U nojchil u chúukaʼan yaakunaj Jéeoba
U nojchil u chúukaʼan yaakunaj Jéeoba
«[Jéeobaeʼ] tuláakal yaakunaj [wa chúukaʼan u yaakunaj].» (SALMO 145:8, Los Salmos en Maya, LSM.)
1. ¿Tak tiʼ máaxoʼob kieʼesik u yaabilaj Dioos?
«JAJAL DIOOSEʼ [...] yaakunaj.» (1 San Juan 4:8, Le Tumben Nuptʼan.) Le jatsʼuts tʼaanaʼ kieʼeskeʼ Jéeobaeʼ ku góobernar yéetel yaabilaj. Tak le máaxoʼob maʼatech u beetkoʼob baʼax u kʼáat Diooseʼ ku jóoʼskoʼob utsil tiʼ le baʼaxoʼob ku tsʼáaikoʼ, jeʼex le Kʼiinoʼ yéetel u kʼáaxal le jaʼoʼ (San Mateo 5:44, 45). Tioʼolal le yaabilaj kieʼesik Dioos tiʼ wíinikoʼobeʼ, tak máaxoʼob pʼekmaileʼ wa ku kʼexik bix kuxlikoʼob yéetel ku natsʼkubaʼob yiknal Diooseʼ jeʼel xan u kʼamkoʼob kuxtal minaʼan u xuuleʼ (San Juan 3:16). Ichil upʼíit kʼiineʼ Jéeobaeʼ yaan u xuʼulsik tiʼe kʼasaʼan máakoʼob maʼ ken u yóot u kʼex bix kuxlikoʼoboʼ, baʼaleʼ le máaxoʼob yaabiltmailoʼ yaan u pʼáatloʼob kuxtal utiaʼal mantatsʼ teʼ túumben luʼum tuʼux tuláakal baʼal tojoʼ (Salmo 37:9-11, 29; 2 San Pedro 3:13).
2. ¿Bix le yaabilaj kieʼesik Jéeoba tiʼ máaxoʼob meyajtikoʼ?
2 U yaabilaj Jéeobaeʼ jach nojoch yéetel maʼ tu jáawal u yeʼesik tiʼ máaxoʼob meyajtik. Le tʼaan ich ebreo ku suʼutul «tuláakal yaakunaj» jach u kʼáat u yaʼaleʼ «chúukaʼan yaakunaj». Le u chúukaʼan yaakunaj Dioosaʼ jach nojoch kaʼach utiaʼal Dabid, u reeyil u úuchben kaajil Íisrael. Yoʼolal baʼaxoʼob úuch tiʼ Dabid yéetel tumen suuk u kʼaʼajsik kaʼach bix u biskuba Dioos yéetel le máaxoʼob yaabiltmailoʼ, kʼaaynaj tiʼ upʼéel baʼal jach u yojel: «[Jéeobaeʼ] tuláakal yaakunaj [wa chúukaʼan u yaakunaj]» (Salmo 145:8, LSM).
¿Máaxoʼob chúukaʼan u yaabilajoʼob tiʼ Dioos?
3, 4. 1) ¿Bix u yáantkoʼon le Salmo 145 k-kʼaj óolt máax le chúukaʼan u yaabilajoʼob tiʼ Jéeobaoʼ? 2) ¿Bix u kiʼikiʼtʼantaʼal Dioos tumen le máaxoʼob chúukaʼan u yaabilajoʼob tiʼoʼ?
3 Aana, u maama profeeta Samueleʼ, tiaʼalaj yoʼolal Jéeoba: «Letiʼ kanáantik u xáakʼaboʼob le j-oksaj óolaloʼob» wa le chúukaʼan u yaabilajoʼob tiʼ Dioosoʼ (1 Samuel 2:9). ¿Máaxoʼob chúukaʼan u yaabilajoʼob tiʼ Dioos? Dabideʼ tu núukaj ka tsʼoʼok u kiʼikiʼtʼantik Jéeoba: «Ka u yutsiltʼantechoʼob tuláakal le ku yoksik yóoloʼob tiʼ techeʼ» (Salmo 145:10, LSM). ¿Bix u yutsiltʼantaʼal Dioos tumen wíinikoʼob? Ku beetkoʼob ken u kiʼikiʼtʼantoʼob yéetel ken jatsʼuts tʼaanakoʼob tiʼ letiʼ.
4 Le oʼolaleʼ, máaxoʼob chúukaʼan u yaabilajoʼob tiʼ Diooseʼ ku kiʼikiʼtʼantkoʼob yéetel u chiʼob. ¿Tiʼ baʼax suuk u tʼaanoʼob ken xiʼikoʼob teʼ muchʼtáambaloʼoboʼ bey xan chéen ich u tsikbaloʼob? Tiʼ u Reeino Dioos. Le máaxoʼob chúukaʼan u yaabilajoʼob tiʼ Dioosoʼ ku tuukuloʼob jeʼex Dabideʼ; letiʼeʼ tu kʼayaj: «Ka tʼaanakoʼob tu yoʼolal u ayikʼalil a reeino [Jéeoba]. Ka úuchuk tʼaan tu yoʼolal a páajtalil» (Salmo 145:11, LSM).
5. ¿Baʼax eʼesiktoʼon Jéeobaeʼ ku yuʼubik ken kiʼikiʼtʼantaʼak tumen le chúukaʼan u yaabilajoʼob tiʼoʼ?
5 ¿Ku yuʼubik wa Jéeoba u kiʼikiʼtʼantaʼal tumen le máaxoʼob chúukaʼan u yaabilajoʼob tiʼoʼ? Ku yuʼubik. Diooseʼ ku chʼenxikintik u kiʼikiʼtʼantaʼal. Tiʼ upʼéel próofesiya yaan yil yéetel máaxoʼob meyajtik bejlaʼeʼ, Máalakiyaseʼ tu tsʼíibtaj: «Le máaxoʼob túun tsikik Kʼuoʼ [wa Jéeobaoʼ] j-tʼaanajoʼob tu baatsiloʼob, Yuumtsileʼ tu yuʼubaj maʼalob baʼaxoʼob ku yaʼalikoʼob. Tu táan túun Yuumtsileʼ j-tsʼíibtaʼab tiʼ jumpʼéel juʼun tuʼux ku kʼaʼajsaʼal máaxoʼob tsikik yéetel táan óoltik [wa kʼaʼajsik] Yuumtsil» (Malaquías 3:16). Jéeobaeʼ jach utstutʼaan u kiʼikiʼtʼantaʼal tumen le máaxoʼob chúukaʼan u yaabilajoʼob tiʼoʼ, yéetel maʼ tu tuʼubsikoʼob.
6. ¿Baʼax beetik u kʼaj óoltaʼal le máaxoʼob chúukaʼan u yaabilajoʼob tiʼ Dioosoʼ?
6 Le máaxoʼob chúukaʼan u yaabilajoʼob tiʼ Jéeobaoʼ maʼatech u sajaktaloʼob u káajsoʼob upʼéel tsikbal yéetel le máaxoʼob maʼatech u meyajkoʼob Jajal Dioosoʼ, lelaʼ uláakʼ baʼax beetik u kʼaj óoltaʼaloʼob. Le máaxoʼob chúukaʼan u yaabilajoʼob tiʼ Dioosoʼ ku yilik u «tsʼáa[ikoʼob] u yojéelt le máakoʼoboʼ [u] páajtalil yéetel u nojoch ayikʼalil [u] reeino» Jéeoba (Salmo 145:12, LSM). ¿Ka wilik wa a tsikbaltik u Reeino Dioos tiʼ jeʼel máaxak kex maʼ kʼaj óoleʼ? U góobernasion Diooseʼ minaʼan xuʼulul tiʼ, maʼ jeʼex u góobernasion chéen máakoʼob taʼaytak u xuʼulul tiʼeʼ (1 tiʼ Timoteo 1:17). Lelaʼ tuláakal máak jach kʼaʼabéet u séeb ojéeltik yoʼolal u tsʼáakubaʼob tu tséel u gobieerno Dioos. Dabideʼ tiaʼalaj: «A reeinoeʼ jumpʼéel reeino minaʼan xuʼulul tiʼ; a jalaʼachileʼ utiaʼal tuláakal chʼiʼibaloʼob» (Salmo 145:13, LSM).
7, 8. ¿Baʼax úuch tu jaʼabil 1914, eʼesik táan u reinaar Jéeoba yéetel u Reeino u Paal?
7 Tu jaʼabil 1914 anchaj baʼax oʼolal u maas úuchul tʼaan tiʼ u góobernasion Jéeoba. Teʼ jaʼab jeʼeloʼ, Jéesukriisto, u Paal Dabideʼ, beetaʼab reeyil tumen Jéeoba teʼ kaʼanoʼ, bey túunoʼ jeʼex u yaʼalmil Jéeobaoʼ tu béeykuntaj u reeino Dabid utiaʼal minaʼan u xuul (2 Samuel 7:12, 13; San Lucas 1:32, 33).
8 Le baʼax eʼesik táan u reinaar Jéeoba yéetel u reeino Jéesukriisto, u Paaleʼ, letiʼe k-ilik táan u yúuchul le baʼaxoʼob aʼalaʼan kun chíikbesik táan u góobernaroʼ. Upʼéel baʼax jach eʼeskeʼ letiʼe meyaj tiaʼalaj Jéesukriisto ken u beet le máaxoʼob chúukaʼan u yaabilajoʼob tiʼ Dioosoʼ: «U maʼalob péektsil le ajawiloʼ [wa reeinooʼ] bíin tseʼektaʼak tiʼ tuláakal yóokʼol kaab, utiaʼal ka kʼaj óoltaʼak tumen tuláakal kaajoʼob; letiʼ túun ken taalak u xuul» (San Mateo 24:3-14). Le máaxoʼob chúukaʼan u yaabilajoʼob tiʼ Dioosoʼ jach u kʼubmaj yóoloʼob u beetoʼob le meyajaʼ, le oʼolal bejlaʼeʼ yaan maas tiʼ seeis miyoones xiiboʼob, koʼoleloʼob yéetel paalaloʼob táan u beetkoʼob le nojoch meyaj mix bikʼin kun kaʼa beetbilaʼ. Maʼ kun xáantal ken xuʼulsaʼak tiʼe máaxoʼob maʼ u kʼáatoʼob yantal yáanal u Reeino Jéeobaoʼ (Apocalipsis 11:15, 18).
Baʼax utsiloʼob k-kʼamik tiʼ u góobernasion Jéeoba
9, 10. ¿Baʼaxten maas maʼalob u góobernar Jéeoba tiʼ u góobernar chéen máakoʼob?
9 Wa k-tsʼaamaj k-óol meyajt k-Jalaʼach Jéeobaeʼ yaan u taasiktoʼon yaʼab utsiloʼob (Salmo 71:5; 116:12). Upʼéel tiʼ letiʼobeʼ, letiʼe u kʼamikoʼon tumen k-tsikik yéetel k-beetik baʼax toj tu táanoʼ; uláakʼeʼ letiʼe u yantal naatsʼ tiʼ toʼonoʼ (Baʼaxoʼob [Hechos] 10:34, 35; Santiago 4:8). Le jalaʼach wíinkoʼoboʼ chéen ku biskubaʼob yéetel maʼalob máakoʼob, jeʼex le u nojchiloʼob le soldaadoʼoboʼ, le ayikʼaloʼoboʼ wa le déeportistaʼob wa áartistaʼob jach kʼaj óolaʼanoʼoboʼ. Upʼéel perioodiko tiʼ Aafrikaeʼ tu tsʼíibtaj baʼax tiaʼalaj u jalaʼachil upʼéel gobieerno yoʼolal le kaajoʼob jach óotsiltakoʼob yanoʼob teʼ tu luʼumiloʼ: «Kin wilik baʼaxten óoliʼ mix utúul tiʼ toʼon k-kʼáat xíimbalt le kaajoʼob jach óotsiltakoʼoboʼ yéetel baʼaxten maʼ t-tuukul yoʼolal le óotsiloʼoboʼ, tumen ken k-il bix kuxlikoʼobeʼ ku kʼaʼajsiktoʼon maʼ táan k-áantkoʼobiʼ yéetel ku beetik k-chʼaʼik subtal yoʼolal le koʼokoj koocheʼob yantoʼonoʼ».
10 U jaajileʼ, jujuntúul jalaʼach wíinikoʼobeʼ ku yilik u yáantkoʼob le máaxoʼob yaan yáanal u gobieernoʼoboʼ. Baʼaleʼ tak le jalaʼach maas jach utseʼ maʼ u kʼaj óol tuláakal le máaxoʼob ku góobernarkoʼoʼ. Tuukulnakoʼon tiʼ lelaʼ: «¿Yaan wa utúul jalaʼach táan u kaxtik yutsil tuláakal máaxoʼob ku góobernartik yéetel ka u yil u yáantik kaada utúul tiʼ letiʼob ken máankoʼob tiʼ talamiloʼob?». Yaan. Dabideʼ tu tsʼíibtaj: «Le Yuumtsiloʼ [wa Jéeobaeʼ] letiʼ áantik le máaxoʼob ku lúubuloʼ, yéetel ku líikʼesik le máaxoʼob ku lúubul yóoloʼoboʼ» (Salmo 145:14 LSM).
11. ¿Baʼax talmiloʼob ku aktáantik le máaxoʼob chúukaʼan u yaabilajoʼob tiʼ Dioosoʼ, yéetel máax áantkoʼob?
11 Le máaxoʼob chúukaʼan u yaabilajoʼob tiʼ Jéeobaoʼ ku aktáantkoʼob yaʼab talmiloʼob yéetel túumtajiloʼob, yaan ooraeʼ le baʼaloʼobaʼ ku taaloʼob tumen kʼeban wíinkoʼob yéetel tumen tiaʼanoʼob teʼ yóokʼol kaab yaan yáanal u kʼab Sáatanas, le Kʼaasilbaʼaloʼ (1 San Juan 5:19; Salmo 34:19). Yaan kristiaanoʼobeʼ ku chʼaʼapachtaʼaloʼob, yaan xaneʼ ku tsaʼayal yaayaj kʼojaʼanil tiʼob wa ku muʼyajtkoʼob u kíimil u láakʼtsiloʼob. Yaan kʼiineʼ ku lúubloʼob tiʼ baʼax maʼ maʼalobiʼ, lelaʼ ku beetik u jach «lúubul yóoloʼob». Baʼaleʼ, jeʼel baʼaxak talmil ka u aktáantoʼobeʼ, mix juntéen ku pʼaʼatloʼob x-maʼ áantajil tumen Jéeoba. Tsʼoʼoleʼ, Jéesukriistoeʼ láayliʼ bey xan u yaabiltik máaxoʼob ku góobernartikoʼ (Salmo 72:12-14).
Janal ku tsʼaʼabal tu kʼiinil
12, 13. Jéeobaeʼ, ¿tak tuʼux ku náakal u tsʼáaik baʼax kʼaʼabéet tiʼ «tuláakal le kuxaʼan baʼaloʼoboʼ»?
12 Yoʼolal u chúukaʼan yaakunajeʼ Jéeobaeʼ ku tsʼáaik tuláakal baʼax kʼaʼabéet tiʼ le máaxoʼob meyajtikoʼ, jeʼex le u síik baʼal u jaantoʼoboʼ. Dabideʼ tu tsʼíibtaj: «U yichoʼob tuláakal máakoʼobeʼ ku páaʼtajoʼob tiʼ teech [Jéeoba] utiaʼal ka a tsʼáa u [yoʼochoʼob] tu kʼiinil. Ka jeʼik a kʼabeʼ, yéetel maʼalob óolaleʼ ka naʼajkunsik tuláakal le kuxaʼan baʼaloʼoboʼ» (Salmo 145:15, 16, LSM). Tak tu kʼiinil táan u jach máansaʼal óotsilileʼ, Jéeobaeʼ ku tsʼáaik tu kʼiinil «le waaj» kʼaʼabéet tiʼ máaxoʼob chúukaʼan u yaabilajoʼob tiʼoʼ (San Lucas 11:3; 12:29, 30).
13 Dabideʼ tiaʼaleʼ Diooseʼ ku «naʼajkunsik tuláakal le kuxaʼan baʼaloʼoboʼ», leloʼ u kʼáat u yaʼaleʼ táakaʼan tak le baʼalcheʼoboʼ. Wa maʼ tioʼolal le yaʼabach xíiwoʼob ku jóoʼloʼob teʼ luʼum yéetel ichil le jaʼoʼ, bejlaʼa mix u baʼalcheʼiloʼob le kʼáaʼnáaboʼ, mix le chʼíichʼoʼoboʼ yéetel mix u baʼalcheʼiloʼob le luʼum jeʼel u páajtal u chʼaʼik yiikʼoʼobeʼ, yéetel bejlaʼa maʼ tu yantal baʼal u jaantoʼobeʼ (Salmo 104:14). Baʼaleʼ, Jéeobaeʼ ku tsʼáaiktiʼob tuláakal le baʼax kʼaʼabéettiʼoboʼ.
14, 15. Bejlaʼeʼ, ¿máax yéetel ku tsʼaʼabal le nuʼuktaj ku keʼetel bey janaloʼ?
14 Wíinikeʼ ku yuʼubik u kʼaʼabéetil u natsʼkuba tiʼ Dioos, le baʼalcheʼoboʼ maʼatech (San Mateo 5:3). Le oʼolal Jéeobaeʼ jach yaʼab baʼax ku tsʼáaik utiaʼal u yáantik le máaxoʼob chúukaʼan u yaabilajoʼob tiʼoʼ utiaʼal ka u natsʼubaʼob tu yiknal. Jesuseʼ, táanil tiʼ u kíimileʼ, tiaʼaleʼ letiʼe «palitsil chúukpajaʼan u yóol yéetel yaan u naʼat» kun tsʼáaik tiʼ u j-kaambaloʼob le «janal [...] tu yoorailoʼ» (San Mateo 24:45). U yalab tiʼe 144.000 yéeyanoʼob utiaʼal bin kaʼanoʼ, bejlaʼeʼ letiʼob le palitsil pʼaatloʼob way Luʼumeʼ, yéetel letiʼobeʼ Jéeobaeʼ ku tsʼáaik yaʼab nuʼuktaj ku keʼetel bey janaleʼ.
15 Bejlaʼeʼ, óoliʼ tuláakal máaxoʼob meyajtik Jéeobaeʼ yantiʼob upʼéel Biiblia maʼ talam u naʼataʼaliʼ yéetel jach maʼalob sutaʼanil ichil u tʼaanoʼob: le Traducción del Nuevo Mundo de las Santas Escrituras. ¡Bukaʼaj uts tsʼoʼok u taasik! Táan xan u jóoʼsaʼal u miyoonesi juʼunoʼob yéetel liibroʼob utiaʼal u xoʼokol le Biiblia ichil tresieentos tʼaanoʼoboʼ. Leloʼobaʼ tsʼoʼok u taasik yaʼab utsil tiʼ tuláakal le máaxoʼob tu jaajil táan u meyajtkoʼob Dioosoʼ. ¿Máax unaj u kiʼikiʼtʼantaʼal yoʼolal lelaʼ? Jéeoba Dioos; yoʼolal tumen chúukaʼan u yaakunajeʼ ku tsʼáaiktoʼon yéetel u palitsil le «janal [...] tu yoorailoʼ». Yoʼolal le baʼax ku tsʼáaik Dioosaʼ ku «naʼajkunsik» tuláakal máaxoʼob tiaʼanoʼob ich u kaajal ku keʼetel bey upʼéel páaraisoeʼ. Le máaxoʼob meyajtik Dioosoʼ kiʼimak yóoloʼob tumen maʼ kun xáantaleʼ yaan u suʼutul Páaraisoi le Luʼumaʼ (San Lucas 23:42, 43).
16, 17. 1) ¿Baʼax eʼesik ku kʼuchul tu kʼiinil le nuʼuktajoʼob ku keʼetel bey janaloʼ? 2) Le Salmo 145, ¿bix u yeʼesik máaxoʼob chúukaʼan u yaabilajoʼob tiʼ Diooseʼ jelaʼan u tuukuloʼob tiʼ le baʼax kiaʼalik Sáatanas yoʼolal u góobernasion Jéeobaoʼ?
16 Koʼox ilik upʼéel baʼax eʼesik jach ku kʼuchul tu kʼiinil le nuʼuktajiloʼob ku keʼetel bey janaloʼ. Tu jaʼabil 1939 káaj le u Kaʼapʼéel Nojoch Baʼateltáambal tu luʼumil Euroopaoʼ. Teʼ jaʼab xanoʼ, teʼ The Watchtower 1 tiʼ nobieembreoʼ jóokʼ upʼéel xook ku kʼaabaʼtik “Neutralidad” (ich kastlaneʼ jóokʼ tu meesil maarso tiʼ 1940). Yoʼolal le baʼax tu tsoloʼ, u j-jaajkunajoʼob Jéeoba tiʼ tuláakal yóokʼol kaabeʼ kʼuch u naʼatoʼob kʼaʼabéet u jach chúukpajal u yóoloʼob utiaʼal maʼ u yáantkoʼob mix upʼéel tiʼ le luʼumoʼob ku baʼateloʼoboʼ. Lelaʼ tu beetaj u pʼuʼujul u jalaʼachil le luʼumoʼob tu yoksubaʼob teʼ baʼateʼel xáanchaj seeis jaʼaboʼoboʼ. Kex maʼ tu chaʼabal u kʼaʼaytajoʼob yéetel ku chʼaʼapachtaʼaloʼob kaʼacheʼ, le máaxoʼob chúukaʼan u yaabilajoʼob tiʼ Dioosoʼ maʼ xuʼul u kʼaʼaytkoʼob u maʼalob péektsilil u Reeino Dioosiʼ. Le oʼolal tu jaʼabil 1939 tak tu jaʼabil 1946 kiʼikiʼtʼantaʼaboʼob tumen Jéeoba; 157% maas yaʼabchajikoʼob. Le úuchik u chúukpajal yóoloʼob táan le baʼateltáambal jeʼeloʼ, tak bejlaʼa ku yáantaj utiaʼal ka kʼaj óoltaʼak máaxoʼob táan u meyajkoʼob Dioos jeʼex u kʼáateʼ (Isaías 2:2-4).
17 Le nuʼuktajoʼob ku tsʼáaik Jéeobaoʼ maʼ chéen ku kʼuchul tu kʼiiniliʼ, ku taasik xan kiʼimak óolal. Le táan le nojoch baʼateltáambaloʼ, le máaxoʼob meyajtik Dioosoʼ líiʼsaʼab u yóoloʼob u beetoʼob upʼéel meyaj maas jach kʼaʼanan tak tiʼ u sáalbarkubaʼob. Jéeobaeʼ tu yáantaj u naʼatoʼobeʼ baʼax jach kʼaʼanan u yeʼesaʼal tu táan tuláakaleʼ, teʼ kaʼan yéetel teʼ Luʼumaʼ, Jéeobaeʼ toj u góobernasion. Tuláakal j-jaajkunajeʼ, ku kiʼimaktal yóol u yojéeltik ikil u chúukpajal yóol u meyajt Jéeobaeʼ ku yáantaj utiaʼal ka kʼaʼamak u góobernasion Jéeoba, yéetel ku yeʼesik maʼ jaaj baʼax kiaʼalik le Kʼaasilbaʼaloʼ (Proverbios 27:11). Sáatanaseʼ ku tʼaan kʼaas tiʼ bix u góobernar Jéeoba, baʼaleʼ le máaxoʼob chúukaʼan u yaabilajoʼob tiʼ Dioosoʼ maʼatech u xuʼulul u kʼaʼaytkoʼob «toj [...] tuláakal u beeloʼob» Jéeoba Dioos (Salmo 145:17, LSM).
18. ¿Baʼax uláakʼ tsʼoʼok u tsʼáaik Jéeoba jach tu kʼiinil yéetel ku taasiktoʼon kiʼimak óolal?
18 Uláakʼ baʼax tsʼoʼok u tsʼáaik Jéeoba jach tu kʼiinil yéetel ku muʼukʼaʼankúuntik k-oksaj óolaleʼ letiʼe liibro Acerquémonos a Jehová. Le liibroaʼ jóoʼsaʼab tiʼ le muchʼtáambaloʼob noj baʼpaach tu kʼaabaʼtaj «J-kʼaʼaytajoʼob jach u kʼubmaj yóoloʼob u tsʼaʼob ojéelbil le Reeinooʼ», beetaʼaboʼob tuláakal yóokʼol kaab tu jaʼabiloʼob 2002 yéetel 2003. Le liibroaʼ, ku taal tiʼe «palitsil chúukpajaʼan u yóol yéetel yaan u naʼat[oʼ]» yéetel ku jóoʼsaʼal tumen u j-jaakunajoʼob Jéeoba, ku tʼaan tiʼ u jatsʼuts moodos Jéeoba Dioos, jeʼex le ku yaʼalal teʼ Salmo 145. Le jach maʼalob liibroaʼ yaan u yáantik le máaxoʼob chúukaʼan u yaabilajoʼob tiʼ Dioos ka u maas natsʼubaʼob tiʼ letiʼoʼ.
Bejlaʼeʼ jach u kʼiinil k-natsʼikba tiʼ Jéeoba
19. ¿Baʼax tsʼoʼok u náatsʼal u kʼiinil, yéetel bix jeʼel k-púutsʼul tiʼeʼ?
19 Jach táan u náatsʼal u kʼiinil u yeʼesaʼal chéen Jéeoba unaj u góobernar. Jeʼex yaʼalik le kapiitulo 38 tiʼ Ezequieloʼ, Sáatanaseʼ yaan u beetkuba Goog tiʼ u luʼumil Magog yéetel yaan u chʼaʼapachtik u kaajal Dioos teʼ tuláakal yóokʼol kaabaʼ utiaʼal yilik u kʼebantaloʼob tu táan Dioos. Teʼ kʼiin jeʼeloʼ, le máaxoʼob meyajtik Jéeobaoʼ yaan u maas kʼaʼabéettal u chʼaʼachiʼitkoʼob u kʼaabaʼ Dioos tu jaajil yóoloʼob yéetel u awat kʼáatkoʼob áantaj tiʼ letiʼ. Teʼ kʼiin xanoʼ, ¿yaan wa u kʼaʼajsik Jéeoba le tsiikil yéetel le yaabilaj ku yeʼesaʼal tiʼoʼ? Yaan. Le Salmo 145 ku jaajkúuntiktoʼon: «Le Yuumtsiloʼ [wa Jéeobaeʼ] naatsʼ yanil tiʼ máaxoʼob tʼanik, tiʼ le máaxoʼob tʼanik yéetel jaaj óolaloʼ. Letiʼeʼ ku béeykunsik u tsʼíibolaloʼob le máaxoʼob tsikikeʼ; le ken u kʼáatoʼob áantaj tiʼeʼ, ku yuʼubikoʼob yéetel ku tokikoʼob. Yuumtsileʼ ku kanáantik le máaxoʼob yaakuntmaileʼ, baʼaleʼ ku xuʼulsik le kʼaakʼas máakoʼoboʼ» (Salmo 145:18-20, LSM).
20. ¿Bix kun béeychajal u tʼaaniloʼob Salmo 145:18-20?
20 Jach yaan u kiʼimaktal k-óol ken sáalbartaʼakoʼon teʼ kʼiin ken xuʼulsaʼak tiʼe kʼasaʼan máakoʼoboʼ. Teʼ kʼiin jach naatsʼ yaniloʼ, Jéeobaeʼ chéen yaan u chʼenxikintik «le máaxoʼob tʼanik yéetel jaaj óolaloʼ». Baʼaleʼ, maʼ ken u yuʼub u kʼáat óolal le j-kaʼapʼéel ichoʼoboʼ. Le Biibliaoʼ kieʼesik chéen kunel ka chʼaʼachiʼitaʼak u kʼaabaʼ Dioos tumen le kʼasaʼan máakoʼob tu kʼiinil u pʼis óolaloʼ (Proverbios 1:28, 29; Miqueas 3:4; San Lucas 13:24, 25).
21. Le máaxoʼob chúukaʼan u yaabilajoʼob tiʼ Dioosoʼ, ¿bix yeʼeskoʼob utstutʼaanoʼob u chʼaʼachiʼitkoʼob u kʼaabaʼ Dioos?
21 Le máaxoʼob eʼesik tsiikil tiʼ Jéeobaeʼ, bejlaʼa jach u kʼiinil u «tʼanik[oʼob] yéetel jaaj óolal[eʼ]». Le máaxoʼob chúukaʼan u yaabilajoʼob tiʼ Dioosoʼ utstutʼaan u chʼaʼachiʼitkoʼob u kʼaabaʼ ken payalchiʼinakoʼob, ken táakpajkoʼob teʼ muchʼtáambaloʼoboʼ, ichil u tsikbaloʼob yéetel maʼatech u chʼaʼikoʼob saajkil u tsʼáaʼob kʼaj óoltbil u kʼaabaʼ Dioos ken jóoʼkoʼob kʼaʼaytaj (Tiʼ Romailoʼob 10:10, 13-15).
22. ¿Baʼaxten jach kʼaʼanan k-kanáantikba tiʼ le tuukuloʼob yéetel u tsʼíibolaloʼob le yóokʼol kaabaʼ?
22 Utiaʼal maʼ u xuʼulul k-bisikba yéetel Jéeobaeʼ, kʼaʼabéet k-kanáantikba tiʼ tuláakal baʼax jeʼel u beetik k-náachtal tiʼeʼ, jeʼex le u kaxtaʼal ayikʼaliloʼ, le náaysaj óoloʼob maʼ maʼalobtakoʼ, le maʼ u saʼasaʼal u siʼipil yaanal máakoʼ wa le maʼ u chʼaʼabal óotsililoʼ (1 San Juan 2:15-17; 3:15-17). Wa maʼ k-kanáantikba tiʼ le baʼaloʼobaʼ, jeʼel u beetik k-lúubul tiʼ upʼéel nojoch kʼeban ka u náachkuntoʼon tiʼ Jéeobaeʼ (1 San Juan 2:1, 2; 3:6). Kʼaʼajaktoʼoneʼ, chéen wa ku chúukpajal k-óol meyajt Jéeobaeʼ, chéen bey jeʼel u yeʼesiktoʼon mantatsʼ u chúukaʼan yaakunajoʼ (2 Samuel 22:26).
23. ¿Baʼax ken u kʼam le máaxoʼob chúukaʼan u yaabilajoʼob tiʼ Dioosoʼ?
23 Kʼaʼabéet maʼ u tuʼubultoʼon baʼax ken u kʼam le máaxoʼob chúukaʼan u yaabilajoʼob tiʼ Jéeobaoʼ. Wa k-beetik beyoʼ yaan k-antal ichil le máaxoʼob kiʼikiʼtʼantik Jéeoba «sáamsamal[oʼ]» yéetel utiaʼal tak «kʼiinoʼob minaʼan u xuul» (Salmo 145:1, 2, LSM). Le beetkeʼ, utiaʼal k-kʼamik le kuxtal minaʼan u xuuloʼ, kʼaʼabéet k-ilik k-pʼáatleʼex ichil u yaabilaj Dioos (Judas 20, 21). Jéeobaeʼ táan u yeʼesiktoʼon u jatsʼuts moodos; upʼéel tiʼ letiʼobeʼ letiʼe chúukaʼan yaakunaj kieʼesik tiʼe máaxoʼob yaabiltmailoʼ. Le oʼolal kʼaʼabéet k-tuukul jeʼex tu tsʼíibtil Dabid teʼ Salmo 145: 21: «In chiʼeʼ ka u kiʼikiʼtʼant le Yuumtsiloʼ. Tuláakal máaxoʼob ka u yutsil tʼantoʼob u kiliʼich kʼaabaʼ, [bejlaʼeʼ] yéetel utiaʼal kʼiinoʼob minaʼan u xuul».
[U kʼáatchiʼiloʼob le xookoʼ]
[U tsolajil le oochel teʼ táan juʼun 14]
¿Baʼax jeʼel a núukikeʼ?
• ¿Bix u yáantkoʼon le Salmo 145 ka k-kʼaj óolt máaxoʼob chúukaʼan u yaabilajoʼob tiʼ Dioos?
• ¿Bix u tsʼáaik Jéeoba baʼax kʼaʼabéet tiʼ tuláakal baʼal kuxaʼan?
• ¿Baʼaxten kʼaʼabéet k-natsʼikba tiʼ Jéeoba?