Ku kiʼikiʼtʼantikoʼob Jéeoba tu najil u xookoʼob

TULÁAKAL tuʼuxeʼ, le táankelem paalal j-jaajkunajoʼoboʼ ku kaxtikoʼob bix jeʼel u kiʼikiʼtʼantikoʼob Dios tu najil u xookoʼobeʼ, lelaʼ ku beetkoʼob ken u tsikbaltoʼob tiʼ u yéet xookoʼob le baʼax ku kaʼansik le Bibliaoʼ bey xan yéetel baʼaxoʼob ku beetkoʼob. Lelaʼ, bey tu beetil le táankelem paalal ken k-il teʼ xookaʼ.

Tiʼ utúul x-lóoʼbayan chʼúupal Greciaileʼ, aʼalaʼab tiʼ tumen u x-kaʼansaj ka tʼaanak tiʼ bix u kʼaskúuntaʼal le iikʼoʼ. Letiʼeʼ tu xakʼaltaj le Índice de las publicaciones Watch Tower, teʼeloʼ tu yileʼ yaan upʼéel ¡Despertad! ku tʼaan tiʼ lelaʼ, ka meyajnaj tiʼ utiaʼal u beetik le tsʼíib pʼataʼab u beetoʼ. Tsʼoʼoleʼ tu tsʼíibtaj tiʼ baʼax revistai tu chʼaʼaj. Le x-kaʼansajoʼ tu yaʼalaj tiʼeʼ mix utéen u xok upʼéel tsʼíib jach maʼalob jeʼex le tu beetaj le kiikaʼ, ka tsʼoʼokeʼ lelaʼ meyajnaj tiʼ le x-kaʼansaj tiʼ upʼéel muchʼtáambal anchaj tiʼ yéetel uláakʼ j-kaʼansajoʼoboʼ. Le baʼax úuch tiʼe kiikaʼ tu péeksaj utiaʼal u tsʼáaik uláakʼ revistaʼob tiʼ u x-kaʼansaj, ichil leloʼobaʼ tiʼ yaan le revista ku taasik le xook: “¿Qué haríamos sin los profesores?”. Ka tsʼoʼok túuneʼ tu táan le paalaloʼoboʼ le x-kaʼansajoʼ tu yaʼaleʼ jach jatsʼuts le xookoʼob ku taasik le revista ¡Despertad!, u yéet xookoʼob túun le kiikaʼ tu kʼáatoʼob xan le revistaaʼ. Letiʼ túuneʼ tu bisaj le revistaʼob tiʼoboʼ.

Tiʼ upʼéel u kaajil África ku kʼaabaʼtik Benineʼ, utúul x-lóoʼbayan chʼúupal j-jaajkunajeʼ tu máansaj upʼéel talamil. Jeʼex suuk u beetaʼal teʼ kaajoʼ, u taataʼob le paalaloʼoboʼ tu muchʼubaʼob utiaʼal u kaxkoʼob máaxoʼob kun áantik u paalaloʼob utiaʼal ka u máansoʼob le eksamenoʼob maas talamtakoʼ. Le máaxoʼob kaxtaʼab utiaʼal áantik le paalaloʼobaʼ tu yaʼaloʼobeʼ tiʼ sábados ken u yáantoʼob. Le kiikaʼ tu yaʼalaj: «Tiʼ sabadoseʼ tuláakal le sukuʼunoʼob teʼ múuchʼuliloʼ ku jóoʼloʼob kʼaʼaytaj. Ken jóoʼken kʼaʼaytaj yéeteloʼobeʼ jach ku kiʼimaktal in wóol, le oʼolaleʼ mix baʼal uláakʼ jeʼel u páajtal in beetik teʼ kʼiinaʼ». U taata le kiikaʼ j-jaajkunaj xan yéetel chéen tu juunal ku líiʼsik le u iijaaʼ. Letiʼeʼ tu éejemtaj baʼax tu yaʼalaj u iijaoʼ tsʼoʼoleʼ ka tʼaanaj yéetel tuláakal le tu muchʼubaʼoboʼ utiaʼal ka u kʼexoʼob u kʼiinil le xookoʼoboʼ, baʼaleʼ mix utúul tu yóotiʼ. Le kiik túunaʼ tu yaʼaleʼ maʼ kun bin teʼ xookoʼob kun tsʼaabiloʼ utiaʼal beyoʼ ka páatak u bin teʼ kʼaʼaytaj yéetel le sukuʼunoʼob teʼ múuchʼuliloʼ. U yéet xookoʼob le kiikaʼ tu pʼaʼastoʼob, tu yaʼaloʼob tiʼ ka u xul u kʼaʼaytaj yéetel ka u xul u meyajtik Dios. Letiʼobeʼ tu tukloʼobeʼ maʼ ken u máans u eksamenoʼob le kiikaʼ. Baʼaleʼ ka tsʼoʼokeʼ, chéen letiʼ tu máansaj le eksamenoʼoboʼ. Tuláakal le u yéet xookoʼob áantaʼaboʼoboʼ maʼ tu máansoʼobiʼ. Le kiikaʼ xuʼul u pʼaʼastaʼal. Yéetel bejlaʼeʼ u yéet xookoʼob aʼalik tiʼ maʼ u pʼatik u meyajtik Dios.

Teʼ República Checaoʼ utúul chan x-chʼúupal j-jaajkunaj, 12 u jaʼabileʼ aʼalaʼab tiʼ tumen u x-kaʼansaj ka u líiʼsuba utiaʼal ka tʼaanak tiʼ upʼéel libro, u maama le chan x-chʼúupalaʼ tu yaʼalaj tiʼ ka tʼaanak tiʼ le libro El hombre más grande de todos los tiempos. Utiaʼal u káajsik túun u tʼaaneʼ tu kʼáataj tiʼ u yéet xookoʼob: «A tiaʼaleʼexeʼ, ¿máax le máak maas nojoch tsʼoʼok u kuxtaloʼ?». Ka tsʼoʼok u tsolik máax Jesús, baʼaxoʼob tu kaʼansaj yéetel bix úuchik u kuxtal way Luʼumeʼ, tʼaanaj tiʼ le xook ku kʼaabaʼtik: “Lección sobre saber perdonar”. Le x-kaʼansajoʼ tu yaʼalaj: «¡Le meyaj ta beetaʼ letiʼe maas maʼalob meyaj tsʼoʼok a beetikoʼ!», tsʼoʼoleʼ le x-kaʼansajaʼ tu kʼamaj upʼéel libro. U yéet xookoʼob le chan x-chʼúupalaʼ tu kʼáatoʼob xan le libroaʼ. Tuláakʼ kʼiineʼ, le chan x-chʼúupaloʼ tu kʼubaj dieciocho upʼéelel libroʼob.

Le táankelem paalaloʼobaʼ ku kiʼimaktal u yóoloʼob ikil u kiʼikiʼtʼantikoʼob Jéeoba tu najil u xookoʼob. Toʼon xaneʼ maʼalob ka k-beet jeʼex tu beetiloʼoboʼ.