¿Baʼaxten unaj k-kʼaj óoltik Jéeoba?

¿KA WUʼUYIK wa yaan baʼax ku bineltiktech ichil a kuxtal? Maʼ xaaneʼ bey a wuʼuyikabaoʼ tumen todavía maʼ a kʼaj óolt Diosiʼ. U millonesil máakoʼobeʼ tsʼoʼok u yilkoʼob le utsiloʼob ku taasik u kʼaj óoltaʼal Diosoʼ.

Jéeobaeʼ jach u kʼáat ka a kʼaj óolte. Le salmistaoʼ tu tsʼíibtaj: «Ka u yojéelt le máakoʼoboʼ a kʼaabaʼeʼ Jéeoba, chéen teech le Maas Nojoch Dios yaan tu yóokʼol tuláakal le luʼumaʼ». Dioseʼ u yojel yaan u bintoʼon maʼalobil wa k-kʼaj óoltik. Letiʼeʼ ku yaʼalik: «Teneʼ Jéeobaen, teen a Dios, teen le máax kaʼansikech utiaʼal u bintech utsiloʼ». ¿Baʼax utsil ku taasik u kʼaj óoltaʼal Jéeoba? (Salmo 83:18; Isaías 48:17).

Yáaxeʼ ku yáantik máak u yutskíint u problemas, ku tsʼáaik esperanza bey xan jeetsʼelil. Le máaxoʼob u kʼaj óoloʼob Diosoʼ tsʼoʼok u kankoʼob u núukil le preguntaʼob chiʼichnakkúuntik yaʼab máakoʼ. ¿Máakalmáak le preguntaʼobaʼ?

¿Yaan wa baʼax oʼolal kuxaʼanoʼon?

Kex tsʼoʼok u jóoʼsaʼal yaʼab baʼaloʼob túumbentak tumen wíinikeʼ yaʼab preguntaʼob maʼ páajchajak u núukikoʼobiʼ. Por ejemplo: ¿Baʼax oʼolal kuxaʼanoʼon? ¿Baʼax ku taal u kʼiin u yúuchul? ¿Yaan wa u biilal k-kuxtal? Yaʼab máakoʼobeʼ maʼ u yojloʼob u núukil le preguntaʼobaʼ le beetik minaʼan u biilal u kuxtaloʼob. ¿Jach wa jaaj bey u yuʼubikuba le máakoʼoboʼ? Tu tsʼoʼokbal le año 1997, beetaʼab junpʼéel encuesta Alemania. Tiʼ tuláakal le máakoʼob entrevistartaʼoboʼ ilaʼabeʼ táanchumukeʼ tu yaʼalaj yaan hora ku yuʼubikoʼob minaʼan u biilal u kuxtaloʼob. Maʼ xaaneʼ yaan máaxoʼob bey u yuʼubikubaʼob teʼ tuʼux kajaʼanechoʼ.

Le máakoʼob ku yuʼubikoʼob minaʼan u biilal u kuxtaloʼoboʼ ku chʼíikiloʼob meyaj utiaʼal u ayikʼaltaloʼob. Ku tuklikoʼobeʼ beyoʼ yaan u yantal u biilal u kuxtaloʼob, pero maʼ beyiʼ. Le máaxoʼob minaʼan u biilal u kuxtaloʼoboʼ jach ku chiʼichnaktaloʼob, hasta ku tsʼíiboltik u kíimloʼob. Le periódico International Herald Tribune, ku yaʼalikeʼ bey úuchik tiʼ juntúul x-chʼúupaloʼ, letiʼeʼ líikʼ «tiʼ junpʼéel familia jach ayikʼal, le oʼolal jeʼel baʼaxak u kʼáateʼ ku maʼanal tiʼ». Kex yaantiʼ tuláakal baʼaleʼ ku yuʼubikuba chéen tu juunal. Tu tsʼookeʼ le x-chʼúupalaʼ tu yukʼaj yaʼab tsʼaak utiaʼal u kíimsuba. Maʼ xaaneʼ yaan máaxoʼob a wuʼuymaj bey tsʼoʼokikoʼob xanoʼ.

¿Tsʼoʼok wa a wuʼuyik u yaʼalaʼal le cienciaoʼ ku núukik tuláakal baʼal? Tu luʼumil Alemaniaeʼ junpʼéel revista ku kʼaabaʼtik Die Woche, tu yaʼalaj: «Yaʼab baʼaloʼob jach maʼalob u tsolik le cienciaoʼ, pero le baʼaloʼobaʼ maʼ tu yáantik máak utiaʼal ka yanak u biilal u kuxtal. Jejeláas baʼaloʼob ku yaʼalaʼal yoʼolal le evolución yéetel le física cuánticaoʼ pero maʼ tu taasik jeetsʼeelil yéetel mix tu beetik u kiʼimaktal u yóol máak». U jaajileʼ le científicoʼoboʼ tsʼoʼok u yáantkoʼon k-naʼat le u clasesil kuxtal yaan way Luʼumeʼ, tsʼoʼok xan u tsolkoʼob baʼaxten maʼ tu xuʼupul le jaʼoʼ, le iikʼoʼ yéetel uláakʼ baʼaloʼob. Pero maʼ páajchajak u tsolkoʼob baʼaxten kuxaʼanoʼon mix baʼax kun úuchul yéetel wíinik. Le cienciaoʼ mix bikʼin ken páajchajak u núukik le kʼáatchiʼobaʼ. Junpʼéel periódicoeʼ (Süddeutsche Zeitung) ku yaʼalikeʼ «wíinikeʼ kʼaʼabéet u yojéeltik baʼax oʼolal kuxaʼan».

¿Máax túun jeʼel u yaʼalik baʼax oʼolal kuxaʼanoʼoneʼ? Chéen Dios tumen letiʼ beetoʼon. Le Bibliaoʼ ku yaʼalikeʼ Jéeobaeʼ tu beetaj wíinik utiaʼal u kajtal yéetel utiaʼal u kanáantik le Luʼumaʼ. Tu tsʼáaj xan u páajtalil tiʼ wíinik utiaʼal u yeʼesik le jatsʼuts modosoʼobaʼ: yaabilaj, naʼatil yéetel justicia. Le kéen k-kan baʼax oʼolal tu beetoʼon Dioseʼ ku yantal u biilal k-kuxtal (Génesis 1:26-28).

¿Baʼax jeʼel u yáantkecheʼ?

Maʼ xaaneʼ maʼ páajchajak a kaxtik u núukil le kʼáatchiʼobaʼ: ¿baʼax oʼolal kuxaʼanoʼon? ¿Baʼax ku taal u kʼiin u yúuchul? ¿Yaan wa u biilal k-kuxtal? Le Bibliaoʼ ku yaʼalikeʼ baʼax jeʼel u yáantkecheʼ letiʼe a kʼaj óoltik Diosoʼ. Jesúseʼ tu yaʼalaj: «Lelaʼ letiʼe baʼax kun tsʼáaik kuxtal minaʼan u xuul tiʼ le máakoʼoboʼ: ka kʼuchuk u kʼaj óoltechoʼob, teech le u juntúuliliʼ jaajil Diosoʼ, bey xan ka u kʼaj óoltoʼob Jesucristo, le máax ta túuxtoʼ». Jeʼex a wilkoʼ kʼaʼabéet a kʼaj óoltik Dios yéetel a weʼesik yaabilaj utiaʼal u yantaltech kuxtal minaʼan u xuul. Wa ka beetik beyoʼ yaan u yantal u biilal a kuxtal yéetel junpʼéel jatsʼuts esperanza. Tsʼoʼoleʼ yaan a kaxtik u núukil le kʼáatchiʼob jach taak a wojéeltikoʼ (Juan 17:3; Eclesiastés 12:13).

¿Jach wa tu jaajil ku yáantik máak u kʼaj óoltik Dios? Koʼox ilik baʼax úuch tiʼ Hans. * Úuchjeakileʼ Hanseʼ chéen ku yuʼubik u yaʼalaʼal yaan Dios. Letiʼ kaʼacheʼ ku sen drogarkuba, ku núupkʼebantal yéetel jach uts tu yich le motoʼoboʼ. Kex beyoʼ Hanseʼ ku yaʼalik: «Maʼ kiʼimak in wóoliʼ, kin wuʼuyik minaʼan u biilal in kuxtal». Chéen baʼaleʼ le yaan kex 25 años tiʼoʼ tu chʼaʼtuklaj u xakʼalxoktik le Biblia utiaʼal u kʼaj óoltik Diosoʼ. Hans túuneʼ káaj u biskuba yéetel Jéeoba yéetel anchaj u biilal u kuxtal, yoʼolal leloʼ tu kʼexaj bix u kuxtal, tsʼoʼoleʼ ka okjaʼanaji. Beoraaʼ u testigo Jéeoba yéetel tsʼoʼok u máan diez años joʼopʼok u xupkuba u meyajt Dios. Letiʼeʼ ku yaʼalik: «Chéen tumen tin kʼaj óoltaj Jéeobaeʼ anchaj u biilal in kuxtal, minaʼan uláakʼ kuxtal maas maʼalob ke lelaʼ».

Yaʼab máak taak u yojéeltik wa yaan u biilal u kuxtal, chéen baʼaleʼ yaan xan uláakʼ baʼaloʼob chiʼichnakkúuntikoʼob. Jeʼex u bin u maas kʼastal le baʼaloʼob ku yúuchul way yóokʼol kaabeʼ bey xan u bin u maas chiʼichnaktal le máakoʼoboʼ.

¿Baʼaxten k-sufrir?

Le yáax baʼax ku tuklik máak le kéen sen sufrirnakeʼ, letiʼe jeʼelaʼ: «¿Baʼaxten k-sufrir?». U yojéeltik máak u núukil le preguntaaʼ le kun áantik utiaʼal maʼ u sen sufrir. Chéen baʼaleʼ wa maʼ tu núukaʼaltiʼ tubeeleʼ jeʼel u beetik u maas sufrireʼ yéetel jeʼel tak u xuʼulul u kiʼimaktal u yóoleʼ. Koʼox ilik baʼax úuch tiʼ Bruni.

Letiʼeʼ tu yaʼalaj: «Walajki wa jaypʼéel añosaʼ kíim Susanne, in chan hija. Como kin creertik Dioseʼ binen in wil le sacerdote utiaʼal u líiʼsik in wóoloʼ. Pero letiʼeʼ tu yaʼalajteneʼ Dioseʼ kʼaʼabéettiʼ bin juntúul ángel teʼ kaʼanoʼ le beetik tu bisaj in chan hija. Yoʼolal le baʼax tu yaʼalajtenoʼ káaj in pʼektik Dios. Desde ka kíim Susanneeʼ tin wuʼuyaj maʼ taak in kuxtaliʼ». Brunieʼ máan yaʼab años táan u sufrir. Letiʼeʼ ku seguer u yaʼalik: «Taal juntúul u testigo Jéeoba u xíimbalten, tu yeʼesajten teʼ Bibliaoʼ minaʼan baʼax oʼolal in pʼektik Dios tumen maʼ letiʼ bis Susanne teʼ kaʼanoʼ. Tin kaneʼ u kʼojaʼanil in hijaeʼ ku taal tiʼ le kʼebanoʼ. Beoraaʼ bey chéen táan u weenleʼ, táan u páaʼtik u kaʼa kuxkíintaʼal tumen Jéeoba. Tin kanaj xaneʼ maʼ kun xáantal ken béeychajak le baʼax u tukultmaj Diosaʼ: u kajtal wíinik tiʼ junpʼéel paraíso way Luʼum utiaʼal mantatsʼeʼ. Le baʼaxoʼob tin kanoʼ tu yáanten in natsʼinba yiknal Jéeoba yéetel maʼ u sen yaatal in wóol» (Salmo 37:29; Hechos 24:15; Romanos 5:12).

U millonesil máakoʼobeʼ ku sufriroʼob yoʼolal baʼaloʼob jeʼex guerraʼob, wiʼijil, nukuch loobiloʼob wa uláakʼ baʼaloʼob ku yúuchul ichil u familiaʼob. Brunieʼ kiʼimakchaj u yóol le ka tu kanaj maʼ Dios beetik k-sufririʼ, tu kanaj xaneʼ ichil junpʼíit kʼiineʼ Jéeobaeʼ yaan u xuʼulsik le kʼasaʼaniloʼ. Tuláakal le baʼax ku yúuchul bejlaʼaʼ ku yeʼesikeʼ kuxaʼanoʼon ‹tu tsʼook kʼiinoʼob›. Maʼ tun xáantaleʼ Dioseʼ yaan u xuʼulsik tuláakal le baʼaxoʼob kʼaastak ku yúuchloʼ (2 Timoteo 3:1-5; Mateo 24:7, 8).

¿Bix jeʼel a kʼaj óoltik Dioseʼ?

Kex Hans yéetel Bruni u yojloʼob yaan Dioseʼ, maʼ jach u kʼaj óoloʼob kaʼachiʼ. Pero le ka tu kʼaj óoltoʼobeʼ tu kʼamoʼob yaʼab utsiloʼob yéetel tu yojéeltoʼob u núukil le preguntaʼob maas kʼaʼanaʼantakoʼ. Leloʼ tu beetaj u yantaltiʼob jeetsʼelil yéetel esperanza. U millonesil máakoʼob meyajtik Jéeobaeʼ ku yuʼubikubaʼob jeʼex Hans yéetel Brunieʼ.

Utiaʼal k-kʼaj óoltik Dioseʼ kʼaʼabéet k-xokik le Bibliaoʼ. Teʼ yáax siglooʼ yaan máaxoʼob beet beyoʼ. Lucaseʼ tu yaʼaleʼ bey tu beetil le judíoʼob yaan Bereaoʼ, letiʼobeʼ «tu séebaʼanil tu kʼamoʼob yéetel kiʼimak óolal u tʼaan Dios, yéetel sáamsamal kaʼach ku xakʼalxoktikoʼob tubeel u Tʼaan Dios utiaʼal u yilkoʼob wa jaaj le baʼaxoʼob ku kaʼansaʼaltiʼoboʼ» (Hechos 17:10, 11).

Le sukuʼunoʼob teʼ yáax siglooʼ suuk kaʼach u muchʼkubaʼob (Hechos 2:41, 42, 46; 1 Corintios 1:1, 2; Gálatas 1:1, 2; 2 Tesalonicenses 1:1). Teʼ kʼiinoʼob xanaʼ u testigoʼob Jéeobaeʼ ku muchʼkubaʼob utiaʼal u maas kaanbaloʼob tiʼ Dios. Chéen baʼaleʼ, ¿yaan wa uláakʼ utsiloʼob ku taasik u muchʼkuba máak yéetel le Testigoʼoboʼ? Yaan, como táan u adorarkoʼob Dioseʼ ku yilik u yeʼeskoʼob u jatsʼuts modos Dios. Le oʼolal wa ka muchʼkaba tu yéeteloʼobeʼ yaan a maas kʼaj óoltik Jéeoba (Hebreos 10:24, 25).

Bix a wilik, ¿jach trabajo wa u kʼaj óoltaʼal Dios? U jaajileʼ kʼaʼabéet u tsʼáaik u yóol máak. Bey u yúuchul yéetel tuláakal baʼax u kʼáat u beet máakoʼ, maʼ chéen unaj u kutal u páaʼtiʼ kʼaʼabéet u beetik wa baʼax. Jáan tuukulnen tiʼ le bukaʼaj entrenamiento ku beetik le deportistaʼoboʼ. Por ejemplo Jean-Claude Killy, tu ganartaj medalla de oro tiʼ esquíeʼ, ku yaʼalik: «Diez años antes tiʼ a competireʼ kʼaʼabéet a entrenar sáamsamal [...]. Chéen baʼaleʼ maʼ chéen u wíinklil máak kun meyaj bul añoiʼ, baʼaxeʼ tak u tsʼoʼomel». ¡Tuláakal le meyaj ku beetkoʼoboʼ yaan u meyaj chéen utiaʼal diez minutos carrera! Pero u meyajtaʼal Jéeobaeʼ maas ku xáantal le utsiloʼob ku taasiko’.

Ilawil a maas kʼaj óoltik Dios

¿Yaan wa baʼax ku bineltik ichil a kuxtal? ¿Ka wuʼuyik wa minaʼan u biilal a kuxtal? ¿A kʼáat a wojéelt baʼaxten ku muʼyaj máak? Wa beyoʼ xok le Biblia utiaʼal a kʼaj óoltik Diosoʼ. Le kéen a kʼaj óolteʼ yaan u kiʼimaktal a wóol tuláakal u kʼiiniloʼob a kuxtal.

¿Yaan wa u kʼuchul u kʼiinil k-ojéeltik tuláakal yoʼolal Jéeoba? Le máaxoʼob úuch joʼopʼok u meyajtikoʼob Jéeobaoʼ tak bejlaʼa táan u kaanbaloʼob tiʼ letiʼeʼ. Jeʼex u bin a maas kʼaj óoltik Diosoʼ yaan u maas kiʼimaktal a wóol yéetel yaan a maas biskaba tu yéetel. Jach jaaj baʼax tu tsʼíibtaj apóstol Pablo: «¡Bukaʼaj baʼaloʼob maʼalobtak ku taal tiʼ Dios, yéetel bukaʼaj taamil u naʼat bey xan u kʼaj óolal! ¡Maʼ tu páajtal u chʼaʼnuʼuktaʼal le baʼaxoʼob ku tuklik u beetkoʼ mix u xakʼaltaʼal u beeloʼob! Tumen ‹¿máax tsʼoʼok u kʼuchul u kʼaj óolt u tuukul Jéeoba wa máax tsʼoʼok u tsolik u xikin?›» (Romanos 11:33, 34).

[Nota]

[Uláakʼ baʼax ku tsoʼolol]

Yaʼab máakoʼobeʼ ku beetkoʼob le preguntaʼobaʼ: ¿Baʼax oʼolal kuxaʼanoʼon? ¿Baʼax ku taal u kʼiin u yúuchul? ¿Yaan wa u biilal k-kuxtal?

[Uláakʼ baʼax ku tsoʼolol]

«Le baʼaxoʼob tin kanoʼ tu yáanten in natsʼinba yiknal Jéeoba yéetel maʼ u sen yaatal in wóol»

[Uláakʼ baʼax ku tsoʼolol]

«Chéen tumen tin kʼaj óoltaj Jéeobaeʼ anchaj u biilal in kuxtal, minaʼan uláakʼ kuxtal maas maʼalob ke lelaʼ»