Le baʼax jeʼel u páajtal u beetik u Tʼaan Diosoʼ

Detlef, utúul táankelem paal, u pʼatmuba u taataʼobeʼ, ku drogarkuba, ku káaltal yéetel ku sen uʼuyik paax ku kʼaabaʼtik heavy metal. * Letiʼeʼ joʼopʼ xan u máan yéetel u múuchʼ pandilleroʼob u tsʼikmaj u pooloʼob, yéetel tumen jach séeb u baʼateleʼ yanchaj talmiloʼob tiʼ yéetel le policíaʼoboʼ.

Tu jaʼabil 1992, tiʼ upʼéel cántina yaan tu luʼumil Alemaniaeʼ, 60 tiʼ le pandilleroʼobaʼ baʼatelnajoʼob yéetel 35 roqueros punk. Thomas, utúul tiʼ le roqueros punkoʼ, kíim teʼ baʼatelaʼ. Yaʼab tiʼ u pooliloʼob le baʼatelaʼ kʼalaʼaboʼob cárcel ka tsʼoʼok u juzgartaʼaloʼob, ichiloʼobeʼ tiaʼan Detlefiʼ. Le baʼax úuchtiʼobaʼ jach yaʼab máak ojéelte.

Maʼ úuch jáalkʼabtaʼak Detlefeʼ, utúul j-jaajkunajeʼ tu pʼataj tiʼ upʼéel tratado ku kʼaabaʼtik: “¿Por qué hay tantos problemas en la vida?”. Letiʼeʼ tu yileʼ jach jaaj baʼax ku yaʼalik le chan juʼunaʼ, ka túun káaj u xokik le Biblia yéetel u j-jaajkunajoʼob Jéeobaoʼ. Ka tsʼoʼokeʼ tu kʼexaj u kuxtal. Tu jaʼabil túun 1996, Detlefeʼ tu beetuba utúul tiʼ u j-jaajkunaj Jéeoba.

Siegfried, utúul tiʼ le roqueros punk jach ku bisikuba kaʼach yéetel Thomas, le xiʼipal kíimsaʼabeʼ, tu beetuba xan j-jaajkunaj tiʼ Jéeoba; bejlaʼeʼ u nuxibil upʼéel múuchʼulil. Ka bin Siegfried tu múuchʼulil Detlef u máans upʼéel tseʼekeʼ, invitartaʼab janal tumen Detlef (u maama Thomaseʼ yaan kʼiineʼ ku bin muchʼtáambal). Walajkiak diez jaʼaboʼobaʼ Siegfried yéetel Detlefeʼ jach u pʼekmubaʼob kaʼachi. Baʼaleʼ bejlaʼeʼ, jach u yaabiltmubaʼob.

Letiʼobeʼ táan u páaʼkoʼob u kʼuchul u kʼiinil u kʼamkoʼob Thomas ken kaʼa kuxkíintaʼak. Detlefeʼ ku yaʼalik: «Ken kʼaʼajakten baʼaxoʼob tin beetajeʼ kin sen okʼol yéetel jach ku yaatal tin wóol». Detlef yéetel Siegfriedeʼ jach u kʼáat u yáantoʼob Thomas ken kaʼa kuxkíintaʼak, jeʼex u yáantkoʼob uláakʼ máakoʼob bejlaʼoʼ.

Jach u jaajileʼ u Tʼaan Dioseʼ jeʼel u páajtal u kʼexik u kuxtal máakeʼ.

[Tsolajiloʼob]