Kʼaʼabéet k-kiʼikiʼtʼantkeʼex Dios yéetel «jumpʼéeliliʼ tʼaan»

«Tuláakalileʼex junmúuchʼeʼ, tiʼ jumpʼéeliliʼ tʼaaneʼ, [...] kiʼikiʼtʼanteʼex u Jajal Dios yéetel u Taata k-Yuumtsil Jesucristo» (ROMAILOʼOB 15:6, El Nuevo Testamento en Maya, NT.)

1. ¿Baʼax tu kaʼansaj Pablo tiʼ uláakʼ cristianoʼob yoʼolal le baʼaloʼob maʼ upʼéeliliʼ bix k-tuukul tu yoʼolaloʼobiʼ?

KEX yaan tiʼ baʼaloʼob maʼ upʼéeliliʼ bix k-tuukul yéetel maʼ upʼéeliliʼ baʼax uts t-icheʼeʼ, tuláakloʼon kʼaʼabéet k-múul xíimbaleʼex teʼ bej ku bisaj tiʼ le kuxtal minaʼan u xuuloʼ. ¿Jeʼel wa u páajtaleʼ? Jeʼeleʼ, baʼaleʼ maʼ kʼaʼabéet k-baʼateʼel tu yoʼolal baʼaloʼob maʼ jach kʼaʼanantak maʼ upʼéeliliʼ bix k-tuukul tu yoʼolaloʼobiʼ. Lelaʼ bey tu kaʼansilak le apóstol Pablo tiʼe yáax cristianoʼoboʼ. ¿Bix úuchik u tsoliktiʼob le baʼal jach kʼaʼananaʼ? Yéetel ¿bix jeʼel k-beetik le baʼax tsʼaʼab tu tuukul tumen Dios ka u tsʼíibtoʼ?

U jach kʼaʼananil k-meyajtik Dios yéetel upʼéeliliʼ tuukul

2. ¿Bix úuchik u yeʼesik Pablo jach kʼaʼanan ka meyajtaʼak Dios yéetel upʼéeliliʼ tuukul?

² Pabloeʼ u yojel kaʼacheʼ le cristianoʼoboʼ jach kʼaʼanan ka u meyajtoʼob Dios yéetel  upʼéeliliʼ tuukul, le oʼolal tu tsʼáaj maʼalob tsol nuʼuktiʼob utiaʼal maʼ u beetkoʼob u cuentai baʼax ku beetaʼaltiʼob tumen uláakʼ cristianoʼob yéetel ka u kan u bisubaʼob ich yaabilaj (Tiʼ Efesoiloʼob 4:1-3; Colosenses 3:12-14). Baʼaleʼ, ku tsʼoʼokol u káajsik yaʼab múuchʼuliloʼob yéetel ku tsʼoʼokol u xíimbaltik le sukuʼunoʼob tu yoʼolal maas tiʼ veinte jaʼaboʼoboʼ, tu yileʼ maʼ chéen chʼaʼabil jeʼel u meyajtaʼal Dios yéetel upʼéeliliʼ tuukuliʼ (1 tiʼ Corintoiloʼob 1:11-13; Tiʼ Galaciailoʼob 2:11-14). Le oʼolal tu tsʼíibtaj le tʼaanoʼob tiʼ u cristianoiloʼob Romaaʼ: «Jajal Dios, [le] máax ku tsʼáaik chúukaʼan óolal yéetel kiʼimak óolaleʼ, u yáanteʼex utiaʼal ka kuxlakeʼex maʼalob ta baatsileʼex, [...] utiaʼal beyoʼ tuláakalileʼex junmúuchʼeʼ, tiʼ jumpʼéeliliʼ tʼaaneʼ, ka a kiʼikiʼtʼanteʼex u Jajal Dios yéetel u Taata k-Yuumtsil Jesucristo» (Tiʼ Romailoʼob 15:5, 6). Bejlaʼeʼ, toʼon xaneʼ kʼaʼabéet k-kiʼikiʼtʼantik Jéeoba Dios yéetel «jumpʼéeliliʼ tʼaan», lelaʼ u kʼáat yaʼaleʼ kʼaʼabéet meyajtik yéetel jumpʼéeliliʼ tuukul. ¿Táan wa k-ilik beetik lelaʼ?

3, 4. 1) ¿Tuʼux u taal le cristianoʼob yanoʼob Roma kaʼachoʼ, yéetel bix líiʼsaʼabikoʼob? 2) ¿Baʼax kʼaʼabéet u beetik kaʼach le cristianoʼob yanoʼob Roma utiaʼal ka páatak u kiʼikiʼtʼantkoʼob Jéeoba yéetel «jumpʼéeliliʼ tʼaan»?

³ Yaʼab tiʼ le cristianoʼob yanoʼob Roma kaʼachoʼ jach u amigoʼob Pablo (Tiʼ Romailoʼob 16:3-16). Kex maʼ upʼéeliliʼ tuʼux u taaloʼob yéetel jejeláas bix líiʼsaʼabikoʼobeʼ, utiaʼal Pablo kaʼacheʼ tuláakal le sukuʼunoʼobaʼ láaj «yaabiltaʼan[oʼob] tumen Jajal Dios». Pabloeʼ tu tsʼíibtaj: «Tu yoʼolal Jesucristoeʼ kin tsʼáaik gracias tiʼ Jajal Dios tu yoʼolal tuláakaleʼex, tumen tiʼ tuláakal tuʼux ku yúuchul tʼaan tu yoʼolal a woksaj óolaleʼex». K-ilik túuneʼ, le cristianoʼob yanoʼob Roma kaʼachoʼ maʼalob bix u kuxtaloʼob tu táan Dios (Tiʼ Romailoʼob 1:7, 8; 15:14). Baʼaleʼ, yaan tiʼ letiʼob kaʼacheʼ maʼ upʼéeliliʼ bix u tuukuloʼob tu yoʼolal jujumpʼéel baʼaloʼobiʼ. Teʼ kʼiinoʼob xanaʼ, le cristianoʼoboʼ jejeláas tuʼux u taaloʼob yéetel jejeláas bix líiʼsaʼaniloʼob. Le oʼolaleʼ, utiaʼal u páajtal k-kiʼikiʼtʼantik Dios yéetel «jumpʼéeliliʼ tʼaaneʼ», maʼalob ka k-xokeʼex le tsolnuʼukoʼob tu tsʼáaj Pablo tiʼ bix kʼaʼabéet k-ilik le baʼaloʼob maʼ upʼéeliliʼ bix k-tuukul tu yoʼolaloʼoboʼ.

⁴ Ichil le cristianoʼob yanoʼob Roma kaʼachoʼ yaan judíoʼob yéetel maʼ judíoʼobiʼ (Tiʼ Romailoʼob 4:1; 11:13). K-ilkeʼ, jujuntúul tiʼ le cristianoʼob judíoʼob kaʼachoʼ láayliʼ táan yilik u tsʼoʼokbeskoʼob jujumpʼéel baʼaloʼob ku kʼáatik u Ley Moiseseʼ, baʼaleʼ maʼ xaaneʼ u yojloʼob kaʼach maʼ tsaa ka u beetoʼob utiaʼal u salvarkubaʼobiʼ. Baʼaleʼ, utiaʼal uláakʼ judíoʼobeʼ jáalkʼabtaʼaboʼob tumen u kʼiʼikʼel Cristo tiʼ le leyoʼob unaj u tsʼoʼokbeskoʼob le maʼiliʼ u beetubaʼob cristianoi kaʼachoʼ. Le oʼolaleʼ, tu xulaj u meentkoʼob jujumpʼéel baʼaloʼob suuk u beetaʼal tumen le judíoʼob kaʼachoʼ (Tiʼ Galaciailoʼob 4:8-11). Baʼaleʼ, jeʼex tu yaʼalil Pablooʼ, tuláakloʼob kaʼach «yaabiltaʼan[oʼob] tumen Jajal Dios» yéetel jeʼel u páajtal u kiʼikiʼtʼantkoʼob Jéeoba yéetel «jumpʼéeliliʼ tʼaan» wa ka u yil u biskubaʼob maʼalob yéetel u maasileʼ. Toʼon xaneʼ, yaan tiʼ baʼaloʼob maʼ upʼéeliliʼ bix k-tuukuliʼ, le oʼolal maʼalob ka k-xokeʼex baʼax tiaʼalaj Pablo tiʼ bix kʼaʼabéet k-ilkeʼex le baʼaloʼob maʼ upʼéeliliʼ bix k-tuukul tu yoʼolaloʼoboʼ (Tiʼ Romailoʼob 15:4).

«Utsi kʼamabaʼex ta baatsileʼex»

5, 6. Le cristianoʼob yanoʼob Roma kaʼachoʼ, ¿baʼaxten maʼ upʼéeliliʼ bix u tuukuloʼob tu yoʼolal le janaloʼ?

⁵ Teʼ tsʼíibil juʼun tu túuxtaj tiʼ le romailoʼoboʼ, Pabloeʼ tʼaanaj tiʼ upʼéel baʼal maʼ upʼéeliliʼ bix u tuukul le cristianoʼob tu yoʼolaloʼ. Letiʼeʼ tu tsʼíibtaj: «Yaan máax ku tukultikeʼ ku páajtal u jaantik tuláakal baʼal, yaan uláakʼeʼ [...] ku jaantik chéen janalbeʼen xíiwoʼob». ¿Baʼaxten túun ku yúuchul kaʼach lelaʼ?  Utiaʼal k-naʼatkeʼ, u Ley Moiseseʼ ku yaʼalik maʼ uts u jaantaʼal u bakʼel kʼéekʼeniʼ (Tiʼ Romailoʼob 14:2; Levítico 11:7). Baʼaleʼ, ka tsʼoʼok u kíimil Jesuseʼ le ley jeʼelaʼ xuʼuli (Tiʼ Efesoiloʼob 2:15). Óoxpʼéel jaʼab ka tak táankoch kíimik Jesuseʼ, utúul ángeleʼ tu yaʼalaj tiʼ Pedro baʼax ku tuklik Dios tu yoʼolal lelaʼ: mix upʼéel janal kʼaʼabéet u yilaʼal maʼ uts u jaantaʼaliʼ (Baʼaxoʼob [Hechos] 11:7-12). Le oʼolaleʼ, jujuntúul cristianoʼob judíoʼob kaʼacheʼ, maʼ xaaneʼ ku tuklikoʼob maʼ kʼaas u jaantaʼal u bakʼel kʼéekʼeniʼ mix xan uláakʼ janaloʼob kiaʼalik kaʼach le Ley maʼ uts u jaantaʼaloʼ.

⁶ Baʼaleʼ, utiaʼal uláakʼ cristianoʼob judíoʼob kaʼacheʼ, maʼ xaaneʼ chéen u tuklikoʼob jeʼel u páajtal u jaantkoʼob le baʼaloʼob kiaʼalik le Ley maʼ uts u jaantaʼal kaʼachoʼ, ku beetik u woʼoltkuba u nakʼoʼob. Maʼ xaaneʼ, chéen yéetel u yilkoʼob u yéet sukuʼuniloʼob judíoʼob táan u jaantkoʼob le baʼaloʼobaʼ, ku pʼuʼujuloʼob. Baʼaleʼ, yaan cristianoʼob maʼ judíoʼobeʼ, maʼ xaaneʼ ku jaʼakʼal yóoloʼob ken u yiloʼob u yúuchul baʼateʼel chéen tu yoʼolal janal, tumen letiʼobeʼ líikʼoʼob tiʼ upʼéel religión tuʼux maʼatech u yaʼalaʼaltiʼob kaʼach maʼ uts u jaantkoʼob wa baʼaxiʼ. U jaajileʼ, utúul cristianoeʼ maʼ tu kʼebantal wa maʼ tu yóotik u jaant wa baʼax jaanlil, baʼaleʼ maʼ maʼalob ka u yil u yoksik tu tuukul u maasil, unaj u beetkoʼob jeʼex letiʼ utiaʼal ka kʼaʼamkoʼob tumen Diosiʼ. Le jejeláas tuukuloʼob yaan ichil le cristianoʼob kaʼachoʼ jach séeb jeʼel u beetik u maas tʼaʼabal le baʼateʼel yaan ichiloʼob tu yoʼolal le jaanloʼ. Le cristianoʼob yanoʼob Roma kaʼachoʼ jach kʼaʼabéet u kanáantkubaʼob utiaʼal maʼ u xuʼulul u kiʼikiʼtʼantkoʼob Dios yéetel «jumpʼéeliliʼ tʼaan» chéen tumen maʼ upʼéeliliʼ bix u tuukuloʼob tu yoʼolal le janaloʼ.

7. ¿Baʼax jejeláas tuukulil yaan kaʼach tiʼ le cristianoʼob tu yoʼolal le sábadooʼ?

⁷ Pablo xaneʼ kiaʼalikeʼ «yaan máax ku táanilkunsik [wa ku tuklik maas maʼalob] jumpʼéel kʼiin tiʼ uláakʼ, yaan máax xaneʼ ku tukultikeʼ» upʼéeliliʼ «tuláakal le kʼiinoʼoboʼ» (Tiʼ Romailoʼob 14:5, yáax xéetʼ). U Ley Moisés kaʼacheʼ maʼ tu chaʼik u beetaʼal mix upʼéel meyaj tu kʼiinil sábado, aʼalaʼab tak bukaʼaj jeʼel u páajtal u xíimbaltik máak teʼ kʼiin jeʼeloʼ (Éxodo 20:8-10; Mateo 24:20; Baʼaxoʼob 1:12). Kex tuláakal le baʼaloʼob jeʼelaʼ xuʼuloʼob le ka luʼsaʼab le Leyoʼ, maʼ xaaneʼ jujuntúul cristianoʼob judíoʼob kaʼacheʼ jelaʼan u yuʼubkubaʼob ken u tukloʼob jeʼel u páajtal beetkoʼob jeʼel baʼalak meeyjil tu kʼiinil sábadoeʼ wa jeʼel u páajtal u xíimbaltkoʼob yaʼabach kilómetros teʼ kʼiin kiliʼich utiaʼaloʼob kaʼachoʼ. Maʼ xaaneʼ, kex tsʼoʼok u beetkubaʼob cristianoʼob kaʼacheʼ, ku pʼatkoʼob u kʼiinil le sábado chéen utiaʼal u meyajkoʼob Diosoʼ, kex tsʼoʼok maʼ tu tsaʼabaltiʼob tumen Jéeoba ka u kʼiimbesoʼob le kʼiin jeʼelaʼ. ¿Kʼaas wa túun le baʼax ku beetkoʼoboʼ? Maʼ kʼaasiʼ, baʼaleʼ maʼ unaj u yilik u yokskoʼob tu tuukul u maasil láayliʼ táan u kʼáataʼaltiʼob tumen Jéeoba ka u kʼiimbesoʼob u kʼiinil le sábadooʼ. Pablo túuneʼ, tu yoʼolal bix u tuukul u yéet cristianoiloʼobeʼ, tiaʼalaj: «Cada juntúuleʼ unaj u jéetsʼel maʼalob tiʼ baʼax ku tukultik» (Tiʼ Romailoʼob 14:5b, u tsʼook xéetʼ).

8. Kex unaj u kʼaʼajskoʼob bix u tuukul cada utúuleʼ, ¿baʼax maʼ kʼaʼabéet u beetkoʼob u cristianoiloʼob Roma kaʼachiʼ?

⁸ Pabloeʼ tiaʼalaj tiʼ u yéet cristianoiloʼobeʼ maʼ u kʼuuxiloʼob yéetel máaxoʼob maʼ yiijchajak u naʼatoʼob tiʼ baʼaxoʼob letiʼ máak kun chʼaʼatuklik baʼax ken u beete. Baʼaleʼ, tu yaʼalaj xan jach maʼ maʼalob baʼax ku beetik le máaxoʼob táan u yilik u yokskoʼob tu tuukul u yéet cristianoiloʼob ka u tsʼoʼokbesoʼob baʼax kiaʼalik u Ley Moisés utiaʼal ka u salvartubaʼoboʼ. Le oʼolaleʼ, óoliʼ tu jaʼabil 61 t.T-kʼ. (teʼ T-kʼiinoʼobaʼ), tu tsʼíibtaj u carta tiʼ le cristianoʼob ebreoʼob wa judíoʼoboʼ. Le baʼax ku yaʼalik ichiloʼ jach yaan u muukʼ. Teʼ cartaaʼ,  Pabloeʼ jach tʼáalkab bix úuchik u tsolik minaʼan u beelal u tsʼoʼokbesaʼal le Leyoʼ, tumen le cristianoʼoboʼ táan u páaʼtkoʼob upʼéel baʼal maas maʼalob ku taal tiʼ u yoksaj óolkoʼob u kʼiʼikʼel Jesús (Tiʼ Galaciailoʼob 5:1-12; Tiʼ Tito 1:10, 11; Tiʼ Hebreob 10:1-17).

9, 10. ¿Baʼax maʼ unaj u beetik le cristianoʼoboʼ, yéetel baʼaxten?

⁹ K-ilik túuneʼ, Pabloeʼ ku yaʼalikeʼ, wa le baʼax ku beetaʼal mix baʼal jach eʼesik táan u bin tu contra le nuʼuktajoʼob tsʼaʼan utiaʼal le cristianoʼoboʼ, le jejeláas tuukul yaan ichiloʼoboʼ maʼ unaj u talamkúuntik u meyajtkoʼob Dios yéetel upʼéeliliʼ tuukuliʼ. Le oʼolal kiaʼalik tiʼe cristianoʼob ku tuklikoʼob kʼaʼabéet u tsʼoʼokbesaʼal baʼax kiaʼalik le Leyoʼ: «¿Baʼaxten ka pʼis óoltik a sukuʼun?». Baʼaleʼ, tiʼ le máaxoʼob ku tuklikoʼob jeʼel u páajtal u meyajoʼob utiaʼal sábado wa jeʼel u páajtal u jaantkoʼob le baʼaloʼob kiaʼalik le Ley maʼ uts u jaantaʼal kaʼachoʼ, Pabloeʼ kiaʼalik: «[¿]Baʼaxten ka pʼektik [a sukuʼun]?» (Tiʼ Romailoʼob 14:10). Pabloeʼ kiaʼalikeʼ le cristiano ku tuklik maʼ uts u beetaʼal wa baʼax, kex mix baʼal eʼesik wa kʼaaseʼ, maʼ unaj u tʼaan kʼaas tu yoʼolal u yéet sukuʼunoʼob jelaʼan u tuukuloʼob tiʼ letiʼiʼ. Baʼaleʼ kiaʼalik xaneʼ, le cristiano ku tuklik jeʼel u páajtal u beetik wa baʼax, tumen mix baʼal eʼesik wa kʼaaseʼ, maʼ unaj u pʼektik le máaxoʼob maʼ bey u tuukuloʼob jeʼex letiʼoʼ. Tuláakal máax meyajtik Jéeobaeʼ kʼaʼabéet u yeʼesik tsiikil tiʼ bix u tuukul u maasil yéetel «mix juntúul ka u tukult tu yoʼolaleʼ maanal tiʼ le unaj u tukultikoʼ» (Tiʼ Romailoʼob 12:3, 18).

¹⁰ Pabloeʼ tu yeʼesaj bix kʼaʼabéet u yilaʼal le baʼaloʼoboʼ: «Le máax ku jaantik jeʼel baʼalakeʼ, maʼ u pʼektik le máax ku tukultik yaan baʼaxoʼob maʼ unaj u jaantaʼaloʼobiʼ. Bey xan le máax ku tukultik yaan baʼax maʼ unaj u jaantaʼaloʼ maʼ u pʼis óoltik le máax ku jaantik jeʼel baʼalakeʼ, tumen Jajal Dioseʼ tsʼoʼok u kʼamik le máakoʼ». Tu yaʼalaj xan: «Jeʼebix xan Cristo tu yutsi kʼamajoʼon utiaʼal u nojbeʼenil Jajal Dios[eʼ]». Bey tumen Dios yéetel Cristo ku kʼamkoʼob le máaxoʼob ku tuklikoʼob maʼ uts u beetaʼal wa baʼax yéetel ku kʼamkoʼob xan le máaxoʼob ku tuklikoʼob jeʼel u páajtal u beetkoʼobeʼ, toʼoneʼex xaneʼ kʼaʼabéet k-beetkeʼex jeʼex letiʼoboʼ, unaj «[k-]utsi kam[ik]baʼex t[-]baatsileʼex» (Romailoʼob 14:3, NT; 15:7, Le Tumben Nuptʼan). ¿Maʼ wa jaaj baʼax kiaʼalik le apóstol Pabloaʼ?

Le yaabilaj yaan ichiloʼonoʼ ku yáantkoʼon ka k-bisbaʼex tubeel

11. ¿Tiʼ baʼax tʼaanaj Pablo chéen tu kʼiinil le yáax cristianoʼob ilaʼaboʼ?

¹¹ Teʼ carta tu túuxtaj tiʼ le romailoʼoboʼ Pabloeʼ tʼaanaj tiʼ upʼéel baʼal chéen teʼ kʼiinoʼob jeʼel ilaʼaboʼ. Óoliʼ 23 jaʼaboʼob táanil tiʼ u tsʼíibtik Pablo le cartaaʼ, Jéeobaeʼ tu xulaj le núup tʼaan u beetmaj yéetel le judíoʼoboʼ, ka tu jel beetaj uláakʼ yéetel le cristianoʼoboʼ, baʼaleʼ jujuntúul tiʼ letiʼobeʼ talamchaj u kʼamkoʼob baʼax kiaʼalik le túumben núup tʼaanaʼ. Kex bejlaʼa maʼ táan k-máansik le talamiloʼob anchaj tiʼe yáax cristianoʼob le ka kʼeʼex le úuchben núup tʼaanoʼ, yaan kʼiineʼ jeʼel u yantaltoʼon talamiloʼob jeʼex le anchaj tiʼ letiʼoboʼ.

12, 13. Le cristianoʼob bejlaʼaʼ, ¿tiʼ baʼaxoʼob unaj u yeʼeskoʼob tsiikil tu yoʼolal bix u tuukul u yéet sukuʼuniloʼob?

¹² Maʼ xaaneʼ utúul cristianaeʼ líikʼ tiʼ upʼéel religión tuʼux kiaʼalaʼaltiʼob maʼ uts u jatsʼuts líiʼskuba utúul koʼoleliʼ. Baʼaleʼ, ka tu yoksaj óoltaj u jaajileʼ, maʼ xaaneʼ, ku talamtal u kʼamik utúul cristianaeʼ jeʼel u páajtal u búukintik upʼéel jatsʼuts nookʼ wa maʼ jelaʼan bey xan maʼ kʼaas u yilaʼaliʼ yéetel jeʼel u páajtal u jatsʼuts bonkuba utiaʼal súutukiloʼob tuʼux ku páaʼtaʼal ka u líiʼsuba máak tubeeleʼ. Le kiik maʼ jach maʼalob yilik  u jatsʼuts líiʼskuba utúul cristianaeʼ maʼ kʼaʼabéet u yilaʼal u kʼeʼexel u tuukul tiʼ bix unaj u líiʼskubaeʼ, tumen le bix u tuukuloʼ maʼ tiaʼan tu contra upʼéel u ley Jéeobaeʼ. Letiʼ xaneʼ, kʼaʼabéet u naʼatkeʼ maʼ unaj u tʼaan kʼaas tu yoʼolal le cristianaʼob uts tu yich u jatsʼuts líiʼskubaʼoboʼ.

¹³ Beoraaʼ koʼoneʼex tuklikeʼ utúul cristianoeʼ líikʼ tuʼux jach kʼaas u yilaʼal u yukʼik máak, kex tak chéen u pʼíit. Le ka tu kanaj u jaajileʼ, ku yilkeʼ le Bibliaoʼ kieʼeskeʼ le vinooʼ Dios tsʼaamil tiʼ wíinik yéetel maʼ kʼaas u yuʼukʼliʼ, baʼaleʼ kʼaʼabéet u tsʼaʼabal u pʼiis (Salmo 104:15). Le sukuʼunaʼ ku kʼamik le baʼax ku kaʼansik le Bibliaaʼ, baʼaleʼ, yoʼolal bix líiʼsaʼabikeʼ, ku chʼaʼatuklik maʼ u yukʼik jach upuliʼ, mix kex u pʼíit. Baʼaxeʼ, maʼ tu tʼaan kʼaas tu yoʼolal máaxoʼob ku tsʼáaik u pʼiis u yuʼkoʼob. Ku kʼaʼajsik le baʼax kiaʼalik Pabloaʼ: «Koʼo[neʼe]x kaxantik le baʼaloʼob ku taasik jeetsʼel óolaloʼ, le baʼaloʼob ku páajtal u yáantikoʼonoʼ» (Tiʼ Romailoʼob 14:19).

14. ¿Tiʼ baʼaxoʼob unaj k-nuʼuktikba tioʼolal baʼax tiaʼalaj Pablo tiʼ u cristianoiloʼob Roma?

¹⁴ Yaan uláakʼ baʼaxoʼob ku kʼaʼabéetkuntik k-nuʼuktikba yoʼolal baʼax tiaʼalaj Pablo tiʼ u cristianoiloʼob Romaoʼ. Yaʼab sukuʼunoʼob yaan teʼ múuchʼuliloʼ, yéetel jejeláas baʼax utstutʼaanoʼob, le oʼolal maʼ xaaneʼ, yaanal bix u tuukuloʼob yoʼolal jejeláas baʼaloʼob. Maʼ xaaneʼ, cada utúuleʼ yaanal bix uts tu yich u líiʼskuba. Baʼaleʼ, teʼ Bibliaoʼ yaan nuʼuktajiloʼob kʼaʼabéet u uʼuyajtʼantaʼal tumen tuláakal cristiano u kʼáat u beet baʼax utstutʼaan Dios. Mix utúul tiʼ toʼon jeʼel u beetik u kʼoʼosol wa u takik upʼéel nookʼ jach kʼaas wa jelaʼan u yilaʼaleʼ. Mix utúul xan tiʼ toʼon jeʼel u líiʼskuba jeʼex le máaxoʼob maʼ maʼalob yilaʼal bix u líiʼskubaʼoboʼ (1 San Juan 2:15-17). Utúul cristianoeʼ mix utéen kʼaʼabéet u tuʼubsik táan u meyajtik yéetel táan u tʼaan tu kʼaabaʼ Jéeoba, u Noj Jalaʼachil tuláakal baʼal, mix tak tu súutukil táan u náaysik u yóol (Isaías 43:10; San Juan 17:16; 1 tiʼ Timoteo 2:9, 10). Kex beyoʼ, utúul cristianoeʼ yaʼab baʼaloʼob jeʼel u páajtal u beetik maʼ tiaʼanoʼob tu contra u leyoʼob Jéeobaeʼ. *

Maʼ k-beetik u tʼóochpajal mix máak

15. Utúul cristianoeʼ, ¿baʼax kʼiin jeʼel u chʼaʼatuklik maʼ u beetik upʼéel baʼal kex u yojel maʼ kʼaasiʼ?

¹⁵ Pablo xaneʼ tu tsʼáaj uláakʼ jach maʼalob nuʼuktaj tiʼ le cristianoʼob yanoʼob Roma kaʼachoʼ. Maʼ xaaneʼeʼ, utúul cristiano yiijchajaʼan u naʼat tubeeleʼ, jeʼel u chʼaʼatuklik maʼ u beetik upʼéel baʼal kex u yojel maʼ kʼaasiʼ. ¿Baʼax oʼolal? Tumen ku naʼatik jeʼel u beetik kʼaas tiʼ u maasileʼ. Wa k-ilik jeʼel u tʼóochpajal k-sukuʼun yoʼolal baʼax ken k-beeteʼ, ¿baʼax unaj k-meentik? Pabloeʼ ku yaʼalik: «Maʼalob maʼ a jaantik bakʼ, mix a wukʼik vino, mix a beetik mix baʼal ka u beet u tʼóochpajal a sukuʼun» (Tiʼ Romailoʼob 14:14, 20, 21). Le oʼolaleʼ, wa yiijchajaʼan k-naʼateʼ maʼ unaj k-tʼaan kʼaas tu yoʼolal le máaxoʼob maʼ yiijchajaʼan u naʼatoʼoboʼ, «maʼ unaj k-lúubul utsil chéen tiʼ toʼoniʼ. Cada juntúul tiʼ toʼoneʼ unaj u lúubul utsil tu táan uláakʼ tiʼ jeʼel baʼalak utiaʼal u yutsil uláakʼeʼ» (Romailoʼob 15:1, 2, NT). Wa k-ilik jeʼel u tʼóochpajal k-sukuʼun yoʼolal baʼax k-tuklik beetikeʼ, le yaabilaj k-uʼuyik tu yoʼolaloʼ yaan u túulchʼinkoʼon utiaʼal maʼ k-beetik. Maʼ xaaneʼ, utúul sukuʼuneʼ u yojel jeʼel u páajtal yukʼik, wa ku tsʼáaik u pʼiiseʼ, baʼaleʼ wa ku yilik jeʼel u beetik u tʼóochpajal u yéet sukuʼunileʼ, maas maʼalob maʼ u yukʼik.

16. ¿Bix jeʼel u páajtal k-eʼesik táan k-tuukul tu yoʼolal le máaxoʼob kajaʼanoʼob teʼ tuʼux k-kʼaʼaytajoʼ?

 ¹⁶ Le nuʼuktaj jeʼelaʼ jeʼel xan u meyaj utiaʼal k-kanik bix jeʼel k-bisikba yéetel le máaxoʼob maʼ k-sukuʼunoʼoboʼ. Maʼ xaaneʼ le tuʼux kajaʼanoʼonoʼ le religión yaan tiʼ óoliʼ tuláakaloʼ ku yaʼalik unaj u jeʼelel máak utiaʼal upʼéel kʼiin tiʼ le semanaoʼ. Utiaʼal túun maʼ k-beetik u tʼóochpajloʼob yéetel utiaʼal maʼ k-beetik u yantal talmiloʼob utiaʼal k-bisik le maʼalob péektsiloʼ, kʼaʼabéet kanáantik baʼax k-beetik utiaʼal maʼ u kʼuuxil le vecinoʼoboʼ. Maʼ xan xaneʼ, utúul cristiano yaan taakʼin tiʼeʼ ku bin kajtal tiʼ upʼéel kaaj óotsil tuʼux kʼaʼabéet sukuʼunoʼob utiaʼal áantaj teʼ kʼaʼaytajoʼ. Tumen táan u tuukul tu yoʼolal u túumben vecinoʼobeʼ, maʼ xaaneʼ ku chʼaʼatuklik maʼ u takik nookʼoʼob jach koʼojtak wa xan ku chʼaʼatuklik maʼ u sen yantal baʼaloʼob tiʼ, kex jeʼel u páajtal u mankeʼ.

17. ¿Baʼax eʼesik jeʼel u páajtal k-tuukul tu yoʼolal u maasil ken k-chʼaʼatukult baʼax ken k-beeteʼ?

¹⁷ Le máaxoʼob yiijchajaʼan u naʼatoʼoboʼ, ¿jeʼel wa u páajtal u yáax kaxkoʼob u yutsil u maasileʼ? Utiaʼal k-núukikeʼ, koʼoneʼex tuklik táan u bin k-manejareʼ k-ilkeʼ jujuntúul mejen paalaleʼ táan u báaxloʼob teʼ tu jáal le bejoʼ. ¿Maʼ wa ken k-kabalkuns u chichil k-bin, kex chaʼabaʼan k-chichich maan teʼ bej jeʼeloʼ? Yaan, tumen wa maʼeʼ jeʼel k-yachʼik le mejen paalaloʼ. Yaan kʼiin xaneʼ, kʼaʼabéet k-ilik kaxtik yáax u yutsil k-sukuʼunoʼob wa u yutsil uláakʼ máakoʼob. Lelaʼ bey ka k-éems u chichil k-bineʼ. Maʼ xaaneʼ, le baʼax k-tuklik beetkoʼ maʼ kʼaasiʼ, tumen maʼ tiaʼan tu contra baʼax kiaʼalik le Bibliaoʼ. Baʼaleʼ, wa k-ojéeltik jeʼel u beetik u kʼuuxil jujuntúul tiʼ k-sukuʼunoʼob, wa jeʼel u beetik u tʼóochpajal wa u lúubul tiʼ kʼeban le máaxoʼob maʼ jach yiijchajaʼan u naʼatoʼobeʼ, le yaabilaj k-uʼuyik tu yoʼolaloʼoboʼ yaan u péekskoʼob k-beet baʼax jeʼel u taasik utsil tiʼ letiʼobeʼ (Tiʼ Romailoʼob14:13, 15). K-meyajtik Dios yéetel upʼéeliliʼ tuukul, yéetel k-bisik u maʼalob péektsilil le Reinooʼ, maas jach kʼaʼanan tiʼ k-ilik beetik baʼax k-ojel maʼ kʼaasiʼ.

18, 19. 1) Wa k-tuukul tu yoʼolal u maasileʼ, ¿baʼaxten táan k-beetik jeʼex Jesuseʼ? 2) ¿Tiʼ baʼax upʼéeliliʼ bix k-tuukul, yéetel baʼax ken k-il teʼ tuláakʼ xookoʼ?

¹⁸ Ken k-beet beyaʼ táan k-beetik jeʼex Jesuseʼ. Pabloeʼ tu yaʼalaj: «Tumen mix Cristo j-lúub utsil chéen tu táan letiʼiʼ, baʼaleʼ tiʼ letiʼeʼ úuch le baʼaloʼob ku yaʼalik le Kiliʼich Tsʼíiboʼ: U poochʼiloʼob le máaxoʼob pochʼikoʼonoʼ j-lúub tin wóokʼol». Wa Jesús tu tsʼáaj u kuxtal t-oʼolaleʼexeʼ, toʼon xaneʼ kʼaʼabéet k-tsʼáaik táanil u yutsil le máaxoʼob maʼ jach yiijchajak u naʼatoʼoboʼ, utiaʼal k-múul kiʼikiʼtʼanteʼex Dios tu yéeteloʼob. Wa k-ilik kʼamkoʼob jeʼex bixoʼoboʼ bey xan wa k-kanáantik maʼ k-beetik upʼéel baʼal jeʼel u beetik u tʼóochpajloʼobeʼ, táan k-kuxtal «jeʼel bix [t]u kaʼansi[j] Cristo Jesusoʼ» (Tiʼ Romailoʼob 15:1-5).

 ¹⁹ Jeʼex tsʼoʼok k-ilkoʼ, tiʼ baʼaloʼob maʼ tu binoʼob tu contra baʼax kiaʼalik le Bibliaoʼ, maʼ upʼéeliliʼ bix k-tuukuliʼ, baʼaleʼ tiʼ baʼax yaan yil yéetel bix kʼaʼabéet k-meyajtik Dioseʼ, upʼéeliliʼ bix k-tuukul (1 tiʼ Corintoiloʼob 1:10). Le upʼéeliliʼ tuukul yantoʼon utiaʼal k-meyajtik Diosoʼ ku chíikpajal tiʼ bix k-ilik le máaxoʼob ku tsʼáaikubaʼob tu contra u jaajiloʼ. Le Kiliʼich Tsʼíiboʼoboʼ kiaʼalikoʼobeʼ le máakoʼob jeʼeloʼobaʼ beyoʼob máakoʼob maʼ k-kʼaj óoloʼobeʼ yéetel ku yaʼaliktoʼon maʼ k-uʼuyik u tʼaanoʼob (San Juan 10:5). ¿Baʼax ken u yáantoʼon utiaʼal k-kʼaj óoltik máaxoʼobiʼ? ¿Bix jeʼel k-kanáantikba tiʼ letiʼobeʼ? Lelaʼ yaan k-ilik teʼ tuláakʼ xookoʼ.

[Tsolajiloʼob]

[U kʼáatchiʼiloʼob le xookoʼ]

[U tsolajil le oochel teʼ táan juʼun 25]

¿Baʼax jeʼel a núukikeʼ?

• U yantaltoʼon jejeláas tuukul tu yoʼolal upʼéel baʼaleʼ, ¿baʼaxten maʼ unaj u talamkúuntik k-meyajtik Dios yéetel upʼéeliliʼ tuukuliʼ?

• ¿Baʼaxten kʼaʼabéet k-ilik naʼatikba t-baatsileʼex?

• ¿Tiʼ baʼaxoʼob jeʼel u nuʼuktikoʼon le baʼax tiaʼalaj Pablo tiʼ bix jeʼel k-meyajtik Dios yéetel upʼéeliliʼ tuukuleʼ, yéetel baʼax kun túulchʼinkoʼon utiaʼal k-beet le baʼax tiaʼaloʼ?