Kʼaʼabéet k-kʼaʼaytik le maʼalob péektsiloʼ
Kʼaʼabéet k-kʼaʼaytik le maʼalob péektsiloʼ
«¡Bukaʼaj jaʼtsil u yilaʼal u kʼuchbal teʼ joʼol luʼumoʼob máax taasik maʼalob péektsiloʼob!» (ISAÍAS 52:7.)
1, 2. 1) ¿Baʼaxoʼob kʼaastak ku sen úuchul sáamsamal? 2) ¿Bix u yuʼubikuba yaʼabach máak yoʼolal le baʼaloʼob kʼaastak ku sen úuchloʼ?
BEJLAʼEʼ tuláakal máak tsʼoʼok u náakal u yóol u yuʼub u péektsilil baʼaloʼob kʼaastak. Teʼ radiooʼ ku yuʼubik máak u yaʼalaʼal tuláakal tuʼux táan u muʼyajtaʼal kʼojaʼaniloʼob séeb u kíimsik máak. Ken u chaʼant máak péektsiloʼob tiʼ televisioneʼ ku yilik mejen paalal jach tsʼoyaʼantak tumen minaʼan baʼal u jaantoʼob. Ken xan u xok máak periodicoeʼ ku yilkeʼ le nukuch bombaʼob ku waʼakʼloʼoboʼ yaʼab nukuch najoʼob ku nikik yéetel ku kíimsik yaʼabach máakoʼob.
2 U jaajileʼ, sáamsamal ku yúuchul baʼaloʼob jach kʼaastak. Le yóokʼol kaabaʼ táan u bin u maas kʼastal (1 Corintoiloʼob 7:31). Upʼéel revista ku jóoʼsaʼal tu chikʼinil Europa ku tʼaan tiʼ le baʼaloʼob ku sen úuchloʼob teʼ kʼiinoʼobaʼ, tu yaʼaleʼ yaan kʼiineʼ ku yilaʼal bey jach u «kaʼaj wáakʼal» le yóokʼol kaabaʼ. Le baʼaloʼob kʼaastak ku yúuchloʼobaʼ ku beetik u jach chiʼichnaktal máak. Le baʼax tu yaʼalaj utúul tiʼ u kajnáaliloʼob Estados Unidos ka kʼáataʼab tiʼ bix u yuʼubikuba yoʼolal le sen péektsiloʼob ku máansaʼal sáamsamaloʼ, ku chíikbesik bix u yuʼubkuba u millonesi máakoʼob xan, letiʼeʼ tu yaʼalaj: «Ken in wuʼuy le péektsiloʼoboʼ, ku jach lúubul in wóol yéetel kin jach chiʼichnaktal. Tumen chéen u péektsilil baʼaloʼob kʼaastak ku sen máansaʼal».
Péektsiloʼob kʼaʼabéet u yuʼubaʼal tumen tuláakal máak
3. 1) ¿Tiʼ baʼax maʼalob péektsilil ku tʼaan le Bibliaoʼ? 2) ¿Baʼaxten jach nojoch baʼal k-ilik k-bisik u maʼalob péektsilil le Reinooʼ?
3 ¿U kʼáat wa túun u yaʼal jach minaʼan maʼalob péektsiloʼob teʼ yóokʼol kaabaʼ? ¡Maʼatech! Le Bibliaoʼ ku tʼaan tiʼ maʼalob péektsiloʼob, ku yaʼalikeʼ u Reino Dioseʼ yaan u xuʼulsik le kʼojaʼaniloʼoboʼ, le wiʼijiloʼ, le loobiloʼ, le baʼateltáambaloʼoboʼ yéetel tuláakal le baʼaloʼob talamkúuntik u kuxtal máakoʼ (Salmo 46:9; 72:12). ¿Máasaʼ letiʼe péektsiloʼob u kʼáat u yuʼub tuláakal máakaʼ? Toʼon u j-jaajkunajoʼon Jéeobaeʼ k-tuklikeʼ letiʼ. Le oʼolaleʼ, tuláakal tuʼuxeʼ kʼaj óolaʼanoʼon ikil k-bisik u maʼalob péektsilil u Reino Dios tiʼ tuláakal máak (Mateo 24:14).
4. Teʼ xookaʼ yéetel teʼ tuláakʼoʼ, ¿baʼax ken kan jeʼel u yáantkoʼon k-bis le maʼalob péektsiloʼ?
4 ¿Baʼax túun jeʼel u yáantkoʼon utiaʼal maʼ u xuʼulul k-kʼaʼaytik tubeel le maʼalob péektsil tak teʼ tuʼuxoʼob maʼatech u jach chʼenxikintaʼaloʼ? (Lucas 8:15.) Koʼoneʼex ilik óoxpʼéel baʼal jach jeʼel u yáantkoʼoneʼ. Yáaxeʼ yaan k-ilik baʼaxten k-kʼaʼaytaj, u kaʼapʼéeleʼ baʼax k-kʼaʼaytik, yéetel u óoxpʼéeleʼ bix k-kʼaʼaytaj. Wa jach k-ojel baʼaxten k-kʼaʼaytaj, baʼax k-kʼaʼaytik bey xan wa k-ojel bix ken k-kʼaʼaytajeʼ, yaan u páajtal k-áantik yaʼabach máakoʼob u yuʼuboʼob le maas maʼalob péektsiloʼ: u maʼalob péektsilil u Reino Dios. *
Baʼaxten k-kʼaʼaytik le maʼalob péektsiloʼ
5. 1) ¿Baʼax jach péekskoʼon k-kʼaʼayt le maʼalob péektsiloʼ? 2) ¿Baʼaxten jeʼel u páajtal u yaʼalaʼaleʼ ken jóokʼok máak kʼaʼaytajeʼ upʼéel bix u yeʼesik u yaabilmaj Dios?
5 Yáaxeʼ koʼoneʼex ilik baʼaxten k-kʼaʼaytik le maʼalob péektsiloʼ. K-kʼaʼaytaj tumen ku péekskoʼon xan le baʼax péeks Jesús kʼaʼaytajoʼ, letiʼeʼ tu yaʼalaj: «Teneʼ in yaabiltmaj le Taataoʼ» (Juan 14:31; Salmo 40:8). Toʼon xaneʼ k-kʼaʼaytaj tumen k-yaabilmaj Dios (Mateo 22:37, 38). Le Bibliaoʼ ku yeʼesik yaan baʼax u yil u yaabiltaʼal Dios yéetel u kʼaʼaytaʼal le maʼalob péektsil ken u yaʼal: «U yaabiltaʼal Jajal Dioseʼ u yuʼubaj tʼantaʼal u yaʼalmaj tʼaanoʼob» (1 Juan 5:3; Juan 14:21). ¿U yaʼalmaj wa túun Dios ka kaʼansaʼak uláakʼ máakoʼob? (Mateo 28:19.) U yaʼalmaj. Tumen kex Jesús aʼal ka beetaʼakeʼ, jeʼel u páajtal k-aʼalikeʼ Jéeoba aʼale, tumen Jesuseʼ tu yaʼalaj: «Teneʼ maʼ tin beetik mix baʼal chéen tu juunal in wóolal. Baʼaleʼ kin waʼalik chéen le baʼax tu kaʼansaj teen le Taataoʼ» (Juan 8:28; Mateo 17:5). Le oʼolaleʼ, ken jóoʼkoʼon kʼaʼaytajeʼ, táan k-eʼesik k-yaabiltmaj Jéeoba.
6. ¿Bix u péekskoʼon kʼaʼaytaj le yaabilaj k-uʼuyik yoʼolal Diosoʼ?
6 K-yaabilaj tiʼ Dioseʼ ku péekskoʼon xan kʼaʼaytaj, tumen k-kʼáat eʼes maʼ jaaj tuláakal baʼax ku yaʼalaʼal tu contra tumen Satanasiʼ (2 Corintoiloʼob 4:4). Satanaseʼ u yaʼalmaj maʼ maʼalob bix u gobernar Jéeobaiʼ (Génesis 3:1-5). Toʼoneʼ k-tsʼíiboltik ka chíikpajak maʼ jaaj baʼax ku yaʼalik Satanasiʼ, yéetel k-tsʼíiboltik ka u nojbeʼenkúunt u kʼaabaʼ Jéeoba tu táan tuláakal máak (Isaías 43:10-12). K-jóokʼol xan kʼaʼaytaj tumen tsʼoʼok k-kʼuchul k-kʼaj óolt u jatsʼuts modos Jéeoba yéetel tumen tsʼoʼok k-kanik tojtak tuláakal baʼax ku beetik. K-uʼuyik xan naatsʼ yaniloʼon tiʼ Jéeoba yéetel k-jach kʼáat tsikbalt tiʼ uláakʼ máakoʼob baʼaxoʼob tsʼoʼok k-kanik tiʼ letiʼ. U jaajileʼ, yoʼolal u yutsil Jéeoba yéetel tumen láaj tojtak baʼaxoʼob ku beetikeʼ maʼ tu páajtal k-xulik k-tʼaan tiʼ letiʼ (Salmo 145:7-12). Tsʼoʼoleʼ, k-uʼuyik taak k-kiʼikiʼtʼantik yéetel taak k-tsikbaltik u nukuch meyajoʼob tiʼ tuláakal máax uʼuyikoʼon (1 Pedro 2:9; Isaías 43:21).
7. ¿Baʼax uláakʼ péekskoʼon kʼaʼaytaj?
7 Uláakʼ baʼax péekskoʼon utiaʼal maʼ k-xulik kʼaʼaytajeʼ, tumen jach tu jaajil k-kʼáat líiʼs u yóol le máaxoʼob chiʼichnakkúuntaʼanoʼob tumen le baʼaloʼob kʼaastak ku sen úuchloʼoboʼ. Ken kʼaʼaytajnakoʼoneʼ k-ilik líiʼsik u yóol le máakoʼob jeʼex tu beetil Jesuseʼ. Koʼoneʼex ilik baʼax tu beetaj Jesús utéenjeakil jeʼex u yeʼesik le capítulo 6 tiʼ u libroi Marcosoʼ.
8. ¿Bix u yeʼesik Marcos capítulo 6 bix úuchik u chʼaʼik óotsilil Jesús tiʼ le máakoʼoboʼ?
8 Utéenjeakil, ka suunaj le apostoloʼob tsʼoʼok u kʼaʼaytajoʼoboʼ, joʼopʼ u tsikbaltkoʼob tiʼ Jesús tuláakal baʼax tu beetoʼob yéetel tu kaʼansoʼob. Ka tu yilaj Jesús kaʼanaʼanoʼobeʼ tu yaʼalajtiʼob ka xiʼikoʼob tu yéetel utiaʼal ka jeʼelkoʼob u súutuk. Ka túun naʼakoʼob tiʼ upʼéel cheem utiaʼal u binoʼob tiʼ upʼéel kúuchil tuʼux mix máak yaniʼ. Baʼaleʼ, le máakoʼoboʼ áalkabil binikoʼob tu jáal le kʼáaʼnáaboʼ, le oʼolaleʼ maʼ xáanchaj ka tu chukpachtoʼobiʼ. ¿Baʼax túun tu beetaj Jesús? Le Bibliaoʼ ku yaʼalik: «Tu yilaj yaʼabkach máakoʼob, ka tu chʼaʼaj óotsilil tiʼob, tumen beyoʼob j-taman minaʼan máax kanáantikoʼobeʼ, ka joʼopʼ u kaʼansiktiʼob yaʼabkach baʼaloʼob» (Marcos 6:31-34). Kex kaʼanaʼaneʼ, Jesuseʼ tu tsikbaltaj le maʼalob péektsil tiʼ le máakoʼoboʼ, tumen jach tu jaajil «tu chʼaʼaj óotsilil tiʼob».
9. ¿Baʼax ku kaʼansiktoʼon Marcos capítulo 6 yoʼolal baʼax unaj u péekskoʼon kʼaʼaytaj?
9 ¿Baʼax ku kaʼansiktoʼon le tsikbalaʼ? U jaajileʼ k-ojel kʼaʼabéet k-kʼaʼaytik yéetel k-kaʼansik tiʼ uláakʼ máakoʼob le maʼalob péektsiloʼ. K-ojel xaneʼ unaj k-beetik, tumen Dioseʼ u kʼáat ka u salvartuba «tuláakal máakoʼob» (1 Timoteo 2:4). Baʼaleʼ, maʼ unaj k-kʼaʼaytaj chéen tumen k-ojel kʼaʼabéetiʼ, unaj k-beetik tumen k-chʼaʼik óotsilil tiʼ k-éet wíinikil. Wa jach tu jaajil k-kaxtik u yutsil u maasil jeʼex tu beetil Jesuseʼ, yaan k-péeksaʼal tumen k-puksiʼikʼal utiaʼal maʼ k-xulik k-kʼaʼaytik le maʼalob péektsiloʼ (Mateo 22:39). Wa k-tuukul beyaʼ yaan u yáantkoʼon utiaʼal maʼ k-xulik k-kʼaʼaytik le maʼalob péektsiloʼ.
K-kʼaʼaytik u maʼalob péektsilil u Reino Dios
10, 11. 1) ¿Bix u yeʼesik Isaías baʼax péektsilil k-kʼaʼaytik? 2) ¿Bix úuchik u kʼaʼaytik Jesús le maʼalob péektsiloʼ, yéetel bix u kʼaʼaytaʼal tumen máaxoʼob meyajtik Dios teʼ kʼiinoʼobaʼ?
10 Baʼaleʼ ¿baʼax túun k-kʼaʼaytik? Profeta Isaíaseʼ ku núukik yéetel le jatsʼuts tʼaanoʼobaʼ: «¡Bukaʼaj jatsʼutsil u yilaʼal u kʼuchbal teʼ joʼol luʼumoʼob máax taasik maʼalob péektsiloʼob, máax taasik u péektsiloʼob jéetsʼel, máax taasik u péektsiloʼob jáalkʼabil bey xan ku yaʼalik tiʼ Sión: [Dioseʼ] letiʼ [rey]!» (Isaías 52:7).
11 Le xóotʼ tʼaan maas kʼaʼanan ku taasik le tekstoaʼ letiʼ lelaʼ, Dioseʼ «letiʼ [rey]», lelaʼ ku yeʼeskeʼ kʼaʼabéet k-kʼaʼaytik u maʼalob péektsilil u Reino Dios (Marcos 13:10). Le versículo xanaʼ ku yeʼesikeʼ le maʼalob péektsiloʼ jach ku líiʼsik u yóol máakoʼoboʼ. Isaíaseʼ tu chʼaʼachiʼitaj tʼaanoʼob jeʼex «maʼalob péektsiloʼob», «jeetsʼel» yéetel «jáalkʼabil». Teʼ yáax siglooʼ, Jesucristoeʼ jach chúukpaj u yóol u kʼaʼayt u maʼalob péektsilil u Reino Dios, jeʼex aʼalaʼabik tumen profeta Isaíasoʼ (Lucas 4:43). Jeʼex tu beetaj Jesuseʼ, tu jaʼabil 1919 tak bejlaʼeʼ, u j-jaajkunajoʼob Jéeobaeʼ táan xan u kʼaʼaytkoʼob yéetel chúukaʼan óolal u péektsilil u Reino Dios yéetel le utsiloʼob ken u taasoʼ.
12. ¿Baʼax utsiloʼob ku yilik le máaxoʼob kʼamik u maʼalob péektsilil le Reinooʼ?
12 ¿Baʼax utsiloʼob ku yilik le máaxoʼob kʼamik u maʼalob péektsilil le Reinooʼ? Jeʼex tu kʼiiniloʼob Jesuseʼ, le maʼalob péektsiloʼ ku tsʼáaik esperanza yéetel ku líiʼsik u yóol tuláakal máak (Romailoʼob 12:12; 15:4). Ku yáantik le máaxoʼob uts u puksiʼikʼaloʼoboʼ, tumen ku naʼatkoʼobeʼ yaan u kʼuchul u kʼiinil u béeykuntik Dios baʼax u tukulmaj utiaʼal le Luʼumaʼ (Mateo 6:9, 10; 2 Pedro 3:13). Le jatsʼuts baʼaloʼob ku taal u kʼiinaʼ, ku beetik u kiʼimaktal u yóol le máaxoʼob ku chʼaʼikoʼob maʼalob saajkilil tiʼ Diosoʼ, jeʼex u yaʼalik le salmistaoʼ, letiʼobeʼ maʼ ken u chʼaʼob saajkil «tiʼ u tsikbalil baʼax kʼaas ku yúuchul» (Salmo 112:1, 7).
Upʼéel péektsil utiaʼal u baʼkʼaxtaʼal «le máaxoʼob kaachal u puksiʼikʼaloʼoboʼ»
13. ¿Baʼax utsiloʼob tu yaʼalaj profeta Isaías ku yilik le máaxoʼob kʼamik le maʼalob péektsiloʼ?
13 Tsʼoʼoleʼ, le máaxoʼob xan kʼamik le maʼalob péektsiloʼ ku líikʼil u yóoloʼob yéetel ku kʼamikoʼob xan yaʼab utsiloʼob bejlaʼeʼ. ¿Bix túun u yúuchul lelaʼ? U libroi Isaíaseʼ ku tʼaan tiʼ le utsiloʼob ku taasik u kʼamaʼal le maʼalob péektsiloʼ: «U kiliʼich muukʼ Jalaʼach Yuumtsil Jéeobaeʼ tiʼ yaan tin wóokʼoleʼ, tumen Jéeobaeʼ tsʼoʼok u yalik aceite tin wóokʼol utiaʼal in kʼaʼaytik maʼalob péektsilil tiʼ le óotsiloʼoboʼ. Tsʼoʼok u túuxtiken utiaʼal in baʼkʼaxtik le máaxoʼob kaachal u puksiʼikʼaloʼoboʼ, utiaʼal in kʼaʼaytik yaan u jáalkʼabtaʼal le máaxoʼob kʼaxbil bisaʼabikoʼoboʼ yéetel yaan u píiʼ jeʼekʼabtaʼal u yichoʼob le kʼalaʼanoʼoboʼ; utiaʼal in kʼaʼaytik u jaʼabil ikil u yeʼesik u yutsil Jéeoba, yéetel u kʼiinil tuʼux k-Dioseʼ bíin u sut u jeel le looboʼ; utiaʼal in líiʼsik u yóol le máaxoʼob táan yoʼtik u kimenoʼoboʼ» (Isaías 61:1, 2, NM; Lucas 4:16-21).
14. 1) ¿Baʼax ku yeʼesik yoʼolal le maʼalob péektsil le tʼaan ku «baʼkʼaxtik le máaxoʼob kaachal u puksiʼikʼaloʼoboʼ»? 2) ¿Bix k-eʼesik u yutsil Jéeoba tiʼ le «kaachal u puksiʼikʼaloʼoboʼ»?
14 Jeʼex u yaʼalik le profecíaaʼ, yéetel le maʼalob péektsil táan u kʼaʼaytaʼaloʼ, Jesuseʼ bey ku «baʼkʼaxtik le máaxoʼob kaachal u puksiʼikʼaloʼoboʼ». ¿Máasaʼ jach jatsʼuts le kettʼaan tu beetaj Isaíasoʼ? Upʼéel diccionario ku tsolik u tʼaaniloʼob le Bibliaoʼ ku yaʼalikeʼ le tʼaan ich ebreo ku suʼutul baʼkʼaaxoʼ «maases ku meyaj utiaʼal u yaʼalaʼal u tsʼaʼakal u yajil wa máax». Ken bisaʼak utúul máak ospital uchaʼan loob tiʼeʼ ku baʼkʼaxtaʼal u yajil yéetel upʼéel nookʼ utiaʼal ka séeb utsak. U péektsilil le Reino ku kʼaʼaytaʼal tumen u j-tsaypachoʼob Cristooʼ ku tsʼakik xan u puksiʼikʼal le máaxoʼob táan u muʼyajoʼoboʼ. Ken k-áant túun le máaxoʼob táan u muʼyajoʼoboʼ ku yeʼesaʼal u yutsil Jéeoba (Ezequiel 34:15, 16). Le salmistaoʼ ku yaʼalik tu yoʼolal Dios: «Letiʼ tsʼakik máaxoʼob kʼilaʼan u puksiʼikʼaloʼob ku toʼik xan u yajiloʼob» (Salmo 147:3).
Baʼax utsil ku taasik tiʼ le máakoʼob u maʼalob péektsilil le Reinooʼ
15, 16. ¿Baʼaxoʼob eʼesik jach tu jaajil u maʼalob péektsilil le Reinooʼ ku líiʼsik u yóol yéetel ku tsʼáaik muukʼ tiʼ le máaxoʼob «kaachal u puksiʼikʼaloʼoboʼ»?
15 Yaʼab máaxoʼob «kaachal u puksiʼikʼaloʼob[eʼ]» tsʼoʼok u líiʼsaʼal u yóoloʼob yéetel tsʼoʼok u tsʼaʼabal muukʼ tiʼob tumen u maʼalob péektsilil le Reinooʼ. Lelaʼ bey úuchik tiʼ Oreanna, utúul koʼolel chʼijaʼan, tsʼoʼok kaʼach u joʼopʼol u tsʼíiboltik u kíimil. Baʼaleʼ joʼopʼ u xíimbaltaʼal tumen utúul kiik utiaʼal ka xoʼokok le Biblia u yuʼuboʼ bey xan U libroi tsikbaliloʼob tiʼ le Bibliaoʼ. * Tu káajbaleʼ, le nojoch koʼolelaʼ chilikbal yéetel u mutsʼmaj u yich táan u yuʼubik u xook le kiikoʼ, chéen wa baʼax ora ku yuʼubal u kʼaʼam chʼaʼik u yiikʼ kaʼachi. Maʼ xáanchajeʼ, kex istikiaeʼ, joʼopʼ u kutal tu cama u yuʼub le xookoʼ. Ka chan máan kʼiineʼ ka joʼopʼ u kutal tiʼ upʼéel silla u páaʼt le kiikoʼ. Maʼ xáanchaj ka káaj u bin teʼ muchʼtáambaloʼoboʼ. Jach líikʼ u yóol yoʼolal le baʼax ku kankoʼ, le oʼolal joʼopʼ u kʼaʼaytik le jóoʼsaʼaniloʼob tiʼ le máaxoʼob ku máanoʼob tu jool u yotochoʼ. Tu tsʼookeʼ, Oreannaeʼ kex yaan 93 jaʼaboʼob tiʼeʼ, okjaʼanaj utiaʼal u yeʼesik tsʼoʼok u kʼubikuba u meyajt Jéeoba. U maʼalob péektsilil le Reinooʼ letiʼ áant utiaʼal ka xuʼuluk u tsʼíiboltik u kíimil (Proverbios 15:30; 16:24).
16 U maʼalob péektsilil le Reinooʼ ku tsʼáaik xan muukʼ tiʼ le máaxoʼob yaan kʼojaʼanil tiʼob u yojloʼob maʼ yaʼab u bin u kíimloʼoboʼ. Lelaʼ bey úuchik tiʼ Maria, utúul koʼolel kajaʼan tu chikʼinil Europa, letiʼeʼ yojel taʼaytak u kíimil yoʼolal le kʼojaʼanil yantiʼoʼ, le oʼolaleʼ ku yuʼubik kaʼacheʼ tsʼokaʼan tiʼiʼ. Jach lubaʼan u yóol ka kʼuch xíimbaltbil tumen u j-jaajkunajoʼob Jéeoba. Baʼaleʼ, ka tu kanaj baʼaxoʼob u yaʼalmaj Dios u beetkeʼ, tu yuʼubaj kaʼa yanchaj u beelal u kuxtal. Letiʼeʼ okjaʼanajiʼ, yéetel tu jach kʼubaj u yóol kʼaʼaytaj. Ichil u tsʼook kaʼapʼéel jaʼabil u kuxtaleʼ, u yichoʼobeʼ ku yeʼeskoʼob kaʼach jach kiʼimak u yóol yéetel yaan baʼax maʼalob ku páaʼtik. Maria ka kíimeʼ, tiaʼan tu tuukul yaan u kaʼa kuxkíintaʼaleʼ (Romailoʼob 8:38, 39).
17. 1) ¿Bix u yáantaʼal le máakoʼob tumen le maʼalob péektsil tsʼoʼok u kʼamkoʼoboʼ? 2) Techeʼ, ¿bix tsʼoʼok a wilik Jéeobaeʼ ku «líikʼesik le máaxoʼob ku lúubul yóoloʼoboʼ»?
17 Le baʼaxoʼob uchaʼantakaʼ ku yeʼesikeʼ u maʼalob péektsilil le Reinooʼ ku yáantik le máakoʼob kʼamik le kaʼansajoʼob ku taal teʼ Bibliaoʼ. Le máaxoʼob jach lubaʼan u yóoloʼob tumen maʼ úuch kíimik máax jach u yaabiltmoʼobeʼ ku líikʼil u yóoloʼob ken u kanoʼob yaan u kaʼa kuxtal le kimenoʼoboʼ (1 Tesalonicailoʼob 4:13). Le máaxoʼob ku máanskoʼob óotsilil yéetel talam u kaxkoʼob baʼal u jaantoʼob yéetel u familiaʼobeʼ ku líikʼil yéetel ku kiʼimaktal u yóoloʼob ken u kanoʼob mix bikʼin kun pʼatbiloʼob tumen Jéeoba wa ku yilik u meyajtikoʼob jeʼex u kʼáateʼ (Salmo 37:28). Yéetel u yáantaj Jéeobaeʼ, le máaxoʼob jach lubaʼan u yóoloʼob yoʼolal le chiʼichnakiloʼob ku máanskoʼoboʼ ku líikʼil u yóoloʼob, yéetel yaneʼeʼ ku xuʼulul u jach chiʼichnaktaloʼob (Salmo 40:1, 2). Yéetel le muukʼ ku tsʼáaik u Tʼaanoʼ, Jéeobaeʼ táan xan u «líikʼesik le máaxoʼob ku lúubul yóoloʼoboʼ» (Salmo 145:14). Cada ken k-il bix u líiʼsaʼal u yóol le máaxoʼob «kaachal u puksiʼikʼaloʼob» teʼ tuʼux k-kʼaʼaytaj yéetel bix u líiʼsaʼal u yóol k-sukuʼunoʼob tumen u maʼalob péektsilil le Reinooʼ, k-ilkeʼ tiʼ toʼon yaan le maas maʼalob péektsil teʼ kʼiinoʼobaʼ (Salmo 51:17).
«In payalchiʼ tiʼ Jajal Dios tu yoʼolal[oʼob]»
18. ¿Bix tu yuʼubiluba Pablo tumen maʼ kʼaʼam le maʼalob péektsil tumen le judíoʼoboʼ, yéetel baʼaxten tu yuʼububa beyoʼ?
18 Kex jach maʼalob le baʼaxoʼob k-kʼaʼaytikoʼ, yaʼabeʼ maʼatech u yóotik u yuʼubeʼ. Lelaʼ, ¿bix jeʼel u beetik k-uʼuyikbaeʼ? Maʼ xaaneʼ jeʼex tu yuʼubiluba apóstol Pabloeʼ. Letiʼeʼ jach yaachaj tu yóol ka tu yilaj maʼ kʼaʼam tumen le judíoʼob u péektsilil salvación tu kʼaʼaytaj tiʼoboʼ. Letiʼeʼ tu yaʼalaj: «Jach okʼom in wóol yéetel mantatsʼ yaan yaayaj óolal tin puksiʼikʼal» (Romailoʼob 9:2). K-ilik túuneʼ, Pabloeʼ tu chʼaʼaj óotsilil tiʼe judíoʼoboʼ, le oʼolal yaachaj tu yóol ka tu yilaj maʼ kʼaʼam le maʼalob péektsil tu kʼaʼaytaj tiʼoboʼ.
19. 1) ¿Baʼaxten ku yaatal t-óol ken k-il maʼatech u kʼaʼamal le maʼalob péektsiloʼ? 2) ¿Baʼax áant Pablo utiaʼal maʼ u xulik u kʼaʼaytaj?
19 Toʼon xaneʼ k-kʼaʼaytik le maʼalob péektsiloʼ tumen k-chʼaʼik óotsilil tiʼ le máakoʼoboʼ, le oʼolal ku yaatal xan k-óol ken k-il maʼatech u kʼaʼamal. K-uʼuyikba beyaʼ ku yeʼesik k-jach tsʼíiboltik ka meyajtaʼak Dios tumen le máaxoʼob tiʼ k-kʼaʼaytajoʼ. Baʼaleʼ, maʼ unaj u tuʼubultoʼon baʼax tu beetaj Pabloiʼ. Letiʼeʼ, ¿baʼax áant utiaʼal maʼ u xulik u kʼaʼaytaj? Kex jach yaachaj tu yóol ka tu yilaj maʼ kʼaʼam le maʼalob péektsil tumen le judíoʼoboʼ, maʼ tu tuklaj wa jach mix máak kun kʼamkiʼ. Letiʼeʼ u yojel yaan tiʼ letiʼob kun kʼamik Cristoiʼ, le oʼolal tu yaʼalaj tu yoʼolaloʼob: «[In] tsʼíibolal yéetel in payalchiʼ tiʼ Jajal Dios tu yoʼolal le israelitaʼoboʼ letiʼ lelaʼ: ka toʼokokoʼob» (Romailoʼob 10:1).
20, 21. 1) ¿Bix jeʼel k-kʼaʼaytaj jeʼex úuchik u beetik apóstol Pabloeʼ? 2) ¿Baʼax ken k-il teʼ tuláakʼ xookoʼ?
20 Tuukulnakoʼon tiʼ kaʼapʼéel baʼax tʼaanaj Pablo. Letiʼeʼ jach ku tsʼíiboltik kaʼach ka u salvartuba yaʼabach judíoʼoboʼ yéetel ku kʼáatik tiʼ Dios ka úuchuk beyoʼ. Toʼon xaneʼ bey k-beetikoʼ. K-tsʼíiboltik kaxtik tuláakal le máaxoʼob u kʼáat u kʼamoʼob le maʼalob péektsiloʼ, yéetel k-kʼáatik xan tiʼ Jéeoba ka u tsʼáatoʼon u páajtalil k-áantikoʼob ka xíimbalnakoʼob tu bejil le salvacionoʼ (Proverbios 11:30; Ezequiel 33:11; Juan 6:44).
21 Baʼaleʼ, utiaʼal ka k-kʼaʼayt le maʼalob péektsil tiʼ jeʼel jaytúul máak ku páajtaleʼ, maʼ chéen unaj k-ilik baʼaxten yéetel baʼax k-kʼaʼaytikiʼ, kʼaʼabéet xan k-ilik bix unaj k-beetik. Teʼ tuláakʼ xookoʼ le ken k-ile.
[Tsolajiloʼob]
^ xóot’ol 4 Teʼ xookaʼ yaan k-ilik le yáax kaʼapʼéeloʼ. Teʼ tuláakʼoʼ yaan k-ilik u yóoxpʼéeloʼ.
^ xóot’ol 15 Beetaʼan tumen u j-jaajkunajoʼob Jéeoba.
¿Baʼax tsʼoʼok a kanik?
• ¿Baʼaxten k-kʼaʼaytik le maʼalob péektsiloʼ?
• ¿Baʼax péektsilil k-kʼaʼaytik?
• ¿Baʼax utsiloʼob ku yilik le máaxoʼob kʼamik u maʼalob péektsilil le Reinooʼ?
• ¿Baʼax kun áantkoʼon utiaʼal maʼ k-xulik kʼaʼaytaj?
[U kʼáatchiʼiloʼob le xookoʼ]
[U tsolajil le oochel teʼ táan juʼun 18]
U péektsilil le Reinooʼ ku líiʼsik u yóol le «kaachal u puksiʼikʼaloʼoboʼ»
[U tsolajil le oochel teʼ táan juʼun 20]
Le payalchiʼoʼ ku yáantkoʼon utiaʼal maʼ k-xulik k-kʼaʼaytaj