan u kʼaabaʼob tu libroil le kuxtaloʼ, yéetel baʼax kun úuchultiʼob?
8 Le u yóoxpʼéel grupooʼ letiʼe máaxoʼob beyoʼob chivoʼob kun xuʼulsbiloʼob Armagedónoʼ. U kʼaabaʼobeʼ minaʼan tu libroil le kuxtaloʼ. Jesúseʼ tu yaʼaleʼ «yaan u xuʼulsaʼaltiʼob utiaʼal mantatsʼ» (Mat. 25:46). Pabloeʼ tu yaʼalaj xaneʼ «yaan u tsʼaʼabaltiʼob baʼax ku náajmatikoʼob, yaan u xuʼulsaʼaltiʼob utiaʼal mantatsʼ» (2 Tes. 1:9; 2 Ped. 2:9). Bey xan kun úuchul tiʼ tuláakal le máaxoʼob taaliʼtiʼob úuchik u kʼebantaloʼob tu contra le espíritu santooʼ. Le máakoʼob tsʼoʼok k-aʼalikaʼ maʼ kun tsʼaabiltiʼob kuxtal minaʼan u xuul, baʼaxeʼ yaan u xuʼulsaʼaltiʼob utiaʼal mantatsʼ (Mat. 12:32; Mar. 3:28, 29; Heb. 6:4-6). Beoraaʼ yaan k-tʼaan tiʼ kaʼapʼéel grupo máakoʼob yaan u kaʼa kuxtaloʼob way Luʼumeʼ.
LE MÁAXOʼOB KUN KAʼA KUXKÍINTBILOʼOBOʼ
9. ¿Máakalmáak le kaʼapʼéel grupo kun kaʼa kuxkíintbiloʼob way Luʼumeʼ, yéetel baʼax u jelaʼaniloʼob? (Hechos 24:15).
9 Le Bibliaoʼ ku yaʼalikeʼ yaan u kaʼa kuxkíintaʼal «le utsoʼoboʼ bey xan le kʼasaʼanoʼoboʼ». Tiʼ le kaʼapʼéel grupo máakoʼobaʼ yaan u tsʼaʼabaltiʼob u oportunidadil u kuxtaloʼob utiaʼal mantatsʼ way Luʼumeʼ (xok Hechos 24:15). «Le utsoʼoboʼ» letiʼe máaxoʼob chúukpaj u yóol u meyajtoʼob Jéeoba antes u kíimloʼoboʼ. «Le kʼasaʼanoʼoboʼ» letiʼe máaxoʼob maʼ táan u meyajtikoʼob Jéeoba ka kíimoʼoboʼ, u maas yaʼabil tiʼ letiʼobeʼ tu beetoʼob baʼaloʼob jach kʼaastak tu táan Dios. Le kaʼapʼéel grupo máakoʼobaʼ yaan u kaʼa kuxkíintaʼaloʼob. ¿U kʼáat wa túun u yaʼaleʼ tiaʼan u kʼaabaʼob tu libroil le kuxtaloʼ? Utiaʼal k-naʼatikeʼ yaan k-tʼaan tiʼ cada junpʼéel tiʼ le grupoʼobaʼ.
10. ¿Baʼaxten yaan u kaʼa kuxkíintaʼal «le utsoʼoboʼ», yéetel yaan tiʼ letiʼobeʼ baʼax ken u beetoʼob? (Teʼ revistaaʼ jeʼel u páajtal a wilik xan le jaats «Kʼáatchiʼob ku beetaʼal» ku tʼaan tiʼ le máaxoʼob kun kaʼa kuxkíintbiloʼob way Luʼumeʼ).
10 Le u kanpʼéel grupooʼ letiʼe «utsoʼoboʼ». Antes u kíimloʼobeʼ tiaʼan u kʼaabaʼob tu libroil le kuxtaloʼ. Le ka kíimoʼobeʼ, ¿tuʼup wa u kʼaabaʼob teʼ librooʼ? Maʼatech, tumen utiaʼal Jéeobaeʼ láayliʼ kuxaʼanoʼobeʼ. Le Bibliaoʼ ku yaʼalikeʼ «utiaʼal letiʼeʼ le máakoʼobaʼ kuxaʼanoʼob, tumen letiʼeʼ maʼ u Dios kimenoʼobiʼ, baʼaxeʼ u Dios máaxoʼob kuxaʼanoʼob» (Luc. 20:38). Leloʼ ku yeʼesikeʼ le kéen kaʼa kuxkíintaʼak le utsul máakoʼoboʼ tiaʼan u kʼaabaʼob tu libroil le kuxtaloʼ, chéen baʼaleʼ tak teʼ kʼiinoʼob jeʼeloʼ bey yéetel lápiz tsʼíibtaʼaneʼ (Luc. 14:14). Yaan tiʼ letiʼobeʼ yaan u beetik «u príncipeiloʼob tiʼ tuláakal yóokʼol kaab» (Sal. 45:16).
11. ¿Baʼax kun kʼaʼabéettal u kanik «le kʼasaʼanoʼob» utiaʼal ka tsʼíibtaʼak u kʼaabaʼob tu libroil le kuxtaloʼ?
11 Le u cinco grupooʼ letiʼe «kʼasaʼanoʼoboʼ». Maʼ xaaneʼ tumen maʼ u yojloʼob baʼax uts tu tʼaan Jéeobaeʼ maʼ tu bisoʼob junpʼéel toj kuxtaliʼ, le oʼolal minaʼan u kʼaabaʼob tu libroil le kuxtaloʼ. Chéen baʼaleʼ le kéen kaʼa kuxkíintaʼakoʼobeʼ yaan u tsʼaʼabaltiʼob u oportunidadil u náajaltikoʼob u tsʼíibtaʼal u kʼaabaʼob teʼ librooʼ. Le kʼasaʼan máakoʼobaʼ yaan u kʼaʼabéettal u yáantaʼaloʼob, tumen yaan tiʼ letiʼobeʼ tu beetoʼob baʼaloʼob jach kʼaastak. Yaan u kʼaʼabéettal u kankoʼob kuxtal jeʼex uts tu tʼaan Jéeobaeʼ. Utiaʼal u yáantaʼaloʼobeʼ u Reino Dioseʼ yaan u nuʼuktik le kaʼansaj kun tsʼaabil tiʼ tuláakal yóokʼol kʼaaboʼ.
12. 1) ¿Máaxoʼob kun kaʼansik le kʼasaʼanoʼoboʼ? 2) ¿Baʼax kun úuchul tiʼ le máaxoʼob maʼ ken u chaʼa u kaʼansaʼaloʼoboʼ?
12 ¿Máaxoʼob kun kaʼansik le kʼasaʼanoʼoboʼ? Yaan u kaʼansaʼaloʼob tumen le yaʼabkach máakoʼoboʼ bey xan tumen le utsoʼob kun kaʼa kuxkíintbiloʼoboʼ. ¿Baʼax túun kʼaʼabéet u beetik le kʼasaʼanoʼob utiaʼal ka tsʼíibtaʼak u kʼaabaʼob tu libroil le kuxtaloʼ? Yaan u kʼaʼabéettal u biskubaʼob yéetel Jéeoba bey xan u kʼubik u kuxtaloʼob tiʼ letiʼ. Jesús yéetel le yéeyaʼanoʼoboʼ yaan u jach ilkoʼob baʼax ken u beet le kʼasaʼanoʼoboʼ, le kéen tsʼoʼokkeʼ yaan u chʼaʼtuklikoʼob baʼax ken u beetoʼob tu yéeteloʼob (Apo. 20:4). Wa yaan máax maʼ ken u chaʼa u kaʼansaʼaleʼ yaan u xuʼulsaʼaltiʼ kex tsʼoʼok 100 años tiʼ (Isa. 65:20). Jéeoba yéetel Jesúseʼ jeʼel u páajtal u yilkoʼob baʼax yaan tu puksiʼikʼal máakeʼ, le oʼolal yaan u kanáantkoʼob maʼ u yantal mix máak ka u beet loob teʼ túumben yóokʼol kʼaaboʼ (Isa. 11:9; 60:18; 65:25; Juan 2:25).
YANEʼ YAAN U LÍIKʼIL UTIAʼAL KA KUXLAK, YÉETEL YANEʼ UTIAʼAL KA JUZGARTAʼAK
13, 14. 1) ¿Bix k-naʼatmil kaʼach le baʼaxoʼob tu yaʼalaj Jesús teʼ Juan 5:29? 2) ¿Baʼax unaj k-chʼaʼik en cuenta le kéen k-xok le tekstoaʼ?
13 Jesúseʼ tʼaanaj xan tiʼ le máaxoʼob kun kaʼa kuxkíintbiloʼob way Luʼumoʼ. Letiʼeʼ tu yaʼalaj: «Yaan u kʼuchul u kʼiinileʼ tuláakal le máaxoʼob yanoʼob ichil le muknaloʼoboʼ yaan u yuʼubikoʼob u tʼaan yéetel yaan u jóokʼloʼob. Le máaxoʼob tu beetoʼob baʼaloʼob maʼalobtakeʼ yaan u líikʼloʼob utiaʼal ka kuxlakoʼob, chéen baʼaleʼ le máaxoʼob tu beetoʼob baʼaloʼob kʼaastakeʼ yaan u líikʼloʼob utiaʼal ka juzgartaʼakoʼob» (Juan 5:28, 29). ¿Baʼax tu yóotaj u yaʼal Jesús yéetel leloʼ?
14 Kaʼacheʼ k-tuklikeʼ Jesúseʼ táan u tʼaan tiʼ le baʼaloʼob ken u beet le máakoʼob le kéen tsʼoʼokok u kaʼa kuxtaloʼoboʼ. Yaneʼ yaan u beetik baʼaloʼob maʼalobtak yéetel yaneʼ baʼaloʼob kʼaastak. Chéen baʼaleʼ unaj k-chʼaʼik en cuentaeʼ Jesúseʼ maʼ tu yaʼaleʼ wa le máakoʼob kun kaʼa kuxtaloʼoboʼ yaan u beetkoʼob baʼaloʼob maʼalobtak wa yaan u beetkoʼob baʼaloʼob kʼaastak. Baʼaxeʼ tu yaʼalaj: «Le máaxoʼob tu beetoʼob baʼaloʼob maʼalobtak» yéetel «le máaxoʼob tu beetoʼob baʼaloʼob kʼaastak». Leloʼ ku yeʼesikeʼ Jesúseʼ táan kaʼach u tʼaan tiʼ baʼaloʼob tu beetoʼob antes tiʼ u kíimloʼoboʼ. ¿Máasaʼ maas maʼalob u naʼataʼal beyoʼ? Tumen jeʼex k-ojliloʼ teʼ túumben luʼumoʼ maʼ kun chaʼabil tiʼ mix máak ka u beet baʼaloʼob kʼaastak. Jeʼeloʼ ¿baʼax túun tu yóotaj u yaʼal Jesús le ka tu yaʼalaj ‹yaan máakoʼob kun líikʼloʼob utiaʼal ka kuxlakoʼob› yéetel ‹yaan máakoʼob kun líikʼloʼob utiaʼal ka juzgartaʼakoʼob›?
15. ¿Máaxoʼob «yaan u líikʼloʼob utiaʼal ka kuxlakoʼob», yéetel baʼaxten?
15 Le utsoʼob wa le máaxoʼob tu beetoʼob baʼaloʼob maʼalobtak antes tiʼ u kíimloʼoboʼ «yaan u líikʼloʼob utiaʼal ka kuxlakoʼob» tumen u kʼaabaʼobeʼ tsʼíibtaʼan tu libroil le kuxtaloʼ. Leloʼ ku yeʼesikeʼ «le máaxoʼob tu beetoʼob baʼaloʼob maʼalobtak» kun kaʼa líikʼloʼob ku yaʼalik Juan 5:29, láayliʼ letiʼe «utsoʼob» ku chʼaʼchiʼitaʼaloʼob teʼ Hechos 24:15. Le bix u naʼataʼal beoraaʼ ku kʼaxkuba yéetel le baʼax ku yaʼalik Romanos 6:7: «Le máax tsʼoʼok u kíimiloʼ tsʼoʼok xan u jáalkʼabtaʼal tiʼ u kʼeban». Le kéen kíimik le utsoʼoboʼ ku borrartaʼal u kʼebanoʼob, chéen baʼaleʼ maʼ tu borrartaʼal le baʼaloʼob maʼalobtak u beetmoʼoboʼ (Heb. 6:10). Pero le kéen kaʼa kuxlakoʼobeʼ kʼaʼabéet u seguer u chúukpajal u yóoloʼob, beyoʼ maʼ kun borrarbil u kʼaabaʼob tu libroil le kuxtaloʼ.
16. ¿Baʼax u kʼáat u yaʼal le tʼaan ‹yaan u líikʼloʼob utiaʼal ka juzgartaʼakoʼoboʼ›?
16 ¿Baʼax kun úuchul yéetel le máaxoʼob tu beetoʼob baʼaloʼob kʼaastak antes tiʼ u kíimloʼoboʼ? Le kéen kíimkoʼobeʼ ku borrartaʼal u kʼebanoʼob, chéen baʼaleʼ tumen maʼ tu beetoʼob baʼax maʼalobeʼ mix baʼal xan maʼalob tsʼíibtaʼan tu yoʼolaloʼob. U kʼaabaʼobeʼ maʼ tsʼíibtaʼan tu libroil le kuxtaloʼ. Leloʼ ku yeʼesikeʼ «le máaxoʼob tu beetoʼob baʼaloʼob kʼaastak» kun kaʼa líikʼloʼoboʼ láayliʼ letiʼe «kʼasaʼanoʼob» kun kaʼa kuxtaloʼob ku yaʼalik Hechos 24:15. Letiʼobeʼ «yaan u líikʼloʼob utiaʼal ka juzgartaʼakoʼob». * Leloʼ u kʼáat u yaʼaleʼ yaan u tsʼaʼabaloʼob a pruebail yéetel yaan u yilaʼal baʼax ken u beetoʼob (Luc. 22:30). U jaajileʼ yaan u máan tiempo utiaʼal u yilaʼal máaxoʼob ku náajaltikoʼob u tsʼíibtaʼal u kʼaabaʼob tu libroil le kuxtaloʼ. Le kʼasaʼanoʼob kun kaʼa kuxkíintbiloʼoboʼ yaan u kʼaʼabéettal u káajal u beetkoʼob baʼaloʼob maʼalobtak yéetel u kʼubik u kuxtaloʼob tiʼ Jéeoba.
17, 18. ¿Baʼax kun kʼaʼabéettal u beetik le máaxoʼob kun kaʼa kuxkíintbiloʼob way Luʼumoʼ, yéetel jeʼex u yaʼalik Apocalipsis 20:12, 13 baʼax kun chʼaʼabil en cuenta utiaʼal u juzgartaʼaloʼob?
17 Le utsoʼob yéetel le kʼasaʼanoʼob kun kaʼa kuxkíintbiloʼoboʼ yaan u kʼaʼabéettal u tsʼoʼokbeskoʼob le leyoʼob yaan teʼ túumben rolloʼob kun jeʼekʼabtbil tu yáamil le 1,000 añosoʼ. Apóstol Juaneʼ tu yaʼalaj: «Le máaxoʼob kimenoʼob kaʼachoʼ, le nuuktakoʼoboʼ bey xan le mejentakoʼoboʼ, tin wilaj waʼalakbaloʼob tu táan le tronooʼ, ka chóolaʼab le rolloʼoboʼ. Chéen baʼaleʼ chóolaʼab uláakʼ rollo, u rolloil le kuxtaloʼ. Le kimenoʼob túunoʼ juzgartaʼaboʼob tu yoʼolal le baʼax tu beetoʼoboʼ, jeʼex tsʼíibtaʼanil teʼ rolloʼoboʼ» (Apo. 20:12, 13).
18 ¿Baʼax kun chʼaʼabil en cuenta utiaʼal u juzgartaʼal le máaxoʼob kun kaʼa kuxtaloʼoboʼ? ¿Letiʼe baʼaxoʼob tu beetoʼob antes tiʼ u kíimloʼoboʼ? Maʼatech. Kʼaʼajaktoʼoneʼ le ka kíimoʼobeʼ borrartaʼab u kʼebanoʼob. Le oʼolal teʼelaʼ maʼ táan u tʼaan tiʼ ‹le baʼaxoʼob tu beetoʼob› antes tiʼ u kíimloʼoboʼ. Baʼaxeʼ chíikaʼan táan u tʼaan tiʼ le baʼaxoʼob ken u beetoʼob le kéen tsʼoʼokok u kaʼansaʼaloʼob teʼ túumben luʼumoʼ. Tak máakoʼob jeʼex Noé, Samuel, David yéetel Danieleʼ yaan u kʼaʼabéettal u kaanbaloʼob yoʼolal Jesucristo yéetel u tsʼáaik u fejoʼob tiʼ le u kuxtal tu kʼuboʼ. ¡Jeʼel u páajtal k-aʼalikeʼ le kʼasaʼanoʼob kun kaʼa kuxkíintbiloʼoboʼ maas kʼaʼabéet u beetkoʼob leloʼ!
19. ¿Baʼax kun úuchul tiʼ le máaxoʼob maʼ ken u aprovechartoʼob le oportunidad kun tsʼaabiltiʼoboʼ?
19 ¿Baʼax kun úuchul tiʼ le máaxoʼob maʼ ken u aprovechartoʼob le oportunidad kun tsʼaabiltiʼoboʼ? Apocalipsis 20:15, ku yaʼalik: «Le máaxoʼob maʼ tsʼíibtaʼan u kʼaabaʼob tu libroil le kuxtaloʼ píikchʼintaʼaboʼob ichil le kʼáaʼnáab de kʼáakʼoʼ». Leloʼ ku yeʼesikeʼ yaan u xuʼulsaʼaloʼob utiaʼal mantatsʼ. ¿Máasaʼ kʼaʼabéet k-beetik tuláakal le ku páajtal utiaʼal u tsʼíibtaʼal k-kʼaabaʼ tu libroil le kuxtaloʼ, yéetel k-kanáantik utiaʼal maʼ u tuʼupul?
Juntúul sukuʼun táan u táakpajal teʼ kaʼansaj kun beetbil ichil le Mil Añosoʼ (Ilawil párrafo 20)
20. ¿Baʼax jatsʼuts meyajil kun beetbil ichil le Mil Años kun Reinar Cristooʼ? (Ilawil le dibujo yaan tu yáax páginail le revistaaʼ).
20 Jach jatsʼuts tuláakal baʼax kun úuchul ichil le Mil Años kun Reinar Cristooʼ. Yaan u kaʼansaʼal le máakoʼob tiʼ tuláakal yóokʼol kaaboʼ. Yaan xan u yilaʼal baʼax ken u beet le utsoʼob yéetel le kʼasaʼanoʼoboʼ (Isa. 26:9; Hech. 17:31). ¿Bix kun kaʼansbil le máakoʼob tiʼ tuláakal yóokʼol kaaboʼ? Lelaʼ yaan k-ilik teʼ tuláakʼ xookoʼ.
KʼAAY 147 Le kuxtal minaʼan u xuul u yaʼalmaj Diosoʼ
^ Teʼ xookaʼ yaan u maas tsoʼolol le baʼax tu yaʼalaj Jesús tiʼ Juan 5:28 yéetel 29. Letiʼeʼ tu yaʼaleʼ yaan máaxoʼobeʼ «yaan u líikʼloʼob utiaʼal ka kuxlakoʼob», yéetel uláakʼoʼobeʼ «yaan u líikʼloʼob utiaʼal ka juzgartaʼakoʼob». Yaan u tsoʼolol le kaʼapʼéel baʼax tu yaʼalaj Jesúsoʼ bey xan máaxoʼob taʼakaʼanoʼob ichil.
^ Le libroaʼ káaj u tsʼíibtaʼal «desde tu káajbal yóokʼol kaab». Le yóokʼol kaab ku yaʼalaʼaloʼ letiʼe máaxoʼob jeʼel u páajtal u salvartaʼaloʼoboʼ (Mat. 25:34; Apo. 17:8). Le oʼolal jeʼel u páajtal k-aʼalikeʼ le yáax kʼaabaʼ tsʼíibtaʼab tu libroil le kuxtaloʼ u kʼaabaʼ Abel.
^ Kaʼacheʼ k-tuklikeʼ le kéen u yaʼal le teksto «utiaʼal ka juzgartaʼakoʼob» táan u tʼaan tiʼ junpʼéel juicio kun beetbil utiaʼal u condenartaʼaloʼob. U jaajileʼ le tʼaan «juzgaroʼ» jeʼel u páajtal xan u naʼataʼal beyoʼ. Chíikaʼan u yilaʼaleʼ teʼ tekstoaʼ meyajnaj tiʼ Jesús utiaʼal u tʼaan tiʼ u yilaʼal baʼax ken u beetoʼob wa utiaʼal u tsʼaʼabaloʼob a pruebail. Junpʼéel diccionario ku tsolik u tʼaaniloʼob le Bibliaoʼ ku yaʼalikeʼ le tʼaanaʼ u kʼáat u yaʼal «u yilaʼal baʼax ku beetik máak»
