Kʼaʼabéet k-áantik le máakoʼob u kʼamoʼob u tsikbalil le Reeino k-bisiktiʼoboʼ
Kʼaʼabéet k-áantik le máakoʼob u kʼamoʼob u tsikbalil le Reeino k-bisiktiʼoboʼ
«Agriipaeʼ tu yaʼalaj [tiʼ Paablo]: Jumpʼíit tu binetaj a woksik tin pool in beetikimba kristiaanoil.» (BAʼAXOʼOB [HECHOS] 26:28.)
1, 2. ¿Baʼax beet u bisaʼal Paablo tu táan jalaʼach Feesto yéetel reey Agriipa II utiaʼal ka pʼis óoltaʼak?
TU JAʼABIL 58 t.T-kʼ. (teʼ T-kʼiinoʼobaʼ) Poorcio Feestoeʼ, utúul u jalaʼachil Roomaeʼ, tu kʼamaj u yuʼulaboʼob tu kaajil Séesarea: reey Eroodes Agriipa II yéetel Béerenise, u yíitsʼin. Letiʼobeʼ jach noj baʼal taasaʼabikoʼob ka kʼuchoʼob teʼeloʼ, yéetel ka ookoʼob teʼ kúuchil pʼis óoloʼ láakʼintaʼanoʼob tumen u nojochiloʼob le soldaadoʼoboʼ bey xan tumen u maʼalob máakiloʼob le kaajoʼ. Feesto túuneʼ tiaʼalaj ka taasaʼak áapostol Paablo tu táanoʼob. ¿Baʼax beet u bisaʼal Paablo tu táan jalaʼach Feesto utiaʼal ka pʼis óoltaʼak? (Baʼaxoʼob 25:13-23.)
2 U núukileʼ k-ilik tiʼe baʼax tiaʼalaj Feesto tiʼ u yuʼulaboʼoboʼ: «Ajaw Agriipa yéetel taticheʼex yaneʼex way [muchʼukbaleʼex] t-éeteleʼ, jeʼel le máakaʼ. Yaʼab tiʼ le judiiyoʼoboʼ tsʼoʼok u takikoʼob u pool [tu kaajil] Jéerusalen bey xan way Séesareaeʼ, maʼ tu jáawal u yaʼalikoʼobeʼ unaj u kíimil. Baʼaleʼ teneʼ kin wilikeʼ mix baʼal u beetmaj ku náajmatik u kíimsaʼal; baʼaleʼ tumen letiʼ tu kʼáataj ka pʼis óoltaʼak tumen Seesar Áaugustoeʼ, in tukultmaj yaan in túuxtik tu táan. Tumen mix baʼal yaan in tsʼíibt tiʼ u tsikbeʼenil Seesar tu yoʼolal, kin taasik ta táaneʼex, yóokʼol tuláakaleʼ ta táan, ajaw Agriipa, utiaʼal kaʼa kʼáat u chiʼ utiaʼal ka yanak baʼax in tsʼíibte. Tumen kin tukultikeʼ maʼ maʼalob in túuxtik juntúul máak kʼalaʼaneʼ, maʼ in waʼalik baʼax tiʼ ku taʼakal u pool» (Baʼaxoʼob 25:24-27).
3. ¿Baʼaxten takaʼab u pool Paablo tumen le j-kʼiinoʼoboʼ?
3 Feestoeʼ tiaʼalajeʼ Paabloeʼ takʼan u pool táan u líiʼsik máakoʼob tu koontra le jalaʼachoʼoboʼ; leloʼ kíimil u káastigoi (Baʼaxoʼob 25:11). Baʼaleʼ, le takpoolaʼ maʼ jaajiʼ. Paabloeʼ takaʼab u pool tumen u j-kʼiiniloʼob Jéerusalen, tumen letiʼobeʼ u jach chʼaʼapʼekmoʼob ikil u kʼaʼaytik le Reeinooʼ, yéetel ikil u yáantik uláakʼ máakoʼob ka u tsaypachtoʼob Jéesukriisto. Paablo túuneʼ, ka luʼsaʼab Jéerusaleneʼ jach kanáantaʼan úuchik u bisaʼal tak Séesarea, upʼéel kaaj jáal jaʼ yaan, tiʼ túun tu kʼáataj ka pʼis óoltaʼak tumen Seesariʼ. Le oʼolaleʼ bisaʼab tak Rooma.
4. ¿Baʼax jach jakʼ óol tʼaan tu beetaj reey Agriipa?
4 Tukult tiaʼan Paablo tu jalaʼach naj Feestoeʼ, waʼalakbal tu táan u múuchʼ máakoʼob tuʼux yaan utúul u jalaʼachil tiʼ yaʼab u kaajiloʼob Rooma. Le reey Agriipaaʼ tiaʼalaj tiʼ Paablo: «Ku páajtal a tʼaan ta woʼolal». Ka tʼaanaj Paabloeʼ, úuch upʼéel jakʼ óol baʼal. Le baʼax kiaʼalikoʼ káaj u yokol tu tuukul le reeyoʼ, le oʼolaleʼ le reeyoʼ kʼuch tak u yaʼaleʼ: «Jumpʼíit tu binetaj a woksik tin pool in beetikimba kristiaanoil» (Baʼaxoʼob 26:1-28).
5. ¿Baʼaxten jach maʼalob tʼaanajik Paablo tu táan Agriipa?
5 ¡Chéen tuklej! Úuchik u maʼalob tʼaan Paabloeʼ, káaj u kʼeʼexel u tuukul utúul reey tumen u nojoch muukʼ u Tʼaan Dioos (Baʼaxoʼob 4:12). ¿Baʼaxten jach maʼalob tʼaanajik? ¿Yéetel baʼax jeʼel k-kanik tiʼ Paablo jeʼel u yáantkoʼon tiʼ k-meeyjil kaʼansajeʼ? Kaʼapʼéel baʼal k-kanik tiʼ bix úuchik u tʼaan: 1) tu yilaj u kʼexik u tuukul Agriipa yéetel u 2) jach maʼalob tu kaʼansij baʼax yojel tiʼ le Biibliaoʼ, jeʼex utúul máak jach yojel meyaj yéetel u nuʼukuleʼ.
Bix jeʼel k-kʼexik u tuukul le máakoʼoboʼ
6, 7. Teʼ Biibliaoʼ, le tʼaan ku meyaj utiaʼal yaʼalaʼal «u kʼeʼexel u tuukul utúul máak», ¿baʼax u kʼáat yaʼale?, yéetel baʼaxten jach kʼaʼanan utiaʼal k-áantik le máakoʼob ka u tsaypachtoʼob kriistooʼ?
6 Tu liibroi Baʼaxoʼobeʼ, ken úuchuk tʼaan tiʼ Paabloeʼ, yaʼab u téenel ku chíikpajal le tʼaanoʼob ich grieego ku tsʼáaikoʼob naʼatbil u kʼeʼexel u tuukul utúul máak. Lelaʼ, ¿baʼax yaan yil yéetel k-kaʼansik uláakʼ máakoʼob ka u tsaypachtoʼob kriistooʼ?
7 Le Diccionario Expositivo de Palabras del Nuevo Testamento, tiʼ Vine, kiaʼalikeʼ teʼ tu Tsʼíiboʼob le Kristiaanoʼob ich Grieegooʼ, le tʼaan meyajnaj utiaʼal u yaʼalaʼal «u kʼeʼexel u tuukul utúul máak» u kʼáat yaʼaleʼ «k-máansik t-tséel», wa «k-kʼexik u tuukul yoʼolal le baʼax k-tsoliktiʼoʼ wa ikil k-kaʼansik baʼax maʼalob tiʼ». Le tʼaanaʼ tiʼ u taal tiʼ uláakʼ tʼaan ku tsʼáaik naʼatbil oksaj óolal, lelaʼ ku yáantkoʼon k-maas naʼat baʼax u kʼáat u yaʼale. Le oʼolaleʼ, wa k-beetik u kʼaʼamal tumen wa máax baʼax kiaʼalik le Biibliaoʼ, tsʼoʼok k-beetik u oksaj óolkoʼon, le oʼolal ku kʼamik le baʼax k-kaʼansiktiʼoʼ. Baʼaleʼ, utiaʼal ka u oksaj óolt yéetel ka u beet baʼax ku kankeʼ maʼ chéen unaj yojéeltik baʼax kiaʼalik le Biibliaoʼ. Unaj u yilik jach jaaj baʼax k-aʼaliktiʼoʼ, kex wa utúul chan paal, wa utúul máak kajaʼan t-tséel, wa utúul k-láakʼ, wa utúul k-éet xook wa k-éet meyaj (2 tiʼ Timoteo 3:14, 15).
8. ¿Bix jeʼel a weʼesik jaaj le baʼax kiaʼalik le Biibliaoʼ?
8 ¿Bix jeʼel a weʼesik jach jaaj baʼax kiaʼalik u Tʼaan Diooseʼ? Paabloeʼ tu yilaj u kʼexik u tuukul u yéet tsikbaloʼob, utiaʼal lelaʼ tu yilaj ka naʼataʼak baʼax kiaʼalik, tu yeʼesaj baʼaxten jaaj baʼax ku kaʼansik yéetel tʼaanaj xan tu jaajil yóol. * Le oʼolaleʼ, maʼ chéen unaj a waʼalik jach jaaj baʼax ka kaʼansikiʼ, unaj a weʼesik. ¿Bix jeʼel a beetkeʼ? Kʼaʼabéeteʼ le baʼax ka waʼalikoʼ ka jóokʼok tiʼ u tʼaan Dioos, maʼ tiʼ a tuukuliʼ. Tsʼoʼoleʼ, unaj a weʼesik baʼaxten jaaj le baʼax ka waʼalikoʼ (Proverbios 16:23). Jeʼex wa táan a kaʼansik yaan u yilaʼal upʼéel jatsʼuts kuxtal way Luʼum tumen le wíinikoʼob ku yuʼubkoʼob tʼaanoʼ, unaj a weʼesik yéetel upʼéel teeksto, jeʼex San Lucas 23:43 wa Isaías 65:21-25. ¿Baʼaxoʼob jeʼel a waʼalik utiaʼal a weʼesik jaaj baʼax kiaʼalik le Biibliaoʼ? Tʼaanen tiʼ baʼaloʼob u kʼaj óol le máax uʼuykechoʼ. Jeʼel u páajtal a kʼaʼajsiktiʼeʼ minaʼan u boʼotaʼal u yilaʼal u jatsʼutsil u tʼúubul kʼiin, u yuʼubaʼal u kiʼibokil upʼéel lool, u jaantaʼal u yich upʼéel cheʼ wa u yilaʼal bix u tséentik u mejnil utúul chʼíichʼ. Áant ka u yileʼ, tuláakal le baʼaloʼob jatsʼutstakoʼobaʼ, kieʼeskoʼobeʼ le Máax beetmailoʼonoʼ u kʼáat ka k-kiʼikiʼ óolt le kuxtal way Luʼumeʼ (Eclesiastés 3:11, 12).
9. ¿Bix unaj k-kaʼansaj utiaʼal ka kʼaʼamak le baʼax k-aʼalikoʼ?
9 Ken a wil ka kʼaʼamak upʼéel u kaʼansajil le Biiblia tumen wa máaxoʼ, kʼaʼabéet maʼ tʼaan bey táan a chʼinik tu yich maʼ patal baʼax ku beetkeʼeʼ, leloʼ jeʼel u beetik maʼ u kʼamik le baʼax ka waʼalik tiʼoʼ. Le liibro Benefíciese kiaʼalik: «Kex ka k-eʼes yaʼabach teekstos tiʼ wa máaxeʼ, jach jeʼel u talamtaltiʼ u kʼamik baʼax kiaʼalik le Biiblia wa u taatsʼ k-aʼaliktiʼ maʼ maʼalob baʼax u jach oksaj óolmeʼeʼ. Maʼ xaaneʼ, maʼ ken k-kʼex u tuukul máax k-kaʼansik wa chéen k-kúumul sen aʼal maʼ maʼalobtak le kʼiimbesajoʼob suuk u beetik maʼ tiʼ Dioos u taaloʼ. Wa k-ilik eʼesik baʼaxten maʼ maʼalob baʼax ku oksaj óolkeʼeʼ, leloʼ maas jeʼel u yáantajeʼ». Le máax k-kaʼanskoʼ, ¿baʼaxten jach kʼaʼabéet k-ilik ka u naʼat tubeel baʼax k-aʼaliktiʼoʼ? Le liibroaʼ ku núukik: «Wa k-ilik eʼesik baʼaxten jaaj le baʼax k-aʼalikoʼ, maʼ chéen ku beetik u kʼaʼamaliʼ, ku beetik xan u chʼenxikintaʼal tumen le máax uʼuykoʼonoʼ, kex yaanal bix u tuukul; tsʼoʼoleʼ ku beetik xan ka tuukulnak tuláakʼ súutukil tiʼ le baʼax t-aʼalajtiʼoʼ yéetel ku tsʼáaik xan tuʼux utiaʼal k-kaʼa tsikbal tu yéetel» (1 tiʼ Tesalonicailoʼob 4:6).
Kʼaʼabéet k-ilik kʼuchul tu puksiʼikʼal le máakoʼoboʼ
10. Paabloeʼ, ¿bix tu káajsil u tʼaan tu táan Agriipa utiaʼal u yeʼesik maʼ jaaj baʼax ku yaʼalal tu koontraoʼ?
10 Koʼox jach ilik tu kapiitulo 26 tiʼ Baʼaxoʼob bix tu yeʼesilak Paablo maʼ jaaj le baʼaxoʼob aʼalaʼab tu koontraoʼ. Ilawil bix úuchik u káajsik u tseʼektaj. Kex tumen kʼaas yilaʼal baʼax ku beetik reey Agriipa yéetel Béereniseiʼ, Paabloeʼ tu kaxtaj upʼéel baʼal maʼalob u yojel tiʼ le reey utiaʼal u yaʼaltiʼoʼ: «Jach kiʼimak in wóol tumen ku páajtal in tʼaan ta táan, ajaw Agriipa, utiaʼal in tokkimba tiʼ tuláakal u tak pooloʼob le judiiyoʼoboʼ, tu yóokʼol tuláakaleʼ tumen techeʼ a kʼaj óol tuláakal le baʼax suuk k-beetik ichil le judiiyoʼoboʼ yéetel le baʼaxoʼob k-baʼateltʼantikoʼ. Le oʼolaleʼ kin kʼáatik tiʼ teech ka a wuʼuyen yéetel chúukaʼan óolal» (Baʼaxoʼob 26:2, 3).
11. Paabloeʼ, ¿bix úuchik u tsikik Agriipa, yéetel baʼax utsiloʼob tu taasaj leloʼ?
11 ¿Ta wilaj wa Paabloeʼ tiaʼalaj «ajaw» tiʼ Agriipa utiaʼal u yeʼesik jach nojoch baʼal yanik? Bey túunoʼ, yéetel le tʼaanaʼ tieʼesaj tsiikil tiʼ (1 San Pedro 2:17). Paabloeʼ tiaʼalajeʼ, Agriipaeʼ, jach u kʼaj óol u leey le judiiyoʼoboʼ bey xan le baʼax suuk u beetkoʼoboʼ, kex chan talam u naʼataʼaloʼob; le oʼolaleʼ tiaʼalajeʼ jach kiʼimak yóol ikil u tʼaan tu táan. Kex Paablo utúul kristiaanoeʼ, leloʼ maʼ tu beetaj u yuʼubkuba maas noj baʼal tiʼ Agriipaeʼ (Tiʼ Filiposiloʼob 2:3). Letiʼeʼ tu kʼáataj tiʼ Agriipa ka uʼuyak yéetel chúukaʼan óolal, beyoʼ tu tsʼáaj tuʼux ka kʼaʼamak baʼax ken u yaʼale.
12. ¿Bix jeʼel a kʼuchul tu puksiʼikʼal le máakoʼob ken a tsikbalt le Reeino tiʼoboʼ?
12 Ken a tsikbalt le Reeino tiʼ wa máaxoʼ, ilawil u kʼuchul tu puksiʼikʼal le baʼax ka waʼaliktiʼoʼ, jeʼex tu beetij Paablo tu táan Agriipaoʼ. Utiaʼal lelaʼ jach unaj a weʼesik tsiikil tiʼ yéetel unaj a weʼesik a kʼáat a kʼaj óolt bix u kuxtal yéetel bix u tuukul (1 tiʼ Corintoiloʼob 9:20-23).
Kʼaʼabéet kaʼansik tu beel baʼax kiaʼalik u Tʼaan Dioos
13. ¿Bix jeʼel a beetik jeʼex Paablo utiaʼal a péeksik le máakoʼob ku beetoʼob le baʼax ka kaʼansiktiʼoboʼ?
13 Paabloeʼ u kʼáat kaʼach u péeks le máakoʼob ka u beetoʼob le baʼax ku tsikbaltiktiʼoboʼ (1 tiʼ Tesalonicailoʼob 1:5-7). Utiaʼal leloʼ tu yilaj u kʼuchul tu puksiʼikʼaloʼob, le tuʼux ku jóokʼol baʼax ku yuʼubik máakoʼ. Koʼox xakʼaltik tukaʼaten bix tʼaanajik tu táan Agriipa utiaʼal k-ilik bix úuchik u maʼalob kaʼansik baʼax kiaʼalik u Tʼaan Dioos le ka tʼaanaj tiʼ Moises yéetel tiʼe profeetaʼoboʼ (1 tiʼ Timoteo 2:15).
14. Tsol bix úuchik u káajal u kʼeʼexel u tuukul Agriipa tumen Paablo.
14 Paabloeʼ u yojel Agriipaeʼ ku yaʼalikuba judiiyo, kex chéen letiʼ ku taaskuba beyoʼ. Tumen túun u yojel le reey u kʼáaj óol u réelijion le judiiyoʼoboʼ, tu tsolaj tiʼeʼ, «mix juntéen [tiaʼalaj] mix baʼal jelaʼan tiʼ le baʼaxoʼob tu yaʼalaj le j-boʼobatoʼob [wa profeetaʼob] yéetel Moises» tiʼ baʼax yaan yil yéetel u kíimsaʼal yéetel u kaʼa kuxkíintaʼal le Mesiiyasoʼ (Baʼaxoʼob 26:22, 23). Tsʼoʼoleʼ ka tu kʼáataj tiʼ: «¿Ka woksaj óoltik, ajaw Agriipa, le baʼax tu yaʼalaj le j-boʼobatoʼoboʼ?». Agriipa túuneʼ anchaj upʼéel talamil tiʼ. Wa kiaʼalik maʼatech u kʼamik baʼax kiaʼalik le profeetaʼoboʼ, yaan yeʼesik maʼ jaaj wa judiiyo jeʼex u taaskubaoʼ. Baʼaleʼ, wa kiaʼalik ku éejemtik baʼax kiaʼalik Paabloeʼ, yaan yeʼesik táan u tsʼáaikuba tu tséel yéetel jeʼel xan u yaʼalal tsʼoʼok u beetkuba kristiaanoileʼ. Paablo túuneʼ utiaʼal u yeʼesik ku oksaj óolal Agriipaeʼ, tiaʼalaj: «Teneʼ in wojel ka woksaj óoltik». ¿Baʼax tu núukaj yéetel u jaajil yóol reey Agriipa? «Jumpʼíit tu binetaj a woksik tin pool in beetikimba kristiaanoil.» (Baʼaxoʼob 26:27, 28.) Kex reey Agriipa maʼ tu beetuba kristiaanoileʼ, le baʼax tiaʼalaj Paablooʼ kaaj u kʼuchul tu puksiʼikʼal (Tiʼ Hebreob 4:12).
15. ¿Baʼaxten Paabloeʼ páajchaj u káajsik upʼéel múuchʼulil teʼ Téesaloonikaoʼ?
15 Jeʼex tsʼoʼok k-ilkoʼ, Paabloeʼ maʼ chéen tu tsikbaltaj le maʼalob péektsiloʼ, tu yilaj xan u kʼexik u tuukul le máakoʼoboʼ. Ikil tu maʼalob kaʼansij baʼax kiaʼalik le Biibliaoʼ, jujuntúul tiʼe máaxoʼob chʼenxikintoʼ káaj u oksaj óoloʼob. Bey úuchik tu síinagogai Téesaloonikaoʼ; teʼeloʼ Paabloeʼ joʼopʼ u kaxtik le máakoʼob judiiyoʼob yéetel maʼ judiiyoʼob u chʼaʼamoʼob saajkil tiʼ Dioosoʼ. Baʼaxoʼob 17:2-4 kiaʼalik: «Jeʼel bix suuk u beetikeʼ, j-bin teʼ j-síinagogaoʼ ka j-tʼaanaj tu yéeteloʼob tiʼ óoxpʼéel saabado. Tu tsolajtiʼob yéetel le Kiliʼich Tsʼíiboʼoboʼ, le Kriistooʼ kʼaʼabéetchaj u mukʼyaj, ku tsʼoʼokol u kíimileʼ yanchaj u kaʼa púut kuxtal [...]. Tsʼeʼetsʼek túun tiʼ le judiiyoʼoboʼ oksaj óolnajoʼob». Paablo kaʼacheʼ ku tsolik tubeel baʼax ku kaʼansik utiaʼal ka naʼataʼak; ku yeʼesik xan kaʼach yéetel le Tsʼíiboʼoboʼ, Jesuseʼ letiʼe Mesiiyas úuch joʼopʼok u páaʼkoʼoboʼ. Úuchik u beetik beyoʼ, káaj upʼéel múuchʼulil teʼ Téesaloonikaoʼ.
16. ¿Bix jeʼel a maas kiʼikiʼ óoltik a kʼaʼaytik u Reeino Diooseʼ?
16 ¿Jeʼel wa u páajtal a maas kanik bix jeʼel a beetik u kʼexik u tuukul le máakoʼob ken a kaʼans baʼax kiaʼalik u Tʼaan Dioosoʼ? Wa ka maas kanikeʼ, yaan a maas kiʼikiʼ óoltik a kʼaʼaytik u Reeino Dioos yéetel a weʼesik baʼax ken u beete. Bey u yuʼubikuba le j-kʼaʼaytajoʼob tsʼoʼok u beetkoʼob le baʼax tsʼoʼok u yaʼalal utiaʼal ka maas meyajnak le Biiblia teʼ kʼaʼaytajoʼ.
17. Aʼal baʼax utsiloʼob ku taasik u meyajtoʼon le Biiblia ken kʼaʼaytnakoʼonoʼ, jeʼel u páajtal a waʼalik upʼéel baʼax uchaʼantecheʼ wa a tsolik le baʼax kiaʼalaʼal teʼ xóotʼolaʼ.
17 Utúul sukuʼun ku xíimbaltik le múuchʼuliloʼoboʼ, tu tsʼíibtaj: «Bejlaʼeʼ yaʼab sukuʼunoʼobeʼ u machmoʼob le Biiblia le tu kʼaʼaytajoʼob joonaj joonailoʼ, leloʼ tsʼoʼok u tsʼáaiktiʼob u páajtalil u xokkoʼob upʼéel teeksto tiʼ yaʼab máakoʼob. Lelaʼ tsʼoʼok u yáantaj ka ilaʼak tumen u yuumil naj yéetel tumen le j-kʼaʼaytajoʼ, ichil k-meeyjil kaʼansajeʼ maʼ chéen ku meyajtoʼon liibroʼob yéetel rebiistaʼobiʼ, ku meyaj xan toʼon le Biibliaoʼ». Baʼaleʼ, teʼ tuʼux kajaʼanoʼonoʼ, maʼalob ka k-il wa maʼ kʼaas u yilaʼal ka jóoʼkoʼon kʼaʼaytaj joonaj joonai tiaʼan le Biiblia t-kʼaboʼ. Baʼaleʼ, k-kʼáat ka kʼaj óoltaʼakoʼon k-kaʼansik tubeel baʼax kiaʼalik le Biibliaoʼ utiaʼal ka k-áant le máakoʼob u kʼamoʼob u tsikbalil le Reeinooʼ.
Kʼaʼabéet k-ilik le meeyjil kaʼansaj jeʼex yilik Dioosoʼ
18, 19. 1) ¿Bix u yilik Dioos le meyaj k-beetkoʼ, yéetel baʼaxten bey xan kʼaʼabéet k-ilkoʼ? 2) ¿Bix jeʼel k-áantik le máakoʼob ken kaʼa suunakoʼon k-xíimbaltoʼoboʼ? (Ilaʼak le kuaadro «Bix jeʼel k-áantik le máakoʼob ken kaʼa suunakoʼon k-xíimbaltoʼoboʼ», teʼ t.j. 13.)
18 Wa k-ilik le meeyjil kaʼansaj jeʼex yilik Dioosoʼ bey xan wa maʼ u náakal k-óoleʼ, jeʼel xan k-kʼuchul tu puksiʼikʼal le máakoʼoboʼ. Diooseʼ u kʼáat tuláakal máak ka «u chúukaʼan kʼaj óoltoʼob le jaajoʼ» (1 tiʼ Timoteo 2:3, 4). ¿Maʼ wa xan le k-kʼáat toʼoniʼ? Tsʼoʼoleʼ, Jéeobaeʼ chúukaʼan u yóol, leloʼ ku tsʼáaik u páajtalil tiʼ uláakʼ máakoʼob u kʼexik u tuukuloʼob (2 San Pedro 3:9). Le oʼolaleʼ, ken k-kaxt wa máax u kʼáat u yuʼub u tsikbalil le Reeinooʼ, maʼ xaaneʼ kʼaʼabéet k-xíimbaltik yaʼab u téenel utiaʼal ka páatak k-áantik. Ku bisik tieempo u kʼexik u kuxtal le máakoʼoboʼ, le oʼolaleʼ maʼ unaj u jáan náakal k-óoliʼ (1 tiʼ Corintoiloʼob 3:6). Le kuaadro ku kʼaabaʼtik «Bix jeʼel k-áantik le máakoʼob ken kaʼa suunakoʼon k-xíimbaltoʼoboʼ» ku yaʼaliktoʼon bix jeʼel k-beetikeʼ. Maʼ u tuʼubultoʼoneʼ mantatsʼ táan u kʼexpajal bix kuxlik le máakoʼoboʼ bey xan baʼax talmil ku máanskoʼob. Maʼ xaaneʼ yaʼab u téenel unaj k-suut xíimbaltoʼob utiaʼal k-kaʼa tsikbal tu yéeteloʼob, baʼaleʼ maʼalob ka k-beete, tumen beyoʼ táan k-tsʼáaiktiʼob u páajtalil u yuʼubkoʼob baʼax u kʼáat Dioos ka u beetoʼob utiaʼal u sáalbarkubaʼob. Le oʼolaleʼ, koʼoneʼex kʼáatik tiʼ Jéeoba Dioos le naʼat kʼaʼabéettoʼon utiaʼal k-maas kanik bix jeʼel k-beetik ka kʼaʼamak u tsikbalil le Reeino k-biskoʼ.
19 Wa yaan máax tsʼoʼok k-kaxtik taak u maas kaambal tiʼ le Reeinooʼ, ¿bix jeʼel u páajtal k-maas áantikeʼ? Tuláakʼ xookoʼ tiʼ ken k-il u núukiliʼ.
[Tsolajil]
^ xóot’ol 8 Utiaʼal a kanik bix jeʼel a beetik ka kʼaʼamak le baʼax ka waʼalikoʼ, ilawil le xookoʼob 48 yéetel 49 tiʼ le liibro Benefíciese de la Escuela del Ministerio Teocrático, jóoʼsaʼan tumen u j-jaajkunajoʼob Jéeoba.
[U kʼáatchiʼiloʼob le xookoʼ]
[U tsolajil le oochel teʼ táan juʼun 14]
¿Kʼajaʼan wa tech?
• ¿Baʼaxten jach maʼalob tʼaanajik Paablo tu táan Agriipa?
• ¿Bix jeʼel k-kʼuchul tu puksiʼikʼal le máakoʼoboʼ?
• ¿Baʼax kun áantkoʼon utiaʼal k-kaʼansik tubeel baʼax kiaʼalik u Tʼaan Dioos utiaʼal ka kʼuchkoʼon tu puksiʼikʼal le máakoʼoboʼ?
• ¿Bix k-eʼesik k-ilik le meeyjil kaʼansaj jeʼex u yilik Dioosoʼ?