Kʼaʼabéet k-kanáantikba utiaʼal maʼ u xuʼulul k-eʼesik u jaajil cristianoʼon
Kʼaʼabéet k-kanáantikba utiaʼal maʼ u xuʼulul k-eʼesik u jaajil cristianoʼon
«Yuumtsileʼ ku yaʼalik: Teʼexeʼ in j-jaajkunajeʼex.» (ISAÍAS 43:10.)
1. ¿Máaxoʼob ku natsʼik Jéeoba tu yiknal?
KEN paakatnakoʼon t-baʼpaach teʼ Najil Reinooʼ, ¿máaxoʼob k-ilik? Maʼ xaaneʼ, k-ilik táankelem paalaloʼob tu jaajil u yóoloʼob táan u beetkoʼob baʼax kiaʼalik le Bibliaoʼ (Salmo 148:12, 13), taatatsiloʼob táan u yilik u yáantik u familiaʼob u meyajtoʼob Dios teʼ yóokʼol kaab tuʼux yaʼab taatatsiloʼobeʼ maʼatech u beetkoʼob beyoʼ yéetel sukuʼunoʼob tsʼoʼok u yantal u jaʼabiloʼob, baʼaleʼ táan u chúukpajal u yóoloʼob u meyajtoʼob Jéeoba kex kʼojaʼanoʼob (Proverbios 16:31). Tuláakloʼob u yaabiltmoʼob Jéeoba tu jaajil u yóoloʼob, Jéeoba xaneʼ tsʼoʼok u natsʼkoʼob tu yiknal. Jesuseʼ tiaʼalaj: «Mix máak ku páajtal u taal tiʼ teen wa maʼ tu taasaʼal tumen le Taata[oʼ]» (San Juan 6:37, 44, 65).
2, 3. ¿Baʼaxten maʼ chéen chʼaʼabil k-eʼesik u jaajil cristianoʼoniʼ?
2 ¿Máasaʼ kiʼimak k-óol ikil anikoʼon ichil upʼéel kaaj ku kʼamik u yutsil Jéeoba? Baʼaleʼ, teʼ tsʼook kʼiinoʼobaʼ yaʼab baʼaloʼob talamkúuntik k-eʼesik u jaajil cristianoʼon (2 tiʼ Timoteo 3:1). Lelaʼ, maas jach talam utiaʼal le táankelem paalal ku líiʼsaʼaloʼob ichil u jaajiloʼ. Utúul tiʼ letiʼobeʼ kiaʼalik: «Kin bin kaʼach teʼ muchʼtáambaloʼoboʼ, baʼaleʼ minaʼanten u tuukulil in maas meyajtik Dios kaʼachi, yéetel u jaajileʼ, maʼ tin wuʼuyik kaʼach wa jach tu jaajil in kʼáat in beete».
3 Yaan táankelem paalaleʼ, kex taak u beetkoʼob baʼax u kʼáat Dioseʼ, jeʼel u náachtaloʼob tiʼ letiʼ wa ku chaʼik u túulchʼintaʼal u beetoʼob baʼax maʼ maʼalobeʼ, wa ku chaʼik u kʼaskúuntaʼal u tuukuloʼob bey xan wa ku lúubloʼob tiʼ u tsʼíibolal u bakʼeloʼob. Wa táan k-túulchʼintaʼal k-beet baʼax maʼ maʼalobeʼ, jujumpʼíitileʼ jeʼel u tuʼubultoʼon wa u jaajil cristianoʼoneʼ. Yaʼab máakoʼobeʼ ku tuklikoʼobeʼ le baʼax kiaʼalik le Bibliaoʼ jach úuchben, yéetel maʼ patal utiaʼal u nuʼuktik u kuxtal máak bejlaʼeʼ (1 San Pedro 4:4). Yaan xan máaxeʼ kiaʼalikeʼ maʼ tsaaj ka k-meyajt Dios jach jeʼex u kʼatoʼ (San Juan 4:24). Pabloeʼ tiaʼaleʼ u máakiloʼob le yóokʼol kaabaʼ «maʼ tu yuʼubikoʼob u tʼaan Jajal Dios» (Tiʼ Efesoiloʼob 2:2). Letiʼob túuneʼ táan u yilkoʼob ka tuukulnakoʼon yéetel ka kuxlakoʼon jeʼex letiʼoboʼ.
4. ¿Bix tu yeʼesil Jesús u kʼaʼananil k-kanáantikba utiaʼal maʼ u xuʼulul k-eʼesik u jaajil cristianoʼon?
4 Tumen kʼubmaj k-kuxtal tiʼ Jéeobaeʼ, wa ku xuʼulul k-eʼesik u jaajil cristianoʼoneʼ jeʼel u taasik nojoch yajil tiʼ toʼoneʼ, kex táankelmoʼon wa nojoch máakoʼon. Utiaʼal k-eʼesik u jaajil cristianoʼoneʼ kʼaʼabéet tsʼoʼokbesik u leyoʼob Jéeoba yéetel k-eʼesik le jatsʼuts modos ku páaʼtik tiʼ toʼonoʼ, tumen u beetmoʼon jeʼex letiʼoʼ (Génesis 1:26; Miqueas 6:8). Le baʼax eʼesik u jaajil cristianoʼonoʼ, teʼ Bibliaoʼ ku keʼetel yéetel upʼéel nookʼ. Ka tʼaanaj tiʼ le kʼiinoʼobaʼ, Jesuseʼ tiaʼalaj: «Ileʼex, teneʼ táan in taal [...] jeʼel bix u taal juntúul j-ookoleʼ. Kiʼ u yóol máax maʼ táan u wenel yéetel u nuʼukbesmaj [wa u kanáantmaj] u nookʼ utiaʼal maʼ u máan chaknuul yéetel utiaʼal maʼ u yilaʼal u subtalil» (Apocalipsis 16:15). * Wa ku xuʼuluk k-eʼesik u jatsʼuts modos Cristo yéetel ku xuʼulul k-beetik le baʼax kiaʼalik le Bibliaoʼ bey ka k-luʼs le nookʼ eʼesik u jaajil cristianoʼonoʼ. Wa ku yúuchultoʼon lelaʼ, yaan u xuʼulul k-kʼaʼamal bey utúul jaajil cristianoeʼ; jach kʼaas yéetel subtsil ka úuchuktoʼon lelaʼ.
5, 6. ¿Baʼaxten jach kʼaʼabéet k-kanáantikba?
5 K-eʼesik jach tu jaajil cristianoʼoneʼ ku beetik k-nuʼuktik tubeel k-kuxtal. Wa maʼ k-kanáantikbaeʼ, jeʼel k-jóokʼol tiʼ u beeloʼob Dioseʼ, tumen jeʼel u pʼáatal maʼ k-ojel baʼax taak k-beetik yéetel k-kuxtaleʼ. Le Bibliaoʼ yaʼab u téenel kiaʼaliktoʼon ka k-kanáantba utiaʼal maʼ u kaʼapʼéeltal k-tuukul. Santiago, utúul u j-tsaypach Cristoeʼ, tiaʼalaj: «Le máax ku kaʼapʼéelchajal u yóoleʼ bey jeʼel bix le u kuklil [wa u olasi] le kʼáaʼnáab ku bisaʼal tumen iikʼ tiʼ juntséel tak tiʼ uláakʼ juntséeloʼ. Le máax beyoʼ maʼ unaj u tukultik wa yaan u kʼamik wa baʼax tiʼ Yuumtsiliʼ, tumen le máax kaʼapʼéel u yóoleʼ maʼ tu páajtal u jetsʼik u tuukul tiʼ mix baʼal» (Santiago 1:6-8; Tiʼ Efesoiloʼob 4:14; Tiʼ Hebreob 13:9).
6 ¿Baʼax jeʼel u yáantikoʼon utiaʼal maʼ u xuʼulul k-eʼesik u jaajil cristianoʼon yéetel utiaʼal u maas kiʼimaktal k-óol k-uʼuyikba u palitsiloʼon u Noj jalaʼachil tuláakal baʼal? Koʼoneʼex ilik.
Kʼaʼabéet k-eʼesik jach máaxoʼoniʼ
7. ¿Baʼaxten maʼalob ka k-kʼáat tiʼ Jéeoba ka u xakʼalt u taamil k-tuukuloʼob?
7 Maʼ u xuʼulul a maas natsʼkaba tiʼ Jéeoba. Utiaʼal utúul cristianoeʼ, u yantal naatsʼ tiʼ Dioseʼ letiʼe baʼax maas maʼalob jeʼel u yantal tiʼoʼ (Salmo 25:14; Proverbios 3:32). Wa k-uʼuyik bey maʼ k-ojel baʼaxten táan k-meyajtik Jéeobaeʼ, kʼaʼabéet k-ilik baʼax beetik maʼ k-uʼuyikba naatsʼ tiʼ letiʼ. Maʼalob ka k-kʼáat tiʼ Jéeoba le baʼax tu kʼáataj le salmistaaʼ: «Xakʼalt in kuxtal, ¡tsʼáaen tiʼ túuntajil! ¡sakkúuns in tuukuloʼob yéetel u sen taamiloʼob in puksiʼikʼal!» (Salmo 26:2). ¿Baʼaxten maʼalob ka k-kʼáat tiʼ Jéeoba ka u beet lelaʼ? Tumen chéen toʼoneʼ maʼ tu páajtal k-xakʼaltik tubeel u maas taamil k-tuukuloʼob. Chéen Jéeoba jeʼel páajtal u yilik jach baʼax yaan tu tsʼuʼ k-puksiʼikʼaleʼ (Jeremías 17:9, 10).
8. 1) ¿Baʼax utsil k-jóoʼsik tiʼ le baʼaloʼob ku chaʼik u yúuchultoʼon Jéeobaoʼ? 2) ¿Bix u yáantkoʼon Dios utiaʼal k-maas maʼalobkíintik k-kuxtal?
8 Ken k-kʼáat tiʼ Jéeoba ka u xakʼalt u maas taamil k-tuukuloʼobeʼ táan k-kʼáatik tiʼ ka u chaʼa k-máan tiʼ baʼaloʼob jeʼel u yeʼeskoʼob wa muʼukʼaʼan k-oksaj óolaleʼ. Le baʼaloʼobaʼ jeʼel u beetkoʼob k-eʼesik jach baʼax k-tuklik yéetel jach baʼax yaan tu tsʼuʼ k-puksiʼikʼaleʼ (Tiʼ Hebreob 4:12, 13; Santiago 1:22-25). Maʼ unaj k-chaʼik u lúubul k-óol tu yoʼolal le baʼaloʼobaʼ, tumen jeʼel u tsʼáaik tuʼux k-eʼesik wa jach tu jaajil k-yaabilmaj Jéeobaeʼ. Ku yeʼeskoʼob xan wa «chúukaʼan[oʼon]» yéetel wa «maʼ tu bineltik mix baʼal» tiʼ k-oksaj óolal (Santiago 1:2-4). Yéetel wa yaan baʼax maʼ maʼalob táan k-beetkeʼ, ku tsʼáaik tuʼux k-utskíintik utiaʼal k-maas maʼalobkíintik k-kuxtal (Tiʼ Efesoiloʼob 4:22-24).
9. ¿Baʼaxten kʼaʼabéet k-ilik wa tiaʼan teʼ Biblia le baʼax k-oksaj óoltikoʼ?
9 Kʼaʼabéet k-ilik wa tiaʼan teʼ Biblia le baʼax k-oksaj óoltikoʼ. Wa maʼ k-beetkeʼ jeʼel u pʼáatal maʼ k-ojel baʼaxten táan k-meyajtik Jéeobaiʼ (Tiʼ Filiposiloʼob 1:9, 10). Tuláakloʼon —kex táankelmoʼon wa nojoch máakoʼoneʼ— kʼaʼabéet k-ilik wa jach bey u kaʼansik le Biblia le baʼax k-oksaj óoltikoʼ. Pabloeʼ tiaʼalaj tiʼ u yéet cristianoiloʼob: «Il a wileʼex [wa] maʼalob tuláakal, pʼáateneʼex yéetel le baʼax maʼaloboʼ» (1 tiʼ Tesalonicailoʼob 5:21). Le paalaloʼob líiʼsaʼanoʼob ichil u jaajiloʼ letiʼob kʼaʼabéet u chʼaʼatuklikoʼob u meyajkoʼob Jéeoba, maʼ chéen tumen u taataʼob táan u beetkoʼobiʼ. Davideʼ tiaʼalaj tiʼ Salomón, u iijo: «Táan óolt [wa kʼaj óolt] u [Dios] a taata, meyajt yéetel tuláakal a puksiʼikʼal» (1 Crónicas 28:9). Salomoneʼ maʼ chéen kʼaʼabéetchaj u yilik bix u meyajtaʼal Dios tumen u taataiʼ, letiʼ xaneʼ kʼaʼabéetchaj u kʼaj óoltik Jéeoba utiaʼal u meyajtik. Yéetel bey tu beetiloʼ, tumen tu kʼáat óoltaj tiʼ: «Tsʼáa tiʼ teen naʼatil yéetel ojéelajil utiaʼal in nuʼukbesik le kaajaʼ» (2 Crónicas 1:10).
10. Wa yaan baʼax jach tu jaajil taak k-ojéeltikeʼ, ¿baʼaxten maʼ kʼaas ka k-kaxt u núukiliʼ?
10 Upʼéel muʼukʼaʼan oksaj óolaleʼ ku taal tiʼ u kʼaj óoltaʼal baʼax kiaʼalik le Bibliaoʼ. Pabloeʼ tiaʼaleʼ «le oksaj óolaloʼ ku taal tu yoʼolal le uʼuyajoʼ» (Tiʼ Romailoʼob 10:17). ¿Baʼax tu yóotaj u yaʼalej? Tu yóotaj u yaʼaleʼ utiaʼal k-muʼukʼankúuntik k-oksaj óolal tiʼ Jéeoba, tiʼ baʼaxoʼob u yaʼalmaj yéetel tiʼ máaxoʼob nuʼuktik u kaajaleʼ, kʼaʼabéet k-tséentikba tiʼ u Tʼaan Dios. Wa yantoʼon kʼáatchiʼobeʼ, maʼalob ka k-il baʼax kiaʼalik le Biblia tu yoʼolaloʼ. Pabloeʼ xaneʼ tu tsʼáaj le tsolnuʼukaʼ: «[Ilawil] a wojéeltikeʼex máakalmáak u yóolal Jajal Dios» (Tiʼ Romailoʼob 12:2). Baʼaleʼ ¿bix jeʼel k-beetkeʼ? Kʼaʼabéet k-ilik «kʼaj óolt[ik] le jaajoʼ» (Tiʼ Tito 1:1). U kiliʼich muukʼ Jéeobaeʼ yaan u yáantkoʼon k-naʼat tak le baʼaloʼob talamtakoʼ (1 tiʼ Corintoiloʼob 2:11, 12). Wa maʼ t-naʼatik tubeel upʼéel baʼaleʼ, kʼaʼabéet k-kaxtik u yáantaj Dios (Salmo 119:10, 11, 27). Letiʼeʼ u kʼáat ka k-naʼat le baʼax kiaʼalik u Tʼaanoʼ, ka k-oksaj óolte yéetel ka k-beet baʼax kiaʼalik. Wa yaan baʼax jach tu jaajil taak k-ojéeltikeʼ, maʼ kʼaas ka k-kaxt u núukiliʼ.
Kʼaʼabéet k-ilik lúubul utsil tiʼ Jéeoba
11. 1) ¿Baʼax jeʼel u túulchʼinkoʼon k-beet baʼax u kʼáat u maasileʼ? 2) ¿Bix jeʼel u yantaltoʼon u muukʼil utiaʼal maʼ k-chaʼik lúubsaʼal tiʼ baʼax kʼaaseʼ?
11 Kʼaʼabéet k-ilik lúubul utsil tiʼ Dios, maʼ tiʼ wíinikiʼ. U tsʼíibolil k-kʼaʼamal tumen u maasileʼ jeʼel u biskoʼon k-beet baʼax u kʼáatoʼobeʼ. Tuláakloʼon kʼaʼabéettoʼon amigoʼob yéetel ka lúubkoʼon utsil tiʼ u maasil. Tu táankelmil máak, bey xan tiʼ uláakʼ u kʼiiniloʼob k-kuxtaleʼ, máaxoʼob yéetel k-bisikbaeʼ u kʼáatoʼob ka k-beet baʼax utstutʼaanoʼob, lelaʼ jeʼel u túulchʼintkoʼon k-beet baʼax u kʼáatoʼob utiaʼal k-lúubul utsil tiʼobeʼ. Baʼaleʼ, maʼ unaj u tuʼubultoʼoneʼ le máaxoʼob yéetel k-bisikbaoʼ maʼ mantatsʼ u kʼáatoʼob k-utsiliʼ. Yaan kʼiineʼ, chéen táan u kaxkoʼob máax láakʼintkoʼob utiaʼal u beetoʼob baʼax kʼaas (Proverbios 1:11-19). U suukileʼ le máaxoʼob maʼatech u yaʼalikoʼob wa j-jaajkunajoʼoboʼ, maas séeb u chaʼik u lúuʼsaʼaloʼob tiʼ baʼax kʼaas (Salmo 26:4). Pabloeʼ tiaʼalaj: «Maʼ kuxtaleʼex jeʼel bix u yaʼalik le yóokʼol kaabaʼ» (Tiʼ Romailoʼob 12:2). Jéeobaeʼ ku tsʼáaiktoʼon u muukʼil utiaʼal maʼ k-chaʼik lúubsaʼal tiʼ baʼax kʼaas (Tiʼ Hebreob 13:6).
12. ¿Baʼax jach maʼalob ka k-beete, yéetel máax bey tu beetiloʼ?
12 Wa táan k-túulchʼintaʼal k-beet upʼéel baʼal maʼ unaj utiaʼal utúul cristianoeʼ, kʼaʼabéet kʼaʼajskeʼ maas maʼalob ka k-eʼes k-yaabilaj tiʼ Jéeoba, maʼ ka kʼaʼamkoʼon tumen u maasiliʼ. Jach maʼalob ka k-beet le baʼax kiaʼalik Éxodo 23:2: «Maʼ a tsaypachtik le sen yaʼab máakoʼob tiʼ u loolob beeloʼob[oʼ]». Utéenjeakileʼ, óoliʼ tuláakal le israelitaʼoboʼ tu tukloʼobeʼ Jéeobaeʼ maʼ tu páajtal u tsʼáaik le luʼum u yaʼalmaj u tsʼáaiktiʼoboʼ, baʼaleʼ Calebeʼ jach upuliʼ maʼ tu yóotaj u tsʼáauba tu tséeloʼobiʼ. Letiʼeʼ jach u yojel kaʼach yaan u béeytal le baʼaxoʼob u yaʼalmaj Jéeobaoʼ, le tuukul yanchaj tiʼaʼ tu taasaj yaʼab utsiloʼob tiʼ (Números 13:30; Josué 14:6-11). Teech xaneʼ, wa a kʼáat lúubul utsil tiʼ Jéeobaeʼ, maʼ kʼaʼabéet a chaʼik a túulchʼintaʼal a beet baʼax kʼaas tumen u maasiliʼ.
13. ¿Baʼaxten kʼaʼabéet k-tsʼáaik ojéeltbil u j-jaajkunajoʼon Jéeoba?
13 Kʼaʼabéet k-tsʼáaik ojéeltbil j-jaajkunajoʼon. Upʼéel tʼaaneʼ kiaʼalik: «Táanil tiʼ u laʼachkecheʼ, kʼos u yíichʼak». U tuukulil le tʼaanaʼ ku yeʼesik baʼax unaj u beetik utúul cristiano utiaʼal u kanáantkuba tiʼ le máaxoʼob jeʼel u túulchʼintik u beet baʼax kʼaasoʼ. Le judíoʼob tu kʼiiniloʼob Esdrasoʼ, le ka talamkúuntaʼab tiʼob u beetkoʼob baʼax u kʼáat Dioseʼ, letiʼobeʼ tiaʼaloʼob ku meyajtikoʼob u Diosil kaʼan yéetel luʼum (Esdras 5:11). Wa k-chʼaʼik saajkil tiʼ baʼax jeʼel u beetik wa tiʼ baʼax jeʼel u yaʼalik le máaxoʼob pʼekmailoʼonoʼ, maʼ xaaneʼ jeʼel k-beetik baʼax u kʼáatoʼobeʼ. K-ilik lúubul utsil tiʼ tuláakal wíinikeʼ maʼ tu yáantkoʼon, le oʼolal maʼ kʼaʼabéet k-chʼaʼik saajkil tiʼobiʼ. Maas maʼalob ka k-aʼal u j-jaajkunajoʼon Jéeoba. Kʼaʼabéet k-aʼalik yéetel tsiikil bey xan yéetel u jaajil k-óol baʼax maʼalob k-ilik, baʼax k-oksaj óoltik yéetel baʼax k-tuklik. Jach maʼalob ka ojéeltaʼak maʼ t-kʼéechel tiʼ le baʼaxoʼob kiaʼalik u leyoʼob Diosoʼ. Kʼaʼabéet k-eʼesik maʼ t-chaʼik túulchʼintaʼal k-beet baʼax kʼaas, yéetel kʼaʼabéet k-eʼesik jach maʼalob k-ilik baʼax kiaʼalik le Bibliaoʼ (Salmo 64:10). K-eʼesik maʼatech k-kʼéechel tiʼ baʼaxoʼob kiaʼalik Jéeobaeʼ ku muʼukʼankúuntkoʼon, ku kanáantkoʼon yéetel jeʼel u péeksik uláakʼ máakoʼob ka kaambalnakoʼob tiʼ Jéeoba yéetel tiʼ u kaajaleʼ.
14. ¿Baʼaxten maʼ unaj u lúubul k-óol wa k-pʼaʼastaʼal yéetel k-chʼaʼapʼektaʼaliʼ?
14 Maʼ xaaneʼ jeʼel k-pʼaʼastaʼal yéetel k-chʼaʼa pʼektaʼaleʼ (San Judas 18). Baʼaleʼ maʼ u lúubul k-óol wa yaan máax maʼ u kʼáat u yuʼuboʼoniʼ (Ezequiel 3:7, 8). Kex jeʼel bukaʼaj ka k-beeteʼ, maʼ kun béeytal k-kʼexik u tuukul le máaxoʼob maʼ u kʼáat u yuʼuboʼonoʼ. Jeʼex Faraoneʼ, kex tu yilaj yaʼab jakʼ óol baʼaloʼob yéetel kex kíim tak u paaleʼ, maʼ tu yóotaj u yoksaj óolt wa Moisés táan u tʼaan tu kʼaabaʼ Jéeobaiʼ. Le oʼolaleʼ, maʼ kʼaʼabéet k-chʼaʼik saajkil tiʼ wíinikoʼobiʼ. Kʼaʼabéet kʼub óoltikeʼ Jéeobaeʼ yaan u yáantkoʼon (Proverbios 3:5, 6; 29:25).
Kaambalnakoʼon tiʼ baʼax uchaʼan yéetel meyajnakoʼon utiaʼal k-salvartikba
15, 16. 1) ¿Baʼaxoʼob tsʼoʼok k-kʼamik tiʼ Dios? 2) ¿Baʼax utsiloʼob jeʼel k-jóoʼsik wa k-tuukul tiʼ le baʼaxoʼob u tsʼaamajtoʼonoʼ?
15 Kʼaʼabéet k-ilik jach maʼalob tuláakal baʼax k-kʼammaj tiʼ Dios. Ken k-xok le Bibliaoʼ, maʼalob ka tuukulnakoʼon tiʼ le jatsʼuts baʼaloʼob tsʼoʼok k-kʼamikaʼ: le jaajil tsʼoʼok k-kanik teʼ Bibliaoʼ, u alab óolalil le kuxtal minaʼan u xuuloʼ yéetel u kiʼimak óolalil k-tʼaan tu kʼaabaʼ Dios ken k-bis le maʼalob péektsiloʼ. Jéeobaeʼ u yaʼalmaj tiʼ u j-jaajkunajoʼob ka u kʼaʼaytoʼob le maʼalob péektsiloʼ, ¿k-uʼuyik wa jach tu jaajil tiaʼanoʼon ichiloʼobeʼ? Kʼaʼajaktoʼoneʼ Jéeoba aʼaliktoʼon: «Teʼexeʼ in j-jaajkunajeʼex» (Isaías 43:10).
16 Kʼaʼabéet k-tuklik: «¿Jach maʼalob wa in tiaʼal tuláakal le baʼaloʼobaʼ? ¿Jach wa kʼaʼanan in tiaʼal, le oʼolal kin wilik in tsʼáaik táanil in meyajtik Dios? In yaabilaj yoʼolal le baʼaxoʼob u tsʼaamajtenoʼ, ¿ku tsʼáaikten wa u muukʼil utiaʼal maʼ in lúubul tiʼ baʼaloʼob jeʼel u beetik in peʼertikeʼ?». Le baʼax u tsʼaamajtoʼon Diosoʼ ku taasiktoʼon upʼéel jeetsʼelil chéen ichil u kaajal jeʼel u kaxtaʼaleʼ (Salmo 91:1, 2). K-kʼaʼajsik le baʼaxoʼob uchaʼantak tiʼ u kaajal Jéeoba teʼ kʼiinoʼobaʼ, ku yáantkoʼon k-il jach mix máak yéetel mix baʼal jeʼel u xuʼulsik tiʼ u kaajaleʼ (Isaías 54:17; Jeremías 1:19).
17. ¿Baʼax jach kʼaʼabéet utiaʼal k-salvartikba?
17 Le baʼaxoʼob u tsʼaamajtoʼon Diosaʼ, chéen tu juunaloʼobeʼ maʼ tu salvarkoʼonoʼob, kʼaʼabéet k-antal naatsʼ tiʼ letiʼ utiaʼal k-salvartikba. Pabloeʼ, ka tsʼoʼok u yantal yéetel u cristianoiloʼob Filiposeʼ, tu tsʼíibtaj tiʼob: «Le oʼolaleʼ in yaabilaj sukuʼuneʼex, jeʼel bix ta tsʼoʼokbesajileʼex in tʼaan mantatsʼ le ka yanjien ta wéeteleʼexoʼ, tsʼoʼokbeseʼex in tʼaan maas maʼalob bejlaʼaʼ náach yanen tiʼ teʼexoʼ. Tsʼáa a wóoleʼex tiʼ a toksajileʼex yéetel kabal óolal yéetel sajakil» (Tiʼ Filiposiloʼob 2:12). Jeʼex k-ilkoʼ, toʼon kʼaʼabéet kaxtik k-toksajil wa k-salvación.
18. ¿Bix jeʼel k-maas chíikbesik u jaajil cristianoʼoneʼ?
18 Kʼaʼabéet k-ilik beetik le baʼaxoʼob u kʼáat Diosoʼ. Kiaʼalaleʼ «le baʼax k-beetkoʼ ku yeʼesik máaxoʼoniʼ». Toʼoneʼexeʼ tsʼoʼok k-kʼamik u nojoch meeyjil k-kʼaʼaytik u Reino Dios. Pabloeʼ tiaʼalaj: «Tumen Jajal Dios u túuxmajen tiʼ le máaxoʼob maʼ judíoʼoboʼ, kin jach táanilkuntik in meyaj» (Tiʼ Romailoʼob 11:13). Le kʼaʼaytajoʼ ku jumpáaykuntkoʼon tiʼ le yóokʼol kaabaʼ, yéetel le k-jóokʼol kʼaʼaytajoʼ ku maas eʼesik u jaajil cristianoʼon. Uláakʼ baʼaxoʼob tsʼáaiktoʼon u muukʼil utiaʼal maʼ u xuʼulul k-eʼesik u jaajil cristianoʼoneʼ letiʼe k-antal teʼ muchʼtáambaloʼoboʼ, le k-áantaj ken líiʼsaʼak u kúuchil muchʼtáambaloʼoboʼ yéetel k-tsʼáaik áantaj tiʼ máaxoʼob kʼaʼabéet (Tiʼ Galaciailoʼob 6:9, 10; Tiʼ Hebreob 10:23, 24).
K-eʼesik u jaajil cristianoʼoneʼ ku taasiktoʼon yaʼab utsil
19, 20. 1) ¿Baʼax utsiloʼob tsʼoʼok a kʼamik tumen u jaajil cristianoech? 2) ¿Máax aʼalik máaxoʼon?
19 Tuukulnakoʼon tiʼ le yaʼabach utsil k-kʼamik tumen u jaajil cristianoʼonoʼ. Yáaxeʼ, jach kiʼimak k-óol tumen kʼamaʼanoʼon tumen Jéeoba. Le profeta Malaquíasoʼ tiaʼalaj: «Le máaxoʼob túun tsikik [Dioseʼ] j-tʼaanajoʼob tu baatsiloʼob, Yuumtsileʼ tu yuʼubaj maʼalob baʼaxoʼob ku yaʼalikoʼob. Tu táan túun Yuumtsileʼ j-tsʼíibtaʼab tiʼ jumpʼéel juʼun tuʼux ku kʼaʼajsaʼal máaxoʼob tsikik yéetel táan óoltik [wa kʼaʼajsik] Yuumtsil» (Malaquías 3:16). Ku páajtal xan k-amigotik Dios (Santiago 2:23). Ku yantal xan u beelal k-kuxtal yéetel k-bin tu paach baʼaloʼob ku taaskoʼob utsil. Yéetel táan k-páaʼtik upʼéel kuxtal minaʼan u xuul (Salmo 37:9).
20 Kʼaʼajaktoʼon xaneʼ Jéeoba aʼalik máaxoʼon yéetel bukaʼaj k-tojol, maʼ wíinikoʼobiʼ. Le wíinikoʼoboʼ jeʼel u yaʼalikoʼob maʼ maʼalob máakoʼoneʼeʼ, baʼaleʼ le yaabilaj yéetel le utsil ku yeʼesiktoʼon Diosoʼ ku yeʼesik yaan k-tojol tu táan, tumen u tiaʼaloʼon (San Mateo 10:29-31). Le yaabilaj xan k-uʼuyik tu yoʼolal Jéeobaoʼ ku beetik k-uʼuyik jach tu jaajil u palitsiloʼon yéetel ku yeʼesiktoʼon bix jach kʼaʼabéet k-nuʼuktik kuxtal. «Máax u yaabiltmaj Jajal Dioseʼ, letiʼeʼ kʼaj óoltaʼan tumen Jajal Dios» (1 tiʼ Corintoiloʼob 8:3.)
[Tsolajiloʼob]
^ xóot’ol 4 Maʼ xaaneʼ le tʼaanoʼobaʼ táan u kʼaʼajsik le meyaj ku beetik u noj j-kananil u temploi Jerusalén úuchiloʼ. Teʼ áakʼab tu yorai le kananoʼ letiʼeʼ ku jóokʼol xíimbal teʼ templo utiaʼal u yilik wa le levitaʼob ku kananoʼoboʼ maʼ táan u weenloʼobiʼ. Le máax táan u weenleʼ ku jaʼatsʼal yéetel upʼéel cheʼ, yéetel jeʼel xan u yúuchul upʼéel baʼal jach subtsil tiʼeʼ, u piʼitil u nookʼ utiaʼal tóokbil ka pʼáatak chéen yéetel u yáal u nookʼ.
¿Kʼajaʼan wa toʼon?
• ¿Baʼaxten jach kʼaʼanan k-kanáantik «le nookʼ» wa le baʼax eʼesik u jaajil cristianoʼonoʼ?
• ¿Baʼax jeʼel u yáantikoʼon utiaʼal maʼ u xuʼulul k-eʼesik u jaajil cristianoʼoneʼ?
• Wa ku kʼaʼabéetchajal k-yéeyik tiʼ máax k-kʼáat lúubul utsileʼ, ¿baʼax jeʼel u yáantkoʼon ka k-il baʼax maas maʼalob ka k-beete?
• ¿Bix jeʼel k-chíikbesik u jaajil cristianoʼoneʼ, yéetel baʼax utsiloʼob ku taasiktoʼon?
[U kʼáatchiʼiloʼob le xookoʼ]
[U tsolajil le oochel teʼ táan juʼun 15]
K-ilik beetik le baʼaxoʼob u kʼáat Diosoʼ ku maas eʼesik jach máaxoʼon