Koʼoneʼex beetik jeʼex tu yeʼesil Jesuseʼ
Koʼoneʼex beetik jeʼex tu yeʼesil Jesuseʼ
«Tsʼoʼok in weʼesik teʼex bix u beetaʼal, utiaʼal ka a beeteʼex jeʼel bix tsʼoʼok in [weʼesik] tiʼ teʼexoʼ.» (SAN JUAN 13:15.)
1. ¿Baʼaxten kʼaʼabéet k-kuxtal jeʼel bix kuxlajik Jesusoʼ?
TIʼ TULÁAKAL wíinik tsʼoʼok u yantaleʼ chéen utúul maʼ lúub tiʼ kʼebaniʼ: Jesús. Tuláakal u maasileʼ ku «kʼebantaloʼob» (Tiʼ Romailoʼob 3:23; 1 Reyes 8:46). Le oʼolal jach maʼalob ka kuxlakoʼon jeʼex kuxlajik letiʼeʼ. Jesús xaneʼ, le 14 tiʼ nisán tiʼ u jaʼabil 33 teʼ tu kʼiiniloʼoboʼ, le taʼaytak u kíimiloʼ, tu yaʼalaj tiʼ u tsaypachoʼob ka u beetoʼob jeʼex letiʼeʼ: «Tsʼoʼok in weʼesik teʼex bix u beetaʼal, utiaʼal ka a beeteʼex jeʼel bix tsʼoʼok in [weʼesik] tiʼ teʼexoʼ» (San Juan 13:15). Teʼ áakʼab jeʼeloʼ, Jesuseʼ tu yaʼalaj tiʼ u j-tsaypachoʼob uláakʼ baʼaloʼob kʼaʼabéet u beetkoʼob jeʼex tu beetil letiʼoʼ. Teʼ xookaʼ yaan k-ilik jujumpʼéeliʼ.
Kʼaʼabéet k-eʼesik kabal óolal
2, 3. ¿Bix úuchik yeʼesik jach kabal u yóol Jesús?
2 Jesuseʼ táan kaʼach u tʼaan tiʼ le kabal óolal le ka tiaʼalaj tiʼ u apostoloʼob ka u beetoʼob xan jeʼex letiʼoʼ. Yaʼab u téenel tsʼokaʼaniliʼ u yaʼaliktiʼob ka u yeʼesoʼob kabal óolaleʼ, baʼaleʼ teʼ áakʼab jeʼeloʼ tu pʼoʼaj u yook u apostoloʼob utiaʼal u yeʼesik kabal u yóol. Tsʼoʼoleʼ ka tiaʼalajtiʼob: «Wa teen kex j-kaʼanbesajen yéetel Yuumtsilen tsʼoʼok in pʼoʼik a wookeʼexeʼ, bey xan teʼex unaj a pʼoʼik a wookeʼex ta baatsileʼex» (San Juan 13:14). Tsʼoʼoleʼ ka tiaʼalajtiʼob ka u beetoʼob jeʼex letiʼoʼ.
3 Pabloeʼ tiaʼaleʼ Jesuseʼ táanil tiʼ u taal way luʼumeʼ «beyiliʼ Jajal Dioseʼ». Baʼaleʼ tu pʼataj tuláakal baʼax yaan tiʼ teʼ kaʼanoʼ, ka tu beetuba chéen wíinik. Baʼaleʼ maʼ chéen leloʼ, «tu chichankúuntuba, ka tu yuʼubaj tʼaan tak [tu yorai tu kíimil]» (Filipenses 2:6-8, LTN). ¡Chéen tukultej! U kaʼatúul máax maas nojoch tu yóokʼol tuláakal baʼaleʼ tu chichankúuntuba tu tséel le angeloʼoboʼ, síij bey utúul chaambal unaj u kanáantaʼaleʼ, tu taataintaj kʼeban wíinikoʼob yéetel tu yuʼubaj u tʼaanoʼob, tu tsʼookeʼ ka kíim jeʼex utúul jach kʼasaʼan wíinikeʼ (Tiʼ Colosailoʼob 1:15, 16; Tiʼ Hebreob 2:6, 7). ¡Jach túun kabal u yóol! ¿Jeʼel wa u páajtal k-tuukul «jeʼel bix tuukulnajik» Jesusoʼ? ¿Jeʼel wa u páajtal k-eʼesik kabal óolal jeʼex letiʼeʼ? (Tiʼ Filiposiloʼob 2:3-5.) Jeʼeleʼ, kex maʼ chéen chʼaʼabiliʼ.
4. ¿Baʼaxoʼob beetik u kaʼantal u yich máak, yéetel baʼaxten maʼ kʼaʼabéet u kaʼantal k-ichiʼ?
4 Máax kaʼanal u yicheʼ maʼ kabal u yóoliʼ (Proverbios 6:16-19). Le kaʼanal ichiloʼ le beet u lúubul Satanás (1 tiʼ Timoteo 3:6). Le kaʼanal ichiloʼ séeb u tabik u moots tu puksiʼikʼal máak; ken u tab u mootseʼ, maʼ chéen chʼaʼabil u joʼokliʼ. Yaʼab máakeʼ ku yuʼubkuba noj baʼalil yoʼolal tuʼux sijnal, u raza, yoʼolal baʼaxoʼob yantiʼ, tumen kaʼanchajaʼan u xook, tumen ayikʼal, yoʼolal u jatsʼutsil wa yoʼolal uláakʼ baʼaloʼob. Baʼaleʼ, le baʼaloʼobaʼ maʼ tu tsʼáaikoʼon utsil tu táan Dios (1 tiʼ Corintoiloʼob 4:7). Wa ku kaʼantal k-ich tu yoʼolaloʼobeʼ, jeʼel u beetik maʼ k-kʼaʼamal tumen Dioseʼ, tumen letiʼeʼ «ku paktik le j-kabal óol wíinikoʼ», baʼaleʼ u «pʼeek le j-kaʼanal ichoʼoboʼ» (Salmo 138:6; Proverbios 8:13).
U yeʼesaʼal kabal óolal teʼ múuchʼuliloʼ
5. ¿Baʼaxten jach unaj u yeʼesik kabal óolal le nuxiboʼoboʼ?
5 Maʼ unaj u kaʼantal k-ich tumen yaʼab u téenel k-jóokʼol kʼaʼaytaj wa tumen yaʼab máax k-áantikiʼ, mix tu yoʼolal le meyaj tsʼaʼan k-beet teʼ múuchʼuliloʼ (1 tiʼ Crónicas 29:14; 1 tiʼ Timoteo 6:17, 18). U jaajileʼ, wa maas nojoch le meyaj tsʼaʼan k-beetoʼ maas jach kʼaʼabéet k-eʼesik kabal óolal. Apóstol Pedroeʼ tiaʼalaj tiʼe nuxiboʼoboʼ maʼ u tuklikoʼob wa letiʼob u yuumil le sukuʼunoʼoboʼ, baʼaxeʼ unaj u yeʼeskoʼob «maʼalob bej tiʼ le j-tamanoʼoboʼ» (1 San Pedro 5:3). Le nuxiboʼoboʼ tsʼaʼanoʼob utiaʼal u meyajtoʼob u maasil yéetel utiaʼal ka u yeʼesoʼob upʼéel maʼalob bej tiʼe sukuʼunoʼoboʼ (San Lucas 22:24-26; 2 tiʼ Corintoiloʼob 1:24).
6. ¿Tiʼ baʼaxoʼob kʼaʼabéettoʼon kabal óolal?
6 Baʼaleʼ, maʼ chéen le nuxiboʼob unaj u yeʼeskoʼob kabal óolaloʼ. Maʼ xaaneʼ, le táankelmoʼoboʼ ku kaʼantal yichoʼob tumen maas muʼukʼaʼanoʼob yéetel maas séeb u meyaj u tuukuloʼob; le oʼolal Pedroeʼ ku yaʼaliktiʼob unaj u yeʼeskoʼob kabal óolal, tumen «Jajal Dioseʼ ku [tsʼáaikuba tu contra] le j-kaʼanal ichoʼoboʼ, baʼaleʼ ku tsʼáaik u siibal utsil tiʼ le máaxoʼob kabal u yóoloʼoboʼ» (1 San Pedro 5:5). Tuláakloʼon kʼaʼabéet k-eʼesik kabal óolal. Kʼaʼabéettoʼon utiaʼal k-kʼaʼaytik le maʼalob péektsiloʼ, jeʼex ken tʼaanakoʼon yéetel máax maʼ u kʼáat u yuʼuboʼoniʼ wa yéetel máax táan u yaʼaliktoʼon baʼal; kʼaʼabéettoʼon xan ken tsoʼoloktoʼon u nuʼuk bey xan utiaʼal u kiʼimaktal k-óol yéetel upʼíit baʼal utiaʼal ka páatak maas táakpajal teʼ kʼaʼaytajoʼ. Kʼaʼabéettoʼon xan kabal óolal yéetel maʼ k-chʼaʼik saajkil utiaʼal u chúukpajal k-óol ken joʼopʼok u yaʼalaʼal baʼaloʼob maʼ jaajtak t-oʼolaliʼ wa ken joʼopʼok k-chʼaʼapachtaʼal (1 San Pedro 5:6).
7, 8. ¿Bix jeʼel u yantaltoʼon kabal óolaleʼ?
7 ¿Baʼax jeʼel u yáantkoʼon k-eʼes kabal óolal yéetel ka k-tukult u maasil máakoʼobeʼ «maas maʼaloboʼob» tiʼ toʼon? (Tiʼ Filiposiloʼob 2:3.) Kʼaʼabéet k-ilikba jeʼex u yilkoʼon Jéeobaeʼ. Jesuseʼ tiaʼalaj bey kʼaʼabéet k-tuukulaʼ: «Ken tsʼoʼokok a beetikeʼex tuláakal le baʼax ku yaʼalik Jajal Dioseʼ, aʼaleʼex: Palitsiloʼon mix baʼal k-biilal, tumen t-beetaj chéen le baʼax unaj k-beetikeʼ» (San Lucas 17:10). Maʼ unaj u tuʼubultoʼoneʼ, jeʼel bukaʼaj ka k-beeteʼ, mix bikʼin ken k-béeykunt tuláakal le bukaʼaj tu beetaj Jesusoʼ, kex beyoʼ letiʼeʼ maʼ kaʼanchaj yichiʼ.
8 Kʼaʼabéet xan k-kʼáatik tiʼ Jéeoba ka u yáantoʼon utiaʼal maʼ u kaʼantal k-ich. Jeʼel u páajtal k-kʼáatik le baʼax tu kʼáat óoltaj le salmistaoʼ: «Kaʼambesten maʼalob tuukul yéetel ka yanak teen kʼaj óolalil» (Salmo 119:66). Jéeobaeʼ yaan u yáantkoʼon ka yanaktoʼon upʼéel maʼalob tuukul, yéetel yaan u yeʼesiktoʼon u yutsil wa k-eʼesik kabal óolal (Proverbios 18:12). Jesuseʼ tiaʼaleʼ «máax ku kaʼanalkúuntik u yóoleʼ bíin kabalkúuntaʼak u yóol, baʼaleʼ le máax ku kabalkuntik u yóoleʼ bíin kaʼanalkúuntaʼak u yóol» (San Mateo 23:12).
Kʼaʼabéet k-yaabiltik le utsoʼ yéetel k-pʼektik le kʼaasoʼ
9. ¿Bix u yilik kaʼach Jesús le baʼax maʼalob yéetel le baʼax kʼaasoʼ?
9 Jesuseʼ treintaitres jaʼaboʼob tu máansaj ichil kʼeban máakoʼob, baʼaleʼ «maʼ j-kʼebanchajiʼ» (Tiʼ Hebreob 4:15). Le salmistaoʼ tiaʼalaj yoʼolal Jesús: «A yaakuntmaj le utsoʼ baʼaleʼ a pʼekmaj le kʼaasoʼ» (Salmo 45:7; Tiʼ Hebreob 1:9). Toʼon xaneʼ k-ilik beetik jeʼex Jesusoʼ, maʼ chéen k-kʼaj óoltik le uts tiʼ le kʼaasoʼ, k-pʼektik le kʼaasoʼ yéetel yaabiltik le baʼax maʼaloboʼ (Amós 5:15). Lelaʼ ku yáantkoʼon utiaʼal maʼ k-chaʼik k-lúuʼsaʼal tumen le kʼeban yaan t-wíinkliloʼ (Génesis 8:21; Tiʼ Romailoʼob 7:21-25).
10. Wa táan k-beetik baʼax kʼaas yéetel maʼ t-kʼexik bix kuxlikoʼoneʼ, ¿baʼax táan k-eʼesik?
10 Utéenjeakileʼ, Jesuseʼ tu yaʼalaj tiʼ Nicodemo: «Le máax ku beetik baʼal kʼaaseʼ ku pʼektik le sáasiloʼ, yéetel maʼ tu náatsʼal tiʼ le sáasiloʼ, utiaʼal maʼ u chíikpajal le baʼal kʼaas ku beetikoʼ. Baʼaleʼ le máax kuxaʼan tu bejil le jaajiloʼ ku náatsʼal tiʼ le sáasiloʼ, utiaʼal ka ilaʼak tiʼ yaan Jajal Dios tiʼ baʼax ku beetikeʼ» (San Juan 3:20, 21). Juaneʼ tiaʼaleʼ Jesuseʼ letiʼ le «jaajil sáasiloʼ» (San Juan 1:9, 10). Jesús xaneʼ tiaʼaleʼ wa táan k-beetik baʼax kʼaaseʼ, táan k-pʼektik le sáasiloʼ. Lelaʼ u kʼáat yaʼaleʼ táan k-pʼektik Jesús yéetel u kaʼansajoʼob. Lelaʼ le ku beetaʼal tumen le máaxoʼob beetik baʼax kʼaas yéetel maʼ tu kʼexik bix kuxlikoʼoboʼ. Maʼ xaaneʼ, letiʼobeʼ maʼ bey u yilkoʼobiʼ, baʼaleʼ Jesuseʼ bey u yilik.
Bix jeʼel k-ilik le baʼax maʼalob yéetel le baʼax kʼaas jeʼex tu yilij Jesusoʼ
11. ¿Bix jeʼel k-ilik le baʼax maʼalob yéetel le baʼax kʼaas jeʼex tu yilij Jesusoʼ?
11 Kʼaʼabéet k-naʼatik tubeel baʼax utstutʼaan yéetel baʼax maʼ utstutʼaan Jéeobaiʼ, utiaʼal lelaʼ kʼaʼabéet k-xokik u Tʼaan. Ken k-xokeʼ, kʼaʼabéet kʼáatik le baʼax tu kʼáataj le salmistaoʼ: «Yuumtsil, eʼes teen a beeloʼob; bisen tiʼ a tʼuʼutʼul bejoʼob» (Salmo 25:4). Baʼaleʼ maʼ unaj k-tuʼubsikeʼ Satanaseʼ jach u yojel tuus (2 tiʼ Corintoiloʼob 11:14). U yojel u jatsʼutskíint le baʼax kʼaas utiaʼal ka kʼamaʼak tumen le cristiano maʼ u jach pʼilmaj u yichoʼ. Le oʼolaleʼ, ken k-xok le Bibliaoʼ kʼaʼabéet jach k-tuklik baʼax ku kaʼansiktoʼon yéetel kʼaʼabéet k-beetik tuláakal le baʼax kiaʼaliktoʼon le «palitsil chúukpajaʼan u yóol yéetel yaan u naʼatoʼ» (San Mateo 24:45-47). Le xook, le payalchiʼ yéetel k-tuukul tiʼ baʼax k-kanikeʼ le kun áantkoʼon utiaʼal ka yiijchajak k-tuukul yéetel ka «[k-]chʼaʼa nuʼukt [...] baʼax le utsoʼ bey xan baʼax le kʼaasoʼ» (Tiʼ Hebreob 5:14). Wa k-beetik beyoʼ yaan u yantaltoʼon u muukʼil utiaʼal k-pʼektik le kʼaasoʼ yéetel k-yaabiltik le utsoʼ.
12. ¿Baʼax tsolnuʼukil jeʼel u yáantkoʼon utiaʼal maʼ k-beetik baʼax maʼ utstutʼaan Diosiʼ?
12 Wa k-pʼektik baʼax kʼaaseʼ, maʼ ken chaʼa u yantal kʼaakʼas tsʼíibolaloʼob t-puksiʼikʼal. Tsʼoʼok u máan kʼiin kíimik Jesuseʼ, apóstol Juaneʼ tu tsʼíibtaj: «Maʼ a yaabiltikeʼex yóokʼol kaab, mix le baʼaloʼob yaan yóokʼol kaaboʼ. Wa yaan máax ku yaabiltik yokʼol kaabeʼ, maʼ u yaabiltmaj Jajal Dios le Taataoʼ; tumen mix baʼal tiʼ le baʼaxoʼob ku yaʼalik u tsʼáaik yóokʼol kaaboʼ tiʼ Jajal Dios le taata u taaloʼ, baʼaleʼ tiʼ yóokʼol kaab u taal. U kʼaakʼas tsʼíibolaloʼob le luʼumkabil wíinkliloʼ, u kʼaakʼas tsʼíibolalil le ichoʼ, yéetel u kaʼanal ichil ku yantal tu yoʼolal u baʼaliloʼob le kuxtaloʼ, [...] letiʼ le baʼaxoʼob ku yaʼalik yóokʼol kaab u tsʼáaikoʼ» (1 San Juan 2:15, 16).
13, 14. 1) ¿Baʼaxten maʼ kʼaʼabéet k-yaabiltik le baʼaloʼob yaan way yóokʼol kaabaʼ? 2) ¿Baʼax unaj k-beetik utiaʼal maʼ yaabiltik le baʼaloʼobaʼ?
13 Yaan máax aʼalikeʼ maʼ tuláakal baʼax yaan teʼ yóokʼol kaab láaj kʼaastakiʼ. Lelaʼ jaaj, baʼaleʼ le baʼaloʼob yaan teʼ yóokʼol kaabaʼ séeb jeʼel u beetik u náayal k-óol tiʼ k-meyajtik Jéeobaeʼ. Tsʼoʼoleʼ, mix baʼal tiʼ le baʼaxoʼob ku tsʼáaik le yóokʼol kaab jeʼel u natsʼkoʼon tiʼ Dioseʼ. Le oʼolaleʼ, wa k-yaabiltik le baʼaloʼobaʼ, kex yaan tiʼ letiʼob maʼ kʼaastakeʼ, jeʼel u náachkuntkoʼonoʼob tiʼ Jéeobaeʼ (1 tiʼ Timoteo 6:9, 10). Baʼaleʼ u jaajileʼ, yaʼab tiʼ le baʼax ku tsʼáaik le yóokʼol kaabaʼ maʼ maʼalobtakiʼ, yéetel jeʼel u kʼaskúuntik k-tuukuleʼ. Wa k-chaʼantik peliculaʼob wa baʼaxoʼob ku máansaʼal tiʼ televisión ku yeʼeskoʼob chéen baʼateʼel, baʼaloʼob subtsiltak, wa baʼaloʼob ku beetik k-tsʼíiboltik ayikʼalileʼ, jeʼel u pʼáatal maʼ kʼaas k-ilik le baʼaloʼobaʼ yéetel jeʼel u beetik k-lúubul tiʼ kʼebaneʼ. Wa k-bisikba yéetel máaxoʼob ku tuukuloʼob chéen tiʼ u yantal baʼaloʼob tiʼobeʼ maʼ kun xáantal ken joʼopʼok k-tuukul jeʼex letiʼobeʼ (San Mateo 6:24; 1 tiʼ Corintoiloʼob 15:33).
14 Baʼaleʼ, wa k-kiʼ óoltik xokik u Ley Jéeobaeʼ, le «u kʼaakʼas tsʼíibolaloʼob le luʼumkabil wíinkliloʼ, u kʼaakʼas tsʼíibolalil le ichoʼ, yéetel [le] kaʼanal ichil ku yantal tu yoʼolal u baʼaliloʼob le kuxtaloʼ» maʼ ken k-il bey jach jaʼtsoʼobeʼ. Wa xan k-bisikba yéetel máaxoʼob ku tsʼáaikoʼob táanil le Reinooʼ yaan u taaktal k-beetik jeʼex letiʼoboʼ, yaan k-yaabiltik le baʼax u yaabilmoʼoboʼ yéetel yaan k-pʼektik le baʼax u pʼekmoʼoboʼ (Salmo 15:4; Proverbios 13:20).
15. K-yaabiltik le baʼax utsoʼ yéetel k-pʼektik le baʼax kʼaasoʼ, ¿bix u yáantkoʼon, jeʼex tu yáantilak Jesusoʼ?
15 U pʼektik baʼax kʼaas yéetel u yaabiltik baʼax utseʼ le áant Jesús ka u kaxt le «kiʼimak óolal» ku páaʼtik u kʼamikoʼ (Tiʼ Hebreob 12:2). Le xan jeʼel u yáantkoʼoneʼ. K-ojeleʼ «le yóokʼol kaaboʼ táan u bin u xuʼulul yéetel tuláakal le kʼaakʼas tsʼíibolaloʼob yaan tu yóokʼoloʼ», le oʼolaleʼ jeʼel baʼalak kiʼimak óolalil ku tsʼáaikeʼ maʼ tun xáantal. «Baʼaleʼ le máax ku beetik baʼax u kʼáat Jajal Dioseʼ ku pʼáatal utiaʼal kʼiinoʼob minaʼan u xuul.» (1 San Juan 2:17.) Cristoeʼ tu beetaj baʼax utstutʼaan Dios, le oʼolaleʼ tu jeʼekʼabtaj u joonai utiaʼal ka kʼaʼamak kuxtal minaʼan u xuul tumen wíinikoʼob (1 San Juan 5:13). Jach maʼalob ka k-biseʼex upʼéel toj kuxtal jeʼex letiʼoʼ, leloʼ yaan u taasiktoʼon yaʼab utsil.
Ken chʼaʼapachtaʼakoʼon
16. ¿Baʼaxten tu yaʼalaj Jesús tiʼ u j-tsaypachoʼob ka u yaabiltubaʼob?
16 Jesuseʼ tiaʼalaj tiʼ u j-tsaypachoʼob uláakʼ baʼax kʼaʼabéet u beetkoʼob jeʼex tu beetil letiʼoʼ; letiʼeʼ tiaʼalaj: «Yaabiltabaʼex ta baatsileʼex, jeʼel bix in yaabiltmaʼexeʼ» (San Juan 15:12, 13, 17). Toʼoneʼ jach kʼaʼabéet k-yaabiltik k-sukuʼunoʼob. Jesuseʼ le ka tiaʼalaj le tʼaanoʼobaʼ, táan u yeʼesik uláakʼ baʼax oʼolal kʼaʼabéet k-paklan yaabiltikbaʼex: tumen yaan k-pʼektaʼaleʼex. Tu yaʼalaj: «Wa yóokʼol kaab ku pʼektikeʼexeʼ ojéelteʼexeʼ teen táanil tu pʼektajen. [...] Mix juntúul palitsil maas nojoch tiʼ u tsʼuulil. Wa teen tu chʼaʼapachtenoʼobeʼ bey xan teʼex yaan a chʼaʼapachtaʼaleʼex» (San Juan 15:18, 20). K-ilik túuneʼ, yaan xan k-pʼektaʼaleʼex jeʼex pʼektaʼabik Jesuseʼ. Le oʼolaleʼ, jach kʼaʼabéet k-yaabiltikbaʼex utiaʼal maʼ u lúuʼsaʼal k-óol tumen le pʼektajiloʼ.
17. ¿Baʼaxten k-pʼektaʼal tumen le yóokʼol kaaboʼ?
17 ¿Baʼaxten ku pʼektaʼal le cristianoʼob tumen le yóokʼol kaaboʼ? Tumen jeʼex Jesuseʼ, «maʼ yóokʼol kaabiloʼobiʼ» (San Juan 17:14, 16). Maʼatech u yokskubaʼob tiʼ baʼateʼel mix tiʼ política, ku yilkoʼob le kuxtal jeʼex u yilik Diosoʼ yéetel ku yilik u beetkoʼob baʼax utstutʼaan (Beetaʼanoʼob [Hechos] 15:28, 29; 1 tiʼ Corintoiloʼob 6:9-11). Ku tsʼáaikoʼob Dios táanil, maʼ le ayikʼaliloʼoboʼ, yéetel kex kuxaʼanoʼob teʼ yóokʼol kaabaʼ «maʼ táan u náajaltikoʼob» baʼaxoʼob yaan ichiliʼ (1 tiʼ Corintoiloʼob 7:31). Yaan máaxoʼobeʼ ku tʼaanoʼob maʼalob tu yoʼolal u j-jaajkunajoʼob Jéeoba. Baʼaleʼ tumen k-ilik beetik baʼax u kʼáat Dios kex ka kʼuuxilnak le máakoʼoboʼ, k-pʼektaʼal tumen u maasil, tumen maʼ tu naʼatkoʼob baʼaxten bey kuxlikoʼonoʼ.
18, 19. Le cristianoʼoboʼ, ¿bix u aktáantkoʼob le chʼaʼapachtajil jeʼex tu beetil Jesusoʼ?
18 Le ka maʼach yéetel ka kíimsaʼab Jesuseʼ, u apostoloʼobeʼ tu yiloʼob bukaʼaj pʼektaʼanil, baʼaleʼ tu yiloʼob xan baʼax tu beetaj tu táan le pʼektajiloʼ. Ka bin machbil Jesús tu jardinil Getsemanieʼ, Pedroeʼ tu jóoʼsaj u máaskab utiaʼal u baʼateʼel tu yoʼolal, baʼaleʼ Jesuseʼ tu yaʼalaj tiʼ: «Okes le a máaskab tu piixoʼ. Tumen tuláakal le máaxoʼob ku baʼateloʼob yéetel máaskabeʼ yéetel máaskab bíin kíimikoʼob» (San Mateo 26:52; San Lucas 22:50, 51). Úuchjeakileʼ, le israelitaʼoboʼ tu machaj u máaskaboʼob utiaʼal u baʼateloʼob tu contra máaxoʼob pʼekmailoʼob, baʼaleʼ Jesuseʼ tu yeʼesaj tsʼoʼok ma kʼaʼabéetiʼ. U Reino Dioseʼ «maʼ yóokʼol kaabiliʼ», le oʼolaleʼ le cristianoʼoboʼ minaʼan upʼéel u kaajoʼob teʼ yóokʼol kaab unaj u baʼateloʼob tu yoʼolaloʼ (San Juan 18:36). Ich upʼíit kʼiin kaʼacheʼ, Pedro yéetel uláakʼ cristianoʼobeʼ yaan u kʼaʼamloʼob utiaʼal u yookloʼob tiʼ upʼéel túumben kaaj, baʼaleʼ teʼ kaʼanoʼ (Tiʼ Galaciailoʼob 6:16; Tiʼ Filiposiloʼob 3:20, 21). Teʼ kʼiin jeʼeloʼ, le cristianoʼoboʼ káaj u aktáantkoʼob le pʼektajil yéetel le chʼaʼapachtajil jeʼex tu beetil Jesusoʼ: yéetel x-maʼ saajkilil, baʼaleʼ x-maʼ baʼatelil. Tu pʼatoʼob tuláakal tu kʼab Jéeoba yéetel tu kʼubaj u yóoloʼob yaan u yáantaʼaloʼob tumen Dios utiaʼal ka chúukpajak u yóoloʼob (San Lucas 22:42).
19 Ka máan tsʼeʼetsʼek jaʼaboʼobeʼ, Pedroeʼ tu tsʼíibtaj: «Cristoeʼ mukʼyajnaj ta woʼolaleʼex, ka tu tsʼáaj teʼex jumpʼéel kaʼansaj, utiaʼal ka kuxlakeʼex jeʼel bix kuxlajik letiʼoʼ. [...] Le ka j-poʼochʼeʼ maʼ tu núukaj yéetel poochʼiloʼobiʼ; le ka j beetaʼab u mukʼyajeʼ, maʼ kʼaakʼas tʼaanajiʼ, baʼaleʼ tu kʼubentaj tiʼ Jajal Dios» (1 San Pedro 2:21-23). Jeʼex tu yaʼalil Jesusoʼ, le cristianoʼoboʼ tsʼoʼok u jach chʼaʼapachtaʼaloʼob. Úuchjeakil tak bejlaʼeʼ, le cristianoʼoboʼ tsʼoʼok u yeʼeskoʼob ku chúukpajal u yóoloʼob u aktáantkoʼob le chʼaʼapachtajil yéetel x-maʼ baʼateliloʼ, jeʼex tu beetil Jesusoʼ (Apocalipsis 2:9, 10). Cada utúul tiʼ toʼoneʼ bey xan kʼaʼabéet u beetikoʼ (2 tiʼ Timoteo 3:12).
«Búukbesabaʼex yéetel Yuumtsil Jesucristo»
20-22. ¿Bix k-búukbesikba yéetel Yuumtsil Jesucristo?
20 Pabloeʼ tu tsʼíibtaj tiʼ u cristianoiloʼob Roma: «Búukbesabaʼex yéetel Yuumtsil Jesucristo [...], yéetel maʼ a tukultikeʼex a beetikeʼex baʼax ku tsʼíiboltik le wíinklilaʼ» (Tiʼ Romailoʼob 13:14). Le cristianoʼoboʼ ku búukbeskubaʼob yéetel Jesús, bey jeʼex u upʼéel nookʼeʼ. Ku yilik u yeʼeskoʼob u jatsʼuts modos yéetel ku yilik u beetkoʼob jeʼex letiʼeʼ, beyoʼ kex kʼeban wíinkoʼobeʼ ku kʼuchul u yeʼesoʼob bix Jesús tak le bukaʼaj ku páajtaleʼ (1 tiʼ Tesalonicailoʼob 1:6).
21 Táan k-búukbesikba «yéetel Yuumtsil Jesucristo» ken k-il kaambal tiʼ letiʼ, ken kuxlakoʼon jeʼex úuchik u kuxtaloʼ, ken k-eʼes kabal óolal, ken k-yaabiltik baʼax toj, ken k-pʼekt baʼax kʼaas, ken k-yaabilt le sukuʼunoʼoboʼ, ken k-náachkuntba tiʼ u kuxtalil le yóokʼol kaabaʼ yéetel ken chúukpajak k-óol k-muʼyajt le talamiloʼoboʼ. Maʼatech k-tuklik beetik «baʼax ku tsʼíiboltik le wíinklil[oʼ]», lelaʼ u kʼáat u yaʼaleʼ, maʼ t-bin tu paach le baʼaloʼob k-tuklik jeʼel u béeykuntkoʼob u tsʼíibolal k-bakʼeleʼ. Baʼaxeʼ, táanil tiʼ k-beetik wa baʼaxeʼ, k-tuklik lelaʼ: «¿Baʼax jeʼel u beetik Cristoeʼ? ¿Baʼax utstutʼaan ka in beete?».
22 Jeʼex Jesuseʼ, toʼon xaneʼ jeʼel u páajtal k-kʼubik óol kʼaʼayt le maʼalob péektsiloʼ (San Mateo 4:23; 1 tiʼ Corintoiloʼob 15:58). Lelaʼ uláakʼ bix jeʼel k-beetik jeʼex tu yeʼesil Cristoeʼ. Tuláakʼ xookoʼ le ken k-ileʼex.
¿Jeʼel wa u páajtal k-tsolkeʼ?
• ¿Baʼaxten kʼaʼabéet kabal u yóol le cristianoʼoboʼ?
• ¿Bix jeʼel k-ilik le baʼax maʼalob yéetel le baʼax kʼaas jeʼex tu yilij Jesusoʼ?
• ¿Bix jeʼel k-beetik jeʼex Jesús ken k-aktáant le pʼektajiloʼ?
• ¿Bix jeʼel k-búukbesikba yéetel Yuumtsil Jesucristoeʼ?
[U kʼáatchiʼiloʼob le xookoʼ]