Kʼaʼabéet k-kanáantikba utiaʼal maʼ k-tuʼusleʼex

«Kanáantabaʼex maʼ a chaʼikeʼex a bisaʼaleʼex tumen le máaxoʼob u kʼáat u tuseʼexoʼob yéetel [...] tʼaanoʼob chéen kuneloʼob.» (TIʼ COLOSAILOʼOB 2:8.)

1-3. 1) ¿Baʼaxoʼob eʼesik óoliʼ tuláakal tuʼux ku yilaʼal le tuusoʼ? 2) ¿Baʼaxten maʼ unaj u jaʼakʼal k-óol k-ilik óoliʼ tuláakal máak ku tuus bejlaʼeʼ?

UTÚUL j-kaʼansaj tiʼ leeyoʼobeʼ tu beetaj upʼéel kʼáatchiʼ tiʼ yaʼabach áabogadoʼob: «¿Mix utéen wa tuʼuskeʼex tumen le máaxoʼob kʼáatik a wáantajeʼexoʼ?». Le j-kaʼansajaʼ kiaʼalik baʼax núukaʼabi: «Tiʼ u miilesi áabogadoʼobeʼ chéen utúul maʼ tusaʼaniʼ». ¿Baʼaxten? «Tumen le áabogadoaʼ táant u káajal u meyaj tuʼux ku meyaj yaʼab áabogadoʼobeʼ yéetel maʼ tʼaʼanak utiaʼal ka u yáant mix máakiʼ». Lelaʼ kieʼesik upʼéel baʼal jach subtsil táan yúuchul bejlaʼeʼ: óoliʼ tuláakal máak ku tuus.

² Bejlaʼeʼ, jejeláas bix u yúuchul tuus, yéetel óoliʼ tuláakal tuʼux ku yilaʼal. Suuk k-uʼuyik baʼaloʼob beyaʼ: poliitikoʼob maʼ tu yaʼalikoʼob u jaajil tiʼ baʼax ku beetkoʼob, kóontadoroʼob yéetel áabogadoʼob maʼ tu yaʼalkoʼob u jaajil tiʼ bukaʼaj ku náajaltik upʼéel nojoch negoosio, j-koonoloʼob ku tuusoʼob utiaʼal u maas koonoloʼob, máakoʼob ku tuusoʼob utiaʼal u kobraartik u seguuroʼob, yéetel uláakʼ jejeláas baʼaloʼob beyaʼ. Jeʼel u páajtal xan k-tʼaan tiʼ le tuus ku beetaʼal tumen le réelijionoʼoboʼ. Le j-kʼiinoʼoboʼ yaʼabach máak ku tuskoʼob ikil u kaʼanskoʼob yaan bin upʼéel pixan ku pʼáatal kuxaʼan ken kíimik máak, wa ken u yaʼaloʼob yaan upʼéel metnal tuʼux ku tóokaʼal wíinik, wa ken u kaʼansoʼob Diooseʼ upʼéel Tríinidad (2 tiʼ Timoteo 4:3, 4).

³ ¿Unaj wa túun u jaʼakʼal k-óol k-ilik óoliʼ tuláakal máak ku tuus? U jaajileʼ, maʼ. Le Biibliaoʼ le ka tʼaanaj tiʼ «u tsʼook jaʼaboʼobeʼ», tiaʼalaj: «Le máaxoʼob kʼasaʼanoʼoboʼ yéetel le ku tuusoʼoboʼ bíin xiʼikoʼob tiʼ kʼaas tak tu maas kʼaasil, táan u tuusoʼob yéetel táan u tuʼusuloʼob» (2 tiʼ Timoteo 3:1, 13). Le oʼolaleʼ kʼaʼabéet k-kanáantikba tiʼ tuukuloʼob jeʼel u náachkuntkoʼon tiʼ u jaajileʼ. Unaj k-beetik le kaʼapʼéel kʼáatchiʼobaʼ: ¿baʼaxten óoliʼ tuláakal máak ku tuus bejlaʼeʼ, yéetel bix jeʼel k-kanáantikba utiaʼal maʼ k-tuʼusleʼexeʼ?

¿Baʼaxten jach táaj yaan tuusil?

4. ¿Bix yeʼesik le Biiblia baʼaxten jach yaan tuusil way yóokʼol kaabeʼ?

⁴ Le Biibliaoʼ kiaʼalik baʼaxten jach yaan tuusil. Le áapostol Juanoʼ tu tsʼíibtaj: «Yóokʼol kaabeʼ tiʼ yaan yáanal  u páajtalil kʼaasibaʼaleʼ» (1 San Juan 5:19). Le kʼaasilbaʼaloʼ Sáatanas; tiʼ letiʼ tʼaanaj Jesus ka tiaʼalaj: «Mix juntéen u chʼaʼa u muukʼ tiʼ le jaajoʼ, yéetel mix bikʼin ku yaʼalik u jaajil. Le ken tuusnakeʼ ku tʼaan jeʼel bix letiʼeʼ, tumen letiʼeʼ juntúul j-tuus yéetel u taata le tuusoʼ». Le oʼolaleʼ, le yóokʼol kaabaʼ, yoʼolal bix kuxlikeʼ, táan u yeʼesik bix Sáatanas, le máax ku góobernar tu yóokʼoloʼ (San Juan 8:44; 14:30; Tiʼ Efesoiloʼob 2:1-3).

5. Teʼ tsʼook kʼiinoʼobaʼ, ¿bix táan u maas tsʼáaik yóol Sáatanas utiaʼal u tusik máakoʼob, yéetel máaxoʼob jach táan yilik u jaantik?

⁵ Sáatanaseʼ táan u jach tsʼáaik yóol utiaʼal u tusik máak teʼ kʼiinoʼobaʼ. Tsʼoʼok u puʼulul way Luʼumeʼ yéetel u yojel maʼ yaʼab kʼiin pʼaatal tiʼiʼ, le oʼolal jach «pʼujaʼan». U kʼáat u xuʼuls le jaytúul máak ku páajtaleʼ, le oʼolaleʼ táan yilik u «tusik tuláakal yóokʼol kaab» (Apocalipsis 12:9, 12). Maʼ chéen wa baʼax kʼiin ku tuusiʼ, sáamsamal táan yilik bix jeʼel u tusik máakoʼobeʼ. * U jejeláas tuusoʼobeʼ ku keʼetel yéetel u jejeláas nuʼukulil baʼateʼel, yéetel tuláakal u tuusoʼob ku meyajtiʼ utiaʼal u éeʼjochʼeʼenkuntik u naʼat le máaxoʼob maʼ tu oksaj óoloʼoboʼ yéetel utiaʼal u beetik u náachtaloʼob tiʼ Dioos (2 tiʼ Corintoiloʼob 4:4). U taatai le tuusoʼ jach táan yilik u jaantik máaxoʼob meyajtik Dioos yéetel «pixan yéetel tiʼ jaaj» (San Juan 4:24; 1 San Pedro 5:8). Maʼ u tuʼubultoʼoneʼ, letiʼeʼ tiaʼaleʼ jeʼel u páajtal u náachkuntik tuláakal máak tiʼ Diooseʼ (Job 1:9-12). Koʼoneʼex ilik jujumpʼéel «u táabsajiloʼob kʼaasilbaʼal» yéetel bix jeʼel k-kanáantikba tiʼ letiʼobeʼ (Tiʼ Efesoiloʼob 6:11).

Kʼaʼabéet k-kanáantikba tiʼ le máaxoʼob tsʼoʼok u xúumpʼatkoʼob u jaajiloʼ

6, 7. 1) ¿Baʼax jeʼel u yaʼalik le máaxoʼob tsʼoʼok u xúumpʼatkoʼob u jaajiloʼ? 2) ¿Bix u yeʼesik le Biiblia baʼax u kʼáat le máakoʼobaʼ?

⁶ Úuch joʼopʼok u meyaj tiʼ Sáatanas le máaxoʼob tsʼoʼok u xúumpʼatkoʼob u jaajiloʼ utiaʼal u tusik máaxoʼob meyajtik Dioos (San Mateo 13:36-39). Kex ka u yaʼaloʼob táan u meyajkoʼob Jéeoba yéetel ku oksaj óolkoʼob baʼax kiaʼalik le Biibliaoʼ, maʼ tu kʼamkoʼob wa u j-jaajkunajoʼob Jéeoba u kaajal Dioos way Luʼumeʼ. Yanoʼobeʼ ku kaʼa káajal u kaʼanskoʼob baʼaloʼob ku taaskoʼob subtsilil tiʼ Dioos, kaʼansajoʼob u taaloʼob tiʼ le «nojoch Báabilonia» wa tuláakal le maʼ jaajil réelijionoʼoboʼ (Apocalipsis 17:5; 2 San Pedro 2:19-22). Yéetel u nuʼuktaj Diooseʼ, le máaxoʼob tsʼíibt le Biibliaoʼ tu jach eʼesoʼob baʼax oʼolal yéetel bix u tuskoʼob máak le máaxoʼob tsʼoʼok u xúumpʼatkoʼob u jaajiloʼ.

⁷ ¿Baʼax u kʼáat le máakoʼobaʼ? Yaʼabeʼeʼ maʼ chéen ku pʼatkoʼob baʼax ku  oksaj óolkoʼob kaʼachiʼ, u kʼáat xan u kóoloʼob uláakʼ sukuʼunoʼob tu paachoʼob. Maʼ chéen ku jóoʼloʼob utiaʼal u bin u kaxt u j-tsaypachoʼob yaanal tuʼuxiʼ, baʼaxeʼ ku tuusoʼob «utiaʼal ka tsaypachtaʼakoʼob tumen le oksaj óolaloʼoboʼ» wa u j-tsaypachoʼob Kriisto (Baʼaxoʼob [Hechos] 20:29, 30). Paabloeʼ tu tsʼáaj le kʼaʼajsajilaʼ utiaʼal k-kanáantikba tiʼ le máakoʼobaʼ: «Kanáantabaʼex maʼ a chaʼikeʼex a bisaʼaleʼex tumen le máaxoʼob u kʼáat u tuseʼexoʼob[oʼ]» (Tiʼ Colosailoʼob 2:8). Lelaʼ le u kʼáat u beet le máaxoʼob ku xúumpʼatkoʼob u jaajiloʼ. Jeʼex le j-okol máakoʼob ku páaʼtkoʼob u náaya yóol máax ken u yokloʼob utiaʼal u náachkuntoʼob tiʼ u láakʼtsiloʼobeʼ, le máakoʼob xanaʼ táan u yilik u taʼabskoʼob le sukuʼunoʼob naayal u yóoloʼoboʼ utiaʼal ka u náachkuntoʼob tiʼ le múuchʼuliloʼ.

8. Le máakoʼob tsʼoʼok u xúumpʼatkoʼob u jaajiloʼ, ¿bix u yilik u jóoʼloʼob yéetel baʼax u kʼáatoʼob?

⁸ Le máakoʼob tsʼoʼok u xúumpʼatkoʼob u jaajiloʼ, ¿bix u yilik u jóoʼloʼob yéetel baʼax u kʼáatoʼob? Ku jelbeskoʼob u jaajil, maʼ tu chúukaʼan aʼalikoʼob u jaajil wa jach upuliʼ ku tuusoʼob. Jesuseʼ tiaʼaleʼ yaan u líiʼsaʼal «tuláakal tuusoʼob» tu yóokʼoloʼob u j-kaambaloʼob (San Mateo 5:11). Le kʼaakʼas máakoʼob tsʼoʼok u xúumpʼatkoʼob u jaajiloʼ ku tuusoʼob chéen utiaʼal u beetkoʼob kʼaas. Peedroeʼ tiaʼaleʼ le máakoʼobaʼ yaan u «tuusil kaʼansajoʼob» yéetel yaan u jelbeskoʼob baʼax kiaʼalik le Kiliʼich Tsʼíiboʼob utiaʼal u jóoʼloʼob yéetel baʼax u kʼáatoʼoboʼ (2 San Pedro 2:3, 13; 3:16). Bey u «xaʼakʼtikoʼob u yoksaj óolaloʼob tsʼeʼetsʼek máakoʼob» wa sukuʼunoʼoboʼ (2 tiʼ Timoteo 2:18).

9, 10. 1) ¿Bix jeʼel k-kanáantikba tiʼ le tuus ku beetik máaxoʼob tsʼoʼok u xúumpʼatkoʼob u jaajiloʼ? 2) ¿Baʼaxten k-ojel jeʼel u kʼexpajal bix k-naʼatik baʼax u kʼáat u yaʼal u Tʼaan Diooseʼ?

⁹ ¿Bix jeʼel k-kanáantikba tiʼ le tuus ku beetik máaxoʼob tsʼoʼok u xúumpʼatkoʼob u jaajiloʼ? Ken k-beet baʼax kiaʼalik le Biibliaaʼ: «Ileʼex le máaxoʼob ku beetikoʼob jatslantáambailoʼoboʼ yéetel ku tsʼáaikoʼob tuʼux u tʼóochpajal máakoʼ, tumen lelaʼ tiʼ yaan tu koontra le kaʼansajoʼob ta kanajeʼexoʼ. Tselabaʼex tiʼob» (Tiʼ Romailoʼob 16:17). Utiaʼal k-tselikba tiʼ letiʼobeʼ kʼaʼabéet maʼ k-chʼenxikintik baʼax kiaʼalkoʼob wa taak u tʼaanoʼob t-éetel, mix xan kʼaʼabéet k-xokik baʼax ku jóoʼskoʼob tiʼ juʼunoʼob wa ich Íinternet. ¿Baʼaxten kʼaʼabéet k-beetik lelaʼ? Yáaxeʼ, tumen le Biiblia aʼaliktoʼonoʼ, yéetel k-ojleʼ le baʼax ku kʼáatiktoʼon Jéeobaoʼ mantatsʼ utiaʼal k-utsil (Isaías 48:17, 18).

¹⁰ U kaʼapʼéeleʼ, tumen k-yaabilmaj le moʼolay (organización) tsʼoʼok u kaʼansiktoʼon le kiʼichkelem jaajiloʼob jelaʼankúunskoʼon tiʼe Nojoch Báabiloniaoʼ. Baʼaleʼ, k-ojel maʼ chúukaʼan le kʼaj óolal yantoʼon tiʼ baʼax u tukulmaj u beetik Dioosoʼ, tumen jeʼex u máan le jaʼaboʼoboʼ táan u bin u maas maʼalobtal k-naʼatik u Tʼaan Dioos. Le kristiaanoʼob chúukaʼan yóoloʼoboʼ maʼ tu  náakal yóoloʼob u páaʼt u yáantaʼaloʼob tumen Jéeoba utiaʼal ka u naʼatoʼob tubeel baʼax kiaʼalik u Tʼaan (Proverbios 4:18). Le táan k-páaʼtik u kʼuchul le kʼiin jeʼeloʼ, maʼ kʼaʼabéet k-pʼatik u kaajal Dioosiʼ, tumen yaʼab baʼaxoʼob eʼesik táan yáantik u kaajal teʼ kʼiinoʼobaʼ (Baʼaxoʼob 6:7; 1 tiʼ Corintoiloʼob 3:6).

Maʼ k-tusikba t-juunaleʼex

11. ¿Baʼax beetik u tuskuba le kʼeban wíinikoʼoboʼ?

¹¹ Sáatanaseʼ táan yilik u jóoʼsik utsil tiʼ upʼéel baʼal kiúuchul tiʼ tuláakal kʼeban wíinikoʼob: u tuskubaʼob tu juunaloʼob. Jeremías 17:9 kiaʼalik: «Minaʼan uláakʼ baʼal ku tuus yéetel sen kʼasaʼaneʼ jeʼel bix u puksiʼikʼal wíinikeʼ». Sáantiagoeʼ tu tsʼíibtaj xan: «Baʼaleʼ tu jujuntúulil [wa tu juunal máak] ku túuntaʼal u yóol ken kóolaʼak yéetel ken táabsaʼak tumen u kʼaakʼas tsʼíibolal» (Santiago 1:14, Le Tumben Nuptʼan). Wa k-puksiʼikʼal táan u tsʼíiboltik upʼéel baʼal kʼaaseʼ jeʼel u táabskoʼoneʼ tumen jeʼel u beetik k-ilik bey upʼéel baʼal jatsʼutseʼ yéetel bey maʼ tu taasiktoʼon mix upʼéel kʼaaseʼ. Máax ku tuukul beyaʼ chéen táan u tuskuba, tumen máax ku lúubul tiʼ baʼax kʼaaseʼ yaan u bin kʼaasil tiʼ (Tiʼ Romailoʼob 8:6).

12. ¿Bix jeʼel u tuskuba máak tu juunaleʼ?

¹² Jach chéen chʼaʼabil jeʼel u tuskuba máak tu juunaleʼ. Le puksiʼikʼaloʼ jeʼel u beetik k-tuklik yaan baʼax oʼolal maʼ tu páajtal k-jelbesik upʼéel kʼaakʼas moodos yantoʼoneʼ wa xan jeʼel u beetik maʼ k-éejemtik tsʼoʼok beetik upʼéel baʼal jach kʼaaseʼ (1 Samuel 15:13-15, 20, 21). Le puksiʼikʼaloʼ kʼasaʼan xan, le oʼolal jeʼel u beetik k-tuklik maʼ kʼaas le baʼax k-beetkoʼ. Koʼoneʼex tʼaan tiʼ le náaysaj óoloʼoboʼ. Yaan náaysaj óoloʼobeʼ jatsʼutstak yéetel maʼalobtak, baʼaleʼ yaʼab tiʼ le baʼaloʼob ku chaʼantaʼal teʼ peliikulaʼoboʼ, teʼ téelebisionoʼ yéetel ich Íinterneteʼ jach subtsiltak yéetel kʼaastak. Jach séeb jeʼel k-tuklik maʼ ken u beettoʼon kʼaas k-náaysik k-óol yéetel baʼaloʼob maʼ maʼalobtakeʼeʼ. Yaneʼeʼ kiaʼalikoʼob: «Teneʼ maʼ kʼaas in wilkiʼ, maʼ tu beetik in tʼóochpajal». Baʼaleʼ, máaxoʼob ku tuukuloʼob beyaʼ chéen táan u tuskubaʼob (Santiago 1:22).

13, 14. 1) ¿Tiʼ máax ku tʼaan le Biiblia kieʼesiktoʼon k-tuukuleʼ maʼ mantatsʼ jeʼel u nuʼuktikoʼon maʼalobeʼ? 2) ¿Baʼaxoʼob kʼaʼabéet k-beetik utiaʼal maʼ k-tusikba t-juunal?

¹³ ¿Bix jeʼel u páajtal k-kanáantikba utiaʼal maʼ k-tusikba t-juunaleʼexeʼ? Yáaxeʼ, kʼaʼabéet k-kʼaʼajskeʼ le bix k-tuukuloʼ maʼ u kʼáat yaʼal wa mantatsʼ maʼalobiʼ. Koʼoneʼex ilik bix u tuukul Paablo kaʼachi. Letiʼeʼ táanil tiʼ u beetkuba kristiaanoileʼ tu chʼaʼapachtaj u j-kaambaloʼob Kriisto (Baʼaxoʼob 9:1, 2). Kex maʼ maʼalob baʼax ku beetkeʼeʼ, maʼ xaaneʼ, letiʼe maʼ kʼaas yilik kaʼachiʼ. Ka tsʼoʼok u beetkuba kristiaanoileʼ, letiʼeʼ tiaʼalaj: «Maʼ in woksmaj in  wóol tiʼ [Kriistoiʼ], yéetel maʼ in wojel kaʼach baʼax kin beetikiʼ» (1 tiʼ Timoteo 1:13). Le oʼolaleʼ, kex maʼ kʼaas k-ilik jujumpʼéel náaysaj óoloʼobeʼ, maʼ u kʼáat yaʼal wa maʼalobtakiʼ. Utiaʼal k-nuʼuktikba yéetel k-tuukuleʼ táanil kʼaʼabéet k-ilik wa le baʼax k-tuklikoʼ maʼ tu bin tu koontra baʼax kiaʼalik le Biibliaoʼ.

¹⁴ Yaan jujumpʼéel tsolnuʼukoʼob unaj k-kʼaʼajsik utiaʼal maʼ k-tusikba t-juunaleʼex. Yáaxeʼ, unaj k-kʼáatik tiʼ Dioos ich payalchiʼ ka u yáantoʼon utiaʼal k-ilikba jach bixoʼon (Salmo 26:2; 2 tiʼ Corintoiloʼob 13:5). Wa k-beetkeʼ, yaan yáantkoʼon k-il tiʼ baʼaxoʼob kʼaʼabéet kʼexik k-tuukul wa baʼaxoʼob k-beetik. U kaʼapʼeleʼ, kʼaʼabéet k-chʼenxikintik baʼax kiaʼalaʼal t-oʼolal (Santiago 1:19). Máakeʼ, ken joʼopʼok u yilkuba tu juunal bixeʼ, maʼalob u yilik baʼax ku beetik, le oʼolal maʼalob ka k-chʼenxikint baʼax kiaʼalkoʼob tiʼ toʼon le sukuʼunoʼob yiijchajaʼan u naʼatoʼoboʼ. Wa utúul tiʼ letiʼob kiaʼaliktoʼon yaan baʼaxoʼob k-chʼaʼatuklik wa yaan baʼaxoʼob k-beetik maʼ maʼalobtakeʼeʼ, unaj k-tuklikeʼex: «¿Maʼ wa ta tʼaan maʼ patal bix in tuukuliʼ? ¿Maʼ wa ta tʼaan táan u tusken in puksiʼikʼaliʼ?». Tsʼoʼokol xaneʼ kʼaʼabéet k-xokik mantatsʼ le Biiblia yéetel le juʼunoʼob u taaloʼob tiʼ letiʼoʼ (Salmo 1:2). Beyoʼ, k-tuukul yéetel baʼaxoʼob k-beetikeʼ, yaan upʼéeliʼtal yéetel baʼax kiaʼalik le Biibliaoʼ.

Kʼaʼabéet k-kanáantikba tiʼ u tuusoʼob Sáatanas

15, 16. 1) ¿Bix u jejeláasil yilik u tuskoʼon Sáatanas? 2) ¿Bix jeʼel k-kanáantikba tiʼ u tuusoʼobeʼ?

¹⁵ Sáatanaseʼ jejeláas bix u yilik u tuskoʼon. Letiʼeʼ ku beetik k-tuklikeʼ le kiʼimak óolaloʼ ku taal tiʼ u yantal yaʼab baʼaloʼob tiʼ máak, baʼaleʼ leloʼ maʼ jaajiʼ (Eclesiastés 5:10-12). Taak xan u beetik k-tuklikeʼ le kʼasaʼan yóokʼol kaabaʼ yaan u pʼáatal utiaʼal mantatsʼ, kex tuláakal baʼax eʼesik táan k-kuxtal tu «tsʼook jaʼaboʼob» (2 tiʼ Timoteo 3:1-5). Sáatanaseʼ ku beetik xan u tuklaʼaleʼ u beetaʼal baʼax subtsileʼ maʼ tu taasik mix upʼéel kʼaas, baʼaleʼ u jaajileʼ, máaxoʼob ku binoʼob tu paach u tsʼíibolaloʼobeʼ ku kʼuchul u kʼiinil u muʼyajoʼob yoʼolal baʼax ku beetkoʼob (Tiʼ Galaciailoʼob 6:7). ¿Bix jeʼel k-kanáantikba tiʼ u tuusoʼobaʼ?

¹⁶ Kaambalnakoʼon tiʼ le máaxoʼob kiaʼalik le Biiblia maʼ maʼalob baʼax tu beetoʼoboʼ. Teʼ Kiliʼich Tsʼíiboʼoboʼ k-xokik tiʼ máakoʼob tu chaʼaj u tuʼusloʼob tumen Sáatanas. Tu yaabiltoʼob u ayikʼaliloʼob le yóokʼol kaabaʼ, tuʼubtiʼob tiʼ baʼax kʼiiniloʼob kuxaʼanoʼob wa tu kʼububaʼob tiʼ u kʼaakʼas tsʼíibolaloʼob, baʼaleʼ bintiʼob kʼaasil (San Mateo 19:16-22; 24:36-42; San Lucas 16:14; 1 tiʼ Corintoiloʼob 10:8-11). Kaambalnakoʼon tiʼ máaxoʼob tsʼoʼok u beetkoʼob baʼax maʼ maʼalobtak teʼ kʼiinoʼobaʼ. Ku  yaatal k-óol k-aʼalik, baʼaleʼ yaan kristiaanoʼobeʼ ku tuʼubultiʼob kuxaʼanoʼon tu tsʼook kʼiinoʼob yéetel ku kʼuchul u tukloʼobeʼ ikil u meyajkoʼob Diooseʼ maʼ tu páajtal u kiʼikiʼ óoltkoʼob le kuxtalaʼ, le oʼolal maʼ xaaneʼ ku pʼatkoʼob u kaajal Dioos utiaʼal u binoʼob tu paach baʼaloʼob ku tuklikoʼob yaan u taasik kiʼimak óolal tiʼob. Baʼaleʼ, tiaʼanoʼob tiʼ upʼéel «kúuchil jajalki[leʼ]», tumen yaan u kʼuchul u kʼiinil u boʼotkoʼob baʼax ku beetkoʼob (Salmo 73:18, 19). Le oʼolaleʼ, maʼ kʼaʼabéet k-beetik jeʼex letiʼobeʼ (Proverbios 22:3).

17. ¿Baʼaxten Sáatanaseʼ u kʼáat ka k-tukult maʼ yaabiltaʼanoʼon mix kʼaʼabéetoʼon tiʼ Jéeobaeʼ?

¹⁷ Sáatanaseʼ tsʼoʼok xan u tusik yaʼab sukuʼunoʼob ikil u beetik u tuklikoʼob maʼ yaabiltaʼanoʼob mix kʼaʼabéetoʼob tiʼ Jéeobaiʼ. Le Kʼaasilbaʼaloʼ u miilesi jaʼaboʼob joʼopʼok u yilik bixoʼon, le oʼolal u yojel wa ku lúubul k-óoleʼ yaan u taaktal k-pʼatik meyajtik Dioos (Proverbios 24:10). Le oʼolaleʼ, u kʼáat ka k-tukleʼ jach mix baʼal k-beelal tu táan Dioos. Wa k-uʼuyik luubul k-óoleʼ yéetel wa k-tuklik maʼ kʼaʼabéetoʼon tiʼ Diooseʼ, maʼ xaaneʼ jeʼel u taaktal k-náachtal tiʼ letiʼeʼ (2 tiʼ Corintoiloʼob 24:10). U taatai le tuusoʼ jach letiʼe u kʼáat ka k-tukloʼ. Le oʼolaleʼ, ¿baʼax jeʼel u páajtal k-beetik utiaʼal maʼ k-tuukul jeʼex u kʼáat Sáatanasoʼ?

18. ¿Bix u yeʼesik le Biiblia jach yaabiltaʼanoʼon tumen Jéeobaoʼ?

¹⁸ Le Biibliaoʼ kieʼeskeʼ, kaada utúul tiʼ toʼoneʼ yaabiltaʼan tumen Dioos. Ichil u Tʼaan Diooseʼ yaan yaʼabach jatsʼuts kettʼaanoʼob ku yeʼeskoʼob jach yaabiltaʼanoʼon yéetel maʼ tuʼubsaʼanoʼon tumen Jéeobaiʼ. Letiʼeʼ ku «kʼamik u yaaliloʼob» wa u jaʼi k-ichoʼob k-wekik le táan u chúukpajal k-óol meyajtoʼ, lelaʼ u kʼáat yaʼaleʼ ku yilik yéetel ku kʼaʼajsik le okʼol k-beetikoʼ (Salmo 56:8, Los Salmos en Maya). U yojel wa «kʼiilil [k-]puksiʼikʼal», yéetel ku pʼáatal naatsʼ tiʼ toʼon utiaʼal u yáantkoʼon (Salmo 34:18). Jach u kʼaj óoloʼon, tak u tsoʼotsel «[k-]pooleʼexeʼ láaj xokaʼan tu jujunkúulil» (San Mateo 10:29-31). Baʼax eʼesik jach u yaabiltmoʼoneʼ letiʼe úuchik u tsʼáaik «u juntúuliliʼ [...] Paal» kíimil t-oʼolaloʼ (San Juan 3:16; Tiʼ Galaciailoʼob 2:20). Maʼ xaaneʼ jeʼel u talamtaltoʼon k-oksaj óoltik táan u tʼaan tiʼ toʼon le teekstoʼobaʼ. Baʼaleʼ, mix juntéen kʼaʼabéet k-tuklik wa maʼ jaaj baʼax ku yaʼaliktoʼon Jéeobaiʼ; letiʼeʼ maʼ chéen u múuchʼ yaabiltmoʼoniʼ, u kʼáat ka k-ojéelteʼ u yaabilmaj kaada utúul tiʼ toʼon.

19, 20. 1) ¿Baʼaxten jach kʼaʼanan k-ojéeltik Sáatanaseʼ u kʼáat ka k-tukult maʼ yaabiltaʼanoʼob tumen Dioosiʼ? 2) Utúul sukuʼun ku xíimbaltik le múuchʼuliloʼoboʼ, ¿bix tsʼoʼok u yáantik le sukuʼunoʼob lubaʼan u yóoloʼoboʼ?

¹⁹ Kʼaʼabéet ojéeltik máakalmáak le tuusoʼ yéetel maʼ kʼaʼabéet k-oksaj óoltikiʼ. Wa k-ojel jach ku tuus utúul  máakeʼ, jeʼel u páajtal k-kanáantikba tiʼ utiaʼal maʼ u tuskoʼoneʼ. Jeʼex tsʼoʼok k-ilkoʼ, Sáatanaseʼ u kʼáat ka k-tukult maʼ u yaabiltmoʼon Jéeobaiʼ, baʼaleʼ k-ojéeltik maʼ jaajeʼeʼ jach jeʼel u yáantkoʼoneʼ. Utúul kiikeʼ, le ka tsʼoʼok u xokik upʼéel u xookil U Pʼíich Tulumil Kanan ku tʼaan tiʼ bix u tuus Sáatanaseʼ, tiaʼalaj: «Mix juntéen tin tuklaj wa táan yilik u lúuʼsik in wóol Sáatanas yoʼolal bix in wuʼuykimba. In wojéeltik lelaʼ ku yáantken utiaʼal maʼ in tuukul jeʼex u kʼáat letiʼoʼ».

²⁰ Koʼoneʼex ilik baʼax ku beetik utúul sukuʼun xíimbaltik le múuchʼuliloʼob tiʼ upʼéel u luʼumil Súudamerika. Le sukuʼunaʼ, ken xiʼik u xíimbalt le sukuʼunoʼob utiaʼal u líiʼsik yóoloʼoboʼ, suuk u kʼáatiktiʼob: «¿Diooseʼ Tríinidad wa?». «¡Maʼatech!», ku núukaʼal tiʼ, tumen u yojloʼob leloʼ upʼéel u tuus Sáatanas. Tsʼoʼoleʼ ku kʼáatiktiʼob: «A tuklikeʼ, ¿yaan wa upʼéel metnal tuʼux ku tóokaʼal máak?» «¡Maʼatech!», ku kaʼa núukaʼal tiʼ. Tsʼoʼoleʼ kiaʼaliktiʼob yaan uláakʼ tuus u taal tiʼ Sáatanas maʼ tu jáan kʼaj óoltaʼal. Ken tsʼoʼokok u yaʼalik lelaʼ ku jeʼik le liibro Acerquémonos a Jehová * tu táan juʼunil 249, utiaʼal u xokiktiʼob le xóotʼol 21, teʼeloʼ kiaʼalikeʼ Sáatanaseʼ u kʼáat ka k-tukult maʼ yaabiltaʼanoʼon tumen Dioosiʼ. Ikil u beetik beyaʼ, le sukuʼunaʼ kiaʼalikeʼ tsʼoʼok u yáantik yaʼab sukuʼunoʼob luubul yóoloʼob utiaʼal ka u yiloʼob maʼ jaaj wa maʼ yaabiltaʼanoʼob tumen Dioosiʼ, chéen upʼéel u tuus Sáatanas.

Kʼaʼabéet k-kanáantik maʼ k-tuʼusleʼex

21, 22. ¿Baʼaxoʼob áantkoʼon k-kʼaj óolt máakalmáak u tuusoʼob Sáatanas, yéetel tiʼ baʼaxoʼob kʼaʼabéet k-kanáantikba?

²¹ Teʼ tsʼook kʼiinoʼobaʼ, Sáatanaseʼ jach jejeláas bix u yilik u tuskoʼon. U maʼalobileʼ, Jéeobaeʼ maʼ u pʼatoʼon tu kʼab u Kʼaasilbaʼal utiaʼal ka u tuʼutusoʼoniʼ. Le Biiblia yéetel le juʼunoʼob u taal tiʼ «le palitsil chúukpajaʼan u yóol yéetel yaan u naʼat[oʼ]», ku yáantkoʼon kʼaj óolt máakalmáak u tuusoʼob Sáatanas (San Mateo 24:45). Jeʼex yaʼalaʼaloʼ: «Chʼiin ku yilaʼal u taaleʼ, jeʼel u  páajtal u jechaʼaleʼ» (1 tiʼ Corintoiloʼob 2:11).

²² Le oʼolaleʼ, unaj k-kanáantikba tiʼ le tuusoʼob ku beetik le máaxoʼob tsʼoʼok u xúumpʼatkoʼob u jaajiloʼ. Jach kʼaʼabéet k-kanáantikba utiaʼal maʼ k-tusikba t-juunaleʼex. Kʼaʼabéet xan kʼaj óoltik máakalmáak u tuusoʼob Sáatanas yéetel maʼ kʼaʼabéet k-oksaj óoltkoʼobiʼ. Wa k-beetik beyaʼ, maʼ kun xuʼulul k-bisikba yéetel Jéeoba, «u Kʼuil jaaj», le máax u pʼekmaj le tuusoʼ (Salmo 31:5; Proverbios 3:32).

[Tsolajiloʼob]

[U kʼáatchiʼiloʼob le xookoʼ]

 [U tsolajil le oochel teʼ táan juʼun 9]

¿Kʼajaʼan wa tech?

• ¿Baʼaxten jach táaj yaan tuusil bejlaʼeʼ?

• ¿Bix jeʼel k-kanáantikba tiʼ le tuusoʼob ku beetik le máaxoʼob tsʼoʼok u xúumpʼatkoʼob u jaajiloʼ?

• ¿Baʼaxoʼob jeʼel u páajtal k-beetik utiaʼal maʼ k-tusikba t-juunaleʼ?

• ¿Bix jeʼel k-kanáantikba tiʼ u tuusoʼob Sáatanaseʼ?