Kʼáatchiʼob ku beetaʼal

Deuteronomio 14:21, ku yaʼalik: «Maʼ a jaantikeʼex j-kimen baʼalcheʼ le chéen ku kíimiloʼ». Le baʼax ku yaʼalik le tekstoaʼ, ¿táan wa u bin tu contra le baʼax ku yaʼalik Levítico 11:40, tuʼux ku yaʼalik: «Le máax bíin jaantik u bakʼel le baʼalcheʼ [le chéen ku kíimiloʼ] unaj u pʼoʼik u nookʼ, bey xan ku pʼáatal maʼ uts yanil tak u yookbal kʼiin[iʼ]»?

Deuteronomio 14:21 maʼ táan u bin tu contra le baʼax ku yaʼalik Levítico 11:40. Tumen le yáax tekstoaʼ táan u yaʼalik maʼ maʼalob ka jaantaʼak u bakʼel utúul baʼalcheʼ tsʼokaʼaniliʼ u kíimil ken kaxtaʼakiʼ, maʼ xaaneʼ u yéet baʼalcheʼiloʼob kíimse (Éxodo 22:31; Levítico 22:8). Baʼaleʼ Levítico 11:40, táan u tʼaan tiʼ baʼax unaj u beetik utúul israelita wa ku jaantik u bakʼel utúul baʼalcheʼ, baʼaleʼ maʼ u yojel wa chéen bey úuchik u kíimiloʼ.

U ley Dioseʼ ku yaʼalik baʼaxoʼob maʼ uts ka beetaʼakiʼ, baʼaleʼ kex beyoʼ yaʼab máakoʼobeʼ ku beetkoʼob baʼaloʼob maʼ uts tu táan Diosiʼ. Yaan leyoʼobeʼ ku yaʼalikoʼob maʼ uts le ookoloʼ, maʼ uts u kíimsaʼal máakiʼ, maʼ uts u yaʼalik máak baʼaloʼob maʼ jaajtakiʼ yéetel uláakʼ baʼaloʼob. Yéetel ku yaʼalik xan baʼax kun úuchul tiʼ le máaxoʼob ku beetkoʼob baʼaloʼob ku bin tu contra u ley Diosoʼ, leloʼobaʼ ku yeʼeskoʼob jach kʼaʼabéet u beetaʼal baʼax ku yaʼalik Dios.

Le máax ku jaantik kaʼach u bakʼel utúul baʼalcheʼ tsʼokaʼaniliʼ u kíimil ken kaxtaʼakeʼ, maʼ uts yanil tu táan Jéeobaiʼ yéetel kʼaʼabéet u limpiokíintikuba. Baʼaleʼ wa maʼ tu beetik jeʼex aʼalaʼaniloʼ, «bíin u kuch u kʼasaʼanil» (Levítico 17:15, 16).