Maʼ k-kaʼanal beet baʼax maʼalob

APÓSTOL Pedroeʼ tu yaʼalaj: «Xíimbalneneʼex maʼalob ichil le máaxoʼob maʼ u kʼaj óoloʼob Jajal Diosoʼ» (1 Pedro 2:12). Le tʼaan ich griego ku sutaʼal «maʼalob», ku tsʼáaik naʼatbil upʼéel baʼal «jatsʼuts, uts, toj, maʼ kʼaschajaʼaniʼ». Teʼ kʼiinoʼobaʼ óoliʼ minaʼan máakoʼob beetik baʼax maʼalob. Baʼaleʼ le máaxoʼob meyajtik Diosoʼ ku beetikoʼob le baʼax tu yaʼalaj le apóstol Pedrooʼ le oʼolal kʼaj óolaʼanoʼob yoʼolal le toj kuxtal yantiʼoboʼ.

Jach ku kiʼimaktal k-óol k-ilik yaan upʼéel toj kuxtal tiʼ u kaajal Jéeoba kex kuxaʼanoʼon tiʼ «talam kʼiinoʼob» (2 Timoteo 3:1). Sáamsamaleʼ k-aktáantik talamiloʼob yéetel chʼaʼapachtajil ichil k-kuxtal. Tsʼoʼoleʼ, kex yaan talamiloʼob chéen u súutuk ku muʼyajtaʼaleʼ, yanoʼobeʼ ku xáantal táan u muʼyajtaʼaloʼob yéetel ku bin u maas nojochtaloʼob. Baʼaleʼ, apóstol Pabloeʼ tu yaʼalaj: «maʼ unaj k-kaʼanal k-beet utsiʼ, tumen wa maʼ tu lúubul k-óoleʼ tu kʼiinil bíin joochnakoʼon» (Galaciailoʼob 6:9). ¿Baʼax jeʼel k-beetik utiaʼal maʼ u xuʼulul k-beetik baʼax maʼalob kex táan k-muʼyajtik upʼéel nojoch talamileʼ?

Baʼaloʼob jeʼel u yáantkoʼon k-beet baʼax maʼalobeʼ

U yeʼesaʼal utsil, tojil yéetel u bisaʼal upʼéel kuxtal maʼ kʼaschajaʼaneʼ ku taal tu puksiʼikʼal máak. Le oʼolaleʼ u beetik máak baʼax maʼalob kex táan u aktáantik talmiloʼobeʼ, ku yeʼesik táan u tsʼáaik ichil u kuxtal le baʼax ku yaʼalik le Bibliaoʼ. ¿Baʼax kun áantkoʼon k-beete? Koʼoneʼex ilik.

Kʼaʼabéet k-tuukul jeʼex tuukulnajik Cristoeʼ. Kʼaʼabéet kabal óolal tiʼ máak utiaʼal u chúukpajal u yóol u aktáant wa baʼax ku beetaʼal tiʼ kex mix baʼal u beetmaj. Le máax jach noj baʼal u taaskubaeʼ maʼ xaaneʼ ken beetaʼak wa baʼax tiʼeʼ maʼ kun chúukpajal u yóol u aktáante. Jesuseʼ, «tu kabalkúuntaj u yóol yéetel tu yoʼolal u yuʼubaj tʼaaneʼ bin tiʼ kíimil» (Filiposiloʼob 2:5, 8). Wa k-tuukul jeʼex tuukulnajik Cristoeʼ maʼ ken kaʼanal k-beet baʼax u kʼáat Dios (Hebreob 12:2, 3). Kʼaʼabéet k-eʼesik kabal óolal yéetel k-áantik le nuxiboʼob yaan teʼ múuchʼuliloʼ (Hebreob 13:17). Kʼaʼabéet xan k-ilik u maasiloʼob bey maas «maʼalob» máakoʼob tiʼ toʼoneʼ yéetel k-kaxtik táanil u yutsiloʼob (Filiposiloʼob 2:3, 4).

Unaj k-kʼaʼajsik u yaabiltmoʼon Jéeoba. Kʼaʼabéet k-jach oksaj óoltik «yaan Jajal Dios yéetel letiʼeʼ ku boʼotik le máaxoʼob kaxtikoʼ» (Hebreob 11:6). Jéeobaeʼ jach tu jaajil u yaabiltmoʼon yéetel u kʼáat ka yanaktoʼon le kuxtal minaʼan u xuuloʼ (1 Timoteo 2:4; 1 Pedro 5:7). K-kʼaʼajsik mix baʼal jeʼel u páajtal u xuʼulsik u yaabilaj Dios t-oʼolaleʼ, ku yáantkoʼon utiaʼal maʼ k-kaʼanal k-beet baʼax maʼalob kex táan k-aktáantik talamiloʼob (Romailoʼob 8:38, 39).

Kʼaʼabéet k-jach kʼubik k-óol tiʼ Jéeoba. Lelaʼ maas jach kʼaʼanan k-beetik ken k-máans  yaʼab talmiloʼob wa xan ken k-máans chʼaʼapachtajiloʼob ku tsʼáaikoʼob k-kuxtal tu táan kíimil. Yéetel maʼ unaj u tuʼubultoʼoneʼ, Dioseʼ «maʼ bíin [u] pʼat u túuntaʼal [k-óol] maas tiʼ le ku páajtal [k-]mukʼyajtikeʼexoʼ» letiʼeʼ yaan u tsʼáaiktoʼon u páajtalil utiaʼal ka jóoʼkoʼon tiʼ le talmiloʼoboʼ (1 Corintoiloʼob 10:13). Wa k-jach kʼubik óol tiʼ Jéeobaeʼ, jeʼel u páajtal k-aktáantik tak le talmiloʼob ku tsʼáaikoʼob k-kuxtal tu táan kíimiloʼ (2 Corintoiloʼob 1:8, 9).

Kʼaʼabéet k-payalchiʼ mantatsʼ. Le payalchiʼoʼ upʼéel baʼal jach kʼaʼanan (Romailoʼob 12:12). Lelaʼ ku yáantkoʼon utiaʼal ka k-natsʼba tiʼ Jéeoba (Santiago 4:8). Toʼoneʼ k-ojleʼ jeʼel baʼalak ka k-kʼáat tiʼ Dioseʼ, «letiʼeʼ ku yuʼubikoʼon» (1 Juan 5:14). Wa Jéeoba ku chaʼik u yantaltoʼon nojoch talmiloʼob utiaʼal ka ilaʼak wa chúukaʼan k-óoleʼ, jeʼel u páajtal k-kʼáatik tiʼ ka u yáantoʼoneʼ (Lucas 22:41-43). U chʼenxikintaʼal k-payalchiʼ tumen Jéeobaeʼ ku yeʼesik maʼ u pʼatmoʼoniʼ yéetel mantatsʼ jeʼel k-jóokʼol táanil yéetel u yáantajeʼ (Romailoʼob 8:31, 37).

Le baʼaloʼob maʼalobtak k-beetkoʼ ku taasik kiʼikiʼtʼaan yéetel tsiikil tiʼ Jéeoba

Yaan kʼiineʼ, tuláakloʼoneʼ k-muʼyajtik «yaʼabkach yaayaj óolaloʼob». Baʼaleʼ, «maʼ unaj k-kaʼanal k-beet utsiʼ». Ken k-máans talmiloʼob ku chiʼichnakkúuntkoʼoneʼ, jeʼel u yantaltoʼon u muukʼil k-aktáantkoʼob wa ku kʼaʼajaltoʼon yaan u taasik «kiʼikiʼ tʼaan», «nojbeʼenil», yéetel «tsiikil» tiʼ Jéeobaeʼ (1 Pedro 1:6, 7). Le oʼolaleʼ kʼaʼabéet k-ilik u meyajtoʼon tuláakal le baʼaloʼob ku tsʼáaik Jéeoba utiaʼal k-muʼukʼankúuntik oksaj óolaloʼ. Wa kʼaʼabéettoʼon áantaj utiaʼal k-aktáantik upʼéel talmileʼ maʼalob ka k-kʼáat tiʼe nuxiboʼoboʼ tumen letiʼobeʼ ku meyajoʼob bey j-kanan tamanoʼob, j-kaʼansajoʼob yéetel ku tsolnuʼukoʼob teʼ múuchʼuliloʼ (Beetaʼanoʼob [Hechos] 20:28). Kʼaʼabéet xan k-ilik k-bin tiʼ tuláakal le muchʼtáambaloʼoboʼ tumen leloʼobaʼ ku yáantkoʼon k-paklan eʼes «yaakunaj yéetel utiaʼal k-beetik baʼax uts» (Hebreob 10:24). Wa k-xokik le Biblia sáamsamal bey xan uláakʼ jóoʼsaʼaniloʼob, yéetel wa k-ilik k-maas táakpajal teʼ kʼaʼaytajoʼ yaan u yáantkoʼon utiaʼal maʼ u náayal k-óol yéetel utiaʼal ka muʼukʼanchajak k-oksaj óolal (Salmo 1:1-3; Mateo 24:14).

Ken k-il bix yaabiltaʼaniloʼon tumen Jéeoba yéetel bix u kanáantkoʼoneʼ, k-maas kʼubik k-óol «beet utsil meyajoʼob» (Tito 2:14). Kʼaʼajaktoʼoneʼ «le máax ku [chúukpajal] u yóol tak tu xuuleʼ, bíin toʼokok» (Mateo 24:13). Le oʼolaleʼ «maʼ unaj k-kaʼanal k-beet utsiʼ».

[U tsolajil le oochel teʼ táan juʼun 3]

Maʼ unaj u tuʼubultoʼoneʼ, Dioseʼ «maʼ bíin [u] pʼat u túuntaʼal [k-óol] maas tiʼ le ku páajtal [k-]mukʼyajtikeʼexoʼ» yéetel yaan u tsʼáaik xan u páajtalil utiaʼal ka jóoʼkoʼon tiʼ le talmiloʼoboʼ

[U tsolajil le oochel teʼ táan juʼun 4]

K-ilik k-maas meyajtik Jéeobaeʼ ku yáantkoʼon k-aktáant le talmiloʼoboʼ