Jéeobaeʼ mix utéen ku beetik baʼax kʼaas

«[Jéeoba] le Yuumtsiloʼ toj tiʼ tuláakal u beeloʼob.» (SALMO 145:17.)

1. ¿Bix k-uʼuyikba ken tuklaʼak upʼéel baʼal maʼ jaaj t-oʼolaliʼ, yéetel baʼax ku kaʼansiktoʼon lelaʼ?

¿YAAN wa baʼax maʼ jaaj tsʼoʼok u tuklaʼal ta woʼolaliʼ? Maʼ xaaneʼ, aʼalaʼab maʼ maʼalob baʼax ka beetkiʼ wa maʼ maʼalob baʼax oʼolal táan a beetkiʼ, kex maʼ jaajiʼ. Wa beyoʼ, maʼ xaaneʼ yaachaj a wóol, yéetel ku naʼataʼal baʼaxten ta wuʼuyaba beyoʼ. Lelaʼ ku kaʼansiktoʼon upʼéel baʼal jach jaaj: maʼ maʼalob ka k-aʼal upʼéel baʼal wa maʼ k-ojel jach bix úuchikiʼ.

2, 3. Yaneeʼ, ¿baʼax ku tuklik ken u xok teʼ Biblia baʼaloʼob chan talam u naʼataʼal tumen maʼ láaj tsʼíibaʼan baʼax uchaʼaniʼ, baʼaleʼ baʼax kiaʼalik le Biblia tu yoʼolal Jéeobaoʼ?

² Lelaʼ maʼalob ka k-kʼaʼajs ken joʼopʼok k-tuklik baʼax oʼolal tu beetaj Dios upʼéel wa baʼax. ¿Baʼaxten? Tumen yaan baʼaxoʼob kiaʼalik le Bibliaoʼ ken k-jáan xokeʼ maʼ xaaneʼ jeʼel u xaʼakʼbesik k-tuukuleʼ. Maʼ xaaneʼ ku tʼaan tiʼ le baʼaxoʼob tu beetaj le máaxoʼob meyajtik Dios wa tiʼ le baʼaxoʼob tu beetaj Jéeoba úuchiloʼ, baʼaleʼ maʼ láaj tsʼíibtaʼan baʼax uchaʼaniʼ, le oʼolal ku talamtal k-naʼatik tubeel. Yaan máaxeʼ tu yoʼolal lelaʼ ku jáan aʼalikeʼ maʼ maʼalob baʼax tu beetaj Diosiʼ. Baʼaleʼ, le Bibliaoʼ kiaʼalikeʼ Jéeobaeʼ «uts tiʼ tuláakal baʼax ku beetik» (Salmo 145:17). Le Bibliaoʼ kiaʼalik xaneʼ Dioseʼ «maʼatech u beetik mix baʼal kʼaas» (Job 34:12; Salmo 37:28). Chéen tukle, ¿bix u yuʼubkuba Jéeoba ken tuklaʼak upʼéel baʼal maʼ jaaj tu yoʼolaliʼ?

³ Koʼoneʼex ilik cinco baʼaloʼob eʼesik maʼ unaj k-tuukul kʼaas tu yoʼolal Jéeobaiʼ. Ku tsʼoʼokol túuneʼ, yaan k-ilik kaʼapʼéel tsikbaliloʼob, maʼ xaaneʼ, chan talam u naʼataʼaloʼob.

Baʼaxten maʼ unaj k-tuukul kʼaas tu yoʼolal Jéeobaiʼ

4. ¿Baʼaxten maʼ maʼalob ka tʼaanakoʼon tu contra baʼax u beetmaj Jéeobaiʼ? Ketej.

⁴ Yáaxeʼ, chéen Jéeoba u yojel jach bix uchaʼanik upʼéel baʼal, le oʼolal maʼ maʼalob ka tʼaanakoʼon tu contra baʼax u beetmiʼ. Koʼox aʼalikeʼ, utúul juez jach toj u pʼis óoleʼ ku yaʼalik bix kun tsʼoʼokol upʼéel juicio. ¿Baʼax jeʼel k-tuklik wa utúul máak, kex maʼ u yojel jach baʼax uchaʼan wa maʼ u yojel baʼax leyoʼob táakpajaʼanoʼobeʼ, ku káajal u tʼaan tu contra le juezoʼ? ¿Máasaʼ maʼ maʼalob ka tʼaanak máak tu yoʼolal upʼéel baʼal wa maʼ u yojel jach bix úuchikiʼ? (Proverbios 18:13.) Lelaʼ kieʼesikeʼ, toʼon chéen kʼeban wíinkoʼoneʼ, ¡maas jach maʼ maʼalob ka tʼaanakoʼon tu contra u Juezil tuláakal yóokʼol kaabiʼ! (Génesis 18:25).

5. Ken k-xok teʼ Biblia bix úuchik u pʼis óoltaʼal jujuntúul máakoʼob tumen Jéeobaeʼ, ¿baʼax kʼaʼabéet kʼaʼajsik?

⁵ U kaʼapʼéeleʼ, Jéeobaeʼ u yojel baʼax yaan tu puksiʼikʼal máak (1 Samuel 16:7). U Tʼaaneʼ kiaʼalik: «Teen Yuumtsileʼ, kin xakʼal ilik le puksiʼikʼaloʼ[,] in kʼaj óol tak u tsʼuʼ le tuukuloʼ; máax tsʼáaik tiʼ jujuntúul baʼax ku náajmatik, [yoʼolal] baʼaxoʼob tu beetaj» (Jeremías 17:10). Le oʼolaleʼ, ken k-xok teʼ Biblia bix úuchik u pʼis óoltaʼal jujuntúul máakoʼob tumen Jéeobaeʼ, maʼ u tuʼubul toʼoneʼ letiʼeʼ ku yilik tuláakal, tu yilaj tak baʼax yaan tu taamil u puksiʼikʼaloʼob, kex maʼ tsʼíibtaʼab teʼ Bibliaoʼ (1 Crónicas 28:9).

6, 7. 1) Jéeobaeʼ, ¿bix tsʼoʼok u yeʼesik maʼatech u kʼéechel tiʼ u ley, kex ka u taas yajil tiʼ? 2) Wa k-xokik teʼ Biblia upʼéel baʼal ku beetik k-tuklik maʼ maʼalob baʼax tu beetaj Dioseʼ, ¿baʼax unaj kʼaʼajsik?

 ⁶ U yóoxpʼéel baʼaxten maʼ maʼalob ka tuukulnakoʼon kʼaas tu contra Jéeobaeʼ letiʼ lelaʼ: maʼatech u jóokʼol tiʼ baʼax kiaʼalik u ley, kex ka u taas yajil tiʼ u puksiʼikʼal. Jeʼex ka tu túuxtaj u Paal kíimil utiaʼal u jáalkʼabtik wíinik tiʼ le kʼeban yéetel tiʼ le kíimiloʼ, Jéeobaeʼ tu tsʼoʼokbesaj u leyoʼob (Tiʼ Romailoʼob 5:18, 19). Bukaʼaj wal muʼyajnajik úuchik u yilik u kíimil u kiʼichkelem Iijo tiʼ upʼéel cheʼiʼ. Lelaʼ, ¿baʼax ku kaʼansiktoʼon tiʼ letiʼ? Ka tʼaanaj tiʼ bix jáalkʼabtaʼabikoʼon tumen Cristoeʼ, Pabloeʼ tiaʼaleʼ Dioseʼ tu beetaj «utiaʼal u yeʼesik u tojil» (Tiʼ Romailoʼob 3:24-26). Uláakʼ Bibliaeʼ bey u sutik le tekstoaʼ: «Utiaʼal u yeʼesik mantatsʼ ku beetik baʼax toj» (La Palabra de Dios para todos, 2001). Jach beyoʼ, le baʼax tu beetaj Jéeoba utiaʼal u tokikoʼon tiʼ le kʼeban yéetel tiʼ le kíimiloʼ ku yeʼesik u yojel baʼax toj yéetel maʼ tu kʼéechel tiʼ.

⁷ Le oʼolaleʼ, wa k-xokik teʼ Biblia upʼéel baʼal ku beetik k-tuklik maʼ maʼalob baʼax tu beetaj Dioseʼ, kʼaʼabéet kʼaʼajsik lelaʼ: tumen mix utéen ku kʼéechel tiʼ u leyoʼob jach tojtakeʼ, maʼ tu tokaj mix tak u Paal tiʼ upʼéel yaayaj kíimliʼ. Le oʼolaleʼ, ¿bix jeʼel u tsʼáaik juntséelil u leyoʼob tiʼ uláakʼ baʼaloʼobeʼ? U jaajileʼ, jach mix utéen ku kʼéechel tiʼ u toj leyoʼob. Le beetikeʼ, mix utéen kʼaʼabéet k-tuklik wa Jéeobaeʼ ku beetik baʼax maʼ tojiʼ (Job 37:23).

8. ¿Baʼaxten maʼ tu páajtal k-aʼalik maʼ maʼalob baʼax ku beetik Diosiʼ?

⁸ U kampʼéel baʼax oʼolal maʼ maʼalob ka tuukulnakoʼon kʼaas tu yoʼolal Jéeobaeʼ letiʼ lelaʼ: tu beetaj wíinik jeʼel bix letiʼeʼ (Génesis 1:27). Tu beetaj yéetel u páajtalil u yeʼesik u jatsʼuts modos yéetel u beetik jeʼex letiʼeʼ, jeʼex le u beetik baʼax tojoʼ. Le oʼolaleʼ, wa toʼon yaan u tuukulil k-beetik baʼax tojeʼ, maʼ tu páajtal k-aʼalik wa tiʼ Dioseʼ minaʼan. Wa yaan baʼax k-xokik teʼ Biblia maʼ t-naʼatik tubeeleʼ, kʼaʼajaktoʼoneʼ, tumen kʼeban wíinikoʼoneʼ, toʼon kʼeechel k-beeloʼob maʼ Jéeobaiʼ; letiʼeʼ toj tuláakal u beeloʼob, toʼon chíikaʼanoʼon tiʼ letiʼ, maʼ letiʼ tiʼ toʼoniʼ (Deuteronomio 32:4). Le oʼolaleʼ, bix ken k-aʼal maas toj baʼax k-beetik tiʼ Dios (Tiʼ Romailoʼob 3:4, 5; 9:14).

9, 10. Jéeobaeʼ, ¿baʼaxten maʼ tsaaj ka u yaʼal tiʼ wíinikoʼob baʼax ku beetkiʼ mix baʼaxten ku beetkiʼ?

⁹ U tsʼookeʼ, Jéeobaeʼ chéen letiʼ «sen kaʼanal tu yóokʼol tuláakal le luʼumoʼ», le oʼolal maʼ maʼalob ka tuukulnakoʼon kʼaas tu yoʼolaliʼ (Salmo 83:18). Maʼ tsaaj ka u yaʼal tiʼ  wíinikoʼob baʼax ku beetkiʼ mix baʼaxten ku beetkiʼ. Jéeobaeʼ letiʼ le Noj pat kʼatoʼ, toʼoneʼ kʼatoʼon yéetel jeʼel u beetik jeʼel baʼalak u kʼáat t-éeteleʼ (Tiʼ Romailoʼob 9:19-21). Bey letiʼ beetmailoʼonoʼ, ¿máaxoʼon toʼon utiaʼal k-aʼalik maʼ maʼalob baʼax ku beetkiʼ? Ka tu tuklaj Job maʼ maʼalob baʼax ku beetik Dioseʼ, Jéeobaeʼ tu yutskíintaj u tuukul Job yéetel le kʼáatchiʼaʼ: «¿Táan a tukultik a waʼalik maʼ tubeel baʼax kin beetik [...], utiaʼal [u] chíikpajal minaʼan a siʼipil?» Ka tu yilaj Job maʼ maʼalob baʼax ku yaʼalikeʼ tu kʼexaj bix u tuukul (Job 40:8; 42:6). Le oʼolaleʼ, mix utéen kʼaʼabéet tʼaan kʼaas tu yoʼolal Jéeoba.

¹⁰ K-ilik túuneʼ, jach yaan baʼax oʼolal k-oksaj óoltik Jéeobaeʼ mantatsʼ ku beetik baʼax toj. Beora tsʼoʼok k-naʼatik lelaʼ, koʼoneʼex tʼaan tiʼ kaʼapʼéel tsikbaloʼob yaan teʼ Biblia, maʼ xaaneʼ ku beetik u xaʼakʼpajal u tuukul jujuntúuliʼ. Le yáaxoʼ yaan yil yéetel upʼéel baʼax tu beetaj utúul u palitsil Dios, uláakʼoʼ tiʼ upʼéel pʼis óol tu beetaj Jéeoba.

Baʼaxten tiaʼalaj Lot u tsʼáaik u iijas

11, 12. 1) Tsol baʼax úuch ka túuxtaʼab kaʼatúul angeloʼob tu kaajil Sodoma. 2) ¿Baʼaxoʼob tsʼoʼok u tuklaʼal tu yoʼolal lelaʼ?

¹¹ Génesis capítulo 19 ku tsolik baʼax úuch ka tu túuxtaj Dios kaʼatúul angeloʼob tu kaajil Sodoma. Loteʼ tu yaayamtaj ka u máansoʼob áakʼab tu yotoch. Baʼaleʼ, teʼ áakʼab jeʼeloʼ, u múuchʼ tiʼ u xiibiloʼob le kaajoʼ tu baʼpachtoʼob u yotoch Lot, ka joʼopʼ u kʼáatkoʼob ka jóoʼsaʼak le uʼulaboʼob utiaʼal ka chilakoʼob tu yéeteloʼoboʼ. Loteʼ tioʼotaj tʼaan tu yéeteloʼob, baʼaleʼ maʼ tu chaʼajoʼobiʼ. Utiaʼal túun maʼ u beetaʼal mix baʼal tiʼ u yuʼulaboʼobeʼ, tiaʼalaj tiʼe máakoʼoboʼ: «Kin kʼáat óoltik teʼex in wéet kaajaleʼex: bik a beeteʼex jumpʼéel baʼal talam kʼaas. Teneʼ yaan kaʼatúul in x-chʼupul paalal maʼ u yokesmubaʼob yéetel mix utúul xiibiʼ; in kaʼaj in jóokʼesoʼob utiaʼal ka a beeteʼex tu yéeteloʼob jeʼel baʼalak a kʼáateʼexeʼ, baʼaleʼ maʼ a beetikeʼex mix baʼal tiʼ le máakoʼobaʼ tumen in wuʼula[boʼob]». Le máakoʼoboʼ maʼ tu yuʼuboʼob u tʼaaniʼ, baʼaxeʼ óolak tak u puloʼob u joonai le najoʼ. Le angeloʼob túunoʼ tu beetoʼob u chʼóoptal le máakoʼob pʼujaʼanoʼobaʼ (Génesis 19:1-11).

¹² Le tsikbal jeʼelaʼ tsʼoʼok u beetik u tuklaʼal baʼaloʼob jeʼex lelaʼ: «¿Bix táabik Lot u yaʼal u tsʼáaik u iijas tiʼ kʼaakʼas máakoʼob utiaʼal u kanáantik u yuʼulaboʼob? ¿Maʼ wa kʼaas baʼax tiaʼalaj u beetkiʼ? ¿Maʼ wa yoʼolal u saajkil tiaʼaliʼ?». Yoʼolal lelaʼ, ¿baʼaxten Dioseʼ tu beetaj u tsʼíibtaʼal tumen Pedro, Loteʼ «utúul utsil máak»? ¿U kʼáat wa túun yaʼal kʼambeʼen tu táan Dios le baʼax tiaʼalaj u beetkoʼ? (2 San Pedro 2:7, 8.) Koʼoneʼex ilik jujumpʼéel baʼal jeʼel u yáankoʼon utiaʼal maʼ k-naʼatik jelaʼan le xookaʼ.

13, 14. 1) ¿Baʼax maʼatech u yaʼalik le Biblia yoʼolal le baʼax tu beetaj Lotoʼ? 2) ¿Bix k-ojéeltik maʼ yoʼolal saajkil tu beetiʼ?

¹³ Yáaxeʼ, le Bibliaoʼ chéen kiaʼalik baʼax úuchi, maʼatech u yaʼalik wa maʼalob bey xan wa maʼ maʼalob baʼax tu beetaj Lotiʼ. Maʼatech xan u yaʼalik baʼax tu tuklaj Lot, mix baʼax oʼolal tiaʼalaj u tsʼáaik u iijas. Ken líiʼsaʼakeʼ, maʼ xaaneʼ tiʼ ken u tsikbaltoʼon jach baʼax úuchiʼ (Beetaʼanoʼob [Hechos] 24:15).

¹⁴ Lot xaneʼ maʼ utúul sajak máakiʼ. Jach talam baʼax tu aktáantaj. Ka tiaʼalaj tu yoʼolal le angeloʼob «in wuʼula[boʼob]», tu tsʼáaj naʼatbileʼ kʼaʼabéet u kanáantikoʼob. Baʼaleʼ lelaʼ maʼ chéen chʼaʼabiliʼ. Josefo, utúul judío tu tsʼíibtaj baʼaxoʼob uchaʼantakeʼ, tiaʼaleʼ le sodomailoʼoboʼ «jach kʼasaʼanoʼob kaʼach tiʼ u yéet wíinikiloʼob yéetel maʼ tu yeʼeskoʼob tsiikil tiʼ Dios [...]; jach u pʼekmoʼob le uʼulaboʼoboʼ yéetel jach kʼaas baʼax ku beetkoʼob». Baʼaleʼ Loteʼ maʼ tu chʼaʼaj saajkil tiʼobiʼ. Kex jach pʼujaʼan le máakoʼoboʼ jóokʼ tʼaan tu yéeteloʼob, ka tak «tu kʼalaj maʼalob le jool naj tu paachoʼ» (Génesis 19:6).

15. ¿Baʼaxten k-aʼalik maʼ xaan yoʼolal u yoksaj óolal tiaʼalaj u tsʼáaik u iijas Lotiʼ?

¹⁵ Maʼ xaaneʼ, yaan máax jeʼel u yaʼalikeʼ:  «Kex beyoʼ, ¿baʼaxten tiaʼalaj Lot u tsʼáaik u iijas?» Táanil tiʼ k-aʼalik maʼ maʼalob baʼax tu beeteʼ, koʼoneʼex ilik baʼax oʼolal maʼ xaan tiaʼalaj u beetkiʼ. Yáaxeʼ, maʼ xaaneʼ Loteʼ tu beetaj yoʼolal u yoksaj óolal. ¿Baʼaxten k-aʼalik lelaʼ? Letiʼeʼ u yojel bix kanáantaʼabik Sara, u yatan Abraham, u tío. Tumen Sara jach kiʼichpaneʼ, Abrahameʼ tu kʼáataj tiʼ Sara ka u yaʼal letiʼeʼ u sukuʼun, utiaʼal maʼ u kíimsaʼal ka toʼokok Sara tiʼ. * Upʼéel kʼiineʼ bisaʼab Sara tu yotoch Faraón, baʼaleʼ kanáantaʼab tumen Jéeoba utiaʼal maʼ u beetaʼal mix baʼal tiʼ tumen Faraón (Génesis 12:11-20). Maʼ xaaneʼ, Loteʼ tu yoksaj óoltaj jeʼel xan u kanáantaʼal u iijaseʼ. U jaajileʼ, Jéeobaeʼ tu kanáantaj u iijas Lot, tumen maʼ úuch mix baʼal tiʼob yoʼolal baʼax tu beetaj le angeloʼoboʼ.

16, 17. 1) ¿Baʼaxten k-aʼalik Loteʼ, maʼ xaaneʼ, tu yóotaj u beet u bin le máakoʼoboʼ wa tu yóotaj u beet u baʼateloʼob tu baatsiloʼob? 2) Yoʼolal jeʼel baʼaxakeʼ, ¿baʼax k-ojel?

¹⁶ Maʼ xaan xaneʼ, Loteʼ tu yóotaj u beet u bin le máakoʼoboʼ wa tu yóotaj u beet u baʼateloʼob tu baatsiloʼob. Maʼ xaaneʼ, tu tukleʼ maʼ kun óotbil u iijas, tumen le sodomailoʼoboʼ xiib ku kaxkoʼob (San Judas 7). Tsʼoʼoleʼ, tumen u iijas u núukmaj u tsʼoʼokol u beeloʼob yéetel kaʼatúul máak tiʼ le kaajoʼ, maʼ xaaneʼ ichil le máakoʼobaʼ yaan láakʼtsiloʼob wa amigoʼob tiʼ le máaxoʼob tʼanik u iijasoʼ (Génesis 19:14). Lot túuneʼ, maʼ xaaneʼ tu tukleʼ jeʼel u yantal máax baʼateʼel tu yoʼolaloʼobeʼ, yéetel wa ku jatsik le máakoʼobaʼ, maas maʼ tu jáan beetkoʼob loob. *

¹⁷ Yoʼolal jeʼel baʼaxak tu yaʼalaj Lot u tsʼáaik u iijaseʼ, k-ojel upʼéel baʼal: tumen Jéeoba ku beetik mantatsʼ baʼax tojeʼ, u yojel baʼaxten tiaʼalaj Loteʼ «utúul utsil máak». Yoʼolal xan baʼax taak u beetik kaʼach le kʼasaʼan sodomailoʼoboʼ, ¿jeʼel wa u páajtal k-aʼalik kʼasaʼan Dios úuchik u xuʼulsik tiʼobeʼ? (Génesis 19:23-25).

Baʼaxten luʼsaʼab u kuxtal Uza tumen Jéeoba

18. 1) ¿Baʼax úuch ka tu yóotaj David u bis le Baʼascheʼ tu kaajil Jerusalenoʼ? 2) ¿Baʼax jeʼel u beetik u tuklaʼal le baʼax úuch tiʼ Uzaoʼ?

¹⁸ Uláakʼ tsikbal chan talmeʼ letiʼe ku tʼaan tiʼ bix úuchik u bisaʼal u Baʼascheʼi le Núuptʼaan tu kaajil Jerusalén tumen Davidoʼ. Utiaʼal lelaʼ, naʼaksaʼab tiʼ upʼéel carreta táan u nuʼuktaʼal tumen Uza yéetel u sukuʼun. Le Bibliaoʼ kiaʼalik: «Le kaʼaj kʼuchoʼob tiʼ le kúuchil ku kʼaabaʼintaʼal u tʼoʼolol u Era Naconoʼ, Uzaeʼ, tu tichʼaj u kʼab utiaʼal u machik u baʼascheʼ [Dios] tumen j-tʼóochpaj le wakaxoʼoboʼ. Baʼaleʼ Yuumtsileʼ, j-pʼuʼuj tu yoʼolal maʼachik u baʼascheʼ tumen [Uza], ka tu kíimsaj teʼeloʼ, Uzaeʼ j-lúub kimen tu tséel u baʼascheʼ [Dios]». Maʼ úuch tiʼ leloʼoʼ, bisaʼab u Baʼascheʼoʼ, baʼaleʼ maʼ úuch mix baʼaliʼ, tumen kuchaʼab bisbil tumen le coatitaʼob, jeʼex u yaʼalmil Jéeobaoʼ (2 Samuel 6:6, 7; Números 4:15; 7:9; 1 Crónicas 15:1-14). Maʼ xaaneʼ, yaan máaxeʼ jeʼel u yaʼalikeʼ: «¿Baʼaxten jach  nojoch castigartaʼabik Uza? Letiʼeʼ chéen táan kaʼach u kanáantik maʼ u lúubul le Baʼascheʼoʼ». Koʼoneʼex ilik jujumpʼéel baʼal utiaʼal maʼ k-tuklik yaanal baʼal yoʼolal lelaʼ.

19. ¿Baʼaxten k-aʼalik Jéeobaeʼ mix utéen ku beetik baʼax kʼaas?

¹⁹ Maʼ u tuʼubultoʼoneʼ, Jéeobaeʼ mix utéen ku beetik baʼax kʼaas (Job 34:10). Wa ka u beeteʼ, minaʼan yaabilaj tiʼ, baʼaleʼ teʼ Bibliaoʼ tsʼoʼok kankeʼ «Jajal Dioseʼ yaakunaj» (1 Juan 4:8). Le Biblia xanoʼ kiaʼalik tu yoʼolal Dios: «A jalach kʼáan[cheʼiʼ] jejetsʼkil yanil tiʼ pʼis óolal yéetel tiʼ tojil» (Salmo 89:14). Le oʼolaleʼ, ¿bix jeʼel u beetik Jéeoba upʼéel baʼal maʼ maʼalobeʼ? Wa ka u beeteʼ, bey ka u páan tuʼux etsʼekba u jalaʼach kʼáancheʼiʼ.

20. ¿Baʼaxten k-aʼalikeʼ Uzaeʼ u yojel baʼax kiaʼalik le Ley yoʼolal u Baʼascheʼi le Núuptʼaanoʼ?

²⁰ Kʼaʼajak toʼoneʼ Uzaeʼ u yojel baʼax kiaʼalik u Ley Dios. Kʼaʼabéet kʼaʼajskeʼ, teʼ tu Baʼascheʼi le Núup tʼaanoʼ bey tiʼ ku yantal Jéeobaeʼ. Le Leyoʼ kiaʼalik maʼ unaj u maʼachal tumen máax maʼ chaʼabaʼan tiʼiʼ, yéetel kiaʼalikeʼ le máax kun machik maʼ chaʼabaʼan tiʼeʼ yaan u kíimil (Números 4:18-20; 7:89). Le oʼolaleʼ, maʼ chéen upʼéel báaxal u bisaʼal le kiliʼich baʼascheʼoʼ. Kex Uza maʼ utúul sacerdoteiʼ, baʼaleʼ mi utúul levita kaʼachiʼ, le oʼolal k-tuklik jach yojel baʼax kiaʼalik le Leyoʼ. U Baʼascheʼi le Núuptʼaan xanoʼ bisaʼab tu yotoch u taata utiaʼal kanáantbiliʼ yéetel tu beetaj setenta jaʼaboʼob teʼeloʼ, tak ka tuklaʼab u luʼsaʼal tumen Davidiʼ (1 Samuel 6:20–7:1). Le oʼolal maʼ xaaneʼ, Uzaeʼ u yojel le Leyoʼ kiaʼalik maʼ jeʼel máaxak jeʼel u páajtal u machik u Baʼascheʼi le Núuptʼaanoʼ.

21. Ken k-xok baʼax úuch tiʼ Uzaeʼ, ¿baʼaxten maʼalob ka k-kʼaʼajs Jéeobaeʼ ku yilik baʼax yaan tu puksiʼikʼal máak?

²¹ Jeʼex tsʼoʼok k-aʼalikoʼ, Jéeobaeʼ u yojel baʼax yaan tu puksiʼikʼal máak. Le Bibliaoʼ kiaʼalikeʼ Uzaeʼ «maʼ tu yeʼesaj tsiikiliʼ», le oʼolaleʼ maʼ xaaneʼ Jéeobaeʼ tu yilaj yaan baʼax kʼaas tu puksiʼikʼal, kex maʼ tiaʼalaʼal teʼ Bibliaoʼ (2 Samuel 6:7, NM). Maʼ xaaneʼ suuk u beetik baʼaloʼob maʼ tiʼ letiʼ tsʼaʼan u páajtalil u beetkiʼ (Proverbios 11:2). Maʼ xaaneʼ, ku yuʼubkuba noj baʼalil tumen letiʼ bisik u Baʼascheʼi le Núup tʼaan kanáantaʼab tu najil u taataoʼ (Proverbios 11:2). Maʼ xaan xaneʼeʼ, maʼ tu yoksaj óoltaj wa Jéeoba jeʼel u páajtal u tichʼik u kʼab utiaʼal maʼ u lúubul u Baʼascheʼi le Núup tʼaan tuʼux tiaʼalaj tiʼ kun antal letiʼoʼ. Jeʼel bixakeʼ, k-ojel Jéeobaeʼ tu beetaj baʼax toj. Maʼ xaaneʼ, tu yilaj yaan baʼax kʼaas tu puksiʼikʼal Uza, le oʼolal tu luʼsaj u kuxtal tu séebaʼanil (Proverbios 21:2).

Mix utéen kʼaʼabéet k-tuukul kʼaas tu yoʼolal Jéeoba

22. ¿Bix u yilaʼal u nojchil u naʼat Jéeoba ikil yaan kʼiineʼ u Tʼaaneʼ maʼ tu láaj tsolik baʼax uchaʼan?

²² U sen nojchil u naʼat Jéeobaeʼ ku yilaʼal tumen yaan kʼiineʼ u Tʼaaneʼ maʼ tu láaj tsolik baʼax úuchi, lelaʼ ku tsʼáaik tuʼux k-eʼesik wa yaan k-oksaj óoltik wa tu beetaj baʼax toj. Tuláakal le baʼax tsʼoʼok k-xokikaʼ, ¿máasaʼ ku yeʼesiktoʼon mix utéen kʼaʼabéet k-tuukul kʼaas tu yoʼolal Jéeoba? Ken k-xok le Biblia yéetel ken k-il naʼatik tubeeleʼ, k-ilik yaʼab baʼaxoʼob eʼesikeʼ Jéeobaeʼ mantatsʼ ku beetik baʼax toj. Le oʼolaleʼ, wa yaan baʼax k-xokik teʼ Biblia maʼ tu páajtal k-jáan naʼatik tubeeleʼ wa xan ku beetik k-tuklik baʼaloʼob maʼ tu páajtal k-jáan núukikeʼ, mix utéen kʼaʼabéet k-tuklik maʼ maʼalob baʼax tu beetaj Diosiʼ.

23. ¿Baʼax jeʼel u páajtal k-oksaj óoltik tiʼ baʼax ken u beet Dioseʼ?

²³ Maʼ kʼaʼabéet xan k-chʼaʼik saajkil tiʼ baʼax ken u beet Dios ichil upʼíit kʼiiniʼ. Ken u xuʼuls tiʼ le j-kʼasaʼanoʼob maʼ kun xáantaloʼ, yaan u kanáantik le j-tojoʼoboʼ, tumen u yaabilmaj baʼax toj yéetel baʼax uts (Génesis 18:23). Jeʼel xan u páajtal k-oksaj óoltikeʼ, teʼ túumben yóokʼol kaaboʼ yaan u tsʼáaiktoʼon tuláakal baʼax kʼaʼabéettoʼon (Salmo 145:16).

[Tsolajiloʼob]

¿Kʼajaʼan wa tech?

• ¿Baʼaxoʼob eʼesik maʼ unaj k-tuukul kʼaas tu yoʼolal Jéeobaiʼ?

• ¿Baʼax jeʼel u yáantkoʼon utiaʼal maʼ k-tuukul jelaʼan tiʼ úuchik u yaʼalik Lot u tsʼáaik u iijas tiʼ le múuchʼ máakoʼob pʼujaʼanoʼoboʼ?

• ¿Baʼax jeʼel u yáantoʼon k-naʼat baʼaxten Jéeobaeʼ tu luʼsaj u kuxtal Uza tu séebaʼanil?

• ¿Baʼax jeʼel u páajtal k-oksaj óoltik tiʼ baʼax ken u beet Dios maʼ kun xáantaleʼ?

[U kʼáatchiʼiloʼob le xookoʼ]