Maʼalob tsol nuʼukoʼob utiaʼal le tsʼokaʼan u beeloʼoboʼ
Maʼalob tsol nuʼukoʼob utiaʼal le tsʼokaʼan u beeloʼoboʼ
«Le atantsiloʼoboʼ ka yanakoʼob tu yáanal u páajtalil u yíichamoʼob, bey jeʼel bix tiʼ Yuumtsileʼ. Íichamtsileʼex yaabilt a wataneʼex.» (TIʼ EFESOILOʼOB 5:22, 25.)
1. ¿Bix unaj u yilaʼal le tsʼoʼokol beeloʼ?
JESUSEʼ tu yaʼaleʼ Dioseʼ tu tsʼáaj le tsʼoʼokol beel utiaʼal u nupik u kuxtal utúul xiib yéetel utúul koʼolel utiaʼal ka pʼáatkoʼob bey «juntúuli[liʼobeʼ]» (San Mateo 19:5, 6). Le tsʼoʼokol beel túunoʼ ku nupik u kuxtal kaʼatúul jejeláas wíinik táan yilik u yantaltiʼob upʼéeliliʼ tuukul tiʼ yaʼab baʼaloʼob bey xan tiʼ baʼax taak u beetkoʼob. Le tsʼoʼokol beeloʼ utiaʼal mantatsʼ, maʼ chéen utiaʼal u súutukiʼ mix xan utiaʼal u juʼubul chéen yoʼolal mix baʼaliʼ. Yaʼab tuʼuxeʼ maʼ talam u divorciarkuba máakiʼ, baʼaleʼ utiaʼal utúul cristianoeʼ kʼeban u divorciarkuba tiʼ u núup; chéen jeʼel u páajtal u divorciarkuba yoʼolal upʼéel baʼaleʼ (San Mateo 19:9).
2. 1) ¿Baʼax áantajil yaan tiʼ le cristianoʼob tsʼokaʼan u beeloʼoboʼ? 2) ¿Baʼaxten jach kʼaʼanan ka u yaabiltubaʼob?
2 Utúul koʼolel ku tsʼáaik nuʼuktaj tiʼ le tsʼokaʼan u beeloʼoboʼ tiaʼalaj: «Le máaxoʼob ku bin utsil tiʼoboʼ ku kʼexik u kuxtaloʼob jeʼex u bin kʼexpajal le kuxtalaʼ, ku aktáantkoʼob le talamiloʼob ku yantaltiʼoboʼ yéetel ku yilik u jóoʼskoʼob utsil tiʼ baʼaxoʼob áantkoʼob ichil u kuxtaloʼob». Le cristianoʼoboʼ ku jóoʼskoʼob utsil tiʼ u maʼalob tsol nuʼukoʼob le Bibliaoʼ, tiʼ u yáantaj le sukuʼunoʼoboʼ yéetel tiʼ u natsʼkubaʼob tiʼ Jéeoba ich payalchiʼ. Le íichamtsil yéetel le atantsil u yaabiltmubaʼoboʼ maʼ tu chaʼik u jaʼatsloʼob tumen mix baʼal; le bix u kuxtaloʼoboʼ ku taasik kiʼimak óolal tiʼob jeʼex u máan le jaʼaboʼoboʼ. U maas jaʼtsileʼ, ku taasik tsiikil tiʼ Jéeoba, le Máax tsʼaamil le tsʼoʼokol beeloʼ (Génesis 2:18, 21-24; 1 tiʼ Corintoiloʼob 10:31; Tiʼ Efesoiloʼob 3:15; 1 tiʼ Tesalonicailoʼob 5:17).
Kʼaʼabéet k-beetik jeʼex Jesús yéetel jeʼex le múuchʼuliloʼ
3. 1) ¿Baʼax tiaʼalaj Pablo tiʼ le tsʼokaʼan u beeloʼoboʼ? 2) ¿Bix unaj k-beetik jeʼex Jesuseʼ?
3 Teʼ yáax siglooʼ, le apóstol Pablooʼ tu yaʼalaj tiʼ le cristianoʼob tsʼokaʼan u beeloʼoboʼ: «Jeʼel bix le iglesia [wa múuchʼulil] tiʼ yaan tu yáanal u páajtalil Cristooʼ bey xan le atantsiloʼoboʼ unaj u yantal[oʼob] tu yáanal u páajtalil u yíichamoʼob tiʼ tuláakal baʼal. Íichamtsileʼex yaabilt a wataneʼex bey jeʼel bix Cristo tu yaabiltaj le iglesiaoʼ ka tu tsʼáaj u kuxtal tu yoʼolal» (Tiʼ Efesoiloʼob 5:24, 25). ¡Bukaʼaj jaʼtsil bix u keʼetel! Le atantsil ku yuʼubik u tʼaan u yíichamoʼ táan u beetik jeʼex le múuchʼuliloʼ, tumen táan u kʼamik le autoridad tsʼaʼan tu yóokʼol tumen Diosoʼ. Le cristiano maʼ tu xuʼulul u yaabiltik u yatan kex yaan talamileʼ, ku yeʼesik táan xan u beetik jeʼex Cristoeʼ, tumen letiʼeʼ tu yaabiltaj yéetel tu kanáantaj le múuchʼuliloʼ.
4. ¿Bix jeʼel u beetik jeʼex Jesús le íichamtsiloʼ?
4 Le íichamtsiloʼ letiʼ u joʼolil u yotoch, baʼaleʼ unaj u kʼaʼajskeʼ letiʼ xaneʼ yaan xan u joʼol: Cristo Jesús (1 tiʼ Corintoiloʼob 11:3). Jeʼex Cristo tu kanáantaj le múuchʼuliloʼ, le íichamtsil xanoʼ unaj u kanáantik yatan yéetel u paalal, unaj u yilik ka yanakoʼob naatsʼ tiʼ Dios yéetel kʼaʼabéet u tsʼáaik baʼax kʼaʼabéettiʼob, kex maʼ chéen chʼaʼabil ka u beetiʼ. Kʼaʼabéet u tsʼáaik táanil u yutsil u yatan yéetel u paalal. Jesuseʼ tiaʼalaj: «Beeteʼex mantatsʼ tiʼ uláakʼ máakoʼob le baʼax a kʼáateʼex ka u beetoʼob tiʼ teʼexoʼ» (San Mateo 7:12). Le maʼalob tsol nuʼukaʼ utiaʼal tak le íichamtsiloʼoboʼ. Bey tu yeʼesil Pablo ka tiaʼalaj: «Le íichamtsiloʼoboʼ unaj u yaabiltikoʼob u yatanoʼob, jeʼel bix u yaabiltikoʼob u wíinkliloʼobeʼ. [...] Tumen mix máak ku pʼektik u wíinklil, baʼaleʼ ku tséentik yéetel ku kanáantik» (Tiʼ Efesoiloʼob 5:28, 29). Le xiiboʼ unaj u tsʼáaik baʼax kʼaʼabéet tiʼ u yatan yéetel u kanáantik jeʼel bix u beetik yéetel u wíinklileʼ.
5. Le atantsiloʼ, ¿bix jeʼel u beetik jeʼex le múuchʼuliloʼ?
5 Le atantsil xanoʼ unaj u beetik jeʼex le múuchʼuliloʼ. Ka taal Jesús way Luʼumeʼ, u j-tsaypachoʼobeʼ tu pʼataj u meyajoʼob ka joʼopʼ u máanoʼob tu yéetel. Ka tsʼoʼok xan u suut teʼ kaʼanoʼ, maʼ xuʼul u yantaloʼob yáanal u páajtaliliʼ, yéetel teʼ dos mil jaʼaboʼob máanak tiʼ leloʼ, le jaajil cristianoʼoboʼ láayliʼ u tsʼaamubaʼob yáanal u páajtalil Cristoeʼ, tsʼoʼok u yuʼubkoʼob u tʼaan tiʼ tuláakal baʼal. Le atantsil cristiana xanoʼ maʼ tu tʼaan kʼaas tiʼ u yíicham yéetel ku yantal yáanal u páajtalil, tumen bey u yaʼalik le Biblia kʼaʼabéet u beetkoʼ. Ku yilik xan u yáantik yéetel u líiʼsik u yóol. Wa tu kaʼatulal ku beetkoʼob baʼax ku tsolnuʼuktaʼal tiʼobeʼ yaan u yantal kiʼimak óolal tiʼob.
«Muunchajak a puksiʼikʼaleʼex utiaʼal a wataneʼex»
6. ¿Baʼax tiaʼalaj Pedro tiʼ le íichamtsiloʼoboʼ, yéetel baʼaxten jach kʼaʼanan le baʼax tiaʼaloʼ?
6 Le apóstol Pedrooʼ tu tsolaj xan u nuʼuk tiʼ le tsʼokaʼan u beeloʼoboʼ. Tiaʼalaj tiʼ le íichamtsiloʼoboʼ: «Muunchajak a puksiʼikʼaleʼex utiaʼal a wataneʼex. Tsʼaʼex tiʼob le tsiikil unaj u tsʼaʼabal tiʼoboʼ [«jeʼel bix upʼéel vaso maas séeb u paʼapajleʼ», NM], maʼ chéen tumen [maas] muun u wíinklil le koʼoleloʼoboʼ, baʼaleʼ tumen letiʼobeʼ yaan tiʼob xan le kuxtal u tsʼaamaj teʼex Jajal Dios ichil u chʼaʼa óotsililoʼ. Beeteʼex beyoʼ utiaʼal maʼ u kʼaʼakʼatkuba mix baʼal tiʼ a payalchiʼex» (1 San Pedro 3:7). Le baʼax tu yaʼalaj tu tsʼookoʼ ku yeʼesiktoʼon lelaʼ: wa le íichamtsil maʼ tu yeʼesik tsiikil tiʼ u yataneʼ, jeʼel u xuʼulul u kʼaʼamal tumen Jéeobaeʼ yéetel maʼ tun uʼuybil u payalchiʼob.
7. ¿Bix u yeʼesik tsiikil tiʼ u yatan le íichamtsiloʼ?
7 ¿Bix u yeʼesik tsiikil tiʼ u yatan le íichamtsiloʼ? Ku tsikik ken u yeʼes u yaabiltmaj. U tsikik yéetel u yeʼesik u yaabilmeʼ upʼéel baʼal túumben utiaʼal yaʼab máakoʼob teʼ yáax siglooʼ. Utúul máak ku tʼaan tiʼ bix u kuxtal kaʼach le romanoʼoboʼ tiaʼalaj: «Tu yáanal u leyiloʼob Romaeʼ utúul koʼoleleʼ maʼ tu páajtal u kʼáatik mix baʼal. Tu táan le leyoʼoboʼ letiʼeʼ mantatsʼ bey utúul chan paaleʼ [...,] bey utúul palitsil utiaʼal yíichameʼ, [...] mix baʼal kanáantik tiʼ letiʼ». ¡Bukaʼaj jelaʼanil baʼax kiaʼalik le Biblia tiʼ le cristianoʼoboʼ! Unaj u yeʼeskoʼob tsiikil tiʼ u yatanoʼob, unaj u kuxtaloʼob tu yéeteloʼob jeʼex u nuʼuktik le Bibliaoʼ, maʼ chéen jeʼex u kʼáatoʼobeʼ. Kʼaʼabéet u muunchajal u puksiʼikʼaloʼob utiaʼal u yatanoʼob, yéetel unaj yilkoʼob «bey upʼéel vaso maas séeb u paʼapajleʼ».
¿Baʼaxten kiaʼalaʼal «bey upʼéel vaso maas séeb u paʼapajleʼ»?
8, 9. ¿Baʼaxten k-aʼalikeʼ xiibeʼ maʼ maas maʼalob tiʼ koʼoleliʼ?
8 Pedroeʼ maʼ tu tsʼáaj naʼatbil maas yaan u naʼat xiib tiʼ koʼoleliʼ mix xan tu tsʼáaj naʼatbil maas maʼalob u yilaʼal xiib tiʼ koʼolel tumen Diosiʼ. Jaaj, yaʼab meyajoʼob ku tsʼaʼabal tiʼ le xiib teʼ múuchʼuliloʼ maʼ tu páajtal u tsʼaʼabal tiʼ koʼolel; le atantsil xanoʼ kʼaʼabéet u yuʼubik u tʼaan yíicham (1 tiʼ Corintoiloʼob 14:35; 1 tiʼ Timoteo 2:12). Baʼaleʼ le xiib yéetel le koʼoleloʼ, tu kaʼatulal unaj u yoksaj óolkoʼob yéetel u chúukpajal u yóol u meyajtoʼob Dios yéetel u tsʼoʼokbeskoʼob baʼax kiaʼalik le Bibliaoʼ. Jeʼex tiaʼalij Pedrooʼ, tu kaʼatulal ku kʼamkoʼob «le kuxtal» ku tsʼáaik Diosoʼ. Jéeoba xaneʼ upʼéeliliʼ baʼax ku kʼáatiktiʼob utiaʼal u salvarkubaʼob (Tiʼ Galaciailoʼob 3:28). Le baʼax tiaʼalaj Pedrooʼ tiʼ le cristianoʼob kun binoʼob kaʼan tu yaʼalajoʼ; táan túun u kʼaʼajsik tiʼ le íichamtsil cristianoʼoboʼ u yatanoʼob xaneʼ yaan xan u binoʼob kaʼan, tumen tak letiʼob ken u kʼamoʼob le Reino yéetel Cristooʼ (Tiʼ Romailoʼob 8:17). Le cristianoʼob yéeyanoʼob yéetel u yatanoʼobeʼ yaan u beetik u sacerdoteiloʼob yéetel u reyiloʼob tu Reino Dios teʼ kaʼanoʼ (Apocalipsis 5:10).
9 Le cristianoʼob yéeyanoʼoboʼ maʼ maas maʼaloboʼob tiʼ u yatanoʼob yéeyanoʼob xaniʼ. Le xan jeʼel u páajtal k-aʼalik yoʼolal le máaxoʼob ku páaʼtik u kuxtaloʼob way Luʼumeʼ. Le xiiboʼob yéetel le koʼoleloʼob yanoʼob ichil le «yaʼabkach máakoʼob[aʼ]» ku pʼoʼik u nookʼoʼob yéetel ku sakkúunskoʼob tu kʼiʼikʼel le Tamanoʼ. Xiiboʼob yéetel koʼoleloʼobeʼ táan u nojbeʼenkúuntkoʼob Jéeoba «bul kʼiin yéetel bul áakʼab» teʼ tuláakal yóokʼol kaabaʼ (Apocalipsis 7:9, 10, 14, 15). Xiiboʼob yéetel koʼoleloʼobeʼ táan u páaʼtik u kʼamkoʼob «u nojbeʼen jáalkʼabtajil u paalaloʼob Jajal Dios» utiaʼal u kiʼikiʼ óolkoʼob «le kuxtal minaʼan u xuuloʼ» (Tiʼ Romailoʼob 8:21; 1 tiʼ Timoteo 6:19). Le cristianoʼob kun binoʼob kaʼan yéetel le kun pʼáatloʼob way Luʼumeʼ múuchʼ u meyajtkoʼob Jéeoba bey upʼéeliliʼ «u múuchʼul j-tamanoʼob» yáanal «juntúuliliʼ j-kanan taman[eʼ]» (San Juan 10:16). Tuláakal lelaʼ ku yeʼesik tiʼ le tsʼokaʼan u beeloʼoboʼ unaj u yeʼeskoʼob tsiikil tu baatsiloʼob.
10. ¿Baʼaxten kiaʼalaʼaleʼ le koʼoleloʼ «bey upʼéel vaso maas séeb u paʼapajleʼ»?
10 ¿Baʼaxten túun kiaʼalaʼaleʼ koʼoleleʼ «bey upʼéel vaso maas séeb u paʼapajleʼ»? Maʼ xaaneʼ, Pedroiʼ táan yaʼalikeʼ utúul koʼoleleʼ, u suukileʼ, maas kabal u baakel yéetel maas upʼíit u muukʼ tiʼ xiib. Yéetel tumen kʼeban wíinkoʼoneʼ, u jach jaʼtsil u wíiniktal utúul chan chaambal tu jobnel utúul koʼolel tak ken síijkeʼ jach ku beetik u xuʼupul le koʼoleloʼ. Utúul koʼolel tiaʼan tu kʼiiniloʼob tuʼux jeʼel u páajtal u embarazareʼ ku muʼyajtik kʼiʼinamiloʼob. Teʼ kʼiinoʼob beyaʼ, jach kʼaʼabéet u kanáantaʼal yéetel u naʼataʼal bey xan tu talam kʼiiniloʼob táan u páaʼtik u chaambal wa ken tsʼoʼokok u muʼyajtik u síijsik. Le íichamtsil ku yeʼesik tsiikil tiʼ u yatan yéetel ku tsʼáaik le áantaj kʼaʼabéet tiʼoʼ ku kiʼimakkúuntik u yóol u yatan.
Wa maʼ upʼéeliliʼ u religionoʼobiʼ
11. ¿Bix jeʼel u bin utsil tiʼ le tsʼokaʼan u beeloʼob kex maʼ upʼéeliliʼ u religionoʼobiʼ?
11 ¿Kux túun wa maʼ upʼéeliliʼ u religionoʼob tumen utúul tiʼ letiʼobeʼ tu kʼaj óoltaj u jaajil tsʼokaʼaniliʼ u beeloʼobeʼ? ¿Jeʼel wa u páajtal u bin utsil tiʼobeʼ? Le bix tsʼoʼok u yáantik u núup yaʼab cristianoʼobeʼ ku yeʼesik jeʼeleʼ. Kex yaanal baʼax ku oksaj óoltik cada utúuleʼ, jeʼel u páajtal u múul máansik u kuxtaloʼob ich kiʼimak óolaleʼ. Tu táan xan Jéeobaeʼ láayliʼ «juntúuli[liʼobeʼ]». Le beetik kiaʼalaʼal tiʼ le cristianooʼ ka pʼáatak yéetel u núup maʼ oksaj óolnajaʼaniʼ; wa u núup u kʼáateʼ kʼaʼabéet u pʼáatal tu yéetel. Wa yaan u paalaloʼobeʼ, le paalaloʼoboʼ ku jóoʼskoʼob utsil tiʼ u yoksaj óolal le taatatsil cristianooʼ (1 tiʼ Corintoiloʼob 7:12-14).
12, 13. Utúul kiikeʼ, ¿bix jeʼel u yáantik u yíicham maʼ oksaj óolnajaʼaneʼ?
12 Pedroiʼ kiaʼalik baʼax jeʼel u beetik le kiikoʼob maʼ oksaj óolnajaʼan u yíichamoʼoboʼ; lelaʼ láayliʼ xan jeʼel u meyaj tiʼ le sukuʼunoʼob maʼ oksaj óolnajaʼan u yatanoʼoboʼ. Pedroeʼ tiaʼalaj: «Atantsileʼex, tsʼáabaʼex yáanal u kʼab a wíichameʼex, utiaʼal beyoʼ wa yaan tiʼ letiʼob maʼ táan u yoksaj óoltikoʼob le maʼalob péektsiloʼ, ka kʼuchuk u yoksaj óoltoʼob tu yoʼolal bix a kuxtaleʼex teʼex, kex maʼ a waʼalikeʼex mix baʼal, le ken u yiloʼob a toj yéetel tsiikil kuxtaleʼex» (1 San Pedro 3:1, 2).
13 Yaan kʼiineʼ, le atantsiloʼ ku yilik jeʼel u páajtal u tsikbaltik tiʼ u yíicham baʼax ku kankeʼ. Baʼaleʼ ¿kux túun wa letiʼ maʼ u kʼáat u yuʼubiʼ? Wa beyoʼ, maʼ maʼalob ka u sen aʼal tiʼ. Baʼaleʼ, láayliʼ jeʼel u páajtal u yáantik yíichameʼ, tumen u kuxtal máak jeʼex utúul jaajil cristianoeʼ láayliʼ jach yaan u muukʼeʼ. Yaʼab íichamtsiloʼob kaʼacheʼ maʼ utstutʼaan u yuʼubkoʼob mix baʼaliʼ, yaan xaneʼ jach u puliʼ maʼ u kʼáatoʼob ka meyajtaʼak Jéeoba tumen u yatanoʼobiʼ, baʼaleʼ yoʼolal u maʼalob kuxtal u yatanoʼobeʼ bejlaʼeʼ tsʼoʼok u kʼamkoʼob u jaajil. Utúul íichamtsil j-jaajkunaj tiʼ Jéeoba u yataneʼ tiaʼalaj maʼ tu páajtal u tsʼoʼokbesik baʼax kiaʼalik le Bibliaoʼ. Baʼaleʼ tu túuxtaj upʼéel carta tiʼ upʼéel periódico tuʼux kiaʼalik «tsʼokaʼan u beel yéetel utúul koʼolel ku jach taasik kiʼimak óolal tiʼ», yéetel jach tʼaanaj maʼalob tu yoʼolal u j-jaajkunajoʼob Jéeoba.
14. Utúul sukuʼuneʼ, ¿bix jeʼel u yáantik u yatan maʼ oksaj óolnajaʼaneʼ?
14 Yaan xan sukuʼunoʼobeʼ tsʼoʼok beetkoʼob jeʼex tu yaʼalil Pedrooʼ, yéetel yoʼolal u maʼalob kuxtaloʼobeʼ tsʼoʼok u yáantik u yatanoʼob maʼ oksaj óolnajaʼanoʼobiʼ. U yatanoʼobeʼ ku yilkoʼobeʼ letiʼobeʼ ku maas tuukuloʼob tubeel, maʼatech u chéen xuʼuxupkoʼob le taakʼin tiʼ tsʼuʼutsʼ chamaloʼ mix tiʼ káaltal wa tiʼ buul, yéetel ku xulik u tʼaanoʼob kʼaas. Yaan atantsiloʼobeʼ ka tu kʼaj óoltoʼob uláakʼ j-jaajkunajoʼob tiʼ le múuchʼuliloʼ, jach jatsʼuts tu yiloʼob bix u biskubaʼob, le oʼolal tsʼoʼok xan u taaktal u natsʼkubaʼob tiʼ Jéeoba (San Juan 13:34, 35).
«A jatsʼutsileʼexeʼ unaj u yantal tu tsʼuʼ a puksiʼikʼaleʼex»
15, 16. ¿Bix unaj u kuxtal utúul kiik utiaʼal u yáantik u yíicham maʼ oksaj óolnajaʼaniʼ?
15 ¿Bix unaj u kuxtal utúul kiik utiaʼal u yáantik u yíicham? Unaj u kuxtal jeʼex ku páaʼtaʼal tiʼ utúul cristianaeʼ, Pedroeʼ tiaʼalaj: «A jatsʼutsileʼexeʼ maʼ u yantal tiʼ [...] u nikiʼ xáacheʼetaʼal u tsoʼotsel [pool wa tiʼ] jatsʼuts baʼaloʼob beetaʼan yéetel oro wa koʼokoj nookʼoʼob, baʼaleʼ a jatsʼutsileʼexeʼ unaj u yantal tu tsʼuʼ a puksiʼikʼaleʼex, jumpʼéel kiʼichkelemil maʼ táan u saʼatal, tumen tiʼ yaan tiʼ jumpʼéel chʼujuk jeetsʼel óoleʼ, tumen lelaʼ jach nojoch u tojol tu táan Jajal Dios. Tumen tiʼ le úuchben kʼiinoʼoboʼ bey tu jatsʼutskíintubaʼob le kiliʼich koʼoleloʼoboʼ[;] letiʼobeʼ tu alab óoltajoʼob Jajal Dios yéetel tu tsʼáajubaʼob tu yáanal u kʼab u yíichamoʼob. Bey tu beetil Sara, máax tu yuʼubaj u tʼaan Abraham yéetel tu yaʼalaj in yuumtsil tiʼ. Teʼexeʼ bíin kʼuchukeʼex béeytal jeʼel bix letiʼeʼ, wa ka beetikeʼex baʼax uts yéetel wa maʼ sajakeʼex tiʼ mix baʼaliʼ» (1 San Pedro 3:3-6).
16 Pedroeʼ kiaʼalik tiʼ le kiik tsʼokaʼan u beeloʼ maʼ u tsʼaatáantik chéen u kiʼichpanil, baʼaxeʼ ka u yil u yeʼesik tiʼ u yíicham bix tsʼoʼok u kʼexik u kuxtal yoʼolal le baʼax ku kanik teʼ Bibliaoʼ. Unaj u yeʼesik u túumben jatsʼuts modos tiʼ u yíicham utiaʼal ka páatak u keʼetel yéetel le modos yaan tiʼ kaʼachoʼ (Tiʼ Efesoiloʼob 4:22-24). U yíichameʼ yaan yilik u kiʼichpanil u yataneʼ ku taal tiʼ upʼéel «chʼujuk jeetsʼel óol». Utúul atantsil beyaʼ maʼ chéen ku lúubul utsil tiʼ u yíichamiʼ, ku lúubul utsil xan tiʼ Dios (Tiʼ Colosailoʼob 3:12).
17. Le atantsiloʼoboʼ, ¿baʼax kʼaʼabéet u beetkoʼob jeʼex Saraoʼ?
17 Pedroiʼ ku tʼaan tiʼ bix tu yuʼubil tʼaan Sara; le kiikoʼob xanoʼ bey unaj u beetkoʼoboʼ, kex yaanal u religión u yíichamoʼob. Utiaʼal Saraeʼ Abrahameʼ bey u yuumtsil kaʼacheʼ. Bey kaʼach tak u tʼanik ichil u puksiʼikʼaloʼ (Génesis 18:12). Baʼaleʼ lelaʼ maʼ tu mixbaʼalkúuntaj Sara tu tséel yíichamiʼ. Sara kaʼacheʼ maʼ sajak u beet baʼax maʼalobiʼ, muʼukʼaʼan kaʼach u yoksaj óolal. Le oʼolal táakaʼan ichil le yaʼabach máakoʼob tu yeʼesoʼob chúukaʼan u yoksaj óoloʼoboʼ. Le bix kuxlajikoʼoboʼ unaj u péekskoʼon «k-áalkabt yéetel chúukaʼan óolal le bej yaan táanil toʼonoʼ» (Tiʼ Hebreob 11:11; 12:1). U yuʼubik tʼaan utúul atantsil jeʼex tu beetil Saraeʼ, maʼ u kʼáat yaʼal wa tu taaskuba mix baʼalil tu tséel u yíichamiʼ.
18. ¿Baʼax unaj u kʼaʼajsik utúul cristiano yaanal u religión u núup?
18 Kex yaanal u religión cada utúuleʼ, le íichamtsiloʼ letiʼ u joʼolil u yotoch. Wa letiʼ le oksaj óolnajaʼanoʼ, kʼaʼabéet u yeʼesik tsiikil tiʼ baʼax ku oksaj óoltik u yatan, baʼaleʼ maʼ kʼaʼabéet u tsʼáaik juntséelil u ley Dios utiaʼal u kiʼimakkúuntik yóol u yataniʼ. Wa le atantsil letiʼ le oksaj óolnajaʼanoʼ bey xan unaj u beetkoʼ (Beetaʼanoʼob [Hechos] 5:29). Baʼaleʼ kʼaʼabéet u yuʼubik u tʼaan u yíicham tiʼ uláakʼ baʼaloʼob. Kʼaʼabéet u yeʼesik tsiikil tiʼ, yéetel kʼaʼabéet u yantal yáanal u páajtalil (Tiʼ Romailoʼob 7:2).
Le maʼalob tsol nuʼuk yaan teʼ Bibliaoʼ
19. ¿Baʼaxoʼob taasik talmil tiʼ le tsʼokaʼan u beeloʼoboʼ, yéetel bix jeʼel u aktáantaʼal le baʼaloʼobaʼ?
19 Teʼ kʼiinoʼobaʼ yaʼab baʼaxoʼob taasik talamil tiʼ le tsʼokaʼan u beeloʼoboʼ. Yaan íichamtsiloʼobeʼ maʼ tu tuukuloʼob tubeel; yaan xan atantsiloʼobeʼ maʼ tu yantaloʼob yáanal u páajtalil u yíichamoʼob. Yaan xaneʼ ku beetik loob tiʼ u núup. Le u minaʼantal xan taakʼin tiʼ máakoʼ, u tsʼíibolal le bakʼeloʼ, le bix u tuukul le máakoʼoboʼ, le kʼaakʼas baʼaloʼob ku beetaʼal bejlaʼaʼ yéetel le bix tsʼoʼok u kʼastal u yilaʼal baʼax maʼaloboʼ, jeʼel xan u kʼaskúuntik u kuxtal le cristianoʼob tsʼokaʼan u beeloʼoboʼ. Baʼaleʼ le cristianoʼob ku yilik u beetkoʼob baʼax kiaʼalik le Bibliaoʼ, ku yáantaʼaloʼob tumen Jéeoba. Kex chéen utúul tiʼ letiʼob ka u beetoʼob baʼax kiaʼalik le Bibliaoʼ, maas maʼalob ke wa mix utúul ka u beetiʼ. Jéeoba xaneʼ ku yaabiltik yéetel ku yáantik máaxoʼob meyajtik táan yilik u tsʼoʼokbeskoʼob baʼax tiaʼaloʼob ka tsʼoʼok u beeloʼob kex yaʼab talmiloʼob yaan bejlaʼeʼ. Jéeobaeʼ maʼ tu tuʼubsik u chúukaʼan yaabilajoʼob (Salmo 18:25; Tiʼ Hebreob 6:10; 1 San Pedro 3:12).
20. ¿Baʼax tsol nuʼuk ku tsʼáaik Pedro tiʼ le cristianoʼoboʼ?
20 Pedroeʼ ku tsʼoʼokol u tsolik u nuʼuk tiʼ le tsʼokaʼan u beeloʼob yéetel le jatsʼuts tʼaanoʼobaʼ: «Kuxleneʼex tuláakaleʼex ichil jumpʼéeliliʼ tuukul bey xan yéetel chʼaʼa óotsilil [...], yaabiltabaʼex jeʼel bix sukuʼunoʼobeʼ. Yanakteʼex muumun puksiʼikʼal bey xan kabal óolal. Maʼ a sutikeʼex kʼaas tu yoʼolal kʼaas, mix poochʼil tu yoʼolal poochʼil. Baʼax unajeʼ suteʼex kiʼikiʼ tʼaan, tumen Jajal Dioseʼ tsʼoʼok u tʼanikeʼex utiaʼal a kʼamikeʼex kiʼikiʼ tʼaan» (1 San Pedro 3:8, 9). Le tsol nuʼukaʼ jach maʼalob utiaʼal tuláakal, baʼaleʼ maas jach maʼalob utiaʼal le tsʼokaʼan u beeloʼoboʼ.
¿Kʼajaʼan wa toʼon?
• Le íichamtsil cristianooʼ, ¿bix jeʼel u beetik jeʼex Jesuseʼ?
• Le atantsil cristianaoʼ, ¿bix jeʼel u beetik jeʼex le múuchʼuliloʼ?
• ¿Bix jeʼel u yeʼesik tsiikil tiʼ u yatan le íichamtsiloʼ?
• Utúul kiik maʼ oksaj óolnajaʼan u yíichameʼ, ¿bix jeʼel u yáantikeʼ?
[U kʼáatchiʼiloʼob le xookoʼ]
[U tsolajil le oochel teʼ táan juʼun 24]
Utúul íichamtsil cristianoeʼ ku yaabiltik yéetel ku kanáantik u yatan
[U tsolajil le oochel teʼ táan juʼun 24]
Utúul atantsil cristianaeʼ ku yeʼesik tsiikil tiʼ u yíicham
[U tsolajil le oochel teʼ táan juʼun 25]
Le Bibliaoʼ maʼ jeʼex u leyiloʼob Roma kaʼacheʼ, tumen kiaʼalik tiʼ le íichamtsil ka u yeʼes tsiikil tiʼ u yatanoʼ
[U tsolajil le oochel teʼ táan juʼun 26]
Le xiiboʼob yéetel le koʼoleloʼob yanoʼob ichil le «uláakʼ j-tamanoʼob[oʼ]» táan u páaʼtkoʼob le kuxtal minaʼan u xuul teʼ Paraísooʼ
[U tsolajil le oochel teʼ táan juʼun 28]
Utiaʼal Saraeʼ Abrahameʼ bey u yuumtsil kaʼacheʼ