Maʼ tsʼokaʼan u beeloʼobiʼ baʼaleʼ kiʼimak u yóoloʼob táan u meyajtikoʼob Jéeoba
«In wáantajeʼ tiʼ Jéeoba u taal»
Maʼ tsʼokaʼan u beeloʼobiʼ baʼaleʼ kiʼimak u yóoloʼob táan u meyajtikoʼob Jéeoba
UTÚUL kiik kajaʼan tu luʼumil Españaeʼ tu yaʼalaj: «Yaʼab tiʼ toʼoneʼ jach kiʼimak k-óol kex maʼ tsʼokaʼan k-beeliʼ». ¿Baʼaxten kiʼimak u yóoloʼob? Le kiikaʼ tu yaʼalaj: «Kiʼimak k-óol tumen minaʼantoʼon le chiʼichnakiloʼob yaan tiʼ le máaxoʼob tsʼokaʼan u beeloʼoboʼ yéetel ku páajtal k-maas meyajtik Jéeoba».
Le baʼax tu yaʼalaj le kiikaʼ letiʼe baʼax ku yaʼalik le Biblia ken tʼaanak yoʼolal le máaxoʼob maʼ tsʼokaʼan u beeloʼoboʼ. Ka tʼaanaj apóstol Pablo yoʼolal le tsʼoʼokol beeloʼ, tu yaʼalaj: «Tiʼ le maʼ tsʼokaʼan u beeloʼoboʼ yéetel tiʼ le kimen u [yíichamoʼoboʼ], kin waʼaliktiʼobeʼ maʼalob maʼ u tsʼoʼokol u beeloʼob, jeʼel bix tenoʼ». Pabloeʼ maʼ tsʼokaʼan u beel kaʼachiʼ. ¿Baʼax oʼolal tu yaʼalaj Pablo maʼalob maʼ u tsʼoʼokol u beel máak? Letiʼeʼ tu yaʼaleʼ le máax tsʼokaʼan u beeleʼ ku tsʼáaik táanil u núup, baʼaleʼ le máax maʼ tsʼokaʼan u beeleʼ ku tsʼáaik táanil «u baʼalubaʼob Yuumtsil» (1 Corintoiloʼob 7:8, 32-34). Le beetkeʼ, le máaxoʼob maʼ tsʼokaʼan u beeloʼoboʼ baʼax maas taasik kiʼimak óolal tiʼobeʼ u meyajtikoʼob Jéeoba.
Yaan baʼax oʼolal maʼ u kʼáatoʼob tsʼoʼokol u beeloʼobiʼ
Maʼ xaaneʼ le baʼax tu yaʼalaj apóstol Pablooʼ jelaʼan kun uʼuybil tumen le máaxoʼob ku tuklikoʼob jach kʼaʼanan u tsʼoʼokol u beel máak yéetel u yantal u paalaloʼ. Baʼaleʼ Jesucristo, utúul máak jach kiʼimakchaj u yóol kex maʼ tsʼoʼok u beeleʼ, tu yaʼalaj baʼax oʼolal yanoʼobeʼ maʼ u kʼáatoʼob tsʼoʼokol u beeloʼobiʼ, letiʼeʼ tu yaʼaleʼ: Yanoʼobeʼ «ku pʼáatal maʼ tu tsʼoʼokol u beeloʼob tu yoʼolal u [reinoi] kaʼan. Máax ku páajtal u kʼamik lelaʼ u kʼame» (Mateo 19:12).
Yaʼab tiʼ le máaxoʼob maʼ tsʼokaʼan u beeloʼoboʼ tsʼoʼok u yilkoʼob jaaj le baʼax tu yaʼalaj Jesusaʼ, tumen maas jeʼel u páajtal u meyajtkoʼob Dioseʼ yéetel minaʼan tiʼob le chiʼichnakil yaan tiʼ le máaxoʼob tsʼokaʼan u beeloʼoboʼ (1 Corintoiloʼob 7:35). Ku tsʼoʼoleʼ yaʼabach cristianoʼob maʼ tsʼokaʼan u beeloʼobeʼ táan u meyajtikoʼob Jéeoba yéetel kiʼimak óolal tsʼoʼoleʼ jach u kʼubmaj u yóoloʼob u yáantoʼob uláakʼ máakoʼob u yojéeltoʼob baʼax ku yaʼalik le Bibliaoʼ. *
Yaʼab xan tiʼ le sukuʼunoʼob maʼ tsʼokaʼan u beeloʼoboʼ ku yilkoʼobeʼ maʼ chéen le tsʼokaʼan u beeloʼob ku yantal kiʼimak óolal tiʼoboʼ, tiʼ letiʼob xaneʼ láayliʼ ku yantal kiʼimak óolaleʼ. Le tsʼokaʼan u beeloʼob bey xan le maʼ tsʼokaʼan u beeloʼoboʼ yaan súutukiloʼob kiʼimak u yóoloʼob yéetel yaan súutukiloʼob lubaʼan u yóoloʼob. Le Bibliaoʼ ku yaʼalikeʼ le máaxoʼob tsʼokaʼan u beeloʼoboʼ ku «yantal yaayaj óolal tiʼob» (1 Corintoiloʼob 7:28).
Yaan baʼax beetik maʼ tsʼoʼokok u beeloʼobiʼ
Yaʼab sukuʼunoʼobeʼ yaan baʼax oʼolal maʼ tsʼoʼokok u beeloʼobiʼ, maʼ tumen wa maʼ u kʼáatoʼobiʼ. Yaan kʼiineʼ maʼ xaaneʼ u kʼáatoʼob tsʼoʼokol u beeloʼob utiaʼal ka yanak máax yéetel u máansik u kuxtaloʼob, baʼaleʼ maʼ xaaneʼ minaʼan u tojol tiʼob. Ichil le yaʼabach sukuʼunoʼob maʼ tsʼoʼokok u beeloʼoboʼ táakaʼan yaʼab tiʼ le kiikoʼoboʼ, maʼ xaaneʼ letiʼobeʼ maʼ tsʼoʼokok u beeloʼobiʼ tumen táan u yilkoʼob u tsʼoʼokol u beeloʼob chéen yéetel máaxoʼob u yaabiltmoʼob Jéeobaoʼ (1 Corintoiloʼob 7:39). Yoʼolal u yaabilajoʼob tiʼ Dioseʼ, ku yilkoʼob u kaxtik u núupoʼob chéen ichil u yéet j-jaajkunajiloʼob.
Yaan kʼiineʼ, le máaxoʼob maʼ tsʼokaʼan u beeloʼoboʼ ku yuʼubikoʼob bey tu juunal yaniloʼobeʼ. Utúul kiik maʼ tsʼokaʼan u beeleʼ tu yaʼalaj: «U jaajileʼ taak u tsʼoʼokol k-beel, baʼaleʼ k-ojel baʼax ku yaʼalik u ley Jéeoba, yéetel maʼ k-kʼáat beet baʼax kʼaas tu táaniʼ. Tsʼoʼoleʼ kex yaan máaxoʼob u kʼáatoʼob ka tsʼoʼokok k-beel yéetel wa máaxeʼ k-ilik beetik baʼax u kʼáat Jéeoba. Yéetel maʼ k-kʼáat kaxt núup ichil le máaxoʼob maʼatech u meyajtikoʼob Jéeobaoʼ». Le sukuʼunoʼob yéetel le kiikoʼob ku tuukuloʼob beyaʼ jach kʼaʼabéet k-aʼaliktiʼob maʼalob baʼax ku beetkoʼob, tumen táan u yilkoʼob u lúubloʼob utsil tiʼ Jéeoba kex yaan kʼiin ku yuʼubikubaʼob bey tu juunal yaniloʼobeʼ.
Le áantaj ku tsʼáaik Diosoʼ
Jéeobaeʼ ku yeʼesik u yaabilaj tiʼ le máaxoʼob u chʼaʼatukulmaj maʼ u tsʼoʼokol u beeloʼob yéetel máaxoʼob maʼatech u meyajtikoʼob Jéeobaoʼ. Davideʼ kʼuch u naʼat lelaʼ, le oʼolal tu yaʼalaj: «Techeʼ Yuumtsil chúukaʼan a wóol yéetel máax chúukaʼan u yóol tiʼ teech» (2 Samuel 22:26). Ku tsʼoʼoleʼ, Dioseʼ ku yaʼalik xan tiʼ le máax beetik baʼax utstutʼaanoʼ: «Mix bikʼin [ken] in pʼatech mix [ken] in xúumpʼatech» (Hebreob 13:5). Jeʼex u beetik Jéeobaeʼ, toʼon xaneʼ kʼaʼabéet k-ilik líiʼsik u yóol le máaxoʼob maʼ tsʼokaʼan u beeloʼob u jach kʼubmubaʼob u meyajtoʼob Diosoʼ. Kʼaʼabéet xan k-kʼáatik tiʼ Jéeoba ka u yáant le sukuʼunoʼob utiaʼal ka u aktáantoʼob jeʼel baʼalak talamil ka yanaktiʼobeʼ (Jueces 11:30-40).
Yaʼab sukuʼunoʼob maʼ tsʼokaʼan u beeloʼobeʼ tsʼoʼok u yilkoʼobeʼ yaʼab utsiloʼob ku taasiktiʼob u tsʼáaik yóoloʼob u kʼaʼaytoʼob le maʼalob péektsiloʼ. Patricia, utúul kiik x-táanilkunsaj maʼ tsʼokaʼan u beel yaan maas tiʼ 30 jaʼaboʼob tiʼeʼ, tu yaʼalaj: «Kex yaʼab talmil ku máansik máax maʼ tsʼokaʼan u beeleʼ, baʼaleʼ tiʼ teneʼ tsʼoʼok u tsʼáaikten u páajtalil in beetik in x-táanilkunsajil. Yéetel tumen maʼ tsʼokaʼan in beeleʼ, ku maas yantalten u súutukil in xokik le Biblia yéetel le jóoʼsaʼaniloʼoboʼ. Ku tsʼoʼokol xaneʼ, tumen maʼ tsʼokaʼan in beeleʼ ken in aktáant talmiloʼobeʼ kin maas kʼubik in wóol tiʼ Jéeoba».
Le baʼax tu yaʼalaj le kiikaʼ bey u yaʼalik le Biblia unaj u beetik le máaxoʼob aktáantik talmiloʼoboʼ: «Tsʼáa a kuxtal tu kʼab Yuumtsil; kʼub óolnen tiʼ, letiʼ túuneʼ bíin u yáantech» (Salmo 37:5). U jaajileʼ, tuláakal le máaxoʼob meyajtik Jéeobaoʼ, kex tsʼokaʼan u beeloʼob wa maʼeʼ, le tʼaanoʼobaʼ jeʼel u páajtal u líiʼsik u yóoloʼobeʼ: «In wáantajeʼ tiʼ Jéeoba u taal» (Salmo 121:2, NM).
[Tsolajiloʼob]
^ xóot’ol 7 Ilaʼak u mesil julio yéetel agosto teʼ Calendario de los Testigos de Jehová 2005.
[U tsolajil le oochel teʼ táan juʼun 31]
UTSILOʼOB KU YILIK MÁAXOʼOB MAʼ TSʼOKAʼAN U BEELOʼOBIʼ
[U tsolajil le oochel teʼ táan juʼun 31]
Jesús u Hijo Dios, maʼ tsʼoʼok u beeleʼ, tu yaʼalaj: «In janaleʼ in beetik [baʼax u kʼáat] le máax túuxtenoʼ, yéetel in tsʼoʼoksik u meyaj» (Juan 4:34).
U kantúul x-chʼupul paalal Felipe maʼ tsʼokaʼan kaʼach u beeloʼobeʼ, jach tu kʼubaj u yóoloʼob u tsʼaʼob kʼaj óoltbil le maʼalob péektsil ku taal tiʼ Diosoʼ (Beetaʼanoʼob [Hechos] 21:8, 9).
Le kiikoʼob maʼ tsʼokaʼan u beeloʼoboʼ, táakaʼanoʼob ichil le yaʼabkach koʼoleloʼob ku yaʼalik le Biblia ku kʼaʼaytikoʼob le maʼalob péektsiloʼ (Salmo 68:11).
[U tsolajil le oochel teʼ táan juʼun 32]
«Le máax maʼ tsʼokaʼan u beeleʼ, ku [tsʼáaik táanil] u baʼalubaʼob Yuumtsil yéetel bix kun lúubul utsil tiʼ.»