Dioseʼ ku salvarkoʼon yoʼolal u yutsil, maʼ chéen yoʼolal baʼaxoʼob k-beetkiʼ

«Teʼexeʼ tsʼoʼok a toʼokoleʼex, tu yoʼolal le oksaj óolaloʼ. [...] Maʼ tu yoʼolal wa baʼax ka u beet máakiʼ, beyoʼ mix máak ku páajtal u kaʼanaltal u yich.» (EFESOILOʼOB 2:8, 9.)

1. ¿Baʼax u jelaʼanil le cristianoʼob tiʼ u maasil máakoʼoboʼ, yéetel baʼaxten?

TEʼ KʼIINOʼOBAʼ, óoliʼ tuláakal máak jach ku taaskuba nojbaʼalil yoʼolal baʼaxoʼob tsʼoʼok u yantal tiʼob. Baʼaleʼ, le cristianoʼoboʼ maʼ bey unaj u beetkoʼobiʼ. Maʼ unaj u kaʼantal u yichoʼob yoʼolal baʼax yantiʼobiʼ, mix yoʼolal le meyaj ku beetkoʼob teʼ múuchʼuliloʼ. Kex ku kiʼimaktal u yóoloʼob yoʼolal le bukaʼaj meyaj ku beetaʼal tumen u kaajal Jéeobaoʼ, maʼ tu kaʼantal u yichoʼob yoʼolal le bukaʼaj meyaj ku beetkoʼoboʼ, tumen u yojloʼobeʼ ku beetkoʼob yoʼolal u yaabilajoʼob tiʼ Jéeoba, maʼ utiaʼal u taaskubaʼob nojbaʼaliliʼ. Bey túunoʼ, le máax tiʼ kun tsʼaabil le kuxtal minaʼan u xuuloʼ, yaan u tsʼaʼabal tiʼ tu yoʼolal u yoksaj óolal yéetel tu yoʼolal u yutsil Dios, maʼ yoʼolal baʼax tu beetiʼ (Lucas 17:10; Juan 3:16).

2, 3. ¿Tiʼ baʼax jach ku kiʼimaktal u yóol kaʼach Pablo, yéetel baʼaxten?

² Apóstol Pabloeʼ u yojel lelaʼ jach jaaj. Ka tu chukaj óoxtéen u kʼáatik ka luʼsaʼak «jumpʼéel mukʼyaj bey jeʼel bix jumpʼéel kʼiʼix chʼiikil [tu] wíinklileʼ», Jéeobaeʼ tu núukaj tiʼ: «Chéen in siibal utsil kʼaʼabéet tiʼ teech, tumen in páajtalileʼ ku yeʼesikuba [maas] maʼalob wa juntúul máak  minaʼan u muukʼ». Le apostoloʼ tu kʼamaj le baʼax aʼalaʼabtiʼoʼ, le oʼolal tu tsʼíibtaj: «Ku kiʼimakchajal in wóol tumen minaʼan in muukʼ, utiaʼal ka u yeʼesuba teen u páajtalil Cristo». Toʼoneʼ jach maʼalob ka k-eʼes kabal óolal jeʼex úuchik u yeʼesik Pablooʼ (2 Corintoiloʼob 12:7-9).

³ Kex Pablo jach kʼaj óoltaʼab tu yoʼolal bix úuchik u meyajtik Dioseʼ, letiʼeʼ u yojel Dios áant u beete. Yéetel kabal óolaleʼ tu yaʼalaj: «Teneʼ [maas] chichanen tiʼ u [maas] chichanil tiʼ tuláakal le máaxoʼob u tiaʼaloʼob Jajal Diosoʼ; baʼaleʼ letiʼeʼ tsʼoʼok u tsʼáaik teen u kiʼimak óolalil in tseʼektik tiʼ le máaxoʼob maʼ judíoʼoboʼ u maʼalob [péektsilil] [...] Cristo» (Efesoiloʼob 3:8). Le tʼaanoʼobaʼ ku yeʼeskoʼobeʼ Pabloeʼ maʼ tu nojbaʼalkúunsubaiʼ mix tu taasuba maas maʼalobil tiʼ u chuukaʼaniʼ. «Jajal Dioseʼ ku tokikuba [wa ku náachkuntikuba] tiʼ le máaxoʼob kaʼanaltak u yichoʼoboʼ, baʼaleʼ ku tsʼáaik u siibal tiʼ le máaxoʼob kabal u yóoloʼoboʼ.» (Santiago 4:6; 1 Pedro 5:5.) ¿K-ilikba wa maas chichnil tiʼ tuláakal k-sukuʼunoʼob jeʼex tu beetil Pabloeʼ?

Kʼaʼabéet k-ilik u maasil bey maas maʼaloboʼob tiʼ toʼoneʼ

4. ¿Baʼaxten jeʼel u talamtal tiʼ máak u yilik u chuukan bey maas maʼaloboʼob tiʼ letiʼeʼ?

⁴ Apóstol Pabloeʼ tu yaʼalaj tiʼ le cristianoʼoboʼ: «Maʼ a beetikeʼex mix baʼal chéen utiaʼal a wutsileʼex mix tu yoʼolal kaʼanal ichiliʼ[,] baʼaleʼ yéetel kabal óolal, tu jujuntúuleʼ ka u yil le u láakʼoʼoboʼ bey maas maʼaloboʼob tiʼ letiʼeʼ» (Filiposiloʼob 2:3). K-beetik le baʼax tu yaʼalaj Pabloaʼ, jeʼel u talamtaltoʼoneʼ, baʼaleʼ maas jeʼel u talamtaltoʼon wa yaan meyaj tsʼaʼan k-beet teʼ múuchʼuliloʼ. Maʼ xaneʼ jeʼel u talamtaltoʼoneʼ tumen le máakoʼob bejlaʼaʼ chéen táan u yilik u yeʼeskoʼob maas maʼaloboʼob tiʼ u maasil. Maʼ xan xaaneʼ, chichnoʼon ka joʼopʼ u kaʼansaʼaltoʼon ka k-eʼes maas maʼaloboʼon tiʼ k-sukuʼunoʼob, tiʼ k-íitsʼnoʼob wa tiʼ k-éet xookoʼob. Maʼ xaaneʼ ku sen aʼalaʼaltoʼon kaʼach ka k-beetba maas maʼalobil tiʼ k-éet báaxloʼob wa tiʼ k-éet xookoʼob. U jaajileʼ maʼ kʼaas ka k-jach tsʼáa k-óol beet maʼalob jeʼel baʼalak meyajil ka tsʼaʼabak k-beeteʼ, baʼaleʼ utúul cristianoeʼ maʼ unaj u beetik chéen utiaʼal ka ilaʼak maas maʼalobil tiʼ u chuukaniʼ, unaj u beetik utiaʼal u jóoʼsik utsil tiʼ le baʼax ku beetkoʼ yéetel utiaʼal ka u yáant u maasil. Baʼaleʼ, u taaktal u beetkuba máak maas maʼalobileʼ, jeʼel u taasik talamileʼ. ¿Baʼaxten?

5. ¿Baʼax jeʼel u yúuchul wa maʼ u luʼsik tu tuukul máak u beetkuba maas maʼalobil tiʼ u maasileʼ?

⁵ Wa maʼ u luʼsik tu tuukul máak u beetkuba maas maʼalobil tiʼ u chuukaneʼ jeʼel u xuʼulul u yeʼesik tsiikil tiʼ u maasileʼ, jeʼel u kaʼantal u yich yéetel jeʼel tak u kʼuchul u tsʼíibolt baʼax maʼ u tiaʼaleʼ. Proverbios 28:22 ku yaʼalikeʼ le máax ku tsʼíiboltik baʼax yaan tiʼ yaanaleʼ «ku taaktal u ayikʼaltal séeb, maʼ u yojeleʼ, wa bíin taalak [tu] yóokʼol u óotsilil». Utúul máak beyaʼ jeʼel tak u bin tu paach baʼaloʼob maʼ u náajalmeʼ, yéetel utiaʼal maʼ u yilaʼal wa kʼaas baʼax ku beetkeʼ jeʼel tak u joʼopʼol u tʼaan tu contra u maasileʼ, tuláakal lelaʼ maʼ unaj u beetaʼal tumen utúul cristianoiʼ (Santiago 3:14-16). Tsʼoʼoleʼ kex wa maʼ bey u beetkeʼ, sajbeʼentsil u káajal u tuukul chéen tu yoʼolal.

6. ¿Bix u yáantkoʼon le Biblia utiaʼal maʼ k-ketlan yéetel u maasiloʼ?

 ⁶ Le oʼolal le Bibliaoʼ ku yaʼalik tiʼ le cristianoʼoboʼ: «Maʼ unaj u kaʼanaltal k-ichiʼ, utiaʼal k-kaxantik baʼatel t-baatsiliʼ, mix unaj u yantal loolob tsʼíibolaloʼob ichiloʼoniʼ» (Galaciailoʼob 5:26). Apóstol Juaneʼ tʼaanaj tiʼ utúul sukuʼun tuukulnaj beyaʼ: «Tin tsʼíibtaj jumpʼéel juʼun tiʼ le iglesiaoʼ baʼaleʼ Diótrefeseʼ maʼ tu kʼamikoʼon, tumen letiʼeʼ utstutʼaan u beetik u nojochil ichiloʼob. Le oʼolaleʼ, wa kin bineʼ, yaan in kʼaʼajsik tiʼ baʼax ku beetik ikil u máan u yaʼal baʼal kʼaas yéetel tuusoʼob t-contra». ¡Bukaʼaj kʼaasil ka úuchuk tiʼ utúul cristiano beyaʼ! (3 Juan 9, 10.)

7. ¿Baʼax maʼ unaj u beetik utúul cristiano tak tuʼux ku meyajiʼ?

⁷ Baʼaleʼ, maʼ unaj k-tuklik wa utúul cristianoeʼ jach upuliʼ maʼ kun ketlan. Maʼ xaaneʼ, le meyaj yantiʼoʼ ku beetik u ketlan yéetel uláakʼ máakoʼob ku konkoʼob láayliʼ le baʼax ku konikoʼ wa ku beetkoʼob láayliʼ le meyaj ku beetik letiʼoʼ. Baʼaleʼ, kex wa bey le meyaj yantiʼoʼ, le cristianooʼ kʼaʼabéet u yeʼesik tsiikil, yaabilaj yéetel u tuukul yoʼolal u maasil. Kʼaʼabéet maʼ u beetik mix baʼal maʼ unaj u beetaʼal tumen utúul cristianoiʼ yéetel maʼ unaj u tsʼáaik tuʼux u yaʼalaʼal wa kʼaas baʼax yaan tu tuukuliʼ mix wa chéen ketlan ku beetkiʼ. Jeʼel baʼaxak ka u beeteʼ, maʼ unaj u tuklikeʼ maas kʼaʼanan ka u beetuba maas maʼalobil tiʼ u chuukan. Le oʼolaleʼ, wa bey unaj u beetik máak tuʼux ku meyajoʼ, ¡maas bey unaj u beetik ichil le múuchʼuliloʼ!

Maʼ k-ketikba yéetel u maasil

8, 9. 1) ¿Baʼaxten minaʼan baʼax oʼolal u ketlan le nuxiboʼob tu baatsiloʼoboʼ? 2) ¿Baʼaxten unaj u beetaʼal tumen tuláakal máaxoʼob meyajtik Dios le baʼax ku yaʼalik 1 Pedro 4:10?

⁸ Le baʼax ku yaʼalik le tekstoaʼ ku yeʼesik bix unaj u tuukul utúul cristiano: «Cada juntúuleʼ unaj u yilik wa maʼalob baʼax ku beetik. Wa ku kiʼimaktal u yóol tu yoʼolaleʼ, lelaʼ chéen utiaʼal letiʼ maʼ utiaʼal uláakʼ máakiʼ [«maʼ utiaʼal u ketuba yéetel uláakʼiʼ», NM]» (Galaciailoʼob 6:4). Le nuxiboʼoboʼ u yojloʼob maʼ unaj u ketlanoʼob yéetel uláakʼ nuxiboʼobiʼ, le oʼolaleʼ ku múuchʼ meyajoʼob bey upʼéeliliʼ wíinklileʼ. Cada utúuleʼ ku kiʼimaktal u yóol yéetel le meyaj ku beetik utiaʼal u yutsil le múuchʼuliloʼ. Beyoʼ maʼ tu ketlanoʼob yéetel u chuukan, yéetel ku yeʼeskoʼob tiʼ u maasil bix unaj u múuchʼ meyajoʼob.

⁹ Maʼ xaaneʼ yaan nuxiboʼobeʼ maas maʼalob u meyajoʼob wa maas séeb u naʼatkoʼob upʼéel baʼal tumen maas yaan u jaʼabiloʼob, maas yaʼab baʼal u yojloʼob wa tumen maas yaan u naʼatil tiʼob bix jeʼel u beetkoʼob upʼéel baʼaleʼ; le oʼolaleʼ le nuxiboʼoboʼ jejeláas meyaj ku beetkoʼob ichil u kaajal Jéeoba. Letiʼobeʼ maʼatech u ketik u meyajoʼob yéetel u maasil, baʼaxeʼ ku beetkoʼob le baʼax ku yaʼalik le tsolnuʼukaʼ: «Cada juntúuleʼ ka u meyajt u láakʼ máakoʼob jeʼel bix le páajtalil tsʼaʼan tiʼ tumen Jajal Diosoʼ, jeʼel bix máaxoʼob ku beetikoʼob u meyajoʼob maʼalob u jejeláas utsil siibal Jajal Dioseʼ» (1 Pedro 4:10). U jaajileʼ, le baʼax ku yaʼalik le tekstoaʼ unaj u beetaʼal tumen tuláakal máaxoʼob meyajtik Jéeoba, tumen tiʼ tuláakloʼon tsʼaʼan u páajtalil k-kʼaj óoltik u jaajil yéetel tiʼ tuláakloʼon yantoʼon u páajtalil k-kʼaʼaytik le maʼalob péektsiloʼ.

10. ¿Bix unaj k-meyajtik Jéeoba utiaʼal k-kiʼimakkúuntik u yóol?

 ¹⁰ Utiaʼal ka kiʼimakchajak u yóol Jéeoba yéetel le meyaj k-tsʼáaiktiʼoʼ kʼaʼabéet k-beetik jach tu jaajil k-óol yéetel yoʼolal k-yaabilaj tiʼ letiʼ, maʼ yoʼolal k-eʼesik maas maʼaloboʼon tiʼ u chuukaniʼ. Le oʼolal kʼaʼabéet u yantaltoʼon upʼéel maʼalob tuukul ken k-beet jeʼel baʼalak meyajil utiaʼal Jéeobaeʼ. Kex mix máak jeʼel u páajtal u yilik baʼax ku tuklik uláakʼ máakeʼ, Jéeobaeʼ ku yilik baʼax yaan tu puksiʼikʼal máak (Proverbios 24:12; 1 Samuel 16:7). Bey túunoʼ, cada wa baʼax kʼiineʼ maʼalob ka k-il jach baʼax péekskoʼon k-meyajt Jéeoba (Salmo 24:3, 4; Mateo 5:8).

Kʼaʼanantak, baʼaleʼ maʼ le kun salvarkoʼoniʼ

11. ¿Baʼax kʼáatchiʼiloʼob jeʼel u beetik máakeʼ?

¹¹ Wa le baʼax péekskoʼon k-meyajt Dios jach kʼaʼanan utiaʼal u kʼamkoʼoneʼ, ¿jach wa túun kʼaʼabéet k-beetik yaʼab utiaʼal k-meyajtik Dios? Wa táan k-meyajtik Dios tumen k-yaabilmeʼ, ¿kʼaʼabéet wa túun k-tsʼíibtik bukaʼaj k-beetik teʼ kʼaʼaytajoʼ? Yaan máax jeʼel u beetik le kʼáatchiʼobaʼ tumen baʼax maas kʼaʼananeʼ letiʼe baʼax oʼolal k-meyajtik Diosoʼ maʼ letiʼeʼ bukaʼaj k-beetkoʼ yéetel maʼ chéen táan k-ilik k-beetik u maas yaʼabil teʼ kʼaʼaytajoʼ.

12, 13. 1) ¿Baʼax oʼolal k-kʼubik le bukaʼaj t-beetaj teʼ kʼaʼaytajoʼ? 2) ¿Baʼaxten ku kiʼimaktal k-óol ojéeltik bukaʼaj beetaʼab teʼ kʼaʼaytaj tiʼ tuláakal yóokʼol kaaboʼ?

¹² Le libro Organizados para hacer la voluntad de Jehová ku yaʼalik: «U yáax j-tsaypachoʼob Jesuseʼ jach kʼaʼanan tu yililoʼob u tsʼíibkoʼob bix u bin u kʼaʼaytkoʼob le maʼalob péektsiloʼ (Mar. 6:30). U libroi Beetaʼanoʼobeʼ [Hechos] ku yaʼalik tsʼaʼab kiliʼich muukʼ tiʼ kex ciento veinte j-kaambaloʼob, tsʼoʼoleʼ maʼ xáanchaj ka tu chukaj tres mil j-kaambaloʼobiʼ yéetel maʼ úuch tiʼ leloʼ tu chukaj cinco mil [...] (Hech. 1:15; 2:5-11, 41, 47; 4:4; 6:7). Ka uʼuyaʼab tumen le sukuʼunoʼob bix u bin u yaʼabtal le j-kaambaloʼoboʼ, jach muʼukʼanchaj u yóoloʼob». Le oʼolaleʼ, u j-jaajkunajoʼob Jéeoba bejlaʼeʼ ku tsʼíibkoʼob jach bukaʼaj meyaj ku beetaʼal tiʼ tuláakal yóokʼol kaab utiaʼal u kʼaʼaytaʼal le maʼalob péektsil jeʼex tu yaʼalil Jesusaʼ: «U maʼalob péektsil le [reinooʼ] bíin [kʼaʼay]taʼak tiʼ tuláakal yóokʼol kaab, utiaʼal ka kʼaj óoltaʼak tumen tuláakal kaajoʼob; letiʼ túun ken taalak u xuul» (Mateo 24:14). U tsʼaʼabal ojéeltbil le bukaʼaj meyaj ku beetaʼal teʼ kʼaʼaytajoʼ ku yáantaj utiaʼal u yilaʼal bix u bin u kʼaʼaytaʼal le maʼalob péektsil tiʼ tuláakal yóokʼol kaaboʼ. Ku yeʼesik tuʼux maas kʼaʼabéet j-kʼaʼaytajoʼob yéetel ku meyaj xan utiaʼal u yilaʼal baʼax  jóoʼsaʼanil maas kʼaʼabéet yéetel bukaʼaj kʼaʼabéetiʼ.

¹³ K-ilik túuneʼ, le k-kʼubik cada mes bukaʼaj k-beetik teʼ kʼaʼaytajoʼ ku meyaj utiaʼal u maas kʼaʼaytaʼal u Reino Dios. Tsʼoʼoleʼ, ken k-uʼuy bix táan u kʼaʼaytaʼal le maʼalob péektsil tuláakʼ tuʼuxoʼoboʼ, ¿máasaʼ jach ku líiʼsik k-óol? Ken k-uʼuy táan u maas yaʼabtal máaxoʼob meyajtik Jéeobaeʼ jach ku kiʼimaktal k-óol, ku péekskoʼon utiaʼal k-maas tsʼáaik k-óol teʼ kʼaʼaytajoʼ yéetel ku yeʼesiktoʼon táan u tsʼáaiktoʼon u yutsil Jéeoba. Ku kiʼimaktal xan k-óol ojéeltik le bukaʼaj t-beetajoʼ tiʼ yaan xan ichil tuláakal le bukaʼaj beetaʼab teʼ kʼaʼaytaj tiʼ tuláakal yóokʼol kaaboʼ. Kex le bukaʼaj t-beetaj upʼíit tu táan le bukaʼaj beetaʼab tiʼ tuláakal yóokʼol kaaboʼ, tu táan Jéeobaeʼ yaʼab (Marcos 12:42, 43). Maʼ u tuʼubultoʼoneʼ wa maʼ k-kʼubik bukaʼaj t-beeteʼ le bukaʼaj ku chíikpajal beetaʼab tuláakal yóokʼol kaaboʼ maʼ chúukaʼaniʼ.

14. Kex tumen k-jóokʼol kʼaʼaytaj yéetel k-kaʼansik uláakʼ máakoʼobeʼ, ¿baʼax uláakʼ táakaʼan ichil k-meyajtik Jéeoba?

¹⁴ U jaajileʼ, yaʼab tiʼ le meyaj ku beetik utúul u j-jaajkunaj Jéeobaeʼ maʼatech u tsʼíibtik utiaʼal ka u tsʼáa ojéeltbil. Maʼatech u tsʼáaik ojéeltbil bukaʼaj súutukil tu jóoʼsaj utiaʼal u xokik le Bibliaoʼ, utiaʼal u bin teʼ muchʼtáambaloʼoboʼ, utiaʼal u beetik uláakʼ meyajoʼob teʼ múuchʼuliloʼ, utiaʼal u yáantik le sukuʼunoʼoboʼ yéetel maʼatech xan u tsʼáaik ojéelbil bajux ku tsʼáaik utiaʼal le kʼaʼaytaj ku beetaʼal tuláakal yóokʼol kaaboʼ. K-ilik túuneʼ, jach kʼaʼanan ka k-kʼub bukaʼaj t-beetaj teʼ kʼaʼaytajoʼ, tumen ku yáantkoʼon utiaʼal maʼ u xuʼulul k-tsʼáaik k-óoliʼ, baʼaleʼ kex kʼaʼananeʼ maʼ unaj k-ilik bey letiʼ kun beetik u yantaltoʼon le kuxtal minaʼan u xuuloʼ.

Kʼaʼabéet k-kʼubik k-óol beet «utsil meyajoʼob»

15. Kex le baʼaxoʼob k-beetik maʼ tu páajtal u salvarkoʼonoʼ, ¿baʼaxten jach kʼaʼananoʼob?

¹⁵ K-ilik túuneʼ, kex maʼ ken u salvartoʼon le maʼalob baʼaloʼob k-beetikoʼ jach kʼaʼanantakoʼob. Le oʼolaleʼ le cristianoʼoboʼ kʼaj óolaʼanoʼob bey «jumpʼéel kaaj u kʼubmaj u yóol u beet utsil meyajoʼob», yéetel ku yaʼalaʼal xan tiʼobeʼ ka yanaktiʼob «yaakunaj» yéetel ka u beetoʼob «baʼax uts» (Tito 2:14; Hebreob 10:24). Santiago, utúul tiʼ le máaxoʼob tsʼíib le Bibliaoʼ, tu yeʼesaj xan bukaʼaj kʼaʼananil le baʼaxoʼob k-beetkoʼ, letiʼeʼ tu yaʼalaj: «Bey jeʼel bix le wíinklil x-maʼ pixanil kimenoʼ, bey xan le oksaj óolaloʼ wa maʼ tu yeʼesaʼal yéetel utsil meyajoʼobeʼ kimen u yanil» (Santiago 2:26).

16. ¿Baʼax maas kʼaʼanan tiʼ le baʼaxoʼob k-beetkoʼ, baʼaleʼ tiʼ baʼax unaj k-kanáantikba?

¹⁶ Le baʼaxoʼob k-beetkoʼ kʼaʼananoʼob, baʼaleʼ maas kʼaʼanan le baʼax péekskoʼon k-beetoʼ. Le oʼolaleʼ, cada wa baʼax kʼiineʼ maʼalob ka k-il bix yaniloʼon. Yéetel tumen mix utúul tiʼ toʼon jeʼel u páajtal u yaʼalik baʼax péeksik u maasileʼ, kʼaʼabéet k-kanáantik maʼ k-tʼaan tu contra mix máak. Tiʼ cada utúul tiʼ toʼoneʼ ku kʼáataʼal: «¿Máaxech teech utiaʼal a pʼis óolt le máax táan u meyajtik yaanal máakoʼ?». U núukileʼ jach chíikaʼan yanil: «Wa uts wa kʼaas u pʼáataleʼ, leloʼ u tsʼuulil máax unaj u yaʼalik» (Romailoʼob 14:4). Jéeoba, u Yuumil tuláakal máak, yéetel Jesús, le máax u tsʼaamaj utiaʼal pʼis óoloʼ, maʼ ken u pʼis óoltoʼonoʼob chéen yoʼolal baʼaxoʼob  t-beetaj, yaan xan u pʼis óolkoʼonoʼob yoʼolal baʼax yaan t-puksiʼikʼal, yaan u yilkoʼob wa t-beetaj tuláakal le ku páajtal utiaʼal k-meyajtikoʼob yéetel wa t-yaabiltoʼob tu jaajil k-óol. Chéen Jéeoba yéetel Jesucristo jeʼel u páajtal u yaʼalikoʼob wa táan k-beetik le baʼax ku páaʼtaʼal tiʼ utúul cristiano jeʼex tu yaʼalil Pabloeʼ: «Tsʼáa a wóol a wantal tu táan Jajal Dios jeʼel bix juntúul j-meyaj kʼambeʼen, minaʼan baʼax oʼolal u chʼaʼik subtaleʼ, tumen ku tsolik maʼalob u tʼaaniloʼob le jaajoʼ» (2 Timoteo 2:15; 2 Pedro 1:10; 3:14).

17. Le táan k-ilik meyajtik Jéeoba jeʼex unajeʼ, ¿baʼaxten maʼ unaj u tuʼubultoʼon baʼax ku yaʼalik Santiago 3:17?

¹⁷ Jéeobaeʼ uts u puksiʼikʼal, maʼatech u kʼáatik ka k-beet baʼaxoʼob maʼ tu páajtal k-beetik. Santiago 3:17, ku yaʼalikeʼ le máaxoʼob yaan «le kaʼanilbeʼen naʼat tiʼoboʼ» «uts u puksiʼikʼaloʼob». ¿Maʼ wa maʼalob yéetel upʼéel baʼal jach nojoch ka k-eʼes utsil puksiʼikʼal jeʼex Jéeobaeʼ? Le oʼolaleʼ, maʼ unaj k-tuklik beetik upʼéel meyaj wa maʼ tu páajtal k-tsʼoʼokbeskiʼ mix xan ka k-aʼal tiʼ k-sukuʼunoʼob ka u beetoʼob.

18. ¿Baʼax jeʼel u páajtal k-páaʼtik wa k-kʼaʼajsik baʼax salvarkoʼon yéetel wa k-kʼaʼajsik kʼaʼanan xan le baʼaxoʼob k-beetikoʼ?

¹⁸ K-kʼaʼajsik baʼax salvarkoʼon yéetel k-kʼaʼajsik xan kʼaʼanan le baʼaxoʼob k-beetikoʼ yaan u yáantkoʼon utiaʼal maʼ u xuʼulul u yantaltoʼon le kiʼimak óolal ku yuʼubik le máaxoʼob meyajtik Diosoʼ (Isaías 65:13, 14). Jeʼel bukaʼaj ka páatchajak k-beetik utiaʼal k-meyajtik Jéeobaeʼ, ku kiʼimaktal k-óol k-ilik bix u tsʼáaik u yutsil tu yóokʼol u kaajal. Maʼ u xuʼulul k-kʼáatik tiʼ Dios «ich payalchiʼ» yéetel k-kʼáat óoltik ka u yáantoʼon k-beet tuláakal le ku páajtal utiaʼal k-meyajtikeʼ. Wa k-beetik beyoʼ «Jajal Dios túuneʼ bíin u [tsʼáatoʼon] u jeetsʼel óolal, lelaʼ maas nojoch tiʼ le ku páajtal u naʼatik máakoʼ; le jeetsʼel óolal bíin u kanáant [...] [k-puksiʼikʼal] yéetel [...] [k-tuukul] tiʼ Cristo Jesús» (Filiposiloʼob 4:4-7). Beyoʼ, jach ku kiʼimaktal k-óol ojéeltik yaan u salvarkoʼon Jéeoba yoʼolal u yutsil, maʼ chéen yoʼolal baʼaxoʼob k-beetkiʼ.

¿Jeʼel wa u páajtal a tsolik baʼaxten le cristianoʼoboʼ...

• ... ku yilkoʼob maʼ u kaʼantal u yichoʼob yoʼolal baʼaxoʼob tsʼoʼok u yantaltiʼob?

• ... ku yilkoʼob maʼ u taaskubaʼob maas maʼalobil tiʼ u maasil?

• ... ku kʼubkoʼob bukaʼaj ku beetkoʼob teʼ kʼaʼaytajoʼ?

• ... ku yilkoʼob maʼ u tʼaanoʼob tu contra u maasil?

[U kʼáatchiʼiloʼob le xookoʼ]

[U tsolajil le oochel teʼ táan juʼun 27]

«Chéen in siibal utsil kʼaʼabéet tiʼ teech»

[U tsolajil le oochel teʼ táan juʼun 29]

Le nuxiboʼoboʼ ku kiʼimaktal u yóoloʼob yoʼolal le meyaj ku beetik cada utúul ichil le múuchʼuliloʼ

[U tsolajil le oochel teʼ táan juʼun 31]

Wa maʼ k-kʼubik bukaʼaj t-beetaj teʼ kʼaʼaytajoʼ le bukaʼaj ku chíikpajal beetaʼab tiʼ tuláakal yóokʼol kaaboʼ maʼ chúukaʼaniʼ