Bejlaʼa xaneʼ táan u kaxtaʼal le perla jach yaʼab u tojloʼ
Bejlaʼa xaneʼ táan u kaxtaʼal le perla jach yaʼab u tojloʼ
«U maʼalob péektsil le [reinooʼ] bíin tseʼektaʼak tiʼ tuláakal yóokʼol kaab, utiaʼal ka kʼaj óoltaʼak.» (SAN MATEO 24:14.)
1, 2. 1) Tu kʼiiniloʼob Jesuseʼ, ¿baʼax jach taak u yojéeltik le judíoʼoboʼ? 2) Jesuseʼ, ¿bix tu yáantil u j-tsaypachoʼob u naʼatoʼob baʼax le Reinooʼ, yéetel baʼax tu beetoʼob ka tsʼoʼoki?
TU KʼIINILOʼOB Jesuseʼ, le judíoʼoboʼ jach taak u yojéeltkoʼob tiʼ u Reino Dios (San Mateo 3:1, 2; 4:23-25; San Juan 1:49). Baʼaleʼ, óoliʼ tuláakloʼobeʼ maʼ tu naʼatkoʼob kaʼach wa le Reinoaʼ yaan u gobernartik tuláakal le Luʼumaʼ yéetel teʼ kaʼan kun yantaloʼ (San Juan 3:1-5). Tak jujuntúul tiʼ u j-tsaypachoʼob Jesuseʼ jelaʼan bix u naʼatkoʼob kaʼach baʼax le Reinoaʼ yéetel maʼ u yojloʼob kaʼach baʼax unaj u beetkoʼob utiaʼal u gobernaroʼob tu yéeteliʼ (San Mateo 20:20-22; San Lucas 19:11; Beetaʼanoʼob [Hechos] 1:6).
2 Jesús túuneʼ joʼopʼ u kaʼansik yaʼab baʼaloʼob tiʼ u j-tsaypachoʼob —jeʼex u kettʼaanil le perla jach yaʼab u tojol t-ilaj teʼ xook máanikoʼ— utiaʼal u kaʼansiktiʼob u kʼaʼabéetil u kʼubik yóoloʼob u kaxtoʼob le Reinooʼ (San Mateo 6:33; 13:45, 46; San Lucas 13:23, 24). Le baʼax tu kanoʼoboʼ jach kʼuch tu puksiʼikʼaloʼob, tumen tu séebaʼanileʼ káaj u kʼaʼaytkoʼob yéetel x-maʼ saajkilil u maʼalob péektsil le Reinooʼ, yéetel maʼ jáaw u beetkoʼobiʼ, tu bisoʼob tak tiʼ náanach luʼumoʼob jeʼex u yeʼesik u libroi Beetaʼanoʼoboʼ (Beetaʼanoʼob 1:8; Tiʼ Colosailoʼob 1:23).
3. Ka tʼaanaj tiʼ k-kʼiinoʼobeʼ, ¿baʼax tiaʼalaj Jesús yoʼolal le Reinooʼ?
3 ¿Kux túun teʼ kʼiinoʼobaʼ? Táan u kʼaʼaytaʼal tiʼ u millonesi máakoʼob le utsiloʼob ken u taas le Reino teʼ paraíso kun antal way Luʼumoʼ. Jesuseʼ, ka tʼaanaj tiʼ u xuul yóokʼol kaabeʼ, tiaʼalaj: «U maʼalob péektsil le [reinooʼ] bíin tseʼektaʼak tiʼ tuláakal yóokʼol kaab, utiaʼal ka kʼaj óoltaʼak tumen tuláakal kaajoʼob; letiʼ túun ken taalak u xuul» (San Mateo 24:3, 14; San Marcos 13:10). Tiaʼalaj xaneʼ le nojoch meyajaʼ yaan u beetaʼal kex yanak nojoch talamiloʼob wa kex yanak chʼaʼapachtajil. Baʼaleʼ, tu jaajkúuntaj: «Le máax ku chúukpajal u yóol tak tu xuuleʼ, [letiʼ] bin toʼokok» (San Mateo 24:9-13, LTN). Utiaʼal lelaʼ kʼaʼabéet u kʼubik u yóol máak u kaxt le Reino, jeʼex tu kʼubil u yóol le j-koonol tiʼ le tʼaanaj Jesusoʼ. ¿Yaan wa máaxoʼob beetik bejlaʼeʼ?
U kiʼimak óolalil u kʼaj óoltaʼal u jaajil
4. ¿Baʼax ku beetik u maʼalob péektsilil le Reinooʼ?
4 Le j-koonol tiʼ le tʼaanaj Jesusoʼ jach kiʼimakchaj u yóol ka tu kaxtaj upʼéel perla jach «yaʼab u tojol». Lelaʼ le péeks u beet tuláakal le ku páajtal utiaʼal u tiaʼalintik le perlaoʼ (Tiʼ Hebreob 12:1). Bejlaʼaʼ xaneʼ, u yojéeltaʼal u jaajil tiʼ Dios yéetel tiʼ le Reinooʼ ku natsʼik yéetel ku péeksik yaʼab máakoʼob. Bey tu yeʼesi le sukuʼun A. H. Macmillan, tu libro Faith on the March (Le oksaj óolaloʼ táan u máan táanil) tuʼux ku tʼaan tiʼ bix úuchik kaxtik Dios yéetel bix úuchik u yojéeltik baʼax u kʼáat utiaʼal wíinik. Letiʼeʼ tu tsʼíibtaj: «Le baʼax tsʼoʼok in kaxtikaʼ, láalaj jaʼab u kaxtaʼal xan tumen u milesi máakoʼob. Letiʼobeʼ beyoʼob jeʼexecheʼ yéetel jeʼexeneʼ, jejeláas u jaʼabiloʼob, u kaajaloʼob, u razaʼob, óotsiloʼob yéetel ayikʼaloʼob. Le u jaajiloʼ ku natsʼik tuláakal u jejeláasil máakoʼob».
5. ¿Baʼax béeychaj yéetel le kʼaʼaytaj beetaʼab tu jaʼabil 2004?
5 Le baʼax tiaʼalaj le sukuʼunaʼ jach jaaj, tumen láalaj jaʼabeʼ, u tsikbalil le Reinooʼ ku péeksik yaʼabach máakoʼob u kʼub u kuxtaloʼob tiʼ Jéeoba utiaʼal u beetkoʼob baʼax u kʼáat. Le meeyjil kaʼansaj beetaʼab tu jaʼabil 2004, bey u yeʼesik. Tu mesil septiembre tiʼ 2003 tak agosto tiʼ 2004, 262.416 máakoʼob tiʼ 235 luʼumoʼobeʼ okjaʼanajoʼob, tumen tsʼokaʼan u kʼubik u kuxtaloʼob tiʼ Jéeoba. Teʼ luʼumoʼobaʼ, láalaj semanaeʼ, u j-jaajkunajoʼob Jéeobaeʼ ku xokkoʼob le Biblia yéetel 6.085.387 máakoʼoboʼ. Beyoʼ ku kaʼanskoʼob le kiʼichkelem jaajil tiʼ tuláakal u jejeláasil máak u taaloʼob tiʼ jejeláas luʼumoʼob, kaajoʼob yéetel tʼaanoʼob (Apocalipsis 7:9).
6. ¿Baʼax beetik u maas yaʼabtal máaxoʼob ku yookloʼob ichil u kaajal Dios?
6 ¿Bix béeychajik tuláakal lelaʼ? Béeychaj tumen Jéeobaeʼ ku natsʼik tu yiknal le máaxoʼob u kʼáatoʼob le kuxtaloʼ (San Juan 6:65; Hechos 13:48, NM). Baʼaleʼ, maʼ unaj k-tuʼubsik tuláakal le meyaj tsʼoʼok u beetik le máaxoʼob tu kʼubaj u kuxtaloʼob u kaxtoʼob le Reinooʼ. Le sukuʼun Macmillanoʼ, 79 jaʼaboʼob yantiʼ le ka tu tsʼíibtaj: «Ka tin kanaj teʼ Biblia baʼax ken u beet Dios yoʼolal le yóokʼol kaab jach yaj yanikaʼ, tak bejlaʼa maʼ xuʼuluk in kʼub óoltik le maʼalob baʼaloʼobaʼ. Teʼ kʼiinoʼob jeʼeloʼ, tin chʼaʼatuklaj in maas kanik baʼax kiaʼalik le Bibliaoʼ utiaʼal in wáantik le máaxoʼob u kʼáatoʼob xan u kʼaj óoltoʼob Jéeobaoʼ, le Dios yaan tuláakal páajtalil tiʼoʼ, yéetel u kʼáat u kʼaj óoltoʼob baʼax u tukulmaj utiaʼal wíinikoʼob».
7. ¿Bix u yilaʼal ku taasik kiʼimak óolal u kʼaj óoltaʼal le jaajil yaan teʼ Bibliaoʼ?
7 Bejlaʼaʼ xaneʼ máaxoʼob meyajtik Jéeobaeʼ u kʼáat u yáantoʼob u maasil. Utúul tiʼ letiʼobeʼ Daniela, kajaʼan Viena (Austria), letiʼeʼ tiaʼalaj: «Tak tin chichnileʼ Dioseʼ in maas jach maʼalob amigo. Mantatsʼ kaʼach in kʼáat in wojéelt u kʼaabaʼ, chéen in waʼalik Dios tiʼeʼ maʼ tu beetik in wilik bey utúul máax kuxaʼaneʼ. Anchaj in páaʼtik tak ka yanchajten 17 jaʼaboʼob, le ka xíimbaltaʼaben tumen u j-jaajkunajoʼob Jéeoba ka tu tsoloʼobten tuláakal baʼax in kʼáat in wojéelt tiʼ Dios. ¡Bey túun úuchik in kʼaj óoltik u jaajiloʼ, yéetel jach jatsʼuts tin wilij! Jach táaj kiʼimakchaj in wóol, ka joʼopʼ in kʼaʼaytaj tiʼ tuláakal máak». Yoʼolal lelaʼ, maʼ xáanchaj ka joʼopʼ u pʼaʼastaʼal tumen u yéet xookoʼobiʼ. Danielaeʼ ku yaʼalik: «Baʼaleʼ, teneʼ in wojeleʼ bey u yaʼalik le Biblia kun úuchloʼ, tumen tsʼoʼokaʼaniliʼ in kanikeʼ Jesuseʼ tiaʼalaj yaan u pʼektaʼal yéetel yaan u chʼaʼapachtaʼal u j-tsaypachoʼob tu yoʼolal u kʼaabaʼ. Jach kiʼimakchaj in wóol yéetel jach jakʼ in wóol tu yoʼolal lelaʼ». Maʼ xáanchaj ka tu kʼubaj u kuxtal tiʼ Diosiʼ, ka okjaʼanaji yéetel ka káaj u meyaj utiaʼal u beetik u misionerai. Ka tsʼoʼok u tsʼoʼokol u beeleʼ, Daniela yéetel Helmut, u yíichameʼ, joʼopʼ u kʼaʼaytajoʼob tiʼ leʼ máaxoʼob u taaloʼob África, China, Filipinas yéetel India, kajaʼanoʼob Vienaoʼ. Bejlaʼeʼ letiʼobeʼ misioneroʼob tu noojol chikʼinil África.
Maʼ tu lúubul u yóoloʼob
8. Yaʼabeʼ, ¿bix u yeʼeskoʼob u yaabiltmoʼob Dios yéetel ku tsʼáaikoʼob táanil le Reinooʼ?
8 U beetik u misioneroi máakeʼ upʼéel bix u yeʼesaʼal yaabilaj tiʼ Dios yéetel u tsʼaʼabal táanil le Reinooʼ. Jeʼex le j-koonol tiʼ le tʼaanaj Jesuseʼ, le misioneroʼoboʼ ku yóotkoʼob bin yaanal luʼumoʼob tu yoʼolal le Reinooʼ. Baʼaleʼ, maʼ táan u bin utiaʼal u kaxtoʼob le maʼalob péektsiloʼ, táan u biskoʼob utiaʼal u kaʼansoʼob tiʼ le máakoʼoboʼ yéetel utiaʼal u yáantik le máakoʼob u tsaypachtoʼob Jesusoʼ (San Mateo 28:19, 20). Yaʼab tuʼuxeʼ le misioneroʼoboʼ ku máanskoʼob nojoch talamiloʼob, baʼaleʼ ku kʼamkoʼob yaʼab utsiloʼob yoʼolal u chúukaʼan óolaloʼob.
9, 10. ¿Baʼax jatsʼuts baʼaloʼob tsʼoʼok u yúuchul tiʼ le misioneroʼob ku yáantajoʼob tiʼ náanach luʼumiloʼob jeʼex teʼ República Centroafricanaoʼ?
9 Bey u yilaʼal teʼ República Centroafricanaoʼ, teʼeloʼ 16.184 máakoʼob anchajoʼob tu Kʼaʼajsajil kíimik Cristo le jaʼab máanikoʼ, siete u téenel u maas yaʼabil tiʼ le j-kʼaʼaytajoʼoboʼ. Teʼelaʼ yaʼab tuʼuxoʼobeʼ minaʼan corrienteiʼ, le oʼolaleʼ u kajnáaliloʼobeʼ suuk u beetik u meyajoʼob yáanal u boʼoy u kúul cheʼ. Le oʼolal suuk u yilaʼal le misioneroʼob táan u kaʼanskoʼob le máakoʼob yáanal u boʼoy u kúul cheʼoʼ. Táankabeʼ maas sáasil yéetel maas síis óol, baʼaleʼ yaan uláakʼ utsil ku jóoʼsaʼal. Le centroafricanoʼoboʼ jach utstutʼaan u yuʼubkoʼob tiʼ le Bibliaoʼ, yéetel jach suuk u tʼaanoʼob tiʼ Dios jeʼex tuláakʼ tuʼuxoʼob jach suuk u tsikbaltaʼal tiʼ báaxal wa tiʼ baʼaxoʼob ku yúuchul. Yaʼab u téeneleʼ, le máaxoʼob ku máanoʼoboʼ ku náatsʼloʼob utiaʼal u táakpajloʼob teʼ xookoʼ.
10 Utéenjeakileʼ utúul misioneroeʼ le táan u tsʼáaik xook táankaboʼ, náatsʼ utúul xiʼipal kajaʼan aktáan ka tiaʼalaj mix utéen xíimbaltaʼak, ka tu yaʼalaj kʼaʼabéet u xíimbaltaʼal tumen le misionero utiaʼal ka kaʼansaʼakoʼ. Le sukuʼunaʼ yéetel kiʼimak óolal tiaʼalaj jeʼel u yáantkeʼ, le xiʼipalaʼ jach séeb úuchik u bin u kaambal. Le policíaʼob xanoʼ suuk u jeʼelskoʼob u j-jaajkunajoʼob Jéeoba, baʼaleʼ maʼ utiaʼal u multartoʼobiʼ, ku jeʼelskoʼob utiaʼal u kʼáatkoʼob le revistaʼob maas túumbentakoʼ wa utiaʼal u tsʼáaikoʼob nib óolal yoʼolal baʼax jatsʼuts tu xokoʼobiʼ.
11. Kex ku máanskoʼob talamileʼ, ¿baʼax ku yaʼalik jujuntúul misioneroʼob yoʼolal le meyaj ku beetkoʼoboʼ?
11 Yaʼabeʼ láayliʼ misioneroʼob kex tsʼoʼok cuarenta wa cincuenta jaʼaboʼob káajkoʼobeʼ. ¡Jach maʼalob u yeʼeskoʼob bix kʼaʼabéet u chúukpajal u yóol máak! Ich cuarentaidos jaʼaboʼobeʼ, utúul sukuʼun yéetel u yataneʼ tsʼoʼok u beetik u misioneroiloʼob tiʼ óoxpʼéel luʼumoʼob. Le sukuʼunoʼ ku yaʼalik: «Tsʼoʼok k-máansik talamiloʼob. Ich treintaicinco jaʼaboʼobeʼ yaʼab u téenel kʼojaʼanchajoʼon tiʼ paludismo. Baʼaleʼ mix utéen yaachajak t-óol úuchik k-beetik misioneroi». U yatneʼ kiaʼalik xan: «Jach yaan baʼax oʼolal k-tsʼáaik nib óolal tiʼ Jéeoba. Ku taasiktoʼon kiʼimak óolal k-jóokʼol kʼaʼaytaj, yéetel maʼ talam k-káajsik xook yéetel le máakoʼoboʼ. Ken káajak u taaloʼob teʼ muchʼtáambaloʼob yéetel ken u kʼaj óoltubaʼobeʼ, bey ka anak máak ich láakʼtsilileʼ».
Utiaʼal letiʼobeʼ u maasil baʼaloʼobeʼ «minaʼan u tojol»
12. ¿Bix u yeʼesik máak jach maʼalob u yilik le Reinooʼ?
12 Ka tu kaxtaj le perlaoʼ, le j-koonoloʼ bineʼ ka tu konaj «tuláakal baʼal yaan tiʼeʼ» ka tu manaj (San Mateo 13:46). Le máaxoʼob xan jach maʼalob u yilkoʼob le Reinooʼ ku tsʼáaikoʼob jun tséelil le baʼaxoʼob maʼalobtak yantiʼob utiaʼal u tiaʼalintkoʼob le Reinooʼ. Pabloeʼ, tumen u yojel yaan u nojbeʼenkúuntaʼal yéetel Cristo teʼ Reinooʼ, tiaʼalaj: «Tuláakal baʼax ku páajtal u yantal teneʼ kin tukultikeʼ bey jumpʼéel baʼal minaʼan u tojoleʼ tu tséel le nojoch náajal yaan tiʼ teen in kʼaj óoltmail Cristo Jesús in Yuumtsiloʼ. Tu yoʼolal Cristoeʼ tsʼoʼok in [pʼatik] tuláakal, sojol in [tiaʼal], utiaʼal in tiaʼalintik Cristo» (Tiʼ Filiposiloʼob 3:8).
13. Utúul máak tiʼ República Checaeʼ, ¿bix tu yeʼesil u yaabilmaj le Reinooʼ?
13 Bejlaʼaʼ xaneʼ, yaʼab máakoʼobeʼ ku yóotik u kʼex u kuxtaloʼob utiaʼal u kʼamkoʼob le utsiloʼob ku taasik le Reinooʼ. Jeʼex tu mesil octubre tiʼ 2003, utúul máak 60 jaʼaboʼob yaan tiʼ yéetel u directoril upʼéel u najil xook tiʼ República Checaeʼ, tu kaxtaj le libro El conocimiento que lleva a vida eterna. Ka tsʼoʼok u xokikeʼ, tʼaanaj yéetel u j-jaajkunajoʼob Jéeoba yanoʼob teʼ tuʼux kajaʼanoʼ utiaʼal u kʼáatik ka tsʼaʼabak xook tiʼ. Séebaʼan úuchik u káajal u beetik baʼax ku kanik yéetel maʼ xáanchaj ka joʼopʼ u bin tiʼ tuláakal le muchʼtáambaloʼoboʼ. Kex taak u beetkuba jalaʼachil tiʼ u kaajal yéetel ku tsʼoʼokol ku beetik u senadorileʼ, tu yéeyaj u beetik yaanal baʼal: u beetkuba j-kʼaʼaytaj tiʼ le Reinooʼ. Letiʼeʼ tiaʼalaj: «Tsʼoʼok in pʼatik yaʼab jóoʼsaʼaniloʼob tiʼ le j-xookoʼoboʼ». Tu mesil julio tiʼ 2004 okjaʼanaj tiʼ upʼéel u noj muchʼtáambalil óoxpʼéel kʼiinoʼob.
14. 1) ¿Baʼax tsʼoʼok u beetik yaʼab máakoʼob yoʼolal le maʼalob péektsiloʼ? 2) ¿Baʼax kʼáatchiʼob unaj k-beetik?
14 U millonesi máakoʼob tiʼ tuláakal yóokʼol kaabeʼ tsʼoʼok xan u beetkoʼob jeʼex le máakaʼ. Tsʼoʼok u jóoʼloʼob tiʼ le kʼasaʼan yóokʼol kaabaʼ, tsʼoʼok u pʼatkoʼob kʼaakʼas modosoʼob, tsʼoʼok u náachtaloʼob tiʼ u úuchben éet bisbailoʼob yéetel tsʼoʼok u tsʼáaikoʼob juntséelil baʼax u kʼáat u beetoʼob kaʼach teʼ yóokʼol kaabaʼ (San Juan 15:19; Tiʼ Efesoiloʼob 4:22-24; Santiago 4:4; 1 San Juan 2:15-17). ¿Baʼaxten tu beetoʼob lelaʼ? Tumen maas maʼalob utiaʼaloʼob le utsiloʼob ku taasik le Reino tiʼ jeʼel baʼalak jeʼel u tsʼáaik le yóokʼol kaabaʼ. ¿Bey wa xan a wilik le maʼalob péektsiloʼ? ¿Ku péekskech wa a kʼex a kuxtal utiaʼal a beetik baʼax u kʼáat Dios? Wa ka beetkeʼ, yaan a kʼamik yaʼab utsiloʼob bejlaʼeʼ yéetel utiaʼal mantatsʼ.
Táan u tsʼoʼokol le joochoʼ
15. ¿Baʼax aʼalaʼab ken u beet u kaajal Dios teʼ tsʼook kʼiinoʼobaʼ?
15 Le salmistaoʼ kiaʼalik: «A kaajaleʼ ku kʼubikuba tiʼ teech tu kʼiinil le tsʼáanchaʼatajoʼ». Ichil le ku kʼubikubaʼoboʼ tiaʼan le táankelmoʼob beyoʼob le «pʼuul jaʼ ku síijil tiʼ le jaʼatskab kʼiinoʼ» bey xan le «yaʼabkach» koʼoleloʼob ku kʼaʼaytajoʼoboʼ (Salmo 68:11; 110:3). ¿Baʼax utsiloʼob tsʼoʼok u taasik tuláakal le meyaj ku beetik le xiiboʼob yéetel koʼoleloʼob, táankelmoʼob yéetel chʼijaʼanoʼob yanoʼob ichil u kaajal Diosoʼ?
16. ¿Bix u yilaʼal máaxoʼob meyajtik Dioseʼ táan u tsʼáaik u yóoloʼob u yáantoʼob uláakʼ máakoʼob u kʼaj óoltoʼob le Reinooʼ?
16 Teʼ Indiaoʼ utúul x-táanilkunsajeʼ joʼopʼ u tuklik bix jeʼel u yáantaʼal le maas tiʼ dos millonesi kóokoʼob kajaʼanoʼob teʼeloʼ (Isaías 35:5). Letiʼeʼ tu chʼaʼatuklaj u kanik péeksajkʼab tʼaan tiʼ upʼéel u najil xook Bangalore. Teʼeloʼ páajchaj u kʼaʼaytik le Reino tiʼ yaʼab kóokoʼoboʼ yéetel páajchaj u muchʼtal yéetel jujuntúul tiʼ letiʼob utiaʼal u xokoʼob le Bibliaoʼ. Maʼ xáanjieʼ maas tiʼ doce tiʼ letiʼob káaj u binoʼob teʼ muchʼtáambaloʼoboʼ. Tiʼ upʼéel tsʼoʼokol beeleʼ, le kiikaʼ tu kʼaj óoltaj utúul xiʼipal kóok tiʼ u taal Calcutaeʼ, yéetel jach yaʼab baʼax u kʼáat u yojéelt tiʼ Jéeoba. Baʼaleʼ le xiʼipalaʼ kʼaʼabéet kaʼach u suut Calcuta, 1.600 kilómetros pʼaatlil tiʼ Bangalore, utiaʼal u xook universidad, baʼaleʼ teʼeloʼ minaʼan j-jaajkunajoʼob u yojloʼob péeksajkʼab tʼaaniʼ. Utiaʼal maʼ u jáawal u kaambal tiʼ le Bibliaoʼ, letiʼeʼ tu sen kʼáataj tiʼ u taata ka chaʼabak u xook Bangalore, tak ka chaʼab tiʼ. Le xiʼipalaʼ jach séeb úuchik u kaambal, yéetel pʼel máanik u jaʼabeʼ ka okjaʼanaji. Letiʼ xaneʼ tsʼoʼok u yáantik uláakʼ kóokoʼob, ichiloʼobeʼ utúul u yéet líikʼak. Bejlaʼeʼ, u najil meyaj u luʼumil Indiaeʼ táan u yilik u kaʼanal péeksajkʼab tʼaan tumen yaʼab j-táanilkunsajoʼob utiaʼal u yáantoʼob le kóokoʼoboʼ.
Maʼ u xuʼulul k-kaxkeʼex táanil le Reinooʼ
17. ¿Baʼax maʼ tiaʼalaj Jesús tu kettʼaanil le perlaoʼ, yéetel baʼaxten maʼ unaj k-chiʼichnaktaliʼ?
17 Tu kettʼaanil le perlaoʼ, Jesuseʼ maʼ tiaʼalaj bix kun kuxtal le j-koonol ken tsʼoʼokok u konik tuláakal baʼax yantiʼoʼ. Yaan wal máaxeʼ jeʼel u tuklikeʼ: «¿Bix ken u kaxtil u yoʼoch, u nookʼ yéetel tuʼux kun wenel wa tsʼoʼok u pʼáatal mix baʼal yantiʼ? ¿Baʼax túun u beelal le jach maʼalob perla tiʼoʼ?». Yaʼab máakoʼobeʼ jeʼel u beetikoʼob le kʼáatchiʼobaʼ, baʼaleʼ Jesuseʼ tiaʼalaj tiʼ u j-tsaypachoʼob: «Kaxteʼex táanil u [reino] Jajal Dios yéetel le toj kuxtal uts tu tʼaan letiʼoʼ, tuláakal túun le baʼaloʼobaʼ bíin tsʼaʼabak teʼex xan» (San Mateo 6:31-33). Le kettʼaanaʼ jach táan u kaʼansiktoʼoneʼ kʼaʼabéet kʼubik k-óol meyajt Dios yéetel kʼaʼabéet kʼubik k-óol kaxt le Reinooʼ. ¿Táan wa k-chʼaʼanuʼuktik le baʼax ku kaʼanskoʼ?
18. ¿Baʼax ku jach kaʼansiktoʼon u kettʼaanil le perla jach yaan u tojloʼ?
18 Kex wa maʼ úuch k-kʼaj óol u jaajil bey xan wa tsʼoʼok yaʼab jaʼaboʼob joʼopʼok k-kaxtik le Reino yéetel k-kʼaʼaytik le utsiloʼob ken u taasoʼ, maʼ unaj u jáawal k-kaxkiʼ. Kex táan k-máansik talam kʼiinoʼobeʼ, le baʼax táan k-ilik tiaʼalintkoʼ jach tu jaajil yaan yéetel maʼ tu páajtal u keʼetel yéetel mix baʼal, bey jeʼex le perla tu kaxtaj le j-koonoloʼ. Le baʼaloʼob ku yúuchloʼoboʼ yéetel le profecíaʼob táan u béeytaloʼoboʼ, ku yeʼesik jach tu jaajil kuxaʼanoʼon tu tsʼook kʼiinoʼob (San Mateo 24:3). Le oʼolaleʼ, koʼoneʼex beetik jeʼex le j-koonoloʼ, koʼoneʼex kaxtik yéetel u jaajil k-óol le Reinooʼ yéetel kiʼimakchajak k-óoleʼex yoʼolal le jach maʼalob meyaj tsʼaʼantoʼonoʼ: ¡k-kʼaʼaytik le maʼalob péektsiloʼ! (Salmo 9:1, 2).
¿Kʼajaʼan wa tech?
• ¿Baʼax beetik u maas yaʼabtal máaxoʼob ku yookloʼob ichil u kaajal Dios?
• ¿Baʼax ku tuklik le misioneroʼob yoʼolal le meyaj ku beetkoʼoboʼ?
• ¿Baʼax kʼeexiloʼob tsʼoʼok u beetik yaʼab máakoʼob ken u yuʼuboʼob u maʼalob péektsilil le Reinooʼ?
• ¿Baʼax ku jach kaʼansiktoʼon u kettʼaanil le perla jach yaan u tojloʼ?
[U kʼáatchiʼiloʼob le xookoʼ]
[U tsolajil le oochel teʼ táan juʼun 22]
«Le u jaajiloʼ ku natsʼik tuláakal u jejeláasil máakoʼob.» A. H. Macmillan
[U tsolajil le oochel teʼ táan juʼun 23]
Daniela yéetel Helmut táan u kʼaʼaytajoʼob tiʼ máakoʼob tiʼ uláakʼ luʼumoʼob kajaʼanoʼob Viena
[U tsolajil le oochel teʼ táan juʼun 24]
Jeʼex le j-koonoloʼ, le misioneroʼob bejlaʼoʼ ku kʼamkoʼob yaʼab utsiloʼob
[U tsolajil le oochel teʼ táan juʼun 25]
«A kaajaleʼ ku kʼubikuba tiʼ teech»