Táan k-kaʼansaʼal utiaʼal k-chúukaʼan kʼaʼaytik le maʼalob péektsiloʼ
Táan k-kaʼansaʼal utiaʼal k-chúukaʼan kʼaʼaytik le maʼalob péektsiloʼ
«[Yaan] a tseʼek[k]eʼex in kʼaabaʼ Jerusalén, tiʼ tuláakal Judea yéetel Samaria, tak [teʼ] kúuchiloʼob yaan tu xuul yóokʼol kaaboʼ.» (BEETAʼANOʼOB [HECHOS] 1:8.)
1, 2. ¿Baʼax meyaj tsʼaʼab tiʼ Pedro, yéetel máax kʼubéent tiʼ?
«JESÚS Nazaretil[eʼ,] [...] tu yaʼalaj toʼon ka tseʼeknakoʼon tiʼ le máakoʼoboʼ yéetel utiaʼal [ka] k-aʼaleʼ Jajal Dioseʼ tsʼoʼok u tsʼáaik Jesús jeʼel bix juntúul Juez tu yóokʼol kuxaʼanoʼob yéetel kimenoʼob[eʼ].» (Baʼaxoʼob [Hechos] 10:38, 42, NT.) Bey tu tsolil le apóstol Pedro tiʼ Cornelio yéetel tiʼ u láakʼtsilil tsʼoʼok u túuxtaʼal u kʼaʼayt le maʼalob péektsiloʼ.
2 ¿Baʼax kʼiin ka aʼalaʼab tiʼ tumen Jesús? Maʼ xaneʼ, Pedroeʼ tʼaanaj tiʼ le baʼax tiaʼalaj Jesús tiʼ u j-tsaypachoʼob jach le u kaʼaj naʼakal teʼ kaʼanoʼ: «[Yaan] a tseʼek[k]eʼex in kʼaabaʼ Jerusalén, tiʼ tuláakal Judea yéetel Samaria, tak [teʼ] kúuchiloʼob yaan tu xuul yóokʼol kaaboʼ» (Beetaʼanoʼob 1:8). Baʼaleʼ, Pedroeʼ u yojliliʼi unaj u kʼaʼaytik le maʼalob péektsiloʼ, tumen tsʼoʼokaʼaniliʼ u yeʼesaʼaltiʼob tumen Jesús kʼaʼabéet u beetkoʼobeʼ.
Óoxpʼéel jaʼab táan u kaʼansaʼaloʼob
3. ¿Baʼax jakʼ óol baʼal tu beetaj Jesús, yéetel baʼax tu yaʼalaj tiʼ Pedro yéetel tiʼ Andrés?
3 Óoliʼ táanchumuk jaʼab máanak ka okjaʼanaj tu jaʼabil 29 teʼ kʼiinoʼob jeʼeloʼ, Jesuseʼ máan kʼaʼaytaj tu jáal u kʼáaʼnáabil Galilea, tuʼux ku chukkayoʼob Pedro yéetel Andrés. Kex mix baʼal tu chukoʼob bul áakʼabeʼ, Jesuseʼ tu yaʼalaj tiʼob: «Xen[eʼex] tuʼux taam le jaʼoʼ; puleʼex u kʼáaniloʼob a chuk kayeʼex utiaʼal ka chuuknakeʼex». Le ka tu beetoʼobeʼ, «tu chukoʼob senkech yaʼab kay; tu yoʼolaleʼ joʼopʼ u jáatal u kʼáanil le chuk kayoʼ». Yoʼolal lelaʼ, Pedroeʼ jach sajakchaji, baʼaleʼ Jesuseʼ tu yaʼalaj tiʼ: «Maʼ a chʼaʼik sajakil, bejlaʼeʼ ku chúunul [wa u kaʼaj káajal] a chukik wíinikoʼob» (San Lucas 5:4-10, LTN).
4. 1) Jesuseʼ, ¿bix tu kaʼansil u j-tsaypachoʼob ka kʼaʼaytnakoʼob? 2) ¿Baʼax u jeʼelaʼanil le kʼaʼaytaj tu beetaj Jesús tiʼ le ken u beet u j-tsaypachoʼoboʼ?
4 Teʼ súutukoʼ, Pedro yéetel Andrés —bey xan Santiago yéetel Juan, u paalal Zebedeoeʼ— tu pʼatoʼob u cheemoʼobeʼ ka binoʼob yéetel Jesús. Teʼ óoliʼ óoxpʼéel jaʼaboʼob tu láakʼintoʼob Jesús ka joʼopʼ u máan kʼaʼaytaj kaajal kaajiloʼ, kaʼansaʼaboʼob kʼaʼaytaj (San Mateo 10:7; San Marcos 1:16, 18, 20, 38; San Lucas 4:43; 10:9). Ka tsʼoʼok u kaʼansaʼaloʼobeʼ, tu kʼiinil 14 tiʼ nisán tiʼ u jaʼabil 33 tiʼ leʼ kʼiinoʼob jeʼeloʼ, Jesuseʼ tu yaʼalajtiʼob: «Le máax oksaj óoltikeneʼ yaan u beetik xan le baʼaloʼob kin beetikoʼ, baʼaloʼob maas nuuktak [ken] u beete» (San Juan 14:12). Jeʼex tu yaʼalil Jesusoʼ, u tsaypachoʼobeʼ yaan u kʼaʼaytajoʼob jeʼex tu beetil letiʼoʼ, baʼaleʼ maas yaʼab tuʼuxoʼob. Maʼ úuch tiʼ leloʼ, le apostoloʼoboʼ tu yojéeltoʼobeʼ letiʼob yéetel tuláakal cristianoeʼ yaan u kʼaʼaytajoʼob tiʼ tuláakal kaajoʼob tak ken kʼuchuk u kʼiinil u xuʼulul yóokʼol kaab (San Mateo 28:19, 20).
5. ¿Bix jeʼel k-jóoʼsik utsil tiʼ le kaʼansaj tu tsʼáaj Jesús tiʼ u j-tsaypachoʼoboʼ?
5 Bejlaʼeʼ kuxaʼanoʼon tu tsʼook u kʼiiniloʼob le kʼasaʼan yóokʼol kaabaʼ (San Mateo 24:3). Kex maʼ tu páajtal k-láakʼintik Jesús utiaʼal k-uʼuyik bix u tʼaan yéetel le máakoʼob jeʼex tu beetil u j-tsaypachoʼoboʼ, baʼaleʼ jeʼel u páajtal k-xokik le Biblia utiaʼal k-ilik bix úuchik u kʼaʼaytaj yéetel baʼax nuʼuktajiloʼob tu tsʼáaj tiʼ u j-tsaypachoʼob (San Lucas 10:1-11). Baʼaleʼ, le xookaʼ yaan u tʼaan tiʼ upʼéel baʼal jach kʼaʼanan tu kaʼansaj Jesús: bix unaj u yilaʼal le kʼaʼaytajoʼ.
Kʼaʼabéet eʼesik taak k-áantkoʼob
6, 7. ¿Baʼax beet u bin utsil tiʼ Jesús teʼ kʼaʼaytajoʼ, yéetel bix jeʼel k-beetik jeʼex letiʼeʼ?
6 ¿Baʼax beet u bin jach utsil tiʼ Jesús teʼ kʼaʼaytajoʼ? Letiʼeʼ tu yeʼesaj jach tu jaajil taak u yáantik le máakoʼoboʼ. Le salmistaoʼ tiaʼaleʼ Jesuseʼ yaan u chʼaʼik «óotsilil tiʼ le j-kabal óoloʼoboʼ yaan u tokik u kuxtal le óotsiloʼoboʼ» (Salmo 72:13). Jesuseʼ jach tu beetaj le baʼax aʼalaʼab tu yoʼolalaʼ. Le Bibliaoʼ kiaʼalikeʼ utéenjeakileʼ «le ka tu yilaj le máakoʼoboʼ tu chʼaʼaj óotsilil tiʼob tumen yajtak u yóoloʼob yéetel lubaʼantak u yóoloʼob jeʼel bix j-tamanoʼob minaʼan máax kanáantikoʼob[eʼ]» (San Mateo 9:36). Tak le jach kʼaj óolaʼan kʼeban máakoʼobeʼ tu yiloʼob taak u yáantaʼaloʼob tumen Jesús, le oʼolal náatsʼoʼob tu yiknal (San Mateo 9:9-13; San Lucas 7:36-38; 19:1-10).
7 Toʼon xaneʼ, wa k-eʼesik jach tu jaajil taak áantik le máakoʼoboʼ, jeʼel u bintoʼon utsil teʼ kʼaʼaytajoʼ. Táanil tiʼ k-jóokʼol kʼaʼaytajeʼ, maʼalob ka k-tukult bukaʼaj kʼaʼabéetil tiʼob le maʼalob péektsilil k-biskoʼ. Tuukulnakoʼon tiʼ le talamiloʼob ku máanskoʼoboʼ, talamiloʼob chéen le Reino jeʼel u yutskíintkoʼ. Maʼ unaj k-tuklik maʼ ken k-uʼuybiliʼ, tumen maʼ k-ojel máax kun chʼenxikintkoʼoniʼ. Maʼ xaaneʼ le uláakʼ máak yéetel ken k-tʼaanoʼ tsʼoʼok u kʼáatik tiʼ Dios ka u túuxt máax áantik.
Le yaabilajoʼ, le unaj u péekskoʼon
8. Jeʼex Jesuseʼ, ¿baʼax péeksik le cristianoʼob kʼaʼaytajoʼ?
8 Jesuseʼ tʼaanaj tiʼ bix kun béeytal baʼax u kʼáat Jéeoba, tiʼ bix kun kiliʼichkúuntbil u kʼaabaʼ Dios yéetel tiʼ bix kun kaʼa sutbil tsiikil tiʼ u noj jalaʼachil, le baʼaloʼob jach kʼaʼanan ka u yeʼes máak baʼax ku tuklik tu yoʼolaloʼ (San Mateo 6:9, 10). U yaabilaj yoʼolal u Taataeʼ le tsʼáaj u muukʼil tiʼ utiaʼal u chúukpajal u yóol yéetel le péeks utiaʼal u chúukaʼan kʼaʼaytik le Reinooʼ, le gobierno kun béeykuntik le baʼaxoʼob tu kʼaʼaytoʼ (San Juan 14:31). Le yaabilaj k-uʼuyik xan tu yoʼolal Jéeobaoʼ le péekskoʼon utiaʼal kʼubik k-óol teʼ kʼaʼaytajoʼ. Le apóstol Juanoʼ tiaʼalaj: «U yaabiltaʼal Jajal Dioseʼ u yuʼubaj tʼantaʼal u [leyoʼob]»; upʼéel tiʼ letiʼobeʼ ka kʼaʼaytnakoʼon yéetel ka k-kaʼans le máakoʼoboʼ (1 San Juan 5:3; San Mateo 28:19, 20).
9, 10. ¿U yaabilaj uláakʼ máax péekskoʼon utiaʼal k-chúukaʼan kʼaʼaytaj?
9 Jesuseʼ tiaʼalaj tiʼ u j-tsaypachoʼob: «Wa a yaabiltmaeneʼexeʼ tsʼoʼokbeseʼex in [...] tʼaanoʼob. Le máax [...] ku tsʼoʼokbesik in [...] tʼaanoʼobeʼ táan u yeʼesik jach tu jaajil u yaamaen» (San Juan 14:15, 21). Le yaabilaj k-uʼuyik yoʼolal Jesusoʼ le unaj u péekskoʼon kʼaʼaytaj yéetel k-beetik baʼax kiaʼalik. Utéenjeakileʼ, le táant u kaʼa kuxkíintaʼaloʼ, Jesuseʼ chíikpaj tiʼ u apostoloʼobeʼ ka tiaʼalaj óoxtéen tiʼ Pedro: «Kanáant túun in j-tamanoʼob. [...] Kanáant túun in mejen j-tamanoʼob. [...] Kanáant túun in j-tamanoʼob». ¿Baʼax kun péeksik Pedro u beet le baʼax aʼalaʼabtiʼaʼ? Cristo eʼes baʼax le ka tu kʼáataj óoxtéen tiʼ: «¿A yaabiltmaen[?] [...] ¿A yaabiltmaen? [...] ¿A yaabiltmaen?». U yaabilaj yoʼolal Jesuseʼ le kun péeksik Pedro utiaʼal u kʼubik yóol teʼ kʼaʼaytaj utiaʼal u kaxtik u mejen tamanoʼob Jesús yéetel utiaʼal u kanáantikoʼoboʼ (San Juan 21:15-17).
10 Kex maʼ jach k-kʼaj óol Jesús jeʼex kʼaj óoltaʼabik tumen Pedroeʼ, k-naʼatik baʼax tu beetaj t-oʼolal. Ku líiʼsik k-óol ojéeltik «tu yóoltaj ka kíimik tu yoʼolal tuláakal», tumen jach u yaabiltmoʼon (Tiʼ Hebreob 2:9; San Juan 15:13). K-uʼuyikba jeʼex Pablo le ka tu tsʼíibtaj: «Cristoeʼ j-kíim tu yoʼolal tuláakal, utiaʼal beyoʼ le máaxoʼob kuxaʼanoʼoboʼ maʼ u kuxtaloʼob chéen utiaʼal letiʼob, baʼaleʼ ka kuxlakoʼob tu yoʼolal letiʼ» (2 tiʼ Corintoiloʼob 5:14, 15). Wa nojoch k-tiaʼal u yaabilaj Jesús yéetel k-yaabilmaj xaneʼ, yaan k-ilik k-chúukaʼan kʼaʼaytik le maʼalob péektsiloʼ (1 San Juan 2:3-5). Mix utéen kʼaʼabéet k-ilik le kʼaʼaytaj bey upʼéel baʼal maʼ kʼaʼananeʼ, tumen wa maʼeʼ táan k-eʼesik bey maʼ nojoch baʼax tu beetaj Jesús t-oʼolaleʼ (Tiʼ Hebreob 10:29).
Kʼaʼabéet ilik beetik baʼax maas kʼaʼanan
11, 12. ¿Baʼax oʼolal taal Jesús way Luʼumeʼ, yéetel bix tu yeʼesil le taal u beete?
11 Ka anchaj tu táan Poncio Pilatoeʼ, Jesuseʼ tiaʼalaj tiʼ: «Teneʼ j-síijen yéetel j-taalen way yóokʼol kaabeʼ utiaʼal in tʼaan tu yoʼolal le jaajoʼ» (San Juan 18:37). Jesuseʼ maʼ tu chaʼaj u náachkuntaʼal tiʼ le meyaj taal u beetoʼ, tumen Dios aʼal tiʼ ka u beete.
12 Satanaseʼ tu yilaj u náachkuntik Jesús tiʼ le meyaj taal u beetoʼ. Maʼ úuch okjaʼanak Jesuseʼ, tu yeʼesaj «tuláakal u nukuch kaajiloʼob yóokʼol kaab; bey xan u ayikʼaliloʼob» tiʼ, yéetel tiaʼalaj u tsʼáaik tiʼ (San Mateo 4:8, 9). Ku máan kʼiineʼ, le judíoʼob xanoʼ tu yóotoʼob u beetoʼob reyil Jesús (San Juan 6:15). Yaan wal máax jeʼel u tuklikeʼ Jesuseʼ yaʼab maʼalob baʼal jeʼel u beetik utiaʼal u yutsil wíinikoʼob wa ka u yóot u beet u reyil kaʼacheʼ. Baʼaleʼ, letiʼeʼ maʼ bey u tuukuliʼ. Letiʼeʼ taal u tsʼáaj ojéelbil le jaajoʼ.
13, 14. 1) ¿Tu paach baʼax maʼ bin Jesusiʼ? 2) Kex óotsil kaʼacheʼ, ¿baʼax tu tsʼáajtoʼon Jesús?
13 Jesús xaneʼ maʼ bin tu paach ayikʼaliloʼobiʼ. Letiʼeʼ maʼ ayikʼal kaʼachiʼ; mix u yotoch kaʼach yaan. Utéenjeakileʼ tiaʼalaj: «Le chʼomakoʼoboʼ yaan u yáaktunoʼob, bey xan le chʼíichʼoʼoboʼ yaan u kʼuʼob, baʼaleʼ u Paal Máakeʼ minaʼan tuʼux u tʼalkúuntik u pool» (San Mateo 8:20). Chéen baʼax koʼoj yaan tiʼ kaʼacheʼ letiʼe u nookʼ buulintaʼab tumen le soldadoʼob romanoʼoboʼ (San Juan 19:23, 24). ¿Jeʼel wa túun u páajtal yaʼalaʼal bin kʼaasil tiʼeʼ? ¡Jach u puliʼ!
14 Jesuseʼ jach maas nojoch áantaj tu tsʼáaj tiʼ le jeʼel u páajtal u tsʼáaik wíinikoʼob bejlaʼoʼ. Pabloeʼ tiaʼalaj: «Tsʼoʼok a kʼaj óoltikeʼex u siibal k-Yuumtsil Jesucristo. Letiʼeʼ ayikʼal kaʼachi, baʼaleʼ tu yóotsilkuntuba tu yoʼolal u yaakunaj tiʼ teʼex, utiaʼal ka ayikʼalchajkeʼex tu yoʼolal u yóotsilil letiʼ» (2 tiʼ Corintoiloʼob 8:9; Tiʼ Filiposiloʼob 2:5-8). Kex óotsil kaʼacheʼ, Jesuseʼ tu tsʼáaj u páajtalil tiʼ wíinikoʼob ka kuxlakoʼob minaʼan u xuul ich maʼ kʼebanil. ¡Jach k-tsʼáaik nib óolal yoʼolal lelaʼ! Jach kiʼimak k-óol tumen tsʼoʼok u kʼamik u boʼolil ikil tu kʼubil yóol u beet baʼax u kʼáat Dios (Salmo 40:8; Beetaʼanoʼob 2:32, 33, 36).
15. ¿Baʼax maas jach yaan u tojol tiʼe ayikʼaliloʼ?
15 Wa k-ilik beetik xan jeʼex Jesuseʼ, maʼ ken k-bin tu paach ayikʼaliloʼob (1 tiʼ Timoteo 6:9, 10). Kex k-ojel le taakʼin jeʼel u yáantkoʼob utiaʼal maʼ k-jach máansik óotsilileʼ, le kuxtal minaʼan u xuuloʼ maʼ tu páajtal k-manik yéetel taakʼin. Ken kíimik máakeʼ tuláakal baʼax yaan tiʼeʼ tsʼoʼok minaʼan u tojol utiaʼal, jeʼex u nookʼ Jesús minaʼan u tojol utiaʼal le ka kíimoʼ (Eclesiastés 2:10, 11, 17-19; 7:12). Tu yorai táan u kíimil máakeʼ baʼax jach tu jaajil yaan u tojoleʼ wa maʼalob yanik tu táan Jéeoba yéetel Jesús (San Mateo 6:19-21; San Lucas 16:9).
Le chʼaʼapʼektajiloʼ maʼ tu lúuʼsik k-óol
16. ¿Bix tu aktáantil Jesús le chʼaʼapʼektajiloʼ?
16 Le chʼaʼapʼektajiloʼ maʼ tu náachkuntaj Jesús tiʼ le meyaj taal u beetoʼ. Kex u yojel yaan u kíimsaʼaleʼ, leloʼ maʼ tu beetaj u lúubul u yóoliʼ. Pabloeʼ tiaʼaleʼ Jesuseʼ muʼyajnaj tiʼ le cheʼoʼ, baʼaleʼ «maʼ tu beetaj u cuentail wa subtsil u kíimil máak beyoʼ, tumen u yojeleʼ ku tsʼoʼokol u mukʼyajeʼ yaan u yantal kiʼimak óolal tiʼ» (Tiʼ Hebreob 12:2). Jesuseʼ «maʼ tu beetaj u cuentail» baʼax ku tuklaʼal tu yoʼolal tumen máaxoʼob pʼekmailiʼ, letiʼeʼ tu yilaj u beetik baʼax u kʼáat Dios.
17. ¿Baʼax k-kanik tiʼ bix chúukpajik u yóol Jesús?
17 Pabloeʼ tiaʼalaj tiʼe cristianoʼob ka chúukpajak yóoloʼob jeʼex tu beetil Jesuseʼ: «Tsʼáa a tuukuleʼex [...] tiʼ Jesús, máax tu mukʼyajtaj jach yaʼab chʼaʼapʼektajil tu kʼab le j-kʼeban máakoʼoboʼ; le oʼolaleʼ maʼ a kaʼanleʼex mix u lúubul a wóoleʼex» (Tiʼ Hebreob 12:3). Jeʼel k-kaʼanal wa mantatsʼ k-pʼaʼastaʼal wa mantatsʼ pʼektaʼanoʼoneʼ. Maʼ chéen chʼaʼabil xan u chúukpajal k-óol utiaʼal maʼ k-bin tu paach le baʼaloʼob yaan teʼ yóokʼol kaabaʼ, tumen lelaʼ maʼ xaaneʼ ku beetik u yaʼalaʼaltoʼon baʼal tumen k-láakʼoʼob u kʼáatoʼob ka yanaktoʼon «maʼalob baʼaloʼob». Baʼaleʼ, jeʼex Jesuseʼ, k-kaxtik u yáantaj Jéeoba yéetel maʼ tu xuʼulul tsʼáaik táanil le Reinooʼ (San Mateo 6:33; Tiʼ Romailoʼob 15:13; 1 tiʼ Corintoiloʼob 2:4).
18. ¿Baʼax k-kanik tiʼ le baʼax tiaʼalaj Jesús tiʼ Pedrooʼ?
18 Jesuseʼ maʼ tu chaʼaj u náachkuntaʼal tumen mix baʼal tiʼ u meyajtik Diosiʼ, lelaʼ bey k-ilik yoʼolal le baʼax úuch le ka tʼaanaj yéetel u apostoloʼob tiʼ u kíimiloʼ. Pedroeʼ tu yaʼalaj tiʼeʼ ka u chʼaʼaóotsiltuba, yéetel tu yaʼalaj xan tiʼ: «¡Mix bikʼin ka kʼuchuk úuchul tiʼ teech le baʼalaʼ!». Jesuseʼ maʼ u kʼáat u chʼenxikint mix baʼal jeʼel u beetik u lúubul yóol tiʼ u beetik baʼax kʼáat Dioseʼ, le oʼolal tu sutaj u paacheʼ ka tu yaʼalaj tiʼ Pedro: «¡Tselaba tin táan Satanás tumen techeʼ tʼóochpajlech in tiaʼal! Techeʼ maʼ ta tuukul jeʼel bix u tuukul Jajal Dioseʼ, baʼaleʼ ka tuukul jeʼel bix u tuukul máakoʼobeʼ» (San Mateo 16:21-23). Toʼon xaneʼ kʼaʼabéet k-ilik maʼ k-tuukul jeʼel bix u tuukul le máakoʼoboʼ, kʼaʼabéet k-chaʼik nuʼuktaʼal tumen Dios.
Utsiloʼob utiaʼal mantatsʼ
19. Kex Jesús tu beetaj jakʼ óol baʼaloʼobeʼ, ¿baʼax jach taal u beete?
19 Utiaʼal u yeʼesik letiʼ le Mesíasoʼ, Jesuseʼ tu beetaj jakʼ óol baʼaloʼob, tu kaʼa kuxkíintaj tak kimenoʼob. Yoʼolal lelaʼ yaʼab máakoʼob náatsʼ tu yiknal, baʼaleʼ maʼ chéen taal u yáant máakoʼobiʼ, taal utiaʼal u tsʼáaj ojéelbil le jaajoʼ. U yojel tuláakal baʼax ku beetik tu yoʼolaloʼobeʼ chéen utiaʼal u súutuk; tak le tu kaʼa kuxkíintoʼoboʼ kaʼa kíimoʼob. Chéen bix jeʼel u yáantkoʼob utiaʼal ka u kʼamoʼob kuxtal minaʼan u xuuleʼ ka u kaʼanstiʼob u jaajil (San Lucas 18:28-30).
20, 21. ¿Bix u yilik le cristianoʼob le u tsʼaʼabal áantaj tiʼ u maasiloʼoboʼ?
20 Bejlaʼeʼ, yaan máakoʼobeʼ u kʼáat u yáantoʼob u maasil jeʼex tu beetil Jesuseʼ, ku beetkoʼob ospitaloʼob wa ku yáantkoʼob le óotsiloʼoboʼ, kex yaan kʼiin ku talamtaltiʼob. Kex maʼalob baʼax ku beetkoʼobeʼ, le áantaj ku tsʼáaikoʼoboʼ chéen utiaʼal u súutuk. Chéen le Reino kun lúuʼsik utiaʼal mix bikʼin tuláakal le talamiloʼoboʼ. Le beetik u j-jaajkunajoʼob Jéeobaeʼ ku kʼubik yóoloʼob u kʼaʼaytoʼob le Reino jeʼex tu beetil Jesusoʼ.
21 Baʼaleʼ, le jaajil cristianoʼoboʼ ku tsʼáaikoʼob xan áantaj. Pabloeʼ tu tsʼíibtaj: «Jeʼel baʼalak kʼiin ku páajtaleʼ unaj k-beetik uts tiʼ tuláakal, yáax táanileʼ tiʼ le sukuʼunoʼob tiʼ le oksaj óolaloʼ» (Tiʼ Galaciailoʼob 6:10). Tu yoorai táan u máansik nojoch talmiloʼob k-sukuʼunoʼob wa uláakʼ máakoʼobeʼ, k-ilik «k-beetik uts» tiʼob. Kex k-ilik beetik lelaʼ, jach kʼubik óol k-beet baʼax maas kʼaʼanan: tsʼáaik ojéelbil u jaajil.
Kaambalnakoʼon tiʼ Jesús
22. ¿Baʼaxten k-kʼaʼaytaj?
22 Pabloeʼ tu tsʼíibtaj: «¡Óotsilen wa maʼ tin tseʼektik le maʼalob péektsiloʼ!» (1 tiʼ Corintoiloʼob 9:16). Maʼ tu yilaj bey maʼ kʼaʼanan u bisik le maʼalob péektsiloʼ, tumen u yojel kʼaʼabéet utiaʼal u salvarkuba letiʼ yéetel le máaxoʼob chʼenxikintkoʼ (1 tiʼ Timoteo 4:16). Toʼon xaneʼ bey k-ilik le kʼaʼaytajoʼ. Kʼáat áant le máakoʼoboʼ yéetel k-kʼáat eʼes tiʼ Jéeoba jach k-yaabilmaj. Kʼáat xan k-eʼes tiʼ Jesús k-yaabilmaj yéetel k-tsʼáaik nib óolal tiʼ yoʼolal le yaabilaj tu yeʼesajtoʼonoʼ. Le oʼolaleʼ, k-kʼaʼaytik le maʼalob péektsiloʼ yéetel k-ilik kuxtal «jeʼel bix u kʼáat Jajal Dioseʼ maʼ utiaʼal [k-tsʼoʼokbesik] u tsʼíibolal le luʼumkabil wíinklilaʼ» (1 San Pedro 4:1, 2).
23, 24. 1) ¿Baʼax k-kanik tiʼ le ka tu beetaj Jesús u chuʼukul yaʼab kayoʼoboʼ? 2) ¿Máaxoʼob táan u chúukaʼan kʼaʼaytajoʼob teʼ kʼiinoʼobaʼ?
23 Jeʼex Jesuseʼ, maʼ unaj u jáawal k-kʼaʼaytik le maʼalob péektsil kex pʼaʼastakoʼon wa kex aʼalaʼaktoʼon baʼal. Yaan baʼax k-kanik tiʼ le jakʼ óol baʼal tu beetaj Jesús le ka tiaʼalaj tiʼ Pedro yéetel tiʼ Andrés ka u tsaypachtoʼoboʼ. Wa k-uʼuyik u tʼaan yéetel k-pulik u kʼáanil k-chuk kay tuʼux bey minaʼan kayoʼobeʼ, jeʼel u bintoʼon utsil tiʼ le kʼaʼaytajoʼ. Yaʼab cristianoʼobeʼ tsʼoʼok u máan kʼiin joʼopʼok u kʼaʼaytajoʼob tuʼuxoʼob bey minaʼan mix máak jeʼel u kʼamik le maʼalob péektsiloʼ, baʼaleʼ tumen maʼ lúub u yóoloʼobeʼ tsʼoʼok u kʼamkoʼob yaʼab utsil. Yaan xaneʼeʼ tsʼoʼok u binoʼob kajtal tuʼux maas yaʼab máak kʼamik le maʼalob péektsiloʼ yéetel tsʼoʼok u yáantkoʼob yaʼab máakoʼob. Jeʼel tuʼuxak táan k-kʼaʼaytajeʼ, maʼ tun xuʼulul k-pulik u kʼáanil k-chuk kay, tumen Jesuseʼ maʼ u yaʼal tsʼokaʼan le meyajaʼ (San Mateo 24:14).
24 Bejlaʼeʼ, yaan maas tiʼ seis millones u j-jaajkunajoʼob Jéeoba táan u kʼaʼaytajoʼob tiʼ maas tiʼ doscientos treinta luʼumoʼob. Le maʼ xuʼulsaʼak tiʼe kʼasaʼan yóokʼol kaabaʼ, maʼ unaj u jáawal k-beetik le baʼax tiaʼalaj Pabloaʼ: «Séebkunt a tseʼektik le tʼaanoʼ» (2 Timoteo 4:2, LTN). Le oʼolal wa Jéeoba maʼ u yaʼaltoʼon tsʼokaʼan le meyajaʼ, maʼ u jáawal k-chúukaʼan kʼaʼaytajeʼex.
¿Baʼax jeʼel k-núukikeʼ?
• ¿Bix jeʼel k-jóoʼsik utsil tiʼ le kaʼansaj tu tsʼáaj Jesús tiʼ u apostoloʼoboʼ?
• Jesuseʼ, ¿bix tu yilij le máaxoʼob tiʼ le tu kʼaʼaytaj le maʼalob péektsiloʼ?
• ¿Baʼax péekskoʼon utiaʼal k-chúukaʼan kʼaʼaytik le maʼalob péektsiloʼ?
• ¿Baʼax kun áantkoʼon utiaʼal maʼ u jáawal k-beetik baʼax u kʼáat Dios, jeʼex tu beetil Jesusoʼ?
[U kʼáatchiʼiloʼob le xookoʼ]