«Yuumtsil, kaʼansoʼon payalchiʼ»

«Aʼalaʼab tiʼ tumen juntúul tiʼ u j-kaambaloʼob: Yuumtsil, kaʼansoʼon payalchiʼ.» (SAN LUCAS 11:1.)

1. ¿Baʼaxten utúul tiʼ u j-kaambaloʼob Jesuseʼ, tu kʼáataj ka kaʼansaʼakoʼob payalchiʼ?

TU JAʼABIL 32 t.T-kʼ. (teʼ T-kʼiinoʼobaʼ) utúul tiʼ u j-kaambaloʼob Jesuseʼ tu yilaj táan u payalchiʼ u J-kaʼansaj. Baʼaleʼ, maʼ tu yuʼubaj baʼax kiaʼalik Jesus tiʼ u Taataiʼ, tumen maʼ xaaneʼ táan kaʼach u mukul payalchiʼ. Ka tsʼoʼok u payalchiʼ Jesuseʼ, le u j-kaambalaʼ tu kʼáat óoltaj tiʼ: «Yuumtsil, kaʼansoʼon payalchiʼ» (San Lucas 11:1). ¿Baʼax beet u kʼáatik lelaʼ? Utiaʼal le úuchben judiiyoʼoboʼ, le payalchiʼoʼ upʼéel baʼal jach suukaʼan ich u áadorasionoʼob yéetel ich u kuxtaloʼob. Tsʼoʼoleʼ, tu liibroi Salmos yéetel tiʼ uláakʼ liibroʼob yanoʼob ichil le Kiliʼich Tsʼíiboʼob ich Ebreooʼ ku chíikpajal yaʼab payalchiʼobiʼ. Le beetik túuneʼ, le ka tu kʼáataj tiʼ Jesus ka kaʼansaʼak payalchiʼeʼ maʼ u kʼáat yaʼal wa maʼ u yojel payalchiʼi. Maʼ xaaneʼ, u yuʼubmaj bix suukaʼanil u payalchiʼ le j-kʼiinoʼob judiiyoʼoboʼ. Baʼaleʼ, le ka tu yilaj bix u payalchiʼ Jesuseʼ, tu yileʼ maʼ jeʼex u payalchiʼ le j-kʼiinoʼob chéen utiaʼal u yeʼeskoʼob bey jach utsul máakoʼobeʼ (San Mateo 6:5-8).

2. 1) ¿Baʼax eʼesik Jesuseʼ maʼ u kʼáat kaʼach ka payalchiʼitaʼak upʼéeliliʼ bix le paadrenuestrooʼ? 2) ¿Baʼaxten maʼalob ka k-kan bix kʼaʼabéet k-payalchiʼ?

² Óoliʼ diéesiocho meses táanil tiʼ u kʼáataʼal tiʼ Jesus lelaʼ, teʼ tseʼektaj tu beetaj teʼ puʼukoʼ, tu kaʼansaj tiʼ u j-kaambaloʼob baʼaxoʼob jeʼel u páajtal u kʼáatkoʼob ich payalchiʼeʼ. Le payalchiʼaʼ kʼaj óoltaʼanileʼ Paadrenuestro (San Mateo 6:9-13). Maʼ xaaneʼ, le j-kaambalaʼ maʼ bin le kʼiin ka kaʼansaʼab le payalchiʼaʼ, le oʼolal túuneʼ Jesuseʼ tu kaʼa tsolaj baʼaxoʼob jeʼel u páajtal u kʼáataʼal ich payalchiʼeʼ. Jesuseʼ maʼ u takáaliliʼ bix úuchik u kaʼa aʼalikiʼ, le oʼolal jeʼel u páajtal yaʼalaʼaleʼ, le payalchiʼaʼ maʼ tu tsʼáaj utiaʼal payalchiʼitbil upʼéeliliʼ bixiʼ (San Lucas 11:1-4). Toʼon xaneʼ, jeʼex le j-kaambal maʼ tiaʼalaʼal u kʼaabaʼaʼ, láayliʼ taak k-kanik bix kʼaʼabéet k-payalchiʼ utiaʼal k-maas natsʼikba tiʼ Jéeobaeʼ. Le oʼolaleʼ, koʼoneʼex tʼaan tiʼ u payalchiʼi le paadrenuestrooʼ, le tsʼíibtaʼab tumen Máateooʼ. Sieete baʼax ku kʼáataʼaliʼ, óoxpʼéeleʼ yaan yil yéetel baʼax ken u beet Dioos, uláakʼ kampʼéeloʼ yaan yil yéetel baʼaxoʼob kʼaʼabéettak tiʼ toʼon. Teʼ xook jeʼelaʼ yaan k-tʼaan tiʼ le yáax óoxpʼéeloʼ.

Utúul taatatsil jach yaan u yaabilaj

3, 4. Ken payalchiʼinakoʼoneʼ, ¿baʼax k-eʼesik ken k-aʼal tiʼ Jéeoba: «K-Yuum»?

³ Jesuseʼ tu kaʼanseʼ le baʼax k-aʼalik ich payalchiʼoʼ unaj yeʼesik naatsʼ yaniloʼon tiʼ Jéeoba yéetel kʼaʼabéet xan yeʼesik k-tsʼáaik tsiikil tiʼ. Utiaʼal yutsil le j-kaambaloʼob yanchajoʼob tu yéetel teʼ puʼukoʼ, Jesuseʼ tu kaʼansaj ka u natsʼuba máak tiʼ Jéeoba yéetel le tʼaanoʼobaʼ: «K-Yuum yanech teʼ kaʼanoʼ» (San Mateo 6:9). Utúul máak  kaʼanchajaʼan u xookeʼ, kiaʼalikeʼ, kex wa ich ebreo wa ich áarameo tʼaanajik Jesuseʼ, le tʼaan meyajnaj tiʼ utiaʼal u yaʼalik: «Yuum» letiʼe tʼaan ku meyaj tiʼ utúul chan paal utiaʼal u tʼanik u taataoʼ, «tʼaanaj jeʼex u tʼaan utúul chan paaleʼ». K-aʼalik tiʼ Jéeoba «K-Yuum[eʼ]» ku yeʼesik k-yaabilmaj yéetel maʼ saajkoʼon k-natsʼba tu yiknaliʼ.

⁴ Ken k-aʼal «K-Yuum», táan k-aʼalik tiaʼanoʼon ich upʼéel nojoch láakʼtsilil tuʼux yaan xiiboʼob yéetel koʼoleloʼob ku éejemtkoʼob Jéeoba tsʼaamil u kuxtaloʼob (Isaías 64:8; Baʼaxoʼob [Hechos] 17:24, 28). Le kristiaanoʼob yéeyaʼanoʼob tumen u kiliʼich muukʼ Dioosoʼ, ku kʼaʼamloʼob bey «u paalaloʼob Jajal Dioos[eʼ]», le oʼolal jeʼel u páajtal u yaʼalkoʼob tiʼeʼ: «Taata, Yuumbil» wa Yuumtsil (Romanos 8:14, 15, Le Tumben Nuptʼan, LTN). U miyoonesi máakoʼob tsʼoʼok u nupkubaʼob yéeteloʼobeʼ, tsʼoʼok u yokjaʼob utiaʼal u yeʼeskoʼob tsʼoʼok u kʼubik u kuxtaloʼob tiʼ Jéeoba. Tuláakal le «uláakʼ j-tamanoʼob[aʼ]» jeʼel u páajtal u payalchiʼob tiʼ Jéeoba tu kʼaabaʼ Jesuseʼ, yéetel u yaʼalkoʼob xan: «K-Yuum» (San Juan 10:16; 14:6). Mantatsʼ jeʼel u páajtal k-natsʼikba ich payalchiʼ tiʼ k-Taata yaan teʼ kaʼanoʼ utiaʼal k-kiʼikiʼtʼantik, utiaʼal k-tsʼáaik u nib óolalil tiʼ yoʼolal u yutsil yéetel utiaʼal k-pʼatik tuláakal k-yaayam óolaloʼob tu kʼab, tumen letiʼeʼ yaan u yáantkoʼon (Tiʼ Filiposiloʼob 4:6, 7; 1 San Pedro 5:6, 7).

Yaabilaj yoʼolal u kʼaabaʼ Jéeoba

5. ¿Baʼax ku yáax kʼáataʼal ichil u payalchiʼi le paadrenuestrooʼ, yéetel baʼaxten letiʼe kʼaʼabéet u yáax kʼáataʼaloʼ?

⁵ Baʼax maas jach kʼaʼananeʼ letiʼe yáax baʼax tu kʼáataj Jesusaʼ: «Kiliʼichkúunsaʼak a kʼaabaʼ» (San Mateo 6:9). Baʼax kʼaʼabéet k-kaxtik táanileʼ ka kiliʼichkúunsaʼak u kʼaabaʼ Dioos, tumen k-yaabilmaj yéetel jach k-pʼeek tuláakal subtsilil tsʼoʼok u taasaʼal yóokʼol u kʼaabaʼ. Sáatanaseʼ, le ka tu beetaj maʼ u yuʼubkoʼob tʼaan Adan yéetel Eebaeʼ, tʼaanaj kʼaas tiʼ Jéeoba tumen tu tsʼáaj naʼatbil maʼ maʼalob u góobernariʼ; bey úuchik u tsʼáaikuba tu koontra Jéeobaoʼ (Génesis 3:1-6). Tsʼoʼoleʼ, jach úuch joʼopʼok u taasaʼal subtsilil yóokʼol u kʼaabaʼ Jéeoba yoʼolal le baʼaxoʼob ku beetkoʼob yéetel baʼaxoʼob ku kaʼanskoʼob le máaxoʼob kiaʼalkoʼob ku tʼaanoʼob tu kʼaabaʼoʼ.

6. ¿Baʼax maʼ kʼaʼabéet k-beetik wa táan k-kʼáatik ich payalchiʼ ka nojbeʼenkúuntaʼak u kʼaabaʼ Jéeobaeʼ?

⁶ Ken payalchiʼinakoʼon utiaʼal ka kiliʼichkúunsaʼak u kʼaabaʼ Diooseʼ táan k-eʼesik bix k-ilik u góobernasion: utiaʼal toʼoneʼ chéen Jéeoba kʼaʼabéet u góobernar tu yóokʼol tuláakal baʼal yaan kaʼan yéetel Luʼum. Diooseʼ u kʼáat ka kajlak way Luʼum yéetel teʼ kaʼanoʼ chéen máaxoʼob kʼamik yéetel kiʼimak óolal u maʼalob góobernasion yoʼolal u yaabilajoʼob tiʼ letiʼ yéetel tumen u kʼáatoʼob ka nojbeʼenkunsaʼak u kʼaabaʼ (1 Crónicas 29:10-13; Salmo 8:1; 148:13). Le yaabilaj k-uʼuyik yoʼolal u kiʼichkelem kʼaabaʼ Dioosoʼ le kun áantkoʼon utiaʼal maʼ k-beetik mix baʼal jeʼel u taasik subtsilil tiʼeʼ (Ezequiel 36:20, 21; Tiʼ Romailoʼob 2:21-24). Utiaʼal ka yanak jeetsʼelil tiʼ tuláakal le kajaʼanoʼob way Luʼum yéetel teʼ kaʼanoʼ, táanil kʼaʼabéet u kiliʼichkúunsaʼal u kʼaabaʼ Jéeoba yéetel ka kʼaʼamak u maʼalob góobernasion; le oʼolal ken k-aʼaleʼex «kiliʼichkúunsaʼak a kʼaabaʼ» táan k-eʼesik k-ojel Jéeobaeʼ yaan u béeykuntik  baʼax u yaʼalmaj utiaʼal u nojbeʼenkúuntik u kʼaabaʼ (Ezequiel 38:23).

Le Reeino yoʼolal k-payalchiʼoʼ

7, 8. 1) ¿Baʼax le Reeino tu kaʼansaj Jesus ka k-kʼáat ich payalchiʼoʼ? 2) ¿Baʼax k-kanik tu liibroi Daniel yéetel Apocalipsis tiʼe Reeinoaʼ?

⁷ U kaʼapʼéel baʼax ku kʼáataʼal ich u payalchiʼi le paadrenuestrooʼ letiʼ lelaʼ: «Taalak a ajawil» wa reeino (San Mateo 6:10). Lelaʼ yaan yil yéetel le baʼax ku yáax kʼáataʼaloʼ, tumen le baʼax kun meyaj tiʼ Jéeoba utiaʼal u kiliʼichkúunsik u kʼaabaʼeʼ letiʼe Reeino wa gobieerno yaan teʼ kaʼan tu tsʼáaj tu kʼab Jéesukriisto, u Paaloʼ (Salmo 2:1-9). Ich u próofesiya Danieleʼ ku keʼetel le Reeino bey upʼéel «tuunich» ku chʼaʼakal tiʼ upʼéel «puʼukeʼ» (Daniel 2:34, 35, 44, 45). Le puʼukoʼ u kʼáat u yaʼal u góobernasion Jéeoba, le oʼolaleʼ, le tuunich wa Reeinooʼ upʼéel u túumbenil tiʼ le jejeláas bix u góobernaroʼ. Le tuunich tiʼ le ku tʼaan Danieloʼ «suunaj upʼéel nojoch puʼukil ka tu chupaj tuláakal le luʼumoʼ» lelaʼ u kʼáat yaʼaleʼ, le Reeinooʼ yaan u góobernartik tuláakal le Luʼum tu kʼaabaʼ Dioosoʼ.

⁸ Yaan uláakʼ 144.000 reeyoʼob yéetel j-kʼiinoʼob, «tokaʼanoʼob tiʼ ichil u kajnáaliloʼob luʼum» utiaʼal u góobernaroʼob yéetel Jéesukriisto teʼ kaʼanoʼ (Apocalipsis 5:9, 10; 14:1-4; 20:6). Danieleʼ kiaʼalikeʼ letiʼobeʼ «u kaajal u Kʼuil kaʼan» wa u Dioosil kaʼan. Letiʼobeʼ, paʼteʼ yéetel Kriisto u Joʼoliloʼobeʼ, yaan u kʼamkoʼob le «ajawil [wa reeinooʼ], u páajtalil yéetel u nojbeʼenil yéetel tuláakal u ajawiloʼob le luʼumaʼ, [...]. U ajawileʼ bíin pʼáatak utiaʼal jaʼaboʼob minaʼan u xuul, tuláakal u kaajiloʼob le luʼumaʼ bíin u meyajtoʼob bíin xan u tsʼoʼokbesoʼob u tʼaan» (Daniel 7:13, 14, 18, 27). Lelaʼ letiʼe gobieerno yaan teʼ kaʼan tu kaʼansaj Jesus tiʼ u j-kaambaloʼob ka u kʼáatoʼoboʼ.

¿Baʼaxten maʼ kʼaʼabéet u jáawal k-kʼáatkeʼex ka taalak le Reeinooʼ?

9. ¿Baʼaxten láayliʼ kʼaʼabéet kʼáatkeʼex ka taalak u Reeino Diooseʼ?

⁹ Teʼ paadrenuestrooʼ, Jesuseʼ tu kaʼansajtoʼon ka k-kʼáat ka taalak le Reeinooʼ. Tu jaʼabil 1914, úuchik u káajal yúuchul baʼax kiaʼalik le Biibliaoʼ, kieʼesik le Reeinooʼ káaj u góobernar teʼ kaʼan teʼ jaʼab jeʼeloʼ. * ¿Láayliʼ wa túun kʼaʼabéet kʼáatkeʼex ka «taalak» le Reeinooʼ? Láayliʼeʼ. Ich u próofesiya Danieleʼ, kieʼesaʼaleʼ le Reeino ku keʼetel yéetel upʼéel tuunichoʼ, táan u bin tu tojil u gobieerno wíinikoʼob ku keʼetloʼob yéetel utúul nuxiʼi máak, utiaʼal u jatsʼkuba tu yéetel. Le tuunichaʼ maʼ u jatsʼuba tiʼ le nuxiʼi máak utiaʼal u xiixkúuntikoʼoʼ. U próofesiya Danieleʼ kiaʼalik beyaʼ: «Bíin pʼáatak utiaʼal minaʼan u xuul, mix bíin tʼonkíintaʼak tumen mix jumpʼéel múuchʼ kaaj, baʼaleʼ yaan u xuʼulsik jumpuliʼ tuláakal le uláakʼ ajawiloʼob» wa reeinoʼoboʼ (Daniel 2:44).

10. ¿Baʼaxten táan k-tsʼíiboltik ka taalak u Reeino Dioos?

¹⁰ Táan k-tsʼíiboltik u kʼuchul u kʼiinil u taalbal u Reeino Dioos utiaʼal u xuʼuls u kʼasaʼan yóokʼol kaab Sáatanas, tumen  ken kʼuchuk le kʼiinaʼ yaan u kiliʼichkúunsaʼal u kiliʼich kʼaabaʼ Jéeoba yéetel yaan u láaj luʼsaʼal le máaxoʼob maʼ u kʼáatoʼob u kʼamoʼob u góobernasionoʼ. Táan jach k-kʼáat óoltik: «Taalak a ajawil» wa reeino, yéetel táan xan k-aʼalik jeʼex tiaʼalaj áapostol Juaneʼ: «Amen. ¡Koʼoten, Yuumtsil Jesus!» (Apocalipsis 22:20). Beyoʼ, taalak Jesus utiaʼal u kiliʼichkúunt u kʼaabaʼ Jéeoba yéetel utiaʼal u xuʼulsik tuláakal máak maʼ u kʼáat u kʼam u góobernasioniʼ; bey kun jaajtal le baʼax kiaʼalik le Saalmoaʼ: «Utiaʼal ka ojéeltaʼak tumen máakoʼobeʼ teech, a kʼaabaʼeʼ Jéeoba, chéen teech u Sen Kaʼanlil tuláakal yóokʼol luʼum» (Salmo 83:18, Nuevo Mundo).

«Beetaʼak baʼax a kʼáat»

11, 12. 1) ¿Baʼax táan k-kʼáatik ken k-aʼal ich k-payalchiʼ ka béeyak baʼax u kʼáat Dioos «way luʼum[..] jeʼel bix u beetaʼal teʼ j-kaʼanoʼ»? 2) ¿Baʼax xan k-eʼesik ken k-kʼáat ich payalchiʼ ka beetaʼak baʼax u kʼáat Jéeoba?

¹¹ U óoxpʼéel baʼax tu kaʼansaj Jesus tiʼ u j-kaambaloʼob u kʼáatoʼob ich payalchiʼeʼ letiʼ lelaʼ: «Beetaʼak baʼax a kʼáat way luʼumeʼ jeʼel bix u beetaʼal teʼ j-kaʼanoʼ» (San Mateo 6:10). Jéeoba beet u yantal tuláakal baʼal. Le aanjeloʼoboʼ tu kʼaʼam aʼaloʼob: «Yuumtsil yéetel k-Kʼu [wa k-Dioos], techeʼ a náajmatik a kʼamik nojbeʼenil, tsiikil bey xan páajtalil; tumen teech ta beetaj tuláakal baʼaloʼob, tu yoʼolal a wóolajeʼ yanoʼob yéetel j-beetaʼaboʼob» (Apocalipsis 4:11). Jéeobaeʼ yaan baʼax u tukulmaj utiaʼal le baʼaloʼob «yanoʼob kaʼanoʼ bey xan le yanoʼob luʼumoʼ» (Tiʼ Efesoiloʼob 1:8-10). U jaajileʼ, ken k-kʼáat tiʼ Jéeoba ka u beet baʼax u kʼáateʼ, táan k-aʼaliktiʼ ka u tsʼoʼokbes baʼax u tukulmaj u beetik. K-eʼesik xan kʼáat k-il u béeychajal tuláakal baʼax u tukulmaj Dioos utiaʼal le kaʼanoʼ, bey xan utiaʼal le Luʼumaʼ.

¹² Ken k-kʼáat xan lelaʼ, k-eʼesik taak k-kuxtal jeʼex u kʼáat Jéeobaeʼ. Jesuseʼ tiaʼalaj: «In janaleʼ in beetik u yóolal [wa baʼax u kʼáat] le máax túuxtenoʼ, yéetel in tsʼoʼoksik u meyaj» (San Juan 4:34). Jeʼex Jesuseʼ, tuláakal u j-jaajkunajoʼon Jéeobaeʼ jach kiʼikiʼ óoltik k-beetik baʼax u kʼáat Dioos. Le yaabilaj k-uʼuyik yoʼolal Jéeoba bey xan yoʼolal Jesuseʼ ku yáantkoʼon utiaʼal ka kuxlakoʼon, «jeʼel bix u kʼáat Kʼueʼ [wa Dioos] maʼ utiaʼal [k-]tsʼoʼokbesik u tsʼíibolal le luʼumkabil wíinklilaʼ» (1 San Pedro 4:1, 2; 2 tiʼ Corintoiloʼob 5:14, 15). Le oʼolaleʼ, k-ilik k-náachkuntikba tiʼ baʼaloʼob k-ojel maʼ utstak tu táan Jéeobaeʼ (1 tiʼ Tesalonicailoʼob 4:3-5). K-jóoʼsik u súutukil utiaʼal k-xakʼalxoktik le Biibliaoʼ ku yáantkoʼon utiaʼal «[k-]naʼatikeʼex baʼax u kʼáat Yuumtsil» wa Jéeoba. Upʼéel baʼax u kʼáateʼ ka táakpajkoʼon k-kʼaʼayt «u maʼalob péektsil» le Reeinooʼ (Tiʼ Efesoiloʼob 5:15-17; San Mateo 24:14).

Le baʼax u kʼáat Jéeoba ka beetaʼak teʼ kaʼanoʼ

13. ¿Baʼax eʼesik táaniliʼ u beetaʼal baʼax u kʼáat Jéeoba, maʼiliʼ u tsʼáauba Sáatanas tu koontraeʼ?

¹³ Maʼiliʼ u tsʼáauba tu koontra Dioos utúul tiʼ u aanjeloʼob utiaʼal ka kʼuchuk u beetuba Sáatanasil, u Kʼaasilbaʼaleʼ, teʼ kaʼanoʼ táaniliʼ u beetaʼal baʼax u kʼáat Jéeobaeʼ. U liibroi Proverbioseʼ ku ketik Jesus, u juntúuliliʼ  Paal Dioos, bey letiʼe naʼat suunajaʼan máakiloʼ, yéetel ku yaʼalik xaneʼ, ichil u miilesi jaʼaboʼob minaʼan xookiloʼobeʼ tiʼ ku «báaxal kaʼach sáamsamal tu yiknaleʼ», kiʼimak yóol ikil u beetik baʼax u kʼáat u Taata. Ku máan kʼiineʼ múul meyajnaj yéetel Jéeoba utiaʼal u beetkoʼob «tuláakal baʼax yaan teʼ j-kaʼanoʼ yéetel teʼ j-luʼumoʼ, le baʼaloʼob maʼ tu yilaʼaloʼoboʼ bey xan le baʼaloʼob ku yilaʼaloʼoboʼ» (Proverbios 8:22-31; Tiʼ Colosailoʼob 1:15-17). Letiʼeʼ u J-bisaj tʼaan Jéeoba kaʼachi (San Juan 1:1-3).

14. ¿Baʼax jeʼel k-kanik tiʼe Salmo 103 tiʼ bix u yuʼubaʼal u tʼaan Jéeoba teʼ kaʼan tumen le aanjeloʼoboʼ?

¹⁴ Le salmiistaoʼ kieʼesikeʼ tuláakal baʼax yaneʼ tiaʼan yáanal u páajtalil Jéeobaeʼ, kieʼesik xaneʼ le aanjeloʼoboʼ táan u beetkoʼob baʼax kiaʼalaʼaltiʼob tumen Jéeoba. Bey yaʼalikaʼ: «Yuumtsileʼ u tsʼaamaj u jalaʼach kʼáancheʼ teʼ j-kaʼanoʼ; u [ajawil wa u reeinoeʼ] ku tʼonkíinaj tu yóokʼol tuláakal. ¡Muʼukʼaʼan aanjeleʼex kiʼikiʼtʼanteʼex Yuumtsil [Jéeoba]! Teʼex ka tsʼoʼokbesikeʼex baʼaxoʼob ku yaʼalik ka a beeteʼex, teʼex máaxeʼex a kʼubmaj a wóoleʼex a wuʼuyajtʼanteʼex. ¡Kiʼikiʼtʼanteʼex Yuumtsil tuláakaleʼex u kajnáalileʼex kaʼan yéetel luʼum, máaxeʼex meyajtikeʼex yéetel ka beetikeʼex baʼax u kʼáati! Kiʼikiʼtʼanteʼex Yuumtsil, [...] tuláakal le baʼaloʼob beetaʼanoʼob tiʼ tuláakal u kúuchiloʼob u ajawil» wa u reeinooʼ (Salmo 103:19-22).

15. Úuchik u kʼuʼubul le Reeino tiʼ Jesusoʼ, ¿bix tsʼoʼok u yáantaj ka béeychajak baʼax u kʼáat Jéeoba teʼ kaʼanoʼ?

¹⁵ Jeʼex u yeʼesik u liibroi Jobeʼ, kex tsʼoʼok u tsʼáaikuba Sáatanas tu koontra Jéeobaeʼ, láayliʼ tiaʼan kaʼach teʼ kaʼanoʼ (Job 1:6-12; 2:1-7). Baʼaleʼ, u liibroi Apocalipsiseʼ tiaʼalaj yaan u kʼuchul u kʼiinil u luʼsaʼal Sáatanas teʼ kaʼan paʼteʼ yéetel u kʼasaʼan aanjeloʼoboʼ. Tuláakal eʼesikeʼ, le kʼiin jeʼeloʼ kʼuch maʼ úuch kʼuʼubuk le Reeino tiʼ Jéesukriisto tu jaʼabil 1914. Teʼ kʼiin jeʼeloʼ, le aanjeloʼob maʼ tu yuʼuboʼob tʼaanoʼ maʼ chaʼab u pʼáatloʼob teʼ kaʼanoʼ, le oʼolal puʼuloʼob way Luʼumeʼ (Apocalipsis 12:7-12). Teʼ kaʼanoʼ tsʼoʼok minaʼan mix máak ku tsʼáaikuba tu koontra Jéeobaeʼ, chéen tiaʼan máaxoʼob ku papaxkʼabkoʼob Kriisto Jesus yéetel ku kiʼikiʼtʼantkoʼob Jéeoba utiaʼal u yeʼeskoʼob ku kʼamkoʼob u góobernasion (Apocalipsis 4:9-11). K-ilik túuneʼ, teʼ kaʼanoʼ táan u beetaʼal baʼax u kʼáat Jéeobaeʼ.

Le baʼax u kʼáat Jéeoba ka beetaʼak way Luʼumeʼ

16. U payalchiʼi le paadrenuestrooʼ, ¿bix yeʼesik maʼ jaaj wa tuláakal le utsoʼob kun binoʼob kaʼan, jeʼex u kaʼansik yaʼab réelijionoʼoboʼ?

¹⁶ Le réelijionoʼob kiaʼalkoʼob ku kaʼanskoʼob baʼax tiaʼalaj Jesusoʼ, ken u kaʼansoʼob tuláakal le utsoʼob kun binoʼob kaʼanoʼ, ku tsʼáaikoʼob juntséelil le baʼax u kʼáat Jéeoba utiaʼal le Luʼumaʼ. Baʼaleʼ, Jesuseʼ tu kaʼansaj ka kʼáataʼak lelaʼ: «Taalak a ajawil [wa reeino]. Beetaʼak baʼax a kʼáat way luʼumeʼ jeʼel bix u beetaʼal teʼ j-kaʼanoʼ» (San Mateo 6:10). ¿Jeʼel wa u páajtal yaʼalaʼal táan u beetaʼal tuláakal baʼax u kʼáat Jéeoba teʼ Luʼum tuʼux jach yaan loob, kʼasaʼanil, kʼojaʼaniloʼob yéetel kíimiloʼ? ¡Maʼatech! Le oʼolaleʼ, kʼaʼabéet k-kʼáatik ich payalchiʼ yéetel u jaajil k-óol ka beetaʼak baʼax u kʼáat Jéeoba way Luʼumeʼ, jeʼex tsʼíibtaʼanik  tumen áapostol Peedroeʼ: «Toʼoneʼ táan k-páaʼtik le túumben kaʼanoʼoboʼ [le Reeino tsʼaʼan tu kʼab Jesusoʼ] yéetel le túumben luʼum [wa utsul wíinikoʼob] u tsʼaa tʼantmaj Kʼuoʼ [wa Dioos], tuʼux tuláakal baʼal toj» (2 San Pedro 3:13).

17. ¿Baʼax u kʼáat Jéeoba utiaʼal le luʼumaʼ?

¹⁷ Yaan baʼax u beelal le Luʼum ka beetaʼab tumen Jéeobaoʼ. Letiʼeʼ tu beetaj u tsʼíibtaʼal tumen le profeeta Íisaiyasoʼ: «Kʼu [wa Jéeobaeʼ], Yuumtsil xan, letiʼ máax beet luʼum, letiʼ j-etsʼkúunt[ej]; maʼ chéen tu beetajiʼ, baʼaleʼ utiaʼal ka yanak u kajnáaliloʼob[,] letiʼeʼ ku yaʼalik: Teen Yuumtsil minaʼan in jeel» (Isaías 45:18). Diooseʼ tu tsʼáaj Adan yéetel Eeba tiʼ upʼéel jatsʼuts jáardin yéetel tiaʼalajtiʼob: «Yaʼabchajak a paalaleʼex; chupeʼex le yóokʼol kaaboʼ, méekʼtanteʼex xan» (Génesis 1:27, 28; 2:15). Le baʼax túun u kʼáat Jéeoba utiaʼal le Luʼumaʼ, ka kajlak tu yóokʼoleʼ, utsul máakoʼob minaʼan kʼeban tu wíinkliloʼob, ku kʼamkoʼob yéetel kiʼimak óolal u góobernasion yéetel ka kuxlakoʼob utiaʼal minaʼan u xuul teʼ páaraiso tiaʼalaj Kriisto kun antaloʼ (Salmo 37:11, 29; San Lucas 23:43).

18, 19. 1) Utiaʼal u béeychajal tuláakal baʼax u kʼáat Dioos utiaʼal le Luʼumaʼ, ¿baʼax kʼaʼabéet u yáax beetik? 2) ¿Baʼax uláakʼ tieʼesaj Jesus tu payalchiʼi le paadrenuestro ken k-il tuláakʼ xookoʼ?

¹⁸ Le baʼax u kʼáat Jéeoba utiaʼal le Luʼumaʼ, mix bikʼin jeʼel u béeytal wa chuup yéetel máakoʼob maʼ u kʼáat u kʼamoʼob u góobernasioniʼ. Le beetikeʼ, Diooseʼ yaan u túuxtik le aanjeloʼob yanoʼob yáanal u nuʼuktaj Kriistooʼ utiaʼal u «xuʼulsik le máaxoʼob loobiltik [wa kʼaskúuntik] le luʼum[aʼ]». Yaan u xuʼulsaʼal tiʼ tuláakal baʼax yaan yáanal u kʼab Sáatanas, jeʼex le réelijionoʼob maʼatech u kaʼanskoʼob u jaajiloʼ, le jalaʼachoʼob ku yookoloʼoboʼ, le j-maanoʼob yéetel le j-koonoloʼob chéen tiaʼanoʼob tu paach le ayikʼaliloʼob kex ka yanak u beetkoʼob kʼaas tiʼ u maasiloʼ, yéetel le soldaadoʼob paʼteʼ yéetel u nuʼukulil u baʼateloʼoboʼ (Apocalipsis 11:18; 18:21; 19:1, 2, 11-18). Tuláakal máax maʼ u kʼáat u kʼam u góobernasion Jéeobaeʼ yaan u xuʼulsaʼal, yéetel u kʼaabaʼ Jéeobaeʼ yaan u kiliʼichkúunsaʼal. Tuláakal le jeʼelaʼ le k-kʼáatik ken k-payalchiʼit: «K-Yuum yanech teʼ j-kaʼanoʼ, kiliʼichkúunsaʼak a kʼaabaʼ. Taalak a ajawil [wa reeino]. Beetaʼak baʼax a káat way luʼumeʼ jeʼel bix u beetaʼal teʼ j-kaʼanoʼ» (San Mateo 6:9, 10).

¹⁹ Baʼaleʼ, tu payalchiʼi le paadrenuestrooʼ, Jesuseʼ tieʼesaj xan jeʼel u páajtal k-payalchiʼ yoʼolal baʼaxoʼob kʼaʼabéettoʼoneʼ. Le ken k-il teʼ tuláakʼ xookoʼ.

[Tsolajiloʼob]

• Ken payalchiʼinakoʼoneʼ, ¿baʼaxten maʼalob ka k-aʼal tiʼ Jéeoba «K-Yuum»?

[U kʼáatchiʼiloʼob le xookoʼ]

[U tsolajil le oochel teʼ táan juʼun 20]

Utiaʼal kʼaʼajsaj

• ¿Baʼaxten jach kʼaʼanan ka k-kʼáat ich payalchiʼ ka kiliʼichkúunsaʼak u kʼaabaʼ Jéeoba?

• ¿Baʼaxten k-kʼáatik ich payalchiʼ ka taalak u Reeino Dioos?

• ¿Baʼax táan k-kʼáatik ken k-aʼal ka beetaʼak baʼax a káat Dioos way Luʼum jeʼel bix u beetaʼal teʼ kaʼanoʼ?