Koʼoneʼex ilik baʼax ku yaʼalik le Bibliaoʼ.

Hechos 24:15, ku yaʼalikeʼ yaan «u kaʼa kuxkíintaʼal le utsoʼoboʼ bey xan le kʼasaʼanoʼoboʼ». Le utsoʼoboʼ letiʼe máaxoʼob tu beetoʼob baʼax uts tu tʼaan Dios antes tiʼ u kíimloʼoboʼ, le oʼolal u kʼaabaʼobeʼ tsʼíibtaʼan tu libroil le kuxtaloʼ (Mal. 3:16). Ichil le kʼasaʼanoʼoboʼ tiaʼan le máaxoʼob maʼ jach yanchajtiʼob u oportunidadil u kʼaj óoltikoʼob Jéeoba antes tiʼ u kíimloʼoboʼ, le oʼolal u kʼaabaʼobeʼ maʼ tsʼíibtaʼan tu libroil le kuxtaloʼ.

Juan 5:28, 29, ku tʼaan xan tiʼ le kaʼajaats máakoʼob ku yaʼalik Hechos 24:15. Jesúseʼ tu yaʼaleʼ «le máaxoʼob tu beetoʼob baʼaloʼob maʼalobtakeʼ yaan u líikʼloʼob utiaʼal ka kuxlakoʼob, chéen baʼaleʼ le máaxoʼob tu beetoʼob baʼaloʼob kʼaastakeʼ yaan u líikʼloʼob utiaʼal ka juzgartaʼakoʼob». Le utsoʼoboʼ tu beetoʼob baʼaloʼob maʼalobtak antes tiʼ u kíimloʼob. Letiʼobeʼ yaan u líikʼloʼob utiaʼal ka kuxlakoʼob tumen u kʼaabaʼobeʼ tiaʼan tu libroil le kuxtaloʼ. Le kʼasaʼanoʼoboʼ tu beetoʼob baʼaloʼob kʼaastak antes tiʼ u kíimloʼob. Letiʼobeʼ yaan u líikʼloʼob utiaʼal ka juzgartaʼakoʼob, u kʼaabaʼobeʼ minaʼan tu libroil le kuxtaloʼ. Yaan u yantal junpʼéel tiempo utiaʼal ka juzgartaʼakoʼob wa utiaʼal u tsʼaʼabaloʼob a pruebail. Teʼ tiempo jeʼeloʼ yaan u yantaltiʼob u oportunidadil u kʼaj óoltikoʼob Jéeoba bey xan u tsʼíibtaʼal u kʼaabaʼob tu libroil le kuxtaloʼ.

Apocalipsis 20:12, 13, ku yaʼalikeʼ tuláakal le máaxoʼob kun kaʼa kuxkíintbiloʼoboʼ unaj u beetkoʼob le baʼax ‹tsʼíibtaʼan teʼ rolloʼoboʼ›, lelaʼ letiʼe túumben leyoʼob kun antal teʼ túumben luʼumoʼ. Le máaxoʼob maʼ ken u tsʼoʼokbesoʼob le leyoʼobaʼ yaan u xuʼulsaʼaltiʼob (Isa. 65:20).

Daniel 12:2, ku yaʼalikeʼ jujuntúul tiʼ le máaxoʼob kimenoʼoboʼ yaan u yaajloʼob «utiaʼal u kuxtaloʼob utiaʼal minaʼan u xuul, yéetel uláakʼoʼobeʼ utiaʼal u pʼaʼatloʼob ich suʼtsilil yéetel utiaʼal u pʼektaʼaloʼob mantatsʼ». Le tekstoaʼ táan u tʼaan tiʼ baʼax kun úuchul tiʼ le máakoʼob tu tsʼoʼokbal le Mil Añosoʼ: yanoʼobeʼ yaan «u kuxtaloʼob utiaʼal minaʼan u xuul» yéetel uláakʼoʼobeʼ yaan «u pʼektaʼaloʼob mantatsʼ», lelaʼ u kʼáat u yaʼaleʼ yaan u xuʼulsaʼaltiʼob (Apo. 20:15; 21:3, 4).

Le kaʼajaats máakoʼob tsʼoʼok k-aʼalikoʼ jeʼel u páajtal u keʼeteloʼob yéetel le máaxoʼob taak u kajtaloʼob tiʼ yaanal luʼumiloʼ. Le utsoʼoboʼ beyoʼob jeʼex le máaxoʼob ku tsʼaʼabaltiʼob junpʼéel visa utiaʼal u meyajoʼob wa utiaʼal u kajtaloʼob teʼ luʼumiloʼ, le oʼolal yaantiʼob libertad u beetkoʼob jujunpʼéel baʼaloʼob jeʼex u kajnáaliloʼob le luʼumiloʼ. Le kʼasaʼanoʼoboʼ beyoʼob jeʼex le máaxoʼob ku tsʼaʼabaltiʼob junpʼéel visa temporal wa de turistaoʼ. Letiʼobeʼ utiaʼal u seguer u pʼáatloʼob kajtal teʼ luʼumiloʼ kʼaʼabéet u chupikoʼob jujunpʼéel requisitos. Bey túun xanoʼ le kʼasaʼan máakoʼob kun kaʼa kuxkíintbiloʼoboʼ utiaʼal u seguer u pʼáatloʼob kajtal teʼ Paraísooʼ kʼaʼabéet u beetkoʼob baʼaxoʼob ku yaʼalik u leyoʼob Jéeoba yéetel u yeʼeskoʼob tsʼoʼok u suutoʼob utsul máakoʼob. Chéen baʼaleʼ maʼ u tuʼubultoʼoneʼ kex jeʼel baʼaxak visail ka tsʼaʼabak tiʼ le máaxoʼob ku binoʼob táanxel luʼumiloʼ ken máanak kʼiineʼ yanoʼobeʼ ku chaʼabal u pʼáatloʼob kajtaliʼ, pero uláakʼoʼobeʼ ku jóoʼsaʼaloʼob. Ku depender tiʼ baʼaxoʼob tu beetoʼob teʼ luʼumiloʼ. Bey túun xanoʼ utiaʼal u yilaʼal baʼax kun beetbil yéetel tuláakal le máaxoʼob kun kaʼa kuxkíintbiloʼoboʼ yaan u chʼaʼabal en cuenta bix kun chúukpajal u yóol u beetoʼob baʼax maʼalob teʼ túumben luʼumoʼ.

U jaajileʼ Jéeobaeʼ ku chʼaʼik óotsilil tiʼ máak, chéen baʼaleʼ letiʼ xaneʼ juntúul Dios justo yéetel ku beetik baʼax toj (Deu. 32:4; Sal. 33:5). Le kéen u kaʼa kuxkíint le utsoʼob yéetel le kʼasaʼanoʼoboʼ ku yeʼesik u yaabilaj, chéen baʼaleʼ ku páaʼtik xaneʼ tuláakloʼob ka u respetartoʼob le leyoʼob u tsʼaamaj yoʼolal baʼax maʼalob yéetel baʼax maʼ maʼaloboʼ. Teʼ túumben luʼumoʼ chéen yaan u pʼáatal kuxtal le máaxoʼob kun yaabiltik Dios yéetel ken u yuʼuboʼob u tʼaanoʼ.