Le j-kʼasaʼanoʼoboʼ maʼ kun púutsʼloʼob tiʼ le xuʼulsajiloʼ
Le j-kʼasaʼanoʼoboʼ maʼ kun púutsʼloʼob tiʼ le xuʼulsajiloʼ
«[¡Líiʼsaba] utiaʼal a naktáantikaba yéetel a [Dios]!» (AMÓS 4:12.)
1, 2. ¿Baʼaxten k-aʼalikeʼ Dioseʼ yaan u xuʼulsik le kʼasaʼaniloʼ?
¿YAAN wa u kʼuchul u kʼiinil u xuʼulsaʼal tumen Dios tuláakal le kʼaas yéetel le muʼyaj yaan way Luʼumeʼ? Tu káajbal le siglo 21 jach maʼalob ka beetaʼak le kʼáatchiʼaʼ. Bejlaʼeʼ, tuláakal tuʼux yaan máakoʼob ku beetkoʼob loob tiʼ u yéet máakiloʼob. ¡Bukaʼaj k-tsʼíiboltik kuxtal tiʼ upʼéel yóokʼol kaab tuʼux minaʼan kʼaas, terrorismo mix sen ookol!
2 Baʼaleʼ, Jéeobaeʼ yaan u xuʼulsik le kʼasaʼaniloʼ, tumen letiʼeʼ utúul Dios ku beetik baʼax maʼalob yéetel baʼax toj. Le Salmo 33:5 ku yaʼalik tu yoʼolal Jéeoba: «Le Yuumtsiloʼ u yaakuntmaj baʼax tu beel, bey xan baʼax toj». Uláakʼ Salmo xaneʼ ku yaʼalik: «Ku pʼektik yéetel tuláakal u yóol le máaxoʼob [u] yaabiltmajoʼob le meyaj looboʼ» (Salmo 11:5). Jéeoba, le Dios yaan tuláakal páajtalil tiʼoʼ, u yaabiltma baʼax maʼalob yéetel baʼax toj, maʼ ken u chéen u il u beetaʼal baʼax kʼaas utiaʼal mantatsʼ.
3. ¿Baʼax ken k-ileʼex ken k-xokeʼex u profecías Amós?
3 Uláakʼ baʼax eʼesik yaan u xuʼulsaʼal le kʼasaʼanil tumen Jéeobaoʼ, letiʼe castigo tu taasaj tu yóokʼol le kʼasaʼan máakoʼob úuchiloʼ. U libroi Amoseʼ bey u yeʼesik. Koʼoneʼex chʼaʼajoʼoltik u profecías Amós utiaʼal k-ilkeʼex óoxpʼéel baʼaloʼob ku yeʼeskoʼob bix le xuʼulsajil ku taasik Diosoʼ. Yáaxeʼ, náajaltaʼan. U kaʼapʼéeleʼ, maʼ tu páajtal u jeʼechel. U yóoxpʼéeleʼ, chéen utiaʼal máaxoʼob náajaltik, tumen Jéeobaeʼ yaan u xuʼulsik le j-kʼasaʼanoʼoboʼ, baʼaleʼ yaan u chʼaʼik óotsilil tiʼ le ku kʼexik u tuukuloʼob yéetel ku yeʼeskoʼob u kʼáatoʼob kuxtal utiaʼal mantatsʼoʼ (Tiʼ Romailoʼob 9:17-26).
Le xuʼulsajil ku taasik Diosoʼ náajaltaʼan
4. ¿Tuʼux túuxtaʼab Amós tumen Jéeoba, yéetel baʼax túuxtaʼab u beetiʼ?
4 Tu kʼiiniloʼob Amoseʼ, le israelitaʼoboʼ tsʼokaʼaniliʼi u jatskubaʼob tiʼ kaʼapʼéel reinoʼobeʼ: teʼ noojoloʼ tiaʼan u reinoi le kaʼapʼéel tribus tiʼ Judaoʼ, yéetel teʼ xamanoʼ tiaʼan u reinoi le diez tribus tiʼ Israeloʼ. Jéeobaeʼ tiaʼalaj tiʼ Amós ka u pʼat Judá, le kaaj tuʼux sijnáaloʼ, ka xiʼik tu kaajil Israel utiaʼal u kʼaʼayt le xuʼulsajil kun taal tu yóoʼloʼ.
5. ¿Tiʼ baʼax kaajiloʼob yáax kʼaʼaytaʼab tumen Amós yaan xuʼulsaʼaltiʼob, yéetel baʼaxten u náajaltmoʼob?
5 Táanil tiʼ u kʼaʼaytik le xuʼulsajil ken u taas Dios tu yóokʼol u kaajil Israeloʼ, Amoseʼ tu kʼaʼaytaj yaan xuʼulsaʼal tiʼ le seis luʼumoʼob yanoʼob naatsʼ tiʼ Israelaʼ: Siria, Filistea, Tiro, Edom, Amón yéetel Moab. Letiʼobeʼ u náajaltmoʼob ka xuʼulsaʼaktiʼob, tumen jach u pʼekmoʼob kaʼach u kaajal Jéeoba.
6. ¿Baʼaxten tu taasaj Dios nojoch yajiloʼob tu yóokʼol Siria, Filistea yéetel Tiro?
6 Jéeobaeʼ tiaʼalaj yaan u xuʼulsik tiʼe sirioʼoboʼ «tumen tu pʼuʼupʼuchajoʼob le [galadiloʼoboʼ]» (Amós 1:3). Le sirioʼoboʼ ookoʼob tu luʼum le galadiloʼoboʼ ka tu sen beetoʼob loob tiʼ le israelitaʼob yanoʼob teʼeloʼ. ¿Kux túun u kaajiloʼob Filistea yéetel Tiro? Le filisteoʼob kaʼachoʼ ku chukkoʼob le israelitaʼob utiaʼal u konoʼob tiʼe edomiloʼoboʼ. Le tiroiloʼob xanoʼ ku konkoʼob kaʼach le israelitaʼob ku lúubul tu kʼaboʼoboʼ, tumen u meyajoʼobeʼ u konkoʼob máakoʼob utiaʼal palitsiltbil (Amós 1:6, 9). Jeʼex túun k-ilkoʼ, le kaajoʼobaʼ ¡ku konkoʼob kaʼach le israelitaʼob utiaʼal ka palitsiltaʼakoʼoboʼ! Le beetkeʼ, Jéeobaeʼ tu taasaj nojoch yajiloʼob tu yóokʼol Siria, Filistea yéetel Tiro.
7. U kajnáaliloʼob Edom, Amón yéetel Moabeʼ, ¿máaxoʼob kaʼach tiʼe israelitaʼoboʼ, kex beyoʼ baʼax tu beetoʼob tiʼ le israelitaʼoboʼ?
7 U kajnáaliloʼob Edom, Amón yéetel Moabeʼ láakʼtsiloʼob kaʼach yéetel le israelitaʼoboʼ. Le edomiloʼoboʼ u chʼiʼibaliloʼob Esaú, u yaabil Abraham yéetel u sukuʼuntsil Jacob, le beetikeʼ jeʼel u páajtal u yaʼalaʼaleʼ sukuʼuntsiloʼob yéetel le israelitaʼoboʼ. Le amoniloʼob yéetel le moabitaʼoboʼ láakʼtsiloʼob xan yéetel le israelitaʼoboʼ tumen tiʼ u taaloʼob tiʼ u chʼiʼibal Lot, u sobrino Abrahameʼ. Baʼaleʼ, Edom, Amón yéetel Moabeʼ, ¿tu bisubaʼob wa yéetel le israelitaʼob bey sukuʼuntsiloʼobeʼ? Maʼatech. Le edomiloʼoboʼ tu sen beetoʼob loob tiʼ le israelitaʼob kex u «láakʼtsiloʼob[oʼ]»; le amoniloʼob xanoʼ tu sen beetoʼob baʼaloʼob kʼaastak tiʼe israelitaʼob u palitsiltmoʼoboʼ (Amós 1:11, 13). Kex Amós maʼ tu jach aʼalik bix loobiltaʼabik u kaajal Dios tumen le moabitaʼoboʼ, baʼaleʼ jach yaʼab baʼax u beetmoʼob ku yeʼesik u pʼekmoʼob u kaajil Israel. Jéeobaeʼ tu yaʼalaj yaan u taasik upʼéel nojoch xuʼulsajil tu yóokʼol le óoxpʼéel luʼumoʼob láakʼtsiloʼob tiʼ Israeloʼ.
Le xuʼulsajiloʼ maʼ tu páajtal u jeʼechel
8. ¿Baʼaxten maʼ púutsʼ Siria, Filistea, Tiro, Edom, Ammón yéetel Moab tiʼ le xuʼulsajil taasaʼab tu yóoʼloʼoboʼ?
8 Le seis luʼumoʼob tu chʼaʼachiʼitaj Amós tu káajbal u librooʼ jach u náajaltmoʼob ka xuʼulsaʼaktiʼob. Mix upʼéel tiʼ letiʼob púutsʼ tiʼ le xuʼulsajil taasaʼab tu yóoʼloʼoboʼ. Teʼ capítulo 1, versículo 3, tak capítulo 2, versículo 1, Jéeobaeʼ seis u téenel tu yaʼalaj: «Maʼ bíin in pʼatoʼob x-maʼ jaatsʼiliʼ». Jach jeʼex úuchik u yaʼalikoʼ, Jéeobaeʼ tu xuʼulsaj tiʼe kaajoʼobaʼ. Le baʼax úuchtiʼobaʼ kieʼeskeʼ cada upʼéel tiʼ letiʼobeʼ tu muʼyajtoʼob nukuch yajiloʼob. Kampʼéel xan tiʼ letiʼobeʼ —Filistea, Moab, Amón yéetel Edomeʼ— saʼatoʼob ka máan kʼiin.
9. ¿Baʼax ku náajaltik kaʼach u kajnáaliloʼob Judá, yéetel baʼaxten?
9 Amoseʼ tʼaanaj xan tiʼ u luʼumil Judá, le tuʼux sijnáaloʼ. Maʼ xaaneʼ le u kajnáaliloʼob u reinoi Israeleʼ jaʼakʼ u yóoloʼob ka tu yuʼuboʼob yaan u taasaʼal upʼéel nojoch yajil tu yóokʼol u reinoi Judá. ¿Baʼax oʼolal kun taasbil upʼéel nojoch yajil tu yóoʼloʼob? Amós 2:4 kiaʼalikeʼ tumen maʼ «tu yuʼubajoʼob u aʼalmaj tʼaanoʼob» wa u leyoʼob Jéeobaiʼ. Jéeobaeʼ maʼ tu chéen ilaj u mixbaʼalkuntaʼal u Leyiʼ. Amós 2:5, kiaʼalik: «Bíin in tʼab u kaajil Judá, le kʼáakʼoʼ bíin u tóok u jalaʼach najiloʼob Jerusalén».
10. U kajnáaliloʼob Judaeʼ, ¿baʼaxten maʼ páajchaj u jechkoʼob le xuʼulsajiloʼ?
10 U kʼasaʼan kaajil Judaeʼ maʼ púutsʼ tiʼ le nojoch yajil taal tu yóoʼloʼ. Jéeobaeʼ tu kaʼa aʼalaj: «Maʼ bíin in pʼatoʼob x-maʼ jaatsʼiliʼ» . Le castigoaʼ kʼuch le ka xuʼulsaʼab tiʼ u kaajil Judá tumen le babilonioʼob tu jaʼabil 607 táanil tiʼ u taalbal Cristooʼ. Lelaʼ ku kaʼa eʼesiktoʼoneʼ le j-kʼasaʼanoʼoboʼ maʼ tu páajtal u púutsʼloʼob tiʼ le xuʼulsajil ku taasik Jéeobaoʼ.
11-13. ¿Tiʼ baʼax kaajil maases profetizarna Amós, yéetel baʼaxoʼob kʼaastak ku sen beetaʼal kaʼachiʼ?
11 Amoseʼ tu tsʼáaj ojéeltbil yaan u taal upʼéel xuʼulsajil tu yóokʼol siete luʼumoʼob. Baʼaleʼ, wa yaan máax tu tuklaj tsʼoʼok u láaj aʼalik baʼax ku taal u kʼiineʼ, maʼ beyiʼ, tumen Amoseʼ yaʼab uláakʼ baʼax yaan u yaʼal kaʼachi. U jaajileʼ, le profetaaʼ túuxtaʼab utiaʼal ka u tsʼáaj ojéeltbil le nojoch xuʼulsajil ku taal tu yóokʼol Israeloʼ; lelaʼ u jach náajaltmoʼob tumen táan kaʼach u beetkoʼob baʼaloʼob kʼaastak yéetel u náachkuntmubaʼob tiʼ Dios kaʼachi.
12 Amoseʼ tu yaʼalaj tiʼe israelitaʼob jach maʼ uts le baʼaloʼob ku sen beetkoʼoboʼ. Teʼ Amos 2:6, 7, k-xokik: «Bey u yaʼalik Yuumtsilaʼ: Le j-israelitaʼoboʼ tsʼoʼok u beetikoʼob yaʼabkach looboʼob, maʼ bíin in pʼatoʼob x-maʼ jaatsʼiliʼ; tumen ku konikoʼob tu yoʼolal taakʼin le [máax minaʼan u siʼipiloʼ] le máax óotsiloʼ ku konikoʼob tu yoʼolal jun tsʼáam xanab. Ku yetsʼikoʼob yéetel ku pajikoʼob u subtal le óotsiloʼoboʼ, maʼ tu yóoltikoʼob u beetoʼob baʼax noʼojaʼan tu yoʼolal [le máaxoʼob kabal u yóoloʼoboʼ]».
13 Le juesoʼoboʼ ku «konikoʼob» le máaxoʼob minaʼan baʼax kʼaas u beetmoʼoboʼ, lelaʼ maʼ xaaneʼ u kʼáat u yaʼaleʼ ku chaʼik u maʼanloʼob yéetel ku tsʼáaikoʼob u kuuch le máaxoʼob mix baʼal kʼaas u beetmoʼoboʼ. Le máaxoʼob ku tsʼáaikoʼob pʼaaxoʼ maʼ xaaneʼ chéen yoʼolal upʼíit baʼax pʼaxaʼantiʼobeʼ ku konkoʼob le óotsiloʼob utiaʼal ka palitsiltaʼakoʼob chéen yoʼolal u tojol «jun tsʼáam xanab». Le j-kʼasaʼan máakoʼobaʼ jach ku mixbaʼalkúuntkoʼob le «óotsiloʼoboʼ». Le óotsiloʼob túunoʼ ku tóosluʼumtik u pooloʼob utiaʼal yeʼeskoʼob jach yaachajaʼan u yóoloʼob yoʼolal le baʼax ku beetaʼal tiʼoboʼ. Jach yaʼabchaj u beetaʼal baʼax kʼaas, le oʼolaleʼ le «j-kabal óoloʼoboʼ» maʼ tu páaʼkoʼob kaʼach u beetaʼaltiʼob justicia.
14. Tu reinoi Israeleʼ, ¿tiʼ máaxoʼob jach upuliʼ maʼatech u chʼaʼabal óotsilil kaʼachi?
14 Jeʼex tsʼoʼok k-ilkoʼ táan kaʼach u sen beetaʼal loob tiʼ le máaxoʼob toj u kuxtaloʼoboʼ, tiʼ le óotsiloʼoboʼ yéetel tiʼ le kabal u yóoloʼoboʼ. Le Ley tu tsʼáaj Jéeoba tiʼe israelitaʼoboʼ kiaʼalik ka chʼaʼabak óotsilil tiʼe máaxoʼob kʼaʼabéet áantaj tiʼoboʼ yéetel tiʼe óotsiloʼoboʼ. Baʼaleʼ, tiʼe óotsiloʼob kajaʼanoʼob kaʼach tu reinoi Israeloʼ jach upuliʼ maʼatech u chʼaʼabal óotsilil tiʼob.
Líiʼsaba utiaʼal a naktáantikaba yéetel a Dios
15, 16. 1) ¿Baʼaxten aʼalaʼab tiʼ Israel ka u líiʼsuba u tiaʼal u naktáantikuba yéetel u Dios? 2) Amós 9:1, 2, ¿bix u yeʼesik maʼ kun púutsʼul le kʼasaʼan israelitaʼob tiʼe xuʼulsajil kun taasbil tu yóoloʼoboʼ? 3) Tu jaʼabil 740 táanil tiʼ u taalbal Cristoeʼ, ¿baʼax úuch tiʼ u reinoi Israel?
15 Jach yaʼab baʼaloʼob kʼaastak ku beetik kaʼach le israelitaʼoboʼ, le oʼolaleʼ Amoseʼ tu yaʼalajtiʼob: «[¡Líiʼsaba] utiaʼal a naktáantikaba yéetel a [Dios]!» (Amós 4:12). U kʼasaʼan kaajil Israeleʼ maʼ púutsʼ tiʼ le xuʼulsajil taasaʼab tu yóoʼloʼ, Jéeobaeʼ u ocho u téenel u yaʼalik le tʼaanoʼobaʼ: «Maʼ bíin in pʼatoʼob x-maʼ jaatsʼiliʼ» (Amós 2:6). Maʼ xaaneʼ le kʼasaʼan israelitaʼoboʼ tu yóotaj wal u taʼakubaʼobeʼ, baʼaleʼ Dioseʼ tu yaʼalaj: «Kex ka u yóoltoʼob j-púutsʼuleʼ, mix juntúul bíin u jechiʼ; kex ka u taʼakbesubaʼob tu taamiloʼob le luʼumoʼ, tiʼ bíin in jóokʼesoʼobiʼ; kex ka naʼakakoʼob tu kaʼanalil le kaʼanoʼoboʼ, tiʼ bíin in wéensoʼobiʼ» (Amós 9:1, 2).
16 Le j-kʼasaʼanoʼoboʼ kex ka u taʼakubaʼob «tu taamiloʼob le luʼumoʼ» maʼ kun púutsʼloʼob tiʼ le xuʼulsajil ken u taas Jéeobaoʼ. «Kex ka naʼakakoʼob» teʼ «kaʼanoʼoboʼ», wa tu kaʼanlil le witsoʼoboʼ, maʼ kun púutsʼloʼob. Le baʼax tiaʼalaj Jéeobaoʼ jach tʼáalkab yanik: jeʼel tuʼuxak ka u yóot u taʼakubaʼobeʼ yaan u kaxtaʼaloʼob. Yoʼolal le kʼaakʼas baʼaloʼob ku beetkoʼoboʼ, u kajnáaliloʼob Israeleʼ jach u náajaltmoʼob ka xuʼulsaʼaktiʼob, yéetel le súutukil jeʼeloʼ kʼuch xan. Tu jaʼabil 740 táanil tiʼ u taalbal Cristo, sesenta jaʼaboʼob tsʼoʼokok u tsʼíibtik Amós le profecíaaʼ, u reinoi Israeleʼ lúub tu kʼab le asirioʼoboʼ.
Le xuʼulsajiloʼ chéen utiaʼal máaxoʼob náajaltik
17, 18. Le capítulo 9 tiʼ Amosoʼ, ¿bix u yeʼesik yaan u chʼaʼik óotsilil Jéeoba tiʼ u kaajal?
17 Le baʼaxoʼob tu tsʼíibtaj Amosoʼ tsʼoʼok u yáantkoʼon k-ileʼ le xuʼulsajiloʼob ku taasik Diosoʼ náajaltaʼanoʼob yéetel maʼ tu páajtal u jeʼechloʼob. Baʼaleʼ chéen tu yóokʼol máaxoʼob náajaltik. Wa Jéeoba ku páajtal u kaxtik le j-kʼasaʼanoʼob jeʼel tuʼux ka u taʼakubaʼob utiaʼal u xuʼulsiktiʼobeʼ, bey xan jeʼel u páajtal u kaxtik le máaxoʼob tsʼoʼok u kʼexik u tuukuloʼob yéetel toj u kuxtaloʼob utiaʼal u chʼaʼik óotsilil tiʼoboʼ. Lelaʼ bey u yeʼesik le u tsʼook capítulo tiʼ Amosoʼ.
18 Teʼ capítulo 9 versículo 8, Jéeobaeʼ tiaʼalaj: «Maʼ bíin in láaj xuʼuls u yotochnáaloʼob Jacobiʼ». Yéetel teʼ versículos 13 tak 15, tiaʼalaj yaan u jóoʼsik u kaajal teʼ «luʼumoʼob tuʼux bisaʼaboʼoboʼ». Letiʼeʼ yaan u chʼaʼik óotsilil tiʼ u kaajal, yaan u tsʼáaik jeetsʼelil tiʼob yéetel yaan u beetik u bin utsil tiʼob. Jéeobaeʼ tiaʼaleʼ «maʼiliʼ tsʼoʼokok u joʼochol [le] trigo» ken kʼuchuk «u kʼiinil u tʼoʼol bukʼlaʼal le luʼumoʼ». Jeʼex k-ilkoʼ jach yaan u yantal maʼalob jooch, tumen maʼiliʼ tsʼoʼokok u joʼochol le trigooʼ tsʼoʼok u kʼuchul u kʼiinil u kaʼa bukʼlaʼal le luʼum utiaʼal u kaʼa úuchul paakʼaloʼ.
19. ¿Baʼax úuch tiʼ u yaalab u kajnáaliloʼob Israel yéetel Judá?
19 K-ilik túuneʼ Jéeobaeʼ tu xuʼulsaj tiʼ u kʼasaʼan máakiloʼob Israel yéetel Judá, baʼaleʼ tu chʼaʼa óotsilil tiʼ le máaxoʼob tu kʼexaj u tuukuloʼob yéetel tu yeʼesoʼob kabal u yóoloʼoboʼ. Le baʼaxoʼob u yaʼalmaj Dios ku chíikpajal teʼ capítulo 9 tiʼ Amosoʼ, béeychaj tu jaʼabil 537 táanil tiʼ u taalbal Cristo; teʼ jaʼab jeʼelaʼ u yaalab tiʼ u kajnáaliloʼob Israel yéetel Judaeʼ suunajoʼob tu luʼumoʼob utiaʼal u jel káajsik u meyajtkoʼob Jéeobaiʼ. Yéetel u yutsil Dioseʼ, tu jel beetoʼob u yotochoʼob, tu pakʼoʼob uvaʼob bey xan uláakʼ paakʼaloʼob.
Maʼ kun púutsʼloʼob tiʼ le xuʼulsajiloʼ
20. ¿Baʼax ku jach eʼesiktoʼon le baʼaxoʼob tu kʼaʼaytaj Amosoʼ?
20 Le baʼaxoʼob tu yaʼalaj Jéeoba tiʼ Amós ka u tsʼáaj ojéeltbiloʼ, ku yeʼesiktoʼon Jéeobaeʼ yaan xan u xuʼulsik le kʼaas ku beetaʼal bejlaʼaʼ. ¿Bix u yeʼesik? Yáaxeʼ, le castigo tu taasaj Jéeoba tu yóokʼol kʼasaʼan máakoʼob úuchiloʼ ku yeʼesik baʼax ken u beet teʼ kʼiinoʼobaʼ. U kaʼapʼéeleʼ, le bix úuchik u xuʼulsaʼal tiʼ u kʼasaʼan reinoi Israeleʼ ku yeʼesik yaan u xuʼulsaʼal tiʼ le religionoʼob ku yaʼalikubaʼob cristianoʼoboʼ; tiʼ tuláakal le religionoʼob táakaʼanoʼob ich le «nojoch Babiloniaoʼ», letiʼob ku maas náajaltikoʼob ka xuʼulsaʼaktiʼob (Apocalipsis 18:2).
21. Le religionoʼob ku yaʼalikubaʼob cristianoʼoboʼ, ¿baʼaxten ku náajaltik ka xuʼulsaʼaktiʼob?
21 Le religionoʼobaʼ jach u náajaltmoʼob le nojoch yaj kun taal tu yóoloʼoboʼ, tumen jach náachchajaʼanoʼob tiʼ baʼax ku yaʼalik Dios yéetel tsʼoʼok u jach kʼastal bix kuxlikoʼob. Le oʼolal jach u náajalmoʼob ka xuʼulsaʼaktiʼob paʼteʼ yéetel u kʼasaʼan yóokʼol kaab Satanás. Maʼ xan kun púutsʼloʼob tiʼ le nojoch yajilaʼ, tumen ken kʼuchuk u kʼiinileʼ yaan u béeychajal le baʼax kiaʼalik Amós, capítulo 9 versículo 1: «Kex ka u yóoltoʼob j-púutsʼuleʼ, mix juntúul bíin u jechiʼ». Beyoʼ, jeʼel tuʼuxak ka u taʼakubaʼobeʼ, yaan u kaxtaʼaloʼob tumen Jéeoba.
22. ¿Bix le xuʼulsajiloʼob ku taasik Dios jeʼex u yeʼesik 2 tiʼ Tesalonicailoʼob 1:6-8?
22 Le xuʼulsajil ku taasik Diosoʼ náajaltaʼan, maʼ tu páajtal u jeʼechel yéetel chéen utiaʼal le j-kʼasaʼanoʼoboʼ. Bey u yeʼesik le apóstol Pablooʼ: «Toj ka u beet Jajal Dios u mukʼyajoʼob le máaxoʼob ku beetikoʼob a mukʼyajeʼex teʼexoʼ, yéetel ka u tsʼáa jeʼelel tiʼ teʼex ka mukʼyajeʼex, jeʼel bix xan toʼoneʼ, tiʼ le kʼiin ken chíikpajak Yuumtsil Jesús teʼ j-kaʼanoʼ yéetel u muʼukʼaʼan angeloʼobeʼ ichil u tóochʼbal kʼáakʼ. Bíin taalak utiaʼal u jatsʼ [wa u xuʼuls tiʼ] le máaxoʼob maʼ tu kʼaj óoltikoʼob Jajal Dios mix tu yuʼubikoʼob u maʼalob péektsil k-Yuumtsil Jesucristo» (2 tiʼ Tesalonicailoʼob 1:6-8). «Toj» ka u xuʼuls Dios tiʼ le máaxoʼob beetik u muʼyaj le cristianoʼob kun binoʼob kaʼanoʼ. Le kʼasaʼan máakoʼoboʼ maʼ kun púutsʼloʼob tiʼ le kʼiin ken chíikpajak Jesús teʼ kaʼan yéetel u muʼukʼaʼan angeloʼob ichil u tóochʼbal kʼáakʼoʼ, yaan u xuʼulsaʼaltiʼob. Jesuseʼ yaan xan u xuʼulsik chéen tiʼ le «máaxoʼob maʼ tu kʼaj óoltikoʼob Jajal Dios mix tu yuʼubikoʼob u maʼalob péektsil k-Yuumtsil Jesucristo», baʼaleʼ yaan u taasik jeetsʼelil yéetel kiʼimak óolal tiʼ le máaxoʼob táan u beetaʼal u muʼyajoʼob bejlaʼoʼ.
Le toj u kuxtaloʼoboʼ maʼ kun xuʼulsbiltiʼob
23. ¿Bix u líiʼsik k-óol yéetel bix u taasiktoʼon kiʼimak óolal u libroi Amós?
23 Le baʼaxoʼob tu tsʼíibtaj Amosaʼ ku líiʼsik u yóol yéetel ku kiʼimakkúuntik u yóol le máaxoʼob ku yeʼeskoʼob u kʼáat u kʼamoʼob le kuxtaloʼ. Jeʼex úuchik u yaʼalik Amosoʼ, Jéeobaeʼ maʼ tu láaj xuʼulsaj tiʼ u kaajaliʼ. Ka máan kʼiineʼ tu beetaj u suut tu luʼumoʼob u kajnáaliloʼob Israel yéetel Judá, tu kanáantoʼob yéetel tu beetaj u bin utsiltiʼob. Le baʼax tu beetaʼ, ¿baʼax ku yeʼesiktoʼon? Ku yeʼesiktoʼoneʼ ken kʼuchuk u kʼiinil le xuʼulsajiloʼ, jeʼel tuʼuxak ka u taʼakuba le j-kʼasaʼanoʼoboʼ, Jéeobaeʼ yaan u kaxtikoʼob, baʼaleʼ, jeʼel tuʼuxak yaan le máaxoʼob unaj u chʼaʼabal óotsililtiʼoboʼ, yaan u kanáantikoʼob.
24. ¿Baʼax utsiloʼob ku kʼamik le máaxoʼob meyajtik Jéeoba teʼ kʼiinoʼobaʼ?
24 Le maʼ kʼuchuk u kʼiinil u xuʼulsaʼal tiʼ le j-kʼasaʼanoʼob tumen Jéeobaoʼ, ¿baʼax utsiloʼob k-kʼamik? K-ilik le jeetsʼelil yaan ichil u kaajaloʼ yéetel k-ilik bix u bin u maas yaʼabtal máaxoʼob meyajtik. Tsʼoʼoleʼ ichil k-adoracioneʼ minaʼan le kaʼansajoʼob ku taal tiʼ le maʼ jaajil religionoʼoboʼ. Jéeoba xaneʼ táan u tsʼáaiktoʼon yaʼabach kaʼansajoʼob ku keʼetel yéetel kiʼiki janal. Baʼaleʼ, letiʼeʼ yaan baʼax ku páaʼtik ka k-beeteʼex. Ku páaʼtik ka k-tsʼaʼex ojéelbil táan u náatsʼal u kʼiinil upʼéel nojoch yajil. Le oʼolaleʼ, unaj k-beetkeʼex tuláakal le ku páajtal utiaʼal k-kaxtik le máaxoʼob «u kʼáat u kʼamoʼob le kuxtal minaʼan u xuuloʼ» (Hechos 13:48, NM). Kʼaʼabéet k-ilik áantik jeʼel jaytúul máak ku páajtal utiaʼal ka u kʼamoʼob xan le utsiloʼob táan k-kʼamikoʼ yéetel utiaʼal maʼ u kíimloʼob ken xuʼulsaʼak tiʼe j-kʼasaʼanoʼoboʼ. Baʼaleʼ, utiaʼal ka k-kʼameʼex le utsiloʼobaʼ kʼaʼabéettoʼon upʼéel maʼalob puksiʼikʼal. Jeʼex ken k-kaneʼex teʼ tuláakʼ xookoʼ, le baʼaxoʼob tu tsʼíibtaj Amosoʼ jach ku yeʼeskoʼob lelaʼ.
¿Baʼax jeʼel a núukikeʼ?
• U profecías Amoseʼ, ¿bix u yeʼesik jach náajaltaʼan le xuʼulsajiloʼob ku taasik Jéeobaoʼ?
• ¿Bix yeʼesik Amós maʼ kun púutsʼul le kʼasaʼanoʼob tiʼ le xuʼulsajiloʼ?
• ¿Bix u yeʼesik u libroi Amós chéen le j-kʼasaʼanoʼob ku xuʼulsaʼaltiʼob tumen Jéeobaoʼ?
[U kʼáatchiʼiloʼob le xookoʼ]