1-3. 1) ¿Baʼaxten jach especial le baʼaxoʼob úuch teʼ Pentecostés tiʼ u añoil 33? 2) ¿Bix béeychajik le baʼaxoʼob ku yaʼalik le profecíaʼoboʼ? (Ilawil le dibujo yaan tu káajbal le xookaʼ.)

LÁAS nueve de la mañana tu kaajil Jerusalén. Le kʼiinaʼ jach especial, tsʼoʼoleʼ sábado. Le máakoʼoboʼ táan u kʼiinbeskoʼob le Pentecostés tiʼ u añoil 33, le kʼiinbesajilaʼ jach sagrado. De tempranoeʼ u nojchil le sacerdoteʼoboʼ ku kʼubik teʼ templo le siibaloʼob suuk u beetaʼaloʼ. Tsʼoʼoleʼ ku kʼubik kaʼapʼéel waaj yaan u levadurail, le waajoʼobaʼ beetaʼan yéetel le u yáax ich le trigo ku cosechartaʼaloʼ. Le sacerdoteoʼ utiaʼal u kʼubik tiʼ Jéeobaeʼ ku yúuntik le waajoʼoboʼ (Lev. 23:15-20).

² Tsʼoʼok u máan u cientosil años káajak u kʼubik cada año le kaʼapʼéel waajoʼob le u maas nojchil le sacerdoteʼoboʼ. Le baʼax ku beetkaʼ yaan kaʼach u chíikbesik junpʼéel baʼal jach kʼaʼanaʼan kun úuchul teʼ Pentecostés tiʼ u añoil 33. Le baʼax ku chíikbesikoʼ béeychaj le táan u orar ciento veinte u disipuloʼob Jesús tiʼ junpʼéel naj yaan tu kaajil Jerusalenoʼ (Bax. 1:13-15). Ochocientos años táanil tiʼ lelaʼ le profeta Joeloʼ u yaʼalmiliʼ le baʼax úuchaʼ (Joel 2:28-32; Bax. 2:16-21). ¿Baʼax úuchi? ¿Baʼaxten jach kʼaʼanaʼan?

 ³ Xok Baʼaxoʼob 2:2 tak 4. Teʼ Pentecostés tiʼ u añoil 33, Dioseʼ tu tsʼáaj u kiliʼich muukʼ tiʼ le sukuʼunoʼob utiaʼal u yéeyikoʼoboʼ (Bax. 1:8). Le disipuloʼob túunoʼ káaj u tsikbaltikoʼob le jatsʼuts baʼaloʼob u yilmoʼob yéetel u yuʼubmoʼoboʼ, ka túun káaj u muchʼkuba yaʼab máakoʼob tu yiknaloʼob. Le apóstol Pedrooʼ tu tsolajtiʼob le baʼax úuchoʼ yéetel baʼaxten jach kʼaʼanaʼan. Letiʼeʼ tu yaʼalaj tiʼ le máakoʼoboʼ: «Kʼex a tuukuleʼex yéetel okjaʼanak cada juntúul tiʼ teʼex tu kʼaabaʼ Jesucristo utiaʼal ka perdonartaʼak a kʼebaneʼex, beyoʼ yaan a kʼamkeʼex le kiliʼich muukʼ ku síik Diosoʼ». Teʼ kʼiin jeʼeloʼ 3,000 máakoʼob okjaʼanajoʼob yéetel tu kʼamoʼob kiliʼich muukʼ (Bax. 2:37, 38, 41).

4. 1) ¿Baʼaxten jach kʼaʼanaʼan k-tiaʼal le baʼax úuch teʼ Pentecostés tiʼ u añoil 33? 2) ¿Baʼax uláakʼ úuch tu fechail le Pentecostesoʼ? (Ilawil le tsolajil yaan tu tsʼoʼokbal le xookaʼ.)

⁴ ¿Baʼax ku chíikbesik u maas nojchil le sacerdoteʼoboʼ? ¿Baʼax ku chíikbesik le kaʼapʼéel waaj ku kʼubik tu kʼiinil le Pentecostesoʼ? U maas nojchil le sacerdoteʼoboʼ ku chíikbesik Jesús. Le waajoʼoboʼ ku chíikbesik u disipuloʼob Jesús yéeyaʼaboʼ. Le disipuloʼob yéeyaʼaboʼoboʼ j-kʼeban máakoʼob. Le Bibliaoʼ ku yaʼalikeʼ letiʼobeʼ ‹letiʼe yáax máakoʼob yéeyaʼanoʼoboʼ› (Sant. 1:18). Dioseʼ tu kʼamoʼob bey u paalaloʼobeʼ yéetel tu yéeyoʼob utiaʼal ka gobernarnakoʼob teʼ kaʼan yéetel Jesusoʼ (1 Ped. 2:9). Yéetel le Reinoaʼ Jéeobaeʼ yaan u bendecirtik tuláakal le máaxoʼob beetik baʼax ku yaʼalikoʼ. Kex wa yaan k-bin kaʼan gobernar yéetel Jesús bey xan wa yaan k-pʼáatal kuxtal teʼ Paraíso way Luʼumoʼ, le baʼax úuch teʼ Pentecostés tiʼ u añoil 33, yaʼab baʼax yaan u yil yéetel k-kuxtal. ^[1]

5. ¿Baʼaxten k-aʼalik maʼ chéen junpʼéeliliʼ bix u yéeyaʼal le sukuʼunoʼoboʼ?

⁵ Le disipuloʼob muchʼukbaloʼob teʼ najoʼ mix bikʼin ken u tuʼubsoʼob le kʼiin ka yéeyaʼaboʼoboʼ. Tu yóokʼol u pool cada juntúul tiʼ letiʼobeʼ chíikpaj junpʼéel chan kʼáakʼiʼ. Jéeoba túuneʼ tu tsʼáaj u páajtalil u tʼaanoʼob ich jejeláas idiomaʼob. Teʼ kʼiinoʼ tu tsʼáajoʼob cuentaeʼ tsʼoʼok u yéeyaʼaloʼob yéetel kiliʼich muukʼ (Bax. 2:6-12). Jeʼex k-ilkoʼ le baʼaloʼobaʼ tu yeʼesaj tiʼ le yáax sukuʼunoʼob tsʼoʼok u yéeyaʼaloʼoboʼ, chéen baʼaleʼ maʼ bey u yúuchul tiʼ tuláakal le máaxoʼob ku yéeyaʼaloʼoboʼ. Por ejemploeʼ láayliʼ teʼ kʼiin jeʼeloʼ yéeyaʼab uláakʼ sukuʼunoʼob utiaʼal u binoʼob kaʼan, chéen baʼaleʼ maʼ chíikpaj kʼáakʼ tu pooloʼobiʼ. Letiʼobeʼ yéeyaʼaboʼob chéen pʼelak úuchik u tsʼoʼokol u yokjaʼob (Bax. 2:38). Chéen baʼaleʼ uláakʼ sukuʼunoʼob, jeʼex le samaritanoʼoboʼ tsʼokaʼaniliʼ u máan kʼiin okjaʼanakoʼob ka yéeyaʼaboʼobeʼ (Bax. 8:14-17). Yanoʼob xaneʼ, jeʼex úuchik tiʼ Cornelio yéetel u láakʼtsiloʼobeʼ antes u yokjaʼob ka yéeyaʼaboʼob (Bax. 10:44-48).

6. 1) ¿Baʼax ku kʼamik le máaxoʼob yéeyaʼanoʼoboʼ? 2) Le kiliʼich muukʼoʼ, ¿baʼax ku yeʼesik tiʼ le máaxoʼob yéeyaʼanoʼoboʼ?

⁶ Kex maʼ junpʼéeliliʼ bix u yéeyaʼal le sukuʼunoʼoboʼ, letiʼobeʼ ku tsʼáaikoʼob cuenta. Yanoʼobeʼ ku tsʼáaikoʼob cuenta chéen pʼel u yéeyaʼaloʼob tumen Jéeoba. Uláakʼoʼobeʼ ku tsʼáaikoʼob cuenta ken máanak kʼiin. Chéen baʼaleʼ le apóstol Pablooʼ tu tsolaj baʼax ku yúuchul tiʼ cada juntúul tiʼ letiʼob. Letiʼeʼ tu yaʼalaj: «Le ka tsʼoʼok xan a creertikeʼexeʼ, sellartaʼabeʼex yéetel le kiliʼich muukʼ aʼalaʼan u tsʼaʼabal tu yoʼolal Cristooʼ. Lelaʼ junpʼéel garantía eʼesik jach tu jaajil yaan k-kʼamik le herenciaoʼ» (Efe. 1:13, 14). Jeʼex túun k-ilkoʼ u kiliʼich muukʼ Jéeoba jach eʼesik tiʼ le sukuʼunoʼob yéeyaʼanoʼob yaan u binoʼob kaʼanoʼ. Le kiliʼich muukʼoʼ «junpʼéel garantía eʼesik jach tu jaajil» yaan u kuxtaloʼob utiaʼal mantatsʼ teʼ kaʼanoʼ (xok 2 Corintoiloʼob 1:21, 22; 5:5).

7. ¿Baʼax kʼaʼabéet u beetik le sukuʼunoʼob yéeyaʼanoʼob utiaʼal u páajtal u binoʼob kaʼanoʼ?

⁷ Ken yéeyaʼak juntúul sukuʼuneʼ, ¿u kʼáat  wa u yaʼal seguro u bin kaʼan? Maʼatech. Le sukuʼunoʼ u yojel yéeyaʼan utiaʼal u bin kaʼan, chéen baʼaleʼ utiaʼal ka béeyak lelaʼ kʼaʼabéet u chúukpajal u yóol tiʼ Jéeoba. Le apóstol Pedrooʼ ku yaʼalik tiʼ le yéeyaʼanoʼoboʼ: «Le oʼolaleʼ, sukuʼuneʼex, beeteʼex tuláakal le ku páajtal utiaʼal ka pʼáatkeʼex kʼamaʼaneʼex yéetel junpáaykuntaʼaneʼex; tumen wa ku seguer a beetkeʼex le baʼaloʼobaʼ mix bikʼin bíin lúubkeʼex. U jaajileʼ, wa ka beetkeʼex beyaʼ yaan u siʼibilteʼex u jatsʼuts páajtalil a wookleʼex teʼ Reino minaʼan xuʼulul tiʼoʼ, u Reino k-Yuumtsil yéetel k-Salvador Jesucristo» (2 Ped. 1:10, 11). Jeʼex túun k-ilkoʼ le sukuʼunoʼob yéeyaʼanoʼoboʼ unaj u kanáantkubaʼob utiaʼal maʼ u xuʼulul u meyajtikoʼob Jéeoba. Tumen wa maʼ tu chúukpajal u yóoloʼobeʼ yaan u peʼertikoʼob le jatsʼuts privilegioaʼ (Heb. 3:1; Apo. 2:10).

8, 9. 1) ¿Baʼaxten maʼ tu páajtal u naʼatik máak bix u yuʼubikuba juntúul máax yéeyaʼan? 2) ¿Bix u yojéeltik juntúul sukuʼun wa yéeyaʼan utiaʼal u bin kaʼan?

⁸ U maas yaʼabil le máaxoʼob meyajtik Dios teʼ kʼiinoʼobaʼ ku talamtal u naʼatkoʼob baʼax ku yúuchul tiʼ juntúul máax yéeyaʼan. Lelaʼ normal, tumen wa maʼ yéeyaʼanoʼoneʼ maʼ tu páajtal k-naʼatik bix u yuʼubikubaʼob. Dioseʼ tu beetaj wíinik utiaʼal u kuxtal way Luʼumeʼ maʼ utiaʼal u bin kaʼaniʼ (Gén. 1:28; Sal. 37:29). Chéen baʼaleʼ Jéeobaeʼ tsʼoʼok u yéeyik jujuntúul wíinikoʼob utiaʼal u beetik u reyiloʼob yéetel u sacerdoteiloʼob teʼ kaʼanoʼ. Ken yéeyaʼakoʼobeʼ ku kʼexpajal bix u tuukuloʼob, bix u yuʼubikubaʼob yéetel ku taaktal u binoʼob kaʼan (xok Efesoiloʼob 1:18).

⁹ Pero ¿bix jeʼel u yojéeltik juntúul sukuʼun wa juntúul kiik yéeyaʼan utiaʼal u bin kaʼaneʼ? Le apóstol Pablooʼ tu yaʼalaj tiʼ le sukuʼunoʼob yéeyaʼanoʼob yanoʼob Romaoʼ: «Yéeyaʼaneʼex utiaʼal junpʼéel kiliʼich kuxtal». Tu yaʼalaj xan tiʼob: «U kiliʼich muukʼ Dioseʼ maʼ tu beetaj a wuʼuyikabaʼex bey palitsileʼex utiaʼal ka a chʼaʼex saajkil tu kaʼatéeniʼ, baʼaxeʼ ta kʼameʼex le kiliʼich muukʼ utiaʼal ka máataʼakeʼex bey u paalaloʼob Dioseʼ; tu yoʼolal le kiliʼich muukʼaʼ k-aʼalik tiʼ Dios: ‹¡Abá, k-Yuum!›. Le kiliʼich muukʼaʼ, junmúuchʼ yéetel k-puksiʼikʼaleʼ, ku jaajkúuntiktoʼon u paalaloʼon Dios» (Rom. 1:7; 8:15, 16). Lelaʼ u kʼáat u yaʼaleʼ u kiliʼich muukʼ Dios eʼesik tiʼ le sukuʼun wa tiʼ le kiik tsʼoʼok u yéeyaʼal utiaʼal u bin gobernar teʼ kaʼan yéetel Jesusoʼ (1 Tes. 2:12).

10. ¿Baʼax u kʼáat u yaʼal Yáax tiʼ Juan 2:27?

¹⁰ Letiʼobeʼ maʼ tsaaj u yaʼalaʼaltiʼob tumen mix máak wa yéeyaʼanoʼobiʼ, tumen Jéeoba tsʼáaik u yojéeltoʼob. Le apóstol Juanoʼ tu yaʼalaj tiʼ le sukuʼunoʼob yáax yéeyaʼaboʼoboʼ: «Teʼexeʼ yéeyaʼaneʼex tumen le j-Kiliʼichoʼ, yéetel tiʼ tuláakleʼex yaan kʼaj óolalil». Tu yaʼalaj xan tiʼob: «Ta wóokʼoleʼexeʼ láayliʼ tiʼ yaan le kiliʼich muukʼ meyajnaj utiaʼal a yéeyaʼaleʼex tumen Diosoʼ, yéetel maʼ kʼaʼabéet a kaʼansaʼaleʼex tumen mix máakiʼ; baʼax ku yúuchleʼ le kiliʼich muukʼ maʼatech u tuusoʼ, le baʼax meyajnaj utiaʼal a yéeyaʼaleʼex tu jaajiloʼ, letiʼ kaʼansikteʼex tuláakal baʼal. Jeʼex tsʼoʼok u kaʼansikteʼexeʼ, pʼáateneʼex junmúuchʼ tu yéetel» (1 Juan 2:20, 27). Le tekstoaʼ maʼ u kʼáat u yaʼal wa yaan u xuʼulul u kaʼansaʼal le sukuʼunoʼob chéen pʼel u yéeyaʼaloʼoboʼ, mientras kuxaʼanoʼob way Luʼumeʼ yaan u seguer u kaanbaloʼob jeʼex u maasil máaxoʼob meyajtik Diosoʼ. Jeʼex túun k-ilkoʼ mix máak way Luʼum jeʼel u yaʼaliktiʼob wa yéeyaʼanoʼobeʼ, chéen Jéeoba áantik u yojéeltoʼob jach tu jaajil tsʼoʼok u yéeyaʼaloʼob.

11, 12. 1) ¿Baʼax jeʼel u kʼuchul u tukult juntúul máax yéeyaʼaneʼ? 2) ¿Baʼax jach u yojel juntúul máax yéeyaʼan?

¹¹ Ken yéeyaʼak le sukuʼunoʼob tumen le kiliʼich muukʼoʼ, letiʼobeʼ jach ku kʼexpajloʼob, tumen jeʼex tu yaʼalil Jesuseʼ ku «síijil máak  tu kaʼatéen» (wa ku «síijil tiʼ kaʼanal») (Juan 3:3, 5; tsolajil). Jesuseʼ tu yaʼalaj: «Maʼ u jaʼakʼal a wóol yoʼolal le baʼax tin waʼalajtechaʼ: Teʼexeʼ unaj a síijleʼex tu kaʼatéen. Le iikʼoʼ ku suʼusutkuba jeʼel tuʼuxak u kʼáateʼ yéetel ka wuʼuyik u xóob, baʼaleʼ maʼ a wojel tuʼux u taaliʼ mix tuʼux ku biniʼ. Bey u yúuchul xan yéetel tuláakal le máaxoʼob ku síijloʼob tiʼ kiliʼich muukʼoʼ» (Juan 3:7, 8). Jeʼex túun k-ilkoʼ maʼ tu páajtal k-ojéeltik jach bix u yuʼubikuba juntúul sukuʼun yéeyaʼan. ^[2]

¹² Juntúul máax tsʼoʼok u yéeyaʼaleʼ maʼ xaaneʼ ku yuʼubikeʼ maʼ tu merecertik le privilegioaʼ, le oʼolal jeʼel u tuklikeʼ: «¿Baʼaxten maʼ tu yéeyaj Jéeoba yaanal máaxiʼ?». Maʼ xaaneʼ tumen u yojel junpʼéel nojoch responsabilidadeʼ jeʼel tak u tuklik maʼ kun béeytal u beetik le meyajaʼ. Pero u yojel jach tu jaajil yéeyaʼan tumen Jéeoba yéetel jach kiʼimak u yóol yoʼolal le jatsʼuts privilegio tsʼoʼok u tsʼaʼabaltiʼoʼ. Letiʼobeʼ ku yuʼubikubaʼob jeʼex le apóstol Pedrooʼ, letiʼeʼ tu yaʼalaj: «Kiʼikiʼtʼantaʼak u Dios yéetel u Taata k-Yuumtsil Jesucristo, tumen tu yoʼolal u nojoch chʼaʼ óotsilaleʼ tu beetaj k-kaʼa síijil utiaʼal ka yanaktoʼon junpʼéel kuxaʼan esperanza; lelaʼ tu beetaj úuchik u kaʼa kuxkíintik Jesucristo ichil le kimenoʼoboʼ, utiaʼal u tsʼáaik junpʼéel herencia tiʼ maʼ tu kʼastal, maʼ éekʼkuntaʼaniʼ yéetel mix máak jeʼel u páajtal u xuʼulsiktiʼeʼ. Le herenciaaʼ líiʼsaʼan a tiaʼaleʼex teʼ kaʼanoʼ» (1 Ped. 1:3, 4). Ken u xok le máaxoʼob yéeyaʼanoʼob le baʼax ku yaʼalik le tekstoaʼ, letiʼobeʼ ku yuʼubikoʼob jach tiʼ letiʼob ku yaʼalaʼal tumen Jéeoba.

13. ¿Bix u kʼexpajal u tuukul le máaxoʼob yéeyaʼanoʼoboʼ, yéetel máax beetik u kʼexpajal bix u tuukuloʼob?

¹³ Táanil tiʼ u yéeyaʼaloʼob utiaʼal u binoʼob kaʼaneʼ, le sukuʼunoʼoboʼ ku tsʼíiboltkoʼob kaʼach u pʼáatloʼob kuxtal way Luʼumeʼ. Letiʼobeʼ táan kaʼach u páaʼtkoʼob u luʼsaʼal le kʼasaʼanil yéetel u suʼutul Paraísoil le Luʼum tumen Jéeobaoʼ. Maʼ xaaneʼ hasta táan u tsʼíiboltkoʼob kaʼach u méekʼikoʼob u láakʼtsiloʼob wa u amigoʼob kun kaʼa kuxkíintbiloʼob way Luʼumoʼ. Táan wal kaʼach xan u tuklikoʼob bix ken u beetil u yotochoʼob, bix kun kajtaloʼobiʼ yéetel baʼaxoʼob ken u pakʼoʼob utiaʼal u jaantkoʼob u yichiʼ (Isa. 65:21-23). ¿Baʼaxten túun ku kʼexpajal bix u tuukuloʼob? ¿Yaan wa baʼax jach yaj tu muʼyajtoʼob way Luʼum, le oʼolal taakchaj u binoʼob kaʼan? ¿Joʼopʼ wa u tuklikoʼob jach nak óol kun kuxtal máak utiaʼal mantatsʼ teʼ Paraísooʼ? ¿Chéen wa taakchaj u yojéeltikoʼob bix le kuxtal teʼ kaʼanoʼ? Maʼatech. Baʼaxeʼ Dios yéeyoʼob utiaʼal ka xiʼikoʼob kuxtaliʼ. Yéetel u kiliʼich muukʼeʼ, Dioseʼ tu beetaj u kʼexik u tuukuloʼob bey xan le esperanza yaantiʼoboʼ.

14. Le máaxoʼob yéeyaʼanoʼoboʼ, ¿bix u yilkoʼob le kuxtal way Luʼumoʼ?

¹⁴ U kʼáat wa túun u yaʼaleʼ, ¿taak u kíimil le máaxoʼob yéeyaʼanoʼoboʼ? Le apóstol Pablooʼ tu yaʼalaj bix u yuʼubikubaʼob. Letiʼeʼ tu yaʼaleʼ le wíinklil de bakʼoʼ bey jeʼex junpʼéel naj de nookʼeʼ, tu yaʼalaj: «U jaajileʼ toʼon máaxoʼon kajaʼanoʼon teʼ naj de nookʼaʼ, k-áakam yéetel k-sen chiʼichnaktal; maʼ tumen wa maʼ k-kʼáat ka u pixoʼon le najaʼ, baʼaxeʼ maas k-kʼáat ka u pixoʼon le uláakʼoʼ, utiaʼal beyoʼ le baʼax ku kʼastaloʼ ka jeelintaʼak tumen le baʼax maʼatech u kʼastaloʼ» (2 Cor. 5:4). Le máaxoʼob yéeyaʼanoʼoboʼ maʼ u kʼáatoʼob kíimiliʼ. Baʼaxeʼ kiʼimak u yóoloʼob tumen kuxaʼanoʼob yéetel u kʼáat u meyajtoʼob Jéeoba sáamsamal junmúuchʼ yéetel u láakʼtsiloʼob bey xan u amigoʼob. Kex jeʼel baʼaxak meyajil ka u beetoʼob ichil u kaajal Jéeobaeʼ, letiʼobeʼ maʼatech u tuʼubskoʼob le esperanza yaantiʼoboʼ (1 Cor. 15:53; 2 Ped. 1:4; 1 Juan 3:2, 3; Apo. 20:6).

15. Le kʼáatchiʼob yaan teʼ xóotʼoloʼ, ¿baʼax ken u yáantoʼon k-naʼate?

¹⁵ Maʼ xaaneʼ techeʼ maʼ jach seguroech wa  tsʼoʼok a yéeyaʼal tumen Jéeoba utiaʼal a bin kaʼaniʼ. Wa bey a wuʼuyikabaoʼ, maʼalob ka tuukulnakech tiʼ le kʼáatchiʼobaʼ: ¿Ka wuʼuyik wa jach a tsʼaamaj a wóol kʼaʼaytaj? ¿Uts ta tʼaan wa a xokik le Biblia yéetel a kanik «le taamtam baʼaloʼob ku taal tiʼ Diosoʼ»? (1 Cor. 2:10.) ¿Ka wuʼuyik wa jach táan u yáantkech Jéeoba utiaʼal u bintech maʼalobil teʼ kʼaʼaytajoʼ? ¿Uts ta tʼaan wa a beetik tuláakal baʼax ku yaʼalik Jéeoba? ¿Ka wuʼuyik wa jach a yaabiltmaj tuláakal máak yéetel jach uts ta tʼaan a wáantkoʼob utiaʼal ka u meyajtoʼob Jéeoba? ¿Tsʼoʼok wa a tsʼáaik cuenta jach bix u yáantkech Jéeoba ichil a kuxtal? Wa maʼalob bix úuchik a núukik tuláakal le kʼáatchiʼobaʼ, ¿u kʼáat wa túun u yaʼaleʼ yéeyaʼanech utiaʼal a bin kaʼan? Maʼatech. ¿Baʼaxten k-aʼalik lelaʼ? Tumen tuláakal le máaxoʼob meyajtik Dios ku yuʼubikubaʼob beyoʼ, kex yéeyaʼanoʼob wa kex maʼ. Maʼ unaj u tuʼubultoʼoneʼ, yéetel u kiliʼich muukʼeʼ, Jéeobaeʼ ku yáantik tuláakal le máaxoʼob meyajtikoʼ, kex jeʼel baʼaxak esperanzail ka yanaktiʼobeʼ. Wa maʼ seguroech wa yaan a bin kaʼaneʼ, u kʼáat u yaʼaleʼ maʼ yéeyaʼanechiʼ. Le máaxoʼob kun binoʼob kaʼanoʼ maʼatech u máan tu tuukuloʼob wa yéeyaʼanoʼob wa maʼ, deporsi u yojloʼob yéetel seguroʼob.

16. ¿Baʼaxten maʼ tuláakal le máaxoʼob kʼamik kiliʼich muukʼ kun binoʼob kaʼanoʼ?

¹⁶ Le Bibliaoʼ ku tʼaan tiʼ máaxoʼob chúukpaj u yóol u meyajtoʼob Jéeoba, pero maʼ yéeyaʼaboʼob utiaʼal u binoʼob kaʼaniʼ. Juntúul tiʼ letiʼobeʼ Juan Bautista. Jesuseʼ tu yaʼaleʼ mix máak maas nojoch tiʼ Juan Bautista, pero tu yaʼaleʼ maʼ tun gobernar Juan tu yéetel teʼ kaʼanoʼ (Mat. 11:10, 11). Davideʼ láayliʼ nuʼuktaʼab tumen le kiliʼich muukʼoʼ (1 Sam. 16:13). Letiʼeʼ áantaʼab tumen le kiliʼich muukʼ utiaʼal u naʼatik baʼaloʼob talamtak tu yoʼolal Jéeobaoʼ yéetel nuʼuktaʼab xan utiaʼal u tsʼíibtik jujunpʼéel jaatsoʼob tiʼ le Bibliaoʼ (Mar. 12:36). Kex beyoʼ apóstol Pedroeʼ tu yaʼaleʼ Davideʼ ‹maʼ bin kaʼaniʼ› (Bax. 2:34). Jéeobaeʼ tu tsʼáaj u kiliʼich muukʼ tiʼob utiaʼal u beetkoʼob nukuch baʼaloʼob, pero maʼ tu yéeyoʼob utiaʼal u binoʼob kaʼaniʼ. Lelaʼ maʼ u kʼáat u yaʼal wa maʼ chúukpaj u yóoloʼob tiʼ Jéeobaiʼ, tumen yaan u kaʼa kuxkíintikoʼob utiaʼal ka kuxlakoʼob teʼ Paraísooʼ (Juan 5:28, 29; Bax. 24:15).

17, 18. 1) ¿Baʼax esperanzail yaan tiʼ u maas yaʼabil le máaxoʼob meyajtik Dios bejlaʼoʼ? 2) ¿Baʼax kʼáatchiʼiloʼob kun núukbil teʼ xook ku segueroʼ?

¹⁷ U maas yaʼabil le máaxoʼob meyajtik Dios bejlaʼoʼ maʼ kun binoʼob kaʼan. Jeʼex Abrahán, David, Juan Bautista yéetel uláakʼ xiiboʼob yéetel koʼoleloʼob meyajt Dios úuchjeakileʼ, táan kaʼach u páaʼtkoʼob u kuxtaloʼob way Luʼum yáanal u Reino Dioseʼ (Heb. 11:10). Chéen 144,000 máakoʼob kun binoʼob gobernar yéetel Jesús teʼ kaʼanoʼ. Chéen baʼaleʼ le Bibliaoʼ ku tʼaan tiʼ «u yalab u chʼiʼibal le koʼoleloʼ», lelaʼ letiʼe yéeyaʼanoʼob pʼaatloʼob way Luʼum teʼ kʼiinoʼobaʼ (Apo. 12:17). U kʼáat u yaʼaleʼ u maas yaʼabil le 144,000 yéeyaʼanoʼoboʼ tsʼoʼok u binoʼob kaʼan.

¹⁸ Wa yaan máax ku yaʼalik yéeyaʼaneʼ, ¿bix unaj k-ilik? Wa yaan máax teʼ múuchʼulil ku káajal u jaantik le waaj yéetel u yukʼik le vinooʼ, ¿bix unaj k-tratartik? Wa cada año táan u maas yaʼabtal le máaxoʼob jaantik le waaj yéetel ku yukʼikoʼob le vino teʼ Kʼaʼajsajiloʼ, ¿unaj wa k-sen máansik t-tuukul baʼaxten ku yúuchul lelaʼ? Le kʼáatchiʼobaʼ yaan u núukaʼal teʼ xook ku segueroʼ.