¿Bix k-eʼesik k-oksaj óoltik yaan u kaʼa kuxtal le kimenoʼoboʼ?
¿Bix k-eʼesik k-oksaj óoltik yaan u kaʼa kuxtal le kimenoʼoboʼ?
«Ka jeʼik a kʼabeʼ, [...] ka naʼajkunsik [wa «ka tsʼáaik baʼax u kʼáat», NM] tuláakal le kuxaʼan baʼaloʼoboʼ.» (SALMO 145:16.)
1-3. ¿Baʼax tu yaʼalaj kaʼatúul j-jaajkunajoʼob ku yeʼesik baʼax ku oksaj óoltkoʼob kaʼachi?
UPʼÉEL jaʼatskabeʼ, Christopher, nueve u jaʼabiloʼobeʼ, jóokʼ kʼaʼaytaj yéetel u sukuʼun, u tío, u tía yéetel kaʼatúul u primoʼob maʼ náach tiʼ u noj kaajil Manchester, Inglaterraiʼ. Le revista ¡Despertad! ku tsolik baʼax úuch teʼ kʼiin jeʼeloʼ: «Tu chíinil kʼiineʼ binoʼob xíimbal Blackpool, upʼéel kaaj jáal jaʼ yaan, maʼ náach teʼ tuʼux yanoʼoboʼ. Baʼaleʼ tu seisiloʼobeʼ u patiʼ úuchik u kíimloʼob yéetel uláakʼ seis utúul máakoʼob tiʼ upʼéel nojoch loob úuch teʼ noj bej ku biskoʼob kaʼachoʼ».
2 Tu áakʼabil táanil tiʼ u yúuchul lelaʼ Christopher, u sukuʼun yéetel u taataʼobeʼ binoʼob tu Xookil Libro, teʼ kʼiin jeʼeloʼ le xookoʼ tʼaanaj tiʼ le kíimiloʼ. U taata le chan xiʼipalaʼ tiaʼalaj: «Christophereʼ jach ku tuukul kaʼach tiʼ baʼax ku kanik. Teʼ áakʼab jeʼeloʼ tu tsolaj tubeel bix le kuxtal kun antal teʼ túumben luʼum ku oksaj óoltikoʼ. Tsʼoʼoleʼ, le táan le xookoʼ, Christophereʼ tu jáan aʼalaj: “U beetkuba máak j-jaajkunaj tiʼ Jéeobaeʼ jach maʼalob, tumen kex le kíimil ku beetik u jach muʼyaj máakeʼ, k-ojleʼ yaan u kʼuchul u kʼiinil k-kaʼa ilikbaʼex way Luʼumeʼ”. Tuláakal le muchʼukbaloʼonoʼ maʼ t-tuklaj wa yaan k-kʼaʼajsik mantatsʼ le baʼax tu yaʼaloʼ». *
3 Tu jaʼabil 1940, yaʼab jaʼaboʼob táanil tiʼ u yúuchul lelaʼ, utúul j-jaajkunaj Austriai, ku kʼaabaʼtik Franzeʼ, aʼalaʼab tiʼ yaan u kíimsaʼal tumen maʼ tu yóotaj u xul u meyajtik Jéeobaiʼ. Le kʼalaʼan tu kaajil Berlinoʼ, Franzeʼ tu tsʼíibtaj tiʼ u maama: «Wa ka in waʼal jeʼel in beetkimba soldadoi kaʼach kex tsʼoʼok in kanik baʼax ku yaʼalik le Bibliaoʼ bejlaʼa tsʼoʼok in lúubul tiʼ upʼéel nojoch kʼeban minaʼan saʼatsajil tiʼeʼ. Leloʼ jeʼel u beetik u jach yaatal in wóol kaʼacheʼ. Bejlaʼa maʼ kin kaʼa kuxtaleʼ. [...] Mami, in sukuʼuneʼex yéetel in wíitsʼineʼex, bejlaʼeʼ aʼalaʼabten yaan in kíimsaʼal, baʼaleʼ maʼ u lúubul a wóoleʼex. Sáamal jaʼatskab in kíimsaʼal. Baʼaleʼ, Dios tsʼáaikten muukʼ, jeʼex úuchik u tsʼáaik tiʼ le máaxoʼob meyajt úuchiloʼ. [...] Wa ku chúukpajal a wóoleʼex tak tu xuuleʼ, yaan k-ilikbaʼex ken kaʼa kuxkíintaʼaken. [...] Tiʼ ken k-ilbaʼex tukaʼateniʼ». *
4. ¿Bix k-uʼuyikba yoʼolal baʼax tu oksaj óoltaj Christopher yéetel Franz, yéetel baʼax ken k-kan beoraaʼ?
4 Christopher yéetel Franzeʼ tu oksaj óoltoʼob jach tu jaajil yaan u kaʼa kuxkíintaʼal le kimenoʼoboʼ. Tu yiloʼob bey upʼéel baʼal jach yaan u yúuchuleʼ. U jaajileʼ, le baʼax tu beetoʼobaʼ jach ku péeksik k-óol. Baʼaleʼ, utiaʼal k-maas tsʼáaik nib óolal tiʼ Jéeoba yéetel utiaʼal jach k-oksaj óoltik yaan u kaʼa kuxkíintaʼal le kimenoʼoboʼ, koʼoneʼex ilik baʼaxten yaan u kaʼa kuxtal le kimenoʼoboʼ yéetel baʼax unaj u péekskoʼon k-beete.
Eʼesaʼab bix le kaʼa kuxtal kun antal way Luʼumoʼ
5, 6. ¿Baʼax ku yeʼesiktoʼon le baʼax tu yilaj apóstol Juan ku chíikpajal tu libroi Apocalipsis 20:12, 13?
5 Le ka tsʼaʼab tiʼ apóstol Juan u yil baʼax kun úuchul ken gobernarnak Jesús tu yáam le mil jaʼaboʼoboʼ, tu yilaj xan bix kun kaʼa kuxtal le kimenoʼoboʼ. Letiʼeʼ tu yaʼalaj: «Tin wilaj le kimenoʼoboʼ, nuuktakoʼob yéetel mejentakoʼob [...]. Le kʼáaʼnáaboʼ tu kʼubaj le kimenoʼob yaan ichiloʼ, le kíimiloʼ yéetel u kúuchil le kimenoʼoboʼ tu kʼubajoʼob xan le kimenoʼob yaan tiʼoboʼ» (Apocalipsis 20:12, 13). Tuláakal le máaxoʼob yanoʼob tu «kúuchil le kimenoʼob» (teʼ Hades wa Seoloʼ), yaan u kaʼa líiʼsaʼaloʼob: «nuuktakoʼob» yéetel «mejentakoʼob». Le máaxoʼob kíimoʼob teʼ kʼáaʼnáaboʼ yaan xan u kaʼa kuxtaloʼob. Le u kuxkíintik le kimenoʼoboʼ táakaʼan ichil baʼax u tukulmaj u beetik Jéeoba.
6 Le ken káajak u gobernar tu yáam le mil jaʼaboʼoboʼ, Cristoeʼ yaan u kʼaxik yéetel yaan u kʼalik Satanás. Satanás túuneʼ maʼ kun páajtal u tusik mix utúul tiʼ le kun kaʼa kuxtaloʼoboʼ mix le kun pʼáatloʼob ken tsʼoʼokok le nojoch yaayaj óolal kun antaloʼ, tumen teʼ kʼiinoʼoboʼ luʼsaʼan u páajtalil (Apocalipsis 20:1-3). Maʼ xaneʼ mil jaʼaboʼobeʼ jach yaʼab k-uʼuyik, baʼaleʼ utiaʼal Jéeobaeʼ chéen «bey jumpʼéel kʼiineʼ» (2 Pedro 3:8).
7. Ichil le mil jaʼaboʼob kun reinar Cristooʼ, ¿baʼax kun meyaj utiaʼal u pʼiis óoltaʼal le máakoʼob kun kaʼa kuxtaloʼoboʼ?
7 Apóstol Juaneʼ ku yaʼalikeʼ, ichil le mil jaʼaboʼob kun reinar Cristooʼ tiʼ kun pʼiis óoltbil le máakoʼoboʼ, tumen tu tsʼíibtaj: «Tin wilaj le kimenoʼoboʼ, nuuktakoʼob yéetel mejentakoʼob, waʼalakbaloʼob tu táan Jajal Dios; ka jeʼekʼabtaʼab le libroʼoboʼ, jeʼekʼabtaʼab xan uláakʼ libro, lelaʼ u libroil le kuxtaloʼ. Le kimenoʼoboʼ pʼis óoltaʼaboʼob tu yoʼolal le baʼaxoʼob u beetmajoʼobeʼ jeʼel bix tsʼíibtaʼanil tiʼ le libroʼoboʼ. [...] Tuláakaloʼob pʼis óoltaʼaboʼob jeʼel bix le baʼaloʼob u beetmajoʼobeʼ» (Apocalipsis 20:12, 13). Lelaʼ ku kaʼansiktoʼoneʼ, le kun kaʼa kuxtaloʼoboʼ maʼ kun pʼis óolbiloʼob yoʼolal le baʼaxoʼob tu beetoʼob wa xuʼul u beetkoʼob táanil tiʼ u kíimloʼoboʼ (Romailoʼob 6:7). Le tekstooʼ tu yaʼaleʼ yaan u jeʼekʼabtaʼal «libros». K-ilik túuneʼ le baʼax ken u beet le máakoʼob ken tsʼoʼokok u kʼaj óoltikoʼob le baʼaxoʼob tsʼíibtaʼan teʼ libroʼoboʼ le kun meyaj utiaʼal u yilaʼal wa yaan u tsʼíibtaʼal u kʼaabaʼob tu «libroil le kuxtaloʼ» wa maʼ.
Yaan u líiʼsaʼaloʼob «utiaʼal u yantal kuxtal tiʼob» wa «utiaʼal ka xotʼ kʼintaʼakoʼob»
8. ¿Baʼax kaʼa kuxtalil tu yaʼalaj Jesús kun yantal?
8 Tu káajbal le náay tu yilaj Juanoʼ, ku yaʼalaʼaleʼ Jesuseʼ u chʼaʼamaj «u llaveiloʼob le kíimiloʼ, bey xan utiaʼal u kúuchil le kimenoʼoboʼ» (Apocalipsis 1:18). Letiʼeʼ táan u meyajtik Jéeoba bey «le máax ku tsʼáaik kuxtaloʼ» yéetel yaan páajtalil tiʼ utiaʼal u pʼis óoltik «le kuxaʼanoʼob yéetel le kimenoʼoboʼ» (Beetaʼanoʼob 3:15; 2 Timoteo 4:1). ¿Bix ken u beeti? Utiaʼal lelaʼ yaan u líiʼsik le kimenoʼoboʼ. Jesuseʼ tu yaʼalaj tiʼ le máaxoʼob uʼuykoʼ: «Maʼ u jaʼakʼal a wóoleʼex tu yoʼolal lelaʼ, tumen bíin kʼuchuk u kʼiinil le ken uʼuyaʼak u tʼaan tumen tuláakal le kimenoʼoboʼ yéetel bin jóoʼkoʼob tiʼ le muknaloʼoboʼ». Ka tu yaʼalaj xan: «Le máaxoʼob tu beetajoʼob utseʼ, bíin kaʼapúut kuxlakoʼob utiaʼal u yantal kuxtal tiʼob; baʼaleʼ le máaxoʼob tu beetajoʼob kʼaaseʼ, bíin kaʼapúut kuxlakoʼob utiaʼal ka xotʼkʼintaʼakoʼob» (Juan 5:28-30). ¿Baʼax túun ku páaʼtik le máaxoʼob meyajt Dios úuchiloʼ?
9. 1) ¿Baʼax ken u kan le máaxoʼob kun kaʼa kuxtaloʼoboʼ? 2) ¿Baʼax nojoch meyajil kun beetbil?
9 Ken kaʼa kuxlak le máaxoʼob chúukpaj u yóoloʼob u meyajtoʼob Jéeoba úuchiloʼ yaan u yilkoʼob tsʼoʼok u béeychajal le baʼaxoʼob tu oksaj óoltoʼoboʼ. Maʼ xaaneʼ yaan wal u taaktal u yojéeltikoʼob máax u paal u yatan Dios ku yaʼalaʼal tu libroi Génesis 3:15, u yáax profecíai le Bibliaoʼ. Yéetel maʼ xaaneʼ, yaan wal u kiʼimaktal u yóoloʼob ken u yojéeltoʼob Jesús, le Mesías aʼalaʼanoʼ, chúukpaj u yóol tak ka kíim utiaʼal u tsʼáaik u kuxtal tu yoʼolal tuláakal máak (Mateo 20:28). Le máaxoʼob kun kaʼa kuxtaloʼobaʼ yaan u yáantaʼaloʼob tumen le máaxoʼob kun kʼamkoʼoboʼ utiaʼal ka u naʼatoʼob le úuchik u kʼubik u kuxtal Jesusoʼ ku yeʼesik u nojoch utsil Jéeoba bey xan u chʼaʼa óotsilil. Ken ojéeltaʼak tumen le máaxoʼob kun kaʼa kuxtaloʼob tuláakal le baʼax táan u beetik u Reino Dios utiaʼal u béeykuntik tuláakal baʼax u tukulmaj Dios utiaʼal le Luʼumaʼ, yaan u kiʼikiʼtʼantkoʼob Jéeoba. Yaan u sen yantal baʼax oʼolal u chúukpajal u yóoloʼob u meyajtoʼob Jéeoba yéetel Jesús. Tuláakal máakeʼ yéetel kiʼimak óolal kun táakpajal u kaʼansoʼob u millonesi máakoʼob kun kaʼa kuxtaloʼoboʼ, tumen tak letiʼobeʼ yaan u kʼamkoʼob le boʼol tu tsʼáaj Jesús t-óolaloʼ.
10, 11. 1) ¿Baʼaxoʼob kun páajtal u beetik tuláakal le máaxoʼob kun kuxtaloʼob teʼ luʼum ichil le mil jaʼaboʼoboʼ? 2) ¿Baʼax unaj k-beetik wa k-kʼáat antaliʼ?
10 Ken kaʼa kuxlak Abrahameʼ, yaan u kiʼimaktal u yóol tumen yaan u kuxtal yáanal u gobernación le «kaaj» tu sen páaʼtoʼ (Hebreob 11:10). Job xaneʼ yaan u kiʼimaktal u yóol ken u yojéelt le bix úuchik u chúukpajal u yóoloʼ tu muʼukʼankúuntaj u yóol uláakʼ máaxoʼob tu máansoʼob xan talamiloʼob. Profeta Danieleʼ yaan xan u taaktal u yojéeltik bix béeychajik le baʼaxoʼob aʼalaʼab tiʼ ka u tsʼíibtoʼ.
11 U jaajileʼ, tuláakal le máaxoʼob kun kuxtaloʼob teʼ túumben luʼum, kex wa kaʼa kuxtal ken u beetoʼob bey xan wa tu máansoʼob le nojoch yaayaj óolaloʼ, yaʼab baʼax ken u kanoʼob tiʼ baʼax u tukulmaj Dios utiaʼal le Luʼumaʼ yéetel utiaʼal u kajnáaliloʼob. U páajtalil u kuxtal máak utiaʼal mantatsʼ yéetel u kiʼikiʼtʼantik Jéeobaeʼ yaan u beetik u jatsʼutstal u yilik máak u kaambal. Baʼaleʼ, baʼax maas kʼaʼananeʼ letiʼe baʼax ken u beet cada utúul tiʼ toʼon ken u kan le baʼaxoʼob tsʼíibtaʼan teʼ libroʼoboʼ. ¿Yaan wa k-beetik le baʼax ken k-kanoʼ? ¿Yaan wa k-tuukul tiʼ le baʼaxoʼob ken k-kan utiaʼal k-muʼukʼankúuntik óol yéetel utiaʼal maʼ k-chaʼik lúubsaʼal tumen Satanás ken jáalkʼabtaʼakoʼ?
12. ¿Baʼaxten teʼ Luʼum sutaʼan paraísoiloʼ maas yaan u páajtal u táakpajal máak u kaʼans le kun kaʼa kuxtaloʼoboʼ?
12 Maʼ unaj k-tuʼubsik le utsiloʼob kun yantal ikil tu kʼubil u kuxtal Jesús t-oʼolaloʼ. Le máaxoʼob kun kaʼa kuxtaloʼoboʼ maʼ ken u muʼyajtoʼob kʼojaʼanil tu kaʼatéen (Isaías 33:24). Le toj óolal kun yantal tiʼ tuláakal le máakoʼob kun kuxtaloʼob teʼ túumben luʼumoʼ yaan u tsʼáaik u páajtalil u kʼubikubaʼob u kaʼansoʼob u bejil le kuxtal tiʼ u millonesi máakoʼob kun kaʼa kuxtaloʼoboʼ. Tsʼoʼoleʼ yaan xan u táakpajaloʼob tiʼ upʼéel meyaj mix utéen beetaʼak way Luʼumeʼ: u sutkoʼob le Luʼum upʼéel paraísoi utiaʼal u nojbeʼenil Jéeobaoʼ.
13, 14. ¿Baʼaxten yaan u jáalkʼabtaʼal Satanás tu tsʼoʼokbal le mil jaʼaboʼoboʼ, yéetel baʼax páajtalil ku tsʼaʼabal tu táan tuláakal máak?
13 Ken chaʼabak Satanaseʼ yaan u yilik u náachkuntik yaʼab máakoʼob tiʼ Dios. Jeʼex u yaʼalik Apocalipsis 20:7-9, le «kaajoʼob» wa le múuchʼ máakoʼob tusaʼaboʼob tumen Satanasoʼ yaan u xotʼkʼintaʼaloʼob utiaʼal kíimil, yéetel yaan u «yéemel kʼáakʼ» teʼ kaʼan utiaʼal ka «láaj tóo[kaʼakoʼoboʼ]». Le máakoʼob kun kaʼa kuxtaloʼob ken u tsʼáaubaʼob tu tséel Satanaseʼ yaan u xuʼulsaʼaltiʼob, leloʼ u kʼáat u yaʼaleʼ kaʼa kuxlajoʼob utiaʼal ka xotʼkʼintaʼakoʼob. Baʼaleʼ, le máaxoʼob kun chúukpajal u yóoloʼobeʼ yaan u kʼamikoʼob upʼéel kuxtal minaʼan u xuul, beyoʼ jeʼel u páajtal u yaʼalaleʼ kaʼa kuxlajoʼob «utiaʼal u yantal kuxtal tiʼob» (Juan 5:29).
14 ¿Bix u líiʼsik óol k-ojéeltik yaan u kaʼa kuxtal le kimenoʼoboʼ? ¿Baʼax unaj k-beetik utiaʼal k-kʼamik le utsiloʼob ken u taas le kaʼa kuxtal kun yantaloʼ?
Kaʼapʼéel baʼal maʼ unaj u tuʼubul toʼoniʼ
15. ¿Bix u yáantikoʼon k-ojéeltik yaan u kaʼa kuxtal le kimenoʼoboʼ?
15 Maʼ xaneʼ yaan utúul k-láakʼtsilil tsʼoʼok u kíimil yéetel istikiaj k-éejemtik wa minaʼan t-éetel. Baʼaleʼ k-ojéeltik yaan u kaʼa kuxtal le kimenoʼoboʼ ku jetsʼik k-óol yéetel ku tsʼáaiktoʼon muukʼ, upʼéel baʼax minaʼan tiʼ máaxoʼob maʼ u kʼaj óoloʼob u jaajiliʼ. Pabloeʼ tu líiʼsaj u yóol le tesalonicailoʼob yéetel le tʼaanoʼobaʼ: «Sukuʼuneʼex maʼ k-kʼáat ka pʼáatak maʼ a wojéeltikeʼex baʼax ku yúuchul yéetel le kimenoʼoboʼ, utiaʼal maʼ u okʼomtal a wóoleʼex jeʼel bix le u láakʼ máakoʼob [...] minaʼan alab óolal tiʼob[oʼ]» (1 Tesalonicailoʼob 4:13). ¿K-ilik wa bey tiʼ yanoʼon teʼ túumben Luʼum, táan k-ilik u kaʼa kuxkíintaʼal le kimenoʼoboʼ? Wa beyoʼ, yaan u líikʼil k-óol wa k-tuklik yaan k-kaʼa ilikba yéetel le máaxoʼob k-yaabiltmoʼoboʼ.
16. ¿Bix ken k-uʼuyba ken joʼopʼok u kaʼa kuxkíintaʼal le kimenoʼoboʼ?
16 Maʼ xaaneʼ táan k-máansik wa baʼax kʼojaʼanil tu yoʼolal le kʼeban tu máansajtoʼon Adanoʼ. Wa beyoʼ, maʼ unaj k-chaʼik u tuʼubultoʼon wa ka kíimkoʼoneʼ jeʼel k-kaʼa kuxkíintaʼal tiʼ upʼéel túumben Luʼum tuʼux kun antal toj óolal mantatsʼeʼ. Ken kaʼa kuxlakoʼon yéetel ken k-il jach kiʼimak u yóol le máaxoʼob kʼamkoʼonoʼ, yaan k-jach tsʼáaik nib óolal tiʼ Dios yoʼolal u yutsil.
17, 18. ¿Baʼax kaʼapʼéel baʼal maʼ unaj k-tuʼubsikiʼ?
17 Baʼaleʼ, le maʼ kʼuchuk u kʼiinil u yúuchul lelaʼ, koʼoneʼex kanik kaʼapʼéel baʼal maʼ unaj k-tuʼubsikiʼ. Yáaxeʼ kʼaʼabéet k-meyajtik Jéeoba jach tu jaajil k-óol bejlaʼeʼ. Jeʼex tu beetil k-yuum Jesucristoeʼ, wa k-tsʼáaik táanil k-meyajtik Jéeobaeʼ k-eʼesik yaabilaj tiʼ letiʼ yéetel tiʼ k-éet wíinikil. Wa le chʼaʼa pʼektajil ku talamkúuntik k-kaxtik kuxtal, bey xan wa ku beetik k-kʼaʼalal carceleʼ, kʼaʼabéet k-chʼaʼatuklik maʼ ken k-chaʼa k-lúubsaʼal tumen mix baʼal. Ken k-ilba tu táan le kíimiloʼ, k-ojéeltik yaan k-kaʼa kuxtaleʼ ku líiʼsik k-óol yéetel ku muʼukʼankúunskoʼon utiaʼal ka chúukpajak k-óol meyajt Jéeoba yéetel u Reino. Jach beyoʼ, wa k-jach tsʼáaik k-óol kʼaʼayt le Reino yéetel k-ilik kaʼansik tiʼ u maasileʼ yaan k-kʼamik le utsiloʼob u yaʼalmaj Jéeoba u tsʼáaik tiʼ le toj u kuxtaloʼoboʼ.
18 U kaʼapʼéeleʼ yaan yil yéetel bix k-aktáantik u tsʼíibolal le kʼeban yaan t-wíinkliloʼ. Wa k-oksaj óoltik yaan u kaʼa kuxtal le kimenoʼob yéetel wa k-tsʼáaik nib óolal yoʼolal u yutsil Jéeobaeʼ ku tsʼáaiktoʼon u muukʼil utiaʼal maʼ k-náachtal tiʼ Dios. Apóstol Juaneʼ tu yaʼalaj: «Maʼ a yaabiltikeʼex yóokʼol kaab, mix le baʼaloʼob yaan yóokʼol kaaboʼ. Wa yaan máax ku yaabiltik yokʼol kaabeʼ, maʼ u yaabiltmaj Jajal Dios le Taataoʼ; tumen mix baʼal tiʼ le baʼaxoʼob ku yaʼalik u tsʼáaik yóokʼol kaaboʼ tiʼ Jajal Dios le taata u taaloʼ, baʼaleʼ tiʼ yóokʼol kaab u taal. U kʼaakʼas tsʼíibolaloʼob le luʼumkabil wíinkliloʼ, u kʼaakʼas tsʼíibolalil le ichoʼ, yéetel u kaʼanal ichil ku yantal tu yoʼolal u baʼaliloʼob le kuxtaloʼ, tuláakal lelaʼ letiʼ le baʼaxoʼob ku yaʼalik yóokʼol kaab u tsʼáaikoʼ. Le yóokʼol kaaboʼ táan u bin u xuʼulul yéetel tuláakal le kʼaakʼas tsʼíibolaloʼob yaan tu yóokʼoloʼ; baʼaleʼ le máax ku beetik baʼax u kʼáat Jajal Dioseʼ ku pʼáatal utiaʼal kʼiinoʼob minaʼan u xuul» (1 Juan 2:15-17). Yaan u jáawal k-tsʼíiboltik u ayikʼalil le yóokʼol kaab wa k-ketik le «kuxtal minaʼan u xuul» tu yéeteloʼ (1 Timoteo 6:17-19). Yaan xan k-beetik tuláakal le ku páajtal utiaʼal maʼ k-lúubul tiʼ núup kʼeban kex ka túulchʼintaʼakoʼon, tumen k-ojleʼ wa k-kíimil táanil tiʼ u taal le Armagedón, táan k-beetik baʼax maʼ utstutʼaan Dioseʼ, maʼ ken kaʼa kuxkíintbil jeʼex uláakʼ máakoʼob maʼ kun kaʼa kuxkíintbiloʼoboʼ.
19. ¿Baʼax maʼ unaj k-tuʼubsikiʼ?
19 U jaajileʼ, mix utéen unaj k-tuʼubsik jach nojoch baʼal k-tiaʼal k-kiʼimakkúuntik u yóol Jéeoba bejlaʼeʼ yéetel utiaʼal mantatsʼ (Proverbios 27:11). Wa ku chúukpajal k-óol meyajt tak ken kíimkoʼon wa tak ken xuʼulsaʼak le kʼasaʼan yóokʼol kaabaʼ, k-eʼesik k-kʼáat ka gobernarnak chéen Jéeoba. ¿Máasaʼ yaan u taasiktoʼon kiʼimak óolal k-kuxtal teʼ Paraíso, kex wa ka máankoʼon kuxaʼanoʼon teʼ nojoch yaayaj óolaloʼ wa ka kaʼa kuxkíintaʼakoʼon?
Yaan u tsʼaʼabaltoʼon le baʼax k-kʼáatoʼ
20, 21. ¿Baʼax kun áantkoʼon utiaʼal maʼ k-náachtal tiʼ Jéeoba kex yaʼab kʼáatchiʼob maʼ núukaʼaktoʼon yaan yil yéetel le kaʼa kuxtaloʼ?
20 Kex tsʼoʼok k-kanik yaʼab baʼaloʼob yoʼolal le kaʼa kuxtaloʼ láayliʼ yaan kʼáatchiʼob maʼ k-ojel u núukiloʼobiʼ. Jeʼex, ¿baʼax kun úuchul yéetel le máaxoʼob tsʼokaʼan u beeloʼob ka kíimoʼoboʼ? (Lucas 20:34, 35.) ¿Yaan wa u kaʼa kuxtal le kimenoʼob jach teʼ tuʼux kíimoʼoboʼ? ¿Yaan wa u líikʼloʼob náatsʼ tuʼux kajaʼan u láakʼtsililoʼob? Láayliʼ yaan kʼáatchiʼob yaan yil yéetel le kaʼa kuxtal maʼ k-ojel u núukiloʼobiʼ. Baʼaleʼ, kʼaʼajaktoʼon le baʼax tu yaʼalaj Jeremíasaʼ: «Yuumtsileʼ uts yéetel le máaxoʼob u kʼubmaj u yóoloʼob tiʼoʼ bey xan yéetel le máaxoʼob kaxtikoʼ. [Maas] maʼalob u páaʼtaʼal x-maʼ tʼaanil u yáantaj Yuumtsil» (Lamentaciones 3:25, 26). Ken kʼuchuk u kʼiinileʼ Jéeobaeʼ yaan u núukik tuláakal k-kʼáatchiʼob. ¿Baʼaxten k-jach oksaj óoltik yaan u beetik?
21 Tuukulnakoʼon tiʼ le baʼax tu kʼayaj le salmista tiʼ Jéeobaoʼ: «Ka jeʼik a kʼabeʼ, [...] ka naʼajkunsik [wa «ka tsʼáaik baʼax u kʼáat», NM] tuláakal le kuxaʼan baʼaloʼoboʼ» (Salmo 145:16). Le baʼax k-kʼáatoʼ ku bin u kʼexpajal jeʼex u bin u máan le kʼiinoʼoboʼ. Le baʼax k-tsʼíiboltik kaʼach t-paalileʼ bejlaʼeʼ maʼatech k-tsʼíiboltik. Le baʼaxoʼob tsʼoʼok k-máansik yéetel le baʼaxoʼob k-kʼáatoʼ ku jelaʼankúuntik bix k-ilik le kuxtaloʼ. Baʼaleʼ, teʼ túumben luʼumoʼ Jéeobaeʼ yaan u tsʼáaiktoʼon jeʼel baʼalak ka k-tsʼíibolteʼ.
22. ¿Baʼaxten unaj kiʼikiʼtʼantik Jéeoba?
22 Baʼax maas kʼaʼanan bejlaʼeʼ ka chúukpajak k-óol meyajt Jéeoba. Le Bibliaoʼ ku yaʼalik: «Le máax kʼubéentaʼan wa baʼax tiʼeʼ unaj u yeʼesik u kʼubmaj u yóol tiʼ baʼax kʼubéentaʼan tiʼ» (1 Corintoiloʼob 4:2). Toʼoneʼ táan k-kʼaʼaytik u maʼalob péektsilil u Reino Dios. Wa k-tsʼáaik óol k-kʼaʼayt tiʼ tuláakal máakeʼ yaan u yáantkoʼon utiaʼal maʼ k-jóokʼol tiʼ u bejil le kuxtaloʼ. Maʼ u tuʼubultoʼoneʼ tiʼ tuláakal máak jeʼel u jáan úuchul loobeʼ (Eclesiastés 9:11). Kʼaʼabéet k-jach oksaj óoltikeʼ yaan u kaʼa kuxtal le kimenoʼoboʼ, beyoʼ maʼ ken k-jach chiʼichnaktal yoʼolal jeʼel baʼaxak ka úuchuktoʼon tu kʼiinil sáamaleʼ. Wa k-ilik yaan k-kíimil táanil tiʼ u káajal u reinar Cristo teʼ mil jaʼaboʼoboʼ, unaj k-líiʼsik óol yéetel u kaʼansajil le kaʼa kuxtaloʼ. Ken kʼuchuk u kʼiinileʼ Jéeobaeʼ yaan u beetik le baʼax tu yaʼalaj Jobaʼ: «Techeʼ bíin a tʼanen, teen xaneʼ bíin in núuk a tʼaan». Le oʼolaleʼ, koʼoneʼex kiʼikiʼtʼantik Jéeoba, tumen letiʼeʼ táan u páaʼtik u kʼuchul u kʼiinil u kuxkíintik le kimenoʼob u pʼatmoʼob tu tuukuloʼ (Job 14:15).
[Tsolajiloʼob]
^ xóot’ol 2 Ilaʼak ¡Despertad! 8 tiʼ julio tiʼ 1988, t.j. 10, jóoʼsaʼan tumen u j-jaajkunajoʼob Jéeoba.
^ xóot’ol 3 Los testigos de Jehová, proclamadores del Reino de Dios, t.j. 662, jóoʼsaʼan tumen u j-jaajkunajoʼob Jéeoba.
¿Kʼajaʼan wa toʼon?
• Ken reinarnak Cristo ichil le mil jaʼaboʼoboʼ, ¿baʼax kun meyaj utiaʼal u pʼiis óoltaʼal le máakoʼob kun kaʼa kuxtaloʼoboʼ?
• ¿Baʼaxten yaan máakoʼob «bíin kaʼapúut kuxlakoʼob utiaʼal u yantal kuxtal tiʼob» yéetel yaan xan «bíin kaʼapúut kuxlakoʼob utiaʼal ka xotʼkʼintaʼakoʼob»?
• ¿Bix u líiʼsik k-óol k-ojéeltik yaan u kaʼa kuxtal le kimenoʼoboʼ?
• Wa yaan kʼáatchiʼob maʼ núukaʼaktoʼon yaan yil yéetel le kaʼa kuxtaloʼ, ¿bix u yáantkoʼon le baʼax ku yaʼalik Salmo 145:16?
[U kʼáatchiʼiloʼob le xookoʼ]
[U tsolajil le oochel teʼ táan juʼun 31]
¿Bix u yáantkoʼon bejlaʼa k-ojéeltik yaan u kaʼa kuxtal le kimenoʼoboʼ?