Ken k-máans upʼéel nojoch muʼyajil
Ken k-máans upʼéel nojoch muʼyajil
OWEN, utúul chan xiʼipal kaʼapʼéel jaʼab kaʼa tak táankoch yaan tiʼeʼ, táan kaʼach u báaxal tu bañoi u yotoch. Letiʼeʼ tu yilaj bix u kʼuchul tak teʼ tuʼux ku líiʼsaʼal tsʼaakoʼob yéetel uláakʼ baʼaloʼob tumen u taataʼoboʼ, letiʼobeʼ maʼ tu tukloʼob wa jeʼel u kʼuchul le chan xiʼipaloʼ. Baʼaleʼ tu yilaj bix u kʼuchleʼeʼ ka tu chʼaʼaj upʼéel botellaeʼ ka tu yukʼaj le baʼax yanoʼoʼ.
Ka tsʼoʼokeʼ Oweneʼ kíimi tumen le baʼax tu yukʼoʼ ácido. U taataʼobeʼ jach muʼyajnajoʼob tioʼolal le baʼax úuchaʼ. Percy, u taata le chan xiʼipalaʼ, bineʼ ka tu kʼáataj tiʼ utúul u nojchil u iglesia: «¿Baʼaxten kíim in chan iijo?». U nojchil u iglesiaoʼ tu yaʼalaj: «Tumen kʼaʼabéet uláakʼ chan ángel tiʼ Dios teʼ kaʼanoʼ». Le taatatsilaʼ, jach lúub u yóol tumen tu tuklaj maʼ unaj kaʼach u bisaʼal u iijo tumen Diosiʼ. ¿U kʼáat wa túun kaʼach Dios ka kíimik le chan xiʼipaloʼ? Yoʼolal le baʼax aʼalaʼab tiʼ Percyoʼ, xuʼul u bin tu iglesia.
Cada ken kʼaʼajak kaʼach tiʼ Percy baʼax uchaʼaneʼ, ku yaʼalik: «¿Tsʼoʼok wa u xuʼulul u muʼyaj in iijo? ¿Yaan wa u kʼuchul u kʼiinil in kaʼa ilik?».
Maʼ xaaneʼ techeʼ ka kʼáatik xan baʼax ku yúuchul ken kíimik máak yéetel wa yaan u kaʼa ilaʼal le máaxoʼob tsʼoʼok u kíimloʼoboʼ. Le Bibliaoʼ ku núukik le kʼáatchiʼobaʼ. Le baʼax ku yaʼalik le Bibliaoʼ ku líiʼsik u yóol le máaxoʼob tsʼoʼok u máanskoʼob le nojoch muʼyajilaʼ. Le Biblia xanoʼ ku tʼaan tiʼ upʼéel jatsʼuts baʼal u yaʼalmaj Dios u beetik: u kaʼa kuxkíintik le kimenoʼoboʼ.
Le uláakʼ xookoʼ, yaan u tʼaan tiʼ u kaʼa kuxkíintaʼal le kimenoʼoboʼ.