Ku tsʼaʼabal nojbeʼenil tiʼ Jéeoba tumen máaxoʼob meyajtik
Le máaxoʼob kʼaʼaytik le Reinooʼ ku yaʼalikoʼob
Ku tsʼaʼabal nojbeʼenil tiʼ Jéeoba tumen máaxoʼob meyajtik
TULÁAKAL tuʼuxeʼ, le táankelem paalal j-jaajkunajoʼoboʼ bey xan le sukuʼunoʼob tsʼoʼok u chan yantal u jaʼabiloʼoboʼ jach kʼaj óolaʼanoʼob tumen ku beetikoʼob baʼax maʼalob. Koʼoneʼex ilik bix tu beetil óoxtúul j-jaajkunajoʼob.
Olusolaeʼ, utúul x-chʼúupal 17 u jaʼabil kajaʼan Nigeria. Upʼéel kʼiin ka jóokʼ tu xookeʼ, tu kaxtaj upʼéel cartera, ka tu bisaj tiʼ u directori le tuʼux ku xookoʼ, le máak túunaʼ tu xokaj le taakʼin yaan teʼ carteraoʼ ka tu yileʼ yaan, 6,200 nairasiʼ (óoliʼ 45 dólares). Le directoraʼ tu kʼubaj le cartera tiʼ le j-kaʼansaj satmiloʼ. Le j-kaʼansaj túunoʼ tu síiaj 1,000 nairas (óoliʼ 7 dólares) tiʼ Olusola yéetel tu yaʼalaj ka meyajnak le taakʼin utiaʼal u boʼotik u xookoʼ. U yéet xookoʼob Olusolaeʼ ka tu yojéeltoʼob baʼax tu beetajeʼ, tu pʼaʼastoʼob. Baʼaleʼ ka máan kʼiineʼ, utúul u yéet xookeʼ tu yaʼaleʼ oklaʼab u taakʼin. Yoʼolal lelaʼ kʼáataʼab tiʼ tuláakal le j-kaʼansajoʼob ka u láaj xakʼaltoʼob u nuʼukul le paalal ku xookoʼoboʼ. Baʼaleʼ Olusolaeʼ maʼ xakʼaltaʼab u nuʼukuliʼ, u j-kaʼansajeʼ tu yaʼalaj tiʼ: «In wojel maʼatech a wookol tumen u j-jaajkunajech Jéeoba». Ka tsʼoʼokeʼ le taakʼin oklaʼabeʼ, kaxtaʼab ichil u nuʼukul kaʼatúul tiʼ le máaxoʼob pʼaʼast Olusolaoʼ, yéetel castigartaʼaboʼob yoʼolal le baʼax tu beetoʼoboʼ. Olusolaeʼ ku yaʼalik: «Jach kiʼimak in wóol ikil u yojéeltaʼal u j-jaajkunajen Jéeoba yéetel ikil u yojéeltaʼal maʼatech in wookol, tumen lelaʼ ku beetik u kiʼikiʼtʼantaʼal Jéeoba».
Marcelo, utúul j-jaajkunaj kajaʼan Argentinaeʼ, ka jóokʼ upʼéel kʼiin tu yotocheʼ tu kaxtaj upʼéel portafolio naatsʼ tiʼ u yotoch. Letiʼeʼ tu bisaj le portafolio tu yotochoʼ, ka tu jeʼekʼabtaj yéetel u yataneʼ tu yiloʼobeʼ jach yaʼab taakʼin yaniʼ, tsʼoʼoleʼ yaan xan u tarjetailoʼob creditoiʼ yéetel yaʼabach chequeʼob firmadoʼobiʼ. Upʼéel tiʼ le chequeʼobaʼ u tojleʼ, 1,000,000 pesos. Ichil le portafolioaʼ yaan xan kaʼach upʼéel factura tuʼux tsʼíibtaʼan u numeroi u teléfono u yuumil le portafoliooʼ. Letiʼob túuneʼ tu tʼanoʼob u yuumil le portafolio utiaʼal ka páatak u sutkoʼob tiʼ, yéetel tu yaʼaloʼob tiʼeʼ ka xiʼik u chʼaʼa teʼ tuʼux ku meyaj Marcelooʼ. Ka kʼuch u yuumil le portafolio teʼ tuʼux ku meyaj Marcelooʼ bey saajkeʼ. Baʼaleʼ u patrón Marceloeʼ tiaʼalaj tiʼ maʼ u sajaktal tumen Marceloeʼ utúul u j-jaajkunaj Jéeoba. Úuchik u sutik le portafoliooʼ, u yuumileʼ chéen 20 pesos (óoliʼ 6 dólares) tu síiaj tiʼ Marcelo, lelaʼ tu beetaj u tsʼíikil u yuumil tuʼux ku meyaj Marcelooʼ, tumen letiʼeʼ jach maʼalob úuchik u yilik u sutik Marcelo le portafolio tu kaxtoʼ. Le baʼax úuchaʼ tu tsʼáaj u páajtalil tiʼ Marcelo utiaʼal u tsʼáaik ojéeltbileʼ letiʼeʼ utúul j-jaajkunaj, le oʼolaleʼ tuláakal súutukil ku yilik u beetik baʼax maʼalob.
Le uláakʼ baʼax ken k-tsikbaltaʼ tiʼ úuch tu noj kaajil Kirguizistaneʼ. Rinateʼ utúul chan xiʼipal j-jaajkunaj seis jaʼaboʼob yaan tiʼ. Letiʼeʼ tu kaxtaj upʼéel bulto, ichil le bultoaʼ yaan kaʼach 1,100 somiʼ (óoliʼ 25 dólares). Le bultoaʼ utiaʼal kaʼach utúul koʼolel kajaʼan naatsʼ tiʼ u yotoch Rinat. Ka tu sutaj le chan xiʼipal u bulto le koʼolelaʼ, letiʼeʼ tu xokaj le taakʼin yaan ichiloʼ ka tu yaʼalaj tiʼ u maama Rinateʼ, 200 som ku binetik. Le chan xiʼipaloʼ tu yaʼaleʼ letiʼeʼ maʼ tu chʼaʼaj le taakʼinoʼ. Ka túun binoʼob u yiloʼob wa minaʼan le taakʼin teʼ tuʼux tu kaxtaj le bultooʼ, tiʼ túun tu kaxtoʼobiʼ. Le koʼoleloʼ jaʼakʼ u yóol yéetel tu tsʼáaj u diosboʼotikil tiʼ Rinat bey xan tiʼ u maama tumen tu sutoʼob le taakʼinoʼ yéetel tumen jach maʼalob kaʼansaʼanik le chan xiʼipal tumen u maamaoʼ.