Kiʼimak k-óol k-uʼuyikba u jaajil cristianoʼon
Kiʼimak k-óol k-uʼuyikba u jaajil cristianoʼon
«Le máax ku nojbaʼalkúunskubaeʼ, u nojbaʼalkúunsuba tiʼ Yuumtsil.» (1 CORINTIOS 1:31, LTN.)
1. ¿Baʼax táan u tuklik maas yaʼab máakoʼob yoʼolal u religionoʼob?
«MAʼ IN kʼáat in wojéelt mix baʼal tiʼ religioniʼ». Utúul máak ku tʼaan tiʼ religioneʼ tiaʼaleʼ lelaʼ letiʼe tuukul táan u yantal tiʼ maas yaʼab máakoʼoboʼ. Le máakaʼ tu ketaj le tuukulaʼ yéetel upʼéel túumben religión, le oʼolal tiaʼalaj xan: «Le túumben religión táan u chíikpajal bejlaʼeʼ upʼéel tuukul, maʼ upʼéel túumben kaʼansajiʼ». Tiaʼalaj xaneʼ «yaʼab máaxoʼob u yojloʼob yaan Dios [...], baʼaleʼ maʼ u kʼáat u yojéeltoʼob mix baʼal tiʼ letiʼiʼ».
2. 1) ¿Baʼaxten maʼ tu jaʼakʼal k-óol yoʼolal le tuukul yaan tiʼ yaʼab máakoʼob bejlaʼoʼ? 2) ¿Baʼaxten maʼ unaj k-tuukul jeʼex letiʼoboʼ?
2 Le máaxoʼob xokik le Bibliaoʼ u yojloʼob yaan u yantal máaxoʼob maʼ u kʼáatoʼob u yojéeltoʼob mix baʼal tiʼ religioniʼ (San Lucas 18:8). Unaj tak u páaʼtaʼal u yantal máakoʼob kun tuukuloʼob beyaʼ, tumen le religionoʼob maʼatech u kaʼanskoʼob u jaajiloʼ úuch joʼopʼok u tusik le máakoʼoboʼ yéetel maʼ tu beetkoʼob baʼax ku páaʼtaʼal tiʼoboʼ (Apocalipsis 17:15, 16). Le bix u tuukul yaʼab máakoʼobaʼ jeʼel u kʼaskúuntik k-tuukuleʼ. Wa ku káajal k-tuukul jeʼex letiʼobeʼ yaan u lúubul k-óol meyajt Dios yéetel yaan u xuʼulul k-oksaj óoltik baʼax kiaʼalik le Bibliaoʼ. Maʼ unaj k-chaʼik u yúuchultoʼon beyaʼ. Jesuseʼ tiaʼalaj tiʼ u cristianoiloʼob Laodiceaeʼ maʼ u lúubul u yóoloʼob u meyajtoʼob Dios ka tak pʼáatkoʼob bey kʼíinal jaʼeʼ: «Maʼ síisechiʼ mix chokoechiʼ. ¡Bukaʼaj maʼalobil wa síisech wa chokoech! Baʼaleʼ [...] chéen kʼíinalech» (Apocalipsis 3:15-18).
Kʼaʼabéet k-ilik jach máaxoʼoniʼ
3. ¿Baʼaxoʼob taasiktoʼon kiʼimak óolal?
3 Utiaʼal maʼ u yantaltoʼon le tuukul yaan tiʼ yaʼab máakoʼoboʼ kʼaʼabéet k-kʼaʼajsik jach máaxoʼon yéetel u kiʼimaktal k-óol tu yoʼolal. Toʼon táan k-meyajtik Jéeoba yéetel táan k-tsaypachtik Cristoeʼ, le Bibliaoʼ kiaʼalikeʼ u «j-jaajkunaj[oʼon]» Jéeoba yéetel «u yéet meyajoʼon Jajal Dios» tiʼ u meeyjil u kʼaʼaytaʼal le «maʼalob péektsil[oʼ]» (Isaías 43:10; 1 Corintios 3:9, LTN; San Mateo 24:14). Toʼon u jaajil cristianoʼoneʼ k-paklan yaabiltikbaʼex (San Juan 13:34). Tumen k-ilik chʼaʼanuʼuktik baʼax kiaʼalik le Bibliaoʼ tsʼoʼok k-kanik il «baʼax le utsoʼ bey xan baʼax le kʼaasoʼ» (Tiʼ Hebreob 5:14). Beyoʼon «jeʼel bix le eekʼoʼob tiʼ jumpʼéel yóokʼol kaab éekʼjochʼeʼen[eʼ]» (Tiʼ Filiposiloʼob 2:15). Táan xan k-ilik bisik upʼéel toj kuxtal tu táan le máakoʼoboʼ (1 San Pedro 2:12; 2 San Pedro 3:11, 14).
4. Toʼon u palitsiloʼon Jéeobaeʼ, ¿baʼax k-ojel xan?
4 Toʼon u palitsiloʼon Jéeobaeʼ k-ojel xan, jeʼel bix Jesuseʼ, maʼ táakpajaʼanoʼon teʼ yóokʼol kaabaʼ (San Juan 17:16). Jumpáay yaniloʼon tiʼ «le máaxoʼob maʼ u kʼaj óoloʼob Jajal Dios[oʼ]», letiʼobeʼ «tsʼoʼok u éekʼjochʼeʼental u naʼatoʼob» yéetel tsʼoʼok u náachtaloʼob tiʼ «le kuxtal ku taal tiʼ» Jéeobaoʼ (Tiʼ Efesoiloʼob 4:17, 18). Le beetikeʼ, tsʼoʼok pʼatik «le kʼaasoʼ yéetel le luʼumkabil tsʼíibolaloʼoboʼ», yéetel táan k-ilik bisik upʼéel «kuxtal ich maʼalob tuukul, tojil yéetel kʼub óolal tiʼ Jajal Dios» (Tiʼ Tito 2:12).
5. ¿Baʼax u kʼáat u yaʼal k-nojbaʼalkuntikba tiʼ Yuumtsil?
5 K-kʼaʼajsik máaxoʼon yéetel k-kʼaʼajsik táan meyajtik u Noj Jalaʼachil tuláakal baʼaleʼ ku tsʼáaik tuʼux «nojbaʼalkúun[tikba] tiʼ Yuumtsil» (1 Corintios 1:31, LTN). Lelaʼ u kʼáat u yaʼaleʼ ku jach kiʼimaktal k-óol tumen Jéeoba k-Dios. Táan xan k-ilik beetik lelaʼ: «Wa máax u kʼáat kaʼanaltal u yicheʼ, kaʼanalchajak u yich tumen u kʼaj óoltmajen, tumen tsʼoʼok u kʼaj óoltik, teen Yuumtsil, kin meyaj teʼ j-luʼumaʼ yéetel yaakunaj, [...] [bey xan] yéetel tojil» (Jeremías 9:24). Jeʼel u páajtal k-aʼalikeʼ k-nojbaʼalkuntikba tiʼ Jéeoba, tumen k-kʼaj óol yéetel yoʼolal le meyaj k-beetkoʼ letiʼeʼ táan u yáantik le máakoʼoboʼ.
Maʼ chéen chʼaʼabiliʼ
6. Yaan kʼiineʼ, ¿baʼaxten jujuntúul sukuʼunoʼobeʼ maʼ u yojloʼob baʼaxten j-jaajkunajoʼob tiʼ Jéeobaiʼ?
6 U jaajileʼ, yaan kʼiineʼ jeʼel u tuklik máak maʼ u yojel baʼaxten j-jaajkunaj tiʼ Jéeobaiʼ. Utúul xiʼipal líiʼsaʼab ichil u jaajileʼ ku kʼaʼajsikeʼ anchaj upʼéel kʼiin tu yuʼububa beyaʼ. Letiʼeʼ tiaʼalaj: «Yaan kʼiin kaʼacheʼ kin wuʼuyik maʼ in wojel baʼaxten j-jaajkunajen tiʼ Jéeobaiʼ. Tin kʼaj óoltaj u jaajil tin chichnil, baʼaleʼ yaan kʼiineʼ kin wuʼuyik bey tiaʼanen tiʼ jeʼel baʼalak religionileʼ». Yaneʼ, maʼ xaaneʼ, tsʼoʼok u chaʼik u jelbesaʼal u tuukul yoʼolal baʼaxoʼob ku chaʼantik, yoʼolal baʼaxoʼob ku yuʼubik wa yoʼolal le máaxoʼob maʼ tu yeʼeskoʼob tsiikil tiʼ le kuxtaloʼ (Tiʼ Efesoiloʼob 2:2, 3). Maʼ xaaneʼ, yaan sukuʼunoʼobeʼ jeʼel u kaʼapʼéeltal u tuukuloʼobeʼ yéetel jeʼel u káajal u tuklikoʼob wa maʼalob baʼax táan u beetkoʼob yéetel u kuxtaloʼobeʼ.
7. 1) ¿Baʼax xakʼal tuukulil maʼalob ka k-beete? 2) Baʼaleʼ ¿baʼax maʼ tu taasik mix upʼéel utsil?
7 ¿Kʼaas wa ka tuukulnakoʼon cada wa baʼax kʼiin tiʼ baʼax táan k-beetik utiaʼal k-ilik wa utúul jaajil cristianoʼon? Maʼatech. Pabloeʼ tiaʼalaj tiʼ le cristianoʼob ka u xíixt u tuukuloʼoboʼ: «Xíixt a tuukuleʼex [utiaʼal a wilkeʼex] wa tiaʼaneʼex tiʼ [le] oksaj óolal[oʼ], maʼalob kʼaj óoltabaʼex ta juunaleʼex» (2 Corintios 13:5, LTN). Yéetel le tʼaanoʼobaʼ, Pabloeʼ tiaʼalaj tiʼe cristianoʼob ka u jach iloʼob wa yaan baʼax maʼ maʼalob táan u beetkoʼobeʼ ka u yutskíintoʼob. Le sukuʼun túun u kʼáat u yil wa utúul jaajil cristianoeʼ, kʼaʼabéet u yilik wa le baʼax ku beetik yéetel le baʼax kiaʼalikoʼ kieʼesik wa jach tu jaajil cristiano. Baʼaleʼ, wa utiaʼal k-ilik wa jaajil cristianoʼon, ku káajal k-tuukul tiʼ baʼaloʼob minaʼan baʼax yil yéetel Jéeoba wa yéetel le múuchʼulil bey xan wa k-kaxtik u yáantaj chéen máakoʼob kaʼanchajaʼan u xookoʼobeʼ, leloʼ maʼ tu taasik mix upʼéel utsil, jeʼel tak u náachkuntkoʼon tiʼ Dioseʼ. * Kʼaʼabéet k-kanáantikba utiaʼal maʼ k-jóokʼol tiʼ le oksaj óolaloʼ (1 tiʼ Timoteo 1:19).
Yaan kʼiineʼ ku talamtaltoʼon xan
8, 9. 1) ¿Bix tu yeʼesil Moisés sajakchaj u beet le meyaj tsʼaʼabtiʼoʼ? 2) Jéeobaeʼ, ¿bix tu luʼsil u saajkil Moisés? 3) ¿Bix k-uʼuyikba yoʼolal le baʼax tsʼoʼok u yaʼalik Jéeoba tiʼ le máaxoʼob meyajtikoʼ?
8 Le cristianoʼob ku yuʼubkoʼob yaan kʼiin bey maʼ tu béeytal u meyajkoʼob Jéeobaeʼ, ¿maʼalob wa ka u tukloʼob mix baʼal u beelaloʼob? Maʼatech. Jeʼel u líikʼil yóoloʼob u yojéeltkoʼob maʼ chéen letiʼob tsʼoʼok u yuʼubkubaʼob beyoʼ, le máaxoʼob meyajt Dios úuchiloʼ tu yuʼububaʼob xan beyoʼ. Utúul tiʼ letiʼobeʼ Moisés. Letiʼeʼ jach yanchaj u oksaj óolal yéetel jach tu kʼubaj u yóol u meyajt Dios. Baʼaleʼ ka kʼubéentaʼab upʼéel meyaj tiʼeʼ, jach talam tu yilij u beetik, le oʼolal ichil u sajakileʼ tiaʼalaj: «¿Máaxen teen[?]» (Éxodo 3:11). Maʼ xaaneʼ Moiseseʼ táan kaʼach u tuklik: «Teneʼ jach mix máaken» wa «jach mix baʼal in beelal». Maʼ xaaneʼ tuukulnaj beyaʼ, tumen tiʼ u taal tiʼ upʼéel kaaj palitsiltaʼaneʼ wa tumen maʼ lubaʼan utsil tiʼ le israelitaʼoboʼ; tsʼoʼoleʼ, maʼ tʼáalkab u tʼaan kaʼachiʼ (Éxodo 1:13, 14; 2:11-14; 4:10). Chéen j-kanan taman kaʼachi, upʼéel meyaj pʼektaʼan tumen le egipcioʼoboʼ (Génesis 46:34). Le oʼolal k-naʼatik baʼaxten tu yuʼubaj bey maʼ tu páajtal u jáalkʼabtik u kaajal Dioseʼ.
9 Jéeoba túuneʼ tu luʼsaj u saajkil Moisés, tiaʼalaj tiʼ: «Teneʼ yaan in wantal ta wéetel, u chíikulal teen túuxtikecheʼ letiʼ lelaʼ: Le ken tsʼoʼokok a jóokʼsik in kaajal tu luʼumil Egiptoeʼ, yaan a [meyajtikeneʼex] teʼ j-witsaʼ» (Éxodo 3:12). K-ilik túuneʼ, Jéeobaeʼ tiaʼalaj tiʼ Moisés yaan u yáantik mantatsʼ yéetel yaan u jáalkʼabtik u kaajal. Ka kʼaʼabéetchaj xan áantaj tiʼ uláakʼ u palitsiloʼobeʼ, tiaʼalaj yaan xan u yáantkoʼob. Jeʼex le u kaʼaj okol le israelitaʼob teʼ luʼum aʼalaʼan u tsʼaʼabal tiʼoboʼ, Moiseseʼ tiaʼalajtiʼob: «Muʼukʼaʼanchajak a wóoleʼex [...], tumen Yuumtsil a [Dioseʼexeʼ] tiʼ yaan ta wéeteleʼexeʼ, maʼ bíin u xúumpʼajteʼexiʼ» (Deuteronomio 31:6). Jéeoba xaneʼ tiaʼalaj tiʼ Josué: «Mix máak bíin tsʼáancheʼetikech tuláakal u kʼiiniloʼob a kuxtal, teneʼ bíin yanaken ta wéetel [...], maʼ bíin in pʼatechiʼ» (Josué 1:5). Tiʼ le cristianoʼob xanoʼ kiaʼalik: «Mix bikʼin k[e]n in pʼatech mix k[e]n in xúumpʼattech» (Tiʼ Hebreob 13:5). Lelaʼ unaj u beetik u kiʼimaktal k-óol ikil k-uʼuyikba u jaajil cristianoʼon.
10, 11. ¿Baʼax áant Asaf u yutskíint u tuukul?
10 Óoliʼ quinientos jaʼaboʼob kíimik Moiseseʼ, utúul levita ku kʼaabaʼtik Asafeʼ tiaʼalaj káaj u tuklik chéen kunel u bisik máak upʼéel toj kuxtal. Le táan u yilik talamiloʼobeʼ, Asafeʼ káaj u yilik bix u bin utsil tiʼ le máaxoʼob maʼ tu yeʼeskoʼob tsiikil tiʼ Diosoʼ. ¿Baʼax kʼuch u tukle? Letiʼeʼ tiaʼalaj: «Junláakʼ [u]pʼíiteʼ tsʼoʼok kaʼach in lúubuleʼ, in wookoʼobeʼ óoliʼ jakchajoʼob. Le ka tin wilaj bix u ayikʼaltal le kaʼanal ichoʼoboʼ yéetel le j-loolob máakoʼoboʼ, tin tsʼíiboltaj in béeytal jeʼebixoʼoboʼ». Asafeʼ káaj u tuklik maʼ tu taasik mix upʼéel utsil u meyajtik Jéeoba, le oʼolal tu tuklaj: «¡Mix baʼal u biilal u yantal teen jumpʼéel sak puksiʼikʼal yéetel ka in pʼoʼo in kʼaboʼob tiʼ tuláakal kʼaas! Tumen tiʼ tuláakal súutukeʼ kin kʼamik jaatsʼoʼob» (Salmo 73:2, 3, 13, 14).
11 ¿Bix úuchik u yutskíintik u tuukul Asaf? ¿Tiaʼalaj wa maʼ bey u tuukuloʼ? Maʼatech. Tiaʼalaj tiʼ Dios baʼax ku tuklik, jeʼex k-xokik teʼ Salmo 73. Baʼax jach áanteʼ letiʼe úuchik u bin teʼ templooʼ. Teʼeloʼ kʼuch u yileʼ u meyajtaʼal Dioseʼ letiʼe baʼax maas maʼaloboʼ. Tu kaʼa yaabiltaj u beeloʼob Dios, kʼuch u naʼateʼ Jéeobaeʼ u pʼekmaj le kʼaasoʼ yéetel ken kʼuchuk u kʼiinileʼ yaan u xuʼulsik tiʼe j-kʼasaʼanoʼoboʼ (Salmo 73:17-19). Tu kʼaʼajseʼ letiʼeʼ utúul u palitsil Jéeoba, le oʼolal tiaʼalaj ich payalchiʼ: «Mantatsʼ [yanen] ta wéetel. Ta machajen yéetel a x-noʼoj kʼab, [ka nuʼuktik] in kuxtal yéetel a tsol xikinoʼob; le ken kʼuchuken tu xuuleʼ yaan a kʼamiken yéetel tsiikiloʼob» (Salmo 73:23, 24). Asafeʼ kaʼa kiʼimakchaj u yóol yoʼolal u Dios (Salmo 34:2).
Maʼ tuʼubtiʼob letiʼobeʼ u palitsiloʼob Dios
12, 13. ¿Máaxoʼob kiʼimakchaj u yóoloʼob u meyajtoʼob Dios úuchjeakil?
12 K-xokik tiʼ le máaxoʼob chúukpaj u yóol u meyajtoʼob Dios úuchiloʼ yéetel k-beetik jeʼex letiʼobeʼ, ku muʼukʼaʼankúunsik óol utiaʼal maʼ k-chʼaʼik saajkil k-eʼesik Jéeoba k-Dios. Letiʼobeʼ kex tu máansoʼob talamiloʼobeʼ jach kiʼimakchaj u yóoloʼob tumen u Diosoʼobeʼ Jéeoba. Utúul tiʼ letiʼobeʼ José, u paal Jacob. Tu táankelmileʼ koʼon tumen u sukuʼunoʼob utiaʼal ka palitsiltaʼak tu luʼumil Egipto, upʼéel luʼum tuʼux jach jelaʼan u kuxtal le máakoʼob tiʼ bix líiʼsaʼabik letiʼoʼ, náach tiʼ tuʼux yaan u taata u yaabilmaj Dios. Teʼeloʼ, tiʼ mix máax kaʼach jeʼel u kʼáatik áantaj Joseiʼ, yéetel tu aktáantaj talam baʼaloʼob beet u yeʼesik wa yaan u beetik baʼax uts yéetel wa yaan u kʼubik u yóol tiʼ Dios. Baʼaleʼ tu beetaj tuláakal le ku páajtal utiaʼal maʼ u tuʼubsik máax letiʼ; lelaʼ le áant utiaʼal ka kuxlak jeʼex u kʼáat Diosoʼ. Kex kuxlaj ich kʼasaʼan máakoʼobeʼ, kiʼimakchaj u yóol tumen letiʼeʼ utúul u palitsil Jéeoba, le oʼolal mix utéen tu taʼakaj máaxiʼ (Génesis 39:7-10).
13 Ochocientos jaʼaboʼob kuxlak Joseeʼ, utúul chan chʼúupal israelita palitsiltaʼan tumen Naamán, u nojchil u soldadoiloʼob Siriaeʼ, maʼ xan tu tuʼubsaj máax letiʼ. Maʼ tu chʼaʼaj saajkil u yaʼalik Eliseoeʼ u profeta Jéeoba (2 Reyes 5:1-19). Jaʼaboʼob maas táanileʼ, le táankelem rey Josiasoʼ kex tiaʼan ich kʼasaʼan máakoʼobeʼ yaʼab baʼaxoʼob tu beetaj utiaʼal ka adorartaʼak Jéeoba jeʼex unajeʼ, tu yutskíintaj le templooʼ yéetel tu kaʼa natsʼaj le kaaj tu yiknal Jéeobaoʼ. Letiʼeʼ jach nojoch baʼal tu yilij u meyajtik yéetel u yoksaj óoltik Jéeoba (2 Crónicas, capituloʼob 34, 35). Daniel yéetel u óoxtúul amigoʼobeʼ mix utéen tu tuʼubsoʼob letiʼobeʼ u palitsiloʼob Jéeoba, yéetel kex túulchʼintaʼaboʼob u beetoʼob baʼax maʼ maʼalobeʼ, chúukpaj u yóoloʼob tiʼ Dios. Letiʼobeʼ jach kiʼimakchaj u yóoloʼob tumen Jéeoba u Diosoʼob (Daniel 1:8-20).
Kiʼimak óol k-uʼuyikba u jaajil cristianoʼon
14, 15. ¿Baʼaxten kiʼimak óol k-uʼuyikba u jaajil cristianoʼon?
14 Tuláakal le máaxoʼob meyajt Diosaʼ kiʼimakchaj u yóol u kʼaʼajskoʼobeʼ letiʼobeʼ u palitsiloʼob Jéeoba, lelaʼ le áantoʼob utiaʼal ka chúukpajak u yóoloʼob. ¿Kux túun toʼon? ¿Baʼaxten kiʼimak óol k-uʼuyikba u jaajil cristianoʼon?
15 Yáaxeʼ, tumen tiaʼanoʼon ichil u kaajal Jéeobaeʼ; k-ojel xan táan u yáantkoʼon yéetel u kʼammoʼon. Le oʼolal jach k-tsʼáaik nib óolal tiʼ. Dioseʼ jach u kʼaj óol máaxoʼob meyajtik. Le apóstol Pablooʼ, tumen kuxlaj tu kʼiiniloʼob tuʼux yaan yaʼab religionoʼobeʼ, tu tsʼíibtaj: «Yuumtsileʼ u kʼaj óol le máaxoʼob u tiaʼaloʼ» (2 tiʼ Timoteo 2:19; Números 16:5). Dioseʼ kiʼimak u yóol yoʼolal «le máaxoʼob u tiaʼaloʼ», yéetel kiaʼalik yoʼolaloʼob: «Jeʼel máax ka u tsʼáa u kʼab tu yóokʼol in kaajaleʼ, tiʼ u neekʼ in wich ku beetik loob» (Zacarías 2:8-9). Jéeobaeʼ jach tu jaajil u yaabiltmoʼon. Le oʼolaleʼ utiaʼal k-jach bisikba tu yéeteleʼ kʼaʼabéet k-jach yaabiltik xan. Pabloeʼ tiaʼalaj: «Wa yaan máax u yaabiltmaj Jajal Dioseʼ, letiʼeʼ kʼaj óoltaʼan tumen Jajal Dios» (1 tiʼ Corintoiloʼob 8:3).
16, 17. Le cristianoʼob táankelmoʼob bey xan le yaan u jaʼabiloʼoboʼ, ¿baʼaxten jach kiʼimak u yóoloʼob yoʼolal baʼax u kʼammoʼoboʼ?
16 Le táankelem paalal líiʼsaʼanoʼob ichil u jaajiloʼ maʼalob ka u yiloʼob wa cada kʼiin ku máaneʼ táan u yuʼubkubaʼob jach tu jaajil u j-jaajkunajoʼob Jéeoba yoʼolal u yaabilajoʼob tiʼ letiʼ, maʼ chéen tumen j-jaajkunaj u taataʼobiʼ. Pabloeʼ tu tsʼíibtaj yoʼolal u palitsiloʼob Dios: «Wa uts wa kʼaas u pʼáataleʼ, leloʼ u tsʼuulil máax unaj u yaʼalik». Le oʼolaleʼ tiaʼalaj: «Cada juntúul tiʼ toʼoneʼ yaan u tsolik tiʼ Jajal Dios baʼax u beetmaj» (Tiʼ Romailoʼob 14:4, 12). K-ilik túuneʼ, maʼ tu páajtal k-jach amigotik Jéeoba chéen tumen k-láakʼoʼobeʼ u j-jaajkunajoʼob Jéeoba.
17 Úuchjeakil tak bejlaʼeʼ tsʼoʼok u yantal yaʼab j-jaajkunajoʼob tiʼ Jéeoba: káaj yéetel Abel —óoliʼ seis mil jaʼaboʼob kuxlak bejlaʼeʼ— utiaʼal u tsʼoʼokol yéetel le «yaʼabkach máakoʼob» meyajtik Jéeoba teʼ kʼiinoʼobaʼ. Tuláakloʼobeʼ yaan u kʼamkoʼob upʼéel maʼalob kuxtal utiaʼal mantatsʼ (Apocalipsis 7:9; Tiʼ Hebreob 11:4). Toʼon u tsʼook tiʼ le yaʼabach máakoʼob tsʼoʼok u chúukpajal u yóol u meyajtoʼob Diosoʼ. ¿Máasaʼ sen kiʼimak k-óol tu yoʼolal le jach maʼalob baʼal tsʼoʼok k-kʼamikaʼ?
18. ¿Bix u jelaʼankúunskoʼon tiʼ le yóokʼol kaab le bix kuxlikoʼonoʼ?
18 K-uʼuyikba xan u jaajil cristianoʼon tumen táan k-ilik kuxtal jeʼex kuxlajik Cristooʼ. Lelaʼ bey upʼéel «Bej[eʼ]», minaʼan uláakʼ kuxtal jeʼel u taasiktoʼon u yutsil Dioseʼ, chéen lelaʼ (Hechos 19:9, LTN; Tiʼ Efesoiloʼob 4:22-24). Toʼoneʼ k-ilik ojéeltik baʼax maʼalob tiʼ baʼax maʼ maʼalobiʼ yéetel k-ilik pʼáatal «yéetel le baʼax maʼaloboʼ» (1 tiʼ Tesalonicailoʼob 5:21). K-ojel jach bukaʼaj u jelaʼanil utúul cristiano tiʼ máax maʼ letiʼ. Jéeobaeʼ u tsʼaamaj bix jeʼel u kʼaj óoltaʼal le jaajil adoración tiʼ le maʼ u jaajiloʼ. Tu beetaj tak u tsʼíibtaʼal tumen profeta Malaquías: «Teʼex túuneʼ, bíin a kʼaj óolteʼex u jelaʼanil máax uts tiʼ máax kʼasaʼan bey xan máax [meyajtik] Yuumtsil tiʼ máax maʼ tu [meyajtik]» (Malaquías 3:18).
19. ¿Baʼax mix utéen ken u yaʼal le jaajil cristianoʼoboʼ?
19 K-ilik túuneʼ jach kʼaʼanan k-nojbaʼalkúuntikba tiʼ Yuumtsil teʼ yóokʼol kaab tuʼux yaʼab máakoʼob kaʼapʼéelchajaʼan u tuukuloʼoboʼ. Baʼaleʼ ¿baʼax kun áantkoʼon utiaʼal maʼ u jáawal u kiʼimaktal k-óol yoʼolal k-Dios yéetel utiaʼal maʼ u jáawal k-uʼuyikba u jaajil cristianoʼon? Tuláakʼ xookoʼ tiʼ ken k-il baʼax kun áantkoʼoniʼ. Le baʼax ken k-iloʼ yaan u yeʼesiktoʼon lelaʼ: le jaajil cristianoʼoboʼ mix utéen ken u yaʼaloʼob maʼ taak u yojéeltkoʼob mix baʼal tiʼ u religionoʼobiʼ.
[Tsolajiloʼob]
^ xóot’ol 7 Teʼ xookaʼ táan u yúuchul tʼaan tiʼ k-ilik wa utúul jaajil cristianoʼon. Le máakoʼob ku tuʼubultiʼob máaxoʼob tumen yaan kʼojaʼanil tu pooloʼobeʼ, maʼ xaaneʼ kʼaʼabéet u binoʼob yiknal doctor utiaʼal ka áantaʼakoʼob.
¿Kʼajaʼan wa toʼon?
• ¿Bix k-nojbaʼalkuntikba tiʼ Yuumtsil?
• ¿Baʼax t-kanaj tiʼ Moisés yéetel tiʼ Asaf?
• ¿Máaxoʼob mix utéen tu tuʼubsoʼob letiʼobeʼ u palitsiloʼob Jéeoba?
• ¿Baʼaxten kiʼimak óol k-uʼuyikba u jaajil cristianoʼon?
[U kʼáatchiʼiloʼob le xookoʼ]
[U tsolajil le oochel teʼ táan juʼun 8]
Utéeneʼ Moiseseʼ tu chʼaʼaj saajkil u beet baʼax aʼalaʼab tiʼ
[U tsolajil le oochel teʼ táan juʼun 9]
Yaʼab tiʼ le máaxoʼob chúukpaj u yóoloʼob úuchiloʼ, maʼ tu tuʼubsoʼob letiʼobeʼ u palitsiloʼob Jéeoba