Dioseʼ ku tsʼíibtik u ley t-puksiʼikʼal
Dioseʼ ku tsʼíibtik u ley t-puksiʼikʼal
«Bíin in tsʼáa in waʼalmaj tʼaan tu puksiʼikʼal[,] bíin xan in tsʼíibt tu tsʼuʼ u tuukul.» (JEREMÍAS 31:33.)
1, 2. 1) ¿Baʼax ken k-kan teʼ xookaʼ? 2) ¿Bix tu yeʼesil u kiʼichkelmil Jéeoba tu witsil Sinaí?
TEʼ XOOKOʼOB máanikoʼ t-kaneʼ le ka éem Moisés tu witsil Sinaíeʼ, u táan u yicheʼ táan u léembal táan u yeʼesik u kiʼichkelmil Jéeoba; t-ilaj xaneʼ meyajnaj upʼéel jaajay nookʼ tiʼ utiaʼal u pixik u yich. Teʼ xookaʼ yaan k-kanik upʼéel baʼal yaan yil yéetel le baʼax tsʼoʼok kanikoʼ yéetel jach kʼaʼanantak utiaʼal le cristianoʼob teʼ kʼiinoʼobaʼ.
2 Le tiaʼan kaʼach Moisés teʼ witsoʼ, Jéeobaeʼ tu kaʼansaj yaʼab baʼaloʼob tiʼ. Le israelitaʼob yanoʼob tu jáal le witsoʼ tu yiloʼob u kiʼichkelmil Dios tu yeʼesoʼ. «Utiaʼal u sáaschajal tu yóoxpʼéel kʼiineʼ yanchaj léembal cháakoʼob yéetel juumbal cháakoʼob, ka j-jay jumpʼéel tat múuyal yóokʼol le puʼukoʼ. Jumpʼéel kʼaʼamkach jóopsaj trompetaʼob tu beetaj u kíilbal yéetel sajakil tuláakal le máaxoʼob yanoʼob ichil le kaajoʼ. [...] Tuláakal kaʼach u puʼukil Sinaí ku buutsʼilankil úuchik u yéemel Yuumtsil tu chúumuk jumpʼéel kʼáakʼ. Le buutsʼoʼ ku bin kaʼanal bey u buutsʼil chujkabeʼ, táan xan kaʼach u sen kíilbal le puʼukoʼ.» (Éxodo 19:16-18.)
3. ¿Tiʼ baʼax tu tsʼíibtaj Jéeoba le Diez Leyoʼob tu tsʼáaj tiʼ le israelitaʼoboʼ, yéetel baʼax kʼuch naʼatoʼob?
3 Tiʼ Jéeobaeʼ meyajnaj utúul ángel utiaʼal u tsʼáaik le Diez Leyoʼob tiʼ le israelitaʼoboʼ (Éxodo 20:1-17). Tsʼoʼoleʼ yoʼolal le baʼax úuch tu witsil Sinaíoʼ, mix máak jeʼel u yaʼalik wa maʼ tiʼ le Dios yaan tuláakal páajtalil tiʼ u taal le Leyoʼoboʼ. Leloʼobaʼ tsʼíibtaʼab tumen Jéeoba tiʼ kaʼapʼéel jaajay tuunich, baʼaleʼ ka ilaʼab tumen Moisés táan u adorartaʼal utúul chan wakax de oro tumen le israelitaʼoboʼ, letiʼeʼ tu táajchʼintaj le kaʼapʼéel jaajay tuunchoʼobaʼ. Le oʼolal Jéeobaeʼ tu jel tsʼíibtaj le leyoʼob tiʼ uláakʼ jaajay tuunchoʼoboʼ. Le ka éem Moisés tu kaʼatéen yéetel le kaʼapʼéel túumben jajay tuunichoʼoboʼ u táan yicheʼ táan kaʼach u léembal. Yéetel tuláakal le baʼax tu yiloʼobaʼ, maʼ xaaneʼ le israelitaʼoboʼ kʼuch u naʼatoʼobeʼ jach unaj u beetkoʼob tuláakal baʼax ku yaʼalik le leyoʼ (Éxodo 32:15-19; 34:1, 4, 29, 30).
4. ¿Baʼaxten jach kʼaʼanantakoʼob kaʼach le Diez Leyoʼoboʼ?
4 Le kaʼapʼéel jajay tuunichoʼob tuʼux tsʼíibtaʼab le Diez Leyoʼoboʼ, líiʼsaʼab ichil u baʼascheʼi le núuptʼaan yaan ichil le sen kiliʼich kúuchil wa santísimo yaan teʼ tabernaculooʼ, yéetel tu tsʼookeʼ líiʼsaʼab ichil le santísimo yaan teʼ templooʼ. Le leyoʼob tsʼíibtaʼanoʼob teʼ tuunichoʼobaʼ ku yeʼeskoʼob kaʼach u tuukulil tuláakal baʼax ku yaʼalik u Ley Moisés, tsʼoʼoleʼ meyajnaj xan utiaʼal u gobernartik Dios le israelitaʼoboʼ. Ku yeʼesik xaneʼ Jéeobaeʼ ku biskuba yéetel upʼéel kaaj letiʼ yéeymi.
5. ¿Bix úuchik u yeʼesik u yaabilaj Jéeoba yéetel le leyoʼob tu tsʼáaj tiʼ Israeloʼ?
5 Le leyoʼoboʼ tu yeʼesoʼob u jatsʼuts modos Jéeoba, maases le yaabilaj ku yuʼubik yoʼolal u kaajaloʼ. Le leyoʼobaʼ upʼéel baʼax tu síiaj Jéeoba tiʼ le máaxoʼob beet le baʼaxoʼob tu yaʼaloʼ. Utúul máak ku xokik baʼax u kʼáat u yaʼal u tʼaaniloʼob le Bibliaoʼ, tu tsʼíibtaj: «Mix upʼéel tiʼ le leyoʼob u tsʼaamaj le wíinikoʼob [...] jeʼel u páajtal u keʼetel yéetel le Diez Leyoʼob tu tsʼáaj Jéeobaoʼ». Ka tʼaanaj Jéeoba tiʼ tuláakal u Ley Moiseseʼ, letiʼeʼ tu yaʼalaj: «Wa ka láaj uʼuyikeʼex in tʼaan yéetel ka tsʼoʼokbesikeʼex in núuptʼaaneʼ, bíin a beetabaʼex in j-yéeybil kaajal ichil tuláakal kaajoʼob, tumen tuláakal le luʼumoʼ in tiaʼal. Teʼexeʼ bíin a beetabaʼex jumpʼéel u ajawil j-kʼiinoʼob, jumpʼéel jumpáaykuntbil kaaj in tiaʼal» (Éxodo 19:5, 6).
Upʼéel ley tsʼíibtaʼan tu puksiʼikʼal wíinik
6. ¿Baʼax leyil maas nojoch tiʼ le tsʼíibtaʼab tiʼ jaajay tuunchoʼoboʼ?
6 K-ilik túuneʼ, le Leyoʼob tsʼíibtaʼab teʼ jaajay tuunichoʼoboʼ jach nojoch baʼax ku kaʼansik. Baʼaleʼ, ¿a wojel wa le máaxoʼob yéeyanoʼob utiaʼal bin kaʼanoʼ tsʼaʼantiʼob upʼéel baʼal maas nojoch tiʼ le baʼaxoʼob ku kaʼanskoʼob le leyoʼob tsʼíibtaʼab teʼ kaʼapʼéel jaajay tuunichoʼ? Jéeobaeʼ tu yaʼalaj yaan u beetik upʼéel túumben núuptʼaan, maʼ jeʼex u núuptʼaanil le Ley tu beetaj yéetel u kaajil Israeloʼ. Letiʼeʼ tu yaʼalaj: «Bíin in tsʼáa in waʼalmaj tʼaan tu puksiʼikʼal[,] bíin xan in tsʼíibt tu tsʼuʼ u tuukul» (Jeremías 31:31-34). Jesús, le máax meyajnaj tiʼ Dios utiaʼal u tsʼáaik le túumben núuptʼaanoʼ, maʼ tu tsʼíibtaj leyoʼob utiaʼal u tsʼáa tiʼ u j-tsaypachoʼobiʼ. Baʼaxeʼ, yéetel baʼaxoʼob tu yaʼalaj bey xan yéetel baʼaxoʼob tu kaʼanseʼ, tu tsʼáaj u ley Jéeoba tu tuukuloʼob yéetel tu puksiʼikʼaloʼob.
7. ¿Tiʼ máaxoʼob tsʼaʼab u ley Cristo, yéetel máaxoʼob beet baʼax ku yaʼalik?
7 Le leyaʼ kʼaj óolaʼan bey «u yaʼalmaj tʼaan [wa u ley] Cristo». Lelaʼ tsʼaʼab tiʼ upʼéel kiliʼich kaaj, u «Israel Jajal Dios», maʼ tiʼ u úuchben kaajil Israel ku taal tiʼ u chʼiʼibalil Jacobiʼ (Gálatas 6:2, 16, LTN; Romailoʼob 2:28, 29). Le máaxoʼob yanoʼob ichil u Israel Dioseʼ letiʼ le yéeyaʼanoʼob utiaʼal u binoʼob kaʼanoʼ, baʼaleʼ tu tsʼookeʼ, u múuchʼ «yaʼabkach máakoʼob» ku taaloʼob tiʼ jejeláas luʼumiloʼobeʼ joʼopʼ xan u meyajkoʼob Jéeoba tu yéeteloʼob (Apocalipsis 7:9, 10; Zacarías 8:23). Tu kaʼa jaatsileʼ ku kʼuchul u beetubaʼob «jumpʼéeliliʼ u múuchʼul j-tamanoʼob» yéetel ku kanáantaʼaloʼob tumen «juntúuliliʼ j-kanan taman», tu kaʼa múuchʼuliloʼobeʼ ku tsʼoʼokbesikoʼob u ley Cristo yéetel ku kuxtaloʼob jeʼel bix tu kaʼansileʼ (Juan 10:16).
8. ¿Baʼax u jelaʼanil u Ley Moisés tiʼ u ley Cristo?
8 Le israelitaʼob úuchiloʼ, le ken síijkoʼobeʼ, tiaʼanoʼob kaʼach yáanal u ley Moiseseʼ, baʼaleʼ le cristianoʼoboʼ tu tʼaan u yóolaloʼob ku tsʼáaikubaʼob yáanal u ley Cristo, jeʼel baʼalak chʼiʼibalil wa baʼax kaajil u taaloʼobeʼ. Ku kʼaj óoltkoʼob u jatsʼuts modos Jéeoba bey xan baʼax utstutʼaan yéetel ku taaktal u meyajtkoʼob. Tumen tsʼíibtaʼan u ley Dios tu puksiʼikʼaloʼobeʼ le máaxoʼob yéeyaʼanoʼob utiaʼal bin kaʼanoʼ ku beetkoʼob baʼax ku yaʼalik Dios, maʼ chéen tumen saajkoʼob u castigartaʼaloʼobiʼ yéetel maʼatech u meyajkoʼob Dios chéen tumen u yojloʼob unaj u beetkoʼob. Le baʼax péekskoʼob u meyajtoʼob Diosoʼ upʼéel baʼax maas nojoch. Lelaʼ bey u yúuchul yéetel le uláakʼ tamanoʼoboʼ, letiʼobeʼ ku beetkoʼob baʼax ku yaʼalik Dios tumen tiaʼan u ley Dios tu puksiʼikʼaloʼobeʼ.
Leyoʼob tsʼaʼanoʼob yoʼolal yaabilaj
9. ¿Bix tu yeʼesil Jesús le yaabilajoʼ letiʼ kun túulchʼintik máak u tsʼoʼokbes tuláakal u leyoʼob Jéeoba?
9 Le baʼax túulchʼintik máak u tsʼoʼokbes tuláakal u leyoʼob Jéeobaeʼ jeʼel u páajtal u yaʼalaʼal chéen yéetel upʼéel tʼaaneʼ: yaabilaj. Le modosaʼ mantatsʼ kʼaʼabéet u yeʼesaʼal utiaʼal u adorartaʼal Dios. Ka kʼáataʼab tiʼ Jesús máakalmáak u maas nojchil le Leyoʼ, letiʼeʼ tu núukaj: «Yaabilt Yuumtsil a Jajal Dios yéetel tuláakal a puksiʼikʼal, yéetel tuláakal a wóol, yéetel tuláakal a naʼat». U kaʼapʼéeleʼ «yaabilt a láakʼ [wa u maasil] jeʼel bix [a] yaabiltikabaʼeʼ». Tsʼoʼoleʼ ka tu yaʼalaj: «Le kaʼapʼéel aʼalmaj tʼaanoʼobaʼ letiʼob u chuun tuláakal u yaʼalmaj tʼaan Moisés yéetel u kaʼambesaj le [profetaʼoboʼ]» (Mateo 22:35-40). K-ilik túuneʼ Jesuseʼ tu yeʼeseʼ tak le Kiliʼich Tsʼíiboʼob ich Ebreooʼ ku tʼaanoʼob tiʼ le yaabilajoʼ, maʼ chéen le Diez Leyoʼoboʼ.
10. ¿Bix k-ojéeltik u ley Cristoeʼ ku yaʼalik jach unaj u yeʼesik yaabilaj máak tiʼ u maasil?
10 Le ley tsʼíibtaʼan tu puksiʼikʼal le cristianoʼoboʼ, ¿láayliʼ wa ku yaʼalik unaj u yaabiltaʼal Dios bey xan u maasil máakoʼobeʼ? Ku yaʼalik. U ley Cristoeʼ ku yaʼalikeʼ unaj u yaabiltaʼal Dios yéetel tu jaajil u yóol máak, tsʼoʼoleʼ ichileʼ yaan upʼéel túumben ley: le cristianoʼoboʼ unaj u yeʼeskoʼob upʼéel yaabilaj ku kaxtik u yutsil u maasil. Kʼaʼabéet u yeʼeskoʼob yaabilaj jeʼex Jesuseʼ, letiʼeʼ tu kʼubaj u kuxtal tu yoʼolal u amigoʼob. Letiʼeʼ tu kaʼansaj u j-tsaypachoʼob u yaabiltoʼob Jéeoba yéetel ka u paklan yaabiltubaʼob jeʼex úuchik u yaabiltikoʼoboʼ. Le yaabilaj beyaʼ ku chíikbesik máaxoʼob u jaajil cristianoʼob (Juan 13:34, 35; 15:12, 13). Jesús xaneʼ, tu yaʼalajtiʼob ka u yaabiltoʼob le máaxoʼob pʼekmailoʼoboʼ (Mateo 5:44).
11. Jesuseʼ, ¿bix úuchik u yeʼesik yaabilaj tiʼ Dios yéetel tiʼ wíinikoʼob?
11 Jesuseʼ tu kaʼansaj bix unaj u yeʼesaʼal chúukaʼan yaabilaj. Kex tiaʼan kaʼach teʼ kaʼan bey utúul ángel jach yaan u páajtalileʼ, tu yóotaj taal way Luʼum utiaʼal ka béeychajak le baʼax u tukultmaj Dios u beetik. Letiʼeʼ tu tsʼáaj u kuxtal utiaʼal u taasik salvación yéetel tu kaʼansaj bix unaj u kuxtal máak. Tu yeʼesaj xan kabal óolal, tu yeʼesaj utsil yéetel tuukulnaj tu yoʼolal u maasil, tsʼoʼoleʼ tu tsʼakaj le ku muʼyajoʼoboʼ yéetel tu yáantaj le óotsiloʼoboʼ. Tu jach tsʼáaj xan u yóol u kaʼans u «tʼaaniloʼob kuxtal minaʼan u xuul» utiaʼal u kʼaj óoltaʼal Jéeoba tumen le máakoʼoboʼ (Juan 6:68).
12. ¿Baʼaxten k-aʼalik u yaabiltaʼal Dioseʼ jach yaan baʼax yil yéetel u yaabiltaʼal uláakʼ máakoʼob?
12 U jaajileʼ, u yaabiltaʼal Dioseʼ jach yaan baʼax yil yéetel u yaabiltaʼal u maasil. Apóstol Juaneʼ tu yaʼalaj: «Le yaakunajoʼ tiʼ Jajal Dios u taal [...]. Wa yaan máax ku yaʼalik: Teneʼ in yaabiltmaj Jajal Dios, baʼaleʼ u pʼekmaj u sukuʼuneʼ, utúul j-tuus. Tumen wa utúul máak maʼ táan u yaabiltik u sukuʼun, máax táan u yilikeʼ, maʼ táan u páajtal u yaabiltik Jajal Dios máax maʼ táan u yilik» (1 Juan 4:7, 20). Tiʼ Jéeoba ku taal le yaabilajoʼ yéetel letiʼeʼ yaabilaj. Tuláakal baʼax ku beetik yoʼolal u yaabilaj. Toʼon xaneʼ k-eʼesik yaabilaj tumen tu beetoʼon jeʼel bix letiʼeʼ (Génesis 1:27). Ken k-eʼes yaabilaj tiʼ uláakʼ máakoʼobeʼ, k-eʼesik xan yaabilaj tiʼ Jéeoba.
U yaabiltik máak Dioseʼ u kʼáat u yaʼal u beetik baʼax ku yaʼalik
13. ¿Baʼax unaj k-yáax beetik utiaʼal k-yaabiltik Dios?
13 ¿Bix jeʼel u páajtal k-yaabiltik Dios wa maʼ tu páajtal k-ilkeʼ? Yáaxeʼ kʼaʼabéet kʼaj óoltik. U jaajileʼ maʼ tu páajtal k-yaabiltik máax maʼ k-kʼaj óoliʼ mix k-alab óoltik; ichil le Bibliaoʼ ku yaʼalik bix jeʼel k-kʼaj óoltik Dioseʼ, le oʼolal unaj k-xokik mantatsʼ, unaj xan k-payalchiʼ tiʼ letiʼ yéetel unaj k-muchʼikba yéetel máaxoʼob u kʼaj óoloʼob Dios yéetel u yaabiltmoʼob (Salmo 1:1, 2; Filiposiloʼob 4:6; Hebreob 10:25). Le kampʼéel Evangelioʼoboʼ jach ku tʼaanoʼob yoʼolal lelaʼ, ken k-xok bix kuxlajik yéetel le baʼax tu kaʼansaj Jesusoʼ ku yeʼeskoʼobtoʼon bix Jéeoba. U taaktal k-beetik le baʼax u kʼáat Dios yéetel k-eʼesik le jatsʼuts modos yantiʼoʼ ku bin u maas nojochtal jeʼex u bin k-maas kʼaj óoltik yéetel k-naʼatik bix úuchik u yeʼesiktoʼon u yaabilajeʼ. K-ilik túuneʼ, ken k-beet baʼax u kʼáat Dioseʼ k-eʼesik yaabiltmaj.
14. ¿Baʼaxten jeʼel u páajtal k-aʼalikeʼ u leyoʼob Dioseʼ maʼ talam u tsʼoʼokbesaʼaloʼobiʼ?
14 Wa k-yaabiltmaj wa máaxeʼ k-ojel baʼax utstutʼaan yéetel baʼax maʼ, yéetel k-kanáantik k-beetik baʼax utstutʼaan utiaʼal ka lúubkoʼon utsil tiʼ. Yoʼolal lelaʼ apóstol Juaneʼ tu tsʼíibtaj: «U yaabiltaʼal Jajal Dioseʼ u yuʼubaj tʼantaʼal u yaʼalmaj tʼaanoʼob; yéetel u yaʼalmaj tʼaanoʼobeʼ maʼ talamoʼobiʼ» (1 Juan 5:3). Toʼoneʼ maʼatech k-ilik bey jach talamtak yéetel bey jach táaj yaʼaboʼob u leyoʼobeʼ. Le yaabilajoʼ letiʼ nuʼuktik baʼax k-beetik, le beetik maʼ kʼaʼabéet ka jach láaj aʼalaʼaktoʼon bix unaj k-beetik wa baʼaxiʼ; k-yaabilaj tiʼ Dioseʼ letiʼ nuʼuktik baʼax k-beetik. Wa k-yaabiltmaj Dioseʼ, ku jach kiʼimaktal k-óol k-beetik baʼax u kʼáat. Wa k-beetik beyoʼ, letiʼeʼ ku kʼamkoʼon yéetel k-jóoʼsik utsil tiʼ le nuʼuktaj ku tsʼáaiktoʼonoʼ, tumen u leyoʼobeʼ utiaʼal k-utsil (Isaías 48:17).
15. ¿Baʼax kun péekskoʼon k-eʼes u jatsʼuts modos Jéeoba? Tsol baʼaxten bey a núukikoʼ.
15 K-yaabilaj tiʼ Dioseʼ ku péekskoʼon k-eʼes u jatsʼuts modos. Ken k-yaabilt wa máaxeʼ, ku jatsʼutstal k-ilik u modos yéetel k-ilik beetik jeʼex letiʼoʼ. Tuukulnakoʼon tiʼ bix jaʼtsil u biskuba Jéeoba yéetel Jesús. Maʼ xaneʼ u millonesi jaʼaboʼob múul kajlajoʼob teʼ kaʼanoʼ. Le yaabilaj ku yuʼubkoʼob ichiloʼoboʼ jach nojoch yéetel jach chúukaʼan. Jesuseʼ jach chíikaʼan tiʼ u Taata, le oʼolal béeychaj u yaʼalik tiʼ u j-tsaypachoʼob: «Le máax ku yilken teneʼ ku yilik le Taataoʼ» (Juan 14:9). Wa k-maas kʼaj óoltik Jéeoba yéetel Jesuseʼ, ku maas taaktal k-eʼesik u jatsʼuts modos. K-yaabilaj tiʼ Jéeoba yéetel u yáantaj u kiliʼich muukʼeʼ yaan u yáantkoʼon utiaʼal k-pʼatik le úuchben kuxtal yéetel le baʼaloʼob k-beetik kaʼachoʼ, utiaʼal ka kuxlakoʼon jeʼex utstutʼaaneʼ (Colosailoʼob 3:9, 10; Galaciailoʼob 5:22, 23).
Le baʼax ku péekskoʼon k-beet le yaabilajoʼ
16. ¿Bix k-eʼesik yaabilaj tiʼ Dios yéetel tiʼ k-éet wíinikil ken k-kʼaʼayt u maʼalob péektsilil le Reino yéetel ken k-kaʼans tiʼ uláakʼ máakoʼoboʼ?
16 Toʼon táan k-tsaypachtik Cristoeʼ k-táakpajal k-kʼaʼayt le Reinooʼ yéetel k-áantik uláakʼ máakoʼob, tumen k-yaabiltmaj Dios yéetel k-yaabiltmaj k-éet wíinikil. Beyoʼ k-lúubul utsil tiʼ Dios, tumen letiʼeʼ «u kʼáat ka toʼokok tuláakal máakoʼob yéetel ka kʼuchuk u chúukaʼan kʼaj óoltoʼob le jaajoʼ» (1 Timoteo 2:3, 4). Ku kiʼimaktal k-óol ikil k-áantik uláakʼ máakoʼob utiaʼal ka tsʼíibtaʼak u ley Cristo tu puksiʼikʼaloʼob. Ku kiʼimaktal xan k-óol ilik bix u kʼexik u kuxtaloʼob utiaʼal ka u yeʼesoʼob u jatsʼuts modos Jéeoba (2 Corintoiloʼob 3:18). U jaajileʼ, k-áantik uláakʼ máakoʼob u kʼaj óoltoʼob Dioseʼ, letiʼe baʼax maas maʼalob jeʼel u páajtal k-síiktiʼoboʼ, tumen le máaxoʼob u kʼáat u bisubaʼob yéetel Jéeobaeʼ yaan u páajtal u biskubaʼob tu yéetel utiaʼal mantatsʼ.
17. ¿Baʼaxten maas maʼalob ka k-maas yaabilt Jéeoba yéetel k-éet wíinikil, maʼ le ayikʼalil ku tsʼáaik le yóokʼol kaabaʼ?
17 Bejlaʼeʼ le yóokʼol kaabaʼ jach ku yaabiltik yéetel jach ku tsʼáaik táanil chéen ayikʼaliloʼob. Baʼaleʼ, le baʼaloʼobaʼ maʼ kun pʼáataloʼob utiaʼal mantatsʼ. Maʼ xaaneʼ, jeʼel u yoklaʼaleʼ wa jeʼel u kʼastaleʼ (Mateo 6:19). Le Bibliaoʼ ku yaʼaliktoʼon: «Le yóokʼol kaabaʼ táan u bin u xuʼulul yéetel tuláakal le kʼaakʼas tsʼíibolaloʼob yaan tu yóokʼoloʼ; baʼaleʼ le máax ku beetik baʼax u kʼáat Jajal Dioseʼ ku pʼáatal utiaʼal kʼiinoʼob minaʼan u xuul» (1 Juan 2:16, 17). Jéeobaeʼ maʼ kun kíimil mix bikʼin mix le máaxoʼob yaabiltikoʼ yéetel meyajtikoʼ. Le oʼolaleʼ, u maas maʼalobileʼ ka k-yaabilt Jéeoba yéetel k-éet wíinikil; maʼ unaj k-chʼíikil chéen k-kaxt le ayikʼaliloʼob séeb u tsʼoʼokol tiʼ ku tsʼáaik le yóokʼol kaabaʼ.
18. ¿Bix úuchik u yeʼesik upʼéel nojoch yaabilaj utúul misionera?
18 Le máaxoʼob ku yeʼeskoʼob yaabilaj mantatsʼeʼ ku beetkoʼob u kiʼikiʼtʼantaʼal Jéeoba. Koʼox ilik bix tu beetil Sonia, utúul kiik ku meyaj bey misionerai tu luʼumil Senegaleʼ. Letiʼeʼ ku tsʼáaik kaʼach xook tiʼ Heidi, utúul koʼolel paʼakʼ sida tiʼ tumen u yíicham maʼatech u xook. Ka tsʼoʼok u kíimil u yíichameʼ, Heidieʼ okjaʼanaji. Baʼaleʼ, maʼ xanchaj ka jach kʼojaʼanchajiʼ, ka yanchaj u bisaʼal hospital. Soniaeʼ ku yaʼalik: «Le doctoroʼoboʼ tu yiloʼob u beetkoʼob tuláakal le ku páajtal utiaʼal u kanáantikoʼob, baʼaleʼ tumen maʼ yaʼaboʼobeʼ tu kʼáatoʼob tiʼe múuchʼulil ka áantaʼakoʼob u kanáantoʼoboʼ. Tu kaʼapʼéel áakʼab oksaʼak hospitaloʼ pʼáaten in kanáante, tin jayaj upʼéel baʼal teʼ luʼum utiaʼal in chital tu tséel u cama utiaʼal in kanáantik, áantajnajen utiaʼal u kanáantaʼal tak ka kíimi. Le doctor tsʼáaik tsʼaak tiʼoʼ tu yaʼalajten: “Le nojoch talamil jach yantoʼonoʼ letiʼe u pʼaʼatal le kʼojaʼan tumen u láakʼtsiloʼob ken ojéeltaʼak yaan sida tiʼoʼ. ¿Baʼaxten techeʼ, kex maʼ a láakʼtsilil, mix a wéet luʼumileʼ ka pʼáatal a kanáante?”. Tin waʼalaj tiʼeʼ, Heidieʼ kin wilik bey jach in kiikeʼ, kin wilik bey utúuliliʼ k-taataʼobeʼ, le oʼolal ku jach kiʼimaktal in wóol kaʼach in pʼáatal in kanáante». Kex pʼáat Sonia u kanáant Heidieʼ maʼ tsaʼay mix upʼéel kʼojaʼanil tiʼ.
19. Tumen u tsʼaamaj Dios u leyil le yaabilaj ichil k-puksiʼikʼaloʼ, ¿baʼax unaj k-ilik beetik tuláakal súutukil?
19 Le máaxoʼob meyajtik Jéeobaoʼ yaʼab bix u yeʼeskoʼob chúukaʼan yaabilaj tiʼ u maasil. U kaajal Dios bejlaʼeʼ maʼ kʼaj óoltaʼanoʼob tumen yaan yaʼab leyoʼob nuʼuktik u kuxtaloʼobiʼ. Baʼaxeʼ, tiʼ letiʼobeʼ ku béeytal le baʼax ku yaʼalik Hebreob 8:10: «[Letiʼ] le núuptʼaan [ken] in beet yéetel u kaajil Israel ku tsʼoʼokol u máan le kʼiinoʼoboʼ beyaʼ, ku yaʼalik Yuumtsil: Bíin in tsʼáa in waʼalmaj tʼaanoʼob tu tuukuloʼob, yéetel bíin in tsʼíib tu puksiʼikʼaloʼob. Teneʼ bíin u [Diosintenoʼob] túun, letiʼobeʼ bíin in kaajaltoʼob». Toʼoneʼ, unaj k-ilik jach nojoch u leyil le yaabilaj u tsʼíibtmaj Jéeoba t-puksiʼikʼaloʼ yéetel unaj k-ilik eʼesik ichil k-kuxtal tuláakal súutukil.
20. ¿Baʼaxten u ley Cristoeʼ jach nojoch u tojol?
20 ¡Jach ku taasiktoʼon kiʼimak óolal k-meyajtik Dios yéetel uláakʼ máakoʼob tiʼ tuláakal yóokʼol kaab ku yeʼeskoʼob upʼéel yaabilaj jach nojoch! Le máaxoʼob yaan u ley Cristo tu puksiʼikʼaloʼoboʼ yantiʼob upʼéel baʼal jach koʼoj u tojol mix baʼal u taasaʼal tumen le yóokʼol kaab maʼatech u yeʼesik yaabilajoʼ. Maʼ chéen Jéeoba yaabiltmailoʼobiʼ, tak tu baatsiloʼob u yaabiltmubaʼob kex tiʼ tuláakal yóokʼol kaab u taaloʼob. «Il a wileʼex bukaʼaj maʼalobil yéetel jatsʼutsil ka múuchʼ kajlak sukuʼuntsiloʼob bey juntúuliliʼobeʼ». Kex tumen u j-jaajkunajoʼob Jéeoba kuxaʼanoʼob ich jejeláas luʼumiloʼob, jejeláas tʼaaniloʼob ku tʼankoʼob yéetel jejeláas bix suukaʼanil u kuxtaloʼobeʼ, upʼéeliliʼ bix u meyajkoʼob Jéeoba, le baʼax ku beetkoʼobaʼ ku beetik u kʼaʼamloʼob tumen Jéeoba. Jeʼex tu tsʼíibtil le salmistaoʼ: «Teʼeloʼ [ichil upʼéel kaaj jumpʼéelilikunsaʼan tumen le yaabilajoʼ] yuumtsileʼ ku túuxtik u kiʼikiʼ tʼaanil jumpʼéel chowak kuxtal» (Salmo 133:1-3).
¿Baʼax jeʼel a núukikeʼ?
• ¿Baʼaxten jach kʼaʼanantakoʼob kaʼach le Diez Leyoʼoboʼ?
• ¿Baʼax le ley tsʼíibtaʼan tu puksiʼikʼal máakoʼ?
• ¿Baʼax ku péekskoʼon k-beet u ley Cristo?
• ¿Bix jeʼel k-eʼesik k-yaabiltmaj Dios yéetel k-éet wíinikiloʼobeʼ?
[U kʼáatchiʼiloʼob le xookoʼ]
[U tsolajil le oochel teʼ táan juʼun 15]
Tiʼ le israelitaʼob kaʼachoʼ tsʼaʼab leyoʼob tsʼíibtaʼanoʼob tiʼ jajay tuunchoʼob
[U tsolajil le oochel teʼ táan juʼun 16]
Tiʼ le cristianoʼoboʼ tsʼaʼan u ley Dios tu puksiʼikʼaloʼob
[U tsolajil le oochel teʼ táan juʼun 18]
Sonia yéetel utúul chan x-chʼúupal tiʼ Senegal, tiʼ upʼéel noj muchʼtáambal óoxpʼéel kʼiin tu jaʼabil 2004