Jeʼel u páajtal k-aktáantik jeʼel baʼalak talamileʼ

¿TÁAN wa a máan tiʼ talamiloʼob? ¿Ka wuʼuyik wa bey minaʼantech u muukʼil utiaʼal a aktáantkoʼobeʼ? ¿Ka wuʼuyik wa bey minaʼan tsʼoʼokol tiʼe talamiloʼob ka máanskoʼ? Wa beyoʼ, ¡maʼ u lúubul a wóol! Le Bibliaoʼ ku yaʼalikeʼ jeʼel baʼalak talamil ka yanaktoʼoneʼ, Dioseʼ yaan u yáantikoʼon utiaʼal k-aktáantik.

Le Bibliaoʼ ku yaʼalikeʼ tuláakal máax meyajtik Dioseʼ, yaan u «máan tiʼ jejeláas túuntaj óoloʼob» (Santiago 1:2). Koʼoneʼex ilik baʼax u kʼáat u yaʼal le tʼaan «jejeláas» (ich griegoeʼ poi·kí·los). Le tʼaan ich griegoaʼ u kʼáat u yaʼaleʼ «jach jejeláas u coloriloʼob». Le oʼolaleʼ ken u yaʼal le Biblia «jejeláas túuntaj óoloʼobeʼ» u kʼáat u yaʼaleʼ le cristianoʼoboʼ yaan u máanoʼob tiʼ u jejeláasil talamiloʼob ku keʼeteloʼob yéetel jejeláas coloroʼob. Baʼaleʼ jeʼel baʼalak talamil ka k-máanseʼ Jéeobaeʼ yaan u yáantikoʼon utiaʼal k-aktáantik. ¿Bix k-ojéeltik lelaʼ?

Jejeláas bix u yeʼesik u yutsil Dios

Apóstol Pedroeʼ tu yaʼaleʼ le máaxoʼob meyajtik Diosoʼ ku muʼyajkoʼob «yaʼabkach yaayaj óolaloʼob» (1 Pedro 1:6). Ku tsʼoʼoleʼ tu yaʼalaj xaneʼ Dioseʼ «jejeláas» bix u yeʼesik u yutsil (1 Pedro 4:10). Le tʼaan «jejeláas» meyajnaj tiʼ apóstol Pedrooʼ ku taal xan tiʼ le tʼaan poikilos. Utúul máak jach u yojel baʼax u kʼáat u yaʼal u tʼaaniloʼob le Bibliaoʼ, tu tsolaj baʼax u kʼáat u yaʼal le tʼaan meyajnaj tiʼ apóstol Pedrooʼ: «Le tʼaanaʼ jach nojoch baʼax u kʼáat u yaʼale [...;] u meyaj le tʼaan poikilos utiaʼal u yaʼalaʼal u jejeláasil bix u yeʼesik u yutsil Dioseʼ u kʼáat u yaʼaleʼ jach jeʼel baʼalak talamil ka u máans máakeʼ Dioseʼ jeʼel u páajtal u yáantik máak u aktáanteʼ».

U yutsil Dioseʼ ku yáantikoʼon k-aktáant le talamiloʼoboʼ

Apóstol Pedroeʼ ku yaʼalikeʼ Dioseʼ ku yeʼesik u yutsil yéetel le áantaj ku tsʼáaik le sukuʼunoʼob teʼ múuchʼuliloʼ (1 Pedro 4:11). Cada utúul tiʼ k-sukuʼunoʼobeʼ jejeláas bix u yáantkoʼonoʼob utiaʼal ka k-aktáant le jejeláas talamiloʼoboʼ (Romailoʼob12:6-8). Yaan sukuʼunoʼobeʼ jach maʼalob u kaʼansajoʼob. Ku tsʼoʼoleʼ le bix u kaʼansajoʼoboʼ jach ku líiʼskoʼob u yóol máak (Nehemías 8:1-4, 8, 12). Uláakʼoʼobeʼ ku bin u xíimbaltoʼob le sukuʼunoʼob táan u máanoʼob tiʼ talamiloʼob utiaʼal u líiʼskoʼob u yóoloʼoboʼ (Colosailoʼob 2:2). U xíimbaltaʼal le sukuʼunoʼobaʼ ku yáantaj utiaʼal u muʼukʼankúuntaʼal u oksaj óolaloʼob (Juan 21:16). Uláakʼ sukuʼunoʼob ichil le múuchʼuliloʼ jach ku chʼaʼikoʼob óotsilil tiʼ le lubaʼan u yóoloʼoboʼ yéetel ku yeʼesikoʼob yaabilaj tiʼob (Beetaʼanoʼob [Hechos] 4:36; Romailoʼob 12:10; Colosailoʼob 3:10). Le  yaabilaj ku yeʼesik le sukuʼunoʼob yéetel le áantaj ku tsʼáaikoʼoboʼ, ku chíikbesik bix u yeʼesik u yutsil Dios (Proverbios 12:25; 17:17).

«Le Jajal Dios ku kiʼimakkúuntik k-óol mantatsʼoʼ»

Jéeobaeʼ letiʼe «Jajal Dios ku kiʼimakkúuntik k-óol mantatsʼoʼ. [...] Ku kiʼimakkúuntik k-óol tiʼ tuláakal k-mukʼyajoʼob» (2 Corintoiloʼob 1:3, 4). Jéeobaeʼ ku núukik k-payalchiʼob yéetel le baʼax ku yaʼalik le Bibliaoʼ bey xan ken u tsʼáatoʼon u muukʼ (Isaías 30:18, 21; Lucas 11:13; Juan 14:16). Jach ku líiʼsik k-óol le baʼax tu tsʼíibtaj apóstol Pabloaʼ: «Teʼexeʼ ku páajtal a alab óoltikeʼex Jajal Dios, tumen letiʼeʼ maʼ bíin [u] pʼat u túuntaʼal a wóoleʼex maas tiʼ le ku páajtal a mukʼyajtikeʼexoʼ. Baʼaleʼ le ken taalak le túuntaj óolaloʼ Jajal Dios túuneʼ bíin u tsʼáa xan bix jeʼel u páajtal a jóokʼoleʼexiʼ» (1 Corintoiloʼob 10:13).

Jach tu jaajileʼ jeʼel baʼalak talamil ka k-máanseʼ Jéeobaeʼ yaan u yáantikoʼon utiaʼal u chúukpajal k-óol aktáante (Santiago 1:17). Le áantaj ku tsʼáaik Jéeoba tiʼ máaxoʼob meyajtik utiaʼal u aktáantkoʼob jeʼel baʼalak talamileʼ, ku yeʼesik «u jejeláasil u naʼat Jajal Dios» (Efesoiloʼob 3:10). ¿Bey wa k-ilkoʼ?

[U tsolajil le oochel teʼ táan juʼun 29]

Jéeobaeʼ ku yáantikoʼon k-aktáant jeʼel baʼalak talamileʼ