Kʼáatchiʼob ku beetaʼal

Le j-kaambaloʼoboʼ ka tu yuʼuboʼob Pedro, le máax ku tuklikoʼob kʼalaʼan kaʼach, letiʼe ku tʼaan teʼ jool najoʼ, ¿baʼaxten tu yaʼaloʼob: «Maʼ letiʼ[iʼ], u ángel»? (Beetaʼanoʼob [Hechos] 12:15.)

Maʼ xaaneʼ le j-kaambaloʼoboʼ tu tukloʼobeʼ le máax ku tʼaan teʼ jool najoʼ, utúul ángel taaljaʼan tʼaan yoʼolal Pedro. Koʼoneʼex ilik bix úuchik lelaʼ.

Pedroeʼ kʼalaʼan kaʼach tumen Herodes, le máax beet u kíimsaʼal Santiagoeʼ, le oʼolaleʼ le j-kaambaloʼoboʼ tu tukloʼobeʼ yaan xan u kíimsaʼal Pedro. Le apóstol Pedrooʼ kʼalaʼan kaʼach yéetel kʼaxaʼan u kʼaboʼob yéetel cadena, tsʼoʼoleʼ bul kʼiin yéetel bul áakʼabeʼ kantúul soldadoʼob kanáantik. Baʼaleʼ, upʼéel áakʼabeʼ jóoʼsaʼab tumen utúul ángel teʼ carceloʼ. Ka tsʼoʼok u jáalkʼabtaʼaleʼ, tu yaʼalaj: «Bejelaʼeʼ kin wilik jach tu jaajil Yuumtsileʼ tu túuxtaj u ángel utiaʼal u tokiken tu kʼab Herodes» (Beetaʼanoʼob 12:1-11).

Pedro túuneʼ bin tu yotoch María, u maama Juan Marcos, teʼeloʼ tiʼ muchʼukba kaʼach yaʼab j-kaambaloʼobiʼ. Ka kʼoopnajeʼ, utúul chʼúupal, Rode u kʼaabaʼeʼ, bin yil máaxiʼ. Le chʼúupalaʼ ka tu kʼaj óoltaj u tʼaan Pedroeʼ maʼ tu jeʼaj le jool najoʼ, bin áalkabil u yaʼal tiʼ le j-kaambaloʼoboʼ. Baʼaleʼ letiʼobeʼ maʼ tu jáan creertoʼob wa Pedro le kʼoopnajoʼ. Le oʼolal tu yaʼaloʼob, «maʼ letiʼ[iʼ], u ángel» (Beetaʼanoʼob 12:12-15).

Le j-kaambaloʼoboʼ, ¿tu tukloʼob wa tsʼoʼok kaʼach u kíimil Pedro yéetel u pixan le ku kʼoop teʼ jooloʼ? Maʼatech, tumen le j-kaambaloʼoboʼ u yojloʼob baʼax ku yaʼalik le Biblia yoʼolal le kimenoʼoboʼ, letiʼobeʼ u naʼatmoʼobeʼ le kimenoʼoboʼ «maʼ u yojeloʼob mix baʼaliʼ» (Eclesiastés 9:5, 10). ¿Baʼaxten túun tu yaʼaloʼob: «Maʼ letiʼ[iʼ], u ángel»?

U j-kaambaloʼob Jesuseʼ u yojloʼob kaʼacheʼ le angeloʼoboʼ tu yáantoʼob le máaxoʼob meyajtik Diosoʼ. Jeʼex Jacobeʼ tʼaanaj tiʼ utúul ángel tok tiʼ tuláakal baʼal kʼaas (Génesis 48:16). Jesuseʼ ka tu kaʼansaj u j-kaambaloʼobeʼ tʼaanaj tiʼ utúul chan xiʼipal yaan tu yiknaloʼob, letiʼeʼ tu yaʼalaj: «Maʼ a [pʼektikeʼex] mix juntúul tiʼ le mejen paalaloʼobaʼ. Tumen kin waʼalikteʼexeʼ teʼ j-kaʼanoʼ u angeloʼobeʼ tiʼ yanoʼob mantatsʼ tu táan in Taata yaan teʼ j-kaʼanoʼ» (Mateo 18:10).

Upʼéel Biblia ku kʼaabaʼtik, Las Escrituras del Nuevo Pacto ku sutik xan le tʼaan ág·gue·los («ángel») «u j-bisaj tʼaanoʼob [Dios]» (le corcheteʼobaʼ tsʼaʼab tumen le máax tsʼíib le Bibliaaʼ). Maʼ xaaneʼ yaan judíoʼobeʼ ku tuklikoʼob kaʼacheʼ cada utúul tiʼ le máaxoʼob meyajtik Diosoʼ yaan utúul «ángel tsʼaʼan utiaʼal kanáantik». Baʼaleʼ lelaʼ maʼatech u jach tsolaʼal ichil le Bibliaoʼ. Le oʼolaleʼ, ka tu yaʼalaj le j-kaambaloʼob «maʼ letiʼ[iʼ], u ángel», maʼ xaaneʼ táan kaʼach u tuklikoʼob utúul ángel taaljaʼan tʼaan yoʼolal Pedro.