Eʼeseʼex wa tiaʼaneʼex tiʼ le oksaj óolaloʼ
Eʼeseʼex wa tiaʼaneʼex tiʼ le oksaj óolaloʼ
«Pʼis óoltabaʼex tu juunal a wóoleʼex, utiaʼal ka a wileʼex wa jeetsʼel a wanileʼex tiʼ le oksaj óolaloʼ.» (2 CORINTOILOʼOB 13:5.)
1, 2. 1) ¿Baʼax jeʼel u yúuchultoʼon wa maʼ k-jach oksaj óoltik le baʼax tsʼoʼok k-kanikoʼ? 2) ¿Baʼax talamil tu beetaj u kaʼapʼéelchajal u tuukul jujuntúul sukuʼunoʼob teʼ Corintooʼ?
UTÚUL máak táan u viajareʼ kʼuch tuʼux ku xaʼaypajal le bejoʼ. Baʼaleʼ, tumen maʼ u jach ojel máakalmáak bejil unaj u bisik utiaʼal u kʼuchul tuʼux ku bineʼ, tu kʼáataj tiʼ le máakoʼob tu yiloʼoboʼ baʼax bejil unaj u bisik. Baʼaleʼ jejeláas baʼax aʼalaʼab tiʼ. Tumen maʼ u yojel jach baʼax bejil kʼaʼabéet u biskeʼeʼ, maʼ tu páajtal u chʼaʼajoʼoltik u bin. Toʼon xaneʼ, wa maʼ k-jach oksaj óoltik le baʼaxoʼob tsʼoʼok k-kanikoʼ jeʼel xan u yúuchultoʼon le baʼax úuch tiʼ le máakaʼ. Wa maʼ k-jach oksaj óoltik upʼéel baʼaleʼ, leloʼ maʼ tu chaʼik k-chʼaʼatuklik baʼax ken k-beete yéetel ku pʼáatal maʼ k-ojel baʼax maʼalob ka k-beetiʼ.
2 Teʼ yáax siglooʼ anchaj upʼéel talamil, maʼ xaaneʼ, tu beetaj u kaʼapʼéelchajal u yóol le sukuʼunoʼob yanoʼob Corinto, tu luʼumil Gresiaoʼ. Jujuntúul máakoʼob ku yaʼalikubaʼob «nukuch apostoloʼob[eʼ]» tu yaʼaloʼobeʼ Pabloeʼ maʼ apostoliʼ, yoʼolal le baʼax tu yaʼaloʼobaʼ Pabloeʼ tu yaʼalaj: «Ku yaʼalaʼaleʼ le baʼaxoʼob kin waʼalik teʼ j-juʼunoʼob kin tsʼíibtikoʼ chichtak yéetel muʼukʼaʼantak, baʼaleʼ teneʼ minaʼan in muukʼ, yéetel in tʼaaneʼ maʼ kʼambeʼeniʼ» (2 Corintoiloʼob 10:7-12; 11:5, 6). Maʼ xaaneʼ yoʼolal le baʼax tu yaʼaloʼoboʼ jujuntúul tiʼ le sukuʼunoʼoboʼ kaʼapʼéelchaj u tuukuloʼob.
3, 4. ¿Baʼaxten kʼaʼabéet k-beetik xan le baʼax tu yaʼalaj Pablo tiʼ le sukuʼunoʼob yanoʼob Corintooʼ?
3 Cincuenta jaʼaboʼob taalak Cristoeʼ, Pabloeʼ tu káajsaj upʼéel múuchʼulil tu kaajil Corinto. Teʼ múuchʼulil jeʼeloʼ tu beetaj «jun jaʼab kaʼa tak táankoch, táan u kaʼansik ichiloʼob u maʼalob péektsil Jajal Dios», le oʼolaleʼ «yaʼab tiʼ u kajnáaliloʼob Corinto[eʼ], le ka tu yuʼubajoʼob le maʼalob péektsiloʼ, tu yoksaj óoltoʼob, ka okjaʼanajoʼob» (Beetaʼanoʼob 18:5-11). Pabloeʼ jach ku kaxtik kaʼach u yutsil le sukuʼunoʼob yanoʼob Corintooʼ, yéetel letiʼobeʼ tu tsʼíibtoʼob xan upʼéel carta utiaʼal u kʼáatkoʼob ka tsoʼoloktiʼob jujumpʼéel baʼaloʼob (1 Corintoiloʼob 7:1). Pablo túuneʼ tu tsʼáaj upʼéel maʼalob tsolnuʼuk tiʼob.
4 Pabloeʼ tu tsʼíibtaj: «Pʼis óoltabaʼex tu juunal a wóoleʼex, utiaʼal ka a wileʼex wa jeetsʼel a wanileʼex tiʼ le oksaj óolaloʼ» (2 Corintoiloʼob 13:5). Le cristianoʼob yanoʼob Corintooʼ unaj u beetkoʼob kaʼach le baʼax ku yaʼalik le tsolnuʼukaʼ, utiaʼal maʼ u kaʼapʼéelchajal u tuukuloʼob. Le tsolnuʼukaʼ jeʼel xan u yáantkoʼon teʼ kʼiinoʼobaʼ. ¿Bix jeʼel k-beetik le baʼax ku yaʼalik le tsolnuʼukaʼ? ¿Bix jeʼel k-ojéeltik wa jeetsʼel yaniloʼon tiʼ le oksaj óolaloʼ? Yéetel ¿bix unaj k-eʼesik jeetsʼel yaniloʼoniʼ?
Pʼis óoltabaʼex «utiaʼal ka a wileʼex wa jeetsʼel a wanileʼex tiʼ le oksaj óolaloʼ»
5, 6. ¿Baʼax áantajil tsʼaʼan utiaʼal u pʼis óoltikuba máak, yéetel baʼaxten jach maʼalob le áantajaʼ?
5 U pʼis óoltikuba máak utiaʼal u yilik wa tiaʼan tiʼ le oksaj óolaloʼ, u kʼáat u yaʼaleʼ tu juunal máak ken u yil wa táan u oksaj óoltik tuláakal le baʼax unaj u oksaj óoltaʼal tumen utúul cristianooʼ. Utiaʼal leloʼ, jeʼel u yáantkoʼon le baʼax tu tsʼíibtaj David teʼ salmoaʼ: «Jach utsil chúukaʼan u kaʼambesaj Yuumtsil, tumen ku tsʼáaik túumben kuxtal. U tusbej tʼaan Yuumtsileʼ jach maʼalob, tumen ku beetik u yantal naʼat tiʼ le máax óotsil u naʼateʼ. U tsol tʼaanoʼob Yuumtsil[eʼ] tojtakoʼob[,] tumen ku taasik kiʼimak óolal tiʼ puksiʼikʼal. U yaʼalmaj tʼaan [wa u ley] Yuumtsileʼ jach sáasiltak, le t-oʼolaleʼ ku tsʼáaik sáasil tiʼ ichoʼob» (Salmo 19:7, 8). Le Bibliaoʼ ku taasik chúukaʼan kaʼambesajoʼob yéetel maʼalob tsol tʼaanoʼob u taaloʼob tiʼ Jéeoba, ku taasik xan u jach maʼalob tusbel tʼaanoʼob yéetel u jach maʼalob leyoʼobiʼ. Le baʼax ku yaʼalikoʼ jeʼel u meyajtoʼon utiaʼal k-ilik wa táan k-tsʼáaik ichil k-kuxtal le baʼax ku yaʼalik Jéeobaoʼ.
6 Yoʼolal le baʼax ku yaʼalik le Bibliaoʼ, Pabloeʼ tu yaʼalaj: «U tʼaan Jajal Dioseʼ kuxaʼan yéetel yaan u páajtalil, [maas] yaan u yej tiʼ jeʼel máakalmáak máaskabil kaʼapʼéel u yejeʼ, yéetel ku yokol tak tu maas taamil u yóol yéetel u pixan máak, tak tiʼ le baʼax [maas] taʼakbeʼen tiʼ máakoʼ; yéetel ku jóokʼesik tiʼ sáasil u tuukuloʼob yéetel baʼaxoʼob u kʼáat u beet le puksiʼikʼaloʼ» (Hebreob 4:12). Jach beyoʼ, le baʼax ku yaʼalik le Bibliaoʼ jeʼel u xakʼaltik k-puksiʼikʼaleʼ, lelaʼ u kʼáat u yaʼaleʼ, jeʼel u yeʼesik jach máaxoʼoneʼ. ¿Baʼax túun unaj k-beetik utiaʼal k-tsʼáaik ichil k-kuxtal le baʼax ku yaʼalik u Tʼaan Dios «kuxaʼan» yéetel yaan u «páajtalil[oʼ]»? Le salmistaoʼ tu yaʼalaj baʼaxiʼ: «Kiʼ u yóol le máak [...] u yaabilajeʼ tiʼ u tsʼaamaj tiʼ u yaʼalmaj tʼaan Yuumtsileʼ, ku tsʼáaik xan tiʼ [u] tuukul [wa «ku mukul xokik», NM] bul kʼiin, yéetel bul áakʼab» (Salmo 1:1, 2). «U yaʼalmaj tʼaan Yuumtsileʼ» tiʼ tsʼíibtaʼan teʼ Bibliaoʼ. Kʼaʼabéet u kiʼimaktal k-óol k-xokik. Kʼaʼabéet xan k-jóoʼsik u súutukil utiaʼal k-mukul xokik, leloʼ u kʼáat u yaʼaleʼ k-tuukul tiʼ baʼax k-xokik utiaʼal k-ilik wa táan k-tsʼáaik ichil k-kuxtal tuláakal le baʼax ku yaʼalikoʼ.
7. ¿Baʼax kʼaʼabéet k-beetik utiaʼal k-ilik wa jeetsʼel yaniloʼon tiʼ le oksaj óolaloʼ?
7 Jeʼex tsʼoʼok k-kankoʼ, utiaʼal k-ilik wa jeetsʼel yaniloʼon tiʼ le oksaj óolaloʼ kʼaʼabéet k-xokik le Bibliaoʼ, k-tuukul tiʼ le baʼax k-xokikoʼ yéetel k-ilik wa táan k-beetik tuláakal le baʼax ku kaʼansikoʼ. Unaj u kiʼimaktal k-óol tumen yaʼab libroʼob yéetel revistaʼob ku tsʼaʼabaltoʼon utiaʼal k-naʼatik tubeel le baʼax ku yaʼalik le Bibliaoʼ.
8. ¿Bix u kaʼansikoʼon Jéeoba yéetel le libroʼob, le revistaʼob yéetel uláakʼ jóoʼsaʼaniloʼob ku taaloʼob tiʼ le «palitsil chúukpajaʼan u yóol» utiaʼal k-ilik wa maʼalob yaniloʼon tiʼ le oksaj óolaloʼ?
8 Jéeobaeʼ ku kaʼanskoʼon yéetel le libroʼob, le revistaʼob yéetel le uláakʼ jóoʼsaʼaniloʼob ku taaloʼob tiʼ le «palitsil chúukpajaʼan u yóol yéetel yaan u naʼat[oʼ]»; le jóoʼsaʼaniloʼobaʼ ku tsolikoʼob le baʼax ku yaʼalik le Bibliaoʼ (Mateo 24:45). Tuukulnakoʼon tiʼ le cuadro ku kʼaabaʼtik “Preguntas para meditar”, ku chíikpajal tu tsʼoʼokbal óoliʼ tuláakal u capitulosi le libro Acerquémonos a Jehová. * Le cuadroaʼ ku taasik kʼáatchiʼob ku yáankoʼon utiaʼal k-tuukul yoʼolal baʼax ku yaʼalik wa baʼax tekstoil. Yaʼab xan tiʼ le xookoʼob ku taasik le revista ¡Despertad! yéetel U Pʼíich Tulumil Kananoʼ ku yáantikoʼon utiaʼal k-ilik wa maʼalob yaniloʼon tiʼ le oksaj óolaloʼ. Lelaʼ letiʼ le baʼax tu yaʼalaj utúul kiik yoʼolal le xook ku taasik U Pʼíich Tulumil Kanan yoʼolal u libroi Proverbiosoʼ: «Jach maʼalobtakoʼob. Ku yáantkenoʼob utiaʼal in wilik wa maʼalob le baʼax kin beetikoʼ yéetel wa táan in kuxtal jeʼex u yaʼalik u maʼalob tsolnuʼukoʼob Jéeobaoʼ».
9, 10. ¿Baʼax uláakʼ áantajoʼob ku tsʼáaiktoʼon Jéeoba utiaʼal k-ilik wa jeetsʼel yaniloʼon tiʼ le oksaj óolaloʼ?
9 Teʼ muchʼtáambaloʼob yéetel teʼ noj muchʼtáambaloʼoboʼ k-kʼamik nuʼuktaj yéetel ku líiʼsaʼal xan k-óoliʼ. Le muchʼtáambaloʼoboʼ táakaʼan ichil le áantaj ku tsʼáaik Dios tiʼ le máaxoʼob ku chʼaʼachiʼitaʼaloʼob tumen Isaíasoʼ: «Tiʼ le kʼiinoʼob ku taaloʼoboʼ, bíin maʼalob jéetsʼek le wits tuʼux yaan u kʼulnaj Yuumtsil. Letiʼ bin [maas] kaʼanal witsak tiʼ tuláakal wits. Bíin taalakoʼob tiʼ tuláakal múuchʼ kaajoʼob; yaʼabkach kaajoʼob bíin kʼuchkoʼob xíimbaltik, táan u yaʼalikoʼob: Koʼoteneʼex, naʼakakoʼon tu wits Yuumtsil, [...] utiaʼal ka u yeʼes toʼon u beeloʼob utiaʼal ka k-xíimbalte» (Isaías 2:2, 3). U kaʼansaʼaltoʼon tumen Jéeoba baʼax bejil unaj k-biskeʼ, upʼéel jach nojoch baʼal k-tiaʼal.
10 Le tsolnuʼuk ku tsʼáaik le máaxoʼob yiijchajaʼan u naʼatoʼob jeʼex le nuxiboʼoboʼ, jach nojoch xan bix u yáantkoʼon. Le Bibliaoʼ ku yaʼaliktiʼob: «Sukuʼuneʼex[,] wa ka wilikeʼex yaan máax lubaʼan tiʼ kʼebaneʼ, teʼex muʼukʼaʼaneʼex tiʼ a pixaneʼexeʼ [wa tiʼ a oksaj óolaleʼexeʼ] unaj a wáantikeʼex utiaʼal ka líikʼik. Baʼaleʼ unaj a beetikeʼex yéetel kabal óolal, yéetel cada juntúuleʼ unaj u jach kanáantikuba bik túuntaʼak u yóol xan» (Galaciailoʼob 6:1). ¿Máasaʼ jach kiʼimak k-óol yoʼolal le nojoch áantaj ku tsʼáaiktoʼon le nuxiboʼob utiaʼal k-utskíintik bix k-tuukuloʼ?
11. ¿Baʼax unaj k-beetik utiaʼal k-ilik wa tiaʼanoʼon tiʼ le oksaj óolaloʼ?
11 Le jóoʼsaʼaniloʼoboʼ, le muchʼtáambaloʼob yéetel le nuxiboʼoboʼ siibaloʼob jach maʼalobtak ku tsʼáaiktoʼon Jéeoba. Baʼaleʼ, utiaʼal k-ilik wa tiʼ yanoʼon tiʼ le oksaj óolaloʼ unaj k-ilik wa táan k-beetik le baʼaxoʼob ku yaʼalik le Bibliaoʼ. Le oʼolaleʼ, ken k-xok le jóoʼsaʼaniloʼob wa ken k-uʼuy le tsolnuʼuk ku taal tiʼ le Bibliaoʼ, unaj k-tuklik: «¿Beyen wa jeʼex tsʼoʼok u yaʼalaloʼ? ¿Kin beetik wa jach jeʼex u yaʼalik le Bibliaoʼ?». Le bix k-kʼamik le tsolnuʼukoʼob ku tsʼáaiktoʼon Jéeoba jejeláas bixoʼ ku yeʼesik wa naatsʼ yaniloʼon tiʼ Dios. Le Bibliaoʼ ku yaʼalik: «Le máax minaʼan tiʼ le pixanoʼ maʼ tu kʼamik le baʼaloʼob ku taal tiʼ u Kiliʼich Pixan [wa u kiliʼich muukʼ] Jajal Diosoʼ, tumen utiaʼal letiʼeʼ chéen báaxal tʼaanoʼob». Tsʼoʼoleʼ ku yaʼalik: «Baʼaleʼ le máax yaan Kiliʼich Pixan tiʼeʼ ku páajtal u xakʼaltik bix yanil tuláakal baʼal, baʼaleʼ letiʼeʼ maʼ tu páajtal u xakʼaltaʼal u tuukul tumen mix máak» (1 Corintoiloʼob 2:14, 15.) Bey túunoʼ, ¿máasaʼ unaj k-kʼamik maʼalob le tsol nuʼukoʼob ku tsʼáaik le Biblia wa le jóoʼsaʼaniloʼoboʼ, le ku tsʼaʼabal teʼ muchʼtáambaloʼoboʼ bey xan le ku tsʼáaik le nuxiboʼoboʼ?
Eʼeseʼex «wa jeetsʼel a wanileʼex tiʼ le oksaj óolaloʼ»
12. ¿Bix jeʼel u yilaʼal wa jeetsʼel yaniloʼon tiʼ le oksaj óolaloʼ?
12 Utiaʼal k-eʼesik wa jeetsʼel anikoʼon tiʼ le oksaj óolaloʼ, yáaxeʼ kʼaʼabéet k-ilik baʼax k-beetik. Maʼ xaaneʼ, tsʼoʼok k-kʼaj óoltik u jaajil, baʼaleʼ ¿jach wa jeetsʼel anikoʼoniʼ? Utiaʼal u yilaʼal jeetsʼel yaniloʼon tiʼ le oksaj óolaloʼ kʼaʼabéet k-eʼesik yiijchajaʼan k-tuukul yéetel k-tsʼáaik nib óolal yoʼolal le áantajoʼob ku tsʼáaiktoʼon Diosoʼ.
13. Jeʼex u yaʼalik Hebreob 5:14, ¿baʼax eʼesik yiijchajaʼan k-tuukul?
13 ¿Bix túun jeʼel k-ilik wa yiijchajaʼan k-tuukuleʼ? Apóstol Pabloeʼ tu tsʼíibtaj: «Le chichich janaloʼ utiaʼal le máaxoʼob tsʼoʼok u nukuch wíiniktaloʼoboʼ, máaxoʼob tsʼoʼok u kanikoʼob pʼis óolal tumen tsʼoʼok u suuktal tiʼob u chʼaʼa nuʼuktikoʼob baʼax le utsoʼ bey xan baʼax le kʼaasoʼ» (Hebreob 5:14). Wa k-kanik kʼaj óolt «baʼax le utsoʼ bey xan baʼax le kʼaasoʼ» k-eʼesik tsʼoʼok u yiijchajal k-tuukul. Jeʼex utúul atleta unaj u yáalkab mantatsʼ utiaʼal u muʼukʼaʼankúuntik u wíinklil táanil tiʼ u yeʼesik wa utúul maʼalob atletaeʼ, toʼoneʼ unaj k-muʼukʼaʼankúuntik k-tuukul ken meyajnaktoʼon utiaʼal k-beetik le baʼax ku yaʼalik le Bibliaoʼ.
14, 15. ¿Baʼaxten kʼaʼabéet u jatsʼutstal k-ilik xokik le baʼaloʼob talam u naʼataʼal tiʼ u tʼaan Diosoʼ?
14 Baʼaleʼ, táanil tiʼ k-kanik il baʼax uts yéetel baʼax kʼaaseʼ unaj u yantaltoʼon kʼaj óolal. Utiaʼal lelaʼ kʼaʼabéet k-tsʼáaik k-óol xook mantatsʼ. Ken xooknakoʼon mantatsʼ, maases ken k-xok le baʼaxoʼob maʼ séeb u naʼataʼal yaan teʼ Bibliaoʼ, yaan k-jach kanik kʼaj óolt baʼax uts tiʼ baʼax kʼaas. U Pʼiich Tulumil Kananeʼ úuch joʼopʼok u taasik xookoʼob ku tʼaanoʼob tiʼ baʼaxoʼob maʼ séeb u naʼataʼal tiʼ le Bibliaoʼ. ¿Baʼax k-beetik ken k-il ku taasik xookoʼob ku tʼaanoʼob tiʼ baʼaloʼob chan talamtak u naʼataʼal? ¿Ku pʼáatal wa maʼ k-xokik tumen «tsʼeʼetsʼek[eʼ] talamtak u naʼataʼal»? (2 Pedro 3:16, LTN.) Maʼatech, baʼaxeʼ k-xokik yaʼab utéenel utiaʼal k-naʼatik le baʼax ku yaʼalikoʼ (Efesoiloʼob 3:18).
15 ¿Kux túun wa maʼ jatsʼuts k-ilik xookiʼ? Jach maʼalob ka jatsʼutschajak k-ilik (1 Pedro 2:2). * Tumen utiaʼal ka yiijchajak k-tuukuleʼ unaj k-jaantik chichich janal, lelaʼ u kʼáat u yaʼaleʼ unaj k-xokik yéetel k-naʼatik le baʼaloʼob talamtak u naʼataʼaloʼob tiʼ u tʼaan Diosoʼ. Wa maʼ k-beetikeʼ maʼ ken k-kan kʼaj óolt baʼax uts tiʼ baʼax kʼaas. Baʼaleʼ utiaʼal k-eʼesik yiijchajaʼan k-tuukuleʼ maʼ chéen unaj k-kʼaj óoltik baʼax uts tiʼ baʼax kʼaas. Sáamsamal kʼaʼabéet k-tsʼáaik ichil k-kuxtal tuláakal le baʼaxoʼob k-kanik ken xooknakoʼonoʼ.
16, 17. ¿Baʼax tsolnuʼukil tu tsʼáaj Santiago le ka tu yaʼalaj ka u beet máak le baʼax ku kanikoʼ?
16 Uláakʼ bix kun ilbil jeetsʼel anikoʼon tiʼ le oksaj óolaloʼ, letiʼe ken k-yaabilt u jaajiloʼ, leloʼ u kʼáat u yaʼaleʼ yaan k-eʼesik yéetel baʼaxoʼob k-beetik yantoʼon oksaj óolal. Le ka tʼaanaj Santiago, utúul tiʼ u j-kaambaloʼob Jesús, tiʼ bix jeʼel k-eʼesik wa jeetsʼel anikoʼoneʼ meyajnaj upʼéel maʼalob kettʼaan tiʼ: «Beeteʼex le baʼax ku kaʼansik teʼex le tʼaanoʼ maʼ chéen ka wuʼuyeʼexiʼ, tumen wa maʼ táan a beetikeʼexeʼ táan a tusikabaʼex. Le máax chéen ku yuʼubik le tʼaanoʼ baʼaleʼ maʼ táan u tsʼoʼokbesikeʼ, bey jeʼel bix juntúul máak ku paktik u yich tiʼ jumpʼéel néeneʼ. Ku néentikuba baʼaleʼ le ken xiʼikeʼ tu séeblakil ku tuʼubul tiʼ bix yanil u yich. Baʼaleʼ le máax maʼ [tu] tuʼubul tiʼ baʼax ku yuʼubikeʼ, yéetel ku yilik maʼalob le utsil chúukaʼan aʼalmaj tʼaanoʼ, bíin kiʼimakchajak u yóol tiʼ baʼax ku beetik» (Santiago 1:22-25).
17 K-ilik túuneʼ Santiagoeʼ táan u yaʼalik: «Néentaba tu tʼaan Dios yéetel ilawil bix anikech. Maʼ xulik a beetik, yéetel ilawil wa táan a jach beetik le baʼax ku yaʼalikoʼ. Maʼ jáan tuʼubsik le baʼax ta wilaj ka ta néentabaoʼ, yéetel wa kʼaʼabéeteʼ, utskíinte». Baʼaleʼ, maʼ chéen chʼaʼabil jeʼel u beetik máak le baʼax ku yaʼalik Santiagoaʼ.
18. ¿Baʼaxten maʼ chéen chʼaʼabil u beetaʼal le baʼax tu yaʼalaj Santiagooʼ?
18 Upʼéel baʼal ku kʼáataʼaltoʼon ka k-beeteʼ, letiʼe ka k-kʼaʼayt u maʼalob péektsilil le Reinooʼ. Pabloeʼ tu tsʼíibtaj: «Yéetel le puksiʼikʼaloʼ ku yúuchul oksaj óolal utiaʼal ka tsʼaʼabak máak maʼalob tu táan Jajal Dios, yéetel le chiʼ túunoʼ ku káantaʼal [wa ku kʼaʼaytaʼal] Jesucristo utiaʼal ka yanak toksajil [wa salvación] tiʼ máak» (Romailoʼob 10:10). Óoliʼ tuláakaloʼoneʼ maʼ chéen chʼaʼabil k-ilik k-kʼaʼaytik le maʼalob péektsil ku taasik salvacionoʼ, tumen ku kʼaʼabéettal k-beetik kʼeexoʼob ichil k-kuxtal. Baʼaleʼ, wa k-ilik tsʼáaik táanil ichil k-kuxtaleʼ, maas yaʼab kʼeexoʼob kun kʼaʼabéettal k-beetik (Mateo 6:33). Baʼaleʼ wa k-beetik le meyaj jeʼex u yaʼalik Diosoʼ, jach ku kiʼimaktal k-óol tumen k-ojel táan k-beetik upʼéel meyaj ku kiʼikiʼtʼantik Jéeoba. ¿Jach wa k-tsʼáaik óol k-kʼaʼayt u maʼalob péektsilil le Reinooʼ?
19. ¿Baʼax uláakʼ unaj k-beetik utiaʼal k-eʼesik k-oksaj óolal?
19 ¿Baʼax uláakʼ unaj k-beetik utiaʼal k-eʼesik yantoʼon oksaj óolal? Pabloeʼ ku yaʼalik: «Le baʼax tin kaʼansaj tiʼ teʼexoʼ, le tsol xikinoʼob tin tsʼáaj tiʼ teʼexoʼ, le baʼax ta wuʼuyajeʼex in waʼalikoʼ yéetel le baʼax ta wilajeʼex in beetikoʼ: beeteʼex[,] beyoʼ u Jajal Dios jeetsʼel oʼolaleʼ bíin yanak ta wéeteleʼex» (Filiposiloʼob 4:9). K-eʼesik jeetsʼel anikoʼon tiʼ le oksaj óolal ken k-beet le baʼax tsʼoʼok k-kanikoʼ, le baʼax tsʼoʼok k-kʼamikoʼ, le baʼax tsʼoʼok k-uʼuykoʼ yéetel le baʼax tsʼoʼok k-ilkoʼ, leloʼ u kʼáat u yaʼaleʼ, u kʼubikuba máak u beet le baʼax u kʼáat Diosoʼ. Jéeobaeʼ ku yaʼaliktoʼon: «Way yaan le bejaʼ, xeeneʼex teʼelaʼ» (Isaías 30:21).
20. ¿Máaxoʼob le jach maʼalob u yilaʼal le áantaj ku tsʼáaikoʼob teʼ múuchʼuliloʼ?
20 Tuláakal xiib yéetel koʼolel ku tsʼáaik u yóol u xok le Bibliaoʼ, ku kʼubikuba u kʼaʼayt le maʼalob péektsiloʼ, ku chúukpajal u yóol u beet baʼax u kʼáat Dios yéetel ku tsʼáaikuba tu tséel le Reinooʼ ku tsʼáaikoʼob upʼéel nojoch áantaj tiʼ uláakʼ máaxoʼob meyajtik Dios. Letiʼobeʼ jach nojoch áantaj ku tsʼáaikoʼob teʼ múuchʼulil tuʼux yanoʼoboʼ, yéetel le meyaj ku beetikoʼoboʼ jach kʼaʼanan tumen táan u yáantikoʼob le yaʼabkach máakoʼob maʼ úuch joʼopʼok u kaambaloʼoboʼ. Wa k-pʼis óoltikba utiaʼal k-ilik wa jeetsʼel yaniloʼon yéetel wa k-eʼesik jeetsʼel yaniloʼon, jeʼex tu yaʼalil Pablooʼ, yaan k-jach áantik k-sukuʼunoʼob teʼ múuchʼuliloʼ.
Kiʼimakchajak k-óol ikil k-beetik baʼax u kʼáat Dios
21, 22. ¿Bix jeʼel u kiʼimaktal k-óol k-beet baʼax u kʼáat Dioseʼ?
21 David, u reyil u úuchben kaajil Israeleʼ tu kʼayaj: «Utstintʼaan in beetik le baʼax a kʼáateʼ, in Jajal Dios; kin bisik tin puksiʼikʼal a kaʼambesaj» (Salmo 40:8, LSM). Davideʼ jach ku kiʼimaktal u yóol u beetik kaʼach baʼax u kʼáat Dios. ¿Baʼaxten? Tumen le baʼax u kʼáat Diosoʼ tiaʼan tu puksiʼikʼaleʼ. Letiʼeʼ maʼ kaʼapʼéelchaj u tuukul tiʼ baʼax bejil unaj u bisikiʼ.
22 Wa tiaʼan ichil k-puksiʼikʼal u ley Dioseʼ maʼ kun kaʼapʼéeltal k-tuukul tiʼ baʼax bejil unaj k-bisik. Baʼaxeʼ yaan u kiʼimaktal k-óol k-beetik baʼax u kʼáat Dios. Le oʼolaleʼ, koʼoneʼex k-jach tsʼáaik k-óol meyajt Jéeoba yéetel tuláakal k-puksiʼikʼal (Lucas 13:24).
[Tsolajiloʼob]
^ xóot’ol 8 Beetaʼan tumen u jaajkunajoʼob Jéeoba.
^ xóot’ol 15 Utiaʼal a wilik bix jeʼel a xookeʼ ilawil le táan juʼun 27 tak 32 tiʼ le libro Benefíciese de la Escuela del Ministerio Teocrático, beetaʼan tumen u j-jaajkunajoʼob Jéeoba.
¿Kʼajaʼan wa tech?
• ¿Bix unaj k-ilik wa jeetsʼel yaniloʼon tiʼ le oksaj óolaloʼ?
• ¿Baʼax táakaʼan ichil u yeʼesik máak wa tiaʼan tiʼ le oksaj óolaloʼ?
• ¿Bix jeʼel k-eʼesik yiijchajaʼan k-tuukuleʼ?
• ¿Bix u yáantikoʼon le baʼaxoʼob k-beetik utiaʼal k-eʼesik wa jeetsʼel yaniloʼon tiʼ le oksaj óolaloʼ?
[U kʼáatchiʼiloʼob le xookoʼ]
[U tsolajil le oochel teʼ táan juʼun 5]
¿A wojel wa bix unaj k-eʼesik jeetsʼel yaniloʼon tiʼ le oksaj óolaloʼ?
[U tsolajil le oochel teʼ táan juʼun 6]
Ken k-beet le baʼax ku yaʼalik le Bibliaoʼ k-eʼesik yiijchajaʼan k-tuukul
[U tsolajil le oochel teʼ táan juʼun 7]
Ken k-kʼaʼayt u maʼalob péektsilil le Reinooʼ k-eʼesik jeetsʼel yaniloʼon tiʼ le oksaj óolaloʼ