Kʼaʼabéet k-kaʼansik maʼalob u Tʼaan Dioos
Kʼaʼabéet k-kaʼansik maʼalob u Tʼaan Dioos
«Tsʼáa a wóol a wantal tu táan Kʼu [wa Dioos] jeʼel bix juntúul j-meyaj kʼambeʼen, minaʼan baʼax oʼolal u chʼaʼik subtaleʼ, tumen ku tsolik maʼalob u tʼaaniloʼob le jaajoʼ.» (2 TIʼ TIMOTEO 2:15.)
1, 2. 1)Máax ku beetik upʼéel meyajeʼ, ¿baʼaxten kʼaʼabéet u nuʼukulil tiʼ? 2) ¿Baʼax meeyjil u jach tsʼáamaj yóol u beet le kristiaanoʼoboʼ, yéetel bix u yeʼeskoʼob ku kaxkoʼob táanil le Reeinooʼ?
MÁAX ku beetik upʼéel meyajeʼ kʼaʼabéet u nuʼukulil tiʼ utiaʼal u páajtal u beetik. Baʼaleʼ maʼ chéen jeʼel máakalmáak nuʼukulileʼ: kʼaʼabéet jach utiaʼal le meyaj ku beetkoʼ; tsʼoʼoleʼ kʼaʼabéet u yojel bix jeʼel u meyaj yéeteleʼ. Jeʼex ken k-beet upʼéel chan najeʼ, wa yaan tuʼux kʼaʼabéet k-bajik klaabos utiaʼal ka yanak u muukʼeʼ, maʼ chéen unaj u yantaltoʼon upʼéel máartiyo yéetel klaabosiʼ: kʼaʼabéet xan k-ojel bix jeʼel k-bajik le klaabos yoʼolal maʼ u lochloʼoboʼ, baʼaleʼ wa maʼ k-ojel k-mach tubeel le máartiyo utiaʼal k-bajik le klaabosooʼ jeʼel u talamtaltoʼoneʼ yéetel jeʼel tak u beetik k-xúumpʼattikeʼ. Baʼaleʼ, le meyajoʼ maʼalob u jóokʼol wa ku meyajtoʼon tubeel u nuʼukuliloʼob.
2 Toʼon xaneʼ yantoʼon upʼéel nojoch meyaj jach kʼaʼabéet k-beetik. Jéesukriistoeʼ tiaʼalaj tiʼ u j-kaambaloʼobeʼ ka u kaxtoʼob táanil u Reeino Dioos (San Mateo 6:33). ¿Bix jeʼel k-beetkeʼ? Yáaxeʼ kʼaʼabéet k-kʼubik óol kʼaʼayt u Reeino Dioos yéetel k-kaʼansik uláakʼ máakoʼob; kʼaʼabéet xan k-jóokʼsik teʼ Biiblia le baʼax k-kaʼanskoʼ, yéetel kʼaʼabéet k-beetik baʼax maʼalob (San Mateo 24:14; 28:19, 20; Baʼaxoʼob [Hechos] 8:25; 1 San Pedro 2:12). Utiaʼal k-beetik tubeel bey xan yéetel kiʼimak óolal le meyaj tsʼaʼantoʼonoʼ, unaj u yantaltoʼon u nuʼukuliloʼob yéetel unaj k-ojel bix jeʼel k-meyaj yéeteloʼobeʼ. Áapostol Paabloeʼ jach maʼalob úuchik u beetik le meyajaʼ yéetel tiaʼalaj tiʼ u yéet kristiaanoiloʼob ka u beetoʼob jeʼex letiʼeʼ (1 tiʼ Corintoiloʼob 11:1; 15:10). Bey tumen Paablo tu beetaj xan le meyaj k-beetkaʼ, ¿baʼax jeʼel k-kanik tiʼ letiʼeʼ?
Paabloeʼ jach tu kʼubaj yóol u kʼaʼayt le Reeinooʼ
3. ¿Baʼaxten jeʼel u páajtal k-aʼalik jach tu kʼubaj yóol Paablo teʼ kʼaʼaytajoʼ?
3 ¿Bix úuchik u meyaj Paablo? Letiʼeʼ jach tu kʼubaj yóol teʼ kʼaʼaytajoʼ, tumen tu tsʼáaj ojéelbil le maʼalob péektsil tiʼ yaʼab kaajoʼob yanoʼob tu baʼpach le Méediterraneooʼ. Paabloeʼ tiaʼalaj baʼaxten tu tsʼáaj yóol u beet le meyajaʼ: «In tiaʼal teneʼ maʼ u tiaʼal kaʼanal ichil in tseʼektik [wa in kʼaʼaytik] le maʼalob péektsiloʼ, tumen jach unaj in beetik. ¡Óotsilen wa maʼ tin tseʼektik le maʼalob péektsiloʼ!» (1 tiʼ Corintoiloʼob 9:16). ¿Chéen wa tu kaxtik u sáalbartik u kuxtal kaʼachi? Maʼ, maʼ chéen u yutsil ku kaxkiʼ, baʼax ku kaxtik kaʼacheʼ ka uʼuyak tumen tuláakal máak le maʼalob péektsiloʼ. Letiʼeʼ tu tsʼíibtaj: «Kin beetik tuláakal le baʼaloʼobaʼ tu yoʼolal le maʼalob péektsiloʼ, utiaʼal ka yanakten wa baʼax tiʼ le ayikʼalil ku taasik le maʼalob péektsiloʼ» (1 tiʼ Corintoiloʼob 9:23).
4. ¿Máakalmáak u jach nuʼukulil u kaʼansaj le kristiaanoʼoboʼ?
4 Paabloeʼ maʼ kaʼanchaj u yichiʼ, tumen u yojel maʼ chéen unaj u yantal u naʼatil utiaʼal u kaʼansaj tubeeliʼ. Jeʼex tiʼ utúul káarpintero jach kʼaʼabéet u máartiyoeʼ, tiʼ Paabloeʼ kʼaʼabéetchaj xan upʼéel maʼalob nuʼukul utiaʼal u yoksik u Tʼaan Dioos tu puksiʼikʼal le máakoʼoboʼ. ¿Máakalmáak le nuʼukulil meyajnajtiʼoʼ? U Tʼaan Dioos, le Kiliʼich Tsʼíiboʼoboʼ. Bejlaʼaʼ xaneʼ, u jach nuʼukulil utiaʼal k-kaʼansik uláakʼ máakoʼobeʼ, letiʼe Biibliaoʼ.
5. Utiaʼal ka kaʼansajnakoʼon maʼalobeʼ, ¿baʼaxten maʼ chéen unaj k-xokik u teekstosi le Biibliaoʼ?
5 Paabloeʼ u yojel utiaʼal u kaʼansik maʼalob u Tʼaan Diooseʼ maʼ chéen unaj u xokik u teekstosiliʼiʼ. Letiʼ kaʼacheʼ ku yilik u péeksik u tuukul máaxoʼob chʼenxikintik (Baʼaxoʼob 28:23). ¿Bix tu beetij? Tu yilaj u kaʼansiktiʼob maʼalob u Tʼaan Dioos utiaʼal ka u kʼamoʼob u tsikbalil le Reeinooʼ. Ku beetik u tuukuloʼob kaʼachi. Tu síinagogai Eefesoeʼ, óoxpʼéel meesoʼob «tseʼeknaj [wa kʼaʼaytnaj] yéetel kʼubaʼan óolal[iʼ], tuʼux tʼaanaj yéetel tu beetaj u yilaʼal maʼalob u ajawil Kʼu [wa u reeino Dioos] tumen le máakoʼoboʼ». «[Tsʼeʼetsʼekeʼeʼ] tu tsʼuʼuykintajoʼob u puksiʼikʼaloʼob, maʼ tu yóoltajoʼob u yoksaj óoltoʼobiʼ», baʼaleʼ uláakʼoʼobeʼ tu chʼenxikintoʼob baʼax tiaʼalaj. Yoʼolal le kʼaʼaytaj tu beetaj tu kaajil Eefesooʼ, u Tʼaan Diooseʼ joʼopʼ u kʼiʼitpajal yéetel u kʼaʼamal tumen le máakoʼoboʼ (Baʼaxoʼob 19:8, 9, 20).
6, 7. Paabloeʼ, ¿bix úuchik u nojoch baʼalkúuntik u meeyjil kaʼansaj, yéetel bix jeʼel k-beetik xan toʼoneʼ?
6 Tumen jach tu kʼubaj yóol teʼ kʼaʼaytajoʼ, Paabloeʼ tieʼesaj jach nojoch baʼal u yilik u meeyjil kaʼansaj (Tiʼ Romailoʼob 11:13). ¿Bix úuchik u nojoch baʼalkúuntik? Maʼ tu nojbaʼalkúuntuba yéetel le baʼax u yojloʼoʼ, mix suʼlakchaj u yaʼal ku meyajtik Dioosiʼ. Baʼaleʼ utiaʼal letiʼeʼ jach táaj maʼalob le meyaj tsʼaʼabtiʼoʼ. Jach maʼalob u kaʼansik u Tʼaan Dioos kaʼachi. Úuchik u jach chúukpajal u yóol meyajeʼ, tu tsʼáaj tu tuukul uláakʼ kristiaanoʼob ka u maas meyajtoʼob Dioos, bey xan úuchik u nojoch baʼalkúuntik u meeyjil kaʼansajoʼ.
7 Jeʼex Paabloeʼ, toʼon xaneʼ jeʼel u páajtal k-nojoch baʼalkúuntik k-meeyjil kaʼansaj wa ku meyajtoʼon mantatsʼ le Biibliaoʼ yéetel wa k-maʼalob kaʼansik baʼax kiaʼalik. Ken jóoʼkoʼon kʼaʼaytaj joonaj joonai wa uláakʼ bixeʼ, kʼaʼabéet k-ilik kaʼansik baʼax kiaʼalik le Biiblia tiʼ le jaytúul máak ku páajtaleʼ. ¿Bix jeʼel k-beetik u kʼamaʼal baʼax k-kaʼansikeʼ? Koʼox ilik óoxpʼéel bix jeʼel u beetaʼaleʼ: 1) kʼaʼabéet k-eʼesik tiʼ Dioos u taal le baʼax kiaʼalik le Biibliaoʼ; 2) kʼaʼabéet k-kanáantik bix k-tsolik baʼax kiaʼalik u Tʼaan Dioos yéetel bix jeʼel u beetik máak baʼax ku kaʼansikeʼ, yéetel 3) kʼaʼabéet k-maʼalob kaʼansik baʼax kiaʼalik le Biibliaoʼ.
8. Bejlaʼeʼ, ¿baʼax nuʼukuliloʼob ku meyajtoʼon utiaʼal k-kʼaʼaytik le Reeinooʼ, yéetel bix tsʼoʼok u meyajtechoʼob?
8 Bejlaʼeʼ, toʼoneʼexeʼ yantoʼon maas yaʼab nuʼukuloʼob utiaʼal k-kʼaʼaytik le Reeinooʼ ke le anchaj tiʼ Paablo tu kʼiiniloʼoboʼ. Yantoʼon liibroʼob, rebiistaʼob, foyeetoʼob, íimbitasionoʼob, trataadoʼob, kasetoʼob yéetel bideoʼob. Teʼ siiglo máanoʼ meyajnaj xan u mejen juʼuniloʼob kʼaʼaytaj, gramoofonos, kamionoʼob tsʼaʼan u bosiinailoʼob yéetel tak le raadiooʼ. Baʼaleʼ, le nuʼukul maas maʼalob yantoʼonoʼ letiʼe Biibliaoʼ, le oʼolaleʼ kʼaʼabéet k-ilik maʼalob kaʼansik baʼax kiaʼalik.
Le baʼax k-kaʼanskoʼ kʼaʼabéet u taal tiʼ le Biibliaoʼ
9, 10. Tiʼ baʼax yaan yil yéetel u meyajtoʼon u Tʼaan Diooseʼ, ¿baʼax jeʼel k-kanik tiʼ baʼax tiaʼalaj Paablo tiʼ Tíimoteoeʼ?
9 ¿Bix jeʼel u meyajtoʼon u Tʼaan Dioos bey upʼéel nuʼukul jach maʼalobeʼ? Utiaʼal lelaʼ kʼaʼabéet k-beetkeʼex le baʼax tiaʼalaj Paablo tiʼ Tíimoteooʼ: «Tsʼáa a wóol a wantal tu táan Kʼu [wa Dioos] jeʼel bix juntúul j-meyaj kʼambeʼen, minaʼan baʼax oʼolal u chʼaʼik subtaleʼ, tumen ku tsolik maʼalob u tʼaaniloʼob le jaajoʼ» (2 tiʼ Timoteo 2:15). ¿Baʼax u kʼáat u yaʼal «ku tsolik maʼalob u tʼaaniloʼob le jaajoʼ»?
10 Le tʼaan ich grieego ku suʼutul «ku tsolik maʼalob», u kʼáat yaʼal «toj u xootʼ» wa «toj u jolchʼaktik upʼéel bej», yéetel chéen utéen ku chíikpajal teʼ tu Tsʼíiboʼob le Kristiaanoʼob ich Grieegooʼ, chéen teʼ tʼaan tu beetaj Paablo tiʼ Tíimoteoaʼ. Le tʼaanaʼ jeʼel xan u meyaj utiaʼal u yaʼalaʼal ka jóokʼok toj upʼéel tʼoʼol paakʼaleʼ. U tʼoʼol paakʼal loʼolocheʼ jeʼel u taasik subtsilil tiʼ máax jach yojel u beet le meyajaʼ. Tiʼ Tíimoteoeʼ, yoʼolal u beetkuba bey utúul j-meeyjil «minaʼan baʼax oʼolal u chʼaʼik subtaleʼ», kʼaʼajsaʼab tiʼ jumpuliʼ maʼ unaj u jóokʼol tiʼe maʼalob kaʼansaj yaan tu Tʼaan Dioosoʼ. Baʼax ken u kaʼans yéetel baʼax ken u kʼaʼayteʼ kʼaʼabéet kaʼach u jóoʼsik teʼ Biibliaoʼ, maʼ chéen tiʼ u tuukuliʼ (2 tiʼ Timoteo 4:2-4). Beyoʼ yaan u yáantik le máakoʼob toj u puksiʼikʼaloʼoboʼ ka u yiloʼob tuláakal baʼal jeʼex u yilik Jéeobaoʼ maʼ jeʼex u yilik le máakoʼob kaʼanchajaʼan u naʼatoʼoboʼ (Tiʼ Colosailoʼob 2:4, 8). Bejlaʼeʼ bey xan kʼaʼabéet k-beetikoʼ.
Kʼaʼabéet k-kuxtal jeʼex k-kaʼanskoʼ
11, 12. ¿Baʼax yaan yil yéetel k-kaʼansik maʼalob u Tʼaan Dioos ka kuxlakoʼon jeʼex k-kaʼansikoʼ?
11 Utiaʼal k-maʼalob kaʼansik u Tʼaan Diooseʼ maʼ chéen unaj k-eʼesik baʼax kiaʼalikiʼ: kʼaʼabéet xan k-kuxtal jeʼex u yaʼalikoʼ. Tumen «u yéet meyajoʼon Jajal Dioos[eʼ]», maʼ unaj k-eʼesik bey táan k-meyajtik wa maʼ jaajeʼeʼ (1 Corintios 3:9, Le Tumben Nuptʼan, LTN). Le Biibliaoʼ kiaʼalik: «Teech ka kaʼansik uláakʼoʼobeʼ ¿maʼ ta kaʼansikaba teech? Teech ka tseʼektik maʼ unaj u yúuchul ookoleʼ. ¿Maʼ ta wookol teech? Teech ka waʼalik maʼ unaj u núupkʼebantal máakeʼ ¿maʼ ta núupkʼebantal teech? Teech ka pʼektik le beetbil kʼuoʼoboʼ [wa dioosoʼoboʼ] ¿maʼ ta wokoltik u ayikʼalil le u teemploʼob[oʼ]?» (Tiʼ Romailoʼob 2:21, 22). Upʼéel túun bix k-eʼesik táan k-kaʼansik maʼalob u tʼaan Diooseʼ letiʼe ken k-beet baʼax kiaʼalik le tʼaanaʼ: «Okes a wóol tiʼ yuumtsil [wa Jéeoba] yéetel tuláakal a puksiʼikʼal[,] maʼ a walab óoltik le naʼat yaan tiʼ techoʼ. Maʼ a tuʼubsik yuumtsil tiʼ tuláakal baʼax ka beetik, letiʼ túuneʼ bíin u bisech tiʼ u tojil bej» (Proverbios 3:5, 6).
12 Wa k-kaʼansik maʼalob u Tʼaan Diooseʼ ¿baʼax utsiloʼob jeʼel u taaskeʼ? Koʼoneʼex ilik le muukʼ yaan tiʼ u Tʼaan Dioos utiaʼal u kʼexik u kuxtal le máakoʼob uts u puksiʼikʼaloʼoboʼ.
U Tʼaan Diooseʼ yaan u muukʼ utiaʼal u kʼexik u kuxtal máak
13. Máax kʼamik u Tʼaan Diooseʼ, ¿baʼax ku péeksaʼal u beete?
13 Le kaʼansaj ku taal tiʼ u Tʼaan Dioosoʼ jach yaan u muukʼ utiaʼal u kʼexik u kuxtal máaxoʼob kʼamik baʼax kiaʼalik. Paabloeʼ tu yilaj jach yaan u muukʼ u Tʼaan Dioos yéetel tu yilaj xan bix úuchik u kʼexik u kuxtal yaʼab máakoʼob teʼ tu úuchben kaajil Téesaloonikaoʼ. Le oʼolaleʼ tiaʼalaj: «Mantatsʼ k-tsʼáaik nib óolal tiʼ Kʼu [wa Dioos], tumen le ka ta wuʼuyajeʼex u maʼalob péektsil Kʼueʼ, [...] ta kʼamajeʼex jeʼel bix u maʼalob péektsil Kʼueʼ maʼ jeʼel bix u maʼalob péektsil máakoʼobeʼ. Jach tu jaajileʼ u maʼalob péektsil Kʼu, le ku tsʼáaik u [yich tiʼ teʼex le] ka woksaj óoleʼexoʼ» (1 tiʼ Tesalonicailoʼob 2:13). Utiaʼal le kristiaanoʼob jeʼeloʼoboʼ maas jach táaj nojoch u kaʼanlil u naʼat Dioos tiʼ u naʼat wíinikoʼob. Bejlaʼa xaneʼ, u jaajil kristiaanoʼobeʼ bey xan u tuukuloʼoboʼ (Isaías 55:9). Le téesalonikailoʼoboʼ tu yeʼesoʼob bix unaj u tuukul u chuukan kristiaanoʼoboʼ, tumen tu «kam[oʼob] le maʼalob péektsiloʼ yéetel jumpʼéel kiʼimak óolal [...], kex tu tojoltaj[tiʼob] yaʼabkach mukʼyajiloʼob» (1 tiʼ Tesalonicailoʼob 1:5-7).
14, 15. ¿Bukaʼaj u muukʼ yaan le kaʼansaj ku taal tiʼ u Tʼaan Dioosoʼ, yéetel baʼaxten?
14 Le Biibliaoʼ yaan u muukʼ, jeʼex Jéeoba, le máax beetmailoʼ. Tiʼe «kuxaʼan Jajal Dioos» u taaloʼ, le máax yéetel u tʼaaneʼ tu beetaj «kaʼan yéetel tuláakal baʼax yaan», yéetel le tʼaanaʼ ku béeychajal jach jeʼex u yaʼalik Jéeobaoʼ (Hebreos 3:12, LTN; Salmo 33:6; Isaías 55:11). Utúul máak kaʼanchajaʼan u xok tiʼ baʼax yáan yil yéetel le Biibliaoʼ, tiaʼalaj: «Diooseʼ maʼ tu náachtal tiʼ u Tʼaan. Maʼ tu beetik bey maʼ u kʼaj óoleʼ. [...] Le oʼolaleʼ, [u Tʼaaneʼ] maʼ bey upʼéel baʼal minaʼan kuxtal tiʼ, maʼatech u yuʼubik baʼax ku beetaʼal yéeteleʼeʼ, tumen ku natsʼkoʼon tiʼe Dioos kuxaʼanoʼ».
15 ¿Bukaʼaj u muukʼ yaan le kaʼansaj ku taal tiʼ u Tʼaan Dioosoʼ? Upʼéel jach nojoch muukʼ. Jeʼex tu tsʼíibtaj Paablooʼ: «Tumen u tʼaan Kʼueʼ [wa Diooseʼ] kuxaʼan yéetel yaan u páajtalil. Asab yaan u yej tiʼ jeʼel máakalmáak máaskabil kaʼapʼéel u yejeʼ, yéetel ku yokol tak tu maas taamil u yóol yéetel u pixan máak, [...] yéetel ku jóokʼesik tiʼ sáasil u tuukuloʼob yéetel baʼaxoʼob u káat u beet le puksiʼikʼaloʼ» (Tiʼ Hebreob 4:12).
16. U Tʼaan Diooseʼ, ¿bukaʼaj u jelbesik máak?
16 Le kaʼansaj yaan tu Tʼaan Dioosoʼ «asab yaan u yej tiʼ jeʼel máakalmáak máaskabil kaʼapʼéel u yejeʼ». Le oʼolaleʼ, maas jach yaan u yej tiʼ jeʼel máakalmáak nuʼukulil meyaj beetaʼan tumen wíinikeʼ. U Tʼaan Diooseʼ ku yokol tak tu tsʼuʼ le puksiʼikʼaloʼ, beyoʼ ku jelbesik bix máak, ku kʼexik u tuukul yéetel baʼaxoʼob ku yuʼubik, yéetel ku yáantaj xan utiaʼal ka u beetuba utúul utsul j-meeyjil kʼamaʼan tumen Dioos. U Tʼaan Diooseʼ, ¡jach tun táaj yaan u muukʼ!
17. Tsol bix u kʼexik u kuxtal máak u Tʼaan Dioos.
17 U Tʼaan Diooseʼ ku yáantkoʼon k-ilba jach bixoʼon, maʼ chéen jeʼex k-ilikbaeʼ, wa chéen jeʼex k-eʼesikba tu táan máakoʼobeʼ (1 Samuel 16:7). Tak le kʼasaʼan máakoʼoboʼ, yaan kʼiineʼ ku yeʼeskubaʼob bey jach utsoʼob yéetel bey ku chʼaʼikoʼob óotsilaleʼ. Yaʼaboʼobeʼ maʼ tu yeʼeskoʼob jach bixoʼob tumen kʼaschajaʼan u tuukuloʼob. Le máakoʼob noj baʼal u taaskubaʼoboʼ ku beetkoʼob bey jach kabal u yóoloʼobeʼ chéen utiaʼal ka kiʼikiʼtʼantaʼakoʼob tumen u maasil. Baʼaleʼ u Tʼaan Diooseʼ ku jach chíikbesik baʼax yaan tu puksiʼikʼal máak, ku tsʼáaik muukʼ tiʼ máaxoʼob kabal u yóoloʼob utiaʼal ka u pʼat u úuchben kuxtaloʼob yéetel utiaʼal ka u «búukin[toʼob] le túumben wíinikoʼ beetaʼan jeʼel bix u kʼáat Kʼueʼ [wa Dioos] yéetel ku chíikbesaʼal yéetel jumpʼéel kuxtal tu jaajil toj yéetel kiliʼich» (Tiʼ Efesoiloʼob 4:22-24). U kaʼansajiloʼob u Tʼaan Diooseʼ jeʼel xan u yáantik máakoʼob jach saajkoʼob tʼaaneʼ ka u beetubaʼob j-jaajkunajoʼob tiʼ Jéeoba maʼ saajkoʼob u kʼaʼaytoʼob le Reeino yéetel chúukaʼan óolaloʼ (Jeremías 1:6-9).
18, 19. Yoʼolal baʼax kiaʼalaʼal teʼ xóotʼoloʼobaʼ wa yoʼolal baʼax a wilmaj ta meeyjil kʼaʼaytajeʼ, tsol bix jeʼel u kʼexik u tuukul máak le kaʼansaj ku taal teʼ Biibliaoʼ.
18 U Tʼaan Diooseʼ yaan u muukʼil u kʼexik u kuxtal jeʼel máaxakeʼ, jeʼex u yeʼesik le baʼax úuch tiʼ le koʼolelaʼ. Jujuntúul sukuʼunoʼob tiʼ u kaajil Phnom Penheʼ (Kambooya) kaʼatéen tiʼ upʼéel mees ku kʼaʼaytajoʼob kaʼach tu chan kaajil Kompong Cham. Teʼeloʼ utúul koʼolel ku beetik u x-páastoraileʼ, ka tu yuʼubaj u tʼaan u yéet páastoriloʼob tu koontra u j-jaajkunajoʼob Jéeobaeʼ, tu chʼaʼatuklaj u tʼaan yéetel le j-jaajkunajoʼob ken kaʼa taalakoʼob teʼ kaajoʼ. Letiʼeʼ yaʼab baʼax tu kʼáatajtiʼob yoʼolal jujumpʼéel kʼiimbesajiloʼob yéetel tu chʼenxikintaj u núukaʼal u kʼáatchiʼob yéetel le Biibliaoʼ. Letiʼ túuneʼ tiaʼalaj: «¡Beooraaʼ, tsʼoʼok in wilik maʼ jaaj baʼax aʼalaʼab tumen in wéet páastoriloʼob ta wóolaleʼexoʼ! ¡Letiʼobeʼ tiaʼaloʼob maʼatech u meyajteʼex le Biibliaoʼ, baʼaleʼ chéen le tsʼa beetkeʼex teʼ jaʼatskabaʼ!».
19 Le koʼolelaʼ kex aʼalaʼabtiʼ yaan u luʼsaʼal u beetik u x-páastoraileʼ, letiʼeʼ maʼ xuʼul u tsikbal tiʼ le Biiblia yéetel le j-jaajkunajoʼoboʼ. Le baʼax ku yojeltkoʼ tu tsikbaltaj tiʼ utúul u áamiga, u áamiga túunaʼ tu kʼamaj u xokik le Biiblia yéetel le j-jaajkunajoʼoboʼ. U áamiga túunaʼ, tumen jach kiʼimak yóol yéetel le baʼax ku kankeʼ, tiaʼan tiʼ upʼéel muchʼtáambal yéetel u yéet oksaj óoloʼobeʼ, tiaʼalaj: «¡Xokeʼex le Biiblia yéetel u j-jaakunajoʼob Jéeobaoʼ!». Maʼ úuch úuchuk lelaʼaʼ, le koʼolel x-páastora kaʼacheʼ bey xan uláakʼ máakoʼobeʼ káaj u xokkoʼob le Biiblia yéetel le j-jaajkunajoʼoboʼ.
20. Le baʼax úuch tiʼ utúul koʼolel tiʼ Gaanaeʼ, ¿bix yeʼesik le muukʼ yaan tiʼ u Tʼaan Dioosoʼ?
20 U muukʼ u Tʼaan Diooseʼ ku yilaʼal xan tiʼ baʼax úuch tiʼ Páaulina, utúul koʼolel kajaʼan Gaana. Utúul x-táanilkunsaj tsʼáaj xook tiʼ yéetel le liibro El conocimiento que lleva a vida eterna. * Páaulinaeʼ tu yilaj kʼaʼabéet u kʼexik u kuxtal, tumen le máax yéetel tsʼokaʼan u beeloʼ yaan uláakʼ u yatan, baʼaleʼ u yíicham yéetel tuláakal u láakʼtsililoʼobeʼ jach jumpuliʼ maʼ tu chaʼikoʼob u beetik kaʼachiʼ. Óotaʼab kʼexbil u tuukul tumen u áabuelo, utúul nojoch juees jach nojoch baʼal yanil tu igleesia, utiaʼal lelaʼ u áabueloeʼ tu jelbesaj bix unaj u naʼataʼal baʼax kiaʼalik San Mateo 19:4-6. Kex ku tsʼáaik saajkilil u tʼaanoʼob le nojoch jueesaʼ, Páaulinaeʼ tu naʼateʼ, le jueesaʼ táan u beetik jeʼex Sáatanas le ka tu jelbesaj baʼax kiaʼalik le Biiblia utiaʼal u taʼabsik Jesusoʼ (San Mateo 4:5-7). Kʼaʼaj xan tiʼeʼ, ka tʼaanaj Jesus tiʼe tsʼoʼokol beeloʼ tiaʼalajeʼ Diooseʼ tu beetaj xiib yéetel koʼolel, maʼ xiib yéetel koʼoleloʼobiʼ, yéetel ka tiaʼalaj xan yaan u kʼuchul u beetubaʼob upʼéeliliʼ bakʼeʼ, tʼaanaj tiʼ kaʼatúul maʼ tiʼ óoxtuliʼiʼ. Páaulinaeʼ chúukpaj yóol tiʼ baʼax u chʼaʼatukulmaj, tak ka tsʼaʼabtiʼ le diboorsio suuk u beetaʼal u tsʼáaik le íichamtsil yaan yaʼab u yatanoʼoboʼ. Maʼ úuchchaj túuneʼ, joʼopʼ u kʼaʼaytaj yéetel okjaʼanaji, lelaʼ jach tu taasaj kiʼimak óolal tiʼ.
Mantatsʼ kʼaʼabéet k-maʼalob kaʼansik u Tʼaan Dioos
21, 22. 1) Tumen táan k-kʼaʼaytik u Reeino Diooseʼ, ¿baʼax kʼaʼabéet k-ilik beetik? 2) ¿Baʼax ken k-kaneʼex tuláakʼ xookoʼ?
21 Le Biibliaoʼ upʼéel nuʼukul jach yaan u muukʼ ku tsʼáaiktoʼon u páajtalil k-áantik k-éet máakiloʼob u kʼex u kuxtaloʼob utiaʼal ka u natsʼubaʼob tu yiknal Jéeoba (Santiago 4:8). Jeʼex le máakoʼob jach maʼalob u beetik u meyajoʼob tumen u yojloʼob meyaj yéetel u nuʼukuloʼobeʼ, toʼon xaneʼ kʼaʼabéet k-ilik maʼalob kaʼansik u Tʼaan Dioos ken k-kʼaʼayt le Reeinooʼ, le meyaj kʼubéentaʼantoʼon tumen Dioosoʼ.
22 ¿Bix jeʼel k-maas maʼalob kaʼansik u Tʼaan Dioos utiaʼal k-áantik le máakoʼob ka u tsaypachtoʼob Kriistooʼ? Yáaxeʼ kʼaʼabéet k-ilik u kʼaʼamal baʼax k-kaʼansik. Teʼ tuláakʼ xookoʼ, yaan u tsoʼolol bix jeʼel k-kaʼansik u tsikbalil u Reeino Dioos utiaʼal ka kʼaʼamak tumen le máakoʼoboʼ.
[Tsolajiloʼob]
^ xóot’ol 20 Jóoʼsaʼan tumen u j-jaajkunajoʼob Jéeoba.
[U kʼáatchiʼiloʼob le xookoʼ]
[U tsolajil le oochel teʼ táan juʼun 8]
¿Kʼajaʼan wa tech?
• ¿Baʼax nuʼukuliloʼob yaan tiʼ máaxoʼob kʼaʼaytik le Reeinooʼ?
• Paabloeʼ, ¿bix úuchik u yeʼesik letiʼeʼ utúul jach maʼalob j-kʼaʼaytaj tiʼ le Reeinooʼ?
• ¿Baʼax u kʼáat u yaʼal u tsolol maʼalob u Tʼaan Dioos?
• U Tʼaan Diooseʼ, ¿bukaʼaj u muukʼ yaan?